MALAKI
1 Ho Devacho sondex:
Malaki* vorvim Izraelak ho Jehovacho* sondex:
2 Jehova mhunntta: “Hanvem tumcho mog kelo.”
Punn tumi mhunnttat: “Tunvem amcho koso mog kelo?”
Jehova mhunntta: “Esau Jakobacho bhav aslo nhoi? Punn hanvem Jakobacho mog kelo, 3 ani Esauacho dves kelo. Hanvem tache dongor padd korun soddle ani tachem daiz oronnʼnneantlea koleank dilem.”
4 “Edom* mhunntta, ‘Amcho churo kelʼlo, punn ami porot ietole ani amche padd zaun gelʼle zage porot bandtole.’ Punn fouzancho Dev Jehova oxem mhunntta, ‘Te bandtole, punn hanv moddun uddoitolom. Ani tankam “noxtteancho vattar” ani “Jehovan sasnak opradi mhunn tharailʼle lok,” oxe mhunnttole. 5 Tumi svota tumchea dolleamnim hem polloitole, ani mhunnttole: “Akʼkhea Izraelant Jehovachi mhoima zaum.”’”
6 “‘Ek put aplea bapaik man dita ani ek chakor aplea dhoniak man dita. Tor hanv bapui zalear, mhaka favo to man khoim asa? Ani hanv dhoni zalear, mhoji bhirant kiteak dhorinant?’* Hem fouzancho Dev Jehova aplea nanvacho opman kortolea iadnikank mhunntta.
“‘Punn tumi vichartat: “Ami tujea nanvacho opman koso kela?”’
7 “‘Mhojea vedicher boxttailʼlem jevonn* bhettoun.’
“‘Ani tumi mhunnttat: “Ami tuka koso boxttaila?”’
“‘Oxem mhunnon: “Jehovachea mezak kainch valor na.” 8 Ani bolidan mhunn tumi kuddʼddem zonvar bhettoitat ani mhunnttat: “Hantunt kainch vaitt na.” Toxench, tumi longddem vo duent zonvar bhettoitat ani mhunnttat: “Hantunt kainch vaitt na.”’”
Fouzancho Dev Jehova mhunntta, “Upkar korun, hench zonvar tumchea razpalak bhettoun polloiat. To khuxal zatolo kai vo to tumkam maniotai ditolo kai?”
9 Fouzancho Dev Jehova mhunntta, “Ani atam, upkar korun, Devan amkam doia dakhounchi mhunn tachea lagim vinoti korat. Tumi tumchea hatamnim taka jim bolidanam bhettoilim, tea pasot to tumkam maniotai ditolo kai?”
10 Fouzancho Dev Jehova mhunntta, “Tumchea modlo konn daram* bond korunk toiar asa? Tumi tor, vedicher uzo zollounk pasun poixe ghetat. Tumi mhaka matui manvonant ani tumchea hatamnim tumi mhaka dilʼli khoinchich denneachi bhett mhaka khuxalkai dina.”
11 Fouzancho Dev Jehova mhunntta, “Udente thaun ostome meren* soglea raxttram modem mhojem nanv vortem zatolem. Dhunvor voir vochonk, soglea zageamnim bolidanam bhettoitole, ani mhojea nanva pasot xudʼdh bhett mhunn iodn bhettoitole. Karonn soglea raxttramnim mhojem nanv vortem zatolem.”
12 “Punn tumi oxem mhunnon tacho* opman kortat, ‘Jehovachem mez boxttailʼlem asa, ani tacher bhettoilʼlim follam, hoi, tachea voilem jevonn* kainch valorachem na.’ 13 Toxench tumi hungtat* ani oxem mhunnttat, ‘Polloi! Hem ani kitem!’” oxem fouzancho Dev Jehova mhunntta. “Tumi chorlolim, longddim ani duent zonvaram haddttat. Hoi, ani osleo vostu dennem mhunn mhaka bhettoitat! Tumchi osli bhett hanvem manun gheunchi kai?” oxem Jehova mhunntta.
14 “Zo munis aplea hinddant ek borem zonvar aslear pasun, Jehovak angvonn korun khot aslolem zonvar bhettoita, toslea naddbudʼdhechea munxacher xirap poddom! Karonn hanv ek vorto Raza,” oxem fouzancho Dev Jehova mhunntta, “ani soglea raxttram modem mhojea nanvak lagon bhirant utpon zatoli.”
2 “Ani atam iadnikamno, hanv tumkam hi adnea ditam. 2 Tumi mhojem aikonant ani mhojea nanvak mhoima diunk dhean dinant zalear hanv tumcher xirap dhaddttolom ani tumchim besanvam xirapant bodoltolom. Khorem mhunnttlear, hanvem tumchim besanvam xirapant bodolʼleant, karonn tumi mhojea adneancher dhean dinant,”* oxem fouzancho Dev Jehova mhunntta.
3 “Polloi! Tumkam lagonuch hanv tumi vomplolea bim-ancho nas kortolom. Hanv tumchea tonddank xenn laitolom, hoi, tumchea porbam vellar bolidan mhunn bhettoilʼlea zonvaranchem xenn. Ani tumkam uklun tea xennachea raxicher* uddoitole. 4 Tednam tumkam kollon ietolem, ki Levi sangata mhozo korar urcho mhunn hanvem tumkam hi adnea dilea,” oxem fouzancho Dev Jehovan mhunnttlam.
5 “Hanvem tachea sangata kelʼlea korarak lagon taka jivit ani xanti mellʼlli. Tannem mhoji bhirant dhorchi* mhunn hanvem taka him besanvam dilim. Ani tannem mhoji bhirant dhorli, hoi, tannem mhojea nanvak man dilo. 6 Sotacho kaido* tachea tonddant aslo ani tachea vonttancher koslench onitivontponn mellonk na. To mhojea sangata xantin ani promannikponnan cholʼlo, ani tannem khub lokank vaitt rostea voile porot haddle. 7 Iadnikachea vonttamnim ginean samballunk zai ani xikounn* mellonk lokamnim tache lagim vochonk zai, karonn to fouzancho Dev Jehovacho sondexkar zaun asa.
8 “Punn iadnikamno, tuminch sarke vatte thaun koddsorleat. Tumkam lagon lok kaide pallunk chukleat.* Tumi Levicho korar moddla,” oxem fouzancho Dev Jehova mhunntta. 9 “Tor hanv sogleam mukhar tumkam kainch valor naslolea bhaxen lekhtolom, ani tumi lokanchea nodrent sokol poddttole. Karonn tumi mhojea vatten cholonk nant, tachea bodlek mhozo kaido lagu kortana tumi bhedbhav kela.”
10 “Amkam sogleank ekuch bap na kai? Ekach Devan amkam rochunk nant kai? Tor ami eka-mekacho visvasghat kiteak kortat, amchea purvozanchea koraracho opman kiteak kortat? 11 Judan visvasghat kela, ani Izraelant ani Jeruzalemant ekdom vitt haddtta toslem kitem tori ghoddlam. Karonn Jehovak khub mogachi asa ti tachi povitrtai* Judan oxudʼdh kelea, ani porkea devanchi bhokti korta toslea baile* sangata to kazar zala. 12 Oslem kam kortoleank Jehova Jakobachea tombuntlean nas korun uddoitolo, magir to konnui zaum,* to fouzancho Dev Jehovak denneachi bhett dita zalear pasun tacho nas zatolo.”
13 “Tumi anikui* ek vost kortat, zaka lagon Jehovachi vedi dukamnim bhizlea, ani thoim roddnneacho ani pirgonneacho* avaz aikonk ieta, ani taka lagon to tumchea denneachea bhetticher dhean dina ani tumchea hatantlem kainch manun ghena. 14 Ani tumi mhunnttat, ‘Hem kiteak?’ Karonn tumi tumchea tornattponnachea baile sangata visvasghat kela ani hacho Jehova govai zaun asa. Ti tumchi korarachi bail* ani sangati asa, tori astana tumi tichea sangata visvasghat kela. 15 Punn thoddea lokamnim oxem korunk na. Karonn azunui tancher povitr xokti asli. Tankam kitem zai aslem? Devachi sonsot.* Tor tumi tumchea chintpachi* rakhonn korat ani tumchea tornattponnachea baile sangata visvasghat korinakat. 16 Karonn hanv* divorsacho dves kortam,” oxem Izraelacho Dev Jehova mhunntta. “Ani zo maramari korta tacho-i hanv dves kortam,” oxem fouzancho Dev Jehova mhunntta. “Ani tumchea chintpachi* rakhonn korat ani visvasghat korinakat.
17 “Tumi tumchea utramnim Jehovak bejar haddla. Punn tumi mhunnttat, ‘Ami taka koso bejar haddla?’ ‘Vaitt kortat te sogle Jehovachea nodren bore asat ani te taka manvotat,’ oxem mhunnon, vo ‘Niticho Dev khoim asa?’ oxem mhunnon tumi taka bejar haddla.”
3 “Polloi! Hanv mhojea sondexkarak dhaddttam, ani to fuddem vochon mhojea pasot vatt toiar kortolo. Ani okosmat, tumi sodhtat to khoro Dhoni aplea mondirant ietolo. Koraracho to sondexkarui ietolo, zachi tumi axeun vatt polloitat. Polloi! To ietoloch,” oxem fouzancho Dev Jehova mhunntta.
2 “Punn to ietolo tea disa konn thir ravonk xoktolo ani to dixtti poddttolo tednam konn ubo ravonk xoktolo? Karonn to dhatu xudʼdh korta toslea ujea sarko ani kopdde dhuvpachea sabanvam sarko* astolo. 3 Dhatu xudʼdh korpi zoso chandi xudʼdh ani nitoll korunk bosta, tosoch to Levichea putank xudʼdh korunk bostolo. To tankam bhangra bhaxen ani chandi bhaxen xudʼdh kortolo ani te nitivontponnan Jehova pasot denneachi bhett ditat toslea lokam sarke zatole. 4 Adlea disam bhaxen ani adlea kalla bhaxen, Juda ani Jeruzalemacheo denneacheo bhetto Jehovak manvotoleo.
5 “Hanv nit korunk tumchea lagim ietolom, ani jadu-ttona kortat, pordvar kortat, khotto soput ghetat, kamdarancho disvoddo khatat, vidvank ani onathank* sotaitat ani pordexi lokank modot korunk nakartat* tankam, hanv rokddoch khast laitolom. Karonn tankam mhoji bhirant na,” oxem fouzancho Dev Jehova mhunntta.
6 “Karonn hanv Jehova, hanv bodolna.* Ani tumi Jakobache put, dekhun azun poriant tumcho nas zaunk na. 7 Tumchea purvozanchea disam thaun tumi mhoje nem-kaide moddit aileat ani tumi te pallunk nant. Mhojea lagim porot ieiat ani hanv tumchea lagim porot ietolom,” oxem fouzancho Dev Jehova mhunntta.
Punn tumi mhunnttat: “Ami porot koxe ieum?”
8 “Ek munis Devak luttunk xokta kai? Punn tumi mhaka luttʼttat.”
Tumi mhunnttat: “Ami tuka koso luttla?”
“Dhavo vantto ani dan dinastana. 9 Khorench, tumi xirap poddlole lok,* karonn tumi mhaka luttʼttat. Tuminch nhoi, punn akʼkhem raxttr mhaka luttʼtta. 10 Mhojea ghorant jevonn aschem mhunn soglo dhavo vantto gudanvant haddat. Ani upkar korun, hea babtint mhoji porikxa korat, ani hanv sorginche darvontte ugddun tumkam kainch unnem zaina tea meren besanvam dina zalear polloiat,” oxem fouzancho Dev Jehova mhunntta.
11 Fouzancho Dev Jehova mhunntta, “Hanv tumchea pasot, nas kortoleak* tapoitolom ani to tumchea desantlem pik piddʼddear korchona ani tumche drakxanche molle piddʼddear zaunchenant.”
12 Fouzancho Dev Jehova mhunntta, “Soglim raxttram tumkam khuxal mhunnttolim, karonn tumcho des sontosacho des zatolo.”
13 Jehova mhunntta, “Tumi mhojea add khub vaitt uloileat.”
Ani tumi mhunnttat: “Ami amchea modem tujea add kitem uloileat?”
14 “Tumi mhunnttat, ‘Devachi seva korun kainch faido na. Fouzancho Dev Jehova mukhar amchi zobabdari purnn korun amkam kitem mellʼllam? Ani amchea patkanchem dukh korun amkam kitem faido zala? 15 Amkam tor, je gorvixtt asat* tech khuxal asat oxem dista. Toxench, je noxttim kamam kortat tankanch ies melltta oxem dista. Te Devachi porikxa gheunk fatti soronant, torui te koslich khast bhoginastana bore suttʼttat.’”
16 Tea vellar, Jehovachi bhirant dhorta to dor-eklo eka-meka lagim, hoi aplea ixtta lagim ulounk laglo ani Jehova dhean diun tanchem aikot ravlo. Ani Jehovachi bhirant dhortat ani tachea nanvacher niall kortat* tea sogleam pasot ek ugddasachem pustok tachea mukhar boroun kaddlem.
17 Fouzancho Dev Jehova mhunntta, “Tea disa hanv tankam mhoji khas porza* kortolom ani te mhoje lok zatole. Ani zoso ek bapui tachi seva kortolea putak doia-maia dakhoita, toso hanv tankam doia-maia dakhoitolom. 18 Tednam tumi porot ek pavtt nitivont ani noxttea munxam modem, toxench Devachi seva korta ani seva korina tea munxa modem ontor polloitole.”
4 Fouzancho Dev Jehova mhunntta: “Polloi! to dis ieta, zo bhottʼttent zolltta tea agttea sarko astolo. Tea disa, gorvixtt* ani noxtte lok tonna bhaxen zatole. Ieuncho asa to dis tancho bhosm korun uddoitolo ani tanchem mull vo khando pasun urchona. 2 Punn mhojea nanvak man ditoleamno,* tumcher nitivontponnacho suria porzollttolo ani tachea kirnnamnim tumi bore zatole. Tumi mottea-mottea paddkuleam bhaxen uddio martole.”
3 Fouzancho Dev Jehova mhunntta, “Jea disa hanv panvl ghetolom, tea disa noxtte tumchea paim-anchi dhulʼl zatole ani tumi tankam maddoitole.”
4 “Hanvem mhojea sevokak Moizesak zo Kaido dilʼlo to ugddas dovrat. Hoi, te nem-kaide ani teo adnea ugddas dovrat, jeo hanvem Horebant Izraelitkarank dilʼleo.
5 “Polloi! Jehovacho vhodd ani bhirankull dis ieunchea poilim hanv tumchea lagim Elija provadeak dhaddttam. 6 To bapaichim kallzam bhurgeam koddem ani bhurgeanchim kallzam bapai koddem vollttolo, jea udexim mhaka ieun prithumechem luksonn korun, tacho nas korunk poddchona.”
(Hanga Hebrev-Aramaik Bhaxent Boroilʼlea Pustokanchem bhaxantor sompta ani Grik Bhaxent Boroilʼlea Pustokanchem bhaxantor suru zata)
Hacho orth “Mhozo Sondexkar.”
Mahiti A5 polloi.
Esauak dilʼlem dusrem nanv. Xobdhkox polloi.
Vo “mhaka man kiteak dinant.”
Utran utor, “unddo.”
Him mondirachim daram aslim, jim bond korchem tanchem kam aslem mhunn dison ieta.
Vo “suria udeta thoim thaun tem suria buddtta thoim meren.”
Vo ghoddie, “mhozo.”
Vo “tacher bhettoilʼlim bolidanam.”
Vo “tumi tondd vankddem korun vhoddlean nakantlean svas soddttat.”
Vo “mhojeo adnea kallzant ghenant.”
Mhunnche, jea zagear bolidan mhunn bhettounk haddlolea zonvaranchem xenn uddoitale.
Vo “Tannem mhaka man diuncho.”
Vo “Sotachi xikounn.”
Vo “kaido.”
Vo ghoddie, “Tumchea xikounnek lagon zaite lok addkhollʼlleat.”
Vo ghoddie, “mogacho asa to tacho povitr zago.”
Utran utor, “porkea devachea dhuve.”
Utran utor, “eklo zo zago asa ani zo zobab dita.”
Utran utor, “dusri.”
Vo “ani dukh kortat to.”
Vo “Ti kaidea pormonnem tuji bail.”
Utran utor, “bim.”
Utran utor, “jivachi.”
Utran utor, “to.”
Utran utor, “jivachi.”
Vo “dhobichea kopdde dhuvpachea khara sarko.” Inglez bhaxent “lye, alkaline substance.”
Vo “zancho bapui bhair poddla tankam.”
Vo “lokank tancho hokʼk diunk nakartat.”
Vo “hanv bodlonk na.”
Vo ghoddie, “tumi mhaka xirap ditat.”
Utran utor, “khaun uddoitoleak,” chodd korun hanga kiddeanchea pidde vixim sanglam.
Vo “je aplea xime bhair voitat.”
Vo “nanva vixim chintat.” Vo ghoddie, “tachem nanv moladik mhunn lekhtat.”
Vo “moladik girestkai.”
Vo “aplea xime bhair voitat te.”
Vo “mhojea nanvachi bhirant dhortoleamno.”