Izaias
57 Nitivont munis nanch zala,
Punn konnankuch tachem poddlolem na.
Visvaxi munxank gheun geleat,*
Punn odruxttak lagon*
Nitivont munxak gheun gela mhunn konnuch somzona.
2 Atam taka xanti mellʼllea.
Je konn nitt margan choltat, te aplea khatticher* visov ghetat.
3 “Punn tumi, jadu-ttona korpi bailechea putamno,
Pordvar korpi dadleachea ani xindollki korpi bailechea bhurgeamno,
Hanga ieiat!
4 Tumi konnanchim fokannam kortat?
Tondd ugddun tumi konnank jib dakhoitat?
Tumi patkeanchim bhurgim nhoi kai?
Fottkireanchi sonsot nhoi kai?
5 Vhoddlea-vhoddlea zhaddam ponda,
Dor eka hirvea rukha ponda, kuddicheo itsa vaddoitat te tuminch nhoi kai?
Falkeamnim* ani tollpachea khanchimnim
Bhurgeanchem bolidan bhettoitat, te tuminch nhoi kai?
6 Tunvem* falkeantle* sullsullit fator vinchun kaddleat.
Hoi, tech tuzo vantto.
Tum tankam soreachi bhett ani her dennim pasun bhettoita.
Hem soglem polloun hanvem dhadoxi zaunchem kai?*
7 Tunvem eka vhoddlea ani unch dongracher tuji khatt toiar keli,
Ani thoim tum bolidan bhettounk geli.
8 Darachea fattlean ani darvontteacher tunvem aplea devanchi khunna kaddli.
Tunvem mhaka soddlo ani tuje kopdde kaddle.
Tum voir geli ani tujea khattir anik zago kelo.
Ani tunvem tanchea sangata korar kelo.
Tanchea sangata nhidonk tuka avoddlem,
Ani tunvem dadleachem vinglleponn polloilem.*
Tunvem tujea sondexkarank pois-pois dhaddle,
Hea vorvim tum sokol Fonddant* geli.
10 Tum tujea zaitea rosteancher cholon-cholon thoklea,
Tori astana tum oxem mhunnona, ‘Hem soglem kainch faideachem na!’
Tuka novean ghottai mellʼllea.
Taka lagon tum soddun dina.*
11 Tum konnank bhieun ani ghabrun
Fott marunk lagli?
Tum mhaka visron geli.
Tunvem mhojea khoincheach vostucher dhean diunk na.
Hanv vogi ravon tujim kortubam soxit ravonk na kai?*
Taka lagon, tunvem mhoji bhirant dhorop soddun dili.
12 Tujea ‘nitivontponnacho’ ani tujea kamacho tuka kainch faido zaunchona,
Karonn tem hanv ukteponnim dakhoitolom.
13 Tum modot magonk ulo martoli tednam,
Jeo murteo tunvem ektthaim kelʼleo teo tuka vanchounk xokcheonant.
Tankam sogleank varem uboun vhortolem,
Ekach funken teo uddon voitoleo,
Punn zo mhojea sovem asro gheta, takach ho des daiz mhunn mellttolo,
Ani to mhojea povitr dongrak aplea tabeant ghetolo.
14 Tednam konn tori oxem mhunnttolo, ‘Bandat, ek rosto bandat! Vatt toiar korat!
Mhojea lokanchea vatter asloli dor ek addkholl kaddun uddoiat.’”
15 Karonn zo Vorto ani Unch asa,
Zo sodankal jivo asta ani zachem nanv povitr asa, to oxem mhunntta:
“Hanv eka unch ani povitr zagear ravtam,
Punn dukhovlolea ani lhanvikam sangata pasun hanv ravtam,
Lhanvikancho dhir vaddouncho,
Ani dukhovloleank novean jiv haddcho mhunn hanv tanchea sangata ravtam.
16 Hanv sodankal tancho virodh korchom na,
Vo hanv sodankal rag dhorun ravchom na.
Karonn hanvem oxem kelem zalear dor ek munis,*
Hanvem rochlolo dor ek pranni pasun oskot zatolo.
17 Izrael patok korta tem polloun, to fottingponnanchi zodd ektthaim korta tem polloun mhozo rag pettlo,
Tor hanvem taka marlo ani ragan mhojem tondd dusrea vatten kelem.
Tori astana, to mhojea add vochot ravlo ani apleak zai tem korit ravlo.
18 Hanvem tachi vagnnuk polloilea,
Punn hanv taka boro kortolom ani taka vatt dakhoitolom,
Taka ani tachea dukh kortolea lokank hanv bhuzvonn ditolom.”
19 Jehova mhunntta, “Hanv vonttanchem foll rochtam.
Pois, toxench lagim asloleak hanv xanti di-it ravtolom,
Ani hanv taka boro kortolom.”
20 “Punn noxtte lok uchamboll zalʼlea doria bhaxen asat, zo xant zaina,
Ani zachea udkak lagon, doriantlim zhaddam ani chikol hanga-thoim xevttotat.
21 Noxtteank kednanch xanti mellona,” oso mhozo Dev mhunntta.