Izaias
32 Polloi! Raza nitivontponnan raz kortolo,
Ani kunvor neai-an odhikar choloitole.
2 Dor eklo, varem suttʼtta tednam lipʼpachea zagea bhaxen zatolo,
Vadollachea pausan asro koso zatolo,
Udok naslolea vattarant udkachea vhalla bhaxen zatolo,
Sukea vattarant eka vhoddlea khoddpache savlle bhaxen zatolo.
3 Tednam polloitoleanche dolle porot kednanch bond zaunchenant,
Ani aikotoleanche kan dhean diun aikotole.
4 Utavollai kortoleachem mon, gineanachea vostuncher bariksannen niall kortolem,
Ani uloita astana addkholltta ti jib suddsuddit ani spoxtt toren uloitoli.
5 Hea fuddem ginean nasloleak porot kednanch udar kallzacho oxem mhunnchenant,
Ani zo totvam pormonnem cholona taka manadik mhunnchenant.
6 Karonn ginean naslolo kaiche-kai uloita,
Ani dusreank Jehovachea add korunk,*
To aplea monant ievzonneo korta.
Ani bhukelʼlo upaxim uronk ani tanelʼlo tanen uronk,
To tachea vixim fotti sangta.
7 Zo munis totvam pormonnem cholona tachim kamam khub vaitt astat.
To lojechim kamam korunk urba dita,
Fott uloun to dukhi asloleank kabar korun uddoita,
Sot sangta tea goribak pasun to toxem korta.
8 Punn udar kallzacho munis udarponnan diunk sodhta,
Ani to udar kallzan di-it ravta.*
9 “Kainch poddon vochonk naslolea bailamno, utthat ani mhojem aikat!
Koslich porva naslolea dhuvamno, hanv kitem sangtam tacher dhean diat!
10 Tumi, zankam aiz kainch poddon gelʼlem na, tim eka vorsa uprant koddkoddttolim,
Karonn drakxam kaddpachem kam kabar zatolem, punn tumkam kainch mellchem na.
11 Kainch poddon vochonk naslolea bailamno, bhirantin koddkoddat!
Koslich porva naslolea dhuvamno, thorthorat!
Tumche kopdde kaddat,
Ani bhenddak sak bandat.
12 Tumchim horddim boddoun dukh korat,
Khub pik ditolea xeta pasot ani follam ditolea drakxanchea mollea pasot dukh korat.
13 Karonn mhojea lokanchi zomin kantteamnim ani kantteanchea jhilkuttamnim bhortoli,
Jea ghoramnim khuxalkai monoitale,
Hoi, tea khuxalkaiechea xarant tim posortolim.
14 Karonn tache vhoddle gopur soddun dileat,
Lokamnim bhorlolem xar ritem asa.
Ofel ani pahro korpacho gopur* sasnak lagon osadd poddla,
Tem ranvotti gaddvancho moja korpacho zago zala,
Ani hinddam pasot chorvachem moll zalam.
15 Voir thaun Dev amcher apli povitr xokti votoum poriant,
Ranvott vattar follanchi bag zai poriant,
Ani follanchi bag hirvea rana sarki zai poriant oxem zatolem.
16 Tednam tea ranvott vattarant neai vosti kortolo,
Ani tea follanche bagent nitivontponn thikann kortolem.
17 Khorea nitivontponnak lagon sogleak xanti astoli,
Khorea nitivontponnak lagon kednanch kabar zaina tosli xant poristhiti ani surokxa astoli.
18 Mhoje lok oslea zagear ravtole, zoim xanti astoli,
Hoi, oslea zagear zoim te xant poristhitint ani surokxotaien astole.
19 Punn korveanchea pausan ranacho nas zatolo,
Ani xarachem nisontton zatolem.
20 Udok asa thoim bim vomptoleamno,
Aplo boil ani gaddum ukte soddttoleamno,* tumi khuxal!”