Mika
7 Mhojer hai! Hanv eka oslea munxa sarko asam,
Zaka gimantlim follam* ektthaim kelea uprant,
Ani drakxam kaddlea uprant, toxench urlolim drakxam punzailea uprant,
Drakxancho ekui gons khaunk mellona,
Toxench, hanv axetam tem anjirachem poilem foll pasun mellona.
2 Visvaxi munis prithume voilo nanch zala.
Munxam modem konnuch promannik uronk na.
Tanche modle sogle rogot varounk lipon bosleat.
Dor eklo apleach bhavacho xikar korunk vhoddlem zall manddtta.
3 Tanche hat vaitt kamam korunk huxar asat,
Kunvor ek-ek magot ravta,
Neai korpi lonch* magta,
Famad munis ukteponnim apleo itsa sangta,
Ani te sogle mellon manddnni kortat.*
4 Tanchea modem sogleant boro asa to kantteam sarko asa,
Ani sogleant promannik asa to kantteanche voie poros paxtt asa.
Tujea rakhonndaramnim sanglolo to dis ietolo, jea disa tuje koddlean hixob ghetole.
Taka lagon tancher bhirant ietoli.
5 Tum tujea sangateacher bhavarth dovornaka,
Vo tujea ghott ixttacher visvas dovornaka.
Toxench tujea gopant asa tichea lagim* uloitana pasun samballun uloi.
6 Karonn put aplea bapaik valor dina,
Dhuv aplea avoichea add voita,
Ani sun aplea sasumaichea add voita,
Eka munxachim ghorchinch tachim dusman zaun asat.
7 Punn hanv zalear, Jehovachi vatt polloit ravtolom,
Mhaka taronn diupi Devak hanv pasiensan ravtolom.*
Mhozo Dev mhojem aikotolo.
8 Mhojea dusmana,* mhoji poristhiti polloun khuxal zainaka,
Hanv poddlam zalear pasun hanv uttʼttolom,
Hanv kallkhant ravtam zalear pasun Jehova mhozo uzvadd zatolo.
9 Hanvem Jehova add patok kelam,
To mhoji kes zhogddon mhaka neai dina tea meren
Hanv tacho rag soxit ravtolom.
To mhaka uzvaddant bhair haddttolo,
Ani hanv tachem nitivontponn polloitolom.
10 Mhoji dusman ji mhaka mhunnttali:
“Tuzo Dev Jehova khoim asa?”
Ti pasun hem polloitoli ani tika khub loz zatoli.
Tika rosteache matie bhaxen maddoitole,
Ani hanv mhojea dolleam mukhar hem ghoddtta tem polloitolom.
11 Tujea fatrancheo vontti bandpacho to dis astolo.
Tea disa tujeo ximo vaddoitole.*
12 Tea disa pois-pois thaun lok tujea lagim ietole,
Asiria thaun ani Ejipttachea xaram thaun ietole,
Ejiptta thaun Eufrates nhoim-e meren,
Eka doria thaun dusrea doria meren ani eka dongra thaun dusrea dongra meren ravpi lok tujea lagim ietole.
13 Des, tantunt ravtoleank lagon padd zatolo,
Tannim kelʼlea kamank lagon padd zatolo.
14 Danddo gheun tujea lokanchi, hoi, daiz zaun aslolea tujea hinddachi rakhonn kor,
Zo follanche bagent—ranant ekttoch ravtalo.
Tankam Bashanant ani Gileadant poilim bhaxen chorom-di.
15 “Hanv taka ojapachim kamam dakhoitolom,
Zoxim hanvem tumkam, tumi Ejiptt desantlean bhair sorlim tednam dakhoilʼlim.
16 Raxttrantle lok hem polloitole ani xoktivont asonui tankam loz bhogtoli,
Te aplea tonddar hat dovortole,
Ani tanche kan bheretole.
17 Te sorpa bhaxen dhulʼl lenvtole,
Prithume voilea pott goxttun cholpi pranneam bhaxen aplea surokxit zagear thaun bhirantin koddkoddot ietole.
Te bhieun-bhieun amcho Dev Jehova lagim ietole
Ani tachea* mukhar bhirantin koddkoddttole.”
18 Tujea oslo konn Dev asa,
Zo aplea daizantlea urloleanche guneanv bhogxita ani tanchim patkam ugddas dovorna?
To sodankal rag gheun ravcho na,
Karonn taka visvaxi mog dakhounk khuxalkai melltta.
19 To amkam porot doia dakhoitolo, to amche guneanv paim-am ponda maddoitolo.*
To amchim soglim patkam doriache kholaient uddoitolo.
20 Tunvem khub poilim amchea purvozank soput dilʼlo toso,
Tum Jakoba sangata visvaxiponnan vagtolo,
Ani Abrahamak tuzo visvaxi mog dakhoitolo.