Filemonak Chitt
1 Hanv Paulu, zo Krist Jezu pasot bondkhonnint asam, amcho bhav Timota borabor, amchea sangata vavurpi mogachea Filemonak hi chitt boroitam. 2 Toxench amchi bhoinn Apfiak, amchea sangata soinika sarko vavurpi Arkipusak, ani tujea ghorant ektthaim zata tea sobhek hi chitt boroitam:
3 Dev zo amcho Bap zaun asa tachea thaun ani Somi Jezu Krista thaun tumkam favo nasloli doia ani xanti mellom.
4 Hanv mhojea magnneant tumcho ugddas kortam tednam sodanch Devache upkar attoitam. 5 Karonn hanv tujea bhavartha vixim toxench Somi Jezu pasot ani soglea Devachea lokam* pasot aslolea tujea moga vixim aikot ravtam. 6 Tum jea bhavarthacho bhagidar zaun asa to bhavarth tuka Krista udexim amkam mellʼlleant tea soglea besanvachi vollokh mellonk fuddem kaddum mhunn hanv magtam. 7 Mhojea bhava, hanvem tujea moga vixim aikolem tednam hanv khub khuxal zalom ani mhaka bhuzvonn mellʼlli, karonn tujea vorvim Devachea lokanchea* kallzank ghottai mellʼlli.
8 Heach karonnak lagon, hanv Kristacho apostl zalʼlean fattim-fuddem zainastana sarkem tem kor mhunn tuka hukum diunk xoktam. 9 Tori astana, hanv mogak lagon tuje lagim vinoti kortam, karonn hanv Paulu ek zanntto munis zaun asam, ani atam Krist Jezu khatir bondkhonnint asam. 10 Hanv bondkhonnint astana bhavarthant zacho bapui zalom, tea mhojea bhurgea pasot, mhunnche Onesimusa pasot, hanv tujea lagim vinoti kortam. 11 Poilim to tujea pasot kainch faideacho naslo, punn atam to tujea ani mhojea pasotui faideacho asa. 12 Hanv taka tujea lagim porot dhaddttam, hoi taka, zo mhojea kallzak khub lagim asa.
13 Bore khobre pasot hanv bondkhonnint asom poriant tujea bodlek mhoji seva korunk taka mhojea lagim dovrunk mhaka khuxi asa. 14 Punn tuji porvangi nastana mhaka kainch korunk naka. Karonn tunvem koslea-i dobhavant ieun nhoi, punn tuje khuxen borem kam kelʼlem mhaka zai. 15 To tujea thaun thoddea vella pasot pois gelo tem khorem, punn atam to tujea sangata sodankal urcho mhunn, oxem ghoddie ghoddlem astolem. 16 Atam to ek chakor koso nhoi, punn chakra poros vorto, eka bhava sarko asa. Mhozo tor to khub mogacho, punn mhojea poros, tuka to anikui chodd mogacho, karonn to tuzo chakoruch nhoi punn Somiache sevent tuzo bhav pasun zaun asa. 17 Tor, tum mhaka tuzo ixtt* mhunn somzota zalear mhaka ieukar dita toso taka-i mogan ieukar di. 18 Tannem tujem kitem-i luksonn kelam vo to tuka koslea-i rinnant asa zalear tem mhojea khateant boroi. 19 Hanv Paulu, mhojea hatamnim hem boroitam: Hanv tujem luksonn bhorun kaddttolom. Tum tachea poros chodd mhojea rinnant asa hem hanvem tuka sangchi goroz na. 20 Hoi mhojea bhava, Somiache sevent mhaka hi modot kor. Kristacho apostl zalʼlean mhojea kallzak ghottai di.
21 Hanvem sanglam tea pormonnem tum kortolo mhunn mhaka purnn khatri asa. Taka lagon hanv hem boroitam, ani hanvem sanglam tachea poros tum chodd kortolo mhunn hanv zannam. 22 Teach borabor, mhaka ravonk ek zago pasun toiar kor, karonn tumchea magnneank lagon hanv beginuch tumkam mellonk pavtolom* mhunn mhaka bhorvonso asa.
23 Krist Jezuchea ekvottant aslolo mhozo sangati koidi Epafras tuka mog dhaddtta. 24 Toxench, mhojea sangata kam korpi Marku, Aristarkus, Demas ani Lukas, he pasun tuka mog dhaddttat.
25 Tumi dakhoitat te bore urbek lagon Somi Jezu Kristachi favo nasloli doia tumcher asom.