Zefania
1 Jehovacho* sondex Zefania* lagim pavlo. To Kushi mhunnttat tacho put aslo, Kushi Gedaliacho put aslo, Gedalia Amariacho put aslo ani Amaria Hezekiacho put aslo. Amonacho put Josia Judacho raza aslo tea disamnim, Zefaniak ho sondex mellʼllo:
2 “Hanv prithumer asa tem soglem zhaddun uddoitolom,” oxem Jehova mhunntta.
3 “Hanv munxank ani zonvarank kabar korun uddoitolom.
Mollba voilea suknneank ani doriantlea nusteank nanch kortolom,
Addkholl ghaltat toslea fatrank* toxench noxtteank kabar kortolom,
Hanv prithume voilea soglea munxank kaddun uddoitolom,” oxem Jehova mhunntta.
4 “Hanv Judachea add
Ani Jeruzalemant ravtolea sogleam add mhozo hat ubartolom,
Hea zagear Baalachem jem kitem urlam tem soglem hanv nas korun uddoitolom,
Porkea devanchea pujaream sangata hanv iadnikanchim-i nanvam pusun kaddttolom,
5 Je ghoracher voir vochon mollba voilea foujek man bagoitat,
Je Jehovak man bagoitat ani taka visvaxi ravtole mhunn soput ditat,
Punn teach borabor, Malkamak pasun visvaxi ravtole mhunn soput ditat,
6 Je Jehovachea fattlean vochop soddun ditat
Ani je Jehovak sodhinant vo tacho solʼlo ghenant, tancho sogleancho nas zatolo.”
7 Akʼkhea Vixvacho Dhoni Jehova mukhar vogi ravat, karonn Jehovacho dis lagim asa.
Jehovan ek bolidan toiar kelam. Tannem zankam apoileat tankam tannem povitr* keleat.
8 “Jehovachea bolidanachea disa, hanv kunvram koddlean,
Razachea putam koddlean, ani tea sogleam koddlean hixob ghetolom, je pordexi lokam bhaxen nhestat.
9 Je manchier* choddttat, je aplea dhoniachem ghor maramari ani fosounnen bhortat,
Tea sogleam koddlean hanv tea disa hixob ghetolom.”
10 Jehova mhunntta, “Tea disa
Nusteachea Darvonttea koddlean vhoddlean bob marta to avaz aikonk ietolo,
Xarachea Novea Bhagantlean roddnneacho avaz ietolo,
Ani porvotam voilean vhoddlo avaz aikonk ietolo.
11 Makteshant* ravtoleamno, vhoddlean bob marun roddat,
Karonn soglea veapar-dhondo kortoleancho nas zalo,*
Chandi mapun ditale tanchem sogleanchem nisontton zalem.
12 Tea vellar, hanv dive gheun Jeruzalemachea soglea konnxeamnim sodhtolom,
Zankam kainch poddlolem na ani je aplea kallzant chintʼtat,
‘Jehova borem-i korchona ani vaittui korchona,’ tea sogleam koddlean hanv hixob ghetolom.
13 Tanchi girestkai luttʼttole ani tanchim ghoram samkim kabar korun uddoitole.
Te ghoram bandtole, punn tantunt ravonk pavchenant,
Te drakxanche molle laitole, punn tanchea drakxancho soro pieunk pavchenant.
14 Jehovacho vhoddlo dis lagim asa!
To lagim asa ani khub begin ieta!
Jehovachea disacho avaz bhirankull* asa.
Tea disa, zhuzari vhoddlean bob marta.
15 To krodhacho dis,
To akantacho ani uskeancho dis,
To vadollacho ani nisonttonacho dis,
To khub kallkhacho dis,
To kupancho ani kallea-kitt kallkhacho dis,
16 Kilʼleanchea xaramnim ani konnxeachea unch gopuram add,
Xing vazouncho ani zhuzacho bovall korcho dis.
17 Hanv akʼkhea munxakullacher akant haddttolom,
Ani te kuddʼddeam bhaxen choltole,
Karonn tannim Jehova add patok kelam.
Tanchem rogot dhulʼli bhaxen
Ani tanchim moddim xenna bhaxen poddlolim astolim.
18 Jehovachea krodhachea disa tanchi chandi vo tanchem bhangar tankam salvar korunk xokchem na.
Mhoje zolltte urben akʼkhi prithum lason voitoli,
Karonn hanv prithumer ravtolea sogleank kabar korun uddoitolom, hoi, bhirankull toren tancho nas kortolom.”