Izaias
29 “Arielacher* hai! Hoi, tea xaracher zoim David tombu marun ravlo.
Tacheo porbo chaluch urom,
Vorsan-voros teo chaluch urom.
2 Punn hanv Arielacher sonkoxtt haddttolom,
Sogleak roddnnem ani dukh korop astolem,
Ani mhojea pasot hem xar vedicher aslolo zolloupacho zago zatolem.
3 Hanv soglea vattamnim tuka veddo ghaltolom,
Tujea bhonvtonnim tonk aslolea lakddanchi voim ghaltolom,
Soglea vatten tuka gherav ghaltolom.
4 Tuka sokol zomnir uddoitole,
Tum thoim thaun uloitolem,
Punn tuzo avaz dhulʼlintuch ghusmottʼttolo.
Zoso konnui melolea lagim uloita,
Toso tuzo avaz zomni thaun aikonk ietolo.
Ani dhulʼlintlean tujim utram chinvchinvlolea bhaxen aikonk ietolim.
5 Tujea dusmanancho* zomo dhulʼli bhaxen zatolo,
Tujer zulum kortoleancho zomo varean ubtolea bhatachea sali* sarko zatolo.
Hem soglem ekach khinna bhitor, okosmat zatolem.
6 Hanv fouzancho Dev Jehova tuka soddounk tujer dhean ditolom.
Tea vellar, goddgodd martolo, bhuimkamp zatolo ani vhoddlo avaz zatolo,
Vadoll-modd zatolem ani bhosm korta toslea ujeache agtte astole.”
7 Tednam raxttrancho zomo zo Ariela add zhuz kortolo
—Je lok tachea lagim zhuztole,
Tacher akromonn korunk zhuzache gopur ube kortole,
Ani tacher sonkoxtt haddttole—
Te sogle ek sopon koxe zatole, ratchem dista toslea eka dorxona sarke zatole.
8 Zoso ek bhukelʼlo munis apunn jevta mhunn sopneta,
Punn zago zalea uprant to upaxinch asta.
Zoso ek tanelʼlo munis apunn udok pieta mhunn sopneta,
Punn zago zalea uprant to thoklolo ani tanelʼloch asta.
Toxi tea raxttranchea zomeachi poristhiti zatoli,
Jim Sion Dongra add zhuz kortat.
9 Thottakat ani ojap zaiat!
Oxe toren kuddʼddim zaiat ki tumkam kainch disona.
Te bebde zaleat, punn drakxancho soro pieun nhoi,
Te loktat, punn soro pieun nhoi.
10 Karonn Jehovan tumcher sust nhid ghatlea,
Tannem tumchea dolleank, tumchea provadeank kuddʼdde keleat,
Tannem tumchea toklecher, tumchea dorxona polloupeancher poddʼddo dhampla.
11 Dor ek dorxon tumchea pasot xikʼko marun dhamplolea pustoka bhaxen asa. Xiklolea munxak tim hem pustok diun oxem mhunnttat: “Upkar korun, hem vhoddlean vach,” tednam to mhunnttolo: “Hanv koxem vachum, tem tor xikʼko marun dhampun dovorlam.” 12 Ani xikop naslolea eka munxak tim hem pustok diun oxem mhunnttat: “Upkar korun hem vach,” tednam to mhunnttolo: “Mhaka vachunk iena.”
13 Jehova mhunntta: “He lok mhaka aplea tonddan
Ani vonttamnim man ditat,
Punn tanchem kalliz mhojea thaun khub pois asa.
Tankam mhoji bhirant asa mhunn te dakhoitat,
Punn te munxamnim kelʼlea kaideam pormonnem choltat.
14 Taka lagon, hanv anik ek pavtt tanchea pasot kitem tori ojapachem kortolom,
Eka-fattlean-ek ochoriam kortolom.
Tednam tanchea zannaranchi zannvai kabar zatoli,
Ani tanchea xanneanchi somzonni nanch zatoli.”
15 Je apleo ievzonneo* Jehova koddlean lipounk khub proitn kortat, tancher hai!
Te kallkhant lipon kamam kortat,
Ani mhunnttat: “Amkam konn polloita?
Ami kitem kortat tem konnank khobor asa?”
16 Tumchim chintnam kitlim chukichim!
Matiek kumbhara sarki lekhunk zata kai?
Keloli vost, apleak zannem kela taka oxem mhunnonk xokta kai,
“Tannem mhaka korunk na”?
Vo ghoddoilʼli vost, aplea ghoddnnarak oxem mhunnonk xokta kai,
“Taka okʼkol na”?
17 Thoddea vellan Lebanon follanchi bag zatolem,
Uprant ti bag, ran koxi distoli.
18 Tea disa, bherim pasun tea pustokantlim utram aikotolim,
Kuddʼddim aplea dolleamnim pollounk lagtolim, tim anik kallkhant aschimnant.
19 Lhanvik lok Jehovak lagon sontostole,
Ani gorib Izraelachea Povitr Devak lagon khuxal zatole.
20 Karonn zulum korpi aschona,
Boddai marpi nanch zatolo,
Ani dusreank vaitt korunk toiar ravtat tancho nas zatolo.
21 Je fott marun dusreank guneanvkari tharaitat,
Je xarachea darvontteacher neai magtolea pasot fas manddttat,
Ani khotte arop korun nitivontak neai dinant, tancho nas zatolo.
22 Jehova, zannem Abrahamak soddoilʼlo, to Jakobachea ghoranneak mhunntta:
“Jakobak porot kednanch loz bhogonk poddchina,
Taka kednanch man bagounk poddchina.*
23 Karonn mhojea hatanchem kam zaun aslolea tachea bhurgeank,
To aplea modem polloitolo tednam,
Tim mhojea nanvak man ditolim.
Hoi, tim Jakobachea Povitr Devachea nanvak man ditolim,
Ani Izraelachea Devachi bhirant dhortolim.
24 Zanchim monam bhottokleant, tim somjikai melloun ghetolim,
Ani jim gunngunnttat, tim xikonk toiar astolim.”