Izaias
30 Jehova mhunntta: “Tea hottʼtti* putancher hai!
Te oslea ievzonneam pormonnem kam kortat, jeo mhojea thaun nant,
Te osleo ixttagoti zoddttat,* jeo mhojea khuxe* add asat,
Ani te patkacher-patok korit ravtat.
2 Faraoh koddlean rakhonn melloun gheunk,
Ani Ejipttachea savllent asro mellonk,
Te mhaka vicharinastana sokol Ejipttant voitat.
3 Punn Faraoh koddlean rakhonn, tumchea pasot lojechem karonn zatolem,
Ejipttachi savlli tujea pasot opmanachem karonn zatolem.
4 Karonn tache kunvor Zoanant asat,
Ani tache sondexkar Hanesak pavleat.
5 Izraelitkarank loz bhogchi poddttoli,
Karonn Ejiptta koddlean tankam kainch faido zaunchona,
Tankam koslich modot mellchina ani boreponn mellchem na,
Tachea bodlek, tankam loz bhogunk poddttoli ani tancho opman zatolo.”
6 Dokxinnek voitat tea zonvaram add ho sondex:
Gaddvachea fattir girestkai dovrun,
Unttachea fattir dennim dovrun,
He sondexkar, dukh ani trasanchea vattarantlean pasar zatat,
Tea vattarantlean, zoim xinv ravta, goroztolo xinv ravta,
Punn him dennim ani girestkai kainch faideachi zaunchina.
7 Karonn Ejipttachi modot kainch faideachi na,
Taka lagon, hanvem taka hem nanv dilam: “Rahab, ji bexttich boson asta ani kainch kamachi na.”
8 “Atam voch ani hem tanchea mukhar fatranchea pattiecher boroun kadd,
Ani eka pustokant boroun dovor,
Oxem kelolean, fuddara pasot
Tem ek sasnachem govai koxem zatolem.
9 Karonn te odhikarachea add vochpi, visvasghat korpi put,
Te osle put, je Jehovache kaide* aikon gheunk toiar nant.
10 Te dorxonam polloitoleank sangtat, ‘Dorxonam polloinakat,’
Ani provadeank mhunnttat, ‘Amchea vixim khoreo bhasaunneo korinakat.
Tachea bodlek, amkam fulounk boreo-boreo vostu sangat, fottkirim dorxonam polloiat.
11 Sarke vattevoilean koddsorat, to rosto soddun diat.
Izraelachea Povitr Deva vixim amkam anik kainch sangonakat.’”
12 Atam Izraelacho Povitr Dev kitem sangta tem aikat:
“Tumi mhojem utor nakarlam,
Khotteponn ani fottincher tumi visvas dovorla,
Ani tancher tumi patieun ravlim.
13 Taka lagon, tumcho ho guneanv vero poddlolea eka vontti sarko zatolo,
Oslea eka fuglolea vontti sarko, ji kednam-i poddonk xokta.
Ti okosmat, ekach khinnant kosllon poddttoli.
14 Ti kumbharachea vhoddlea moddke bhaxen futtʼttoli,
Ticho purnn toren churo zatolo,
Ujeantlean ingllo kaddunk,
Vo fonddkulantlean* udok kaddunk, ek pasun kuddko urchona.”
15 Akʼkhea Vixvacho Dhoni, Izraelacho Povitr Dev Jehova mhunntta:
“Mhoje lagim porot ailear ani xant ravlear, tumi salvar zatole.
Tumi xant ravon mhojer visvas dovorlo zalear, tumi bollixtt zatole.”
Punn tumi toxem korunk toiar nasle.
16 Tachea bodlek tumi mhunnttlem: “Na, ami ghoddeancher boson pollon voitole!”
Tor tumkam pollon voichem poddttolench.
Tumi mhunnttlem: “Ami vegan* dhanvtat tea ghoddeancher boson voitole!”
Punn tumchea fattik lagleat te tumchea poros vegan dhanvtole.
17 Fokot ekleanuch dhomki dilear, tumche hozar lok bhieun kamptole,
Panch zannanchi dhomki aikon tumi pollon voitole.
Tumche modle je vanchon urtole, te dongrachea tengxer lailolea eka khambea sarke zatole,
Hoi, porvotar khunna mhunn ubarlolea eka khambea sarke zatole.
18 Punn tumkam doia dakhounk Jehova pasiensan ravla,*
Ani tumchi kakut korunk to panvl ghetolo.
Karonn Jehova ek neai korpi Dev.
Je tachi vatt polloit asat* te sogle khuxal astat.
19 Lok Sionant, Jeruzalemant ravtole tednam, tum matui roddchona. Tum modoti pasot ulo martanch, Dev* tuka doia dakhoitolo. Ani tuzo tallo aikotanch, to tuka zobab ditolo. 20 Jehovan tuka khaunk trasancho unddo ani pieunk zulumachem udok dilem zalear pasun, tuzo Vorto Xikoupi tuje koddlean anik lipon ravchona. Tum tujea Vortea Xikoupeak tujea dolleamnim polloitolo. 21 Ani kednam-i tum sarke vatte thaun koddsoron, uzvea vo davea vatten vollʼllo zalear, tuka sarki vatt dakhounk fattlean thaun tuje kan ho avaz aikotole: “Hi ti vatt, heach vatten chol.”
22 Tujeo kantoilʼleo murteo zaka bhailean chandi kaddlea ani tujeo dhatucheo murteo* zaka bhailean bhangar kaddlam, tankam tum oxudʼdh kortolo. Bailanche mhoineache palliecho kopddo uddoitat toso, tum teo uddoitolo ani mhunnttolo: “Vochat!”* 23 Tunvem vomplolea bim-ank ximponk Dev paus dhaddttolo, tujea xetant bhorpur ani ekdom borem pik zatolem.* Tea disa, tujim gorvam-menddram chorvanchea vhoddlea-vhoddlea mollancher chortolim. 24 Xetant kam korpi boil ani gaddvam, khorean ani dantanchea khorean kuxin kaddloli ekdom bori khavodd* khatolim. 25 Jea disa vhoddle-vhoddle gopur poddttole ani khub lokank jivexim martole, tea disa unch-unch porvotancher ani vhoddlea-vhoddlea dongrancher vhall ani udkacheo zhori vhanvtoleo. 26 Jea disa Jehova aplea lokanche ghave bandtolo,* je vhoddle ghave tannench tankam kelʼle te to pekoitolo, tea disa chondrimacho uzvadd suriachea uzvadda porim zatolo. Ani sat disancho uzvadd ekuch disa poddlolea bhaxen, suria sat pavtti chodd uzvadd ditolo.
27 Polloi! Jehova* pois thaun ieta.
To aplea zollttea ragan ani datt kupamnim ieta,
Tache vontt krodhan bhorleat,
Ani tachi jib bhosm korta toslo uzo zaun asa.
28 Tachi povitr xokti* buddtte bhaxen asa, zachem udok gollea meren pavta,
To raxttrank nisonttonache challnnint challttolo,
Ani veg-vegllea desantlea lokank chukiche vatten vhoronk tanchea daddank* logom* ghaltolo.
29 Punn tumi zalear, konnui porbechi toiari kortana*
Ratchem gaita toslem git gaitole.
Ani zoso konnui basuri* vazoit* Jehovachea dongrar choddtta, Izraelachea Khoddpa lagim voita,
Toxem tumchem kalliz khuxalkaien ulʼlastolem.
30 Tea disa, Jehova aplo vhoddlo avaz aikom-so kortolo.
To aplea zollttea krodhan, bhosm korta toslea ujean,
Futtʼttolea kupan, goddgoddachea vadollan,
Ani korveachea pausan aplea hatachem boll dakhoitolo.
31 Jehovacho avaz aikon Asiriecher bhirant posortoli,
To Asiriek danddean martolo.
32 Asiria add zhuz korunk Jehova aplo hat ubartolo tednam,
To tacher khasticho danddo martolo tednam,
To dor ek pavtti taka marta tednam,
33 Asiria pasot Tofeth* poilinchean toiar asa,
Tachea raza pasotui to toiar asa.
Devan lakddachea raxik toiar kelʼlo zago khol ani rund kela,
Thoim khub lakddam ani uzo asa.
Jehovacho svas, gondhokachea vhalla bhaxen asa,
Zo tea raxik uzo pettoitolo.