Izaias
60 “Baile utth! Utthon uzvadd fankoi, karonn tuzo uzvadd aila.
Jehovachea mhoimecho uzvadd tujer fankta.
2 Karonn polloi! Prithumer kallokh poddcho asa,
Raxttrancher datt kallokh poddcho asa.
Punn Jehova tujer uzvadd fankoitolo,
Ani tachi mhoima tujer dison ietoli.
3 Raxttram tujea uzvadda koddem ietolim,
Ani raza tujea porzollttolea sobitkaie koddem* ietole.
4 Dolle ubarun tujea sorvbhonvtonnim polloi!
Te sogle ektthaim zaleat ani tujea lagim ietat.
Tuje put pois-pois thaun ietat,
Tujea dhuvank handdir marun haddttat.
5 Tea vellar, tum hem polloitolem ani tujem tondd porzollttolem,
Tujem kalliz khuxalkaien dhodd-dhoddttolem ani bhoron votʼtolem,
Karonn doriantli girestkai tujea lagim lotton ietoli,
Raxttranchem bhanddar tujea lagim ietolem.
6 Tuzo des* unttanchea zomeamnim bhortolo,
Hoi, Midian ani Efantlea tornnattea unttamnim bhortolo.
Shebantle sogle lok ietole,
Te aplea sangata bhangar ani dhovo dhump gheun ietole.
Te Jehovachi vakhannʼnni kortole.
7 Kedarantlea soglea hinddank ektthaim korun tujea lagim haddttole.
Nebaiothache menddre tuji seva kortole.
Hanv tankam mhojea vedicher bolidan mhunn manun ghetolom,
Ani hanv mhojea mhoimebhorit* ghorachi sobitkai vaddoitolom.
8 He konn, je kupam sarke uddot ietat?
He konn, je parveam sarke aplea ghontteramnim* ietat?
9 Zunve mhojer bhorvonso dovortole.
Tarshishachim tarvam sogleant fuddem asat,*
Te tujea putank pois thaun gheun ietat,
Tanchi chandi ani bhangar pasun sangata gheun ietat,
Tuzo Dev Jehovachea nanvachi ani Izraelachea Povitr Devachi vakhannʼnni korunk te ietat.
Karonn to tuka mhoimevont* kortolo.
10 Pordexi tujeo vontti bandtole,
Tanche raza tuji seva kortole,
Hanvem ragan bhoron tuka marlolo,
Punn atam hanv doia dakhoun tuji kakut kortolom.
11 Raxttrantli girestkai tujea lagim haddunk,
Tuje darvontte sodanch ukte astole,
Dis zaum vo rat, te kednanch bond aschenant.
Ani oxem korunk tanche raza sogleant fuddem astole.
12 Tuji seva korina tem khoinchem-i raxttr ani raj kabar zaun voitolem,
Ani tea raxttrancho purnn toren nas zatolo.
13 Juniper* zhadd, ash* zhadd ani cypress* zhadd,
Hoi, Lebanonachi mhoima tujea lagim ietoli,
Jea vorvim mhojea povitr zageachi sobitkai vaddttoli.
Ani hanv mhozo paim dovorpacho zago mhoimen bhortolom.
14 Zannim tuka sotailolo, tanche put ieun tujea mukhar man bagoitole.
Tuzo opman korpi sogle tujea paim-am poddttole,
Tum Jehovachem xar,
Izraelachea Povitr Devachem Sion, oxem tankam mhunnchem poddttolem.
15 Tuka soddun dilam, tuzo dves kela ani tujea modlean konnuch vochona,
Tuka sodankal man melltta toso hanv tuka kortolom,
Pillgean-pillgi poriant tum khuxalkaiechem karonn zatolem.
16 Tum raxttranchem dudh pietolem,
Razanchem horddem* chokhtolem.
Ani tuka kollon ietolem ki hanv Jehova, tuzo Salvar Korpi zaun asa,
Ani Jakobacho Xoktivont Dev, tuzo Soddoupi zaun asa.
17 Hanv tambeachea bodlek bhangar haddttolom,
Lokhnnachea bodlek chandi haddttolom,
Lakddachea bodlek tambem haddttolom,
Ani fatrachea bodlek lokhonn haddttolom.
Hanv xantik, tujer dekhrekh korunk nemtolom,
Ani nitivontponnak, tuka kamam nemun diupi mhunn nemtolom.
18 Tujea desant porot kednanch maramari aschina,
Vo tujea xime bhitor nas ani nisontton zaunchem na.
Tum tujea vonttinchem nanv Taronn ani tujea darvontteanchem nanv Vakhannʼnni dovortolem.
19 Hea fuddem, disachea uzvadda pasot tuka suriachi,
Ani ratchea uzvadda pasot tuka chondrimachi goroz poddchina,
Karonn Jehova tuzo sasnacho uzvadd zatolo,
Ani tuzo Dev tuji sobitkai zatolo.
20 Hea fuddem, tuzo suria kednanch buddchona,
Toxench tujea chondrimacho uzvadd unno zaunchona.
Karonn Jehova tuzo sasnacho uzvadd zatolo,
Ani tuje dukh korche dis kabar zatole.
21 Tuje sogle lok nitivont astole,
Te sodankal hea desant ravtole.
Mhoji mhoima zaunchi mhunn, te hanvem roilʼli kombri zaun asat,
Ani mhojea hatanchem kam zaun asat.
22 Zo sogleant lhan asa, to ek hozar zatolo,
Ani zo sogleant dhaktto asa, to ek xoktivont raxttr zatolo.
Hanv Jehova, sarkea vellar hem rokddench ghoddoun haddttolom.”