Izaias
44 “Jakoba, mhojea sevoka,
Izraela, mhojea vinchun kaddlolea, aik!
2 Tuzo Rochpi,* zannem tuka ghoddla,
Zo tum kusveant aslo tednam thaun tuka* modot korit asa,
To Jehova oxem mhunntta:
‘Jakoba, mhojea sevoka,
Ani tum Jeshurun,* zaka hanvem vinchun kaddla, bhienaka.
3 Karonn hanv tanelʼleak udok ditolom,*
Ani sukea zomnir vhall vhanvoitolom.
Hanv tujea sonsticher* mhoji povitr xokti votoitolom,
Ani tujea pillgencher besanvam ghaltolom.
4 Te hirvea tonnam bhaxen busbuxit vaddttole,
Vhanvtea udkachea deger lailʼlea zhaddam* bhaxen vaddttole.
5 Eklo mhunnttolo: “Hanv Jehovachom.”
Tor anik eklo aplem nanv Jakob dovortolo,
Anik konn eklo aplea hatar boroitolo: “Hanv Jehovachom.”
Tor anik konn eklo Izraelachem nanv apnnaitolo.’
6 Jehova zo Izraelacho Raza ani tacho Soddoupi zaun asa,
Jehova zo fouzancho Dev zaun asa, to mhunntta:
‘Hanv poilom ani nimannom.
Mhojea bhair anik konn Dev na.
7 Mhojea sarko konn asa?
Konnui asa zalear tannem sangchem, ani mhaka purave diunche!
Hanvem mhojea lokank ostitvant haddle tednam thaun hanv jem korit asam tem tannem korun dakhounchem.
To osleo vostu sangonk xoktolo kai, jeo rokddeoch ghoddcheo asat,
Ani jeo fuddarak ghoddpacheo asat?
8 Tumi bhienakat,
Ani bhirantin koddkoddo nakat.
Hanvem poilinch thaun tumkam sangonk naslem kai, tumchea modlea dor ekleak kollounk naslem kai?
Tumi mhoje sakxi.
Mhojea bhair anik Dev asa kai?
Na, mhojea bhair dusrem Khoddop na. Oso konnui asa mhunn mhaka khobor na.’”
9 Kantoilʼleo murteo kortat te kainch kamache nant,
Ani tankam avoddttat teo murteo kainch faideacheo nant.
Sakxi ason pasun teo* kainch pollounk xokonant ani somzonk xokonant,
Taka lagon, heo murteo kortoleank loz bhogchi poddttoli.
10 Oso konn asa zaka hatamnim kelʼlea deva thaun,
Vo dhatuchea murteam* thaun koslo-i faido zala?
11 Polloi! Tache sogle sangati lojek sampoddttole!
Murteo kortat te tor munis zaun asat.
Tannim sogleamnim ektthaim ieun fuddem ieunchem,
Te sogle thorthortole ani lojent poddttole.
12 Dhatuchem kam korpi* aplem sadhon uzar korun lokhonn kaddun inglleancher dovorta.
Aplea bollvont hatamnim tacher hatoddi marta,
Ani taka akar dita.
Kam kortam-kortam taka bhuk lagta ani taka samkem puro zata,
To udok piena dekhun to khub thokta.
13 Mezpache dorien thovoi lakudd mezta, tambddo khoddu* gheun tacher akar kaddtta.
Uprant, taspachem sadhon gheun tacher kam korta ani kompas gheun tacher akar kaddtta.
14 Cedar* zhaddam katorpi,
Ghoddie ek khas torechem zhadd vinchun kaddtta, tem mhunnttlear oak,*
Ani ranantlea dusream zhaddam borabor to taka vaddonk dita.
Vo ghoddie to anik eke torechem zhadd* laita, jem pausachea udkant vaddot voita.
15 Magir to tea zhaddachim lakddam zollvak vapurta.
To tantuntlim thoddim lakddam xekonk uzar korta.
Uprant to chul pettoita ani unddo bhazta.
Punn tacho to ek dev pasun toiar korta ani tachi bhokti korta.
Toxench, to tachi ek murti kantoita ani tika paim-am poddtta.
16 Zhaddachem ordem lakudd uzar korun to uzo pettoita,
Tacher to mas bhazta ani tem khaun dhadoxi zata.
To tea ujeachi ub gheta ani mhunntta:
“Ah! Kitli bori gormi melltta.”
17 Urlolea lakddacho to ek dev korta, ek kantoilʼli murti korta.
Tichea paim-am poddon tichi bhokti korta.
Ani tichea lagim magnnem korun mhunntta:
“Mhaka salvar kor, karonn tunch mhozo dev.”
18 Oslea lokank kainch khobor na, te kainch somzonant,
Karonn tanche dolle bond asat, te kainch pollounk xokonant,
Ani tankam* kholaiechi somjikai na.
19 Konnuch aplea kallzant chintina,
Vo konnank itlem ginean vo somjikai na, ki to mhunnttolo:
“Ordem lakudd hanvem zolloilem,
Tachea inglleancher unddo bhazlo ani khaunk mas bhazlem.
Atam urlolea kuddkea thaun hanv vitt haddtta tosli vost korum kai?
Zhaddachea hea lakddachea kuddkeachi* bhokti korum kai?”
20 To gobor khaun aplem pott bhorta.
Tachem kalliz fosovlam ani tem taka chukichea margar vhorta.
To apleakuch salvar korunk xokona, toxench to oxem-i mhunnona:
“Mhojea uzvea hatan asloli hi vost kainch valorachi na.”*
21 “Jakoba, Izraela, hanvem sangloleo heo vostu ugddas dovor,
Karonn tum mhozo sevok.
Hanvem tuka rochla, ani tum mhozo sevok.
Izraela, hanv tuka visorchom na.
22 Hanv tuje oprad eka kupan,
Ani tujim patkam eka datt kupan pusun kaddttolom.
Mhoje lagim porot ieo, karonn hanv tuka soddoitolom.
23 Mollba, khuxalkaien bob mar!
Karonn Jehovan panvl ghetlam.
Prithumechea khol zageamno, vhoddlean bob marat!
Dongramno, ranamno ani tumchea soglea zhaddamno,
Sontosbhorit zaiat!
Karonn Jehovan Jakobak soddoila,
Ani to Izraela udexim apli mhoima dakhoita.”
24 Jehova zo tuzo Soddoupi zaun asa,
Tum kusveant aslo tednam thaun zannem tuka ghoddla, to mhunntta:
Tea vellar mhojea sangata konn aslo?
25 Polkeo vostu uloitoleancheo* khunna khotteo mhunn hanv dakhoun ditolom,
Ani fuddar parkhupeank pixeam bhaxen korun uddoitolom.
Hanv zannarank ghuspaun uddoitolom,
Ani tanchea gineanak pixeponnant bodoltolom.
26 Hanv mhojea sevokachem utor khorem korun dakhoitolom,
Ani mhojea sondexkarancheo bhasaunneo purnn korun dakhoitolom.
Hanv Jeruzalema vixim mhunnttam, ‘Tantunt lok ravtole,’
Judachea xaram vixim mhunnttam, ‘Hanv tankam porot ubim kortolom,
Ani Jeruzalemache padd zaun gelʼle zage porot bandun kaddttolom.’
27 Hanv khol udkank mhunnttam, ‘Vaf zaun voir vochat,
Ani hanv tujea soglea nhoim-ank sukoitolom.’
28 Hanv Sirusa vixim mhunnttam, ‘To mhozo gonvlli,
Ani to mhojeo sogleo khuxeo purnn kortolo.’
Jeruzalem xara vixim hanv mhunnttam, ‘Taka porot bandun kaddttole,’
Ani Devmondira vixim mhunnttam, ‘Tuji buniad ghaltole.’”