Tesalonikekarank Dusri Chitt
3 Bhav-bhoinnimno, xevottak hanv tumkam itlench sangtam ki Jehovachem* utor vhodd promannan ximpddot vochom, ani tumchea modem taka mhoima mellot asa toxi mhoima mellot ravom mhunn amchea pasot magnnem korit ravat. 2 Vaitt ani noxttea lokam thaun amkam salvar korche mhunn pasun amchea pasot magnnem korat. Karonn sogleach lokank bhavarth asta oxem nhoi. 3 Punn Somi visvaxi, ani to tumkam ghott kortolo ani noxttea* thaun rakhtolo. 4 Ami Somiache pattlavdar zalolean tumkam dileat teo suchounneo tumi pallttat ani fuddem-i pallit ravtolim mhunn amkam khatri asa. 5 Tumi Devacho mog korcho ani Krista pasot thir ravchim mhunn Somian tumchea kallzank margdorxon di-it ravom, oxem ami magnnem kortat.
6 Bhav-bhoinnimno, manddavolli pormonnem cholonant ani ami tumkam* dilʼlea xikounne pormonnem* cholonant tea dor eka bhava ani bhoinni thaun pois ravat mhunn Somi Jezu Kristachea nanvan, ami tumkam suchounneo ditat. 7 Amchi dekh gheun koxem cholchem tem tumkam khobor asa, karonn ami tumchea modem astana manddavollin cholʼleat. 8 Toxench ami konnanchench funkott* khaunk na. Tachea bodlek, tumchea modlea konnacheruch vojem zaunchem nhoi mhunn ami dis ani rat khub vavr kortale ani gam golloun koxtt kortale. 9 Amkam odhikar na oxem nhoi, punn tumi dekh gheunk xoktat toslem ek udharonn ami tumchea pasot dovrunk sodhtale. 10 Khorem mhunnttlear, ami tumchea sangata asle tednam, ami tumkam ho hukum dilʼlo: “Konnankui kam korunk naka zalear, tannem jevchem-i nhoi.” 11 Tumchea modle thodde lok manddavollin cholonant mhunn ami aikolam. Te kainch kam korinant, punn goroz nastana dusreanchea kamant meter zatat. 12 Oslea lokamnim xantin aplem kam korchem ani apnnem zhoddun khaunchem mhunn Somi Jezu Kristachea nanvan ami tankam hukum ani solʼlo ditat.
13 Bhav-bhoinnimno, tumi mat borem kam korop soddun dium nakat. 14 Punn ami hea chittint boroileat teo vostu konnui pallina zalear, oslea munxacher nodor dovrat* ani tachea sangata vell sarop bond korat. Hea toren taka loz bhogtoli. 15 Tori astana, taka tumcho dusman koso lekhinakat, punn taka ek bhav koso somzait ravat.
16 Atam xantecho Somi tumkam sogle toren xanti di-it ravom. Somi tumchea sogleam sangata asom.
17 Hanv Paulu, mhojea hatamnim tumkam nomoskar boroitam. Chitt boroilea to hanvuch mhunn tumkam kollonk hanv sodanch mhojea soglea chittimnim oxem boroitam.
18 Amcho Somi Jezu Kristachi favo nasloli doia tumcher sogleancher asom.