HAGGAI

1 Darius Razachea razvottkechea dusrea vorsa, sovʼvea mhoineachea poilea disa, Judacho razpal Zerubabelak ani mha-iadnik Joshuak provadi Haggai-a* udexim Jehovacho* sondex mellʼllo. Zerubabel Shealtielacho put aslo ani Joshua Jehozadakacho put aslo. Tankam ho sondex mellʼllo:

2 “Fouzancho Dev Jehova oxem mhunntta, ‘He lok mhunnttat, “Jehovachem ghor* bandpacho* vell azun ieunk na.”’”

3 Porot ek pavtt provadi Haggai-a udexim Jehovan ho sondex dilo: 4 “Mhojem ghor hanga padd zalʼlem astana, tumi tumchea lakddachea borea-borea ghoramnim ravcho ho vell kai? 5 Atam fouzancho Dev Jehova oxem mhunntta, ‘Tumchea vagnnukecher dhean diat. 6 Tumi khub bim vomptat, punn tumkam unnem pik melltta. Tumi khatat, punn tumi dhadoxi zainant. Tumi pietat, punn tumchi tan bhagona. Tumi kopdde ghaltat, punn tumkam ub mellona. Kam korpi manai aplo disvoddo burak* poddlolea potient ghalta.’”

7 “Fouzancho Dev Jehova oxem mhunntta, ‘Tumchea vagnnukecher dhean diat.’

8 “Jehova mhunntta, ‘Dongrar vochat, lakddam haddat ani mhojem ghor bandat. Hea udexim hanv khuxal zatolom ani mhaka mhoima mellttoli.’”

9 “Fouzancho Dev Jehova mhunntta, ‘Tumkam khub pik mellttolem mhunn tumi axeun ravle, punn tumkam thoddench mellʼllem. Ani tumi tem pik ghorant haddlem tednam hanvem tem funk marun uddoilem. Hanvem oxem kiteak kelem? Karonn mhojem ghor padd zaun gelam, tori astana tumi ap-aplem ghor samballunk buddlolim asat. 10 Heach karonnak lagon, mollban dov divop ani prithumen pik divop bond kelam. 11 Hanv zomnicher, dongrancher, daneacher, novea drakxanchea soreacher, telacher, zomnicher kirlota tea dor eka vostucher, munxancher, zonvarancher ani tumchea hatanchea soglea vavracher dukoll dhaddit ravlom.’”

12 Shealtielacho put Zerubabelan ani Jehozadakacho put, mha-iadnik Joshuan ani urlolea soglea lokamnim tancho Dev Jehovachim ani provadi Haggai-achim utram aikolim. Karonn tanchea Devan, Jehovanuch taka ho sondex diunk dhaddlolo. Ani lok Jehovachi bhirant dhorunk lagle.

13 Uprant Jehovacho provadi Haggai-an, Jehova thaun mellʼlloli adnea pallun lokank ho sondex dilo: “Jehova mhunntta, ‘Hanv tumchea sangata asam.’”

14 Taka lagon, Jehovan Shealtielacho put, Judacho razpal Zerubabelachem ani Jehozadakacho put, mha-iadnik Joshuachem, toxench urlolea soglea lokanchim kallzam urben bhorlim. Ani tannim sogleamnim mellon aplea Devachem, Fouzancho Dev Jehovachem ghor bandpachem kam suru kelem. 15 Tannim hem kam Darius Razachea razvottkechea dusrea vorsa, sovʼvea mhoineachea 24-avea disa suru kelem.

2 Satvea mhoineachea 21-avea disa, provadi Haggai-a udexim Jehovacho ho sondex mellʼllo: 2 “Shealtielacho put, Judacho razpal Zerubabelak ani Jehozadakacho put, mha-iadnik Joshuak ani urlolea lokank upkar korun ho prosn vichar: 3 ‘Tumchea modlea kitlea lokamnim hea ghorachi* poilinchi mhoima polloilea? Atam tumkam hem koxem dista? Poilinchea ghorak sor kelear, hem kainch nhoi oxem tumkam disona kai?’

4 “Jehova mhunntta, ‘Zerubabela, dhir ghe. Jehozadakacho put, mha-iadnik Joshua, tum pasun dhir ghe.’

“Jehova mhunntta, ‘Desantlea soglea lokamno tumi-i dhir gheiat ani kam korat.’

“‘Karonn hanv tumchea sangata asam,’ oxem fouzancho Dev Jehova mhunntta. 5 ‘Tumi Ejiptta thaun bhair sorlole tednam hanvem tumkam jem utor dilʼlem tem ugddas korat. Mhoje xokten hanv tumkam margdorxon di-it asam.* Tor tumi bhienakat.’”

6 “Fouzancho Dev Jehova oxem mhunntta, ‘Hanv thoddeach vellan anik ek pavtt mollob, prithum, doria ani suki zomin haloitolom.’

7 “Fouzancho Dev Jehova mhunntta, ‘Hanv soglim raxttram haloitolom ani raxttrantleo sogleo moladik vostu hea ghorant ietoleo ani hanv hem ghor mhoimen bhortolom.’

8 “Fouzancho Dev Jehova mhunntta, ‘Chandi mhoji ani bhangarui mhojem.’

9 “Fouzancho Dev Jehova mhunntta, ‘Fuddem hea ghorachi mhoima poilim asli tachea poros chodd astoli.’

“Fouzancho Dev Jehova mhunntta, ‘Ani hanv hea zageak xanti ditolom.’”

10 Dariusachea razvottkechea dusrea vorsa, nnovʼvea mhoineachea 24-avea disa Jehovacho ho sondex provadi Haggai-ak mellʼllo: 11 “Fouzancho Dev Jehova oxem mhunntta, ‘Upkar korun kaidea vixim iadnikank vicharat: 12 “Ek munis aplea kopddeant povitr mas gheun voita ani tacho kopddo unddeak vo datt soup-ak* vo drakxanchea soreak vo telak vo koslea-i torechea jevnnak laglo zalear tem povitr zatolem kai?”’”

Iadnikamnim zobab dilo: “Na!”

13 Uprant Haggai-an vicharlem, “Eka munxan moddeak hat lailolean to oxudʼdh zata ani to hantuntlea khoinchea-i vostuk hat laita zalear ti vost oxudʼdh zatoli kai?”

Iadnikamnim zobab dilo: “Hoi, ti oxudʼdh zatoli.”

14 Tednam Haggai-an mhunnttlem: “Jehova sangta, ‘He lok ani hem raxttr mhojea nodren oxench asa. Tanchim soglim kamam ani tannim bhettoilʼli dor ek vost oxudʼdh asa.’

15 “‘Punn upkar korun, aiz thaun hacher bariksannen dhean diat: Jehovachem mondir porot bandpachem kam suru korchea poilim 16 tumchi poristhiti koxi asli? Konnui daneachea raxi koddem 20 mapam mellttolim mhunn voitalo tednam taka fokot 10 mapam mellttalim. Ani konnui drakxam maddoupachea zagear 50 mapam drakxancho soro mellot mhunn voitalo tednam taka fokot 20 mapam mellttalim. 17 Hanvem tumchea hatanchem soglem kam gorom varean, duensan* ani korveachea pausan* kabar korun uddoilem. Tori astana, tumchea modlo konnuch mhojea lagim ieunk na,’ oxem Jehova mhunntta.

18 “‘Punn upkar korun, aiz thaun, nnovʼvea mhoineachea hea 24-avea disa thaun, Jehovachea mondirachi buniad ghatlea tea disa thaun, hacher bariksannen dhean diat: 19 Bim azun poriant gudanvant asa kai? Drakxanche valik, anjirak, dallimak ani zoitunachea zhaddak azun poriant foll zaunk na kai? Hea disa thaun hanv tumkam besanvam ditolom.’”

20 Heach mhoineachea 24-avea disa, Jehovacho sondex dusre pavtti Haggai-ak mellʼllo, to oso aslo: 21 “Judacho razpal Zerubabelak sang, ‘Hanv mollob ani prithum halounk voitam. 22 Hanv rajeanchim xinvasonam portim korun uddoitolom, ani raxttrantlea rajeanchem boll kabar korun uddoitolom. Hanv rothank ani tancher bosloleank porte korun uddoitolom, ani ghodde poddttole ani tancher boslole asat te eka-mekak tolvarin marun uddoitole.’”

23 “Fouzancho Dev Jehova mhunntta, ‘Shealtielachea puta, mhozo sevok Zerubabela, tea disa hanv tuka apoitolom.’ Jehova mhunntta, ‘Hanv tuka xikʼko aslolea mudie sarko kortolom, karonn hanvench tuka vinchun kaddla,’ oxem fouzancho Dev Jehova mhunntta.”