Izaias
66 Jehova oxem mhunntta:
“Sorg mhojem xinvason, ani prithum mhoji paim dovorpachi monnoi.*
Toxem zalear, tumi mhojea pasot koslem ghor bandtole?
Ani mhaka ravonk khoim zago toiar kortole?”
2 Jehova mhunntta: “Mhojeach hatan hanvem heo sogleo vostu keleat,
Ani teo sogleo ostitvant aileat,
Tori astana, zo khalto asa, niraxi asa ani zo mhojea utrak khub man dita,*
Tea munxacher hanv dhean ditolom.
3 Boilachem bolidan diupi, konnankui jivexim marta tachea sarko asa.
Menddrachem bolidan diupi, sunneachi man moddtta tachea sarko asa.
Denneachi bhett diupi, dukrachem rogot diupea sarko asa!
Ugddasa pasot dhovo dhump zolloupi, montram mhunnon besanv diupea sarko asa.*
Tannim svota apleo vatto vinchun kaddleat,
Ani vitt haddtta tosleo vostu tankam avoddttat.
4 Taka lagon, hanv tankam khast diunk vatto vinchun kaddttolom,
Ani jea vostunchi tankam bhirant dista teach vostumnim hanv tankam khast laitolom.
Karonn hanvem tankam ulo marlo tednam konnench zobab diunk na.
Hanv tanchea lagim uloilom tednam konnench mhojem aikonk na.
Mhojea nodren vaitt asa tench tannim kelem,
Ani mhaka avoddna tench tannim vinchun kaddlem.”
5 Jehovachea utrak khub man ditoleamno, aikat:
“Tumche bhav je tumcho dves kortat ani mhojea nanvam pasot zannim tumkam ekle soddleat, te voilea-voir tumkam oxem mhunnttat, ‘Jehovachi mhoima zaum!’
Punn Dev tumchea mukhar ietolo ani tumi khuxal zatole,
Ani tankam loz bhogchi poddttoli.”
6 Xarant bovall cholʼla, Devmondirantlean vhoddlo avaz aikonk ieta!
Jehova aplea dusmanak favo ti khast laita, tacho avaz ieta.
7 Ballontiniche vollvolle suru zaunchea poilinch tea bailen tea bhurgeak zolm dilo,
Bhurgeak zolm diunche tras suru zaunchea poilinch tinnem eka putak zolm dilo.
8 Oxem kitem tori ghoddlam mhunn konnem kednam-i aikolam kai?
Oxem kitem tori konnem-i polloilam kai?
Khoincho-i des ekach disa bhitor zolmak ieunk xokta kai?
Vo khoinchem-i raxttr okosmat zolmak ieunk xokta kai?
Punn, Sionan ballontiniche vollvolle suru zatanch, putank zolm dilo.
9 Jehova mhunntta: “Hanv eka bhurgeak zolmak ieunchea vella poriant haddun, taka zolmak ieunk diunchom na kai?”
Tuzo Dev mhunntta: “Hanv kusveant bhurgo uronk diun, kusveachem tondd bond kortolom kai?”
10 Jeruzalemacho mog kortoleamno, tachea sangata sontosat ani khuxal zaiat.
Tachea pasot dukh kortoleamno, tachea sangata anondan bhorat.
11 Karonn tumi tichea horddeachem* dudh pieun dhadoxi zatole ani tumkam bhuzvonn mellttoli,
Tumi pottbhor pietole ani tichi vorti mhoima polloun tumi khuxal zatole.
12 Jehova oxem mhunntta:
“Hanv tika nhoim-e sarki xanti ditolom,
Vhanvtolea vhalla sarki raxttranchi mhoima ditolom,
Tumkam dudh pivoitole, handdier martole,
Ani paim-ancher khelloitole.
13 Zoxi ek avoi aplea putak bhuzvonn dita,
Toso hanv tumkam bhuzvonn di-it ravtolom,
Ani Jeruzalemak lagon tumkam bhuzvonn mellttoli.
14 Hem soglem polloun tumchem kalliz khuxalkaien bhortolem,
Tumchim haddam novea tonna sarkim busbuxit zatolim.
Ani Jehova aplea sevokank aplo xoktivont hat dakhoitolo,
Punn aplea dusmanank to aplo krodh dakhoitolo.”
15 “Karonn Jehova ujea sarko ietolo,
Ani tachim rotham vadollachea varea sarkim ietolim,
Tancho sudd gheunk to ekdom ragan ietolo,
Ani tankam khast lavunk ujeachea agtteam sangata ietolo.
16 Karonn Jehova ujean,
Hoi, aplea tolvarin, soglea munxanchi zhoddtti kortolo,
Tednam, zaite lok Jehovachea hatan moron voitole.
17 “Je bagenchea* modem ubi aslolea murtechi puza korunk apnnakuch xudʼdh ani povitr kortat ani je dukranchem ani undranchem mas khatat, toxench vitt haddtta tosleo vostu khatat, te sogle sangata mortole,” oxem Jehova mhunntta. 18 “Hanv tanchim kamam ani chintnam zannam dekhun, hanv veg-vegllea raxttrantlea ani bhaxechea lokank ektthaim korunk ietam. Te sogle ietole ani mhoji mhoima polloitole.”
19 “Hanv tanchea modem ek khunna stapon kortolom. Hanvem vanchoilʼlea lokam modlea thoddea lokank tea raxttramnim dhaddttolom, zoim konnench mhojea vixim aikonk na vo mhoji mhoima pollounk na. Hanv tankam Tarshish, Pul ani Lud hea raxttramnim dhaddttolom, jim dhonu uzar korunk huxar asat. Toxench hanv tankam Tubal, Javan ani poisulʼlea zunveancher pasun dhaddttolom. Soglea raxttramnim te mhoji mhoima kortole. 20 Zoxe Izraelitkar xudʼdh aidonamnim Jehovachea ghorant* tachea pasot bhett haddttale, toxench he lok soglea raxttrantlean tumchea bhavank haddttole, ani Jehovak ek bhett mhunn ditole. Te tankam ghoddeancher, uktea rothancher, dhamplolea rothancher, khenchrancher* ani vegan dhanvpi unttancher bosoun haddttole. Ani te sogle voir Jeruzalemant, mhojea povitr dongrar ietole,” oxem Jehova mhunntta.
21 “Tanchea modlea thoddeank hanv iadnik zaunk ani thoddeank Levi zaunk ghetolom,” oxem Jehova mhunntta.
22 “Zoso hanv novem mollob ani novi prithum rochtam, ani tim mhojea mukhar sodanch astolim, toxich tuji sonsot* ani tujem nanv mhojea mukhar sodanch astolem,” oxem Jehova mhunntta.
23 “Eka novea chondrimachea disa thaun* dusrea novea chondrimachea disa poriant ani eka sabatha thaun dusrea sabatha poriant,
Sogle lok ieun mhojea mukhar bagovtole,”* oxem Jehova mhunntta.
24 “Te bhair voitole ani je mhojea add geleat tanchim moddim polloitole,
Tea moddeank poddlole kidde morchenant,
Ani tankam zolloita to uzo kednanch palvochona,
Ani hem polloun soglea lokank vitt ietoli.”