HOSEA
1 Uzia, Jotham, Ahaz ani Hezekia, Judacher raj choloitale tednam ani Joashacho put Jeroboam Izraelacher raj choloitalo tednam, Bericho put Hoseak* Jehovacho* sondex mellʼllo. 2 Jehovan Hosea vorvim aplo sondex diunk suru kelo tednam, Jehovan Hoseak mhunnttlem: “Voch, ani osle eke baile lagim kazar zav ji uprant xindollki kortoli,* ani tichea xindollkek* lagon tuka bhurgim zolmotolim. Karonn hea desan xindollki korun,* Jehovak purnn toren soddun dila.”
3 Tor Hosea vochon, Diblaimachi dhuv Gomera lagim kazar zalo. Ti gorbest zali ani tinnem Hoseachea putak zolm dilo.
4 Tednam Jehovan Hoseak mhunnttlem: “Tum hea putachem nanv Jezriel* dovor. Karonn hanv thoddeach tempan, Jezrielant jem rogot varoilʼlem, tacho Jehuchea ghorannea koddlean hixob ghetolom ani Izraelachem raj kabar kortolom. 5 Tea disa Jezrielachea Falkeant* hanv Izraelacho dhonu moddttolom.”
6 Ti anik ek pavtt gorbest zali ani tinnem eke dhuvek zolm dilo. Tednam Devan Hoseak mhunnttlem: “Tum hea cheddvak Loruhama* mhunn nanv di. Karonn atam hanv Izraelak anik doia dakhounchona. Hanv tankam khorench dhanvddaun ghaltolom. 7 Punn hanv Judachea ghoranneak doia dakhoitolom ani hanv Jehova tancho Dev tankam salvar kortolom. Punn dhonu vo tolvar vo zhuz vo ghodde vo ghoddesvar uzar korun nhoi.”
8 Loruhaman dudh soddlea uprant, Gomer porot ek pavtt gorbest zali ani tinnem eka putak zolm dilo. 9 Tednam Devan mhunnttlem: “Tum hea putak Loami* mhunn nanv dovor. Karonn tumi mhoje lok nhoi ani hanv-ui tumcho Dev nhoi.
10 “Ani Izraelachea lokancho* ankddo doria voilea renvenchea konnam sarko, mezunk vo mapunk zaina titlo astolo. Ani jea zagear tankam mhunnttlolem, ‘Tumi mhoje lok nhoi,’ thoim tankam mhunnttole, ‘Tumi jivea Devache put zaun asat.’ 11 Toxench, Judache ani Izraelache lok ektthaim zaun ekvottan astole. Ani te aplea pasot ek mukheli vinchun kaddttole ani desantlean bhair voitole, karonn to Jezrielacho khas dis astolo.
2 “Tumchea bhavank mhunnat, ‘Mhojea lokamno!’*
Ani tumchea bhoinnank mhunnat, ‘Devan doia dakhoilʼlea bailamno!’*
2 Tumchea avoicher arop laiat, ticher arop laiat.
Karonn ti mhoji bail nhoi ani hanv ticho ghov nhoi.
3 Na zalear, tichea zolma disa ti asli toxi hanv tika vinglli kortolom.
Hanv tichi poristhiti oronnʼnnea sarki kortolom,
Ani udok naslolea suke zomni sarki kortolom,
Ani tanen tika moronk soddttolom.
4 Ani tichea putank hanv doia dakhounchona,
Karonn te xindollkeche* bhurge.
5 Tanche avoin xindollki kelea.*
Jichea kusveant te asle, tinnem lojechim kamam keleant. Karonn tinnem mhunnttlem,
‘Mhojer mortat tea mhojea mog korpeam* fattlean hanv voitolem,
Te mhaka mhozo unddo ani mhojem udok ditat,
Mhozo vul,* mhoje kopdde, mhojem tel ani mhozo soro ditat.’
6 Tor hanv kantteanchi voi bandun tichi vatt addaitolom.
Ani hanv tichea mukhar fatranchi vonnott ubi kortolom,
Jea udexim tika tichi vatt mellchina.
7 Ticher mortale tea tichea mog korpeam fattlean ti dhanvtoli, punn ti tanchea meren pavonk xokchina.
Ti tankam sodhtoli, punn te tika mellchenant.
Uprant ti mhunnttoli, ‘Hanv mhojea poilea ghova lagim porot voitolem,
Karonn atam poros mhoji poilinchi poristhiti chodd bori asli.’
8 Tika dano, novo drakxancho soro ani tel hanvuch ditalom mhunn tinnem vollkhon gheunk na.
Hanvench tika bhorpur chandi dilʼli,
Ani bhangar dilʼlem, jem lokamnim Baalachi bhokti korunk uzar kelem.
9 ‘Dekhun hanv porot ieun, lunvnnechea vellar mhozo dano kaddun ghetolom,
Ani novo drakxancho soro toiar zalea uprant hanv to kaddun ghetolom,
Ani apli vinglli kudd dhampunk ti uzar kortali tem mhojem vul ani mhozo boro kopddo* hanv kaddun ghetolom.
10 Ticher mortat tea tichea mog korpeam mukhar hanv tichem vingllemponn uktem kortolom,
Ani khoinchoch munis tika mhojea hatantlo vattaunk xokchona.
11 Hanv tika khuxalkai dita tem soglem bond kortolom,
Tichim festam, tiche nove chondrimache dis,* tiche sabath, ani ticheo sogleo porbo hanv bond kortolom.
12 Tichea drakxanchea valincho ani anjiranchea zhaddancho hanv nas kortolom, zanchea vixim tinnem mhunnttlem:
“Ho mhozo pagar, zo mhojer mortat tea mhojea mog korpeamnim mhaka dila.”
Hanv tanchem ran korun uddoitolom,
Ani ranvotti zonvaram tem khaun uddoitolim.
13 Hanv tiche koddlean tea soglea disancho hixob magtolom, jednam ti Baalachea murteank iodn bhettoitali,
Ringam* ani her nettouncheo vostu ghalun nhestali ani ticher mortat tea tichea mog korpeam fattlean dhanvtali,
Ani ti mhaka samkich visorloli,’ oxem Jehova mhunntta.
14 ‘Tor hanv tika somzaitolom,
Hanv tika oronnʼnneant vhortolom,
Ani tichem kalliz jikhon gheunk hanv tichea lagim uloitolom.
15 Tea vellar thaun, hanv tiche drakxanche molle tika porot ditolom,
Ani Akorachem Falkem* tichea pasot bhorvonxeacho darvontto zatolem.
Ejiptt desantlean ti bhair sorloli tea disa sarki,
Tichea tornnattponnachea disam sarki, thoim ti mhaka zobab ditoli.’
16 Jehova mhunntta, ‘Tea disa tum mhaka,
Mhozo dhoni* mhunnchina, punn Mhozo ghov mhunn ulo martoli.’
17 ‘Baal murteanchim nanvam hanv tichea tonddantlim kaddun uddoitolom,
Ani tanchea nanvanchi ti porot kednanch ugddas kaddchina.
18 Tea disa hanv tanche pasot ranantlea zonvaram sangata,
Ani mollba voilea suknneam sangata, toxench pott goxttun choltolea pranneam sangata ek korar kortolom,
Hanv desantlean dhonu ani tolvar kaddun uddoitolom ani zhuz kabar kortolom,
Ani hanv tankam thoim surokxit jieunk ditolom.
19 Hanv tuka sasnak mhoji vhokol korun ghetolom,
Ani tujea lagim nitivontponnan ani neai-nitin,
Visvaxi mogan ani doien vagtolom.
20 Hanv tuka visvaxiponnan mhoji vhokol korun ghetolom,
Ani tum mhaka, Jehovak, khorench vollkhon ghetoli.’
21 Jehova mhunntta, ‘Tea disa hanv zobab ditolom,
Hanv mollbak zobab ditolom,
Ani tem prithumek zobab ditolem,
22 Ani prithum, daneak ani novea drakxanchea soreak ani telak zobab ditoli,
Ani tim Jezrielak* zobab ditolim.
23 Bim vomptat toxem hanv mhojea pasot tika zomnir vomptolom,
Ani jika doia dakhounk nasli,* tika hanv doia dakhoitolom,
Mhozo lok nhoi* tankam hanv mhunnttolom: “Tumi mhoje lok,”
Ani tim mhaka mhunnttolim: “Tum mhozo Dev.”’”
3 Uprant Jehovan mhaka sanglem: “Izraelache lok dusrea devam fattlean voitat ani tankam pasanchi bhakri* khub avoddtta, tori astana Jehova tancho mog korta. Teach bhaxen, tum-ui porot voch ani jea bailecho dusro munis mog korta ani ji pordvar* korit asa, tea bailecho mog kor.”
2 Tor chandiche 15 kuddke ani dedd homer* zov* diun hanvem tika vikti ghetli. 3 Uprant hanvem tika mhunnttlem: “Tum zaite dis porian mhojich zaun urtoli. Tunvem xindollki korchi nhoi* ani dusrea dadlea sangata onoitik kuddicho sombond dovorcho nhoi, ani hanv-ui tujea sangata tosoch vagtolom.”*
4 Karonn zaito temp* poriant, Izraelant raza, kunvor, iodn, povitr khambo, toxench efod* ani terafim murteo* ascheonant. 5 Uprant Izraelache lok porot ietole ani tancho Dev Jehovak ani tancho raza Davidak sodhtole, ani xevottachea disamnim Jehovachem boreponn onnbhovunk tim bhirantin kampun tache lagim ietolim.
4 Izraelachea lokamno, Jehovacho sondex aikat,
Hea desachea lokancher Jehovan kes kelea.
Karonn hea desant sot, visvaxi mog ani Devachem ginean na.
2 Hanga khotte soput ghevop, fott marop, jivexim marop,
Chorop ani pordvar* korop sogleak posorlam,
Ani hanga eka-fattlean-ek khun zait asat.
3 Tea pasot, des dukh kortolo
Ani thoim ravpi soglim oskot zaun moron voitolim.
Toxench ranantlim zonvaram, mollba voilim suknnim
Ani doriantlim nustim pasun mortolim.
4 “Punn khoinchea-i munxan konnachoch virodh korcho nhoi, vo konnakuch sudharcho nhoi,
Karonn tuje lok iadnikacho virodh kortat toslea lokam sarke zaun asat.
5 Tor tum disachea uzvaddant addkhollon poddttolo,
Ani rat aslolea porim provadi* pasun tujea sangata addkhollon poddttolo
Ani hanv tujea avoik vogi* kortolom.
6 Mhoje lok vogi poddttole* karonn tankam mhoji vollokh na.
Ani mhoji vollokh gheunk tumi nakarlea dekhun,
Hanv-ui tumkam nakarun, mhoje iadnik zaun seva korunk diunchom na.
Ani tumi tumchea Devacho kaido* visorleant dekhun,
Hanv-ui tumchea putank visortolom.
7 Jitle te vaddot gele, titlech te mhojea add patok korit gele.
Hanv tanchi mhoima kaddun ghetolom ani tankam lojen ghaltolom.*
8 Mhojea lokanchea patkancher te aplem pott bhortat,
Ani lokanchea guneanvanchi tankam as zalea.
9 Lokancho ani iadnikancho porinnam ek sarkoch zatolo,
Tanchea kamancho hanv tanche koddlean hixob ghetolom,
Ani tanchea kornneancho porinnam hanv tankam bhogunk laitolom.
10 Te khatole, punn te dhadoxi zaunchenant.
Te zaiteam zannam sangata onoitik kuddicho sombond dovortole* punn tancho ankddo vaddchona,
Karonn tannim Jehovak man diunk na.
11 Xindollki* ani porno ani novo drakxancho soro,
Sarkem asa tem korchi amchi itsa kabar korun uddoita.*
12 Mhoje lok aplea lakddachea murteam koddlean solʼlo ghetat,
Tancho danddo* sangta tem tim kortat.
Karonn xindollki korpacheo* vondovnneo tankam chukichea vatten vhortat,
Ani xindollkechim* kamam korun te aplea Devachea adhin ravonk nakartat.
13 Te dongrachea tengxer iodn bhettoitat,
Ani dhunvor voir voicho mhunn te porvotancher iodn bhettoitat.
Oak* ani storax* rukha ponda ani soglea vhoddlea rukham ponda te oxem kortat,
Karonn hea rukham ponda bori savlli asta.
Taka lagon tumcheo dhuvo xindollkechim* kamam kortat,
Ani tumcheo suno pordvar kortat.
14 Hanv tumchea dhuvam koddlean tanchea xindollkechea* kamancho,
Ani tumchea sunam koddlean tannim kelʼlea pordvaracho hixob gheunchom na.
Karonn dadle xindoll bailam sangata voitat,
Ani mondirant xindollki korpeam sangata iodn bhettoitat.
Oslea somzonni naslolea lokancho nas zatolo.
15 Are Izraela, tum xindollkechim* kamam korta,
Punn Juda, tum tachea sarkem patok korinaka.
Gilgal vo Bethavenant ieum naka,
Ani, ‘Jehovachea jivacho soput!’ oxem mhunnon soput ghenaka.
16 Eke hottʼtti* gaie bhaxen Izrael hottʼtti zala.
Uktea mollar* chorvak vhelʼlea lhan menddrea bhaxen Jehova atam tankam chorvak vhortolo kai?
17 Efraim* murteanchi bhokti korta.*
Taka tosoch soddat!
Ani tichea odhikareank* lojechim kamam khub avoddttat.
19 Varo tika aplea pakhamnim guttlaun vhortolo,*
Ani tannim bhettoilʼlea iodnank lagon tankam loz zatoli.”
5 “Iadnikamno aikat,
Izraelachea ghorannea dhean diat,
Razachea ghorannea aikat,
Tumcho neai zauncho asa.
Karonn tumi Mizpak manddlolo ek fas,
Ani Taboracher posrailʼlem ek zall zaun asat.
2 Mhojea add geleat* te jivexim marchea kamant samkech buddleat,*
Ani hanv tankam sogleank xittkaitam.*
3 Hanv Efraimak vollkhotam,
Ani Izrael mhojea thaun liplolo na.
Karonn Efraim, tunvem zaitea zannam sangata onoitik kuddicho sombond dovorla,*
Izraelan apleakuch boxttaila.
4 Tanchim kamam tankam tanchea Deva koddem porot ieunk dinant,
Karonn xindollkechi* vondovnni tanchea modem rigloli asa,
Ani Jehovak te vollkhonant.
5 Izraelachea gorvan tachea add* govai dilea,
Izrael ani Efraim, dogui aplea guneanvak lagon addkhollon poddleat,
Ani Juda pasun tanchea sangata addkhollon poddla.
6 Te aplea menddranchea ani boilanchea hinddak gheun Jehovak sodhunk gele,
Punn to tankam mellonk na.
To tanchea thaun pois gelʼlo.
7 Tannim Jehovacho visvasghat kela,
Karonn te pordexi putanche bapui zaleat.
Atam tancho ani tanchea xetancho* eka mhoinea bhitor nas zatolo.*
8 Gibeant xing* vazoi, ani Ramant turturi vazoi!
Zhuz zatolem mhunn Bethavenant kollounni kor—Benjamin, ami tujea fatta-fatt ietat!
9 Are Efraima, khastichea disa tuji poristhiti kitli vaitt zalea ti polloun, lok samkech thottoktole.
Izraelachea kulla sangata khorench kitem ghoddttolem tem hanvem kolloilam.
10 Judache kunvor, ximecho fator haloitat* tanchea sarke asat.
Udka bhaxen hanv tancher mhozo rag votoitolom.
11 Efraimacher zulum zata, tacher poddlolea formonnak lagon to chiddʼddola,
Karonn aplea dusmanachea fattlean vochonk tannem nichov kelʼlo.
12 Tor hanv Efraima pasot eka kiddea* sarko aslom,
Ani Judachea ghorannea pasot kuslolo koso aslom.
13 Efraiman aplem duens ani Judan aplo ghavo polloilo tednam,
Efraim Asiria koddem gelo ani tannem eka vhoddlea raza lagim sondexkar dhaddlo.
Punn to raza tumkam boro korunk xoklona,
Ani tumcho ghavo pekounk xoklona.
14 Karonn hanv Efraimak eka tornea xinva sarko zatolom,
Ani Judachea ghoranneak eka xoktivont xinva sarko zatolom.
Hanv tankam pinzun tanche kuddkean-kuddke kortolom ani voitolom,
Hanv tankam ubarun vhortolom ani konnuch tankam vattaunchona.
15 Hanv portun mhojea zagear voitolom, ani jea meren tanchea patkacho porinnam tankam bhogunk poddona, tea meren hanv thoinch ravtolom,
Ani uprant te mhoji maniotai melloun gheunk* sodhtole.
Sonkoxttant astana, te mhaka sodhtole.”
6 “Ieiat, ami Jehova koddem porot vochom-ia,
Karonn tannem amche pinzun kuddkean-kuddke keleat, punn to amkam pekovnni ditolo.
Tannem amkam mar ghatla, punn toch amche ghave bandtolo.
2 To don disamnim amkam jivo kortolo.
Tisrea disa to amkam ubim kortolo,
Ani ami tachea mukhar jietolim.
3 Ami Jehovak vollkhotolim, taka vollkhon gheunk ami kallzantlean proitn kortolim.
Sokallcho suria udetach tea bhaxen to ietoloch,
To amche koddem ghos-ghoxeamnim poddtta toslea pausa sarko ietolo,
Uprant ieta tea pausa* sarko to akʼkhi prithum bhizoitolo.”
4 “Are Efraim, hanv tujem kitem korum?
Are Juda, hanv tujem kitem korum?
Karonn tuzo visvaxi mog sokallchea kupam sarko,
Ani rokddoch na zata toslea dova sarko.
5 Taka lagon hanv provadeam udexim tankam katrun uddoitolom,
Mhojea tonddantlean ieta tea utramnim hanv tankam jivexim martolom.
Ani tumkam je zhoddtteche nirnnoi sangleat, te uzvadda sarke porzollttole.
6 Karonn hanv iodnak lagon nhoi, punn visvaxi mogak* lagon khuxal zatam,
Hulpailʼlea bhettounneank lagon nhoi, punn Devachea gineanak lagon khuxal zatam.
7 Punn tannim chaltea munxa bhaxen korar moddla.
Thoim tannim mhojea sangata visvasghat kela.
8 Gilead noxtteanchem nogor zaun asa,
Tachim panvlam rogtan bhorleant.*
9 Iadnikancho zomo, eka munxak luttunk jhilkuttant lipon boslolea zomea sarko asa.
Te Shekemachea rostear khun kortat.
Tanchi vagnnuk lojechi zaun asa.
10 Hanvem Izraelachea ghoranneant ek samki vitt haddtta tosli vost polloilea.
Thoim Efraim xindollki korta,
Izraelan apleakuch boxttaun uddoila.
11 Punn Juda, tuzo lunvnni korcho vell tharailʼlo asa,
Tea vellar hanv koidi kelʼlea mhojea lokank porot haddttolom.”
7 “Hanv Izraelak pekovnni diuncho proitn kortalom title-i pavtti,
Efraimacho guneanv ukto zata
Ani Samariechem noxtteponn uktem zata.
Karonn te fosounchim kamam kortat,
Chor bhitor ghustat ani luttpeanche zome bhair luttʼttat.
2 Punn hanv tanchea noxtteponnacher dhean ditolom mhunn te aplea kallzant pasun chintinant.
Atam tanchea noxttea kamamnim tankam gherav ghatla,
Tancheo korneo mhojea mukhar asat.
3 Te noxttim kamam korun razak khuxal kortat,
Ani fosounchim kamam korun kunvrank khuxal kortat.
4 Te sogle pordvar korpi,
Te poderan uzo pettoilʼlea bhottʼtte* sarke asat,
Zo pitt mollun tem fugom poriant bhottʼttentle pettlole kollxe* haloina.
5 Amchea razachea festachea disa kunvor duent poddle
—Drakxanchea soreak lagon tancho rag choddla.
Moskorio kortoleam sangata tannem hat melloila.*
6 Karonn taplolea bhottʼtte sarkim aslolim kallzam gheun te ietat.*
Poder akʼkhi rat nhidta,
Sokallim bhottʼttent ujeache agtte borech pettʼttat.
7 Te sogle bhottʼtte sarke taplole asat,
Ani te aplea odhikareank* gillttat.
Tanche sogle raza poddleat,
Tanchea modlo konnuch mhaka ulo korina.
8 Efraim dusrea raxttram sangata misoll zata.
Efraim eke bhakre sarko asa ji portunk na.
9 Onvollkhi lokamnim tachi xokti khaun uddoilea, punn hea vixim taka khobor na.
Tache kens dhove zaleat, punn hea vixim to nokllo.
10 Izraelachea gorvan tachea add govai dilea,
Punn tim Jehova tanchea Deva lagim porot ieunk nant,
Ani hem soglem ghoddonui tannim taka sodhunk na.
11 Efraim pixeponn korta toslea eka parvea sarko zaun asa, zaka somzonni na.*
Tannim Ejipttak ulo marla, te Asirient geleat.
12 Tim voitat thoinsor hanv tancher mhojem zall uddoitolom.
Mollba voilea suknneam bhaxen hanv tankam sokol haddttolom.
Tanchea zomeak dilʼle xittkaunne pormonnem hanv tankam xist ditolom.
13 Tancher hai, karonn te mhojea thaun pollon geleat!
Tancho nas zaum, karonn tannim mhojea add patok kelam!
Hanv tankam soddounk toiar aslom, punn tannim mhojea vixim fotti sangleat.
14 Te aplea khattir vhoddlean bob marun roddot asle,
Tori astana tannim kallzantlean mhaka modoti pasot ulo marunk na.
Te dano ani novea drakxanchea sorea pasot apleakuch ghave ghaltale.
Te mhojea add voitat.
15 Hanvem tankam xist dili ani tanche hat ghott kele,
Tori astana te mhojea add asat, ani vaitt korchi manddnni kaddttat.
16 Tannim apli vatt bodolʼli, punn unchaiechea vatten nhoi,*
Dori luz* aslolea eka dhonu bhaxen te patieupa sarke nant.
Tanche kunvor aplea jibemnim virodh kortat dekhun tankam tolvarin marun uddoitole.
Ani haka lagon Ejipttant tancheo moskoreo zatoleo.”
8 “Tujea tonddant xing* dhor ani vazoi!
Dusman ghonni sarko Jehovachea ghora add ieta.
Karonn tannim mhozo korar moddla ani mhojea kaidea add geleat.
2 Te mhaka vhoddlean mhunnttat, ‘Mhojea Deva, ami Izraelitkar tuka vollkhotat!’
3 Borem tem Izraelan nakarlam.
Dusman tachea fattik lagom.
4 Tannim razank nemle, punn mhojea udexim nhoi.
Tannim kunvrank nemle, punn mhoji maniotai nastana.*
Aploch nas zaunche khatir,
Tannim aplea chandicheo ani bhangracheo murteo keleat.
5 Are Samaria, hanvem tuzo paddkulo nakarla.
Mhozo rag tancher pettla.
Te xudʼdh* zaunk anik kitlo mhunn vell laitole?
6 Ho paddkulo Izraelantlo,
Kola aslolea eka kamdaran to kela, ani to Dev nhoi.
Samariechea paddkuleache kuddkean-kuddke zatole.
7 Te varem vomptat,
Ani te vadoll lunvtole.
Tanchea rompeak dano pikona,
Jem kirlota tachea thaun pitt mellona.
Kitem-i mellʼllear pasun, pordexi* lok tem gillttole.
8 Dusman Izraelak gillun uddoitolo.
Atam tim dusrea raxttram modem,
Kainch upeog naslolea aidona sarkim zatolim.
9 Karonn te eka ranvotti gaddva sarke Asiria koddem gele.
Efraiman mog korpeank* bhaddeak ghetleat.
10 Te tankam dusrea raxttram koddlean poixe diun bhaddeak haddttat,
Tori astana hanv tankam ektthaim kortolom,
Tancher razan ani kunvran ghatlolea bharak lagon tankam dukh bhogchem poddttolem.
11 Karonn Efraiman patok korunk zaiteo vedi bandleat.
Heo vedi bandun tannim patok kelam.
13 Te mhaka iodn bhettoitat ani tem mas khatat,
Punn hanv Jehova, tanchea iodnank lagon khuxal zaina.
Atam hanv tanche guneanv ugddasak haddttolom ani tanchea patkank lagon tankam khast laitolom.
Te Ejiptta koddem porot geleat.*
14 Izrael aplea Rochnnarak visorlo ani tannem mondiram bandlim,
Ani Judan kilʼle aslolim zaitim xaram bandlim.
Punn hanv tachea xaramnim uzo dhaddttolom,
Ani to uzo dor eka xarantle gopur lhasun uddoitolo.”
9 “Are Izraela, khuxal zainaka,
Dusrea raxttrantlea lokam bhaxen khuxal zainaka.
Karonn xindollki korun* tum tujea Deva thaun pois gelea.
Daneachea dor eka mollnnechea khollar,* xindollki korun melltta to pagar tuka khub avoddtta.
2 Punn mollnnechem kholl ani drakxam maddounk toiar kelʼlo zago tanchem pott bhorchem na.
Ani tika novo drakxancho soro mellchona.
3 Te Jehovachea desant ravonk xokchenant.
Tachea bodlek, Efraim Ejipttant porot voitolo,
Ani Asirient te oxudʼdh vostu khatole.
4 Hea fuddem te Jehovak drakxanchea soreacheo bhetto diunchenant,
Tanche iodn taka manvochenant.
Te dukh kortat toslea unddea sarke asat,
Je to unddo khatat, te sogle apleakuch oxudʼdh kortat.
Karonn tancho unddo fokot tancheach pasot asa,
To Jehovachea ghorant ieunchona.
5 Tumi ektthaim zaunchea* disa,
Jehovachea porbe disa kitem kortolim?
6 Karonn polloi! nasak lagon tankam pollon voichem poddttolem.
Ejiptt tankam ektthaim kortolo, ani Memfis tankam purtolo.
Ranvotti jhilkuttam* tancheo chandicheo moladik vostu tabeant ghetolim
Ani tanchea tombumnim kantteanchim jhilkuttam zatolim.
7 Hixob gheunche dis ietole,
Bodlo gheunche dis ietole,
Ani Izraelak hem kollttolem.
Tancho provadi okʼkol naslolo zatolo, ani prerit kelʼlo munis piso zatolo.
Tuje guneanv khub asat dekhun, tujea add dusmankai bhorpur vaddlea.”
8 Efraimacho rakhonndar mhojea Deva sangata aslo.
Punn atam tachea provadeancheo sogleo vatto, suknneak dhorpeachea fasa sarkeo asat.
Tachea Devachea ghorant dusmankai asa.
9 Gibeachea disamnim ghoddlem toxem, te nisonttonak pavoita toslea kamamnim purnn toren buddleat.
To tanche guneanv ugddasak haddttolo ani tanchea patkank lagon tankam khast laitolo.
10 “Oronnʼnneant drakxam mellttat toxim mhaka Izrael mellʼllo.
Tuje purvoz mhaka, anjirachea zhaddak zalʼlea poilea anjiram sarke disle.
Punn te Peorachea Baala koddem gele,
Tannim apnnakuch lojechea vostuk* bhettoile,
Ani te vitt haddtta toslea vostu sarke zale, zacho te mog kortale.
11 Efraimachi mhoima suknnea bhaxen uddon voita.
Konnuch zolm dina, konnuch gorbest zaina ani konnachoch gorb dhorona.
12 Punn tannim bhurgeank vaddoilim zalear pasun,
Ekui munis urona zaunk hanv tankam tanche koddlean kaddun ghetolom,
Hoi, hanv tankam fatt kortolom tednam tanche hal zatole!
13 Chorvachea mollar roilʼlo Efraim mhaka Tira bhaxen aslo,
Atam Efraimak aplea putank jivexim marunk bhair haddunk poddttole.”
14 Jehova Deva, tankam jem diunk zai tem tankam di,
Bhurgem dhorona toslo kusvo ani suklolim horddim.*
15 “Tannim Gilgalant soglem noxtteponn kelʼlem, ani taka lagon thoim hanv tancho dves korunk laglom.
Tanchea noxttea kamank lagon hanv tankam mhojea ghorantlo dhanvddaitolom.
Hanv tancho anik mog korchom na,
Tanche sogle kunvor hottʼtti asat.
16 Efraimak hanv katrun uddoitolom.
Tanchem mull suktolem ani tankam ekui foll zaunchem na.
Tankam bhurgim zolmolim zalear pasun, hanv tanchea mogachea ballkank marun uddoitolom.”
17 Mhozo Dev tankam nakartolo,
Karonn tannim tachem aikonk na,
Tim ghor-dar na zaun, raxttram-raxttramnim hanga-thoim bhonvtolim.*
10 “Izrael duens laglolea* vali sarko asa ji follam dita.
Taka jitlim chodd follam zatat, titleo chodd to vedi bandta,
Tachi zomin jitlem borem pik dita, title to aple povitr khambe anik sobit korta.
2 Te dhongi zaleat,*
Atam tankam guneanvkari tharaitole.
Konn tori asa zo tancheo vedi moddttolo ani tanchea khambeancho nas kortolo.
3 Atam tim mhunnttolim, ‘Amkam raza na, karonn ami Jehovachi bhirant dovrunk na.
Ani ek raza amchea pasot kitem mhunn korunk xokta?’
4 Te pokim utram uloitat, khotte soput ghetat, ani korar kortat,
Tor te kortat ti nit, zot ghatlolea xetant vaddttolea vikari tonna* bhaxen asa.
5 Samarient ravtat te lok Bethavenachea paddkuleachea murtek lagon bhietole.
Thoinche lok tichea pasot dukh kortole.
Toxench porkea devanche pujari je tika ani tiche mhoimek lagon khuxal zatale, te-ui dukh kortole.
Karonn ti tanche thaun pois voitoli.*
6 Eka vhoddlea razak dennem koxem tika Asirient haddttole.
Efraimak lojek ghaltole,
Ani Izraelan zo solʼlo pallʼllo taka lagon taka loz zatoli.
7 Udkacher moddun uddoilʼlea lhan khandea bhaxen,
Samaria ani tichea razacho nas* zatoloch.
8 Izraelak patkant ghaltat tea Bethavenachea unchlea zageancho nas zatolo.
Tanchea vedincher kantte ani kantteanchim zhaddam zatolim.
Lok dongrank mhunnttole, ‘Amkam dhampat!’
Ani porvotank mhunnttole, ‘Amcher poddat!’
9 Are Izraela, Gibeant jem ghoddlem tea disam thaun tum patok korit asa.
Thoim tancho sobhav bodlonk na.*
Gibeantlea zhuzan, onitivont lokancho* purnn toren nas korunk na.
10 Mhaka zai tednam hanv tankam xist ditolom.
Tanchea donui guneanvanchem vojem tancher ghatlolem astolem tednam*
Raxttrantle lok tanchea add ektthaim zatole.
11 Efraim ek xikoiloli gai asli, jika mollnni korunk avoddttalem,
Taka lagon hanvem tichea sobit manecher vojem ghalunk na.
Atam mat hanv konnank tori Efraimacher bosoitolom.*
Juda zot ghaltolo, ani Jakob tachea pasot matieche gulle* foddttolo.
12 Tumchea pasot nitivontponnachem bim vompat ani visvaxi mogachi lunvnni korat.
Jehovak sodhunk sondhi asa tea meren
Tumchea pasot pik zata tea zomnicher zot ghalat.
Ani to ietolo ani tumkam nitivontponnan xikoitolo.
13 Punn tumi noxtteponnachem zot ghatlam,
Onitivontponnachi lunvnni kelea,
Ani khotteponnachem foll khailam.
Karonn tumi tumcheach vattecher visvas dovorla,
Mezunk zaina titlea tumchea zhuzareancher visvas dovorla.
14 Tumchea lokam add zhuzancho avaz aikonk ietolo,
Ani kilʼle aslolea tumchea soglea xarancho nas zatolo.
Arbelachea ghoranneancho Shalmanan nas kelʼlo,
Tednam zhuzachea disa avoink tanchea bhurgeam borabor zomnir apttun kuddkean-kuddke kelʼle tea toren zatolem.
15 Are Bethela, tujea noxtteponnak lagon tujea sangata oxench kortole,
11 “Izrael ek lhan bhurgo aslo tednam hanvem tacho mog kelo,
Ani hanvem mhojea putak Ejiptta thaun apoun haddlo.
2 Jitle chodd tannim* tankam apoile,
Title chodd te tanche koddlean pois gele.
Te Baalachea murteank iodn bhettoit ravle,
Ani kantoilʼlea murteank bolidanam bhettoit ravle.
3 Punn Efraimak cholonk xikoilʼlo to hanv, tankam hanv mhojea vengent ghetalom.
Ani hanvem tankam pekovnni dilʼli mhunn tannim vollkhon gheunk na.
4 Munxanchea doriemnim* ani mogachea doriemnim hanv tankam mhojea lagim voddit ravlom,
Hanv tanchea pasot tanchea mane* voilem zum kaddpi koso aslom,
Ani hanvem dor ekleak mogan jevonn haddun dilem.
5 Te Ejiptt desant porot ieunchenant, punn Asiria tancho raza zatolo,
Karonn mhojea lagim porot ieunk tannim nakarlam.
6 Tachea xarancher tolvar akromonn kortoli.*
Tanchea manddnneank lagon, ti tachea darvontteanche lokhnnache dandde moddun uddoitoli ani khaun uddoitoli.
7 Mhojea lokamnim mhojea sangata ovisvaxiponnan vagcho nichov kela.
Tannim tankam voir* apoile tori astana konnuch utthonaslo.
8 O Efraima, hanv tuka koso soddun dium?
O Izraela, hanv tuka dusmananchea hatant koso dium?
Hanv tujea sangata Adma bhaxen koso vagom?
Hanv tuka Zeboima bhaxen koso korum?
Hanvem mhojem mon* bodolʼlam,
Teach borabor, hanv tumchea pasot doie-maien bhorlam.
9 Hanv mhozo ragacho uzo tujer votounchom na.
Hanv Efraimacho porot nas korchom na,
Karonn hanv munis nhoi punn Dev,
Tumchea modem ravta to Povitr Dev.
Ani hanv ragan bhoron tumchea add ieunchom na.
10 Te* Jehovachea fattlean choltole, ani to eka xinva bhaxen goroztolo,
To gorozta tednam tache put ostome thaun koddkoddon ietole.
11 Te Ejiptta thaun bhair soron ietole tednam eka suknnea bhaxen koddkoddttole,
Eka parvea bhaxen zo Asiria thaun ieta,
Ani hanv tankam tanchea ghoramnim ravonk ditolom,” oxem Jehova mhunntta.
12 “Efraim mhaka fokot fotti sangta,*
Hanv khoinsorui polloitam tednam mhaka Izraelachem khotteponn dista.
Punn Juda azunui Deva sangata bhonvta,*
Ani to Bhov Povitr Devak visvaxi asa.”
12 “Efraim varean aplem pott bhorta.
To dis-bhor udente thaun ieta tea varea fattlean dhanvta.
To vaddoun-choddoun fotti sangta ani bhorpur maramari korta.
Te Asiria koddem korar kortat ani Ejipttant tel gheun voitat.
2 Jehovan Judacher kes kelea.
To Jakoba koddlean tachea kamam pormonnem hixob ghetolo,
Ani tachea korneam pormonnem taka farik kortolo.
3 Kusveant tannem aplea bhavachea khonttek* dhorlo,
Ani to aple purnn xokten Deva lagim zhogoddlo.
4 To eka devduta lagim zhogddot ravlo ani jhiklo.
Tachi maniotai melloun gheunk tannem khub roddon tache lagim vinoti keli.”
To* taka Bethelant mellʼllo ani thoim Dev amchea* lagim uloilo.
5 Jehova fouzancho Dev,
Jehova, hea nanvan tacho ugddas kortat.
6 “Tor tujea Deva lagim porot ieo,
Visvaxi mog korit rav ani sarkem tem korit rav,*
Ani sodanch tujea Devacher bhorvonso dovor.
7 Punn veapar-dhondo korpeachea* hatant fosoita tosleo tagddeo asat.
Taka dusreank nagounk khub avoddtta.
8 Efraim mhunnot ravta, ‘Hanv khorench girest zala.
Mhaka girestkai mellʼllea.
Ani hanvem kelʼlea soglea vavrant tankam kainch chuk vo patok mellchem na.’
9 Punn tum Ejipttant aslo tednam thaun hanv tuzo Dev Jehova.
Tharailʼlea vellar zata tea porbechea disam pormonnem,
Tum porot tombumnim ravo-so hanv kortolom.
10 Hanv provadeam lagim uloilom,
Hanvem tankam dorxonancher-dorxonam dilim.
Ani hanv provadeam udexim vopareamnim uloilom.
11 Gileadant fosovop* ani fottingponn asa.
Gilgalant tannim boilanche iodn bhettoileat.
Ani tancheo vedi, zot ghatlolea xetant aslolea fatranchea raxi bhaxen asat.
12 Jakob Aramachea* vattarant* pollon gelo,
Thoim ek bail mellchi mhunn Izraelan chakri keli,
Ek bail mellchi mhunn tannem menddranchi rakhonn keli.
13 Eka provadea udexim Jehovan Izraelak Ejipttantlean bhair haddlo,
Eka provadea udexim tachi rakhonn keli.
14 Efraiman Devak khub dukhoila,*
Tannem varoilʼlea rogtak toch zobabdar.
Tannem tachea Dhoniak kelʼlea opmanak lagon to taka farik kortolo.”
13 “Efraim uloitalo tednam lok koddkoddttalo,
To Izraelant khub mhotvacho aslo.
Punn to Baalachi bhokti korun guneanvkari zalo ani melo.
2 Atam te anikui patok kortat,
Ani aplea lagim aslolea chandicheo, murteo* kortat,
Kola aslole kamdar apli kola uzar korun murteo kortat.
Te tankam mhunnttat, ‘Bolidan bhettoitolea munxamnim paddkuleancho umo gheuncho.’
3 Taka lagon te sokallchea kupam sarke zatole,
Rokddoch na zata tea dova sarke zatole,
Vadoll uboun vhorta toslea mollnnechea kholla voilea bhatachea sali* sarke zatole,
Ani ghora voir dovorlolea burkantlean bhair sorta tea dhunvra sarke zatole.
4 Punn tum Ejipttant aslo tednam thaun hanv tuzo Dev Jehova.
Mhojea bogor tum anik khoincheach Devak vollkhonaslo,
Ani mhojea bogor salvar korpi anik konnuch na.
5 Oronnʼnneant, dukollachea desant hanv tuka vollkhotalom.*
6 Tanchea chorvachea mollar choron te dhadoxi zale,
Te dhadoxi zale ani tanchem kalliz gorvan bhorlem.
Ani tea pasot te mhaka visorle.
7 Hanv tanchea pasot eka tornea xinva sarko zatolom,
Ani vatter lipon boslolea eka bibttea vaga sarko zatolom.
8 Poram sanddlolea vanxela sarko, hanv tanchea angar voitolom,
Ani hanv tanchi chhati pinztolom.
Eka xinva sarko tankam khaun uddoitolom,
Ek ranvotti zonvar tanche pinzun kuddkean-kuddke kortolem.
9 Are Izraela, tem tuzo nas kortolem,
Karonn tum mhojea add, tuka modot kortoleachea add gela.
10 Tor soglea xaramnim tuka salvar korunk xokta, to tuzo raza khoim asa?
‘Mhaka raza ani kunvor di,’
Oxem zanchea vixim tunvem mhunnttlem, te tuje odhikari* khoim asat?
11 Hanvem ragan bhoron tuka ek raza dilo,
Ani mhojea krodhan hanv taka kaddun vhortolom.
12 Efraimacho guneanv guttlaun* dovorla,
Tachem patok samballun dovorlam.
13 Bhurgeak zolm ditana sosunk poddttat tosle vollvolle to sostolo.
Punn to ek okʼkol naslolo bhurgo,
Zolmak ieuncho vell zalo, punn to kusveantlean bhair iena.
14 Fonddantlea* chopkeantlo hanv tankam soddoitolom,
Mornnantlean hanv tankam porot haddttolom.
Are mornna, tujim kunsam khoim asat?
Are fondda, tuji nas korchi xokti khoim asa?
Hanv tuka matxi pasun doia-maia dakhounchom na.
15 Tonna bhaxen to bhorpur vaddlo zalear pasun,
Udente thaun ietolem varem, Jehovachem varem.
Oronnʼnnea thaun tem ieta, tachi baim ani zhor sukounk tem ieta.
To ieun tachea soglea moladik vostuncho thevo luttun vhortolo.
16 Samariek aplea guneanvancho hixob diuncho poddttolo, karonn ti tichea Deva add gelea.
Tankam tolvarin marun uddoitole,
Tanchea bhurgeank zomnir apttun tanche kuddkean-kuddke kortole,
Ani tanchea gorbest bailank pinzun uddoitole.”
14 “Are Izraela, tujea Deva Jehova lagim porot ieo,
Karonn tujea guneanvak lagon tum addkhollon poddla.
2 Jehova lagim porot ieiat ani taka mhunnat,
‘Upkar korun amche guneanv bhogos ani borem asa tem manun ghe,
Ani ami tuka boilanchim bolidanam bhettoitale toxe, ami amchea vonttamnim tuka vakhannʼnni ditole.
3 Asiria amkam salvar korchona,
Ami ghoddeancher boschenant,
Ani amchea hatamnim kelolea vostuk ami, “Amchea Deva!” oxem anik kednanch mhunnchenant,
Karonn bapui nasloleanchi kakut korpi tunch.’
4 Hanv tanchem ovisvaxiponn borem kortolom.
Hanv mhoje khuxen tancho mog kortolom,
Karonn tache voilo mhozo rag pois gela.
5 Hanv Izraela pasot dova sarko zatolom,
To eka fula* sarko fultolo,
Ani Lebanonachea zhaddanchea mullam bhaxen tachim mullam khol rigoitolom.
6 Tache khande posortole,
Tachi sobitkai zoitunachea zhadda bhaxen astoli,
Ani tacho pormoll Lebanonachea zhadda bhaxen astolo.
7 Te porot tachea savlent ravtole,
Te dano vomptole ani drakxanchea vali sarke fultole.
Lebanonachea drakxanchea sorea bhaxen to famad zatolo.*
8 Efraim mhunnttolo, ‘Murteam koddem mhojem kitem kam asa?’
Hanv taka zobab ditolom* ani tacher nodor dovortolom.
Hanv hirveach* rukha* sarko zatolom.
Mhojea thaun tumkam follam mellttolim.”
9 Zannvaiecho konn asa? Tannem heo vostu somzon gheuncheo.
Xanno konn asa? Tannem teo zannam zaun gheuncheo.
Karonn Jehovacheo vatto nitt asat,
Ani nitivont asat tim tancher choltolim,
Punn patok kortat tim tancher cholonk xokchimnant ani addkhollon poddttolim.
Hem Hoshaia hea nanvachem shortt form zaun asa, zacho orth “Jah-n salvar kelʼlo; Jah-n salvar kelo.”
Mahiti A5 polloi.
Vo “onoitik kuddicho sombond dovortoli.”
Vo “onoitik kuddichea sombondak.”
Vo “onoitik kuddicho sombond dovrun.”
Hacho orth “Dev Bim Vomptolo.”
Ho don dongram modlo sokoilʼlo zago. Inglez bhaxent taka “Valley” mhunnttat.
Hacho orth “Doia Dakhounk Na.”
Hacho orth “Mhoje Lok Nhoi.”
Utran utor, “putancho.”
Hosea 1:9-acho ftn. polloi.
Hosea 1:6-acho ftn. polloi.
Vo “onoitik kuddicho sombond dovrop.”
Inglez bhaxent taka “breasts” mhunnttat.
Xobdhkox polloi.
Vo “onoitik kuddichea sombonda vorvim zolmolʼle.”
Vo “onoitik kuddicho sombond dovorla.”
Vo “mogiam.”
Hem utor menddranchea vo dusrea zonvaranchea lhonvek lagu zata.
Inglez bhaxent taka “linen” mhunnttat. Xobdhkox polloi.
Vo “ticheo omaso.” Chondrimacho lhanso bhag disonk suru zata to dis.
Him nakachim notim, kanantlim vo mudio zaunk xoktat.
Ho don dongram modlo sokoilʼlo zago. Inglez bhaxent taka “Valley” mhunnttat.
Vo “Mhozo Baal.”
Hacho orth “Dev Bim Vomptolo.”
Hosea 1:6-acho ftn. polloi.
Hosea 1:9-acho ftn. polloi.
Mhunnche, thapun kelʼleo bhakreo jeo khottea bhoktent uzar kortat.
Xobdhkox polloi.
Ek homer mhunnttlear 220 liter. Mahiti B14 polloi.
Inglez bhaxent taka “barley” mhunnttat.
Vo “onoitik kuddicho sombond dovorcho nhoi.”
Vo “sangata kuddicho sombond dovorchom na.”
Utran utor, “zaite dis.”
Xobdhkox polloi.
Vo “ghoranneache dev; murteo.”
Xobdhkox polloi.
Hanga hem utor Izraelantlea soglea provadeank lagu kelam.
Vo “avoicho nas.”
Vo “Mhojea lokancho nas zatolo.”
Vo “Devachi xikounn.”
Vo ghoddie, “Mhaka mhoima diunchea bodlek tannim mhozo opman kela.”
Vo “samkem pozddem jivit jietole.”
Vo “onoitik kuddicho sombond.”
Utran utor, “Kalliz kaddun vhortat.”
Vo “fuddar parkhupeachi boddi.”
Vo “onoitik kuddicho sombond dovorpacheo.”
Vo “onoitik kuddichea sombondak zuddlolim.”
Vo “Xindur.” Eke torechem vhoddlem zhadd.
Vo “hivor.” Sobit ani pormollit fulanchem ek zhadd.
Vo “onoitik kuddichea sombondak zuddlolim.”
Vo “onoitik kuddichea sombondak zuddlolea.”
Vo “onoitik kuddichea sombondak zuddlolim.”
Vo “jidʼdi.”
Utran utor, “Uktea zagear.”
Efraim Izraelachea utʼtorechea dha kullanchea rajeak suchit korta.
Vo “murteank zuddla.”
Vo “gonvanchem beer.”
Vo “samkem pozddem jivit jieunk.”
Vo “rakhonn korpeank.” Utran utor, “ddhal.”
Vo “zhaddun kaddttolo.”
Vo “Je poddleat.”
Vo “marchem kam anikui chodd korit asat.”
Vo “xist ditolom.”
Vo “tum samkem pozddem jivit jiela.”
Vo “onoitik kuddicho sombond dovorpachi.”
Utran utor, “tonddar.”
Vo “vantteancho.”
Utran utor, “ek mhoino nas kortolo.”
Xobdhkox polloi.
Vo “xim vaddoitat.”
Ho ek nas korta toslo kiddo zo fulpakhea sarko dista. Inglez bhaxent taka “moth” mhunnttat.
Utran utor, “mhojem tondd.”
Ho paus Abril mhoineachea modem suru zata. Mahiti B15 polloi.
Vo “doiek.”
Vo “Te khub rogot varoitat.”
Vo “khorna.”
Vo “inglle.”
Vo “ixttagot kelea.”
Vo ghoddie, “Te manddnni korun ietat tednam tanchim kallzam taplolea bhottʼtte sarkim astat.”
Utran utor, “neai korpeank.”
Utran utor, “kalliz na.”
Mhunnche, unch dorje aslolea khore bhoktechea vatten nhoi.
Vo “dhil.”
Xobdhkox polloi.
Vo “punn hanvem tankam vollkhonk na.”
Vo “guneanv naslole.”
Vo “onvollkhi.”
Vo “xindollki korpeank.”
Vo “Mhojeo xikounneo.”
Vo “veglleoch koxeo.”
Vo ghoddie, “porot voitole.”
Vo “onoitik kuddicho sombond dovrun.”
Xet mollpacho zago.
Vo “Tumchea tharailʼlea porbe.”
Vo “Khazkurlechim zhaddam; Khatkutlechim zhaddam.”
Vo “lojechea devak.”
Inglez bhaxent taka “breasts” mhunnttat.
Vo “raxttram-raxttramnim bhottoktolim.”
Vo ghoddie, “posorta toslea.”
Vo “Tanchim kallzam dhongi zaleant.”
Vo “ner; noddnni.”
Vo “pois koident voitoli.”
Utran utor, “vogi.”
Vo “Thoim tim toxinch ravlim.”
Utran utor, “onitivontponnachea putancho.”
Mhunnche, maner dovorlolea zum-a bhaxen te apli khast bhogtole tednam.
Vo “zum ghalunk laitolom.”
Vo “dhepe.”
Uzvaddchea poilim thoddo vell.
Utran utor, “vogi.”
Mhunnche, Izraelak xikounk dhaddlole provadi ani dusre lok.
Vo “Doiechea doriemnim.” Mhunnche, avoi vo bapui aplea bhurgeank cholonk xikounk uzar kortat tosli dori.
Utran utor, “dadd.” Inglez bhaxent hem “jaw.”
Vo “Tachea xarancher tolvar ghunvtoli.”
Mhunnche, unch dorje aslolea khore bhoktechea vatten.
Utran utor, “kalliz.”
Vo “Izrael.”
Vo “Efraiman mhaka fottincho gherav ghatla.”
Vo “cholta.”
Inglez bhaxent taka “heel” mhunnttat.
Mhunnche, Dev.
Chodd korun hem Jakobachea sonstek lagu kelam.
Vo “neai-an vag.”
Vo “dukandarachea.”
Vo “jadu korcheo vostu; gupit vostu.”
Vo “Siriechea.”
Utran utor, “xetant.”
Vo “rag haddlo.”
Vo “apli chandi koddoun murteo.”
Vo “kunddea.”
Vo “hanvem tujer dhean dilem.”
Utran utor, “neai korpi.”
Vo “samballun.”
Xobdhkox polloi.
Inglez bhaxent “lily.”
Vo “tacho ugddas kortole.”
Vo “tachem aikotolom.”
Vo “pachveach.”
Inglez bhaxent “juniper tree.” Xobdhkox polloi.