Izaias
51 “Nitivontponn melloun gheuncho proitn kortoleamno,
Jehovak sodhtoleamno, mhojem aikat.
Tumkam jea khoddpa thaun katrun kaddleat, tea khoddpak polloiat.
Tumkam jea khonnintlean khonnun kaddleat, tea khonnik polloiat.
2 Tumcho bapui Abrahamak polloiat,
Ani tumkam zolm dilo* tea Sarak polloiat.
Hanvem taka apoilo tednam to ekloch aslo,
Magir hanvem taka besanv dilem ani tachi sonsot mezunk zaina titli keli.
3 Jehova Sionak bhuzvonn ditolo.
Tache sogle padd zaun gelʼle zage porot bandun kaddttolo,*
To tacho ranvott vattar Edena sarkem kortolo,
Ani tachem oronnʼnnem Jehovachea bage sarko kortolo.
Sion sontosbhorit zatolem ani thoim khuxalkai monoitolem,
Upkariponnacho ani sobit gitancho avaz thoim aikonk ietolo.
4 Mhojea lokamno, mhojer dhean diat,
Mhojea raxttra, hanv sangtam taka kan di,
Karonn mhojea thaun ek kaido bhair sortolo,
Ani veg-vegllea desantlea lokank uzvadd mellcho mhunn hanv mhozo neai stapon kortolom.
5 Mhojem nitivontponn lagim ieta.
Mhojea thaun tumkam taronn mellchem asa,
Hanv mhojea hatachea xokten veg-vegllea desantlea lokanchi zhoddtti kortolom.
Zunve mhojer bhorvonso dovortole,
Ani tea vellachi vatt polloitole jednam hanv mhoji xokti dakhoitolom.*
6 Tumche dolle voir ubarun mollbak polloiat,
Ani tumchi nodor sokol prithumecher marat.
Karonn dhunvra bhaxen mollob nanch zatolem,
Prithum pornea kopddea bhaxen zhoron voitoli,
Ani tantunt ravpi, musam* bhaxen moron voitole.
Punn hanv ditam tem taronn sodankal urtolem,
Ani mhojea nitivontponnacho kednanch xevott zaunchona.
7 Nitivontponnachi vollokh aslolea lokamno,
Mhozo kaido* kallzant aslolea lokamno, mhojem aikat.
Morta toslea munxanche tomnne aikon bhienakat.
Ani te kortat tea opmanak lagon koddkoddonakat.
8 Karonn kidd* tankam kopddo koso khaun uddoitoli,
Kopddeank lagta tosli kidd tankam vul* zalʼlea porim khaun uddoitoli.
Punn mhojem nitivontponn sodankal urtolem,
Ani hanv dita tem taronn pillgean-pillge poriant urtolem.”
9 Utth! Jehovachea hata, utth!
Zoso tum khub poilim, adlea kallar utthlolo,
Toso utth, ani tujem boll dakhoi!
Zannem Rahabache* kuddkean-kuddke korun uddoilʼle,
Ani doriant ravpi tea vhoddlea pranneak toplolo, to tunch nhoi kai?
10 Doriak, khol doriak sukoilʼlo to tunch nhoi kai?
Soddoilʼlea lokank par korunk mellchem mhunn, tunvench doriachea kholaient rosto korunk naslo kai?
11 Jehovan zankam soddoileat, te porot ietole.
Te khuxalkaien bob marit Sionant ietole,
Kednanch kabar zaunchina tosli khuxalkai tanchea toklecho mukutt zatolo.
Te itle anondan ani sontosan bhortole,
Ki dukh ani roddnnem tanchea thaun pollon voitolem.
12 “Tuka bhuzvonn diupi hanvuch.
Tor ek-na-ek dis mortoloch toslea munxak, tum kiteak bhieta?
Hirvea tonna bhaxen sukon voita toslea munxachea putak, tum kiteak bhieta?
13 Mollob posrailam ani prithumechi buniad ghatlea,
Tea Jehovak, tujea Rochnnarak* tum kiteak visorlo?
Zulum korpi tuzo nas korun uddounk toiar aslolea bhaxen,
Tum tachea ragak lagon dis-bhor bhielʼlo kiteak asta?
Zulum kortoleacho to rag atam khoim gelo?
14 Sanklleank lagon zo bagovla, taka beginuch suttka mellttoli.
To morchona vo fonddant voichona,
Toxench, taka unddo unno zaunchona.
15 Punn hanv tuzo Dev Jehova,
Hanv doriak arto-porto korun uddoitam ani tachim lharam uchamboll kortam.
Fouzancho Dev Jehova, hench mhojem nanv.
16 Mollob thir korunk ani prithumechi buniad ghalunk,
‘Tumi mhoje lok,’ oxem Sionak mhunnonk,
Hanv mhozo sondex tujea tonddant ghaltolom,
Ani mhojea hatachea savllent tuka lipoitolom.
17 Utth! Jeruzalema utth! Utthon ubem rav!
Tum Jehovachea hatantlean tachea ragachem kop pielem.
Drakxeanchea soreacho pelo* pielem,
Lokonk lagta tea meren tum pielem, ek thembo pasun soddunk na.
18 Jitlea putank tannem zolmak haddle, tantuntlea konnench taka vatt dakhounk na,
Jitlea putank tannem vaddoile, tantuntlea konnench tachea hatak dhorunk na.
19 Tujer him don odruxttam aileant:
Nas ani nisontton, bhuk ani tolvar!
Konn tuka somzon ghetolo?
Konn tuka bhuzvonn ditolo?
20 Tuje put ghunvoll ieun poddleat.
Ranvotti menddram zallant sampoddttat toxim,
Te dor eka rosteachea nakear poddleat.
Jehovacho krodh tancher purnn toren aila, tankam Deva koddlean boreoch tapounneo mellʼlleat.”
21 Tor dukhi aslole baile, aik!
Tum ttaitt zalea, punn drakxancho soro pieun nhoi.
22 Tuzo Dhoni Jehova, aplea lokanchea vatten uloita to Dev oxem mhunntta:
“Polloi! Tum jem kop pieun loktalem tem kop hanv tujea hatantlean ghetolom.
To pelo, mhojea ragachem kop,
Tum porot kednanch pieunchem na.
23 Tuka tollmollaita tanchea hatant hanv tem ditolom,
Zannim tuka mhunnttlem, ‘Ami tujer paim dovrun cholchem mhunn zomnir add podd.’
Tor tunvem tuji fatt zomni sarki keli,
Tankam cholonk rostea sarki keli.”