Izaias
41 “Zunveamno, vogi ravon mhojem aikat,*
Veg-vegllea raxttranchea lokamno, novea bollan bhorat.
Mhojea mukhar ieiat ani uloiat.
Ami ektthaim ieum-ia ani hanv tuji nit kortolom.
2 Udente thaun* zannem ekleak upzoila, to konn?
Neai korunk zannem taka aplea paim-a lagim* apoila,
Raxttrank tachea tabeant keleant,
Ani razank tachea adhin keleat, to konn?
Tachea tolvari mukhar zo tankam dhulʼl korun soddtta,
Ani tachea dhonu mukhar tankam varean ubtolea tonna sarko korta, to konn?
3 To tanchea fattik lagta, thambonastana fuddem sorta,
To tea rostea voilean voita, zoim tannem aiz meren paim dovrunk na.
4 Hem soglem konnem kelem, hem soglem konnem ghoddoun haddlem?
Survatek thaun konnem eka-eka pillgek hukum diun apoili?
Hanv Jehova, hanv sogleam-von Poilo zaun asam,
Ani nimanne pillge pasotui hanv bodolchom na.”
5 Zunve hem polloun bhieleat,
Prithumeche poisulʼle vattar kampunk lagleat.
Te ektthaim zaun fuddem ietat.
6 Dor eklo aplea sangateak modot korta,
Ani aplea bhavak mhunntta: “Dhir dhor.”
7 Kola aslolo kamdar xettik urba dita,
Zo hatoddi uzar korun dhatu sopatt korta,
To dhaddaupachea fatracher* hatodden kam kortoleak urba dita.
To taka mhunntta: “Dhatu bore bhaxen zoddla.”
Uprant murti poddchi nhoi mhunn tika khille marun ubi korta.
8 “Punn tum Izraela, tum mhozo sevok zaun asa,
Jakoba, hanvem tuka vinchun kaddla,
Tum mhozo ixtt Abrahamachi sonsot.*
9 Hanvem tuka prithumechea pontam thaun haddla,
Hanvem tuka prithumechea poisulʼlea vattarantlean haddla.
Hanvem tuka mhunnttlem, ‘Tum mhozo sevok.
Hanvem tuka vinchun kaddla, hanvem tuka nakarunk na.
10 Bhienaka, karonn hanv tujea sangata asam.
Uske naka, karonn hanv tuzo Dev.
Hanv tuka ghott kortolom, hoi, hanv tuka modot kortolom,
Mhojea nitivontponnachea uzvea hatan hanv tuka samballun dhortolom.’
11 Polloi! Je tujer ragar zatat, te lojek poddttole ani tancho opman zatolo,
Je tujea lagim zhogoddttat, tanchi dhulʼl zaun te nanch zatole.
12 Tujea lagim zhogoddttoleank tum sodhtolo, punn te tuka mellchenant,
Karonn tujea lagim zhuz kortoleancho nas zatolo, te nanch zatole.
13 Karonn hanv Jehova tuzo Dev, tujea uzvea hatak ghott dhorun asam,
Ani tuka mhunnttam, ‘Bhienaka, hanv tuka modot kortolom.’
14 Jakoba, lhanxea kiddea,* bhienaka.
Izraelachea lokamno, hanv tumkam modot kortolom,” oxem Izraelacho Povitr Dev Jehovan mhunnttlam, zo tumcho Soddoupi zaun asa.
15 “Polloi! Hanvem tuka mollnnechea follea* sarko kela,
Dhariche dant aslolea mollnnechea novea sadona sarko kela.
Tum dongranchi mollnni korun tancho churo kortolo,
Ani porvotancho kunddo korun uddoitolo.
16 Tum tankam varem ditolo,
Ani varo tankam uboun vhortolo.
Vadoll tankam ximpddaitolem.
Tum Jehovak lagon khuxal zatolo,
Ani Izraelachea Povitr Deva vixim gorvan uloitolo.”
17 “Gorjevont ani gorib udok sodhtat, punn tankam udok mellona,
Tanchi jib tanen suklea.
Hanv Jehova, tankam zobab ditolom,
Hanv Izraelacho Dev, tankam soddun diunchom na.
18 Hanv sukea porvotancher nhoim-eo vhanvoitolom,
Falkeant zhori futtom-xeo kortolom.
Hanv ranvott vattarak tollem* kortolom,
Ani sukea desak udkacheo zhori kortolom.
Oronnʼnneachea vattarant ash* ani cypress* zhaddam sangata juniper* zhadd laitolom.
20 Oxem kelʼlean, sogle lok polloitole ani tankam kollttolem,
Te dhean ditole ani tankam somzotolem,
Ki hem Jehovachea hatachem kam,
Izraelachea Povitr Devan hem rochlam.”
21 Jehova mhunntta, “Tumchi kes manddat.”
Jakobacho Raza mhunntta, “Tumchea vatten uloiat.
22 Tumche purave haddat ani kitem ghoddchem asa tem amkam sangat.
Jem adim* ghoddlolem tem amkam sangat,
Oxem kelolean ami tea vixim chintunk ani tacho porinnam zannam zaunk pavtole.
Vo jem fuddem ghoddchem asa tem amkam sangat.
23 Fuddarak kitem zaunchem asa tem amkam sangat,
Oxem kelolean tumi dev mhunn amkam kollttolem.
Hoi, kitem tori korat, borem vo vaitt,
Jem polloun ami ojap zatole.
24 Polloi! Tumi ason naslolea sarke asat,
Ani tumchim kamam kainch upeogachim nant.
Zo konn tumkam vinchun kaddtta, to vitt haddtta toslo.
25 Hanvem utʼtore thaun konnank tori upzoila ani to ietolo,
Udente thaun* ieta to mhojea nanvachi mhoima kortolo.
Zoso kumbhar voli mati maddoita,
Toso to raz korpeank* matie bhaxen maddoitolo.
26 Hea vixim zannam zaunk, amkam konnem mhunn survatek thaun hem sanglolem?
Vo ‘tannem sarkem sanglolem’ oxem ami mhunnonk, poilim thaun amkam hem konnem sanglolem?
Khorem mhunnttlear, konnench sangonk na!
Konnench tea vixim kollounk na!
Konnench tumchea thaun kainch aikonk na!”
27 Sogleant poilim hanvench Sionak mhunnttlem: “Hem soglem ghoddchem asa!”
Ani hi bori khobor sangonk, Jeruzalemant hanv ek sondexkar dhaddttolom.
28 Hanvem hevtten-tevtten polloilem, punn thoim konnuch naslo.
Tanchea modem solʼlo diunk eklo-i naslo.
Hanvem porot-porot vicharlem punn konnench zobab diunk na.
29 Polloi! Te sogle kainch upeogache nant.*
Tanchim kamam pasun kainch faideachim nant.
Tancheo dhatucheo murteo* fokot varem ani polkeponn.