Izaias
58 “Vogi ravom naka, vhoddlea tallean bob mar!
Xingachea* avaza bhaxen vhodd avaz kor.
Mhojea lokank tanchea oprada vixim,*
Ani Jakobachea ghoranneak tanchea patkam vixim kolloi.
2 Nitivontponnan cholpi raxttrache lok zalʼlea bhaxen,
Ani aplea Devache kaide pallop kednanch soddun diunk na toslea raxttrache lok zalʼlea bhaxen,
Te dor disa mhaka sodhtat,
Ani mhoje vatte vixim zannam zaunk khuxal zatat.
Tankam aplea Devak lagim ieunk avoddlolea bhaxen,
Te mhojea lagim nitiche nirnnoi magtat.
3 Te mhunnttat, ‘Ami upas kortat tednam tum kiteak polloina?
Amchea patkank lagon ami dukh kortat tednam tum kiteak dhean dina?’
Karonn upasachea disa pasun tumi tumcheo itsa* purnn kortat,
Ani tumchea manaiancher zulum kortat.
4 Upasachea disa tumi vad-vivad ani zhogddim kortat,
Ani tumi eka-mekacher noxtteponnacheo mutti martat.
Oslea toreche upas korun, hanv sorgar tumchim magnnim aikotolom mhunn opekxa korinakat.
5 Hanvem tumkam hea toren upas korunk sanglam kai?
Tea disa tumi tumkanch dukh ditat,
Lamb tonna sarkim tumchi tokli bagoitat,
Sakak ani gobrak tumchi khatt kortat.
Haka tumi upas mhunnttat kai? Oxe toren Jehovak khuxal korunk zata kai?
6 Na! Hanvem tumkam korunk sanglam to upas oso ascho:
Tea disa, tumi noxtteponnacheo sanklleo kaddun uddouncheo,
Zum-acheo dorio soddouncheo,
Zulum sostoleank suttka diunchi,
Ani dor eka zum-ache don kuddke korche.
7 Tumcho unddo tumi bhukeloleam sangata vanttcho,
Gorib ani ghor nasloleank tumchea ghorant asro diuncho,
Konnankui vingllo polloilo zalear taka tachem ang dhampunk kopdde diunche,
Ani tumcheach bhavank fatt korchi nhoi.
8 Tednam tumcho uzvadd fantodde voilea kirnnam bhaxen porzollttolo,
Ani beginuch tumi bore zatole.
Nitivontponn tumchea mukhar choltolem,
Ani Jehovachi mhoima tumchi rakhonn korunk tumchea fatta-fatt ietoli.
9 Tednam tumi Jehovak ulo martole ani to tumkam zobab ditolo,
Tumi modoti pasot roddttole ani to mhunnttolo, ‘Hanv hanga asam!’
Tumi tumchea modlem zum kaddun uddoilear,
Dusreank bott dakhovop bond kelear ani tanchem nanv piddʼddear korunk xokta toslem ulovop soddun dilear,
10 Tuka zai ti vost eka bhukeloleak dilear,
Ani dukhi asloleak tunvem dhadoxi kelear,
Tuzo uzvadd kallkhant poriant chokchoktolo,
Ani tuzo kallokh donparchea vota sarko porzollttolo.
11 Jehova tuka sodanch vatt dakhoitolo,
Ani sukea vattarant pasun tuka dhadoxi kortolo.
To tujim haddam ghott kortolo,
Ani tum eka ximplolea bage sarko zatolo,
Eke osle zhori sarko, ji kednanch sukona.
12 Tujea pasot porne ani padd zaun gelʼle zage porot bandun kaddttole,
Ani adlea pillgemnim ghatloli buniad tum porot ghaltolo.
Tuka moddon* poddloleo vontti sarko korpi,
Ani roste porot bandun haddpi oxe mhunnttole, jea udexim lok tachea bhonvtonnim ravonk xoktole.
13 Sabathachea disa, mhojea povitr disa, tunvem tujeo itsa* purnn korop soddun dilear,*
Ani ho khub khuxalkaiecho dis, Jehovacho povitr dis, ani mhoimecho dis mhunn manlear,
Toxench, tumcheoch itsa purnn korchea bodlek ani faideak poddonant tosleo vostu ulounchea bodlek, tea disak mhoima dilear,
14 Tuka Jehovak lagon bhorpur khuxalkai mellttoli.
Hanv tuka prithumechea unch-unch zageancher odhikar ditolom.*
Ani tujea purvozachea, Jakobachea daizachem zomnichem pik tuka khaunk ditolom,*
Karonn Jehovan oxem sanglam.”