AMOS

1 Ho Amosacho* sondex zo taka dorxonant mellʼllo. To Tekoentlea gonvlleam modlo eklo aslo. Tannem bhuimkamp zaunchea don vorsam poilim Izraela vixim hem dorxon polloilʼlem. Tea vellar, Uzia Judacho raza aslo, ani Joashacho put Jeroboam Izraelacho raza aslo. 2 Amosan mhunnttlem:

“Jehova* Siona thaun goroztolo,

Ani Jeruzalemantlean vhoddlea avazan uloitolo.

Gonvlleanchim chorvak vhorpachim mollam dukh kortolim,

Ani Karmelachi tengxi sukon voitoli.”

3 “Jehova mhunntta,

‘“Damaskan porot-porot* kelʼlea opradank lagon* hanv taka khast diunk fatti sorchom na.

Karonn tannim Gileadak mollnnek uzar kortat tea lokhnnachea vostumnim* mollʼllo.

4 Taka lagon, hanv Hazaelachea ghoracher uzo dhaddttolom,

Ani to uzo Benhadadachea vhoddlea gopurancho nas kortolo.

5 Hanv Damaskachea darvontteanche lokhnnache dandde moddun uddoitolom,

Hanv Bikathavenant ravpi lokancho

Ani Bethedenantlean raz kortoleacho* nas kortolom,

Ani Sirieche lok koidi mhunn Kirant voitole,” oxem Jehova sangta.’

6 Jehova mhunntta,

‘“Gazan porot-porot* kelʼlea opradank lagon* hanv taka khast diunk fatti sorchom na.

Karonn tannim eka akʼkhea zomeak koidi korun Edomachea hatant dilo.

7 Taka lagon, hanv Gazachea vontticher uzo dhaddttolom,

Ani to uzo tichea vhoddlea gopurancho nas kortolo.

8 Hanv Ashdodant ravpi lokancho

Ani Ashkelonantlean raz kortoleacho* nas kortolom,

Hanv Ekronachea add mhozo hat ubartolom,

Ani urlolea Filistevkarancho nas zatolo,” oxem Akʼkhea Vixvacho Dhoni Jehova sangta.’

9 Jehova mhunntta,

‘Tiran porot-porot* kelʼlea opradank lagon* hanv taka khast diunk fatti sorchom na.

Karonn tannim eka akʼkhea zomeak koidi korun Edomachea hatant dilo.

Ani tannim bhavancho korar ugddas dovrunk na.

10 Taka lagon, hanv Tirachea vontticher uzo dhaddttolom,

Ani to uzo tichea vhoddlea gopurancho nas kortolo.’

11 Jehova mhunntta,

‘Edoman porot-porot* kelʼlea opradank lagon* hanv taka khast diunk fatti sorchom na.

Karonn to tolvar gheun apleach bhavachea fattik laglo.

Ani tannem kakut dakhounk nakarlem.

To ragan bhoron thambonastana tankam pinjit ravta,

Ani tancher sodanch ragar asta.

12 Taka lagon, hanv Temanacher uzo dhaddttolom,

Ani to uzo Bozrachea vhoddlea gopurancho nas kortolo.’

13 Jehova mhunntta,

‘“Amonitkaramnim porot-porot* kelʼlea opradank lagon* hanv tankam khast diunk fatti sorchom na.

Karonn tannim aplo vattar vaddounk, Gileadachea gorbest bailanchim pottam chirun uktim kelim.

14 Taka lagon, hanv Rabachea vonttik uzo laitolom,

Ani to uzo tichea vhoddlea gopurancho nas kortolo,

Fouz xaracher akromonn kortoli tednam zhuzacho bovall zatolo,

Ani tea disa borench vadoll-modd ietolem.

15 Ani tancho raza aplea kunvram sangata koident voitolo,” oxem Jehova sangta.’

2 “Jehova mhunntta,

‘“Moaban porot-porot* kelʼlea opradank lagon* hanv taka khast diunk fatti sorchom na,

Karonn tannem chuneak lagon Edomachea razachim haddam lasoilim.

2 Taka lagon, hanv Moabant uzo dhaddttolom ani to uzo Keriotachea vhoddlea gopurancho nas kortolo,

Ani tea gondhollacho avaz,

Zhuzacho bovall ani xing* vazoita to avaz aikonk ietolo tednam Moab mortolo.

3 Hanv tichea modlea odhikareak* kaddun uddoitolom,

Ani tachea sangata tichea soglea kunvrank jivexim martolom,” oxem Jehova sangta.’

4 Jehova mhunntta,

‘Judan porot-porot* kelʼlea opradank lagon* hanv taka khast diunk fatti sorchom na.

Karonn tannim Jehovacho kaido* nakarla,

Ani tannim tache nem-kaide pallunk nant.

Punn tanche purvoz mantale teach khottea khobrank lagon te-ui koddsoron gele.

5 Taka lagon, hanv Judant uzo dhaddttolom,

Ani to uzo Jeruzalemachea vhoddlea gopurancho nas kortolo.’

6 Jehova mhunntta,

‘Izraelan porot-porot* kelʼlea opradank lagon* hanv taka khast diunk fatti sorchom na.

Karonn te chandik lagon nitivontak,

Ani zoteanche eke zoddiek lagon goribak viktat.

7 Te oskotanchi tokli dhulʼlint maddoitat,

Ani khalteanchi vatt addaitat.

Bapui ani put ekach cheddva sangata sombond dovortat.

Ani mhojea povitr nanvacho opman kortat.

8 Te ghannak dovorlolea* kopddeancher kobzo kortat, ani dor eka vedi mukhar te posraun tacher add poddttat,

Ani dondd* mhunn ektthaim kelʼlea poixeamnim te drakxancho soro vikto gheun aplea devanchea ghorant* pietat.’

9 ‘Punn hanvem tanchea mukhar Amoritkaracho nas kelʼlo,

Zo cedar* rukham itlo lamb ani oak* rukham itlo ghott aslo.

Hanvem voilean tachim follam ani sokoilean tachim mullam nas kelim.

10 Tumi Amoritkaracho des tumchea tabeant korcho mhunn,

Hanvem tumkam Ejiptt desantlean bhair haddlim,

Ani tumkam 40 vorsam oronnʼnneantlean choloun haddlim.

11 Hanvem tumchea thoddea putank provadi

Ani tumchea thoddea tornatteank Nazirit* mhunn nemle.

Are Izraelitkaramno, hanvem oxem korunk naslem kai?’ oxem Jehova mhunntta.

12 ‘Punn tumi Naziritank drakxancho soro pieunk di-it ravle,

Ani tumi provadeank oxi adnea dili: “Tumi bhasaunni korinakat.”

13 Taka lagon, danean bhorlolea gaddie ponda zomin chiddʼddota toxi,

Hanv tumkam tumchea zagear chiddʼddun uddoitolom.

14 Fastt* dhanvta to khoinch pollon vochonk xokchona,

Xoktivont munxachi xokti kainch upeogachi aschina,

Ani khoinchoch zhuzari aplo jiv salvar korun pollon vochonk xokchona.

15 Dhonu-bann choloupi aplea zagear ubo urchona,

Fastt dhanvpi salvar zaunchona,

Ani ghoddesvar aplo jiv salvar korun pollon vochonk xokchona.

16 Zhuzaream modem zo sogleant dhirvont asa

To pasun tea disa vinglloch pollon voitolo,’ oxem Jehova mhunntta.”

3 “Izraelachea lokamno, hanv Jehova tumchea vixim, mhunnche hanvem Ejipttantlean bhair kaddun haddlolea akʼkhea ghorannea vixim, hanv kitem sondex ditam to aikat:

2 ‘Prithume voilea soglea ghoranneam modem hanv fokot tumkanch vollkhotam.

Taka lagon, hanv tumche koddlean tumchea soglea guneanvancho hixob ghetolom.

3 Don munis eka-mekak mellonk tharainant zalear te sangata cholonk pavtole kai?

4 Eka xinvak ranant xikar mellonk na zalear to goroztolo kai?

Eka tornea xinvan kainch dhorunk na zalear to aplea dholintlean gurgurtolo kai?

5 Zomnir fas manddlolo na zalear* suknnem tantunt fostolem kai?

Eka fasant xikar sampddonk na zalear to fas voir sortolo kai?

6 Xarant xing* vazoilem zalear lok koddkoddnant kai?

Xarant odruxtt ailem zalear tantunt Jehovacho hat na kai?

7 Akʼkhea Vixvacho Dhoni Jehova, aplea sevokank mhunnche aplea provadeank

Aplo gutt kolloinastana koslench kam korchona.

8 Xinv gorozla! Tor konn bhieunchona?

Akʼkhea Vixvacho Dhoni Jehova uloila! Tor konn bhasaunni korchona?’

9 ‘Ashdodachea vhoddlea gopurancher

Ani Ejipttachea vhoddlea gopurancher kollounni korat.

Oxem mhunnat: “Samariechea dongram add ektthaim zaiat,

Thoim kitlo gondholl zata

Ani kitlem nagovop cholʼlam tem polloiat.

10 Karonn sarkem asa tem koxem korchem, hem tankam khoborna,

Te aplea vhoddlea gopurant maramari ani nisontton bhorun dovortat,” oxem Jehova mhunntta.’

11 Taka lagon, Akʼkhea Vixvacho Dhoni Jehova mhunntta,

‘Ek dusman ieun desak gherav ghaltolo,

To tuji xokti kaddun ghetolo,

Ani tuje vhoddle gopur luttʼttolo.’

12 Jehova mhunntta,

‘Gonvlli xinvachea tonddantlean fokot don paim vo kanacho kuddko voddun kaddtta tea toren,

Aiz Samarient sobit khattincher ani borea sofancher* je lok bostat,

Tanchea modle thoddech salvar zatole.’

13 Akʼkhea Vixvacho Dhoni, fouzancho Dev Jehova mhunntta, ‘Aikat ani Jakobachea ghoranneak xittkaunni diat.’*

14 ‘Jea disa hanv Izraela koddlean tachea soglea opradancho* hixob ghetolom,

Tea disa, hanv Bethelachea vedim koddleanui hixob ghetolom,

Ani vedi voilim xingam katortolom ani tim zomnir poddttolim.

15 Hanv thonddechem ghor ani gormechem ghor, him donui moddun uddoitolom.’

‘Hotʼtinchea dantamnim nettoilʼlim ghoram nas zatolim,

Ani vhoddlea-vhoddlea* ghorancho pasun nas zatolo,’ oxem Jehova mhunntta.”

4 “Samariechea dongrar aslolea

Bashanachea gaiemno, ho sondex aikat.

Tumi osleo bailo, jeo oskotank nagoitat ani goribank chiddʼddoitat,

Tumi tumchea ghovank* mhunnttat, ‘Amkam pieunk soro hadd!’

2 Akʼkhea Vixvacho Dhoni Jehova aple povitrtaiecho soput gheun oso mhunntta,

‘“Polloiat! Tumcher osle dis ieupache asat, jednam to tumkam mas katorpeachea goreamnim* ukoltolo,

Ani urloleank nustem dhortat tea goreamnim ukoltolo.

3 Tumi vonttichea verentlean bhair sortolim, dor ekleak tumchea mukhar aslolea verentlean bhair sorchem poddttolem,

Ani tumkam Harmonant xevttun uddoitolo,” oxem Jehova mhunntta.’

4 ‘Bethelant ieiat ani patok korat,*

Gilgalant ieiat ani anikui patok korat!

Sokallim tumche iodn haddat,

Ani tisrea disa tumcho dhavo vantto haddat.

5 Upkar attounk iodn mhunn khomir ghatlolo unddo lasoiat,

Tumi khuxen haddlolea bhettounnenchi vhoddlean kollounni korat!

Karonn Izraelachea lokamno, tumkam tor hench korunk avoddtta,’ oxem Akʼkhea Vixvacho Dhoni Jehova mhunntta.

6 ‘Hanvem tumchea soglea xaramnim bhuk posraili,*

Ani tumchea soglea ghoramnim unddeachem unnemponn posrailem,

Tori astana, tumi mhojea lagim porot ieunk nant,’ oxem Jehova mhunntta.

7 ‘Hanvem lunvnnechea tin mhoineam poilim paus addaun dovorlo,

Hanvem eka xaracher paus ghatlo punn dusrea xaracher ghalunk na.

Eka xetant paus poddttalo,

Punn dusrea xetant paus poddonaslo dekhun tem suktalem.

8 Don vo tin xarantle lok udkak lagon lokot-lokot ekach xarant voitale,

Punn tanchi tan bhagonasli.

Tori astana, tumi mhojea lagim porot ieunk nant,’ oxem Jehova mhunntta.

9 ‘Hanvem tumchem pik gorom varean piddʼddear kelem ani duensan* kusoun uddoilem.

Tumi tumcheo bago ani drakxanche molle vaddoit ravle,

Punn toll tumchim anjirachim zhaddam ani zoitunachim zhaddam kabar korun uddoitale.

Tori astana tumi mhojea lagim porot ieunk nant,’ oxem Jehova mhunntta.

10 ‘Hanvem tumcher Ejipttant dhaddloli tosli pidda dhaddli.

Hanvem tolvarin tumchea tornatteank marun uddoile ani tumche ghodde vhele.

Hanvem tumchea tombunchi ghann tumchea nakamnim bhorli.

Tori astana, tumi mhojea lagim porot ieunk nant,’ oxem Jehova mhunntta.

11 ‘Sodom ani Gomoracho nas kelo toso,

Hanvem tumcho des nas korun uddoilo.

Tumi oslea lakdda sarke asle zaka ujeantlean voddun bhair kaddlam.

Tori astana, tumi mhojea lagim porot ieunk nant,’ oxem Jehova mhunntta.

12 Taka lagon, Izraela, hanv tuka porot khast laitolom.

Hanv tujea sangata oxench kortolom,

Are Izraela, tujea Deva mukhar ieunk toiar zav.

13 Karonn polloi! tannench dongor rochle ani varem toiar kelem.

To munxak aplim chintnam sangta,

To fantoddek kallkhant bodolta,

Ani prithume voilea unchlea zageank maddoita.

Tachem nanv fouzancho Dev Jehova.”

5 “O Izraelachea ghorannea, hea dukhachea gitantlean* hanv tumchea add sangtam to sondex aikat:

2 ‘Ankvar Izrael sokol poddlam,

Tem porot utthonk xokona.

Zomnir poddlam thoinch taka soddun dilam,

Taka ubartolo konn na.’

3 “Karonn Akʼkhea Vixvacho Dhoni Jehova mhunntta:

‘Jem xar hozar soinik gheun voitolem tache fokot xembor soinik urtole,

Ani jem xar xembor gheun voitolem tache fokot dha urtole, Izraelachea ghoranneak oxench ghoddttolem.’

4 “Jehova Izraelachea ghoranneak mhunntta:

‘Mhaka sodhat ani jiet ravat.

5 Bethelak sodhinakat,

Gilgalant vochonakat vo xim par korun Beershebentui vochonakat.

Karonn Gilgalantle lok koident voitolech,

Ani Bethelachem kainch urchem na.

6 Jehovak sodhat ani jiet ravat,

Na zalear to ujea bhaxen Juzechea ghoranneacho nas kortolo,

Ani Bethelak lasun kabar kortolo, ani to uzo palounk konnuch aschona.

7 Tumi nitik koddu zhadda* sarke kortat,

Ani nitivontponnak zomnir xevttitat.

8 Jea Devan Kima* ani Kesil* noketram* rochlim,

Zo kallkhak sokall korta,

Zo disak kallkhi rat korta,

Zo prithumer votounk

Doriachem udok ektthaim korta

—Tachem nanv Jehova.

9 To bollvont lokancho okosmat nas kortolo,

Kilʼle aslolea zageancho nas korun uddoitolo.

10 Xarachea darvonttea lagim sudhraitat* tancho te dves kortat,

Ani sot uloitoleancho tankam kanttallo ieta.

11 Tumi goribam koddlean zobordosten xetachem bhaddem* ghetat,

Ani tax mhunn tanche koddlean tanchem pik ghetat,

Taka lagon, taslolea fatranchim tumi jim ghoram bandun ravtat, tantunt tumi anik ravonk pavchenant,

Ani tumi borea drakxanche je molle laileat, tea drakxancho soro tumi pieunk pavchenant.

12 Karonn tumi kitle pavtti oprad keleat,*

Kitlim vhoddlim-vhoddlim patkam keleant tem hanv zannam.

Tumi nitivont lokank sotaitat,

Lonch* ghetat,

Ani xarachea darvonttea lagim tumi goribank tancho hokʼk dinant.

13 Taka lagon, kholaiechi somzonni aslole tea vellar vogi ravtole,

Karonn to odruxttacho vell astolo.

14 Borem asa tem sodhat, vaitt asa tem nhoi,

Oxem kelolean tumi jivim urtolim.

Ani tumi mhunnttat toxem,

Fouzancho Dev Jehova tumchea sangata astolo.

15 Vaittacho dves korat, ani boreacho mog korat,

Xarachea darvonttea lagim nitik zoit mellom.

Tednam ghoddie fouzancho Dev Jehova

Juzechea urloleank doia dakhoitolo.’

16 “Taka lagon Jehova, fouzancho Dev Jehova oxem mhunntta:

‘Xarachea soglea nakeancher vhoddlean roddop astolem,

Ani soglea rosteancher, “Amcher hai, amcher hai!” oxem mhunnon te roddttole,

Te dukh korunk xetkareank

Ani poixe diun, roddpeank apoitole.’

17 Jehova mhunntta, ‘Soglea drakxanchea molleamnim bob marun roddop astolem,

Karonn hanv tumchea modlean pasar zatolom.’

18 ‘Je lok Jehovachea disa pasot axetat tancher hai!

Tumkam kitem dista, Jehovacho dis koso astolo?

Tea disa kallokh astolo, uzvadd nhoi.

19 Zoso ek munis xinva thaun pollon voita punn vanxelak sampoddtta,

Ani to aplea ghorant bhitor soron vontticher hat dovorta tednam ek sorop taka chabta, toso to dis astolo.

20 Jehovachea disa uzvaddachea bodlek kallokh aschona kai?

Bhorpur uzvaddachea bodlek kallo-kitt kallokh aschona kai?

21 Hanv tumchea porbancho dves kortam, mhaka tancho kanttallo ieta,

Ani tumchea povitr zomatincho pormoll mhaka koslich khuxalkai dina.

22 Tumi mhaka akʼkheo hulpailʼleo bhetto ani denneacheo bhetto bhettoilear pasun

Mhaka tantunt koslich khuxalkai mellchina,

Ani tumchea mottea-mottea zonvaranchim xantichim bolidanam hanv manun gheunchom na.

23 Tumchea gitancho bovall bond korat,

Ani tar aslolea sadhonanchem songit mhaka aikonk dinakat.

24 Tumchea desant nit udka bhaxen vhanvom-di,

Ani nitivontponn sodankal vhanvtolea vhalla bhaxen vhanvom-di.

25 Are Izraelachea ghorannea, tumi oronnʼnneant 40 vorsam asle tednam

Bolidanam ani denneacheo bhetto tumi mhaka bhettoilʼleo kai?

26 Atam tumkam tumchea raza Sakuthak ani Kaivanak* gheun voichem poddttolem,

Tumi tumchea pasot kelʼlea murteank, tumchea devachea noketrak, tumkam gheun voichem poddttolem,

27 Ani hanv tumkam Damaska thaun anikui fuddem koident dhaddttolom,’ oxem to mhunntta, zachem nanv fouzancho Dev Jehova.”

6 “Sionantlea tea lokancher hai, zankam apleacheruch khub visvas asa.*

Je chintʼtat ki Samariechea dongracher te surokxit asat,

Je sogleant vhoddlea raxttrache khas lok asat,

Zanche lagim Izraelachem ghorannem ieta!

2 Kalne nogrant vochat ani polloiat.

Thoim thaun Vhoddlea Hamathant vochat,

Ani sokol Filistevkaranchea Gath xarant vochat.

Tim hea rajeam* poros borim asat kai,

Vo tancho vattar tumchea vattara poros vhoddlo asa kai?

3 Tumi odruxttacho dis tumchea monantlo kaddun uddoila kai,

Ani tumi maramarichem raj* haddttat kai?

4 Te hotʼtinchea dantanchea khattincher add poddttat ani sofancher* paim posraitat,

Te hinddantlim menddram ani motte-motte paddkule* khatat.

5 Te kinorechea* avazar gitam toiar kortat,

Ani Davida bhaxen, songitachim sadhonam toiar kortat.

6 Vhoddlea-vhoddlea kopamnim te drakxancho soro pietat,

Ani boreantlea-borea telan apleakuch makhtat.

Punn Juzechea nisonttonachem tankam kainch poddlolem na.

7 Taka lagon, sogleant poilim tankam koidi korun vhortole,

Ani tanche mouza korpache dis kabar zatole.

8 Fouzancho Dev Jehova sangta, ‘Akʼkhea Vixvacho Dhoni Jehovan aplea jivacho soput gheun oxem mhunnttlam,

“Mhaka Jakobachea gorvacho kanttallo ieta,

Ani tachea vhoddlea gopurancho hanv dves kortam,

Xar ani tantunt bhorlolem asa tem soglem hanv dusmananchea hatant ditolom.

9 “‘“Eka ghorant dha munis vanchle zalear pasun, te-ui moron voitole. 10 Ek soiro* ieun tanchim moddim bhair gheun voitolo ani ek-ek korun tim lasoitolo. To ghorantlean tanchim haddam bhair haddttolo ani uprant ghorachea bhitorlea rumamnim zo konn asa taka oxem mhunnttolo, ‘Tujea sangata anik konnui asa?’ Ani to mhunnttolo, ‘Konn na!’ Tednam to soiro mhunnttolo, ‘Vogi rav! Karonn ho Jehovachem nanv gheuncho vell nhoi.’”

11 Karonn adnea dita to Jehova,

Ani to vhoddlea ghorache kuddkean-kuddke kortolo,

Ani dhakttea ghoracho churo kortolo.

12 Ghodde khoddpar dhanvtat kai,

Vo thoim konnui boilank gheun zot ghaltolo kai?

Tumi nitik vikari zhadd korun uddoilam,

Ani nitivontponnachem foll koddu* korun uddoilam.

13 Tumi upeog naslolea vostunk lagon khuxal zatat,

Ani mhunnttat, “Ami amcheach bollan xoktivont zaunk nant kai?”

14 Taka lagon, are Izraelachea ghorannea, hanv tumchea add ek raxttr ubem kortolom,

Ani te Lebohamath* tem Arabachea Vhalla meren tumcher zulum kortole,’ fouzancho Dev Jehova oxem mhunntta.”

7 Akʼkhea Vixvacho Dhoni Jehovan mhaka ek dorxon dakhoilem:

Polloi! Uprantchem pik* ieunk suru zalʼlem tednanch tannem tollanchem ek birem dhaddlem. Razak diunk tonn* katrun zalea uprant hem pik zalʼlem. 2 Tollanchem birem desantlem soglem hirvem* tonn khaun gelea uprant hanvem mhunnttlem: “Akʼkhea Vixvachea Dhonia, Jehova Deva, upkar korun lokank bhogos! Na zalear Jakob koso salvar zatolo?* Karonn to oskot asa!”

3 Taka lagon, Jehovan hea vixim porot chintlem.* Jehovan mhunnttlem, “Borem, oxem zaunchem na.”

4 Akʼkhea Vixvacho Dhoni Jehovan mhaka hem dorxon dakhoilem: Polloi! Akʼkhea Vixvacho Dhoni Jehovan uzo dhaddun khast lavunk hukum dilo. Tea ujean khol udkam sukoun uddoilim ani zomnichea eka bhagacho nas korun uddoilo. 5 Tednam hanvem mhunnttlem: “Akʼkhea Vixvachea Dhonia, Jehova Deva, upkar korun hem addai! Na zalear Jakob koso salvar zatolo?* Karonn to oskot asa!”

6 Taka lagon, Jehovan hea vixim porot chintlem.* Akʼkhea Vixvacho Dhoni Jehovan mhunnttlem, “Borem, oxem-i zaunchem na.”

7 Jehovan mhaka hem dorxon dakhoilem: Polloi! Ollombo* lavun kelʼlea vontticher Jehova ubo aslo. Tachea hatant ek ollombo aslo. 8 Tednam Jehovan mhaka mhunnttlem: “Amos, tuka kitem dixtti poddtta?” Hanvem mhunnttlem: “Ek ollombo.” Uprant Jehovan mhunnttlem: “Hanv mhojea lokank Izraelak ek ollombo lavun topasunk voitam. Hanv tankam anik bhogsuncho na. 9 Izakache unchle zage padd zaun voitole ani Izraelachea povitr zageanchem nisontton zatolem. Hanv ek tolvar gheun Jeroboamachea ghoranneacher akromonn kortolom.”

10 Bethelacho iadnik Amazian, Izraelacho Raza Jeroboamak ho sondex dhaddlo: “Izraelachea ghorannea modem, Amos tujea add manddnni korta. Desantle lok tacho sondex anik aikon gheunk xokonant. 11 Karonn Amos mhunntta, ‘Jeroboam tolvarin mortolo, ani Izraelache lok koidi zaun aplea desa thaun voitolech.’”

12 Uprant Amazian Amosak mhunnttlem: “Are dorxona pollovpia, hangasorlo voch. Judachea desant pollon voch. Thoim vochon tujem pott bhor* ani tujeo bhasaunneo kor. 13 Punn hanga Bethelant, porot anik kednanch bhasaunneo korinaka, karonn hanga razacho povitr zago asa ani rajeachem mondir asa.”

14 Tednam Amosan Amaziak mhunnttlem: “Hanv provadi naslom ani provadeacho putui naslom. Punn hanv ek gonvlli aslom ani anjirachea zhaddanchi* kallji ghetalom.* 15 Punn Jehovan mhaka hinddak chorvak vhorpachem kam soddun ieunk sanglem. Jehovan mhaka mhunnttlem, ‘Voch, ani mhojea lokank Izraelak bhasaunni kor.’ 16 Tor atam Jehovacho sondex aik: ‘Tum mhunntta, “Izraelachea add bhasaunneo korinaka ani Izakachea ghorannea add porgott korinaka.” 17 Tea pasot Jehovan mhunnttlam: “Tuji bail xarant eke xindoll baile sarki zatoli, ani tumchea putank ani dhuvank tolvarin martole. Tuji zomin, mezpache dorien mezun tiche vantte kortole, ani tum svota eka oxudʼdh desant mortolo ani Izraelache lok koidi zaun tanchea desa thaun voitolech.”’”

8 Akʼkhea Vixvacho Dhoni Jehovan mhaka ek dorxon dakhoilem: Polloi! Piklolea follamnim* aslolo ek panttlo asa. 2 Tednam tannem mhaka vicharlem, “Amos, tuka kitem dixtti poddtta?” Hanvem mhunnttlem, “Piklolea follamnim* bhorlolo ek panttlo.” Tednam Jehovan mhaka mhunnttlem: “Mhojea lokancho, Izraelitkarancho xevott pavla. Hanv tankam anik bhogsuncho na. 3 Akʼkhea Vixvacho Dhoni Jehova mhunntta, ‘Devmondirantlean songitachea bodlek, vhoddlean bob marun roddttat to avaz ietolo. Sogleak zaitim moddim uddoilʼlim astolim, zaka lagon soglem xant astolem.’

4 Tumi sogle ho sondex aikat, je goribank maddoitat,

Ani desantlea khalteank kabar korun uddoitat.

5 Je mhunnttat, ‘Amcho dano vikunk, novea chondrimachi porob* kednam kabar zatoli?

Amcho dano vikunk Sabathacho dis kednam somptolo?

Magir ami efachem* map lhan korunk xoktole,

Shekelachem* vozon vaddounk xoktole,

Ani khottea tagddeamnim fosounk xoktole.

6 Uprant, ami chandin gorjevontank vikte gheunk xoktole,

Zoteanche eke zoddien goribak vikte gheunk xoktole,

Ani piddʼddear zalʼlo dano vikunk xoktole.’

7 Jehova, Jakobachea Mhoimecho soput gheun sangta,

‘Hanv tancheo korneo kednanch visorchona.

8 Taka lagon, des koddkoddttolo,*

Ani tantunt ravpi dor eklo dukh kortolo.

Ho des Nil nhoim-entlea udka bhaxen bhoron ieunchona kai?

Ani Ejipttantlea Nil nhoim-entlea udka bhaxen uchamboll zaun sokol denvchona kai?’

9 Akʼkhea Vixvacho Dhoni Jehova mhunntta,

‘Tea disa donparchea vellar hanv suria buddom-so kortolom,

Ani disachea uzvaddant desant kallokh kortolom.

10 Hanv tumcheo porbo dukhant bodoltolom,

Ani tumchim soglim gitam dukhachim gitam* korun uddoitolom.

Hanv sogleanchea bhenddar sak ghaltolom ani sogleanche kens tastolom,

Hanv tankam oso dukh korunk laitolom, zoso konnui aplea ekleach puta pasot korta.

Ani tea disacho xevott khub koddu astolo.’

11 Akʼkhea Vixvacho Dhoni Jehova mhunntta, ‘Polloi! Osle dis ietat

Jednam hanv desant bhuk dhaddttolom,

Unddo ani udka pasot nhoi,

Punn Jehovachim utram aikonk lok bhukelʼle ani tanelʼle astole.

12 Te lokot-lokot eka doria thaun dusrea doria poriant voitole,

Ani utʼtore thaun udentek* voitole.

Jehovachem utor sodhit te hanga-thoim bhonvtole, punn tankam tem mellchem na.

13 Tea disa, sobit ankvar cheddvam ani tornatte chedde,

Tanek lagon ghunvoll ieun poddttale.

14 Je Samariechea patkacho soput gheun mhunnttat,

“O Dan, tujea devachean!”

Ani, “Beershebachea vattechean!”

Te poddttole ani porot kednanch utthchenant.’”

9 Hanvem Jehovak vedicher voir polloilo, ani tannem mhunnttlem: “Khambeachea voilea bhagacher* mar ani umbre haltole. Tacho voilo bhag katrun uddoi, ani tea nisonttona thaun salvar zaun urtat tankam sogleank hanv tolvarin marun uddoitolom. Konnuch pollon vochonk xokchona, zo salvar zauncho proitn korta taka ies mellchem na.

2 Te Fondd* khonnon tantunt vochon liple zalear,

Mhozo hat tankam voddun bhair kaddttolo.

Ani te voir mollbar gele zalear,

Hanv tankam sokol denvoitolom.

3 Te Karmelache tengxer vochon liple zalear,

Hanv tankam sodhtolom ani thoim thaun tankam vhortolom.

Mhoje nodre thaun liponk te doriache kholaiek gele zalear,

Hanv tankam chabunk sorpak hukum ditolom.

4 Dusmanamnim tankam koident vhele zalear,

Hanv thoim tolvarek hukum ditolom ani ti tankam marun uddoitoli.

Tankam besanvam diunk nhoi, punn tancher odruxtt haddunk hanv tancher nodor dovortolom.

5 Karonn desak* hat lavpi, Akʼkhea Vixvacho Dhoni, fouzancho Dev Jehova zaun asa,

Taka lagon, des pigllon voitolo ani tantunt ravpi sogle lok dukh kortole.

Akʼkho des Nil nhoim-entlea udka bhaxen bhoron ietolo,

Ani Ejipttantlea Nil nhoim-entlea udka bhaxen sokol denvtolo.

6 ‘Zo mollbar porian aple panvdde,

Ani prithumer aplem bandop ubem korta.

Zo prithumer votounk

Doriachem udok ektthaim korta

—Tachem nanv Jehova.’

7 Jehova mhunntta, ‘Are Izraelachea lokamno, tumi mhojea pasot Kushitam sarke nhoi kai?

Hanvem Izraelak Ejipttantlean bhair haddunk na kai,

Filistevkarank Kretantlean ani Siriek Kirantlean bhair haddunk na kai?’

8 Jehova mhunntta, ‘Polloi! Mhoji nodor, hea Akʼkhea Vixvacho Dhoni Jehovachi nodor hea patki rajeacher asa,

Hanv prithume voilo taka nanch kortolom.

Punn hanv Jakobachea ghoranneacho purnn toren nas korchom na.’

9 ‘Karonn polloi! Hanv hukum ditam,

Zoso konnui challon haloita

Ani ekui fator zomnir poddona,

Toso hanv soglea raxttram modem Izraelachea ghoranneak haloitolom.

10 Mhojea lokam modem jitle patki asat, te sogle tolvarin mortole,

“Amcher odruxtt ieunchem na, amchea lagim pasun pavchem na,” oxem mhunnttat te sogle mortole.’

11 ‘Tea disa hanv Davidacho poddlolo tombu* porot ubo kortolom,

Hanv vero* bhorun kaddttolom,

Ani jem padd zalam tem porot bandun kaddttolom,

Adlea tempar aslem toxem hanv tem porot bandun kaddttolom.

12 Jea udexim, te Edomachea urloleank,

Ani mhojea nanvan vollkhotat tea soglea raxttrank aplea tabeant gheunk pavtole,’ oxem Jehova mhunntta, zo hem soglem korta.

13 Jehova mhunntta, ‘Polloi! Te dis ietat,

Jednam lunvnni korpeachem kam sompchea poilinch zot ghalpi ietolo,

Drakxam maddoupi ieunchea poilinch, bim vompʼpi ietolo,

Dongram thaun drakxancho godd soro gollttolo,

Ani soglea porvotam voilean to vhanvtolo.

14 Hanv mhojea lokank, Izraelitkarank ektthaim korun koidentlean porot haddttolom,

Te padd zalʼlim xaram porot bandun kaddttole ani tantunt ravtole,

Te drakxanche molle laitole ani tancho soro pietole,

Te bago toiar kortole ani tantuntlim follam khatole.’

15 Tumcho Dev Jehova mhunntta, ‘Hanv tankam tanchea desant roitolom,

Ani hanvem tankam dila tea desantlean

Konnuch tankam porot kednanch umttun kaddchona.’”

Hacho orth “Ek Vojem Koxem” vo “Ek Vojem Ubarun Vhorop.”

Mahiti A5 polloi.