JOEL
1 Pethuelacho put Joelak* Jehova* thaun oso sondex mellʼllo:
2 “Vhoddilamno, hem aikat,
Ani desant* ravpi lokamno, dhean diat.
Oxem kitem tori tumchea disamnim,
Vo tumchea purvozanchea disamnim ghoddlam kai?
3 Hea vixim tumchea putank sangat,
Ani tumchea putamnim tem aplea putank sangchem,
Ani tanchea putamnim fuddle pillgek sangchem.
4 Gillun uddoupi tollamnim soddlem, tem zomeamnim uddttat tea tollamnim khailem,
Ani tannim jem soddlem, tem pakham naslolea tollamnim khailem,
Ani tannim jem soddlem, tem bhukelʼlea tollamnim* khailem.
5 Utthat bebdeamno, ani roddat!
Drakxancho soro pietoleamno, tumi sogle vhoddlean roddat,
Karonn drakxancho godd soro tumchea tonddantlean pois vhela.
6 Xoktivont ani mezunk zaina title lok aslolea eka raxttran mhojea desacher akromonn kelam.
Tache dant eka xinvachea dantam sarke asat, ani tachi dadd* xinvache daddi sarki asa.
7 Tannem mhoji drakxanchi val nas korun uddoilea ani mhojea anjirachea zhaddachem fokot mund* soddlam,
Tanchi sal tannem purnn toren solun hevtten-tevtten uddoilea,
Ani tanche khande dhove korun soddleat.
8 Tumi vhoddlean roddat.
Ek ankvar* cheddum aplo tornattponnacho novro* mela dekhun sak ghalun vhoddlean roddtta toxem roddat.
9 Jehovachea ghorant daneachi bhett ani soreachi bhett ievop bond zalea,
Jehovachi seva korpi iadnik dukh kortat.
10 Xetacho nas zala, zomin dukh korta,
Karonn daneacho nas zala, novo drakxancho soro sukon gela ani telui somplam.
11 Gonvank ani zovank* lagon,
Xetkareanchem mon moddlam ani drakxanchea molleamnim kam korpi vhoddlean roddttat,
Karonn xetantlem pik piddʼddear zalam.
12 Drakxanchi val suklea,
Anjirachem zhadd bavlam.
Dallimachem, khazurachem, apolachem,
Desantlim soglim zhaddam sukon geleant,
Karonn lokanchi khuxalkai lojent bodolʼlea.
13 Iadnikamno, sak ghalun dukh korat,*
Vedi lagim seva kortoleamno, vhoddlean roddat.
Devachi seva kortoleamno, ieiat ani sak ghalun rat sarat,
Karonn tumchea Devachea ghorant atam konnuch daneachi bhett ani soreachi bhett haddina.
14 Upasa vixim kollounni korat, povitr zomat apoiat.
Vhoddilank ani desant ravtolea soglea lokank ektthaim korat,
Tumchea Devachea, Jehovachea ghorant ektthaim korat ani modotik lagon Jehovak ulo marat.
15 Tea disak lagon hai!
Karonn Jehovacho dis lagim pavla,
Ani to dis Sorvxoktivont Deva koddlean nas koso ietolo!
16 Amchea dolleam mukharuch amchem jevonn kaddun vhoronk na kai?
Ani amchea Devachea ghorantlean khuxalkai ani umed nanch zaunk na kai?
17 Tanchea khoream ponda bio* sukon geleat,
Gudanv toxech soddun dileat.
Daneache gudanv moddon poddleat, karonn dano sukla.
18 Gorvam pasun pirgotat!
Gorvanche hindd guspa-gondhollan bhonvtat, karonn tankam chorov na!
Ani menddranche hindd khast bhogtat.
19 Jehova Deva, hanv tukach ulo martolom,
Karonn oronnʼnneantle chorvache molle, ujean lasun kabar keleat.
Ani eka agtteak lagon desantlim soglim zhaddam zollon geleant.
20 Ranvotti zonvaram pasun tujeruch apli as dovrun asat,
Karonn udkacheo nhoim-o sukleat
Ani oronnʼnneantle chorvache molle, ujean lasun kabar keleat.”
2 “Sionant xing* vazoiat!
Zhuz zatolem mhunn mhojea povitr dongracher kollounni korat.
Desant* ravpi soglea lokank koddkoddo suttom!
Karonn Jehovacho dis ieta! To lagim pavla!
2 To khub kallkhacho dis,
To kupancho ani kallea-kitt kallkhacho dis,
To dongracher posorta tea fantoddechea uzvadda bhaxen.
Mezunk zaina title lok aslolem ek xoktivont raxttr asa,
Oslem raxttr poilim kednanch asonk na,
Ani hea fuddem kednanch aschem-i na,
Pillgechea-pillge poriant aschem na.
3 Tachea mukhar uzo nas korit voita,
Ani tachea fattlean agttem zollot voita.
Tachea mukhar Eden bage sarko des asa,
Punn fattlean padd zalʼlem oronnʼnnem asa,
Ani tachea thaun kainch vachonk xokona.
4 Te ghoddeam sarke distat,
Ani zhuzachea ghoddeam sarke dhanvtat.
5 Te dongrachea tengxer dhanvtat tednam tancho avaz rotham sarko,
Ani ujeant zolltta tea tonnachea kitt-kittʼttea avaza sarko asa.
Te zhuzak toiar zalolea xoktivont soinikam sarke asat.
6 Tankam lagon lok bhietole ani usketole,
Tanchim tonddam tambddim zatolim.
7 Te zhuzaream sarke dusmana add voitat,
Soinikam sarke vonttincher choddttat,
Dor eklo aple vatten cholot ravta,
Konnuch aplea vatte voilo koddsorona.
8 Te eka-mekak dukholnant,
Dor eklo aplea vatten nitt fuddem voita,
Thodde hotʼtearank lagon poddlear pasun,
Dusre fuddem vochot ravtat.*
9 Te xarant nettan ghustat, vontticher dhanvtat,
Ghorancher choddttat, ani choram bhaxen zonelantlean bhitor ghustat.
10 Tanchea mukhar des koddkoddtta ani mollob thorthorta,
Suria ani chondrimacher kallokh poddla,
Ani noketrancho porzoll na zala.
11 Jehova aplea fouje mukhar vhoddlea avazan hukum ditolo, karonn tachi fouz khub vhoddli asa.
Tachem utor purnn korpi xoktivont asa,
Jehovacho dis ekdom vhodd ani bhirankull.*
Konn tacho fuddo korunk xoktolo?”
12 Jehova mhunntta, “Azunui vell asa, tumi purnn kallzan mhojea lagim porot ieiat.
Upas korun, roddon ani vhoddlean bob marun mhojea lagim ieiat.
13 Tumche kopdde nhoi punn kallzam pinzat,
Ani tumchea Deva lagim, Jehova lagim porot ieiat.
Karonn to doie-maien ani kakutin bhorlolo, rokddoch ragar zaina toslo ani visvaxi mogan bhorlolo.
Odruxtt haddchea vixim to porot chintolo.*
14 Konn zannam, to ghoddie aplea nirnnoi-a vixim porot chintun* aplo nirnnoi bodlit,
Ani tumkam besanv di-it,
Jea udexim tumchea Deva Jehova pasot, tumi daneacheo bhetto ani soreacheo bhetto diunk xoktolim!
15 Sionant xing* vazoiat!
Upasa vixim kollounni korat, povitr zomat apoiat.
16 Lokank ektthaim korat, sobhek povitr korat.
Zanntteank* ektthaim korat, bhurgeank ani dudh pietolea ballkank ektthaim korat.
Novrean ani vhoklen aplea bhitorlea rumantlean bhair ieunchem.
17 Bolkanvachea ani vedichea modem
Jehovachi seva korpi iadnikamnim roddon oxem mhunnchem:
‘Jehova Deva, tujea lokanchem churchurem kor,
Tujea daizacho opman zaina zaunk,
Raxttrank tancher raz cholounk dinaka.
“Tancho Dev khoim asa?” oxem mhunnonk dusrea lokank sondhi kiteak mellchi?’
18 Tednam Jehova aplea desa pasot urben bhortolo,
Ani aplea lokank doia-maia dakhoitolo.
19 Jehova aplea lokank oso zobab ditolo:
‘Hanv tumkam dano, novo drakxancho soro ani tel dhaddttam,
Ani tumi purnn toren dhadoxi zatole,
Hanv porot kednanch raxttram modem tumcho opman zaunk diunchom na.
20 Utʼtore thaun ieta taka hanv tumchea thaun pois dhanvddaun ghaltolom,
Hanv taka eka sukea ani padd zalʼlea desant dhanvddaitolom,
Tachi fuddli fouz udentechea doria* vatten,
Ani fattli fouz ostomechea doria* vatten astoli.
Tachea moddeak ghann marunk lagtoli,
To vas akʼkhea desant posortolo,
Karonn Dev vortim kamam kortolo.’
21 O desa, bhienaka.
Khuxal ani sontosbhorit zav, karonn Jehova vortim kamam kortolo.
22 Ranantlea zonvaramno, bhienakat,
Karonn oronnʼnneantlim chorvachim mollam hirvim* zatolim.
Ani zhaddam follam ditolim.
Anjirachem zhadd ani drakxanchi val bhorpur follam ditoli.
23 Sionachea putamno, tumchea Deva Jehova pasot khuxal ani sontosbhorit zaiat.
Karonn to tumkam goroz titlo survatecho paus* ditolo,
To tumchea pasot bhorpur paus dhaddttolo,
Poilim bhaxen, to tumkam survatecho paus ani uprant ieta to paus* ditolo.
24 Mollnnechim khollam* daneamnim bhorlolim astolim,
Drakxam maddoupacho zago novea drakxanchea sorean bhoron votʼtolo ani tel kaddpacho zago telan bhoron votʼtolo.
25 Hanvem dhaddlole vhoddle foujen,
Mhunnche zomeamnim uddttat tea tollamnim, pakham naslolea tollamnim, bhukelʼlea tollamnim ani gillun uddoupi tollamnim
Jitlim vorsam luksonn kelam tem hanv bhorun kaddttolom.
26 Tumi khorench khaun dhadoxi zatole,
Ani tumcho Dev Jehovachea nanvachi vakhannʼnni kortole,
Tannem tumchea pasot ojapachim kamam keleant.
Mhoje lok porot anik kednanch lojent poddchenant.
27 Ani tumkam vollkhon gheunk poddttolem ki hanv Izraela modem asa,
Hanv Jehova tumcho Dev—mhojea bhair anik konnuch Dev na!
Mhoje lok porot anik kednanch lojent poddchenant.
28 Tea uprant, hanv mhoji povitr xokti soglea torechea munxancher votoitolom,
Ani tumche put ani tumcheo dhuvo bhasaunneo kortolim,
Ani tumche zanntte sopnam polloitole,
Ani tumche tornatte dorxonam polloitole.
29 Tea disamnim, mhojea chakrancher ani chakornincher pasun
Hanv mhoji povitr xokti votoitolom.
30 Ani hanv voir mollbar ani sokol prithumer ojapam korun dakhoitolom,
Rogot, uzo, ani bhorpur dhunvor.
31 Jehovacho vhodd ani bhirankull* dis ieunchea poilim
Suriacher kallokh poddttolo ani chondrim rogta sarko tambddo zatolo.
32 Ani zo konn Jehovachea nanvan ulo marta to salvar zatolo.
Karonn Jehovan sanglam toxem, Sion Dongrar ani Jeruzalemant salvar zatole te lok astole,
Te lok, zankam Jehova apoita.”
3 “Karonn polloiat! tea disamnim ani tea kallar,
Jednam hanv Judantlea ani Jeruzalemantlea lokank koidentlean porot haddttolom,
2 Tednam hanv soglea raxttrank pasun ektthaim kortolom,
Mhojea lokam pasot ani mhojem daiz Izraela pasot
Thoim hanv tanchi zhoddtti kortolom,
Karonn tannim mhojea lokank dusrea raxttramnim ximpddaile,
Ani mhojea desachi zomin aplea modem vanttun ghetli.
3 Tannim sorti ghalun mhojea lokank aplea modem vanttun ghetle,
Te eka cheddeak vikun xindoll bailek bhaddeak ghetale
Ani eka cheddvak drakxanchea soreak lagon viktale.
4 Are Tira ani Sidona, ani Filistiechea soglea vattaramno,
Tumi mhojea sangata oxem koxench kelem?*
Tumi mhoje koddlean koslo tori bodlo ghetat kai?
Tumi bodlo ghetat zalear,
Hanv rokddoch tumkam tumchea korneancho porinnam bhogunk poddtta toso kortolom.
5 Tumi mhojem chandi ani bhangar gheun gele,
Ani mhoje moladik theve tumi tumchea mondiramnim gheun gele.
6 Judantlea ani Jeruzalemantlea lokank tanchea vattarantlean pois vhoronk,
Tumi tankam Grik lokank vikle.
7 Taka lagon, tumi tankam jea zagear viklole thoim thaun hanv tankam porot haddttolom,
Ani hanv tumkam tumchea korneancho porinnam bhogunk poddtta toso kortolom.
8 Hanv tumchea putam-dhuvank Judachea lokank viktolom,
Ani te tankam poisulʼlea raxttrant, mhunnche Shebant aslolea lokank viktole,
Karonn Jehovan svota oxem mhunnttlam.
9 Raxttram modem hi kollounni korat:
‘Zhuzachi toiari korat! Xoktivont zhuzareank bhair ieunk urba diat!
Soglea soinikamnim fuddem soron akromonn korchem!
10 Tumchim zotam moddun tolvari korat ani tumchea koiteanche bhale korat.
Oskot asa tannem mhunnchem: “Hanv xoktivont asam.”
11 Bhonvtonnchea soglea raxttramno ieiat, ektthaim zaiat ani modot korat!’”
Jehova Deva, tujea xoktivont zhuzareank tea zagear sokol gheun ieo.
12 “Raxttramnim utthon Jehoshafatachea Falkeant* ieunchem,
Karonn hanv bhonvtonnchea soglea raxttranchi zhoddtti korunk thoim bostolom.
13 Villo* uzar korat, karonn xet piklam.
Sokol ieun maddoiat, karonn drakxam maddoupacho zago bhorla.
Drakxancho ros ektthaim zata to zago bhoron votʼta, karonn tanchem vaittponn khub vaddlam.
14 Nirnnoi-achea falkeant* lokanchi khub gordi asa,
Karonn nirnnoi-achea falkeant* Jehovacho dis lagim pavla.
15 Suria ani chondrimacher kallokh poddttolo,
Ani noketrancho porzoll na zatolo.
16 Ani Jehova Siona thaun goroztolo,
Jeruzalemantlean to vhoddlea avazan uloitolo.
Ani mollob ani prithum thorthortoli,
Punn Jehova aplea lokam pasot asro zatolo,
Izraelachea lokam pasot ek kilʼlo zatolo.
17 Ani tumkam vollkhon gheunk poddttolem ki hanv tumcho Dev Jehova, zo Sionacher, mhojea povitr dongracher ravta,
Jeruzalem ek povitr zago zatolo,
Ani onvollkhi* lok thoinchean anik pasar zaunchenant.
18 Tea disa dongram thaun godd drakxancho soro gollttolo,
Porvotam thaun dudh vhanvtolem,
Judantleo sogleo nhoim-o udkan bhoron vhanvtoleo.
19 Punn Ejiptt padd zatolo,
Ani Edom padd zalʼlem oronnʼnnem zatolem,
Karonn te Judachea lokam sangata krur toren vagle,
Ani tanchea desant tannim guneanv naslolea lokanchem rogot varoilem.
20 Punn Judant sodanch lok ravtole,
Ani Jeruzalemant pillgechea-pillge poriant lok ravtole.
21 Hanv tankam* niropradi mhunn lekhinaslom, punn atam hanv tankam niropradi mhunn lekhtolom,
Ani Jehova Sionant ravtolo.”
Hacho orth “Jehova Dev Zaun Asa.”
Mahiti A5 polloi.
Vo “prithumer.”
Hebrev bhaxent hea char torechea tollank veg-vegllim nanvam uzar keleant.
Inglez bhaxent taka “jaw” mhunnttat.
Rukh katorlea uprant zomnicher voir urta to tacho bhag. Inglez bhaxent taka “stump” mhunnttat.
Vo “tornattem.”
Vo “ghova.”
Inglez bhaxent taka “barley” mhunnttat.
Vo “tumchi chhati boddoiat.”
Vo ghoddie, “suklolim anjiram.”
Xobdhkox polloi.
Vo “Prithumer.”
Vo “Dusre lainnin vochot ravtat.”
Vo “ojapacho.”
Vo “taka dukh zatolem.”
Vo “dukhi zaun.”
Xobdhkox polloi.
Vo “Vhoddilank.”
Mhunnche, Mittacho Doria (Dead Sea).
Mhunnche, Mediteranean Doria.
Vo “pachvim.”
Ho paus Otumbr mhoineachea modem suru zata. Mahiti B15 polloi.
Ho paus Abril mhoineachea modem suru zata. Mahiti B15 polloi.
Xet mollpacho zago.
Vo “ojapacho.”
Hacho orth “Jehova Neai Korpi.”
Ho don dongram modlo sokoilʼlo zago. Inglez bhaxent taka “Valley” mhunnttat.
Vo “Tumkam mhojea add kitem asa?”
Ho don dongram modlo sokoilʼlo zago. Inglez bhaxent taka “Valley” mhunnttat.
Vo “Xet lunvpachi koiti.” Inglez bhaxent taka “sickle” mhunnttat.
Ho don dongram modlo sokoilʼlo zago. Inglez bhaxent taka “valley” mhunnttat.
Ho don dongram modlo sokoilʼlo zago. Inglez bhaxent taka “valley” mhunnttat.
Vo “pordexi.”
Vo “Babhulachea Zhaddanchem.”
Ho don dongram modlo sokoilʼlo zago. Inglez bhaxent taka “Valley” mhunnttat.
Utran utor, “tanchem rogot.”