Izaias
59 Polloi! Jehovacho hat itlo lhan na, ki to salvar korunk xokona,
Ani tache kan itle bherelʼle nant, ki to aikonk xokona.
2 Tumchech guneanv tumkam tumchea Deva thaun pois gheun geleat.
Tumchea patkank lagonuch tannem aplem tondd tumchea thaun lipoilam,
Ani to tumchem aikonk sodhina.
3 Tumche hat rogtan,
Ani tumchim bottam guneanvan oxudʼdh zaleant.
Tumche vontt fott uloitat ani tumchi jib onitivontponnacheo vostu uloita.
4 Konnuch nitivontponnachea vatten uloina,
Ani korttant voita to konnuch sot uloina,
Lok polkea vostuncher visvas dovortat, ani faideak poddona tosleo vostu uloitat.
Te trasancho gorb samballttat ani vaittponnak zolm ditat.
5 Te vikari sorpachim tantiam ghaltat,
Tantim futtlea uprant tantuntlean vikari sorop* bhair sorta.
Zo konn tim tantiam khata, to mortolo.
Te mavlechem zall vinnttat,
6 Punn tanchem zall kopdde mhunn uzar korunk zaina,
Ani te jem vinnttat tachea thaun te aplem ang dhampunk xokonant.
Tanchim kamam dhokeachim asat,
Te aplea hatamnim maramari kortat.
7 Tanche paim vaitt korunk dhanvtat,
Te niropradeanchem rogot varounk utsuk asat.
Tanchim chintnam vaitt asat,
Dusreank kabar korun uddovop ani dukh divop, hench tanchem kam.
8 Xantin koxem jieunchem tem tankam khoboruch na,
Ani tanchea vatter neai mhunnttlolo nanch.
Tannim aple roste vankdde-tinkdde keleat,
Zo konn tancher cholta taka xanti mellchina.
9 Taka lagon neai amchea thaun khub pois asa,
Ani nitivontponn amchea lagim pavoch na,
Ami uzvaddak axeun asat, punn polloi! kallokhuch asa,
Ami uzvaddachi vatt polloitat, punn kallkhantuch cholot ravtat.
10 Ami kuddʼddea munxa bhaxen vonott sanspitat,
Dollech naslolea bhaxen ami sanspun choltat,
Sanjechea kallkhant addkhollttat toxe ami donparche addkhollttat.
Xoktivont munxa modem ami meloleam sarke asat.
11 Ami sogle vanxela bhaxen gurgurtat,
Parveam bhaxen pirgon roddttat.
Ami neai mellcho mhunn bhorvonso dovortat, punn amkam neai mellona.
Taronn mellchem mhunn bhorvonso dovortat, punn tem amchea thaun khub pois asa.
12 Karonn tujea mukhar amche oprad khub asat,*
Ami kelʼlem dor ek patok amchea add govai dita.
Ami kitle oprad keleat,*
Ani ami kitle guneanv keleat, te amkam khobor asa.
13 Ami oprad kelo ani Jehovak nakarlo,
Ami amchea Devak fatt keli.
Ami zulum korchea vixim ani add voichea vixim uloile,
Ami amchea kallzant fottingponnam bhorlim ani fottkirim utram amchea tonddantlean bhair kaddlim.
14 Neai-ak dhanvddaun ghatla,
Ani nitivontponn pois ubem asa.
Karonn xarachea nakear sot* addkhollon poddlam,
Ani khoreponn bhitor ieunk xokona.
15 Sot* nanch zalam,
Vaitt rosto soddttat tankam luttʼttat.
Khoinsoruch neai na,
Jehovan hem polloilem ani taka rag ailo.*
16 Modot korunk eklo-i fuddem iena,
Ani modesti mhunn konnuch na, hem polloun taka ojap dislem.
Tor tannem apleach hatan taka taronn dilem,*
Ani apleach nitivontponnan taka tenko dilo.
17 Soinik apli rakhonn zaunk ghalta toslo nitivontponnacho kott tannem ghatlo,
Ani aplea tokler taronnachem* helmett ghatlem.
Tannem bodlo gheupache kopdde ghatle,
Ani to urbechea kottan* nheslo.
18 To tankam tanchea kamachem foll ditolo:
Aplea add voitat tancher aplo krodh votoitolo, aplea dusmanank khast ditolo.
Ani zunveank tachea kamam pormonnem farik kortolo.
19 Tednam ostomeche lok Jehovachea nanvachi bhirant dhortole,
Udenteche lok tachi mhoima polloun bhietole,
Karonn to nhoim-chea ghosghoxit udka bhaxen ietolo,
Jehovachi xokti taka vhanvoun haddlolea bhaxen gheun ietoli.
20 Jehova mhunntta: “Sionak Soddoupi ietolo,
Aple oprad soddun dileat tea Jakobachea sonsti pasot to ietolo.”
21 Jehova mhunntta, “Hanv tanchea sangata ho korar kortolom: Mhoji povitr xokti ji tujer asa, ani mhojim utram jim hanvem tujea tonddant ghatleant, tim atam thaun ani sasnak poriant, tujea, tujea bhurgeanchea* ani tujea natranchea* tonddantlean kednanch kaddun gheunchenant,” oxem Jehovan sanglam.