ZEKARIA
1 Dariusachea razvottkechea dusrea vorsachea atthvea mhoineant, Berekiacho put ani Idocho natu, provadi Zekariak* Jehovacho* ho sondex mellʼllo: 2 “Jehovacho rag tumchea purvozancher pettlolo.
3 “Tankam sang, ‘Fouzancho Dev Jehova oxem mhunntta: “‘Hanv fouzancho Dev Jehova! Mhojea lagim porot ieiat, ani hanv tumchea lagim porot ietolom,” oxem fouzancho Dev Jehova mhunntta.”’
4 “‘Tumchea purvozam bhaxen zainakat, zankam provadeamnim adim oxem sanglolem: “Fouzancho Dev Jehova oxem mhunntta, ‘Tumcheo vaitt vatto ani vaitt kamam soddun diat ani mhojea lagim porot ieiat!’”’
“Jehova mhunntta, ‘Punn tannim mhojem aikonk na ani mhojer dhean diunk na.’
5 “‘Aiz tumche purvoz khoim asat? Ani te provadi azunui jive asat kai? 6 Punn hanvem mhojea sevokam udexim, mhojea provadeam udexim tumchea purvozank jeo xittkaunnneo ani formonnam sangonk lailʼlim, tim purnn zalim mhunn tumchea purvozamnim pollounk na kai?’ Tor te mhojea lagim porot aile ani tannim mhunnttlem: ‘Ami jim kamam kelʼlim ani jeo vatto apnnailʼleo, tanchem foll amkam mellʼllem. Fouzancho Dev Jehovan jem tharailʼlem tench tannem amchea sovem kelem.’”
7 Dariusachea razvottkechea dusrea vorsa, Shebat* mhoineachea, mhunnche, 11-vea mhoineachea 24-avea disa, Jehovacho ho sondex Berekiacho put ani Idocho natu, provadi Zekariak mellʼllo: 8 “Rati mhaka ek dorxon mellʼllem. Ek munis tambddea ghoddear boson ieta to hanvem polloilo. To khol falkeant aslolea pormollit zhaddamnim* ieun ubo ravlo. Tachea fattlean tambddea rongache, matiechea rongache ani dhovea rongache ghodde asle.”
9 Tednam hanvem vicharlem: “Mhojea dhonia, he ghoddesvar konn?”
Zo devdut mhojea lagim uloitalo tannem mhunnttlem: “Te konn tem hanv tuka dakhoitolom.”
10 Tednam zo munis pormollit zhaddam modem ubo aslo, tannem mhunnttlem: “He te, zankam Jehovan prithumecher bhonvddi marunk dhaddleat.” 11 Tednam tannim, pormollit zhaddam modem ubo aslolea Jehovachea dutak mhunnttlem: “Ami prithumer bhonvddi marun aile ani polloi! akʼkhi prithum xant asa, thoim kosloch bovall na.”
12 Tednam Jehovachea dutan mhunnttlem: “Fouzanchea Deva Jehova, 70 vorsam thaun tum Judachea xarancher ani Jeruzalemacher ragar asa. Ani kitlo temp poriant tum tanchi kakut korinastana ravtolo?”
13 Zo devdut mhojea lagim uloitalo taka Jehovan doiall ani bhuzvonnechea utramnim zobab dilo. 14 Tednam zo devdut mhojea lagim uloitalo tannem mhaka mhunnttlem: “Hi kollounni kor, ‘Fouzancho Dev Jehova oxem mhunntta: “Jeruzalema pasot hanv urben bhorlam ani Siona pasot hanv khubuch urben bhorlam. 15 Jim raxttram susegad asat, tea raxttrancher hanv khub ragar asam. Karonn hanv mhojea lokank thoddich khast diunk sodhtalom, punn tea raxttramnim tankam purnn toren kabar korun uddoile.”’
16 “Taka lagon Jehova mhunntta: ‘“Hanv kakut dakhounk porot Jeruzalemant ietolom ani mhojem ghor porot bandun kaddttolom. Jeruzalem xarak porot bandun kaddunk taka mezpachea dorien meztole,” oxem fouzancho Dev Jehova mhunntta.’
17 “Anik ek pavtt hi kollounni kor: ‘Fouzancho Dev Jehova oxem mhunntta: “Mhojim xaram porot ek pavtt boreponnan bhoron votʼtolim. Jehova porot Sionak bhuzvonn ditolo ani porot Jeruzalemak vinchun kaddttolo.”’”
18 Uprant hanvem voir polloilem ani mhaka char xingam dislim. 19 Tor, mhojea lagim uloitalo tea devdutak hanvem vicharlem: “Hem kitem?” Tannem mhunnttlem: “Him tim xingam zaun asat zannim Judachea, Izraelachea ani Jeruzalemachea lokank ximpddaun uddoilʼle.”
20 Uprant Jehovan mhaka kola aslole char kamdar dakhoile. 21 Hanvem vicharlem: “Te kitem korunk ietat?”
Tannem mhunnttlem: “Tea xingamnim Judak itlo ximpddaun uddoilʼlo ki konnuch apli tokli voir kaddunk xoklo na. He kola aslole kamdar tancher bhirant ghalunk ietat, toxench Juda desak ximpddaun uddounk jea raxttramnim xingam ubarlolim, tim moddun uddounk te ietat.”
2 Uprant hanvem voir polloilem tednam ek munis hatant mezpachi dori gheun asa to mhaka dislo. 2 Tor hanvem taka vicharlem: “Tum khoim voita?”
Tannem mhunnttlem: “Hanv Jeruzalemachi lambai ani rundai mezunk voitam.”
3 Ani polloi! zo devdut mhojea lagim uloitalo to gelo ani dusro ek devdut taka mellonk ailo. 4 Tea devdutan taka mhunnttlem: “Dhanvon tea tornattea munxa lagim voch ani taka oxem sang, ‘“Tantunt ravtolea zaitea lokank ani hinddak lagon, Jeruzalem durig naslolea eka ganva sarkem zatolem.” 5 Jehova mhunntta, “Hanv tachea bhonvtonnim ujeachi vonott zaun ravtolom ani taka mhojea mhoimen bhortolom.”’”
6 Jehova mhunntta, “Ieiat! Ieiat! Utʼtorechea desa thaun pollon ieiat.”
Jehova mhunntta, “Hanvem tumkam soglea vattamnim* ximpddaun uddoileat.”
7 “Siona, ieo! Tum jem Babilonachea dhuve borabor ravta, pollon ieo. 8 Fouzancho Dev Jehovan mhoima mellʼllea uprant mhaka* tea raxttram lagim dhaddla zannim tumkam luttlolim. To oxem mhunntta: ‘Zo tumkam hat laita, to mhojea dolleache bavlek hat laita. 9 Tor atam, hanv tanchea add mhozo hat ubartolom ani tanchech gulam tankam luttʼttole.’ Ani fouzancho Dev Jehovan mhaka dhaddla mhunn tumkam kollon ietolench.
10 Jehova mhunntta, “Sionache dhuve, khuxalkaien bob mar! Karonn hanv ietam ani hanv tujea modem ravtolom. 11 Tea disa, zaitim raxttram mhaka, Jehovak zuddttolim ani mhoji porza zatoli, ani hanv tujea modem ravtolom.” Ani fouzancho Dev Jehovan mhaka tumchea lagim dhaddla mhunn tumkam kollon ietolem. 12 Jehova povitr zomnicher, Judak aplo vantto zalʼlea bhaxen tabeant ghetolo ani Jeruzalemak porot vinchun kaddttolo. 13 Sogleamnim* Jehova mukhar vogi ravchem, karonn apnnem tharailam tem purnn korunk to aplea povitr zagear thaun ieta.
3 Uprant tannem mhaka mha-iadnik Joshua dakhoilo, zo Jehovachea devduta mukhar ubo asa. Ani Joshuachea uzvea vatten Soitan tacho virodh korunk ubo asa. 2 Jehovachea devdutan Soitanak mhunnttlem: “Soitana, Jehova tuji nit korum! Hoi, Jehova, zannem Jeruzalemak vinchun kaddlam tannem tuji nit korum. Ho Joshua ujeantlean voddun bhair kaddla toslea lakdda sarko nhoi kai?”
3 Joshua mhellea kopddeamnim devduta mukhar ubo aslo. 4 Devdutan aplea mukhar ube asloleank mhunnttlem, “Tache mhelle kopdde kaddat.” Magir tannem Joshuak mhunnttlem, “Polloi, hanvem tuzo guneanv* pois kela ani atam tuka borea kopddeamnim nhesoitole.”
5 Tednam hanvem mhunnttlem: “Tachea toklek ek nitoll munddaso* ghalat.” Tannim tache tokler nitoll munddaso ghatlo ani taka borea kopddeamnim nhesoilo. Tea vellar, Jehovacho dut thoim laginch ubo aslo. 6 Uprant, Jehovachea dutan Joshuak mhunnttlem: 7 “Fouzancho Dev Jehova oxem mhunntta, ‘Tum zor mhojea vatten cholʼlo ani mhojea mukhar tunvem tujeo zobabdareo purnn keleo zalear, tum mhojea ghorant neai korpi mhunn seva kortolo ani mhojea angnnanchi dekhrekh* kortolo. Ani hanga ube asat tanchea sangata hanv tuka-i mhojea mukhar ieunk porvangi ditolom.’
8 “‘Mha-iadnik Joshua, tum ani tujea mukhar bostat te tuje sangati, fuddara pasot ek khunna* zaun asat. Upkar korun aik: Polloi! Hanv Komb mhunnttlolea mhojea sevokak haddttam! 9 Tea fatrak polloi, zo hanvem Joshua mukhar dovorla. Tea fatracher sat dolle asat.* Hanv tacher kantoun kitem tori boroitam. Hanv tea desacho guneanv ekuch disa bhitor kaddun uddoitolom,’ oxem fouzancho Dev Jehova mhunntta.
10 “Fouzancho Dev Jehova mhunntta, ‘Tea disa, tumchea modlo dor eklo aplea xezareak aplea drakxanchea vali ponda ani aplea anjirachea zhadda ponda ieo mhunn apoitolo.’”
4 Uprant, zo devdut mhojea lagim uloitalo to porot ailo ani nhidlolea munxak utthaitat toso tannem mhaka utthailo. 2 Magir tannem mhaka vicharlem: “Tuka kitem dixtti poddtta?”
Hanvem mhunnttlem: “Mhaka ek diveanchem sttendd* dista, jem akʼkhem bhangarachem asa ani tachea voir ek kanso asa. Tacher sat dive asat, hoi sat dive! Ani tanchea voir aslolea diveank sat paipam asat.* 3 Diveanchea sttendda kuxik zoitunachim don zhaddam asat. Ek tea kanxeachea uzvea vatten ani dusrem kanxeachea dave vatten.”
4 Tednam mhojea lagim uloitolea devdutak hanvem vicharlem: “Mhojea dhonia, hea vostuncho orth kitem?” 5 Mhojea lagim uloitalo tea devdutan mhunnttlem: “Hea vostuncho orth kitem tem tuka khoborna?”
Hanvem mhunnttlem: “Na mhojea dhonia, mhaka khoborna.”
6 Tednam tannem mhaka mhunnttlem: “Zerubabelak ho Jehovacho sondex zaun asa: ‘“Nhoi mhunn foujen, nhoi mhunn bollan, punn mhojea xokten hem soglem ghoddttolem,” oxem fouzancho Dev Jehova mhunntta. 7 Are vhoddlea dongra, tum konn? Zerubabela mukhar tum ek-sarke zomni bhaxen* zatolo. Ani “Kitlo sobit! Kitlo sobit!” oxem lok vhoddlean mhunntta astananch, to Devmondiracho voilo fator gheun ietolo.’”
8 Jehova koddlean mhaka porot ek sondex mellʼllo: 9 “Zerubabelachea hatamnim hea ghorachi buniad ghatlea, ani tacheach hatamnim hem ghor bandun purnn zatolem. Fouzancho Dev Jehovan mhaka tumchea lagim dhaddla mhunn tumkam zannam zaunk poddttolem. 10 Konnench lhan survatencho* dis kainch valoracho na oso lekhcho nhoi. Karonn Zerubabelachea hatant ollombo* polloun te khub khuxal zatole. He sat dolle Jehovache zaun asat, je akʼkhea prithumer nodor marit asat.”
11 Uprant hanvem taka vicharlem: “Diveanchea sttenddachea uzvea ani davea vatten aslolea zoitunachea don zhaddancho orth kitem?” 12 Hanvem taka dusre pavtti vicharlem: “Bhangrachea don paipantlean, kanxeant bhangrachea rongachem tel votoita tea don khandeancho* orth kitem?”
13 Tednam tannem mhaka vicharlem: “Hea vostuncho orth kitem tem tuka khoborna?”
Hanvem mhunnttlem: “Na mhojea dhonia, mhaka khoborna.”
14 Tannem mhunnttlem: “He don makhlole zaun asat, je akʼkhea prithumechea Dhonia lagim ube asat.”
5 Hanvem porot voir polloilem ani hanvem ek kovllo uddtta to polloilo. 2 Devdutan mhaka vicharlem: “Tuka kitem dista?”
Hanvem mhunnttlem: “Mhaka ek kovllo uddtta to dista, zo 20 hat* lamb ani 10 hat rund asa.”
3 Uprant tannem mhaka mhunnttlem: “Ho xirap akʼkhea prithumer poddcho asa. Karonn kovlleachea eke vatten boroilam tea pormonnem, chori kortat tea sogleank khast mellonk zai, tori astana tankam ti mellonk na. Ani kovlleachea dusrea vatten boroilam tea pormonnem, khotto soput ghetat tea sogleank khast mellonk zai, tori astana tankam ti mellonk na. 4 Fouzancho Dev Jehova mhunntta, ‘Hanvem ho xirap dhaddla. Ho xirap chorachea ghorant voitolo ani zo munis mhojea nanvan khotto soput gheta, tachea-i ghorant voitolo. To tanchea ghorant ravon, tanchem ghor, moder* ani fatram soit nas korun uddoitolo.’”
5 Magir, zo devdut mhoje lagim uloitalo to fuddem ailo ani tannem mhaka mhunnttlem: “Upkar korun voir polloi, kitem voita tem polloi.”
6 Hanvem vicharlem: “Tem kitem?”
Tannem mhunnttlem: “Hem voita tem efachem aidon.”* Tannem fuddem mhunnttlem: “Akʼkhe prithumer noxttea lokanchem rup oxem asa.” 7 Uprant aidona voilem dhatuchem* gol dhampnnem voir ubarlem tem hanvem polloilem, ani tantunt bhitor ek bail boson asli. 8 Tannem mhunnttlem: “Hi bail Noxtteponn zaun asa.” Magir tannem tika efachea aidonant porot bhitor dukholʼli, ani ticher dhatuchem zodd dhampnnem dovorlem.
9 Magir hanvem voir polloilem tednam don bailo uddon ietat teo mhaka disleo. Tanchim pakham bokeachea pakham sarkim aslim. Tannim efachem aidon prithum ani mollba modem ubarun vhelem. 10 Tednam mhoje lagim uloitalo tea devdutak hanvem vicharlem: “Tim efachem aidon khoim gheun voitat?”
11 Tannem mhunnttlem: “Shinar* desant, zoim tim tichea pasot ek ghor bandtolim. Ani tem ghor bandun toiar zalea uprant, tim tika tichea sarkea zagear dovortolim.”
6 Uprant hanvem porot voir polloilem ani char rotham don dongram modlean ietat tim mhaka dislim. Te dongor tambeache asle. 2 Poilea rothak tambdde ghodde, dusrea rothak kalle ghodde, 3 tisrea rothak dhove ghodde ani chovthea rothak khotam aslole ani veg-vegllea rongache ghodde asle.
4 Mhoje lagim uloitalo tea devdutak hanvem vicharlem: “Mhojea dhonia, hem kitem?”
5 Devdutan mhunnttlem: “He char devdut,* je akʼkhea prithumechea Dhonia mukhar ube asle ani atam te bhair sorleat. 6 Kalle ghodde utʼtore vatten aslolea desant vochot asat. Dhove ghodde doriachea poltoddi vatten aslolea desant vochot asat. Ani khotam aslole ghodde dokxinne vatten aslolea desant vochot asat. 7 Ani veg-vegllea rongache ghodde prithumer bhonvddi marunk utsuk asat.” Tednam tannem mhunnttlem: “Vochat, prithumer bhonvddi marat.” Ani te prithumer bhonvddi marunk lagle.
8 Magir tannem mhaka ulo marun mhunnttlem: “Polloi, je ghodde utʼtorechea desa vatten gelʼle, tankam lagon tea desacher aslolo Jehovacho rag xant zalo.”
9 Porot ek pavtt Jehovacho sondex mhaka mellʼllo: 10 “Heldaian, Tobijan ani Jedaian koident aslolea lokam koddlean jeo vostu haddloleo, teo ghe. Ani tea disa tum Babilona thaun ailolea lokank gheun Zefaniacho put Josiachea ghora voch. 11 Tum bhangar ani chandi gheun, tacho ek mukutt* kor ani to Jehozadekacho put, mha-iadnik Joshuachea tokler dovor. 12 Ani taka oxem sang,
“‘Fouzancho Dev Jehova oxem mhunntta: “Ho to munis zaun asa, zachem nanv Komb. To aplea zagear kirlotolo ani Jehovachem mondir bandtolo. 13 Ho toch, zo Jehovachem mondir bandtolo. Ho toch, zaka vorteponn mellttolem. To aplea xinvasonar boson raz kortolo. To raza ani iadnikui zatolo. To heo donui podveo bore toren samballttolo.* 14 Helem,* Tobija, Jedaia ani Zefaniacho put Hen,* hancho ugddas mhunn to mukutt* Jehovachea mondirant dovortole. 15 Pois-pois thaun lok ietole ani Jehovachem mondir bandunk modot kortole.” Ani fouzancho Dev Jehovan mhaka tumchea lagim dhaddla mhunn tumkam zannam zaunk poddttolem. Tumi tumcho Dev Jehovachem aikolem zalear, hem soglem ghoddon ietolem.’”
7 Darius Razachea razvottkechea chovthea vorsa, Kislev* mhoineachea, mhunnche, nnovʼvea mhoineachea chovtea disa Jehovacho sondex Zekariak mellʼllo. 2 Jehova koddem doiechi bhik magonk, Bethelantlea lokamnim Sharezer, Regem-melek ani tachea munxank dhaddle. 3 Tannim fouzancho Dev Jehovachea ghorachea* iadnikank ani tachea provadeank vicharlem: “Itlea vorsam thaun korit aileat toxem, ami* panchvea mhoineant roddnnem ani upas korcho kai?”
4 Fouzancho Dev Jehovacho sondex anik ek pavtt mhaka mellʼllo: 5 “Desantlea soglea lokank ani iadnikank oxem vichar, ‘Tumi 70 vorsam, panchvea ani satvea mhoineant roddnnem korun upas kelʼlo to khorench mhojea pasot aslo kai? 6 Tumi khatalim ani pietalim tednam tumi tem tumcheach pasot korinaslim kai? 7 Jeruzalem ani tachea bhonvtonnchim xaram xantin aslim, toxench Negeb ani Shefelant lok ravtale tednam, Jehovan aplea adlea provadeank sanglolem tem tumi pallunk zai aslem nhoi?’”
8 Jehovacho sondex porot ek pavtt Zekariak mellʼllo: 9 “Fouzancho Dev Jehova oxem mhunntta, ‘Sarke toren nit korat, eka-mekachi kakut korat ani visvaxi mog dakhoiat. 10 Vidvank vo onathank* nagoinakat, pordexiank vo goribank luttum nakat, ani tumchea kallzant eka-meka add manddnni korinakat.’ 11 Punn lok dhean diunk nakarit ravle, hottʼtti* zaun tannim taka fatt keli ani tachem aikonk naka mhunn tannim aple kan bond kele. 12 Tannim aplem kalliz hirea sarkem ghott* kelam. Fouzancho Dev Jehovan povitr xokte udexim, adlea provadeam koddlean tankam je kaide* dilʼle ani utram sanglolim tim tannim pallunk nant. Taka lagon, fouzancho Dev Jehovacho rag tancher pettlo.”
13 “Fouzancho Dev Jehova mhunntta, ‘Hanvem* ulo marlo tednam tannim aikonk na. Taka lagon, tim mhaka ulo martat tednam hanv-ui tanchem aikochom na. 14 Hanvem vadoll dhaddun, tankam soglea onvollkhi raxttramnim ximpddaile. Te gelea uprant tancho des padd zaun urlo, thoim konnuch porot ieunk na vo tantuntlean konn pasar pasun zaunk na. Karonn dusmanamnim tea sobit desachi poristhiti oxi korun soddloli ki polloitoleank bhirant distali.’”
8 Fouzancho Dev Jehovacho sondex porot ek pavtt mhaka mellʼllo: 2 “Fouzancho Dev Jehova oxem mhunntta, ‘Siona pasot hanv urben bhorlam, hanv khubuch urben bhorlam. Ani ragan bhoron hanv tichea pasot panvl ghetolom.’”
3 “Jehova oxem mhunntta, ‘Hanv porot Sionant ietolom ani Jeruzalemant ravtolom. Jeruzalemak sotachem* xar mhunnttole, ani fouzancho Dev Jehovachea dongrak povitr dongor mhunnttole.’”
4 “Fouzancho Dev Jehova oxem mhunntta, ‘Zanntte lok porot Jeruzalemachea nakear bostole. Te borinch vorsam jieleat dekhun tanchea dor ekleachea hatant danddo astolo. 5 Ani xarache nake, khellttat tea bhurgeamnim bhorlole astole.’”
6 “Fouzancho Dev Jehova oxem mhunntta, ‘Tea disamnim, oxem ghoddop khub kotthin mhunn urlolea lokank dislear pasun, mhaka tem korop kotthin asa kai?’ hem fouzancho Dev Jehova mhunntta.”
7 “Fouzancho Dev Jehova oxem mhunntta, ‘Hanv mhojea lokank udent ani ostomechea desam thaun* soddoitolom. 8 Hanv tankam porot haddttolom ani te Jeruzalemant ravtole. Te mhoji porza zatole ani hanv tancho Dev zatolom, ani hanv tanchea thaim sotan* ani nitivontponnan vagtolom.’”
9 “Fouzancho Dev Jehova oxem mhunntta, ‘Provadeanchem aikotoleamno, dhir dhorat!* Tumi tanchea tonddantlean jem aikotat, tem tumkam fouzancho Dev Jehovachea mondirachi buniad ghatloli tednam-i sanglolem. 10 Hachea poilim lokank tancho disvoddo farik korinasle ani zonvaram pasotui farik korinasle. Ani dusmanachea bhirantik lagon bhair-bhitor soronk dhokeachem aslem, karonn hanvem soglea munxank eka-meka add kelʼle.’
11 “Fouzancho Dev Jehova mhunntta, ‘Punn hanv adim vaglom toso, atam hea urlolea lokam sangata vagchom na. 12 Karonn te xantichem bim vomptole. Drakxancheo vali follam ditoleo, prithum aplem pik ditoli ani mollbar thaun dov poddttolo. Hanv urlolea lokank heo sogleo vostu daiz mhunn ditolom. 13 O Judachea ani Izraelachea ghorannea, raxttram tumchem nanv gheun xirap ditalim. Punn atam hanv tumkam salvar kortolom ani raxttram tumchem nanv gheun besanv ditolim. Bhienakat! Dhir dhorat!’*
14 “Karonn fouzancho Dev Jehova oxem mhunntta: ‘Fouzancho Dev Jehovan sanglam, “Tumchea purvozamnim mhaka rag haddlo tednam hanvem tumcher odruxtt haddunk nichov kelʼlo, ani hanvem mhojem mon bodlunk na.* 15 Toxem, atam hanvem Jeruzalemachea ani Judachea ghoranneachem borem korunk nichov kela. Taka lagon, tumi bhienakat!”’
16 “‘Tumi hem soglem korat: Eka-meka lagim sot uloiat, xarachea darvonttea lagim sarki nit korat, ani osle nirnnoi gheiat jea udexim sodanch xanti urtoli. 17 Tumchea kallzamnim eka-mekak vaitt korchi manddnni korinakat ani khotto soput ghenakat.* Karonn oslea vostuncho hanv dves kortam,’ oxem Jehova mhunntta.”
18 Fouzancho Dev Jehovacho sondex porot ek pavtt mhaka mellʼllo: 19 “Fouzancho Dev Jehova oxem mhunntta, ‘Chovthea, panchvea, satvea ani dhavea mhoineache upasache dis bodlon, Judachea ghorannea pasot khuxalkaieche ani sontosache dis zatole. Te anondan porbo monounche dis astole. Taka lagon, sotacho ani xanticho mog korat.’
20 “Fouzancho Dev Jehova oxem mhunntta, ‘Oslo vell ieuncho asa jednam zaitea desantle ani xarantle lok ietole. 21 Ani eka xarant ravpi dusrea xarant ravtat tanchea lagim vochon mhunnttole: “Ieiat, Jehova koddem vochon doiechi bhik magom-ia, ani fouzancho Dev Jehovak sodhum-ia. Ami-i voitat.”* 22 Tednam zaitea desantle lok ani bollixtt raxttram, fouzancho Dev Jehovak sodhunk Jeruzalemant ietolim ani Jehova lagim doiechi bhik magtolim.’
23 “Fouzancho Dev Jehova oxem mhunntta, ‘Tea disamnim veg-veglleo bhaso uloupi soglea raxttrantle dha munis eka Judevachea kopddeachem pont dhortole. Hoi, te tachea kopddeachem pont dhorun mhunnttole: “Amkam tumchea sangata ieunk zai, karonn Dev tumchea sangata asa mhunn ami aikolam.”’”
9 Ho Devacho sondex:
“Jehovacho sondex Hadrak desa add asa,
Ani to Damaskacher poddttolo,
—Karonn Jehovache dolle munxakullacher asat,
Ani tachi nodor Izraelachea soglea kullancher asa—
2 Ticho* xezari Hamathachea add pasun ho sondex asa,
Ani Tir ani Sidona add pasun ho sondex asa, karonn tim apunn khub xannim mhunn somzotat.
3 Tiran aplea bhonvtonnim kilʼle* bandun kaddleat,
Dhulʼli bhaxen bhorpur chandi ektthaim kelea,
Rostea voilea matie bhaxen bhangar ektthaim kelam.
4 Polloi! Jehova tache koddlean tache theve kaddun ghetolo,
Tachea foujecho doriant* nas korun uddoitolo.
Ani tacho ujeant bhosm zatolo.
5 Hem polloun Ashkelon bhietolo.
Gazak khub dukh zatolem,
Ani Ekronakui toxench zatolem, karonn tacho bhorvonso tunttʼttolo.
Gazacho raza kabar zatolo,
Ani Ashkelonant konnuch ravchona.
6 Ashdodant pordexiacho* put ieun ravtolo,
Ani hanv Filistiacho gorv samko denvoitolom.
7 Hanv tachea tonddantlean rogtan buddloleo vostu bhair kaddttolom,
Vitt haddtta tosleo vostu tachea dantam modlean bhair kaddttolom,
Tache urlole lok amchea Devache zatole.
Ani te Judant sheikha* bhaxen ravtole,
Ani Ekronantle lok Jebusitam bhaxen zatole.
8 Hanv mhojea ghorachi rakhonn korunk bhair tombu bandtolom,
Jea udexim konnuch thoim ieunk-vochonk xokchona.
Porot kednanch zulum korpi thoinchean pasar zaunchona,
Karonn hanvem mhojea dolleamnim hem* polloilam.
9 O Sionache dhuve, khuxal zav!
O Jeruzalemache dhuve, zoit mellʼllem mhunn bob mar!
Polloi! Tuzo raza tujea lagim ieta.
To nitivont asa ani taronn ditolo,*
To khalto asa, to gaddvacher,
Hoi, gaddvachea poracher boson ieta.
10 Hanv Efraima thaun zhuzachem roth
Ani Jeruzalema thaun ghodde kaddun ghetolom.
Zhuzache dhonu kaddun ghetolom.
Ani soglea raxttrank to xanti porgottʼttolo,
Tachi razvottki eka doria thaun dusrea doria meren
Ani Nhoim-e* thaun prithumechea konnxea meren astoli.
11 O baile,* tujea vixim sangchem zalear
Hanv tujea koideank udok naslolea fonddantle bhair kaddttolom.
Oxem hanv tujea tea korarak lagon kortolom, zaka rogtan xikʼko marlolo.
12 Bhorvonso dovorlolea koideamno, kilʼleant porot ieiat.
Siona, aiz hanv tuka sangtam,
‘O baile, hanv tuka dobradan besanvam ditolom.
13 Karonn hanv Judak mhojea dhonu bhaxen bagoitolom
Ani Efraimak bann mhunn tacher laitolom.
O Siona, hanv tujea putank
Grisachea putam add utthaitolom.
Ani hanv tuka zhuzareachea tolvari sarko kortolom.’
14 Jehova aplea lokam sangata asa mhunn dison ietolem,
Tache bann zoglam bhaxen suttʼttole.
Akʼkhea Vixvacho Dhoni Jehova xing* vazoitolo,
Ani dokxinnechea vadollam bhaxen to dusmanam lagim zhuzonk voitolo.
15 Fouzancho Dev Jehova aplea lokanchi rakhonn kortolo,
Dusman gofnnichea fatramnim tancher akromonn kortole, punn te dusmanak haroitole.
Te khuxal zaun drakxancho soro pieun ttaitt zalʼlea bhaxen bob martole,
Te kanxea sarke bhortole,
Te vedichea konnxea bhaxen bhiztole.
16 Tea disa tancho Dev Jehova,
Aplea lokank, aplea hinddak salvar kortolo.
Te mukuttak lailʼlea moladik fatram bhaxen tachea desant chokchoktole.
17 Devachem boreponn kitlem vortem,
Tachi sobitkai kitli vorti!
Dano khaun* tornatte chedde ghott-mutt zatole,
Ani novo drakxancho soro pieun ankvar cheddvam khuxal zatolim.”
10 “Uprant ieta tea pausachea* kallar, Jehova lagim paus magat.
Karonn kallim kupam Jehovach toiar korta,
Toch lokam pasot paus dhaddtta,
Ani dor ekleachea xetant pik upzoita.
Te fottkirim sopnam sangtat,
Ani te bhuzvonn diuncho proitn kortat, punn konnakuch faideak poddona.
Tea pasot, lok menddram bhaxen hanga-thoim bhonvtole.*
Ani tancho konn gonvlli na dekhun te dukh-tras sostole.
3 Gonvlleancher mhozo rag pettla,
Hanv zulum kortat toslea fuddaream* koddlean hixob ghetolom,
Karonn fouzancho Dev Jehovan aplea hinddacher, Judachea ghoranneacher dhean dilam,
Ani tannem tankam aplea zhuzachea ghoddeak asa toslem vorteponn dilam.
4 Tachea thaun* ek mukheli* ietolo,
Tachea thaun modot korunk ek raz korpi* ietolo,
Tachea thaun zhuzachem dhonu bhair sortolem,
Dor eklo dekhrekh korpi tacheach thaun ietolo, he sogle ekach borabor bhair sortole.
5 Ani te oslea zhuzaream bhaxen zatole,
Je zhuza vellar rostea voilea dhulʼlik maddoitat.
Te zhuztole, karonn Jehova tanchea sangata asa,
Dusmananchea ghoddesvarank loz bhogchi poddttoli.
6 Hanv Judachea ghoranneak xoktivont kortolom,
Ani Juzechea ghoranneak salvar kortolom.
Hanv tanchi kakut kortolom,
Ani tankam tanchea desant porot haddttolom.
Hanvem tankam kednanch nakarunk naslolea porim te zatole.
Karonn hanv tancho Dev Jehova, ani hanv tanchem magnnem aikotolom.*
7 Efraimache lok xoktivont zhuzarea sarke zatole,
Drakxancho soro pieun khuxal zalʼlea porim, tanchim kallzam khuxal zatolim,
Hem polloun tanche put sontosbhorit zatole,
Jehovak lagon tanchim kallzam anondan bhortolim.
8 ‘Hanv fivnneo* marun tankam ektthaim kortolom,
Karonn hanv tankam soddoitolom ani tancho ankddo khub vaddttolo,
Ani fuddem pasun vaddot voitolo.
9 Bim-am bhaxen raxttram modem hanv tankam ximpddait zalear pasun,
Poixilʼlea vattaramnim tim mhozo ugddas kortolim,
Tankam ani tanchea putank novean boll mellttolem ani te porot ietole.
10 Hanv tankam Ejipttantlean porot haddttolom,
Ani Asirientlean tankam ektthaim kortolom.
Hanv tankam Gilead ani Lebanonant haddttolom,
Ani tankam sogleank zago pavchona.
11 Doria tanchi vatt addaita tednam,
Hanv tantuntlean pasar zaun tachim lharam foddun uddoitolom.
Nil nhoim tanchi vatt addaunk ubi ravta tednam hanv tichem udok sukoitolom.
12 Hanv Jehova, tankam xoktivont kortolom,
Ani te mhojea nanvan choltole,’ oxem Jehova mhunntta.”
11 “Are Lebanona, tuje darvontte ukte kor,
Ani uzo tujea cedar rukhancho* nas korum.
2 Are hirvea* rukha,* vhoddlean bob marun rodd, karonn cedar rukh sokol poddla.
Vhoddlea-vhoddlea zhaddancho nas zala!
Bashanachea oak* zhaddamno, vhoddlean bob marun roddat,
Karonn datt ran kabar zaun gelam!
3 Aikat! Gonvlleanchem roddnnem aikat,
Karonn tanchem vorteponn kabar zalam.
Aikat! Tornatte xinv goroztat tem aikat,
Karonn Jordanachea deger aslolim datt ranam kabar zaleant.
4 “Mhozo Dev Jehova oxem mhunntta, ‘Jivexim marunk dovorlolea hinddacho gonvlli zav. 5 Tea menddrank vikte gheupi tankam jivexim martat, punn konnuch tankam guneanvkari tharaina. Tankam viktat te mhunnttat, “Jehovachi vakhannʼnni zaum, karonn hanv girest zatolom.” Ani tanchea gonvlleank tanchi matui doia-maia disona.’
6 “Jehova mhunntta, ‘Desant ravpi lokank hanv anik doia-maia dakhounchom na. Tor hanv dor eka munxak tachea xezareachea ani tachea razachea hatant poddom-so kortolom. Ani te desacho nas kortole ani hanv tankam tanchea hatantlean soddounchom na.’”
7 Tednam hanv marunk vhortolea hinddacho gonvlli zalom. Hinddantlea tras sostolea menddram pasot, hoi tumchea pasot hanv gonvlli zalom. Tor hanvem don dandde ghetle. Ekleak Kakut ani dusreak Ekvott mhunn nanv dilem, ani hanv hinddak chorounk laglom. 8 Hanvem ekach mhoineant tin gonvlleank kaddun uddoile. Karonn mhojean tankam sosunk zaina zalem ani tankam-i mhozo kanttallo ietalo. 9 Hanvem mhunnttlem: “Hanv tumchi kallji gheit ravchom na. Tumchea modlo zo konn morta to morom, zacho nas zata tacho nas zaum, ani je urtat tannim eka-mekak pinzun khaum.” 10 Tor hanvem Kakut nanvacho mhozo danddo ghetlo ani to katrun uddoilo, ani hanvem soglea lokam sangata kelʼlo to korar moddlo. 11 Hea toren, tea disa to korar moddlo. Hinddantlea tras sostolea menddramnim mhaka hem korta tem polloilem tednam to sondex Jehova koddlean aslo mhunn tim somzolim.
12 Magir hanvem tankam mhunnttlem: “Tumkam sarkem dista zalear mhaka mhozo disvoddo diat, na zalear dinakat.” Tednam tannim mhaka mhozo disvoddo mhunn chandiche 30 nanne dile.*
13 Tednam Jehovan mhaka mhunnttlem: “Kitlem vhoddlem mol lailam tannim mhojem! Voch ani te nanne dan pettient uddoi.” Tor chandiche 30 nanne gheun hanv Jehovachea ghorant gelom ani hanvem te dan pettient uddoile.
14 Uprant hanvem Ekvott nanvacho mhozo dusro danddo katrun uddoilo. Hea toren, Juda ani Izraela modem bhavam sarkem aslolem natem kabar zalem.
15 Uprant Jehovan mhaka mhunnttlem: “Atam, upeog naslolea gonvlleachem sadon ghe. 16 Karonn hanv eka gonvlleak hea desacho odhikari zaunk ditam. Jim menddram morchim asat tanchi to kallji gheunchona, to lhan menddrank sodhunk voichona, mar laglolea menddranche to ghave bandchona, toxench ghott-mutt menddrankui to bhorounchona. Tachea bodlek, to mottea-mottea menddranchem mas khatolo ani menddranchim fuddam* to umttun kaddttolo.
17 Kosloch upeog naslolea tea gonvlleacher hai, zo hinddak soddun dita!
Ek tolvar tachea hatacher ani uzvea dolleacher akromonn kortoli.
Tacho hat purnn toren sukon voitolo,
Ani to uzvea dollean purnn toren kuddʼddo zatolo.”
12 Ho Devacho sondex:
Jehova, zannem mollob posrailam,
Zannem prithumechi buniad ghatlea,
Zannem munxa bhitor jivitacho svas ghatla, to mhunntta,
“Izraela vixim Jehova oxem sangta,
2 Hanv Jeruzalemak ek oslo pelo* kortolom zo bhonvtonncho lok pieun loktole. Juda sangata Jeruzalemakui gherav ghaltole. 3 Tea disa hanv Jeruzalemak, soglea raxttram pasot eka zodd fatra bhaxen kortolom. Zo konn taka ubarta, taka khub mar lagtolo. Prithume voilim soglim raxttram tachea* add ektthaim zatolim.” 4 Jehova mhunntta, “Tea disa, hanv dor eka ghoddeacher bhirant dhaddttolom ani tachea ghoddesvarak piso kortolom. Hanv Judachea ghoranneacher nodor dovortolom, punn raxttranchea soglea ghoddeank kuddʼdde korun uddoitolom. 5 Judache sheikh* aplea kallzant mhunnttole, ‘Jeruzalemant ravpi lok amchem boll zaun asat, karonn fouzancho Dev Jehova tanchea sangata asa.’ 6 Tea disa, hanv Judachea sheikhank lakddachea raxint zolltta tea ujea sarko kortolom ani hanv tankam tednanch katorlolea daneachea bhoream modem eka zolltte chuddi* sarko kortolom. Te aplea uzveak ani daveak aslolea soglea lokancho nas kortole. Ani Jeruzalemant ravpi lok porot aplea zagear,* Jeruzalemant ravtole.
7 “Jehova poilim Judachea tombunk salvar kortolo, jea vorvim Davidachea ghoranneachi sobitkai* ani Jeruzalemant ravtolea lokanchi sobitkai* Juda poros chodd zaunk pavchina. 8 Tea disa Jehova ek ddhal zaun Jeruzalemant ravtolea lokanchi rakhonn kortolo. Tea disa, tanchea modlo addkholltta to* Davida sarko xoktivont zatolo, ani Davidachem ghorannem Deva sarkem, hoi, tanchea mukhar cholta tea Jehovachea duta sarkem zatolem. 9 Tea disa hanv Jeruzalema add ieta tea soglea raxttrank kabar korun uddoitolom.
10 “Hanv Davidachea ghoranneacher ani Jeruzalemant ravtoleancher mhoji povitr xokti votoitolom. Te mhaka vinovnneo kortole ani tankam mhoji maniotai mellttoli. Zaka tannim bhalo topla taka te polloitole ani tachea pasot te oxe roddttole, zoxem konnui aplo ekloch put mela mhunn vhoddlean bob marun roddtta. Ani tachea pasot oxe dukh kortole, zoxem konnui aplea malgoddea puta pasot korta. 11 Tea disa, Jeruzalemant roddnneachi bob aikonk ietoli. Megiddochea Mollar aslolea Hadad-rimonant vhoddlean bob aikonk ailoli, toxi hi roddnneachi bob astoli. 12 Ani akʼkho des bob marun roddttolo ani dor ek famil dukh kortoli. Davidachem ghorannem dukh kortolem, tanche dadle kuxin ani tancheo bailo kuxin dukh kortoleo. Nathanachem ghorannem dukh kortolem, tanche dadle kuxin ani tancheo bailo kuxin dukh kortoleo. 13 Levichem ghorannem dukh kortolem, tanche dadle kuxin ani tancheo bailo kuxin dukh kortoleo. Shimeichem ghorannem dukh kortolem, tanche dadle kuxin ani tancheo bailo kuxin dukh kortoleo. 14 Urloleo sogleo famili dukh kortoleo, tanche dadle kuxin ani tancheo bailo kuxin dukh kortoleo.
13 “Tea disa, Davidachea ghoranneachem ani Jeruzalemant ravtolea lokanchem patok ani mhelleponn dhuvun kaddunk tanchea pasot baim martole.
2 Fouzancho Dev Jehova mhunntta, “Tea disa, hanv desantlean murteanchim nanvam pusun kaddttolom ani konnuch tancho ugddas pasun korchona. Hanv provadeank ani mhellea xoktek* desantlean kaddun uddoitolom. 3 Ani konnem-i porot bhasaunni keli zalear pasun, taka zolm dilʼlim avoi-bapui mhunnttolim, ‘Tum jivo urchona, karonn tunvem Jehovachea nanvan fotti sangleat.’ Ani taka zolm dilʼlim tachim avoi-bapui taka tolvarin topun martolim.
4 “Tea disa, bhasaunni kortana dor eka provadeak aplem dorxon sangonk loz bhogtoli. Ani dusreank fosounk to provadeache kopdde* ghalop soddun ditolo. 5 To mhunnttolo, ‘Hanv provadi nhoi. Hanv ek xetkamti. Karonn hanv lhan aslom tednam eka munxan mhaka gulam mhunn vikto ghetlolo.’ 6 Ani konnem-i taka oxem vicharlem zalear, ‘Tujea angar* he ghave kosle?’ Tednam to mhunnttolo, ‘Hanv mhojea ixttanchea* ghora gelʼlom tednam tannim mhaka he ghave keleat.’”
7 Fouzancho Dev Jehova mhunntta, “O tolvare, mhojea gonvllea add utth,
Zo mhozo sangati asa tachea add utth.
Gonvlleak mar ani hinddak* hanga-thoim ximpddom-di.
Chaltea lokam add hanv mhozo hat ubartolom.”
8 Jehova mhunntta, “Akʼkhea desant jitle lok asat,
Tantuntle don vantte katrun uddoitole ani tancho nas zatolo.*
Punn tisrea vantteak toxech soddun ditole.
9 Hanv tea tisrea vantteak ujeantlean vhortolom.
Chandi xudʼdh kortat toxi, hanv tankam xudʼdh kortolom,
Ani bhangar topastat toxem, hanv tankam topastolom.
Te mhojem nanv gheun mhaka ulo martole,
Ani hanv tankam zobab ditolom.
Hanv mhunnttolom, ‘He mhoje lok,’
Ani te mhunnttole, ‘Jehova amcho Dev.’”
14 “Polloi! Jehovacho to dis ieta, jednam tuzo* mhal luttun tujea mukharuch to vanttun ghetole. 2 Hanv soglea raxttrank Jeruzalema add zhuz korunk ektthaim kortolom. Te xaracher kobzo kortole, ghoram luttʼttole ani bailancho bolotkar kortole. Xarantlea ordea lokank koidi korun vhortole, punn urlolea lokank xarantlean vhorchenant.
3 “Jehova tea raxttra lagim zhuz korunk voitolo ani to zhuzachea disa zhuzta toso tanche lagim zhuztolo. 4 Tea disa, to Jeruzalemachea udente vatten aslolea Zoitunanchea Dongrar aple paim dovrun ubo ravtolo. Ani udente* thaun ostome* meren Zoitunanchea Dongrache futton don bhag zatole. Tea dongracho ordo bhag utʼtore vatten ani ordo bhag dokxinne vatten voitolo ani modem ek vhoddlem falkem* toiar zatolem. 5 Mhojea dongram modem toiar zalʼlea tea falkeant tumi pollon voitole, karonn tem falkem Azel meren pavtolem. Judacho Raza Uziachea tempar bhuimkamp zalʼlo tednam tumi pollon gelʼle toxem tumkam pollon voichem poddttolem. Ani mhozo Dev Jehova ietolo ani sogle povitr lok tachea sangata astole.
6 “Tea disa, porzollit* uzvadd aschona. Vostu xenketoleo.* 7 To disui aschona ani ratui aschina, ani tea disa sanjecho uzvadd astolo. Ho dis Jehovacho dis mhunn vollkhotole. 8 Tea disa, Jeruzalema thaun jivit dita toslem udok vhanvtolem. Tantuntlem ordem udok udente vatten aslolea doria* koddem ani ordem udok ostome vatten aslolea doria* koddem vhanvtolem. Gormechea disamnim ani thonddechea disamnim pasun oxench zatolem. 9 Ani Jehova akʼkhea prithumecho Raza zatolo. Tea disa, Jehova ekloch eklo astolo* ani tachem nanv-ui ekuch nanv astolem.*
10 “Geba thaun tem Jeruzalemachea dokxinnek aslolea Rimona meren akʼkho des Arabachea falkea bhaxen zatolo. Punn Jeruzalem aplea zagear voir ubarlolem astolem ani lokamnim bhorlolem astolem. Benjaminachea Darvonttea thaun tem Poilea Darvonttea meren, Poilea Darvonttea thaun tem Konnxeachea Darvonttea meren ani Hananelachea Gopura thaun tem razachea drakxam maddoupachea zagea meren bhorlolem astolem. 11 Jeruzalemacher porot kednanch nisonttonacho xirap poddchona. Thoim lok ravtole ani soglim surokxit astolim.
12 “Veg-vegllea desantle lok je Jeruzalema add zhuz kortat, tancher Jehova pidda dhaddttolo. Te ube* astananch tanchem mas kuson voitolem, tanche dolle aplea zagear kustole ani tancheo jibo tanchea tonddamnim kustoleo.
13 “Tea disa, Jehova tankam samko guspa-gondhollant ghaltolo ani dor eklo aplea sangateak* dhortolo ani te eka-mekacher akromonn kortole. 14 Juda pasun Jeruzalema sangata mellon zhuz kortolem. Ani bhonvtonnchea soglea raxttranchi girestkai, mhunnche, bhorpur bhangar ani chandi, toxench kopdde ektthaim kortolem.
15 “Ani tea pidde bhaxen tanchea tombumnim aslolea ghoddeancher, khenchrancher,* unttancher, gaddvancher ani soglea poslolea zonvarancher pasun anik ek pidda ietoli.
16 “Jeruzalema add zhuz kortolea soglea raxttrantle je lok salvar zatat, te dor vorsa Razak, fouzancho Dev Jehovak man bagounk* ani Mattvanchi Porob monounk voir Jeruzalemak voitole. 17 Punn prithumer jietolea soglea familim modlo konnui Razak, fouzancho Dev Jehovak man bagounk voir Jeruzalemant vochonant zalear tankam paus mellchona. 18 Ani Ejipttantlem ghorannem voir Jeruzalemant iena ani xarant bhitor sorona zalear, tankam pasun paus mellchona. Tachea bodlek, Jehova tancher teo pidda dhaddttolo, jeo to, Mattvanchi Porob monounk voir ienant tancher dhaddtta. 19 Ejipttak ani Mattvanchi Porob monounk voir ienant tea soglea raxttrank tanchea patkanchi hi khast mellttoli.
20 “Tea disa, ghoddeanchea ghanttincher him utram boroilʼlim astolim, ‘Jehova povitr!’ Ani Jehovachea ghorachim aidonam,* vedi mukhar dovortat tea kanxeam sarkim zatolim.* 21 Jeruzalemant ani Judant jitlim aidonam* asat tim povitr zatolim ani fouzancho Dev Jehovak bhettoilʼlim astolim. Ani bolidanam bhettounk ietat te sogle tantuntlea thoddea aidonamnim bolidananchem mas xizoitole. Tea disa, fouzancho Dev Jehovachea ghorant ekui Kananitkar* aschona.”
Hacho orth “Jehovan Ugddas Kelo.”
Mahiti A5 polloi.
Mahiti B15 polloi.
Ek oslem zhadd zaka matxim chokchokta toslim panam astat ani boro pormoll dita toslim dhovim fulam zatat. Inglez bhaxent “myrtle tree.”
Utran utor, “mollba voilea charui vaream bhaxen.”
Ghoddie devdut.
Vo “Soglea munxamnim.”
Vo “oprad.”
Vo “pogddi.”
Vo “rakhonn.”
Vo “chinʼn.”
Ghoddie hacho orth sat dolle fatrak polloitat.
Hem oslem diveanchem sttendd zaka sat koddem uzo pettounk zago asta.
Ghoddie tim sat paipam tea kanxeak zuddlolim asat.
Vo “tum molla bhaxen; sopatt zomni bhaxen.”
Vo “vostuncho.”
Hem ek oslem sadhon zaun asa zantunt eka doriecher ek vozon lamboilʼlem asta ani kosli-i vost nitt ubi asa mhunn khatri korunk tem uzar kortat. Inglez bhaxent taka, “plumb line” mhunnttat.
Mhunnche, bhorpur follam laglole khande.
Ek hat mhunnttlear, 44.5 cm (17.5 inch). Mahiti B14 polloi.
Vo “lakudd.”
Utran utor, “efa.” Hanga tem oslea eka aidonak vo panttleak suchit korta jem ek efa map mezunk uzar kortale. Ek efa mhunnche, 22 L. Mahiti B14 polloi.
Inglez bhaxent “lead.”
Mhunnche, Babilonia.
He ghoddie devdutanchea zomeank suchit kortat.
Vo “sobit mukutt.”
Mhunnche, raza ani iadnik mhunn asloli zobabdari to xantin samballttolo.
Vers 10-ant sangla to Heldai.
Ho ghoddie vers 10-ant sanglolo Josia asonk xokta.
Vo “sobit mukutt.”
Mahiti B15 polloi.
Vo “mondirachea.”
Utran utor, “hanvem.”
Vo “zancho bapui bhair poddla tankam.”
Vo “jidʼdi.”
Vo ghoddie, “eka ghott fatra sarkem.”
Vo “xikounneo.”
Utran utor, “Tannem.”
Vo “visvaxi.”
Vo “lokank suria udeta tea desantlean ani suria buddtta tea desantlean.”
Vo “visvaxiponnan.”
Utran utor, “tumche hat ghott korat.”
Utran utor, “Tumche hat ghott korat.”
Vo “ani mhaka dukh zaunk na.”
Utran utor, “khottea soputacho mog korinakat.”
Vo “Hanv-ui voitam.”
Ghoddie Hadrak vo Damaska vixim sangta.
Vo “durgam.”
Vo ghoddie, “doriacher.”
Vo “kazara bhair dovorlolea sombondan zolmol’lo.” Inglez bhaxent “illegitimate.”
Sheikh mhunnche kullacho mukheli.
Hem lokanchem dukh mhunn dison ieta.
Vo “ani to zoitivont asa; ani taka salvar kela.”
Mhunnche, Eufrates.
Mhunnche, Sion vo Jeruzalem.
Xobdhkox polloi.
Vo “Jevonn jevun.”
Ho paus Abril mhoineachea modem suru zata. Mahiti B15 polloi.
Vo “Ghoranneachea devanchem; Imajeanchem.”
Vo “ulovop jadu vixim; ulovop gupit.”
Vo “bhottoktole.”
Utran utor, “bokddeam.”
Mhunnche, Juda thaun.
Utran utor, “konnxeacho gopur,” ho eka khas vo mhotvachea munxak suchit korta.
Utran utor, “khuntti,” ti tenko ditolea eka munxak suchit korta.
Vo “hanv tankam zobab ditolom.”
Inglez bhaxent taka “whistle” mhunnttat.
Utran utor, “danddo.”
Vo “Ejipttacho rajeacho danddo vo rajdondd tachea koddlean kaddun ghetole.”
Vo “devdarancho.” Eke torechem vhoddlem zhadd.
Vo “pachvea.”
Inglez bhaxent “juniper tree.” Xobdhkox polloi.
Vo “xindur.” Eke torechem vhoddlem zhadd.
Utran utor, “mapun dile.”
Vo “futtam.” Inglez bhaxent “hooves.”
Vo “oslo kanso.”
Mhunnche, Jeruzalem.
Sheikh mhunnche kullacho mukheli.
Vo “divtte; moxali.”
Vo “aplea sarkea zagear.”
Vo “mhoima.”
Vo “mhoima.”
Vo “tanchea modlo sogleam-von oskot asa to.”
Vo “ani Devachea nodren mhellem asa tem korunk dusreank uksaitat tankam.”
Vo “to aple provadeache kopdde je kens uzar korun kelʼle te.”
Utran utor, “Tujea hatam modem.” Mhunnche, hoddʼddear vo fattir.
Vo “Je mhozo mog kortat tanchea.”
Vo “menddrank.”
Vo “ani te mortole.”
Mhunnche, vers 2-ant sanglam tem xar.
Vo “suria udeta thoim.”
Utran utor, “doria.”
Ho don dongra modlo sokoilo zago. Inglez bhaxent taka “valley” mhunnttat.
Vo “moladik.”
Vo “ghottetoleo,” thonddaiek lagon ghott zalʼlea bhaxen.
Mhunnche, Mittacho Doria (Dead Sea).
Mhunnche, Mediteranean Doria.
Vo “Tea disa, soglim fokot Jehovachich bhokti kortolim.”
Vo “ani fokot tacheach nanvachi vakhannʼnni kortolim.”
Vo “jive.”
Vo “aplea sangateachea hatak.”
Gaddum ani ghoddeachi sonsot. Inglez bhaxent “mule.”
Vo “Jehovachi bhokti korunk.”
Vo “ghorachim vhoddlea tonddachim aidonam.”
Vo “sarkim povitr zatolim.”
Vo “vhoddlea tonddachim aidonam.”
Vo ghoddie, “veapar-dhondo korpi.”