Izaias
33 Are nas korpea, tum, zacho nas zaunk na,
Are visvasghatkea, tum, zacho visvasghat zaunk na, tujer* hai!
Tum nas korop bond kortolo tednam tuzo nas zatolo,
Tum visvasghat korop bond kortolo tednam tujea sangata visvasghat zatolo.
2 Jehova Deva, amchi doia kor,
Amcho bhorvonso tujer asa.
Dor disa sokallim amchem boll* zav,
Hoi, sonkoxttachea vellar amkam taronn diupi zav.
3 Tum gorozta to avaz aikon veg-vegllea desache lok pollon voitat,
Tum ubo ravtanch raxttram hevtten-tevtten ximpoddttat.
4 Bhukelʼle toll ieun akʼkhea desantlem soglem khaun uddoitat toxe, dusre ieun tuzo lutticho mhal khaun uddoitole,
Tollanchea bhiream bhaxen lok tacher zhompoi martole.
5 Jehovak voir ubartole,
Karonn to unchlea sthanacher ravta.
To Sionak neai-an ani nitivontponnan bhortolo.
6 To tujem jivit* thir kortolo,
Bhorpur taronn, zannvai, ginean ani Jehovachi bhirant
—Hoch tacho thevo asa.
7 Polloi! Tanche* dhirvont munis rosteacher dukhan bob martat,
Xanticho sondex diupi sondexkar dukam golloun roddttat.
8 Mha-marg osadd poddla,
Rosteancher provas korpi konn na.
Tannem* korar moddla.
Tannem xarank nakarleant.
Tachea nodren munxak kainch valor na.
9 Des dukh korta* ani bavon voita,
Lebanonak loz bhogta, to kusot voita.
Sharonachim mollam oronnʼnnem zaleant,
Bashanachim ani Karmelachim panam zhoddttat.
10 Jehova mhunntta, “Atam hanv uttʼttholom,
Ani mhoji vhoddvik kortolom,
Mhoji mhoima kortolom.
11 Tumchea kusveant sukem tonn vaddttolem, ani tumi koroddak zolm ditole.
Tumchem vaitt chintop ujea bhaxen tumcho bhosm kortolem.
12 Veg-vegllea desantle lok zollon gelʼlea chunea sarke zatole.
Tankam kantteanchea zhaddam bhaxen katrun ujeant uddoitole.
13 Poisulʼlea vattarant ravtoleamno, hanv kitem korpacho asam tem aikat!
Ani laginchea vattarant ravtoleamno, mhoji xokti vollkhon gheiat!
14 Sionantle patki bhieleat,
Devak soddun geleat te bhirantin koddkoddttat ani te mhunnttat:
‘Bhosm korta toslo uzo asa thoim amchea modlo konn ravonk xokta?
Kednanch palvona toslea ujea lagim konn ubo ravonk xokta?’
15 Zo nitivontponnachea vatter cholot ravta,
Zo sot uloita,
Zo fottkirponnan ani dusreank fosoun melltta ti zodd nakarta,
Zo lonch* gheunk zhompoi marchea bodlek aple hat fattim kaddtta,
Zo jivexim marchea vixim asloleo ievzonneo aikoncheo nhoi mhunn aple kan bond korta,
Ani zo vaitt vostu dixtti poddcheo nhoi mhunn aple dolle bond korta,
16 Oslo munis unch zageancher ravtolo,
Khoddpacher aslolo ghott* kilʼlo tacho asro zatolo,
Taka unddo mellot ravtolo,
Ani udok taka kednanch unnem zaunchem na.”
17 Tuje dolle razak, tachea purnn vorteponnant polloitole,
Ani te desak pois thaun polloitole.
18 Tumi tumchea kallzant tea bhirankull vellacho ugddas korun* mhunnttole:
“Xastri khoim gelo?
Tax diupi khoim gelo?
Gopur mezpi khoim gelo?”
19 Tum tea gorvixttank porot anik kednanch pollounchona,
Hoi, tea lokank zanchi bhas somzonk khub kotthin asa,
Zanchi bhas vichitr asa, tankam tum porot kednanch pollounchona.
20 Sionak polloi! Jea xarant ami amcheo porbo monoitat.
Jeruzalem ek oslo zago zatolo, zoim ami xantin jietolim.
To eka oslea tombu sarko zatolo, zaka kednanch halounchenant,
Zache khille kednanch umttun kaddchenant,
Ani zacheo dorio kednanch katrun uddounchenant.
21 Thoim, Mhoimen Bhorlolo Jehova Dev amkam rakhtolo,
Zoxeo nhoim-eo vo kanal* eka vattarachi rakhonn kortat toso to amchi rakhonn kortolo.
Zhuzachim vhoddim amchea add ailear pasun, to tankam bhitor soronk diunchona,
Vhoddlea-vhoddlea tarvank pasun pasar zaunk diunchona.
22 Karonn Jehova amcho Neai Korpi,
Jehova amkam Kaido Diupi,
Jehova amcho Raza,
Toch amkam salvar kortolo.
23 Dusmananchea tarvancheo dorio dhil* zatoleo,
Te xidd ubem dovrunk pavchenant ani xiddacho kopddo posraunk xokchenant.
Tea vellar, itlo lutticho mhal vanttʼttole,
Ki longdde pasun bhorpur lutt gheun voitole.
24 “Hanv boro na,” oxem desant ravpi konnuch mhunnchona.
Karonn thoim ravtoleank tanchea guneanvanchem bhogsonnem mellttolem.