MATEVA PORMONNEM BORI KHOBOR

1 Hea pustokant Jezu Kristachea* itihasa vixim boroilʼlem asa. To Davidacho put aslo, ani David Abrahamacho put aslo. Jezu hea vonxavollintlo aslo:

17 Abrahama thaun Davida meren 14 pillgeo zaleo; Davida thaun Judevank Babilonant bondhi korun vhele tednam meren 14 pillgeo zaleo; Babilonant bondhi korun vhele tednam thaun Krista meren 14 pillgeo zaleo.

18 Jezu Kristacho zolm oxe toren zalo: Tachi avoi Mariechem Juze lagim kazarachem utor zalʼlem. Punn kazara poilinch Marie ankvar asli tednam povitr xokte udexim ti gorbest zali. 19 Ticho ghov Juze nitivont munis aslo ani Mariechem nanv piddʼddear zalʼlem taka naka aslem. Tor to dusreank kollonastana tika divors* diunk sodhtalo. 20 Punn hea soglea vixim vichar korun to nhidlo tednam taka sopnant Jehovacho* dut dislo. Dutan taka sanglem: “Juze, Davidachea puta, tum Mariek tujea ghora vhoronk* bhienaka, karonn tichea kusveant asa to ballok povitr xokte udexim asa. 21 Marie eka putak zolm ditoli. Tunvem taka Jezu* mhunn nanv dovrunk zai karonn to aplea lokank patkantlean soddoitolo.” 22 Jehovan* aplea provadeam udexim sanglolim utram purnn zaunk lagon hem soglem ghoddlem. Tannem oxem sanglolem: 23 “Polloiat, ek ankvar cheddum gorbest zatolem ani tem eka putak zolm ditolem. Taka Imanuel mhunn nanv dovortole,” zacho orth “Dev Amchea Sangata Asa.”

24 Tednam Juze nhidentlean utthlo ani tannem Jehovachea* dutan sanglolem toxench kelem. To aple bailek ghora gheun ailo. 25 Punn Marien putak zolm dium poriant Juzen tichea lagim kuddicho sombond dovrunk na. Tannem tea bhurgeachem nanv Jezu dovorlem.

2 Jezucho zolm Judeiachea Bethlehemant zalo. Tea disamnim Herod* Judeiacho raza aslo. Jezucho zolm zalea uprant thoddea disamnim Udente thaun noketram polloun fuddar parkhupi* Jeruzalemant aile. 2 Te oxem vicharunk lagle: “Zolmola to Judevancho raza khoim asa? Ami Udentek asle tednam amkam tachem noketr dixtti poddlolem. Tea pasot ami taka bagon nomoskar korunk aileat.” 3 Hem aikon Herod Raza bhielo ani akʼkhea Jeruzalemant bovall zalo. 4 Herodan soglea mukhel iadnikank ani xastreank apoun haddle ani Krist* khoim zolmocho asa tea vixim tanche koddem vicharlem. 5 Tannim taka oso zobab dilo: “Judeiachea Bethlehemant. Karonn provadea vorvim oxem boroilʼlem asa: 6 ‘Tum Judachea vattarantlea Bethlehema, Judachea mukheleank tum sogleam-von lhan xar nhoi, karonn tujea thaun ietolo ek fuddari ani toch gonvlli koso mhoje Izrael porjecho samball kortolo.’”

7 Tednam Herodan tea fuddar parkhupeank konnank kollonastana apoun haddle ani tem noketr tankam poile pavtt kednam dixtti poddlolem tea vixim tanchea lagim bariksannen choukoxi keli. 8 Uprant tannem tankam oxem sangon Bethlehemant dhaddle: “Vochat, ani tea lhan bhurgeak bore bhaxen sodhat ani to tumkam mellttoch mhaka-i sangat, karonn hanv-ui taka vochon nomoskar korunk sodhtam.” 9 Herod Razachem aikon te aple vattek lagle ani okosmat tannim jem noketr Udente vatten polloilʼlem tem tanchea mukhar vochonk laglem ani to lhan bhurgo aslo tea zagear pavtoch thamblem. 10 Noketr thamblem tem polloun te ekdom khuxal zale. 11 Ani ghorant bhitor soron tannim tea lhan bhurgeak tachi avoi Marie sangata polloilo. Tannim tea bhurgeak dimi ghalun nomoskar kelo ani ap-apleo pettio ugddun taka bhangar, dhovo dhump ani gondhros* dennim mhunn dilim. 12 Punn, Devan tankam sopnant Heroda lagim porot vochonakat mhunn xittkaunni dili. Tea pasot te dusrea vatten aplea desant gele.

13 Te gelea uprant okosmat Jehovacho* ek dut Juzek sopnant dixtti poddlo. Tannem taka sanglem: “Utth, bhurgeak ani tache avoik gheun Ejipttant pollon voch ani hanv sangom poriant thoinch rav. Karonn Herod bhurgeacho jiv kaddunk taka sodhpacho asa.” 14 Tor Juze utthlo ani bhurgeak ani tache avoik gheun teach rati Ejipttant pollon gelo. 15 Ani Herod morosor to thoinch ravlo. Hea toren Jehovan* aplea provadea udexim sanglolim utram purnn zalim. Tannem mhunnttlolem: “Hanvem mhojea putak Ejiptta thaun apoun haddlo.”

16 Fuddar parkhupeamnim apleak fottoilo tem polloun Herod ekdom ragan bhorlo. Tannem aplea munxank dhaddun Bethlehem ani tachea bhonvtonnchea jilʼleant aslolea don vorsanchea ani tache poros unnem piraiechea soglea cheddea bhurgeank marun uddoile. To oxem korunk pavlo karonn tannem adinch, fuddar parkhupeam koddlean choukoxi korun tea lhan bhurgeacho zolmacho vell zannam zaun ghetlolo. 17 Hea toren Jeremias provadea udexim sanglolim utram purnn zalim. Tannem sanglolem: 18 “Ramant roddtta ani mottʼttean bob marta to avaz aikonk ailo. Rakel aplea bhurgeam khatir roddttali. Tika kitli-i bhuzvonn dilear tika bhuzvonn mello nasli, karonn tichim bhurgim atam uronk nant.”

19 Herod melea uprant, Juze Ejipttant astana okosmat Jehovacho* dut taka sopnant dixtti poddlo. 20 Tannem oxem mhunnttlem: “Utth, bhurgeak ani tache avoik gheun Izrael desant voch, karonn bhurgeacho jiv kaddunk sodhtale te moron gele.” 21 Tednam Juze utthlo ani bhurgeak ani tache avoik gheun Izrael desant gelo. 22 Punn Herodachea zagear tacho put Arkelav, Judeiant raj choloita tem aikon Juze thoim vochonk bhielo. Titlench nhoi, Devanui taka sopnant xittkaunni dilʼli. Tea pasot to Galiliechea vattarant gelo. 23 To Nazaret mhunnttat tea nogrant vochon ravonk laglo. Oxe toren, “taka Nazaretkar* mhunnon nanv poddttolem,” him provadeam udexim sanglolim utram purnn zalim.

3 Tea disamnim Juanv Batist Judeiachea oronnʼnneant* ailo ani oso porgottunk laglo: 2 “Poschatap* korat, karonn sorginchem Raj ieunchem zalem.” 3 Ho toch zaun asa zachea vixim Izaias provadean oxem sanglolem: “Oronnʼnneant konn tori ulo korta tacho avaz aikonk ieta: ‘Jehova* pasot vatt toiar korat! Tacho rosto nitt korat.’” 4 Juanv unttachea lhonveche kopdde ghaltalo ani bhenddak chamddeacho pottʼtto bandtalo, to toll ani ranantlem mhonv khaun jietalo. 5 Tednam Jeruzalemantle, toxench akʼkhea Judeiantle ani Jordan nhoim-chea bhonvtonnchea vattarant ravpi lok tache lagim vochonk lagle. 6 Te apnnem kelʼlim patkam ukteponnim manun ghetale ani to tankam Jordan nhoim-ent bautizm ditalo.*

7 Zaite Farizev* ani Saduki,* to bautizm dita tea zagear ietat tem polloun tannem tankam oxem mhunnttlem: “Vikari sorpachea pileamno, ieuncho asa tea krodha thaun pollon vochonk konnem tumkam xittkailam? 8 Tumi poschatap kela mhunn tumchea kamamnim dakhoiat. 9 ‘Abraham amcho bapui’ oxem tumi chintinakat. Karonn hanv tumkam sangtam, Dev hea fatram thaun Abrahama pasot bhurgim zolmak haddunk xokta. 10 Zhaddanchea mulla lagim tor kuradd poilinch dovorloli asa. Borem foll dina tem dor ek zhadd katrun ujean uddoitole. 11 Tumi poschatap kela dekhun hanv tumkam udkant bautizm ditam. Punn mhojea fattlean zo ieuncho asa to mhojea poros anik chodd xoktivont asa. Hanv tor tachim zotim kaddunk pasun purto na. To tumkam povitr xokten ani ujean bautizm ditolo.* 12 Tachea hatant dannea thaun tonn vegllem korpachem dantanchem khorem asa. To aplem akʼkhem kholl* nitoll kortolo, ani aple gonv ektthaim korun gudanvant dovortolo, punn tem tonn palvona toslea ujeant lastolo.”

13 Uprant Jezu Juanva koddlean bautizm gheunk Galilie thaun Jordan nhoim-e lagim ailo. 14 Punn Juanvan taka addauncho proitn korun oxem mhunnttlem: “Hanvem tor tujea koddlean bautizm gheunk zai ani tum mhojea lagim aila?” 15 Tednam Jezun taka oxem mhunnttlem: “Hea pavtti oxench zaum-di karonn Devachea nodren* sarkem asa tench ami korunk zai.” Tea uprant Juanvan taka addaunk na. 16 Bautizm ghetlea uprant Jezu rokddoch udkantlean bhair ailo. Tednam mollob uktem zalem, ani Devachi povitr xokti parvea bhaxen tacher ieta tem Juanvan polloilem. 17 Ani sorgar thaun oso avaz aikonk ailo: “Ho mhozo opurbaiecho Put, to mhaka manvola.”

4 Tednam Devachi povitr xokti Jezuk oronnʼnneant* gheun geli. Thoim Soitanan* taka tallnnent ghalcho proitn kelo. 2 Jezun 40 dis ani 40 rati upas kelea uprant taka bhuk lagli. 3 Tednam tallnnent ghalpi ailo ani tannem mhunnttlem: “Tum Devacho put zalear hea fatrank undde zaunk sang.” 4 Punn Jezun oso zobab dilo: “Oxem boroilʼlem asa: ‘Munis fokot unddea vorvim nhoi punn Jehovachea* tonddantlean bhair sorta tea dor eka utra vorvim jieta.’”

5 Tea uprant Soitan* taka povitr xarant, mhunnche Jeruzalemant gheun gelo ani taka Devmondirachea durgacher, unchlea zagear ubo kelo. 6 Tannem Jezuk oxem sanglem: “Tum Devacho put zalear hanga thaun sokol uddi mar, karonn oxem boroilʼlem asa: ‘To aplea devdutank tujea vixim adnea ditolo,’ ani ‘Tuje paim fatrank adollna zaunk te tuka aplea hatamnim uklun dhortole.’” 7 Jezun Soitanak oxem sanglem: “Oxem-i boroilʼlem asa: ‘Jehova* tujea Devachi tunvem porikxa korchi nhoi.’”

8 Uprant Soitan* taka eka unch dongrar gheun gelo ani taka sonvsarantleo sogleo razvottkeo ani tanchi mhoima dakhoili. 9 Tannem Jezuk mhunnttlem: “Tum fokot ekuch pavtt mhaka paim-am poddon mhoji bhokti korxi zalear, hanv hem soglem tuka ditolom.” 10 Jezun taka mhunnttlem: “Pois sor Soitana! Karonn oxem boroilʼlem asa: ‘Tunvem fokot Jehova* Devachich bhokti korunk zai, ani tachi ekleachich povitr seva korunk zai.’” 11 Tednam Soitan* taka soddun gelo, ani devdut ieun Jezuchi seva korunk lagle.

12 Juanvak dhorun bondkhonnint ghatla mhunn Jezun aikolem tednam to thoim thaun Galilient gelo. 13 Magir Nazaret soddlea uprant to Kapernaumant ravonk laglo, jem Zebulun ani Naftalichea vattarant Galiliechea doria deger asa. 14 Oxe toren Izaias provadea udexim sanglolim utram purnn zalim. Tannem mhunnttlolem: 15 “O Zebulun ani Naftalichea desa, Jordan nhoim-chea poltoddi doria deger aslolea videxianchea Galili! 16 Kallkhant asle tea lokamnim uzvadd polloilo. Je lok mornnachi savlli aslolea desant ravtale tancher uzvadd poddlo.” 17 Tednam thaun Jezu oxem porgottunk laglo: “Poschatap korat karonn sorginchem Raj lagim pavlam.”

18 Galiliechea doria dege voilean cholot voitana tannem Simanv zaka Pedru mhunnttat, ani tacho bhav Andre doriant zall ghaltale tem polloilem. Te dogui kharvi asle. 19 Tannem tankam mhunnttlem: “Mhojea fattlean ieiat. Zoxe tumi nusteank dhortat toxench hanv tumkam munxank dhorpi kortolom.” 20 Te rokddech aplem zall soddun tachea fattlean gele. 21 Thoim thaun fuddem gelea uprant Jezuk, Jakob ani tacho bhav Juanv dislo. Te dogui Zebedevache put asle. Te aplea bapai sangata vhoddeant zall sarkem kortale. Jezun tankam-i apoile. 22 Te rokddech vhoddem ani aplea bapaik soddun tachea fattlean gele.

23 Uprant to akʼkhea Galilient bhonvon tanchea sobha-ghoramnim xikoitalo ani Rajeachi bori khobor porgott kortalo. To lokanchim soglea torechim duensam ani soglea torecheo oskotkaieo pois kortalo. 24 Tachi khobor akʼkhea Siriak pavli. Lok tachea lagim veg-vegllea torechim duensam ani oskotkaieo asloleank haddunk lagle. Tanchea modem noxtte dut* boslole, moddnnem* marun ietale tosle ani ar zaun dhorlole lok pasun asle. Tannem tankam sogleank bore kele. 25 Taka lagon, Galili, Dekapoli,* Jeruzalem ani Judeia thaun, toxench Jordan nhoim-chea poltoddi aslolea vattara thaun pasun zaite lok tachea fattlean ieunk lagle.

5 Jezun zaitea lokank polloile tednam to dongrar gelo ani thoim boslo. Ani tache xis tache lagim aile. 2 Uprant to tankam oxem xikounk laglo:

3 “Devachea margdorxonachi bhuk asa* tim munxam khuxal, karonn sorginchem Raj tanchem.

4 “Dukh kortat tim khuxal, karonn tankam bhuzvonn mellttoli.

5 “Khaltim* tim khuxal, karonn tankam prithum daiz mhunn mellttoli.

6 “Nitivontponna khatir jim bhukelʼlim ani tanelʼlim asat tim khuxal, karonn tim dhadoxi zatolim.

7 “Dusreank doia dakhoitat tim khuxal, karonn dusrim* tankam doia dakhoitolim.

8 “Kalliz nitoll asa tim khuxal, karonn tim Devak polloitolim.

9 “Xanti korunk vavurtat tim khuxal, karonn dusrim tankam Devachim bhurgim* mhunnttolim.

10 “Sarkem tem kortat dekhun dhumallo* sostat tim khuxal, karonn sorginchem Raj tanchem.

11 “Tumi mhoje xis dekhun lok tumcho opman korta, tumkam dhumallo dita ani tumchea vixim zaitem khottem ani vaitt uloita, tednam tumi khuxal. 12 Tumi sontosbhorit ani odik khuxal zaiat, karonn sorgar tumkam vhoddlo inam mellcho asa. Tannim tumchea adim aslolea provadeank osoch dhumallo dilʼlo.

13 “Tumi hea prithumechem mitt, punn mittachi kharsann geli zalear taka porot kharsann diunk zata? Na. Tem kiteakuch upkarona. Tem rostear uddoitat, ani lok tem paim-am ponda maddoitat.

14 “Tumi sonvsaracho uzvadd. Dongrar asa tem xar lipon urona. 15 Lok divo pettoun aidona ponda dhampun dovornant, punn ghorant asat tankam sogleank uzvadd mellonk to eka unch zagear dovortat. 16 Teach bhaxen tumcho uzvadd dusreancher poddom-di, jea udexim tumchim borim kamam polloun, tim sorgar aslolea tumchea Bapachi mhoima kortolim.

17 “Hanv Kaideantlem* vo Provadeanchea Pustokantlem* kitem-i kaddun uddounk ailam mhunn somzonakat. Hanv tem kaddun uddounk nhoi, punn tem purnn korunk ailam. 18 Hanv tumkam khorench sangtam, mollob ani prithum ghoddie na zait, punn Kaideant aslolem ek lhan okxor vo okxorant aslolem lhan kus poriant purnn zalea xivai urchem na. 19 Tor hea lhanantlea-lhan adneantli konnui ek pasun adnea moddtta, ani dusreankui toxem korunk xikoita zalear, to sorginchea Rajeant bhitor soronk purto aschona.* Punn zo konn heo adnea palltta ani dusreankui toxem korunk xikoita, to sorginchea Rajeant bhitor soronk purto astolo.* 20 Hanv tumkam sangtam, tumi xastream ani Farizevam itlinch nitivont asat zalear tumi sorginchea Rajeant kednanch bhitor soronk pavchimnant.

21 “Adlea kallachea lokank oxem sanglolem tem tumi aikolam, ‘Tunvem jivexim marchem nhoi, karonn zo jivexim marta taka neai-sobhent ubo kortole.’ 22 Punn hanv tumkam sangtam, zo konn aplea kallzant aplea bhavacho rag dhorun ravta taka neai-sobhent zobab diuncho poddttolo. Ani zo munis aplea bhavacho opman korunk kednanch tonddant ieunk zaina toslim vaitt utram uloita zalear taka sogleant Vhoddlea Neai-sobhent zobab diuncho poddttolo. Ani zo munis aplea bhavak, ‘Are loz naslolea murkha!’ oxem mhunntta, taka Gehenʼnachea* ujeant uddoitole.

23 “Tum tuji bhett vedixim gheun voita tednam tuka ugddas ieta ki tujea bhavak tujea add kitem tori asa, 24 tor tuji bhett thoinch vedixim dovor ani poilo vochon tujea bhava lagim xanti kor ani uprant ieun tuji bhett bhettoi.

25 “Zor konnui tujea add kes korunk voita zalear, to neai-sobhent voichea poilinch tachea lagim xanti kor. Na zalear to tuka neai-korpeachea hatant ghalit ani neai korpi tuka tea munxachea hatant ghalit zo tuka bondkhonnint uddoitolo. 26 Hanv tuka khorench sangtam, tum tacho ek-ek poiso* farik kori poriant bondkhonnintlo kosoch bhair soronk pavchona.

27 “‘Tunvem pordvar* korcho nhoi’ oxem sanglolem tem tumi aikolam. 28 Punn hanv tumkam sangtam, zo munis eke bailek vaitt nodren polloit ravta, jea vorvim tachea monant pozddim chintnam ietat, tannem tea baile sangata aplea kallzant pordvar kelo. 29 Zor tuzo uzvo dollo tuka patkant uddoita zalear,* to umttun kadd ani bhair uddoi. Tuji akʼkhi kudd Gehenʼnant* uddoilʼlea poros tuzo ek sandho na zalear odik borem. 30 Toxench zor tuzo uzvo hat tuka patkant uddoita zalear* to katrun bhair uddoi. Karonn tuji akʼkhi kudd Gehenʼnant* uddoilʼlea poros tuzo ek sandho na zalear odik borem.

31 “Oxem-i sanglolem asa: ‘Zo munis aplea bailek divors dita, tannem tika divors potr diunchem.’ 32 Punn hanv tumkam sangtam, zo munis aplea bailek onoitik kuddicho sombond* soddun her koslea-i karonnak lagon divors dita zalear, to tika pordvar korpachea tallnnent ghalta. Ani zo munis oxe ritin divors zalʼle baile lagim kazar zata to-ui pordvar korta.

33 “Ani adlea kalla voilea lokank oxem-i sanglolem tumi aikolam: ‘Tunvem ghetla to soput moddum naka. Jehovak* dilʼlem utor pall.’* 34 Punn hanv tumkam sangtam: Tumi soputuch ghenakat, zaum sorgacho karonn tem Devachem xinvason, 35 zaum prithumecho karonn ti tachi paim dovorpachi monnoi,* zaum Jeruzalemacho karonn tem vortea Razachem xar. 36 Toxench tumi tumchea matheacho soput gheum nakat, karonn tumi tumcho ekui kens kallo vo dhovo korunk xokonant. 37 Tumchem ulovop ‘Hoi’ zalear hoi, ani ‘Na’ zalear na zaum di, karonn hachea bhair tumi kitem-i uloitat tem noxttea* thaun ieta.

38 “Oxem mhunnttlolem tem tumi aikolam: ‘Dolleak dollo ani dantak dant.’ 39 Punn hanv tumkam sangtam: Tumkam vaitt kortolea add zhogodd nakat. Konnui tumchea uzvea polear thapott marit zalear taka tumcho dusro-i polo dakhoiat. 40 Konnui tumkam neai-sobhent vhoron, tumchem khomis gheunk sodhit zalear taka tumcho kottui diat; 41 ani konnui odhikari tumkam aplem ojem ubarun ek mil* cholonk laita zalear tumi tachea sangata don mil cholat. 42 Tumchea lagim konnui kitem-i magot zalear taka diat ani konnui tumchea lagim udar magot zalear taka diunk fatti soronakat.

43 “Oxem mhunnttlolem tumi aikolam: ‘Tujea xezareacho mog kor ani dusmanacho dves kor.’ 44 Punn hanv tumkam sangtam: Tumchea dusmanancho mog korit ravat, ani tumkam dhumallo ditat tanchea pasot magnnem korit ravat. 45 Hea toren tumi tumchea sorginchea Bapachim bhurgim* mhunn dakhoun diunk xoktolim. Karonn to borea toxench vaitt munxancher aplo suria ude-so korta. Toxench nitivont ani onitivont munxancher paus dhaddtta. 46 Tumi tumcho mog kortoleanchoch mog kortat zalear tumkam kitem inam mellttolo? Tax vosul korpi pasun toxench korinant kai? 47 Ani tumi fokot tumchea bhavankuch zap kortat zalear tumi vhoddlem-xem kitem kortat? Judev naslole lok pasun oxench korinant kai? 48 Taka lagon zoso tumcho sorgincho Bap poripurnn asa, toxinch tumi-i poripurnn* zaiat.

6 “Chotrai dhorat! Dusreamnim pollounchem mhunn tanchea hujir borim kamam korinakat, na tor tumchea sorginchea Bapa koddlean tumkam kosloch inam mellchona. 2 Munxam koddlean man mellche khatir sobha-ghoramnim ani rosteancher dhongi turturim vazoitat* toxe tumi dan* ditat tednam korinakat. Hanv tumkam khorench sangtam, tankam tancho purnn inam mellʼllo. 3 Punn tumi dan ditat tednam, tumcho uzvo hat kitem dita, tem tumchea davea hatak kollonk zaina, 4 hea toren tumi kitlem dan dilam tem konnankuch kollchem na. Ani tednam tumcho Bap, zo tumchem dor ek kam polloita* to tumkam inam ditolo.

5 “Toxench tumi magnnem kortana, dhongeam sarkim zaum nakat. Apleak lokamnim pollounchem mhunn tankam sobha-ghoramnim ani mukhel rosteancher ravon magnnem korunk avoddtta. Hanv tumkam khorench sangtam, tankam aplo purnn inam mellʼllo. 6 Punn tumi magnnem kortana, tumchea rumant vochon dar bond korat ani konnuch pollounk xokona* tea tumchea Bapa lagim magnnem korat. Ani tednam tumcho Bap zo tumchem dor ek kam polloita,* to tumkam inam ditolo. 7 Magnnem kortana, sonvsarachea lokam bhaxen tinch-tinch utram porot-porot mhunnonakat, karonn apnnem zaitim utram uzar kelim zalear, Dev aplem magnnem aikotolo oxem tankam dista. 8 Tor tumi tanchea sarkim zainakat, karonn tumkam kiteachi goroz asa tem tumi magchea poilinch tumcho Bap zannam.

9 “Tor tumi oxe toren magnnem korat:

“‘Amchea Bapa sorginchea, tujem nanv povitr zaum.* 10 Tujem Raj ieum. Tuji khuxi sorgar zata, toxi sonvsarant zaum. 11 Aichea disa pasot amkam unddo di; 12 ani ami amchea add patok keloleank* bhogxileant toxem, tum-ui amchim patkam* bhogos. 13 Ani amkam tallnneant poddonk dium naka, punn noxtteachea* hatantlim vattai.’*

14 “Tumi dusreancheo chuki bhogxit zalear, tumcho sorgincho Bap tumkam-i bhogxitolo, 15 punn tumi dusreancheo chuki bhogxinant zalear, tumcho Bap tumcheo-i chuki bhogxichona.

16 “Tumi upas kortat tednam, dhongeam bhaxen tumi dukhi asat mhunn dakhounchem bond korat, karonn apunn upas kortat mhunn dakhounk tim aplem tondd mhellem dovortat. Hanv tumkam khorench sangtam, tankam aplo purnn inam mellʼllo. 17 Punn tumi upas kortat tednam, tumchea matheak tel laiat ani tumchem tondd dhuiat. 18 Oxem kelʼlean tumi upas kortat mhunnon lokank nhoi, punn tumcho Bap zaka konn pollounk xokona* taka kollon ietolem. Tednam, tumcho Bap zo tumchem dor ek kam polloita,* to tumkam inam ditolo.

19 “Svota khatir prithumer girestkai ektthaim korchi bond korat, thoim kidd ani kollom lagta ani chor ghor foddun chorun vhortat. 20 Tachea bodlek, svota khatir sorgar girestkai ektthaim korat, zoim kidd ani kollom lagona ani chor ghor foddun chorun vhorona. 21 Karonn, jea zagear tumchi girestkai astoli, thoinch tumchem mon astolem.

22 “Dollo kuddicho divo. Tor, tumi tumcho dollo ekach vostucher lavun* dovorlo zalear, tumchi akʼkhi kudd uzvaddit zatoli. 23 Punn tumcho dollo nattkaien bhorlolo* asa zalear, tumchi akʼkhi kudd kallkhant buddttoli. Tumchea kuddik uzvadd diupi tumcho dollo kallkhant asa zalear, tumi kitlea chodd kallkhant astolim nhoi!

24 “Konnuch don dhonianchi seva korunk xokona; karonn to ekleacho dves kortolo ani dusreacho mog kortolo, vo ekleak chittkon ravtolo ani dusreak kainch valor diunchona. Tumi ekach borabor Devachim ani toxench Girestkaiechim gulamam zaunk xokonant.

25 “Dekhun hanv tumkam sangtam: Tumi kitem khatolim vo tumi kitem pietolim mhunn tumchea jiva pasot usko korop bond korat, vo tumi kitem nhestolim mhunn tumchea kuddi pasot usko korop bond korat. Jevnna poros jiv ani nhesnna poros kudd molachi nhoi? 26 Mollbar uddttat tea suknneancher dhean diat, tim roinant, lunvnant ani gudanvamnim bhorun dovornant, tori astana tumcho sorgincho Bap tankam khaunk dita. Tor tumi tanchea poros chodd molachim nhoi? 27 Usko korun aplem jivit ilʼlem-xem* pasun vaddounk tumchea modlea konnancheanui zait kai? 28 Toxench, kitem nheschem mhunn tumi usko kiteak kortat? Ranantlea fulam koddlean xikat, tim koxim vaddttat, tim tor koxttui korinant, vo sutui toiar korinant. 29 Hanv tumkam sangtam, Solomona lagim soglem aslolem tednam pasun to hanchea bhaxen sobit nhesonk xoklona. 30 Ranantlim zhaddam jim aiz asat ani faleam ujeant* uddoitolim, tankam zor Dev itlo sobit nhesoita zalear, are unnea bhavarthachea munxamno, to tumkam nhesounchona? 31 Taka lagon, ‘Ami kitem khatolim?’ vo, ‘Kitem pietolim?’ vo, ‘Kitem nhestolim?’ hacho kednanch usko korinakat. 32 Hea soglea vostu fattlean sonvsarache lok dis-rat dhanvtat. Punn tumkam hea soglea vostunchi goroz asa mhunn tumcho sorgincho Bap zannam.

33 “Tea pasot, tumi tachem Raj ani tachem nitivontponn* sodanch poilea zagear* dovrat, ani heo sogleo vostu to tumkam ditolo. 34 Tor faleanchea disa vixim kednanch usko korinakat, karonn faleanchea disache aplech uske astole. Aichea disak aichech uske puro.

7 “Dusreanchi nit korop bond korat ani Dev tumchi nit korchona. 2 Karonn jea toren tumi dusreanchi nit kortat, teach toren tumchi-i nit zatoli, ani jea mapan tumi dusreank meztat, teach mapan tim-ui tumkam meztolim. 3 Tor tum tujea dolleantlea pattiecher dhean dinastana tujea bhavachea dolleantlem kisor kiteak polloita? 4 Tujea dolleant ek patti astana, ‘Mhaka tujea dolleantlem kisor kaddunk di,’ oxem tujean tujea bhavak koxem mhunnonk zata? 5 Are dhongea! Poilim tujea dolleant asa ti patti kadd, ani uprant tujea bhavachea dolleantlem kisor koxem kaddchem tem tuka sarkem dixtti poddttolem.

6 “Povitr vostu sunneank ghalinakat ani tumchim motiam dukranchea fuddem uddoinakat, na zalear tim motiam tim aplea paim-am ponda maddoitolim ani porot tumchea angar ieun tumkam pinzun uddoitolim.

7 “Magot ravat ani tumkam tem mellttolem, sodhit ravat ani tumkam tem gavtolem,* darar marit ravat ani tumkam tem ugoddttolem. 8 Karonn zo konn magta taka melltta, ani zo konn sodhta taka gavta, ani zo konn darar marta, taka tem ugoddttolem. 9 Tumchea modem oso konn asa, zo aplea putan unddo maglear, fator kaddun ditolo? 10 Vo nustem magot zalear, taka sorop kaddun ditolo? 11 Tumi patki asonui, aplea bhurgeank boreo vostu diunk zannant zalear tumcho sorgincho Bap aplea lagim magtoleank tachea poros ekdom chodd boreo vostu diunchona kai?

12 “Dekhun, dusreamnim tumkam zoxem kelʼlem zai, toxench tumi-i dusreank korat. Karonn Kaideant ani Provadeanchea Pustokant* hench sanglolem asa.

13 “Oxir darvontteantlean bhitor sorat karonn rund darvontto ani vhoddlo rosto mornnak* pavoita, ani tachea voilean zaito lok voita. 14 Punn jivitak pavoita to darvontto oxir ani rosto barik asa, ani tachea voilean khub thoddo lok voita.

15 “Khottea provadeam thaun chotur ravat, je menddranchem rup gheun tumchea lagim ietat, punn bhitorlean krur kole* koxe asat. 16 Tanchim follam polloun tumi tankam vollkhotole. Kantteanchea zhaddanchim konnem-i drakxam vo ranvotti zhaddanchim konnem-i anjiram kaddleant tem tumi polloilam? 17 Teach bhaxen, borem zhadd borem foll dita, punn kidd laglolem zhadd kuslolem foll dita. 18 Borem zhadd kuslolem foll diunk xokona, ani kidd laglolem zhadd borem foll diunk xokona. 19 Borem foll dina tem dor ek zhadd katrun ujeant uddoitat. 20 Tor tumi tanchim follam polloun tankam vollkhotolim.

21 “Mhaka, ‘Somia, Somia,’ mhunnttat tim soglinch sorginchea Rajeant bhitor sortolinch oxem na. Punn sorgar aslolea mhojea Bapachi khuxi kortat tinch tea Rajeant bhitor sortolim. 22 Tea disa zaito lok mhaka oxem mhunnttolo: ‘Somia, Somia, ami tujea nanvan sondex porgottunk na kai, tujea nanvan ami lokancher boslole noxtte dut kaddunk na kai, ani tujea nanvan ami zaitim vizmitam korunk na kai?’ 23 Tednam hanv tankam spoxtt ritin sangtolom: ‘Khotteponn kortoleamno! Hanv tumkam vollkhoch na! Mhojea sorxil’le pois sorat!’

24 “Tor, jim konn mhojim utram aikotat ani tim pallttat tim eka xannea munxa bhaxen asat zannem aplem ghor khoddpacher bandlem. 25 Paus poddlo, buddtti aili, vadoll ailem ani tea ghoracher marlem. Tori tem moddlem na, karonn tem khoddpacher bandlolem aslem. 26 Punn jim konn mhojim utram aikotat punn tim pallinant tim eka pixea munxa bhaxen asat zannem aplem ghor renvecher bandlem. 27 Paus poddlo, buddtti aili, vadoll ailem ani tea ghoracher marlem. Tednam tem ghor kosollʼllem, ani sarkem kabar zalem.”

28 Jezuchem ulovop somplem tednam lok tachi xikoupachi rit polloun ekdom ojap zale, 29 karonn to tankam xastream bhaxen xikoinaslo punn odhikar aslolea munxa bhaxen xikoitalo.

8 Jezu dongra voilean sokol denvlea uprant, zaito lok tachea fattlean vochonk laglo. 2 Tednanch, kodd zalʼlo ek munis tachea lagim ailo, ani taka nomoskar korun tannem oxem mhunnttlem: “Somia, tuka zai zalear, tum mhaka xud’dh korunk xokta.” 3 Tednam Jezun aplo hat fuddem korun taka lailo, ani mhunnttlem: “Hoi, mhaka zai! Xud’dh zav.” Teach vellar to koddantlean xud’dh zalo. 4 Uprant Jezun taka sanglem: “Polloi, hea vixim konnankuch sangonaka, punn tum boro zala mhunn iadnikank kollche khatir, vochon tankam tuji kudd dakhoi, ani uprant Moizesan diunk sangloli ti bhett bhettoi.”

5 Jezu Kapernaumant ailo tednam, soinikanchea eka odhikarean* tachea lagim vinoti keli 6 ani mhunnttlem: “Dhonia, mhozo chakor ar zaun ghorant duent poddla ani taka khubuch tras zatat.” 7 Jezun taka mhunnttlem: “Hanv thoim ietam tednam taka boro kortolom.” 8 Soinikanchea odhikarean zobab diun oxem mhunnttlem: “Dhonia, tuka mhojea ghorant ieukar diunk hanv purto na, tum fokot hanga thaunuch mhozo sevok boro zaum mhunn hukum di ani to boro zatolo. 9 Karonn hanv-ui dusreachea hata khala kam kortam, ani mhojea-i hata khala soinik kam kortat. Hanv ekleak, ‘Voch!’ mhunn sangtam tednam to voita, ani dusreak, ‘Ieo!’ mhunn sangtam tednam to ieta, ani mhojea sevokak ‘Oxem kor!’ mhunn sangtam tednam to korta.” 10 Hem aikon Jezu ekdom ojap zalo ani aplea fattlean ietale tankam tannem mhunnttlem: “Hanv tumkam khorench sangtam, itlo ghott bhavarth aslolo hanvem Izraelant ekui munis pollounk na. 11 Punn hanv tumkam sangtam, udente ani ostome thaun zaite lok ietole ani sorginchea Rajeant Abraham, Izak, ani Jakoba sangata ekach mezar jevnnak bostole; 12 punn Rajeachea putank bhair kallkhant uddoitole. Thoim te roddttole ani aple dant korkoraitole.” 13 Uprant Jezun soinikanchea odhikareak mhunnttlem: “Voch. Tunvem bhavarth dakhoila tea pormonnem zaum.” Ani teach vellar tacho sevok boro zalo.

14 Jezu Pedruchea ghora ailo tednam tannem Pedruchi sasumai hantrunnar asa tem polloilem karonn tika zor ailolo. 15 Jezun tichea hatak dhortanch ticho zor gelo, ti utthli ani tachi seva korunk lagli. 16 Sanz zata mhunnttlear lok tachea lagim zaitea zannank gheun aile zancher noxtte dut boslole. Jezun tea noxttea dutank ekach utran bhair kaddle ani duent aslolea soglea lokank bore kele, 17 hea toren Izaias provadean sanglolim utram purnn zalim: “Amchem duens ani pidda-rog tannem apnnacher ghetle.”

18 Aplea bhonvtonnim lokanchi gordi polloun Jezun aplea xisank vhoddem poltoddi vhor mhunn adnea dili. 19 Tednam eka xastrean ieun taka oxem mhunnttlem: “Guruji, tum voita thoim hanv tujea fattlean ietolom.” 20 Punn Jezun taka mhunnttlem: “Koleank dholi asat ani mollba voilea suknneank ghontter asat, punn munxachea Putak apli tokli tenkounk pasun khoinch zago na.” 21 Tednam anik eka xisan taka mhunnttlem: “Somia, poilim mhaka mhojea bapaik purunk vochonk di.” 22 Jezun taka mhunnttlem: “Tum mhojea fattlean ieit rav, meleant tankam aplea meloleank purum di.”

23 Jezu eka vhoddear choddlo tednam, tache xisui tachea sangata gele. 24 Uprant okosmat, doriant ek vhoddlem vadoll zalem, ani lharam vhoddeacher marunk laglim; punn to nhidlolo aslo. 25 Tednam xis tachea lagim aile ani oxem mhunnon taka utthounk lagle: “Somia, amkam vachoi, ami buddttat!” 26 Jezun tankam mhunnttlem: “Unnea bhavarthachea munxamno, tumi itle kiteak bhietat?” Magir utthon tannem vadollak ani doriak tapoilo ani soglem xant zalem. 27 Hem polloun xis ojap zale ani oxem mhunnonk lagle: “Vadoll ani doria tacho hukum aikonk, ho munis konn kai?”

28 Uprant Jezu doriachea poltoddi Gadaranchea vattarant pavlo. Thoim noxtte dut boslole don munis asle. Meloleancheo kuddi dovortale tea dholinchea* modlean te Jezuk mellonk aile. Te itle bhirankull asle ki konnuch tea vatten vochonk sodhi nasle. 29 Okosmat te bovall marunk lagle: “Devachea Puta, tuka amchea lagim kitem kam asa? Tharailʼlea vella poilinch tum amkam tollmollaunk kiteak aila?” 30 Te asle thoim thaun pois zagear, dukrancho ek vhoddlo hindd chortalo. 31 Tednam te noxtte dut Jezu lagim oxe vinoti korunk lagle: “Tum amkam kaddun uddoita zalear, amkam tea dukranchea hinddant dhadd.” 32 Tannem tankam mhunnttlem: “Vochat!” Ani te tea munxam thaun bhair soron dukramnim rigle. Tednam to dukrancho akʼkho hindd dhanvon vochon dongra voilean doriant poddlo ani te sogle udkant buddon mele. 33 Punn tanche rakhnne thoinchean pollon gele. Tannim xarant vochon ghoddlolem tem soglem lokank sanglem. Toxench, noxtte dut boslole tea munxanchem kitem zalem tem pasun sanglem. 34 Tednam xarantle sogle lok Jezuk mellonk aile, ani tannim taka polloilo tednam tanchea vattarantlean bhair sor mhunn tannim tachea koddem vinoti keli.

9 Uprant Jezu vhoddear boson poltoddi aplea xarant gelo. 2 Tednam thoddea lokamnim ar zaun dhorlolea munxak khattir ghalun haddlo. Tancho bhavarth polloun, Jezun ar zalʼlea munxak mhunnttlem: “Dhir dhor, puta! Tujim patkam bhogsolim.” 3 Tednam thodde xastri monantlea-monant mhunnonk lagle: “Ho munis Devachea add uloita.” 4 Te tanchea monant kitem chintʼtat tem zannam zaun Jezun mhunnttlem: “Tumi tumchea monant oslim vaitt chintnam kiteak haddttat? 5 Kitem mhunnonk chodd sompem asa, ‘Tujim patkam bhogsolim,’ vo, ‘Utth ani chol’? 6 Munxachea Putak prithumer lokanchim patkam bhogsunk odhikar asa hem tumkam kollchem mhunn—” uprant Jezun ar zaun dhorlolea munxak mhunnttlem: “Utth, tuji khatt ukol, ani ghora voch.” 7 Tednam to utthlo ani aplea ghora gelo. 8 Lokamnim hem polloilem tednam tankam bhirant disli, ani eka munxak oxem korcho odhikar dila mhunn tannim Devak mhoima dili.

9 Uprant thoim thaun fuddem voitana, Jezuk Matev nanvacho tax vosul korpi nakear boslolo dislo. Jezun taka mhunnttlem: “Ieo, mhozo xis zav.” Tednam Matev utthlo ani tachea fattlean gelo. 10 Tea uprant Jezu eka ghorant jevnnak boslolo tednam zaite tax vosul korpi ani tanchea sarke dusre patki munis aile, ani Jezu ani tachea xisam sangata jevnnak bosle. 11 Hem polloun Farizevamnim tachea xisank mhunnttlem: “Tumcho guru tax vosul korpeam sangata ani patkeam sangata kiteak jevta?” 12 Tanchem hem ulovop aikon, Jezun mhunnttlem: “Bholaiken bore asat tea lokank nhoi, punn duent asat tankam voizachi goroz asa. 13 Taka lagon, vochat, ani hea utrancho orth zannam zaiat: ‘Mhaka bolidan naka, punn dusreanchi doia kelʼli zai.’ Karonn hanv nitivont* lokank nhoi, punn patkeank apounk ailam.”

14 Uprant Juanvachea xisamnim Jezu koddem ieun vicharlem: “Farizev ani ami upas kortat, punn tuje xis upas kiteak korinant?” 15 Tednam Jezun tankam mhunnttlem: “Novro aplea ixttam borabor asosor te dukh kortat kai? Na! Punn oxe dis ietole jednam novreak tanchea thaun pois vhortole, ani tednam te upas kortole. 16 Burak poddlolea pornea kopddeak konnuch novea kopddeacho* kuddko laina. Oxem kelem zalear novo kopddo avolltta ani pornea kopddeak poddlolo burak anikui motto zata. 17 Toxench, lok kednanch pornea soreachea potiamnim* drakxancho novo soro ghalinant, karonn oxem kelem zalear soreacheo potio futtʼttoleo, drakxancho soro votʼtolo, ani soreacheo potio-i piddʼddear zatoleo. Tor lok drakxancho novo soro novea soreachea potiamnim ghaltat, ani taka lagon donui bore urtat.”

18 To hem soglem tankam sangta astanach, ek odhikari tachea lagim ailo, tannem taka bagon nomoskar kelo ani mhunnttlem: “Atam poriant mhoji dhuv meli astoli, punn tori astana tum mhojea ghora ieun ticher hat dovor, ani ti jivont zatoli.”

19 Jezu utthlo ani aplea xisank gheun tachea fattlean gelo. 20 Okosmat 12 vorsam thaun rogtpatachem duens* asloli ek bail Jezuchea fattlean aili ani tinnem tachea kopddeachea degek hat lailo, 21 karonn ti monantlea-monant mhunnttali: “Hanvem fokot tachea kopddeak pasun hat lailo zalear, hanv bori zatoli.” 22 Fattlean vollon Jezun tika polloilem, ani mhunnttlem: “Bhienaka, dhuve! Tujea bhavarthan tuka bori keli.” Ani teach vellar ti bail bori zali.

23 Uprant, Jezu tea odhikareachea ghora ailo tednam tannem basuri* vazoitoleank ani mottʼttean roddttolea lokank polloilem, 24 Jezun mhunnttlem: “Tumi sogle bhair vochat, karonn cheddum moronk na, tem nhidlam.” Hem aikon lok tiddkole ani tachim fokannam korun hansonk lagle. 25 Lokank bhair dhaddlea uprant to bhitor gelo, ani tannem tea cheddvacho hat hatant dhortanch, tem utthlem. 26 Hi khobor akʼkhea vattarant posorli.

27 Jezu thoim thaun fuddem voitalo tednam don kuddʼdde munis oxem mhunnon bob marit tachea fattlean ieunk lagle: “Davidachea Puta, amchi kakut kor.” 28 To ghorant bhitor sorlo tednam te kuddʼdde munis tachea lagim aile. Jezun tankam vicharlem: “Hem hanv korunk xoktam mhunn tumkam bhavarth asa?” Tannim zobab dilo: “Hoi, Somia.” 29 Tednam tanchea dolleank hat lavun, tannem mhunnttlem: “Tumchea bhavartha pormonnem tumchea sovem ghoddom.” 30 Ani rokddench tankam disonk laglem. Uprant, Jezun tankam xittkaun sanglem: “Hea vixim konnankuch kollonk dium nakat.” 31 Punn bhair sorlea uprant tannim tea vattarantlea soglea lokank hea vixim sanglem.

32 Te thoim thaun bhair voitale tednam, noxtto dut boslolea eka monea munxak lokamnim Jezu lagim haddlo; 33 tannem noxttea dutak kaddlea uprant to mono ulounk laglo. Hem polloun lok ojap zalo ani mhunnttlem: “Izraelant oxem poilem kednanch ghoddonk na.” 34 Punn Farizev mhunnonk lagle: “Ho tor noxttea dutanchea razachea modotin, noxttea dutank bhair kaddtta.”

35 Jezu soglea nogramnim ani ganvamnim bhonvlo, ani tanchea sobha-ghoramnim xikoit ani Devachea Rajeachi bori khobor porgott korit gelo. Toxench, tannem lokanchim soglea torechim duensam ani oskotkaieo boreo keleo. 36 Tannem lokanchi gordi polloili tednam, taka tanchem churchurem dislem, karonn te gonvlli naslolea menddram bhaxen ghavo zalʼle* ani adar naslole asle. 37 Jezun aplea xisank mhunnttlem: “Khorench, pik khub asa, punn vavraddi thodde asat. 38 Taka lagon, xetachea Dhoniak lunvnni korunk anik vavraddi dhadd mhunn vinoti korat.”

10 Uprant Jezun aplea 12 xisank apoile ani tankam noxttea dutancher odhikar dilo, jea udexim te noxttea dutank kaddunk xoktale, ani toxench, soglea torechim duensam ani oskotkaieo boreo korunk xoktale.

2 Bara apostlanchim nanvam him: Poilo, Simanv, taka Pedru-i mhunnttat, ani tacho bhav Andre; Zebedevacho put Jakob ani tacho bhav Juanv; 3 Filip, Bartholomew, Thomas, tax vosul korpi Matev, Alfevacho put Jakob, ani Tadev; 4 Urbevont* Simanv, ani Judas Iskariot, zannem uprant Jezucho ghat kelo.

5 Hea 12 zannank* Jezun oxi suchounni diun dhaddle: “Tumi videxianchea vattaramnim, ani Samariekaranchea xarant vochonakat. 6 Tachea bodlek fokot Izraelachea ghorannantlea sanddlolea menddram koddenuch vochat. 7 Tumi jea-jea zagear voitat, thoim oxem porgott korat: ‘Sorginchem Raj lagim pavlam.’ 8 Duent asat tankam bore korat, meloleank jivont korat, koddkarank nitoll korat, ani noxttea dutank bhair kaddat. Tumkam funkott mellʼllam, tumi-i funkott diat. 9 Tumchea bhenddak bandlolea pottʼtteant* bhangrache, chandiche, vo tambeache poixe ghalun vhoronakat. 10 Toxench provas kortana jevonn, vo don zoddi kopdde, vo zotim, vo danddo gheun vochonakat, karonn vavraddeak jevonn mellttolench.

11 “Khoinchea-i xarant vo ganvant gelea uprant, thoim konn purto asa taka sodhun kaddat, ani thoim thaun bhair soro poriant tangeruch ravat. 12 Tumi khoinchea-i ghorant bhitor sortat tednam tea ghorantlea lokank nomoskar korat. 13 Tea ghorak favo asa zalear tankam xanti mellttoli; punn tea ghorak favona zalear, ti xanti tumche koddem porot ietoli. 14 Khoinchea-i ghorant vo xarant tumkam konnui ieukar dina zalear vo tumchem aikona zalear thoim thaun bhair sortana tumchea paim-anchi dhulʼl fafddun uddoiat. 15 Hanv tumkam khorench sangtam, Zhoddttechea Disa tea xarachi zhoddtti Sodom ani Gomora poros chodd khoraien zatoli.

16 “Polloiat! Hanv tumkam koleam* modem menddram koxim dhaddttam; dekhun sorpa bhaxen chotur ani parveam bhaxen sadim zaiat. 17 Lokam thaun samballun ravat, karonn te tumkam dhorun neai-sobhent vhortole ani tanchea sobha-ghoramnim tumkam chabkamnim martole. 18 Mhaka lagon tumkam razpal ani razam mukhar ube kortole, jea udexim tankam ani videxi lokank govai mellttoli. 19 Tumkam dhorun vhortat tednam tumi kitem uloitolim ani koxem uloitolim hea vixim usko korum nakat. Tumi kitem ulounk zai tem Dev tumkam tea vellar kolloitolo; 20 karonn fokot tuminch ulounchimnant, punn tumchea Bapachi povitr xokti tumkam ulounk modot kortoli. 21 Bhav bhavak, ani bapui aplea putak jivexim marunk dhorun ditolo, bhurgim aplea avoi-bapaichea add ubim ravtolim ani tancho jiv kaddunk laitolim. 22 Mhojea nanva khatir soglo lok tumcho dves kortolo, punn zo xevott poriant thir ravtolo* to salvar zatolo. 23 Eka xarant tumkam dhumallo ditat tednam tumi dusrea xarant pollon vochat, karonn hanv tumkam khorench sangtam, munxacho Put ieunchea adim Izraelachea soglea xaramnim tumchem bhonvon zaunchem na.

24 “Aplea guru poros vidʼdhearthi, ani aplea dhonia poros chakor vhoddlo nhoi. 25 Vidʼdhearthi aplea guru sarko, ani chakor aplea dhonia sarko zait zalear titlench puro. Lokamnim ghorchea dhoniakuch Belzebul* mhunnttla zalear tachea ghorcheankui tim mhunnchimnant kai? 26 Tor bhienakat, karonn oxem kainch dhamplolem na jem uktem zaunchem na, ani oso kosloch gutt na zo dusreank kollchona. 27 Hanv tumkam kallkhant sangtam tem, tumi disa uzvadda sangat, ani hanv tumchea kanant hollu sangtam tem ghoracher voir vochon porgott korat. 28 Kudd kabar korunk xokta punn jivit* kabar korunk xokona tankam bhienakat, tachea bodlek, kudd ani jivit ekach borabor Gehenʼnant* kabar korunk xokta tachi bhirant dovrat. 29 Eka nanneak* don lhan suknnim* viktat nhoi? Tori astana, tantuntlem ekui tumchea Bapak kollonastana zomnir poddona. 30 Tumchea toklecho ek-ek kens pasun mezlolo asa. 31 Mhunnttoch bhienakat; zaitea lhan suknneam poros tumi chodd molachim asat.

32 “Konnui mhaka munxam hujir manun gheta zalear, hanv taka mhojea sorginchea Bapa hujir manun ghetolom. 33 Punn konnui mhaka munxam hujir nakarta zalear, hanv-ui taka mhojea sorginchea Bapa hujir nakartolom. 34 Hanv prithumecher xanti haddunk ailam mhunn chintinakat. Hanv xanti haddunk nhoi, punn futt ghalunk* ailam. 35 Karonn hanv putak tachea bapaichea add, dhuvek tichea avoichea add, ani sunek tichea sasumaichea add korunk ailam. 36 Khorench, eka munxachea ghorantlo lokuch tacho dusman zatolo. 37 Mhojea poros aplea bapaicho vo aplea avoicho chodd mog korta to mhozo xis zaunk purto na; ani mhojea poros aplea putacho vo dhuvecho chodd mog korta to mhozo xis zaunk purto na. 38 Zo konn aplo trasancho khambo* ubarunk toiar na ani mhojea fattlean ieunk toiar na to mhozo xis zaunk purto na. 39 Zo aplo jiv vachounk proitn korta to aplo jiv hogddaitolo, ani zo mhojea pasot aplo jiv hogddaita to aplo jiv vachoitolo.

40 “Zo tumkam ieukar dita to mhaka-i ieukar dita, ani zo mhaka ieukar dita to mhaka dhaddla taka-i ieukar dita. 41 Zo eka provadeak to provadi mhunn ieukar dita taka provadeak melltta to inam mellttolo, ani zo eka nitivont munxak to nitivont mhunn ieukar dita taka nitivont munxak melltta to inam mellttolo. 42 Hanv tumkam khorench sangtam, hea lhanantlea ekleak pasun to mhozo xis mhunn konnui thondd udkacho ek pelo pieunk dita zalear, taka inam mellʼllea bogor urchona.”

11 Aplea 12 xisank suchounneo dilea uprant, Jezu thoim thaun dusrea xaramnim xikounn diunk ani porgott korunk gelo.

2 Kristan kelʼlea kamam vixim Juanvan bondkhonnint aikolea uprant, tannem aplea xisank dhaddle 3 ani Jezuk oxem vicharlem: “Ieuncho aslo to tunch, vo ami dusrea konnanchi vatt pollounk zai?” 4 Tednam Jezun tankam sanglem: “Jem kitem tumi polloitat ani aikotat tem soglem vochon Juanvak sangat: 5 kuddʼddim pollounk lagtat, longddim choltat, koddkaram nitoll zatat, bherim aikotat, melolim jivont zatat ani goribank bori khobor porgott zata. 6 Mhojer dubhavnant* tim munxam khuxal.”

7 Te thoim thaun gelea uprant, Jezu lokank Juanva vixim oxem sangonk laglo: “Tumi oronnʼnneant* kitem pollounk gelʼle? Varean halta tosli tonnachi boddi? 8 Tor tumi kitem pollounk gelʼle? Bore* kopdde ghatlolo munis? Osle kopdde nhestat tim tor razvaddeant astat. 9 Tor tumi thoim kiteak gelʼle? Eka provadeak pollounk? Hoi, hanv tumkam sangtam, tumi eka provadea poros vhodd munxak pollounk gelʼle. 10 Ho toch zaun asa zachea vixim oxem boroilʼlem aslem: ‘Polloi, hanv mhojea sondexkarak tujea fuddem* dhaddttam zo tujea pasot vatt toiar kortolo!’ 11 Hanv tumkam khorench sangtam, aiz poriant je lok zolmoleat tantunt Juanv Batista poros konn vhodd na, punn sorginchea Rajeant zo munis ekdom lhan asa to Juanva poros vhodd asa. 12 Juanv Batistachea disa thaun atam poriant, lok sorginchem Raj melloun gheunk, zata titlo proitn kortat ani je lok proitn kortat te tem Raj melloun ghetat. 13 Karonn Provadeanchea Pustokantleo ani Kaideantleo* sogleo bhasaunneo Juanvachea kalla poriant asleo; 14 Tumi manun gheum vo na, ‘Ieuncho aslo to Elija hoch.’ 15 Kan asat tannim aikonchem.

16 “Hanv hea pillgek konnank sor korum? Hi pillgi bazarant boslolea lhan bhurgeam sarki asa. Aplea sangata khellttoleank tim ulo kortat, 17 ani mhunnttat: ‘Ami tumchea pasot basuri* vazoili, punn tumi nachonk nant; ami mottʼttean roddlim, punn tumi hoddʼddem boddoun dukh korunk na.’ 18 Teach bhaxen, Juanv khaun-pieun ieunk na, tori astana, ‘Tacher noxtto dut asa,’ oxem lok mhunnttat. 19 Munxacho Put khaun-pieun ailo, tori astana lok mhunnttat, ‘Ho munis pottaro* ani bebdo, toxench to tax vosul korpeancho ani patkeancho ixtt.’ Punn zannvai aplea kamantlean* sarki mhunn dison ieta.”

20 Uprant, jea xarant tannem sogleant chodd xoktivont kamam kelʼlim, thoinchea lokamnim poschatap korunk na dekhun, tanchi chuk dakhounk tannem oxem mhunnttlem: 21 “Korazin, tujer hai! Bethsaida, tujer hai! Karonn tumchea modem ghoddlolim vhodd-vhodd vizmitam Tir ani Sidonant ghoddlolim zalear, thoinche lok sak ghalun ani gobrant bosun poschatap kortole asle. 22 Hanv tumkam sangtam, Zhoddttechea Disa tumchi zhoddtti Tir ani Sidona poros chodd khoraien zatoli. 23 Ani tum Kapernauma, tuka mollba itlem unch kaddttole oxem dista kitem? Tum tor Fonddant* voitolem; karonn tujea sovem ghoddlolim vizmitam Sodoma sovem ghoddlolim zalear, tem aiz poriant urtolem aslem. 24 Hanv tuka sangtam, Zhoddttechea Disa tumchi zhoddtti Sodoma poros chodd khoraien zatoli.”

25 Tednam Jezun mhunnttlem: “Bapa, sorg ani prithumechea Dhonia, hanv sogleam mukhar tuka vakhannttam, karonn tunvem heo vostu gineani ani zannar munxam thaun lipoun dovorleo punn lhan bhurgeank kolloileo. 26 Hoi, Bapa, karonn tuka hench manvolam. 27 Mhojea Bapan soglem mhojea hatant ghatlam. Bapak soddun Putak anik konnuch bore toren vollkhona; ani Putak soddun Bapak anik konnuch bore toren vollkhona. Toxench Put zankam aplea Bapa vixim kolloita tinch Bapak vollkhotat. 28 Koxtt kortoleamno ani ojeachea bhara khala aslolea lokamno, tumi soglim mhojea lagim ieiat, hanv tumkam novean ghottai ditolom. 29 Mhojem zum tumcher gheiat, ani mhojea thaun xikat, jea vorvim tumkam novean ghottai mellttoli, karonn hanv movall ani khalto. 30 Taka lagon mhojem zum gheun vochonk sompem, ani mhojem ojem zodd nhoi.”

12 Ek pavtt Jezu Sabathachea disa aplea xisam borabor xetantlean voitalo. Tachea xisank bhuk lagli dekhun te thoinchim konnsam toddun khaunk lagle. 2 Hem polloun Farizevamnim taka mhunnttlem: “Polloi! Tuje xis Sabathachea disa korunk zaina tem kam kortat.” 3 Jezun tankam mhunnttlem: “Davidak ani tachea sangata aslolea munxank bhuk lagli tednam tannim kitem kelem tem tumi vachunk na? 4 Koso to Devachea ghorant* gelo, ani tannem ani tachea borabor aslolea munxamnim povitr* undde khale je iadnikam xivai anik konnench khaunk zainasle, hea vixim tumi vachunk na? 5 Vo Sabathachea disa iadnik Devmondirant kam kortat ani tori astana te guneanvkari zainant, hem tumi Kaideant vachunk na? 6 Hanv tumkam sangtam, Devmondira poros vhoddlo konn tori hanga asa. 7 ‘Mhaka bolidan naka punn dusreanchi doia kelʼli zai,’ hea utrancho orth tumi somzolʼle zalear je guneanvkari nant tankam tumi guneanvkari mhunn tharaunche nasle. 8 Karonn munxacho Put Sabath disacho Dhoni zaun asa.”

9 Thoim thaun to tanchea sobha-ghorant gelo, 10 thoim ek munis aslo zacho ek hat ar zaun dhorlolo.* Jezucher arop ghalunk kitem-i mellot kai mhunn pollounk thoddea lokamnim taka vicharlem, “Sabathachea disa eka duent munxak boro korop sarkem kai?” 11 Tannem mhunnttlem: “Tumchea modlea konnam-i lagim ek menddro asa ani to Sabathachea disa fonddant poddlo zalear to munis taka bhair kaddchona kai? 12 Eka menddra poros munis kitlo moladik nhoi! Tor Sabathachea disa borem kam korop sarkem zaun asa.” 13 Magir tannem tea munxak sanglem: “Tuzo hat fuddem kor.” Tannem aplo hat fuddem kelo, ani tacho hat dusrea hata sarko boro zalo. 14 Punn Farizev thoinchean bhair gele ani Jezuk jivexim marunk ievzonn korunk lagle. 15 Hem kollʼllea uprant, Jezu thoim thaun gelo. Zaite lok tachea fattlean gele, ani tannem tankam sogleank bore kele, 16 punn aplea vixim konnank sangonakat mhunn tannem tankam koddok utramnim hukum dilo. 17 Hea toren Izaias provadea udexim sanglolim tim utram purnn zalim. Tannem mhunnttlolem:

18 “Polloi! Mhozo vinchun kaddlolo sevok, mhozo opurbaiecho, to mhaka manvola! Hanv taka mhoji povitr xokti ditolom, ani khori nit kitem ti to soglea raxttrank dakhoitolo. 19 To zhogddi korchona, vo vhoddlean bovall korchona, ani mukhel rosteancher tacho avaz konnank aikonk ieunchona. 20 Sarki nit kori poriant to tonnachi bhagovloli boddi moddchona, ani minnminntta ti vat palounchona. 21 Khorench, raxttram tachea nanvacher bhorvonso dovortolim.”

22 Uprant tannim ek noxtto dut boslolea kuddʼddea ani monea munxak Jezu lagim haddlo. Jezun taka boro kelo, tednam to munis ulounk ani pollounk laglo. 23 Hem polloun thoim zomlolo to lok ojap zalo ani oxem mhunnonk laglo: “Ho Davidacho Put kai?” 24 Punn hem aikon Farizev mhunnonk lagle: “Ho munis noxttea dutancho raza, Belzebulachea* modotin lokancher boslole noxtte dut kaddtta.” 25 Te kitem chintʼtat tem Jezu zannam aslo dekhun tannem tankam mhunnttlem: “Jea rajeant futt poddtta tem nas zatolem, ani jea xarant ani ghorant futt poddtta tem togchem na. 26 Toxench, Soitan zor Soitanak kaddtta zalear to svotacheach add zhogoddtta oxem zatolem; magir tachem raj koxem togtolem? 27 Ani zor hanv Belzebulachea modotin noxttea dutank kaddttam zalear tumche put* konnanchea modotin tankam kaddttat? Taka lagon tumi chukichem uloitat mhunn tumche putuch dakhoun ditole. 28 Punn hanv Devachea povitr xoktechea modotin noxttea dutank kaddttam, tor hacho orth, Devachem Raj hanga asa ani tumkam tem kollonkuch na. 29 Zor konnankui eka bollixtt munxachea ghora vochon tachem saman luttunk zai zalear to tea munxak poilim bandun dovorchona kai? Taka bandlea uprantuch to tachem ghor luttunk xoktolo. 30 Zo mhojea vatten na to mhojea add asa, ani zo mhojea borabor punzaina to ximpddaita.

31 “Dekhun hanv tumkam sangtam, munxachea soglea torechea patkak ani opmanak bhogsonnem asa, punn zo povitr xoktecho opman korta taka bhogsonnem na. 32 Udharonnak, zo munxachea Puta add uloita, taka bhogsonnem asa; punn zo povitr xoktechea add uloita taka bhogsonnem na, hea sonvsarant* na ani ieuncho asa tea sonvsarant* pasun na.

33 “Tumchem zhadd borem asa zalear tachem foll borem astolem, punn tumchem zhadd kuslolem asa zalear tachem follui kuslolem astolem, karonn folla voilean zhadd koslem tem kollon ieta. 34 Vikari sorpachea pileamno, tumi vaitt asat zalear borem koxe uloitole? Karonn jem kallzant asa tench tonddantlean bhair sorta. 35 Boro munis aplea borea theveantleo boreo vostu bhair kaddtta, punn vaitt munis aplea vaitt theveantleo vaitt vostu bhair kaddtta. 36 Hanv tumkam sangtam, jea munxachea tonddantlean orth naslolim utram bhair sortat taka Zhoddttechea Disa hixob diuncho poddttolo; 37 karonn tumchea utramninch tumkam nitivont tharaitole ani tumchea utramninch tumkam guneanvkari tharaitole.”

38 Hem aikon thoddea xastreamnim ani Farizevamnim Jezuk mhunnttlem: “Guruji, amkam tuje koddlean ek khunna pollounk zai.” 39 Jezun tankam mhunnttlem: “Noxtti ani visvasghatki* pillgi khunna magot ravta, punn Jonas provadeachea khunne xivai dusri koslich khunna tankam mellchina. 40 Zoso Jonas tin dis ani tin rati eka vhoddlea nusteachea pottant aslo, tosoch munxacho Put tin dis ani tin rati prithumechea pottant astolo. 41 Zhoddttechea vellar Nineveche lok hea pillge borabor uttʼttole ani tika guneanvkari tharaitole, karonn Jonasacho sondex aikon tannim poschatap kelʼlo. Punn polloiat! Jonasa poros vorto konn tori hanga asa. 42 Dokxinneche ranniek Zhoddttechea Disa hea pillge borabor utthoitole ani ti hea pillgek guneanvkari tharaitoli, karonn Solomona koddlean zannvaiechim utram aikonk ti khub pois thaun ailʼli. Punn polloiat! Solomona poros vorto konn tori hanga asa.

43 “Ek noxtto dut* eka munxa thaun bhair sorta tednam to visov gheunk udok naslolo zago sodhunk bhonvta, punn taka khoinch zago mellona. 44 Tednam to mhunntta, ‘Hanv jea ghorantlean bhair sorlolom tea ghorant porot voitam.’ Thoim ailea uprant taka tem ghor ritem, zhaddun-pusun nitoll kelʼlem ani nettoilolem melltta. 45 Tednam to voita ani aplea poros vaitt anik sat noxttea dutank gheun ieta. Magir te tea munxachea bhitor rigon thoinch ravonk lagtat. Oxe toren tea munxachi poristhiti poilim poros vaitt zata. Hea noxttea pillgechem-i oxench zatolem.”

46 Jezu lokam lagim uloitalo tednam tachi avoi ani tache bhav bhair ieun ubim aslim. Tim tachea lagim ulounk sodhtalim. 47 Tednam konnem tori ieun Jezuk mhunnttlem: “Polloi! Tuji avoi ani tuje bhav bhair ube asat, ani tim tujea lagim ulounk sodhtat.” 48 Jezun taka zobab diun mhunnttlem: “Mhoji avoi ani mhoje bhav konn?” 49 Magir aplea xisank hat dakhoun tannem mhunnttlem: “Polloi! Hi mhoji avoi ani mhoje bhav! 50 Karonn zo konn sorgar asa tea mhojea Bapachi khuxi korta, toch mhozo bhav, mhoji bhoinn ani mhoji avoi.”

13 Tea disa ghora thaun bhair gelea uprant Jezu doria deger boslolo aslo. 2 Tednam lokancho ek vhodd zomo tachea lagim ektthaim zalo dekhun to vochon ek vhoddear boslo, ani sogle lok doria deger ube ravle. 3 Uprant tannem tankam vopareamnim zaiteo vostu xikoileo. Tannem mhunnttlem: “Ek pavtt ek xetkar bim vompunk gelo. 4 To bim vomptalo tednam thoddem bim rosteachea kuxik poddlem, ani suknneamnim ieun tem khalem. 5 Thoddem bim khoddpi zomnir poddlem. Thoim chodd mati nasli dekhun tem rokddench kirlolem. 6 Punn suria udelea uprant koddok votak lagon tem korpolem karonn taka mull ieunk naslem. 7 Thoddem bim kantteamnim poddlem ani kantteanchea zhaddamnim taka vaddonk diunk na. 8 Punn thoddem bim borea zomnir poddlem ani taka pik zalem, konnank 100 pavtti chodd, konnank 60 pavtti ani konnank 30 pavtti. 9 Kan asat tannim aikonchem.”

10 Uprant xis Jezu lagim ieun vicharunk lagle: “Tum lokank vopareamnim kiteak xikoita?” 11 Tednam tannem sanglem: “Sorginchea Rajeachi povitr guttachi somzonni tumkam dilea, punn tankam diunk na. 12 Karonn zachea lagim asa taka anik ditole ani tachea lagim chodd zatolem; punn zachea lagim na, tachea thaun asa tem-ui kaddun ghetole. 13 Hanv tankam vopareamnim xikoitam karonn tim polloitat punn tankam disona; tim aikoitat punn tankam aikonk iena, nhoi mhunn tankam tachi somzonni mellona. 14 Tanchea vixim Izaias provadean kelʼli bhasaunni purnn zata. Tannem mhunnttlolem: ‘Tumi aikotole punn tacho orth tumkam kosoch somzochona, tumi polloitole punn tumkam koxench dischem na. 15 Karonn tea lokanchem kalliz fatra sarkem ghott zalam. Te aplea kanamnim aikotat punn kainch korinant. Tannim aple dolle bond keleat. Tannim aplea dolleamnim kednanch pollounchem nhoi, aplea kanamnim kednanch aikonchem nhoi, toxench, aplea kallzant orth somzon gheuncho nhoi ani mhojea lagim porot ieunchem nhoi ani hanvem tankam bore korche nhoi mhunn te oxem kortat.’

16 “Punn tumi khuxal karonn tumche dolle polloitat ani tumche kan aikotat. 17 Hanv tumkam khorench sangtam, zaite provadi ani nitivont munis tumi pollounk sodhtat teo vostu pollounk sodhtale, punn pollounk pavlenant ani te tumi aikotat teo vostu aikonk sodhtale, punn aikonk pavlenant.

18 “Atam tumi bim vomptolea xetkarachea voparicher dhean diat. 19 Zo munis Rajeacho sondex aikota punn tacho orth somzon ghena tachea kallzant roilolem bim noxtto* ieun kaddun vhorta. Tem rosteachea kuxik vomplolem tench bim zaun asa. 20 Khoddpi zomnir vomplolem bim to munis zaun asa zo sondex aikotanch to khuxalkaien manun gheta. 21 Punn taka mullam asonant dekhun to thoddoch vell urta. Uprant sondexak lagon tacher sonkoxtt ietat ani taka dhumallo soscho poddtta tednam to rokddoch tacher bhavarth dovorpachem soddun dita.* 22 Punn kantteamnim vomplolem bim to munis zaun asa zo sondex aikota punn hea sonvsarache* uske ani lokank bhuloita tosli poixanchi takot sondex damun dovorta ani taka pik zaina. 23 Punn bore matient vomplolem bim to munis zaun asa zo sondex aikota, tacho orth somzota ani pik dita, konn 100 pavtti chodd, konn 60 pavtti ani konn 30 pavtti.”

24 Jezun tankam ani ek vopar sangli: “Sorginchem Raj oslea munxak sor korunk zata zannem aplea xetant borem bim roilem. 25 To munis nhidlolo aslo tednam tacho dusman ailo ani tannem gonvachea bim-am modem ranvotti zhaddachem bim vomplem. 26 Jednam rompe vaddle ani tankam konnsam futtlim tednam ranvotti zhaddam-i disonk laglim. 27 Dekhun sevokamnim ieun xetachea dhoniak mhunnttlem, ‘Dhonia, tunvem xetant borem bim vomplolem nhoi? Tor tantunt ranvotti zhaddam koxim ailim?’ 28 Dhonian mhunnttlem, ‘Hem mhojea dusmanachem kam.’ Tednam sevokamnim mhunnttlem, ‘Tor tum sangta zalear, ami tim zhaddam umttun kaddum?’ 29 Tannem mhunnttlem, ‘Naka, karonn tumi ranvotti zhaddam kaddttat tednam gonvui umttun ieit. 30 Lunvnnecho vell iesor dogainkui borabor vaddom di. Lunvnneche dis ietole tednam hanv mhojea lunvnni korpeank sangtolom: Poilim ranvotti zhaddam umttun kaddat ani tem zollounk tache bhore bandat; ani uprant gonv kaddat ani mhojea gudanvant bhorat.’”

31 Tannem tankam anik ek vopar sangli: “Sorginchem Raj sansvachea bie bhaxen asa, ji eka munxan aplea xetant roili. 32 Khorem mhunnttlear ti bi ekdom lhan, punn ti vaddtta tednam ti bhajechea zhaddam modem sogleant vhoddlem zhadd zata. Tem zhadd itlem vhoddlem zata ki mollba voilim suknnim pasun tachea khandeancher ghontter kortat.”

33 Tannem tankam ani ek vopar sangli: “Sorginchem Raj khomira bhaxen asa, jem eke bailen sumar tin vhoddlim mapam* pittant ghatlem ani mollʼllem. Taka lagon akʼkhem pitt fuglem.”

34 Jezun heo sogleo vostu lokank vopareamnim sangleo. To vopari uzar korinastana uloinaslo. 35 Tea vorvim provadeamnim sanglolim utram purnn zalim: “Hanv vopareo uzar korun xikoitolom, ani survatek thaun* gupit asat teo vostu sangtolom.”

36 Lokank dhaddlea uprant Jezu ghora gelo. Tachea xisamnim tachea lagim ieun mhunnttlem: “Amkam xetantlea ranvotti zhaddanchea voparicho orth somzaun sang.” 37 Tannem mhunnttlem: “Borem bim vompʼpi munxacho Put zaun asa; 38 xet mhunnche sonvsar, borem bim mhunnttlear Rajeache put, punn ranvotti zhaddam mhunnche noxtteache* put, 39 ani jea dusmanan hem vomplam to Soitan*. Lunvnni mhunnche, sonvsarachea* xevottacho vell ani lunvnni korpi devdut zaun asat. 40 Tor, zoxem ranvotti zhaddam umttun ujeant uddoitat toxench sonvsarachea* xevottachea vellar zatolem. 41 Munxacho Put aplea dutank dhaddttolo, ani dusreank patkant uddoitat* ani noxttim kamam kortat toslea soglea lokank te tachea Rajea thaun ektthaim kortole. 42 Devdut tankam ujeachea bhottʼttent uddoitole ani thoim tim roddttolim ani dant korkoraitolim. 43 Tea vellar nitivont munxam aplea Bapachea Rajeant suria bhaxen porzollttolim. Kan asat tannim aikonchem.

44 “Sorginchem Raj xetant lipoun dovorlolea thevea bhaxen asa zo eka munxak melltta. To munis to thevo porot teach zagear lipoun dovorta ani khuxalkaien vochon aplea lagim asat teo sogleo vostu vikta ani ti zomin vikti gheta.

45 “Tea bhair sorginchem Raj eka veaparea bhaxen asa zo moladik motiam sodhunk bhonvta. 46 Taka ek khub moladik moti melltta tednam to rokddoch vochon aplea lagim asa teo sogleo vostu vikta ani tem moti viktem gheta.

47 “Toxench sorginchem Raj doriant ghatlolea eka vhodd zalla bhaxen asa. Tea zallant soglea torechim nustim sampoddttat. 48 Zall bhorta tednam tem zall te voddun doria deger haddttat, ani bosun borim nustim ektthaim korun panttleant ghaltat, ani khaunk upkarona tim nustim bhair uddoitat. 49 Hea sonvsarachea* xevottachea vellar oxench zatolem. Devdut vochon noxttea lokank nitivont lokam thaun kuxin kaddttole 50 ani noxttea lokank ujeachea bhottʼttent uddoitole, zoim tim roddttolim ani dant korkoraitolim.

51 “Tumkam hea soglea vostuncho orth somzolo?” Tannim mhunnttlem: “Hoi.” 52 Tannem tankam mhunnttlem: “Lokank xikoupi dor ek xikxok zaka sorginchea Rajea vixim xikoilam to eka ghorachea dhonia bhaxen asa zo aplea theveantleo noveo ani porneo vostu bhair kaddtta.”

53 Hi vopar sanglea uprant Jezu thoim thaun bhair sorlo. 54 To aplea ganvant ailo zoim to vaddlolo. To sobha-ghorant lokank xikounk laglo. Tim tachi xikounn aikon ojap zalim ani mhunnonk laglim: “Hea munxak itli zannvai khoim thaun mellʼlli? Ani him vizmitam korpachi xokti taka konnem dili? 55 Ho thovoiacho put nhoi kai? Ani tachea avoichem nanv Marie nhoi kai? Ani Jakob, Juze, Simanv ani Judas tache bhav nhoi kai? 56 Ani tacheo bhoinno amcheach modem ravonant kai? Tor ho munis heo sogleo vostu khoim thaun xiklo?” 57 Tor tannim tacher bhavarth dovrunk na. Punn Jezun tankam mhunnttlem: “Eka provadeak sogle koddem man melltta punn fokot tachea ganvant ani ghorant taka man mellona.” 58 Tankam bhavarth naslo dekhun tannem thoim chodd vizmitam korunk nant.

14 Tea vellar, jilʼleacho odhikari Herod,* hannem Jezu vixim aikolem. 2 Tannem aplea sevokank mhunnttlem: “Ho Juanv Batist. Taka meloleantlo jivont kela, ani taka lagon to him vizmitam korta.” 3 Herodan aplo bhav Filip, hachi bail Herodiasak lagon Juanvak dhorlolo ani sanklleamnim bandun bondkhonnint ghatlolo. 4 Karonn Juanv Herodak oxem mhunnttalo: “Tunvem Herodiasak tuji bail korun ghetlea tem sarkem nhoi.” 5 Herod Juanvak marun uddounk sodhtalo punn to lokank bhietalo, karonn lok Juanvak ek provadi mhunn mantale. 6 Punn uprant Herodachea zolma disa Herodiasachi dhuv nachli tednam Herod khub khuxal zalo 7 ani tannem, tem aplea lagim jem kitem magta tem apunn taka ditolo mhunn utor dilem. 8 Tinnem aplea avoichem aikon mhunnttlem: “Tum mhaka Juanv Batistachi tokli eka tattant ghalun hanga haddun di.” 9 Hem aikon raza dukhi zalo, punn utor dilʼlem dekhun ani tachea mukhar jevnnak boslolea lokank lagon tannem Juanvachi tokli haddun tika di mhunn hukum dilo. 10 Tannem eka munxak bondkhonnint dhaddun Juanvachi tokli katorli. 11 Tachi tokli tattant ghalun tannem cheddvak haddun dili, ani ti tokli tem aplea avoi koddem gheun gelem. 12 Uprant Juanvache xis aile ani tannim tachi kudd vhoron purli. Magir tannim vochon Jezuk hea vixim sanglem. 13 Hem aikolea uprant Jezu vhoddear boson konn na toslea zagear gelo karonn taka ekloch ravonk zai aslem. Punn lokamnim hea vixim aikolem tednam te xarantlean cholonuch tachea lagim gele.

14 Jezu doria deger pavlo tednam tannem lokancho ek vhoddlo zomo thoim polloilo. Tankam polloun taka churchurem dislem, ani duent asloleank tannem bore kele. 15 Punn sanz zalea uprant xisamnim tachea lagim ieun mhunnttlem: “Hea vattarant konn lok ravona ani atam khub vell zala; tor lokank khaunk lagon bhonvtonnchea ganvant kitem-i viktem gheunk dhaddun di.” 16 Punn Jezun tankam mhunnttlem: “Tankam vochpachi goroz na; tuminch tankam kitem-i khaunk diat.” 17 Xisamnim taka sanglem: “Amchea lagim fokot panch undde ani don nustim asat.” 18 Tannem mhunnttlem: “Undde ani nustem mhojea lagim gheun ieiat.” 19 Uprant Jezun lokank tonnacher bosonk sanglem. Magir tannem panch undde ani don nustim ghetlim ani mollbar polloun magnneant upkar attoile. Tannem unddeache kuddke korun xisank dile ani xisamnim te lokank vanttle. 20 Tim soglim pott bhor jevlim ani urlole kuddke ektthaim kele tednam 12 panttleo bhorleo. 21 Jevlim tanchea modem sumar 5,000 dadle asle, tea bhair bailo ani lhan bhurgim-i aslim. 22 Uprant rokddench Jezun aplea xisank vhoddear boson aplea poilim poltoddi vochonk sanglem, punn lokank dhaddunk lagon to ravlo.

23 Lokank dhaddlea uprant magnnem korunk to dongrar gelo. Sanz zali ani to thoim ekloch aslo. 24 Atam mhunnttlear xisanchem vhoddem doria deger thaun thodde kilometr* pois pavlolem. Varem portem martalem dekhun vhoddeacher lharam martalim. 25 Punn ratchea chovtea parar* Jezu udkacher cholon tanchea lagim ailo. 26 Jezu udkacher cholta tem polloun xisamnim bhieun oxem mhunnttlem: “Ami sopon polloitat koxem dista!” Ani te bhieun mottʼttean bob marunk lagle. 27 Punn tednam Jezun tankam mhunnttlem: “Dhir dhorat! Hanv to; bhienakat.” 28 Tednam Pedrun mhunnttlem: “Somia, to tunch zalear, mhaka udkacher cholon tujea lagim ieunk adnea di.” 29 Jezun mhunnttlem: “Ieo!” Tednam Pedru vhoddea voilo denvlo ani udkacher cholon Jezu lagim vochonk laglo. 30 Punn vadollak polloun to bhielo ani buddonk laglo. Tednam tannem mottʼttean bob marli: “Somia, mhaka salvar kor!” 31 Jezun rokddoch aplo hat fuddem korun tacho hat dhorlo ani mhunnttlem: “Are unnea bhavarthachea munxa, tum kiteak dubhavlo?” 32 Te dogui vhoddeacher choddlea uprant vadoll thamblem. 33 Magir vhoddear asloleamnim taka bagon nomoskar kelo ani mhunnttlem: “Khorench tum Devacho Put.” 34 Poltoddi pavlea uprant te Genezaret vattarant gele.

35 Thoinche lok taka vollkhole ani tannim rokddich bhonvtonnchea vattarant khobor pavoili. Lok soglea duent asloleank tachea lagim gheun aile. 36 Apnnank fokot tachea kopddeachea degek hat lavunk di mhunn te tachea lagim vinoti korunk lagle. Jea lokamnim taka hat lailo te sogle bore zale.

15 Magir Jeruzalema thaun thodde Farizev ani xastri Jezu koddem aile ani taka mhunnonk lagle: 2 “Tuje xis purvozancheo riti-rivazo kiteak moddttat? Zoxem, jevchea poilim te hat dhuinant.”*

3 Tednam Jezun tankam mhunnttlem: “Tumi tumchea riti-rivazank lagon Devachi adnea kiteak moddttat? 4 Udharonnak, Devan sanglam, ‘Tujea bapaik ani tujea avoik man di,’ ani, ‘Zo aplea bapaicho vo avoicho opman korta* taka jivexim marcho.’ 5 Punn tumi mhunnttat, ‘Zo munis aplea bapaik vo avoik mhunntta: “Tumkam upkarak poddonk xokta toslem mhoje koddem jem kitem asa, tem hanvem Devak bhettounk dovorloli ek bhett,” 6 toxem zalear taka aplea avoi-bapaik man diupachi goroz na.’ Hea ritin tumi tumchea riti-rivazank lagon Devachea utrak valor na mhunn dakhoitat. 7 Are dhongeamno, Izaias provadean tumchea vixim kelʼli bhasaunni ekdom sarki asa. Tannem mhunnttlem: 8 ‘He lok vonttamnim mhaka man ditat, punn tanchem kalliz mhojea thaun khub pois asa. 9 Te mhoji bhokti kortat punn tacho kainch faido na, karonn te munxamnim kelʼle kaide Devachi xikounn mhunn xikoitat.’” 10 Tednam Jezun lokank aplea fuddem apoilem ani mhunnttlem: “Aikat ani hacho orth somzon gheiat: 11 Munxachea tonddantlean bhitor voita tem taka oxudʼdh korina, punn jem tachea tonddantlean bhair sorta tem taka oxudʼdh korta.”

12 Magir xisamnim tachea lagim ieun mhunnttlem: “Tujea utrank lagon Farizev ragar zale* mhunn tum zannam?” 13 Tednam tannem mhunnttlem: “Mhojea sorginchea Bapan lavunk na tem dor ek zhadd mulla thaun umttun uddoitole. 14 Tanche koddem dhean dinakat. Te svota kuddʼdde asun dusreank vatt dakhoitat. Eka kuddʼddean dusrea kuddʼddeak vatt dakhoili zalear te dogui fonddant poddttole.” 15 Hem aikon Pedrun mhunnttlem: “Amkam tea voparicho orth sang.” 16 Tannem mhunnttlem: “Tumkam-i tem azun somzonk na? 17 Jem munxachea tonddantlean pottant voita tem tachea kuddintlean bhair sorta, hem tumkam khoborna? 18 Punn jem tonddantlean bhair sorta tem munxachea kallzantlean ieta ani tench munxak oxudʼdh korta. 19 Udharonnak, vaitt chintnam kallzantlean bhair sortat ani taka lagon munis khun korta, pordvar* korta, onoitik kuddicho sombond* dovorta, chorio korta, fotti govai dita ani Devachea add uloita. 20 Heo sogleo vostu munxak oxudʼdh kortat; punn hat dhuinastana* jevlear munis oxudʼdh zaina.”

21 Tednam Jezu thoim thaun bhair soron Tir ani Sidonachea vattarant gelo. 22 Tea vattarant ravpi Finisiachi ek bail tachea lagim aili ani mottʼttean roddon mhunnonk lagli: “Somia, Davidachea Puta, mhoji kakut kor. Mhojea dhuvecher noxtto dut bosla, ani taka lagon tika khub tras zatat.” 23 Punn Jezun tika ek utor pasun mhunnonk na. Tednam tachea xisamnim ieun taka vinoti keli: “Tika vochonk sang, karonn ti roddot amchea fattlean ieit asa.” 24 Tannem zobab dilo: “Mhaka Izraelachea ghorachea sanddlolea menddrank soddun anik konnanch koddem dhaddunk na.” 25 Toripunn te bailen ieun Jezuk bagon nomoskar kelo ani mhunnttlem: “Somia, mhaka modot kor.” 26 Tannem tika mhunnttlem: “Bhurgeancho unddo kaddun sunneachea petteam mukhar uddovop sarkem nhoi.” 27 Tednam tinnem mhunnttlem: “Tum sangta tem sarkem Somia, toripunn sunneache pette aplea dhoniachea meza voilean poddttat te kuddke khatach nhoi.” 28 Hem aikon Jezun tika mhunnttlem: “Tuzo bhavarth khorench khub ghott asa. Tuka zai toxench zaum.” Ani teach vellar tichi dhuv bori zali.

29 Thoim thaun bhair soron Jezu Galiliechea doria lagim ailo ani eka dongrar vochon boslo. 30 Tednam khub lok tachea lagim ieunk lagle ani tannim aplea borabor opong, longdde, kuddʼdde, mone, ani oslea zaitea lokank haddun tachea paim-am lagim dovorle. Jezun tankam sogleank bore kele. 31 Mone uloitat, opong bore zatat, longdde sarke choltat, ani kuddʼdde pollounk xoktat hem polloun te ojap zale ani tannim Izraelachea Devachi mhoima keli.

32 Jezun aplea xisank apoile ani mhunnttlem: “Mhaka hea lokanchem churchurem dista, karonn tin disam thaun te mhojea borabor asat ani tanchea lagim khaunk kainch na. Tankam upaxim dhaddunk mhaka borem disona, karonn voitana te vatter ghunvoll ieun poddot.” 33 Punn xisamnim taka mhunnttlem: “Hea ranant itlea lokank zai titlem jevonn ami khoim thaun haddttole?” 34 Jezun tankam vicharlem: “Tumchea lagim kitle undde asat?” Tannim mhunnttlem: “Sat, ani thoddim lhan nustim-i asat.” 35 Tednam tannem lokank zomnir bosonk sanglem. 36 Jezun te sat undde ani nustim ghetlim ani Devache upkar attoile, uprant te moddun tannem xisank dile ani xisamnim te lokank vanttle. 37 Soglo lok pottbhor jevlo, ani urlole kuddke ektthaim kele tednam sat vhoddleo panttleo bhorleo. 38 Jevleat tea lokam modem 4,000 dadle asle, tea bhair bailo ani bhurgim-i aslim. 39 Xevottak, tannem lokank dhaddle ani to vhoddear boson Magadanachea vattarant gelo.

16 Farizev ani Saduki Jezu lagim aile ani tachi porikxa korunk apnnak sorgar thaun ek khunna dakhoi mhunn sangonk lagle. 2 Jezun tankam mhunnttlem: “Sanz zata tednam tumi mhunnttat, ‘Hovaman borem astolem karonn mollob tambddem asa.’ 3 Sokall zata tednam tumi mhunnttat, ‘Aiz hovaman thondd ani domott astolem, karonn mollob tambddem asa punn kupam manddlolim asat.’ Mollob polloun hovaman koxem astolem tem tumi sangonk xoktat, punn kallachi khunna polloun tacho orth sangonk tumi xokonant. 4 Noxtti ani visvasghatki* pillgi khunna magot ravta, punn Jonasachea khunne xivai dusri koslich khunna tankam mellchina.” Hem sangon to tankam thoinch soddun fuddem gelo.

5 Xis poltoddi voitana aplea borabor undde gheun vochonk visorle. 6 Jezun tankam mhunnttlem: “Farizevanchea ani Sadukinchea khomira thaun zagrut ravonk tumche dolle ukte dovrat.” 7 Tednam te eka-mekak mhunnonk lagle: “Ami amchea sangata undde gheun ieunk nant.” 8 Hem aikon Jezun mhunnttlem: “Are, unnea bhavarthachea munxamno, tumchea lagim undde nant mhunn tumi tumchea modem kiteak uloitat? 9 Tumkam azunui somzonk na? Panch unddeam vorvim 5,000 lok jevlo ani urlolea unddeancheo tumi kitleo panttleo bhorleo tem tumkam ugddas na? 10 Sat unddeam vorvim 4,000 zann jevle ani urlolea unddeancheo tumi kitleo panttleo* bhorleo tem tumkam ugddas na? 11 Tor hanv unddea vixim ulounk na mhunn tumkam koxem somzolem na? Hanvem tumkam Farizevanchea ani Sadukinchea khomira thaun zagrut ravonk sanglam.” 12 Tednam Jezu unddeachea khomira vixim uloinaslo punn Farizevanchea ani Sadukinchea xikounne thaun zagrut ravonk sangta mhunn tankam somzolem.

13 Jezu Sezaria Filipichea vattarant ailo tednam tannem aplea xisank vicharlem: “Munxachea Puta vixim lok kitem mhunnttat?” 14 Tannim mhunnttlem: “Thodde mhunnttat Juanv Batist, anik thodde mhunnttat Elija, ani dusre thodde mhunnttat Jeremias vo provadeam modlo eklo.” 15 Jezun tankam vicharlem: “Punn tumkam kitem dista, hanv konn?” 16 Simanv Pedrun zobab diun mhunnttlem: “Tum Krist, jivea Devacho Put.” 17 Jezun taka mhunnttlem: “Simanv, Jonasachea puta, tum khuxal, karonn khoinchea-i munxachea* modotin nhoi, punn sorginchea Bapachea modotin tum hem somzonk pavlo. 18 Hanv tuka sangtam, tum Pedru, ani hanv hea khoddpar mhoji sobha bandtolom, ani mornnache* darvontte pasun ticher* zoit vhoronk pavchenant. 19 Hanv tuka sorginchea Rajeacheo chavio ditolom. Tum prithumer jem bandtolo tem sorgar poilinch bandlolem astolem, ani tum prithumer jem soddoitolo tem sorgar poilinch soddoilʼlem astolem.” 20 Uprant, apunn Krist mhunn konnank sangonakat oso tannem aplea xisank koddok utramnim hukum dilo.

21 Tednam thaun Jezu aplea xisank sangonk laglo ki taka Jeruzalemant voichem poddttolem ani thoim vhoddilam koddlean, mukhel iadnikam koddlean, ani xastream koddlean dhumallo sosunk poddttolo. Thoim taka jivexim martole ani tisrea disa Dev taka jivont kortolo. 22 Tednam Pedrun Jezuk kuxin vhoron koddok utramnim oxem mhunnttlem: “Somia, toxem mhunno naka, tuka oxem kednanch zaunchem na.” 23 Punn tannem Pedruk fatt korun mhunnttlem: “Mhojea mukha voilo kuxin sor,* Soitana. Tum mhojea mukhar addkholl koxi zaun asa, karonn tujem chintop Deva bhaxen nhoi punn munxam bhaxen asa.”

24 Magir Jezun aplea xisank mhunnttlem: “Konnui mhojea fattlean ieunk sodhta zalear, tannem apnnakuch nakarun* aplo trasancho khambo* ukolcho ani mhojea fattlean cholot ravchem. 25 Zo aplo jiv vachounk proitn korta to aplo jiv hogddaitolo, punn zo mhojea pasot aplo jiv hogddaita to aplo jiv vachoitolo. 26 Khorench, eka munxan akʼkho sonvsar jikhun ghetlo punn aplo jiv hogddailo zalear kitem faido? Vo ek munis aplea jivachea bodlek kitem diunk xokta? 27 Karonn, munxacho Put Bapachea mhoiment aplea dutam sangata ietolo tednam to dor ekleak tachea vagnnuke pormonnem inam ditolo. 28 Hanv tumkam khorench sangtam, hanga ube asloleam modem thodde oxe asat je munxacho Put aplea Rajeant ieta to polloilea bogor morche nant.”

17 Sov disam uprant Jezu Pedruk, Jakobak ani tacho bhav Juanvak, aplea sangata eka unch dongrar gheun gelo. Tanchea bogor thoim anik konn naslo. 2 Tanchea mukhar Jezuchem rup bodolʼlem; tachem tondd suria sarkem chokchoktalem, ani tache kopdde uzvadda sarke porzollttale. 3 Tednam okosmat tankam thoim Moizes ani Elija disle. Te dogui Jezu lagim uloitale. 4 Pedrun Jezuk mhunnttlem: “Somia, amkam hanga ieun khub borem dislem. Tuka zai zalear hanv hanga tin tombu bandtam, ek tuka, ek Moizesak, ani ek Elijak.” 5 To uloita astanach ek porzollit kup tancher ailem, ani tea kupantlean oso avaz ailo: “Ho mhozo opurbaiecho Put, to mhaka manvola. Tachem aikat.” 6 Hem aikon xis khub bhiele ani umte poddle. 7 Tednam Jezu tanchea lagim ailo ani tankam hat laun mhunnttlem: “Utthat. Bhienakat.” 8 Tannim voir polloilem tednam thoim fokot Jezu aslo, anik konn naslo. 9 Te dongra voilean sokol denvtale tednam Jezun tankam hukum dilo: “Munxacho Put meloleantlo jivont zaina tea meren hea dorxona vixim konnankuch sangonakat.”

10 Punn xisamnim taka vicharlem: “Toxem zalear Elijan poilim ieunk zai oxem xastri kiteak mhunnttat?” 11 Tankam zobab diun Jezun mhunnttlem: “Elija khorench ieta, ani to soglem asonk zai toxem kortolo. 12 Hanv tumkam sangtam Elija ailo ani tannim taka vollkhonk na. Punn tankam zai toxem tannim tachea thaim kelem. Teach bhaxen, munxacho Put pasun tanchea koddlean zaite tras sostolo.” 13 Tednam to Juanv Batista vixim uloitalo mhunn xisank kollʼllem.

14 Te lokam lagim ailea uprant, ek munis Jezu lagim ailo ani dimi ghalun mhunnonk laglo: 15 “Somia, mhojea putachi kakut kor, taka moddnnem* marta ani tea khatir taka khub tras zatat. Thodde pavtti to ujeant poddtta ani thodde pavtti to udkant poddtta. 16 Hanv taka tujea xisam lagim gheun ailolom, punn te taka bore korunk xoklenant.” 17 Tednam Jezun mhunnttlem: “Onbhavarthi ani patki pillge, kitlo temp poriant hanv tumchea borabor ravom? Kitlo temp hanv tumkam sosum? Taka mhojea lagim gheun ieiat.” 18 Tednam tea cheddeacher boslolea noxttea dutak Jezun koddok utramnim hukum dilo, ani to tachea voilean bhair soron gelo. Teach vellar to cheddo boro zalo. 19 Uprant Jezu ekloch aslo tednam xisamnim tachea lagim ieun vicharlem: “Ami tea noxttea dutak kiteak kaddunk xokle nant?” 20 Jezun tankam mhunnttlem: “Tumchea unnea bhavarthak lagon. Hanv tumkam khorench sangtam, tumkam sansvachea konna itlo bhavarth asa zalear tumi hea dongrak, ‘Hanga thaun thoim voch’ mhunn sangtole ani to voitolo ani tumchean korunk zaina toslem kainch aschem na.” 21* ——

22 Jezu ani tache xis Galilient ektthaim asle tednam tannem tankam mhunnttlem: “Munxachea Putacho visvasghat kortole ani taka dhorun lokanchea hatant ditole. 23 Te taka marun uddoitole, ani tisrea disa Dev taka jivont kortolo.” Hem aikon te khub dukhi zale.

24 Te Kapernaumant pavlea uprant Devmondiracho tax* vosul kortale te munis Pedru lagim aile. Tannim Pedruk mhunnttlem: “Tumcho guruji Devmondiracho tax farik korina kai?” 25 Tannem mhunnttlem: “Hoi, farik korta.” Punn Pedru ghorant gelo tednam to kitem-i ulounchea poilinch Jezun taka vicharlem: “Simanv, tuka kitem dista? Sonvsarache raza veg-vegllea toreche tax konnam koddlean ghetat? Aplea putam koddlean vo heram koddlean?” 26 Tannem zobab dilo: “Heram koddlean.” Tednam Jezun mhunnttlem: “Hacho orth, putank tax bhorpachi goroz na. 27 Punn te amkam lagon addkhollna zaunk, tum doria deger voch ani gori ghal. Goriek lagta tea poileach nusteachem tondd ugoddlear tantunt tuka ek chandicho nanno* mellttolo. To tankam diun mhojea ani tujea pasot tax bhor.”

18 Tednam xisamnim ieun Jezu lagim vicharlem: “Sorginchea Rajeant sogleant vhoddlo konn astolo?” 2 Jezun eka lhan bhurgeak aplea lagim apoilo ani taka tanchea modem ubo kelo 3 ani mhunnttlem: “Hanv tumkam khorench sangtam, jea meren tumi svotak bodlun* hea lhan bhurgea bhaxen zainant, tea meren tumi sorginchea Rajeant koxech bhitor soronk pavche nant. 4 Taka lagon zo konn hea lhan bhurgea bhaxen apunn khalto zatolo to sorginchea Rajeant sogleant vhodd astolo; 5 Zo konn mhojea nanvan oslea eka lhan bhurgeak ieukar dita to mhaka pasun ieukar dita. 6 Punn zo konn mhojer bhavarth dovorta toslea lhanam modlea ekleak addkhollon poddom-so korta,* tachea golleant gaddum ghunvddaita to danteacho fator bandun taka khol doriant buddoilear chodd borem zatolem.

7 “Hea sonvsarak lagon dusrim patkant poddttat dekhun hea sonvsarachi poristhiti khub vaitt zatoli! Patok korunk uksaita tosleo vostu* astoleoch, punn jea munxak lagon dusrim patkant poddttat tea munxachi poristhiti ekdom vaitt zatoli. 8 Zor tuzo hat vo paim tuka patkant* uddoita zalear to katrun bhair uddoi. Karonn tuje donui hat vo donui paim-am sangata, tuka sasnak zolltta tea ujeant uddoilʼlea poros ekuch hat vo ekuch paim ason jivit inam mhunn mellʼllear odik borem. 9 Zor tuzo dollo tuka patkant uddoita zalear to umttun kadd ani bhair uddoi. Tuka donui dolle ason Gehenʼnant* uddoilʼlea poros ek dollo ason jivit inam mhunn mellʼllear odik borem. 10 Chotrai dhorat, hea dhaktteam modlo konnuch valoracho na mhunn lekhcho nhoi, karonn tanche dut mhojea sorginchea Bapa mukhar sodanch ube astat. 11 *——

12 “Tumkam kitem dista? Zor eka munxa lagim 100 menddram asat, punn tantuntlem ek sanddlear, to 99 menddrank dongrar soddun sanddlam tea menddrak sodhunk voichona kai? 13 Ani tem taka mellot zalear hanv tumkam khorench sangtam, to sanddonk na tea 99 menddram poros tea eka menddrak lagon chodd khuxal zatolo. 14 Teach bhaxen, mhojea* sorginchea Bapak hea lhanantlea ekleacho pasun nas zalʼlo naka.

15 “Tuzo bhav patok korta zalear ekttoch vochon tachea lagim uloi ani tachea chuki vixim taka sang.* Tannem tujem aikolem zalear tunvem tujea bhavak zhoddun ghetlo. 16 Punn to tujem aikona zalear, tum tujea borabor ekleak vo dog zannank gheun voch ani tachea lagim uloi, jea udexim don vo tin sakxeanchea govaikechea adaran* dor ek vixoi suttavo zatolo. 17 Punn to tanchem aikona zalear sobhek sang. Ani to sobhechem-i aikona zalear to tuka Judev nhoi toslea munxa sarko ani tax vosul korpeam sarko zatolo.

18 “Hanv tumkam khorench sangtam, tum jem prithumer bandtolo tem sorgar poilinch bandlolem astolem, ani tum jem prithumer soddoitolo tem sorgar poilinch soddoilʼlem astolem. 19 Hanv tumkam khorench sangtam, tumchea modem dog zannam koslea-i gorjechea vixoi-acher eka monan vinoti korit zalear mhozo sorgincho Bap tankam magta tem ditolo. 20 Karonn jea zagear don vo tin zann mhojea nanvan ektthaim zatat tanchea modem hanv-ui astam.”

21 Tea uprant Pedrun Jezu lagim vochon vicharlem: “Somia, mhozo bhav mhojea add patok korit asa zalear kitlea pavtti hanvem taka bhogxicho? Sat pavtti?” 22 Jezun taka mhunnttlem: “Hanv tuka sangtam, sat pavtti nhoi punn 77 pavtti.

23 “Sorginchem Raj oslea eka raza sarkem asa zo aplea sevokam koddlean hixob gheunk sodhtalo. 24 Tannem hixob gheunk suru kelo tednam tachea mukhar oslea eka sevokak haddlo zo taka 10,000 talent* rinn farik korcho aslo. 25 Punn tachea lagim rinn farik korunk kainch naslem. Tea pasot tachea dhonian taka, tachea bail-bhurgeank ani tachea lagim asa tem soglem vikun rinn farik kor mhunn hukum dilo. 26 Tednam tea sevokan aplea dhoniak paim poddon vinoti keli, ‘mhaka anik thoddo vell di. Hanv tuzo ekan-ek poiso farik kortolom.’ 27 Tednam tea dhoniak tea sevokachem churchurem dislem. Tannem tea sevokachem soglem rinn bhogxilem ani taka vochonk dilem. 28 Punn bhair sorlea uprant, tea sevokan aplea boraborchea anik eka sevokak sodhun kaddlo, zo taka 100 dinar* rinn farik korcho aslo. Tannem tachea golleak dhorlo ani mhunnttlem, ‘Tunvem mhojea koddlean ghetlam tem rinn farik kor.’ 29 Tednam tachea boraborcho sevok tachea paim poddon taka vinoti korunk laglo, ‘Mhaka anik thoddo vell di. Hanv tujem soglem rinn farik kortolom.’ 30 Punn tannem tachem matui aikonk na. Tachea bodlek, rinn farik kori poriant tannem taka bondkhonnint ghatlo. 31 Tachea boraborchea dusrea sevokamnim hem soglem polloilem tednam tankam khub dukh zalem. Tannim aplea dhoniak vochon ghoddlolem tem soglem sanglem. 32 Tednam dhonian tea poilea sevokak apoilo ani taka mhunnttlem: ‘Are noxttea, tum mhaka paim-am poddlo tednam hanvem tujem soglem rinn bhogxilem. 33 Hanvem tuji kakut keli toxi tunvem-i tujea boraborchea sevokachi kakut korunk zai asli nhoi?’ 34 Dhoniak tacho boroch rag ailo, ani tachem soglem rinn farik kori poriant tannem taka bondkhonnint ghatlo. 35 Zor tumchea modlea dor eklean aplea bhavak kallzant thaun bhogxilona zalear mhozo sorgincho Bap pasun tumkam bhogxichona.”

19 Jezuchem uloun somplea uprant to Galili thaun bhair sorlo ani Jordan nhoim-chea poltoddi Judeia vattarachea xime lagim ailo. 2 Zaite lok tachea fattlean aile ani tannem tankam bore kele.

3 Farizev Jezuchi porikxa gheunk tachea lagim aile ani tannim tachea lagim vicharlem: “Koslea-i karonnak lagon ek munis aplea bailek divors diunk xokta kai?” 4 Jezun tankam zobab diun mhunnttlem: “Tumi vachunk na kai, ki rochnnaran survatek thaun tankam dadlo ani bail mhunn rochlim 5 ani mhunnttlem: ‘Hea karonnak lagon dadlo aplea bapaik ani aplea avoik soddttolo, ani aplea bailek ektthovtolo ani tim dogaim ek kudd zatolim’? 6 Tor tim don nhoi punn ek kudd. Taka lagon Devan jem zoddlam tem khoincheach munxan moddchem nhoi.”* 7 Farizevamnim taka mhunnttlem: “Tor eka munxan aplea bailek divors potr diun soddunk zata oxem Moizesan kiteak mhunnttlem?” 8 Jezun tankam mhunnttlem: “Tumchea nibor kallzak lagon Moizesan tumkam tumchea bailank divors diunk porvangi dilʼli, punn survatek thaun toxem naslem. 9 Hanv tumkam sangtam, konnui munis aplea bailek onoitik kuddicho sombond,* hea karonna xivai dusrea karonnak lagon divors dita ani dusrea lagim kazar zata zalear, to pordvar* korta.”

10 Xisamnim taka mhunnttlem: “Ghov-baile modem zor oslem natem asa tor kazar zainastana ravlear odik borem.” 11 Jezun tankam mhunnttlem: “Hanv jem tumkam sangtam tem sogleanchean korunk zaina. Fokot Devan zankam hem dennem dilam tanninch hem korunk zata. 12 Karonn thodde zann avoichea kusvea thaunuch hizdde* zolmolʼle, thoddea zannank lokamnim hizdde kele, ani thoddea zannamnim sorginchea Rajea khatir apleakuch hizdde korun ghetle. Jim konn Rajea khatir kazar zainastana ravonk xoktat tannim ravchem.”

13 Jezun lhan bhurgeancher aple hat dovorche ani tanchea pasot magnnem korchem mhunn lokamnim tankam Jezu lagim haddlim, punn xisamnim tankam tapoile. 14 Jezun tankam mhunnttlem: “Lhan bhurgeank mhojea lagim ieunk di. Tankam addauncho proitn korinakat, karonn sorginchem Raj osleanchem zatolem.” 15 Tannem tancher aple hat dovorle ani uprant to thoim thaun gelo.

16 Titleanuch, konn eklo tachea lagim ailo ani oxem vicharunk laglo: “Guruji, sasnik jivit melloun gheunk hanvem khoinchem borem kam korunk zai?” 17 Jezun taka mhunnttlem: “Borem kam khoinchem hem tum mhaka kiteak vicharta? Boro to ekloch asa. Zor tum jivit melloun gheunk sodhta zalear adnea pallit rav.” 18 Tea munxan vicharlem: “Khoincheo adnea?” Jezun taka sanglem: “Tunvem jivexim marchem nhoi, tunvem pordvar korcho nhoi, tunvem chori korchi nhoi, tunvem khotti govai diunchi nhoi, 19 tujea bapaik ani tujea avoik man di, ani tuzo mog korta toso tujea xezareacho mog kor.” 20 Tea tornnattea munxan taka oxem mhunnttlem: “Heo sogleo adnea hanv adim thaun pallit ailam; mhojea bhitor azun kitem unnem asa?” 21 Jezun taka mhunnttlem: “Tujea bhitor kainch unnemponn urlolem tuka naka zalear,* voch ani tujea lagim asa titlem-i vik ani goribank di, karonn sorgar tuka thevo mellttolo, ani ieun mhozo xis zav.” 22 Punn hem aikotoch to tornnatto dukhi zaun gelo, karonn tachea lagim zaiti girestkai asli. 23 Tednam Jezun aplea xisank mhunnttlem: “Hanv tumkam khorench sangtam ki eka girest munxak sorginchea Rajeant bhitor soronk kotthin zatolem. 24 Hanv tumkam porot sangtam, eka girest munxak Devachea Rajeant bhitor sorchea poros eka unttak suiechea burkantlean vochonk sompem zatolem.”

25 Hem aikon xis ekdom ojap zale, ani tannim mhunnttlem: “Toxem zalear, konnank mhunn taronn mellttolem?” 26 Jezun tancher nodor marun mhunnttlem: “Munxam lagim hem korunk zaina, punn Deva lagim soglem korunk zata.”

27 Tednam Pedrun taka mhunnttlem: “Polloi! Ami soglem soddun tujea fattlean aileat; tor amkam kitem mellttolem?” 28 Jezun tankam mhunnttlem: “Hanv tumkam khorench sangtam, jednam soglem novem zatolem* ani munxacho Put aplea mhoimechea xinvasonar bostolo tednam mhojea fattlean ietat te tumi 12 xinvasonacher bostole ani Izraelachea 12 kullancho neai kortole. 29 Ani jea konnem mhojea nanva pasot ghoram vo bhav vo bhoinno vo avoi vo bapui vo bhurgim vo bhattam-bensam soddun dileant zalear tankam xembor pavtti chodd mellttolem ani sasnik jivit daiz mhunn mellttolem.

30 “Toripunn zaitim zannam poilim asat tim nimannim zatolim ani nimannim asat tim poilim zatolim.

20 “Tor sorginchem Raj eka bhattkara bhaxen asa zachea lagim drakxancho mollo aslo. To sokallim fantear utthon aplea molleant disvoddear kam korunk manai sodhunk bhair sorlo. 2 To manaiank disvoddeak ek dinar* farik korunk toiar zalo ani tannem tankam aplea molleant dhaddle. 3 Uprant sokallim sumar nnov vorancher* to porot bhair sorlo ani tannem polloilem ki bazarachea nakear thodde manai azunui ube asat, zankam kam mellonk naslem. 4 Bhattkaran tankam mhunnttlem, ‘Tumi-i mhojea molleant vochat ani tumkam favo tea pormonnem hanv farik kortolom.’ 5 Tednam te molleant gele. To bhattkar donparam sumar bara vorancher* ani sumar tin vorancher* porot bhair sorlo ani tannem toxench kelem. 6 Xevottak sanjer sumar panch vorancher,* to porot bhair sorlo ani nakear azunui thodde manai ube asat te tannem polloilem. Tednam bhattkaran tankam mhunnttlem, ‘Tumi dis bhor hanga bekar kiteak ravleat?’ 7 Tannim mhunnttlem, ‘Amkam konnench kamak apounk nant.’ Tednam bhattkaran mhunnttlem, ‘Tumi-i mhojea molleant vochat.’

8 “Sanz zatoch, bhattkaran aplea kamachi dekhrekh kortolea munxak mhunnttlem, ‘Manaiank apoi ani tankam sogleank tanchea disvoddea pormonnem farik kor, nimanne aileat tankam poilim ani poilim aileat tankam nimannem farik kor.’ 9 Sanjer sumar panch vorancher kamank laglole manai aile tednam, tantuntlea dor ekleak ek dinar* mellʼllo. 10 Tor poilim ailʼle manai aplo disvoddo gheunk aile tednam apleak chodd disvoddo mellttolo oxem tankam dislem, punn tankam-i ekuch dinar* mellʼllo. 11 Ek dinar* mellʼllo tednam te bhattkaracher gunngunnon mhunnonk lagle, 12 ‘Nimanne aileat tannim fokot ekuch vor kam kelam; tori astana tunvem tankam amchea sarkech lekhle, punn ami hanga akʼkho dis khor votant vavr kela!’ 13 Tednam bhattkaran tanchea modlea ekleak mhunnttlem, ‘Polloi ixtta, hanvem tuka kainch onit korunk na. Tum mhojea pasot ek dinarak* akʼkho dis kam korunk toiar zalʼlo nhoi? 14 Tor tuzo disvoddo ghe ani voch. Tuka dila titloch disvoddo hanv nimanne aileat tankam-i diunk sodhtam. 15 Mhoje poixe zai toxe uzar korunk mhaka odhikar na kai? Vo hanv borem kortam* tem polloun tuka* nattkai zata?’ 16 Hea toren jim nimannim aileant tim poilim zatolim, ani jim poilim aileant tim nimannim zatolim.”

17 Jeruzalemant voita astana Jezun aplea 12 xisank kuxin vhele ani mhunnttlem, 18 “Polloiat! Ami Jeruzalemant voitat, ani munxachea Putak mukhel iadnikanchea ani xastreanchea hatant ditole. Te tacher mornnachem formonn martole 19 ani taka Judev nhoi toslea lokanchea hatant ghaltole. Te tachim fokannam kortole, taka chabkamnim martole, ani khambear* marun tacho jiv kaddttole; uprant tisrea disa Dev taka jivont kortolo.”

20 Uprant Zebedevachi bail aplea donui putank gheun Jezu lagim aili ani tinnem taka bagon nomoskar kelo. Ti tachea lagim kitem tori magonk sodhtali. 21 Jezun tika vicharlem, “Tuka kitem zai?” Tinnem mhunnttlem, “Tujea Rajeant mhoje he dogui put, eklo tujea uzveak ani dusro tujea daveak bostolo mhunn mhaka utor di.” 22 Jezun mhunnttlem, “Tumi mhojea lagim kitem magtat tem tumkam khoborna. Hanv pieuncho asa tea peleantlem tumchean pieunk zatolem kai?” Tannim mhunnttlem, “Amchean pieunk zatolem.” 23 Jezun tankam mhunnttlem, “Tumi mhojea peleantlem pietole tem khorem, punn tumkam mhojea uzveak vo daveak bosouncho odhikar mhaka na, punn ho zago Bapan zanchea pasot toiar korun dovorla tanchea pasot asa.”

24 Urlolea dha zannamnim hem aikolem tednam tankam hea donui bhavancho khub rag ailo. 25 Punn Jezun aplea xisank aplea lagim apoile ani mhunnttlem, “Sonvsarache odhikari lokancher aplo hukum choloitat ani vhoddlea podvecher asat te tea lokank aplea odhikara khala dovortat. 26 Punn tumchea modem oxem zaunk zaina; tachea bodlek tumchea modlo zo konn vhoddlo zaunk sodhta tannem tumcho sevok zauncho; 27 ani tumchea modlo zo poilo zaunk sodhta tannem tumcho chakor zauncho. 28 Munxacho Put seva korun gheunk nhoi, punn seva korunk aila ani aplo jiv bolidan korun zaitea zannam pasot soddvonn diunk* aila.”

29 Te Jeriko thaun bhair voitale tednam lokancho ek vhoddlo zomo Jezuchea fattlean ieunk laglo. 30 Don kuddʼdde rosteachea kuxik boson aslole. Jezu tea vatten voita mhunn tannim aikolem tednam te mottʼttean bob marunk lagle, “Somia, Davidachea Puta, amchi kakut kor!” 31 Punn lokamnim tankam tapoun vogi ravat mhunn sanglem; tori astana te anik mottʼttean bob marunk lagle, “Somia, Davidachea Puta, amchi kakut kor!” 32 Jezu ravlo ani tankam apoun tannem mhunnttlem, “Hanvem tumchea pasot kitem kelʼlem tumkam zai?” 33 Tannim mhunnttlem, “Somia, amchi dixtt amkam porot mello-xi kor.” 34 Hem polloun Jezuk tanchem churchurem dislem ani tannem tanchea dolleank hat lailo. Tednam rokddich tachea dolleanchi dixtt porot aili, ani te tachea fattlean gele.

21 Te Jeruzalemachea lagim Zoitunanchea Dongrar aslolea Bethfage ganvant pavle tednam Jezun aplea don xisank oxem sangon dhaddle: 2 “Tumkam dixtti poddtta tea ganvant vochat. Thoim pavtanch tumkam ek gaddum ani tachem por bandlolem mellttolem. Tankam soddoun mhojea lagim gheun ieiat. 3 Ani konnui tumkam kitem-i mhunnot zalear, ‘Somiak hanchi goroz asa,’ mhunn sangat. Ani tednam to rokddoch tankam vhoronk ditolo.”

4 Provadea udexim sanglolim utram purnn zaunk lagon hem soglem ghoddlem. Tannem mhunnttlolem: 5 “Sionachea dhuvek sang: ‘Polloi! Tuzo raza tujea lagim ieta, to movall kallzacho ani eka gaddvacher, hoi, vojem vhorta toslea gaddvachea poracher boson ieta.’”

6 Xis bhair sorle ani Jezun sanglolem toxench tannim kelem. 7 Te tea gaddvak ani tachea porak gheun aile, ani tannim tancher aple kopdde ghatle ani to tancher* boslo. 8 Thoim aslolea lokam modlea zaiteamnim aple kopdde rostear patllaile, ani dusre lok zhaddache lhan khande moddun rostear posraunk lagle. 9 Tachea fuddem choltale ani fattlean ietale te lok mottʼttean oxem mhunnttale: “Ami vinoti kortat, Davidachea Putak salvar kor! Jehovachea* nanvan ieta tacher besanv asum! Sorginchea Deva, ami tujea lagim vinoti kortat, taka salvar kor!”

10 To Jeruzalemant ailo tednam akʼkhem xar uchamboll zalem, ani sogle lok mhunnonk lagle: “Ho konn kai?” 11 Tednam tanchea modlea lokamnim mhunnttlem: “Ho Galiliechea Nazaretant ravpi provadi Jezu!”

12 Uprant Jezu Devmondirant gelo. Je lok Devmondirant viktale ani viktem ghetale tankam sogleank tannem dhanvddaun ghatle. Toxench, poixe bodoltale tanchim mezam ani parve viktale tanche bank tannem umte uddoile. 13 Tannem tankam mhunnttlem: “Oxem boroilʼlem asa, ‘Mhojea ghorak magnneachem ghor mhunnttole,’ punn tumi taka choranchi dhol kortat.” 14 Magir Devmondirant tachea lagim kuddʼdde ani longdde lok aile, ani tannem tankam bore kele.

15 Mukhel iadnikamnim ani xastreamnim tannem kelʼlim ojapachim kamam polloilim ani Devmondirant chedde oxem mhunnon bob martale tem aikolem, “Ami vinoti kortat, Davidachea Putak salvar kor!” Tednam te khub ragar zale 16 ani tannim taka mhunnttlem: “He kitem mhunnttat tem tunvem aikolam?” Jezun tankam mhunnttlem: “Hoi. ‘Lhan bhurgeanchea ani dudh pietat toslea bhurgeanchea tonddantlean tunvem vakhannʼnni korunk lailea,’ hem tumi kednanch vachunk na?” 17 Magir to tankam thoinch soddun Jeruzalema bhair Bethanient gelo ani tannem thoinch rat sarli.

18 Sokallim fuddem Jeruzalemant porot ietana taka bhuk lagli. 19 Rosteachea kuxik aslolea eka anjirachea zhaddacher tachi nodor poddli ani to tachea fuddeant gelo. Punn tea zhaddak panam soddun anik kainch naslem. Tednam tannem tea zhaddak mhunnttlem: “Hea fuddem kednanch tuka foll zaunchem nhoi.” Ani tem anjirachem zhadd teach vellar sukon gelem. 20 Hem polloun xisank ojap dislem ani tannim mhunnttlem: “Hem anjirachem zhadd rokddench koxem suklem?” 21 Jezun tankam mhunnttlem: “Hanv tumkam khorench sangtam, zor tumkam bhavarth asa ani tumi dubhavnant zalear tumi fokot hanvem anjirachea zhaddak kelam titlench korchenant punn tumi hea dongrak, ‘Hanga thaun umttun doriant vochon podd,’ oxem pasun sanglem zalear toxem zatolem. 22 Ani bhavarth dovrun tumi magnneant jem kitem magtole tem tumkam mellttolem.”

23 To Devmondirant vochon xikoitalo tednam mukhel iadnik ani lokanche vhoddil tachea lagim aile ani tannim mhunnttlem: “Tum hem soglem khoinchea odhikaran korta? Ani ho odhikar tuka konnem dila?” 24 Jezun tankam mhunnttlem: “Hanv-ui tumkam ek prosn vicharunk sodhtam. Tumi mhaka tacho zobab dilo zalear hanv hem soglem khoinchea odhikaran kortam tem tumkam sangtolom: 25 Juanv ditalo to bautizm konnam thaun aslo? Sorgar thaun vo munxa thaun?” Te eka-mekak mhunnonk lagle: “Zor ami mhunnttlem, ‘Sorgar thaun,’ tor to amkam mhunnttolo, ‘Toxem zalear tumi tacher visvas kiteak dovrunk na?’ 26 Punn ami zor mhunnttlem, ‘Munxa thaun,’ zalear he lok amchem kitem korit tem sangonk zaina, karonn he sogle Juanv Batistak ek provadi mhunn mantat.” 27 Taka lagon tannim Jezuk zobab dilo: “Ami nokllo.” Tednam Jezun mhunnttlem: “Toxem zalear, hem soglem hanv khoinchea odhikaran kortam tem hanv-ui tumkam sangchom na.

28 “Tumkam kitem dista? Eka munxak don put asle. Tannem poilea putak vochon mhunnttlem, ‘Puta, aiz vochon drakxanchea molleant kam kor.’ 29 Tednam tea putan mhunnttlem, ‘Hanv voichom na,’ punn magir taka vaitt dislem ani to gelo. 30 Uprant to bapui dusrea puta lagim gelo ani tannem taka tench sanglem. Tea putan bapaik sanglem, ‘Borem, hanv voitolom,’ punn magir to vochonk na. 31 Hea donui putam modlea konnem aplea bapaichi khuxi keli?” Tannim mhunnttlem: “Poilea.” Jezun tankam mhunnttlem: “Hanv tumkam khorench sangtam, tax vosul korpi ani xindoll bailo tumchea poilim Devachea Rajeant bhitor sortat. 32 Karonn Juanv Batist sarki vatt* dakhounk tumchea lagim ailo, tori astana tumi tacher visvas dovrunk na. Punn tax vosul korpeamnim ani xindoll bailamnim tacher visvas dovorlo. Hem soglem polloun pasun tumkam matui dukh zaunk na, ani tumi tacher visvas dovrunk na.

33 “Anik ek vopar aikat: Ek bhattkar aslo, tannem drakxancho mollo lailo ani tachea sorvbhonvti voi bandli. Toxench, tannem drakxam maddounk lagon khonnon ek zago toiar kelo ani to mollo rakhonk ek gopur bandlo. Uprant tannem aplo drakxancho mollo xetkareank bhaddeak* dilo ani to pordesant gelo. 34 Pikecho vell ailo tednam aplo vantto magonk tannem aplea sevokank xetkaream koddem dhaddle. 35 Punn xetkareamnim tachea sevokank dhorle ani ekleak bhorpur marlo, dusreak jivexim marlo, ani tisreak fatramnim marun uddoilo. 36 Uprant bhattkaran poilim poros chodd sevokank dhaddle, punn tea xetkareamnim tankam-i toxench kelem. 37 Xevottak, tannem aplea putak oxem chintun tanche koddem dhaddlo, ‘Te mhojea putak tori man ditole.’ 38 Xetkareamnim tachea putak polloilo tednam te eka-mekak mhunnonk lagle, ‘Ho hea drakxanchea molleacho daiji. Ami taka marun uddoum-ia ani tachem daiz amchem zatolem!’ 39 Tor tannim taka dhorlo ani molleachea bhair vhoron jivexim marun uddoilo. 40 Atam, drakxanchea molleacho bhattkar ietolo tednam to hea xetkareanchem kitem kortolo?” 41 Tannim mhunnttlem: “Te noxtte asat dekhun to tancho samko nas korun uddoitolo ani aplo mollo dusrea xetkareank bhaddeak ditolo, je pikechea vellar taka tacho vantto ditole.”

42 Jezun tankam mhunnttlem: “‘Bandkam korpeamnim zo fator nakarlo, toch konnxeacho mukhel fator zalo. Hem Jehovan* ghoddoun haddlem ani amchea nodren ojapachem asa.’ Hem tumi Devachea utrant kednanch vachunk na? 43 Dekhun hanv tumkam sangtam, Devachem Raj tumchea thaun kaddun ghetole ani tea Rajeak favo toslim follam ditat tea raxttrak tem ditole. 44 Zo konn hea fatracher poddtta, tache kuddkean-kuddke zatole. Ani jea konnancher ho fator poddtta, tacho churo zatolo.”

45 Mukhel iadnikamnim ani Farizevamnim tacheo vopareo aikoleo tednam to tancheach vixim uloita mhunn te somzole. 46 Khorem mhunnttlear, te taka dhorun vhoronk sodhtale punn lokank bhietale, karonn lok Jezuk ek provadi mhunn mantale.

22 Jezu anik ek pavtt tanchea lagim vopareamnim uloilo. Tannem mhunnttlem: 2 “Sorginchem Raj eka oslea raza sarkem asa zannem aplea putachea kazarachem jevonn dovorlem. 3 Kazarachea jevnnak amontronn dilʼlea lokank apounk tannem aplea sevokank dhaddle, punn te ieunk toiar nasle. 4 Uprant porot razan anik thoddea sevokank oxem sangon dhaddle, ‘Amontronn dilam tea lokank oxem sangat: “Jevonn toiar zalem, mhoje boil ani mottim-mottim zonvaram hanvem marlim. Soglem toiar asa. Tumi kazarachea jevnnak ieiat.”’ 5 Punn tannim matui dhean diunk na. Te ap-aplea vattek lagle, thodde aplea xetant gele, ani thodde aplea kam-dhondeak gele; 6 ani urloleamnim tachea sevokank dhorle, tanchea lagim vaitt toren vagle ani tankam marun uddoile.

7 “Tednam razak khub rag ailo ani tannem aplea soinikank dhaddun tea khun korpeank jivexim marun uddoile ani tanchim xaram lasun uddoilim. 8 Tea uprant tannem aplea sevokank mhunnttlem, ‘Kazarachem jevonn toiar asa, punn zankam jevnnak apoilʼle te purte nant. 9 Dekhun xarantlea mukhel rosteancher vochat ani thoim je konn mellttat tankam kazarachea jevnnak apoun haddat.’ 10 Tednam te sevok rostear gele ani tankam je konn bore vo vaitt mellʼlle tankam sogleank gheun aile; ani jea zagear kazaracheo riti-rivazo zauncheo asleo to zago kazarachea jevnnak ailolea lokamnim bhorlo.

11 “Raza jevnnak ailolea lokank pollounk bhitor ailo tednam, tachi nodor eka oslea munxacher poddli zannem kazarache kopdde ghalunk nasle. 12 Tednam tannem mhunnttlem, ‘Kazarache kopdde ghalinastana tum bhitor koso ailo?’ Hacho to munis kainch zobab diunk xoklona. 13 Tednam razan aplea sevokank sanglem, ‘Hache hat-paim bandun taka bhair kallkhant uddoiat. Thoim to roddttolo ani aple dant korkoraitolo.’

14 “Karonn amontronn khub lokank mellʼllam, punn vinchun kaddlole thoddech asat.”

15 Tea uprant Farizev gele ani Jezuk tacheach utramnim koso fosounk mellttolo tea vixim te eka-meka lagim ulounk lagle. 16 Taka lagon tannim aplea xisank Herodachea pokxachea lokam borabor Jezu koddem dhaddle. Tannim Jezuk mhunnttlem: “Guruji, ami zannant ki tum sota pormonnem cholta, ani tum sota pormonnem Devachi vatt xikoita. Tum munxam koddlean favor zoddun gheuncho proitn korina, karonn tum lokanchim tonddam polloun uloina. 17 Tor amkam sang, Somrazak* tax farik korop sarkem vo na? Tuka kitem dista?” 18 Tancho hetu vaitt aslo mhunn Jezuk kollʼllem ani tannem tankam mhunnttlem: “Are dhongeamno, tumi mhoji porikxa kiteak kortat? 19 Mhaka tax-acho ek nanno dakhoiat.” Tednam te tachea lagim ek dinar* gheun aile. 20 Jezun tankam vicharlem: “Hacher konnanchem chitr ani konnancho chhap marlolo asa?” 21 Tannim mhunnttlem: “Somrazacho.” Tednam Jezun tankam sanglem: “Tor, Somrazachem asa tem Somrazak diat, punn Devachem asa tem Devak diat.” 22 Hem aikon te ojap zale ani taka soddun gele.

23 Teach disa, melolim jivont zaunchimnant mhunn sangtat te Saduki tachea lagim aile. Tannim taka vicharlem: 24 “Guruji, Moizesan sanglolem: ‘Konnui munis bhurgim nastana morta zalear, tachea bhavan mela tea bhavachea baile lagim kazar zaunchem ani tachea pasot bhurgim zolmak haddchim.’ 25 Amchea thoim sat bhav asle. Poilo kazar zalo ani bhurgim nastana melo. To apli bail aplea bhava pasot soddun gelo. 26 Dusrea ani tisrea bhavakui oxench ghoddlem. Titlench nhoi, satui bhavank oxench ghoddlem. 27 Xevottak ti bailui meli. 28 Tor melolim jivont zatat tednam ti bail sat bhavam modlea konnanchi bail zatoli? Karonn ti satui bhavam lagim kazar zalʼli.”

29 Jezun tankam mhunnttlem: “Tumchem chintop sarkem na, karonn tumi Devachem Utor nokllo, nhoi mhunn Devachi xokti nokllo. 30 Melolim jivont zatolim tednam tanchea modlo konnuch, dadlo vo bail kazar zaunchimnant, punn tim sorga voilea devdutam bhaxen astolim. 31 Ani tumi vachunk na, melolim jivont zaunchea vixim Devan kitem sanglolem tem? Tannem mhunnttlolem: 32 ‘Hanv Abrahamacho Dev, Izakacho Dev, ani Jakobacho Dev.’ To meleant tancho nhoi punn jivim asat tancho Dev.” 33 Hem aikon, tachi xikoupachi rit polloun lok ojap zale.

34 Jezun Sadukichim tonddam bond keleant mhunn Farizevamnim aikolem tednam te sogle mellon Jezu lagim aile. 35 Tanchea modlea ekleak Kaidea vixim bori zannvai asli. Tannem Jezuchi porikxa korunk oxem vicharlem: 36 “Guruji, Kaideant sogleant vhoddli adnea khoinchi?” 37 Jezun mhunnttlem: “‘Tunvem tuzo Dev Jehovacho* tujea soglea kallzan, tujea soglea jivan* ani tujea soglea monan mog korunk zai.’ 38 Hi sogleant vhoddli ani poili adnea. 39 Ani teach bhaxen, dusri adnea hi: ‘Tuzo mog korta toso tujea xezareacho mog kor.’ 40 Hea don adneancher akʼkho Kaido ani toxench Provadeanchim Pustokam* adarlolim asat.”

41 Farizev thoim ektthaim asle tednam Jezun tankam vicharlem: 42 “Tumi Krista vixim kitem chintʼtat? To konnancho put?” Tannim mhunnttlem: “Davidacho.” 43 Tannem vicharlem: “Tor David povitr xoktechea preronnan* taka Somi mhunnon, oxem kiteak mhunntta, 44 ‘Jehovan* mhojea Somiak mhunnttlem: “Hanv tujea dusmanank tujea paim-am ponda ghaltam tea meren tum mhojea uzveak bos”’? 45 Tor David taka Somi mhunntta zalear to tacho put koso zaunk xokta?” 46 Taka zobab diunk konnench aplea tonddantlean ek utor pasun bhair kaddunk na, ani tea disa thaun konnuch taka anik prosn vicharunk fuddem soronk na.

23 Uprant Jezu lokam lagim ani aplea xisam lagim uloilo. Tannem mhunnttlem: 2 “Xastreamnim ani Farizevamnim Moizesacho zago ghetla. 3 Taka lagon te tumkam sangtat tem korat ani tea pormonnem cholat, punn tanchea sarkim kamam korinakat, karonn jem te sangtat tem apunnuch korinant. 4 Tannim kelʼle kaide zodd vojea sarke asat je te lokanchea khandar dovortat, punn tem ubarunk aplem bott pasun lavunk sodhinant. 5 Te kortat tim soglim kamam lokamnim apleak pollounchem mhunn kortat. Vaitta thaun apli rakhonn zaunk te lhan ddobe* vhoddle korun bandtat. Toxench aplea kopddeachea degek lailʼlim sutam lamb kortat. 6 Sanjechea jevnnak sogleant mhotvachea zagear bosonk ani sobha-ghoramnim sogleant fuddem* bosonk tankam avoddtta. 7 Tankam bazarant lokam koddlean nomoskar korun gheunk ani Rabʼbi* mhunnon gheunk avoddtta. 8 Punn tumi tumkanch Rabʼbi mhunnon gheum nakat, karonn tumcho ekuch Guruji asa ani tumi sogle bhav.* 9 Toxench, prithumer konnankuch tumcho bap mhunno nakat, karonn tumcho ekuch Bap asa, ani to sorgar asa. 10 Tumi tumkanch fuddari mhunnonui gheum nakat karonn tumcho ekuch Fuddari asa, to mhunnttlear Krist. 11 Tachea bodlek, tumchea modem sogleant vhoddlo asa tannem tumcho sevok zauncho. 12 Zo konn svotak voir kaddtta taka sokol denvoitole ani zo konn svotak khalto korta taka voir kaddttole.

13 “Are dhongi xastreamno ani Farizevamno, tumcher hai! karonn tumi lokam mukhar aslolem sorginchem dar bond kortat, tumi svota bhitor vochonant ani jim konn bhitor voitat tankam-i vochonk dinant. 14 *——

15 “Are dhongi xastreamno ani Farizevamno, tumcher hai! karonn eka munxak Judev dhorm svikar korunk lavunk tumi akʼkhe prithumer bhonvtat ani doria pasun par kortat, ani to Judev zata tednam tumi taka tumchea poros don pavtti chodd Gehenʼnant* vochonk purto kortat.

16 “Are dusreank vatt dakhoupi kuddʼddeamno, tumcher hai! karonn tumi mhunnttat, ‘Konnui Devmondiracho soput gheta zalear kaim nozo; punn konnui Devmondirachea bhangracho soput gheta zalear to soput purnn korop tachi zobabdari zaun asa.’ 17 Are murkhamno ani kuddʼddeamno! Kitem chodd mhotvachem? Bhangar vo bhangrak povitr korta tem Devmondir? 18 Toxench tumi oxem-i mhunnttat, ‘Konnui vedicho soput gheta zalear kaim nozo; punn konnui vedicher dovorlolea bhettecho soput gheta zalear to soput purnn korop tachi zobabdari zaun asa.’ 19 Are kuddʼddeamno kitem chodd mhotvachem? Bhett vo bhettek povitr korta ti vedi? 20 Tor vedicho soput gheta to vedicho ani ticher dovorlolea soglea vostuncho soput gheta; 21 ani zo Devmondiracho soput gheta to Devmondiracho ani tantuntlea Devacho soput gheta; 22 ani zo sorgacho soput gheta to Devachea xinvasonacho ani tacher boslolea Devacho soput gheta.

23 “Are dhongi xastreamno ani Farizevamno, tumcher hai! karonn tumi pudina, boddixep ani jireacho dhavo vantto ditat, punn Kaideantleo chodd mhotvacheo vostu zoxem neai, doia ani visvaxiponn, hancher tumi dhean dinant. Tea vostuncho dhavo vantto divop gorjecho punn hea vostunchi beporva korop sarkem nhoi. 24 Dusreank vatt dakhoupi kuddʼddeamno, tumi musak gallun kaddttat punn unttak gillttat!

25 “Are dhongi xastreamno ani Farizevamno, tumcher hai! karonn tumi fokot bhailean nitoll kortat toslea pelea ani tatta sarke asat, jim bhitorlean burxim asat, karonn tumi axen* bhorlole asat ani tumkanch khuxal korunk sodhtat. 26 Are kuddʼddea Farizeva, poilim pelo ani tatt bhitorlean nitoll kor ani tednam tem bhaileanui nitoll zatolem.

27 “Are dhongi xastreamno ani Farizevamno, tumcher hai! karonn tumi chuno kaddlolea fondda sarke asat zantunt meloleank purtat. Te fondd bhailean khub sobit distat punn bhitorlean melolea munxachea haddamnim ani soglea torechea mhelleponnan bhorlole asat. 28 Teach toren, lokank tumi bhailean nitivont distat, punn bhitorlean tumi dhongeponnan ani khotteponnan bhorlole asat.

29 “Are dhongi xastreamno ani Farizevamno, tumcher hai! karonn tumi provadeanche fondd bandun kaddttat ani nitivont lokancheo dholi* nettoitat, 30 ani mhunnttat, ‘Ami amchea purvozanchea kallar asle zalear provadeanchem rogot varounk tankam sangat diunche nasle.’ 31 Hea toren, provadeancho khun kela tanche tumi put mhunn tuminch tumchea add govai ditat. 32 Tor, tumchea purvozamnim patkam korunk suru kelʼlim tantuntlim urlolim patkam tumi korun sompoiat.

33 “Are sorpamno, ani vikari sorpanchea pileamno, Gehenʼnachea* formonna thaun salvar zaun tumi koxe pollon voitole? 34 Taka lagon, hanv tumchea lagim provadeank, zannarank ani xikoupeank dhaddttam. Tanchea modlea thoddeank tumi jivexim martole, thoddeank khambear martole, thoddeank sobha-ghoramnim chabkamnim martole, ani thoddeank eka xara thaun dusrea xarant vochon dhumallo ditole. 35 Abela thaun tumi Devmondir ani vedi modem marlolo to Barakiacho put Zakariasa poriant, prithumer jea soglea nitivont munxachem rogot varovlam tanchea sogleanchea rogtache zobabdar tumi zaum. 36 Hanv tumkam khorench sangtam, hem soglem hea pillgechea mathear ietolem.

37 “Jeruzalem, Jeruzalem, tum provadeank jivexim marun uddoupi ani zankam tujea lagim dhaddleat tankam fatravpi xar—kombi zoxi aplea pilank aplea pakottea khala ektthaim korta, toxench mhaka zaitea pavtti tujea bhurgeank ektthaim korunk zai aslem! Punn tumkam tem naka aslem. 38 Polloiat! Devan tumchem ghor* soddun dilam.* 39 Hanv tumkam khorench sangtam, atam thaun jea poriant tumi, ‘Jehovachea* nanvan ieta tacher besanv asum’ oxem mhunnchim nant tea poriant tumi mhaka pollounchinch nant.”

24 Jezu Devmondirantlean bhair sortalo tednam tache xis tachea lagim aile ani taka Devmondir ani tacheo vontti dakhounk lagle. 2 Tednam Jezun tankam mhunnttlem: “Tumi hem soglem polloun ojap zatat? Hanv tumkam khorench sangtam ki hanga ekui fatracher-fator urchona. Sogle fator sokol poddttole.”

3 Jezu Zoitunanchea Dongrar ekttoch boson aslo tednam xis tachea lagim aile ani taka vicharunk lagle, “Amkam sang, hem soglem kednam ghoddttolem ani tum hajir asa* tachi, ani sonvsarachea* xevottachea vellachi khunna kitem astoli?”

4 Jezun tankam zobab dilo, “Konnem-i tumkam fottoina zaunk chotrai dhorat, 5 karonn zaite lok mhojea nanvan ietole ani, ‘Hanvuch Krist’ mhunn sangon zaiteank fosoitole. 6 Tumi zhuzancho avaz ani zhuzancheo khobro aikotole. Punn bhienakat, karonn hem soglem ghoddonkuch zai, toripunn ho xevott nhoi.

7 “Karonn ek raxttr dusrea raxttracher ani ek raj dusrea rajeacher zhuz kortolem. Veg-vegllea zageancher bhuk poddttoli ani bhuimkamp zatole. 8 Heo sogleo vostu trasanchi* survat zaun asa.

9 “Tednam lok tumkam dhumallo diunk dhorun ditole ani tumkam marun uddoitole, ani mhojea nanva pasot soglea raxttrache lok tumcho dves kortole. 10 Itlench nhoi, zaite lok Deva thaun pois voitole* ani eka-mekacho visvasghat kortole ani eka-mekacho dves kortole. 11 Zaite fottkire provadi uprastole ani zaiteank fottoitole, 12 ani khotteponn vaddtta tem polloun zaiteancho mog thondd zatolo. 13 Punn zo konn xevott poriant thir ravtolo* to salvar zatolo. 14 Soglea raxttrank govai mellche khatir Rajeachi bori khobor ak’khea sonvsarant porgott zatoli, ani tea uprant xevott ietolo.

15 “Teach pasot Daniel provadean sangloli, nisontton ani vitt haddtta tosli vost povitr zagear ubi asa ti tumi polloitat (vachnnarean somzon gheunchem), 16 tednam Judeiant asat tannim dongracher pollon vochonk suru korchem. 17 Zo munis aplea ghoracher voir* asa tannem aplea ghorantlem saman vhoronk sokol denvon ghorant bhitor sorchem nhoi, 18 ani zo munis xetant asa tannem aple kopdde vhoronk porot ieunchem nhoi. 19 Jeo bailo gorbest asat ani jeo bailo bhurgeank dudh ditat tanchea pasot he dis kitle bhirankull astole! 20 Tumkam thonddechea disamnim vo Sabathachea disa pollon vochonk poddona zaunk magnnem korit ravat; 21 karonn tea vellar sonvsarachea survatek thaun atam poriant ieunk na ani fuddem kednanch ieunchem na toslem vhodd sonkoxtt ietolem. 22 Khorem mhunnttlear, te dis unne korunk na zalear konnuch salvar zaunchona; punn vinchun kaddloleam pasot te dis unne kortole.

23 “Tea disamnim konnui tumkam, ‘Polloiat! Krist hanga asa,’ vo, ‘Thoim asa!’ mhunn sangot zalear visvas dovor nakat. 24 Karonn khotte Krist ani khotte provadi uprastole, ani zata zalear vinchun kaddloleank pasun fosounk lagon te vhoddleo-vhoddleo khunna ani vizmitam korun dakhoitole. 25 Polloiat! Hanv tumkam poilinch xittkaitam. 26 Lok tumkam zor oxem mhunnot, ‘Polloiat! To oronnʼnneant* asa,’ zalear bhair vochonakat; vo zor te mhunnot, ‘Polloiat! To bhitorlea rumamnim asa,’ zalear tancher visvas dovor nakat. 27 Karonn zhoglam martat tednam tim udenti thaun ostome poriant chokchoktat tim distat, toxench munxacho Put hajir asa* tednam ghoddttolem. 28 Moddem asa thoim ghonni* ektthaim zatat.

29 “Tea disanchea sonkoxtta uprant rokddoch suriacher kallokh poddttolo, ani chondrim aplo uzvadd diunchona, toxench, mollba voilim noketram sokol poddttolim, ani mollba voileo xokteo haltoleo. 30 Tednam munxachea Putachi khunna mollbar dixtti poddttoli, ani prithume voile soglea kullantle lok dukhi zaun aplem hodd’ddem boddoitole, ani te mollba voilea kupancher munxacho Put xokten ani vhodd mhoimen ieta to polloitole. 31 Turturecho vhodd avaz korun to aplea devdutank dhaddttolo, ani te tachea vinchun kaddloleank mollbachea eka ponta thaun dusrea ponta poriant sonvsarachea charui konnxeam* thaun ektthaim kortole.

32 “Atam anjirachea zhaddachea vopare thaun hem xikat: Zoxem eka zhaddachea khandeak noveo kombreo futtʼttat ani panam ietat tednam tumkam gim lagim pavla mhunn kollon ieta. 33 Toxench, heo sogleo vostu ghoddttat tem tumi polloitat tednam munxacho Put laginch asa, mhunnche dara koddenuch asa mhunn zannam zaiat. 34 Hanv tumkam khorench sangtam, heo sogleo vostu ghoddon ieum poriant hi pillgi koxich morchina. 35 Mollob ani prithum na zatoli, punn mhojim utram sodankal urtolim.

36 “Tea disa vixim ani tea vella vixim konnankuch khoborna, na mhunn sorga voilea devdutank, na mhunn Putak, punn fokot Bapak khobor asa. 37 Noah-chea disamnim zalʼlem toxench munxacho Put hajir asa* tea vellar zatolem. 38 Buddtte adlea disamnim Noah tarvant* bhitor sorlo tea disa meren lok khata-pietale, kazar zatale ani kazar korun ditale. 39 Buddtti ieun tancho sogleancho nas zaum poriant tannim dhean diunk na, toxench munxacho Put hajir asa tea vellarui zatolem. 40 Tednam don munis xetant astole, tantuntlea ekleak borabor vhortole ani dusreak soddun ditole. 41 Don bailo danteacher dollttoleo, tantuntle eke bailek borabor vhortole ani dusrek soddun ditole. 42 Taka lagon zagrut ravat, karonn tumcho Somi khoinchea disak ieta tem tumkam khoborna.

43 “Punn ek mat monant dovrat: Chor khoinchea parar* ietolo hem zor ghorachea dhoniak khobor aslem zalear to zagoch ravtolo aslo ani aplem ghor foddunk diuncho naslo. 44 Tor tumi toiar ravat, karonn tumi chintunk na tea vellar munxacho Put ieta.

45 “Aplea ghorantlea sevokancher odhikar diun, tankam sarkea vellar jevonn diunk dhonian zaka nemla to visvaxi ani xanno* chakor khoroch konn zait? 46 Dhoni ieta tednam chakor toxench kortana dislo zalear to chakor khuxal! 47 Hanv tumkam khorench sangtam, to taka aplea lagim jem kitem asa titleacherui odhikar ditolo.

48 “Punn kednam-i zor to noxtto chakor apleach monant mhunnot, ‘Mhozo dhoni porot ieunk vell laita,’ 49 ani to aplea boraborchea chakrank marunk lagta ani bebdeam borabor khaunk-pieunk lagta zalear 50 tannem chintunk pasun na tea disa ani taka khobor pasun na tea vellar tacho dhoni ietolo. 51 Ani to taka sogleant koddok xikxa ditolo ani dhongeam modem uddoitolo. Thoim to roddttolo ani aple dant korkoraitolo.

25 “Sorginchem Raj tea dha ankvareank sor korunk zata jeo aple dive gheun novreak mellonk bhair sorleo. 2 Tantuntleo panch murkh asleo ani panch xanneo.* 3 Karonn murkh ankvareamnim aplea borabor dive ghetlole punn tel gheunk naslem. 4 Xannea ankvareamnim divea borabor battlent telui ghetlolem. 5 Novreak ieunk vell zalo tednam sogleo ankvareo jhemonk lagleo ani nhidleo. 6 Ratchea vellar modench oso avaz ailo: ‘Novro ieta! Taka mellonk bhair vochat.’ 7 Tednam sogleo ankvareo utthleo ani ap-aple dive toiar korunk lagleo. 8 Murkh ankvareamnim xannea ankvareank mhunnttlem, ‘Tumchem thoddem tel amkam diat, karonn amche dive palvonk pavleat.’ 9 Punn xannea ankvareamnim mhunnttlem: ‘Amchea koddem asa tem tel ghoddie amkam ani tumkam pavchem na. Dekhun tumi tel vikpeam koddem vochon tumchea pasot tel viktem gheiat.’ 10 Teo tel viktem gheunk voita astananch novro ailo. Tednam jeo ankvareo toiar asleo teo tachea borabor kazarachea jevnnak bhitor geleo, ani dar bond kelem. 11 Uprant urloleo ankvareo pasun aileo, ani mhunnonk lagleo, ‘Saiba, Saiba, amchea pasot dar ugodd!’ 12 Punn novrean tankam zobab dilo, ‘Hanv tumkam khorench sangtam, hanv tumkam vollkhona.’

13 “Taka lagon, sodanch zagrut ravat, karonn tumkam to dis ani to vellui khoborna.

14 “Sorginchem Raj oslea eka munxa sarkem asa zo pordesant voichea poilim aplea chakrank apoita ani aplea koddem jem kitem asa tem tanchea hatant dita. 15 Tannem ekleak panch talent,* dusreak don talent, ani tisreak ek talent, oxem tankam dor ekleak tanchea tanki pormonnem dilem, ani to pordesant gelo. 16 Zaka panch talent mellʼllole tannem rokddoch vochon tea poixancho* veapar dhondo suru kelo ani anik panch talent zoddle. 17 Teach bhaxen, zaka don talent mellʼllole tannem anik don talent zoddle. 18 Punn zaka fokot ek talent mellʼllolo tannem aplea dhoniache poixe* zomnint purun dovorle.

19 “Zaitea tempa uprant, tea chakrancho dhoni ailo ani tannem tanche koddem hixob maglo. 20 Panch talent mellʼllolo to chakor aplea borabor anik panch talent gheun ailo ani mukhar ieun tannem mhunnttlem, ‘Dhonia, tunvem mhaka panch talent dilʼle; hanvem anik panch talent zoddle.’ 21 Dhonian taka mhunnttlem: ‘Xabʼbas, borea ani visvaxi chakra! Tum thoddea vostumnim visvaxi ravlo. Hanv tuka zaitea vostuncher odhikar ditolom. Tujea dhonia sangata khuxal zav.’ 22 Uprant zaka don talent mellʼllole tannem fuddem ieun mhunnttlem, ‘Dhonia, tunvem mhaka don talent dilʼle; polloi, hanvem anik don talent zoddle.’ 23 Dhonian taka mhunnttlem: ‘Xabʼbas, borea ani visvaxi chakra! Tum thoddea vostumnim visvaxi ravlo. Hanv tuka zaitea vostuncher odhikar ditolom. Tujea dhonia sangata khuxal zav.’

24 “Xevottak zaka ek talent mellʼllolo to fuddem sorlo ani tannem mhunnttlem: ‘Dhonia, tum ek koddok munis mhunn hanv zannam, zo vompunk na thoim thaun lunvta ani fafddunk na thoim thaun punzaita. 25 Dekhun mhaka bhirant disli ani hanvem tuzo talent zomnint purun dovorlo. Ho ghe tuzo talent.’ 26 Tednam dhonian taka mhunnttlem: ‘Are noxttea ani allxi chakra, jea zagear hanv vompina thoim thaun lunvnni kortam ani fafddina thoim thaun punzaitam, hem tum zannam aslo nhoi? 27 Toxem zalear tunvem mhoje poixe savkaram koddem kiteak dovrunk na?* Mhunnche, hanv ieta tednam mhojea poixam* sangata mhaka jur pasun mellttolo aslo.

28 “‘Tor, hache koddlean talent gheiat ani zachea koddem dha talent asat taka to diat. 29 Karonn zachea lagim asa taka anik ditole, ani tachea lagim bhorpur zatole. Punn zachea koddem na, tachea koddlean jem asa tem sudʼdha kaddun ghetole. 30 Ani kiteakuch upkarona toslea hea chakrak bhair kallkhant uddoiat, zoim to roddttolo ani aple dant korkoraitolo.’

31 “Jednam munxacho Put aplea mhoiment ietolo ani sogle devdut tachea borabor ietole, tednam to aplea mhoimen bhorlolea xinvasonacher bostolo. 32 Soglim raxttram tachea mukhar ektthaim zatolim, ani zoso gonvlli menddrank, bokddeam thaun kuxin kaddtta toso to lokank eka-meka thaun kuxin kaddttolo. 33 To menddrank aplea uzvea vatten punn bokddeank aplea davea vatten dovortolo.

34 “Uprant Raza aplea uzvea vatten asa tea lokank mhunnttolo: ‘Mhojea Bapa thaun axirvad mellʼlloleamno, ieiat. Sonvsarachea survatek thaun tumchea pasot toiar kelam tea Rajeache daiji zaiat. 35 Karonn hanv upaxim aslom tednam tumi mhaka khaunk dilem; mhaka tan lagloli tednam tumi mhaka pieunk dilem. Hanv onvollkhi aslom tori astana tumi mhaka aplea ghorant ghetlo; 36 hanv vingllo aslom* tednam tumi mhaka kopdde dile. Hanv duent poddlom tednam tumi mhoji kallji ghetli. Bondkhonnint aslom tednam tumi mhaka mellonk aile.’ 37 Tednam nitivont lok taka mhunnttole: ‘Somia, ami tuka kednam upaxim polloilo ani khaunk dilem, vo tanelʼlo polloilo ani pieunk dilem? 38 Tum onvollkhi asonui ami kednam tuka ghorant ghetlo, vo tum kednam vingllo aslo ani ami tuka kopdde dile? 39 Ami tuka duent vo bondkhonnint kednam polloilo ani mellonk aile?’ 40 Tednam Raza tankam zobab diun mhunnttolo, ‘Hanv tumkam khorench sangtam, tumi mhojea lhanantlea-lhan bhavam modlea ekleak kelem, tem mhaka kelem.’

41 “Uprant Raza aplea daveak aslolea lokank mhunnttolo: ‘Are xirap poddlolea lokamno, mhojea mukha voile pois sorat ani Soitanak* ani tachea dutank toiar kelolea sasnak zolltta tea ujeant vochat. 42 Karonn hanv upaxim aslom, punn tumi mhaka khaunk kainch diunk na; mhaka tan lagloli, punn tumi mhaka pieunk kainch diunk na. 43 Hanv onvollkhi aslom, punn tumi mhaka tumchea ghorant gheunk na; hanv vingllo aslom, punn tumi mhaka kopdde diunk na; hanv duent poddlom ani bondkhonnint aslom, punn tumi mhoji kallji gheunk na.’ 44 Tednam te-ui taka mhunnttole: ‘Somia, ami tuka bhukelʼlo vo tanelʼlo vo onvollkhi vo vingllo vo duent vo bondkhonnint aslolo kednam polloilo ani tuji seva korunk na?’ 45 Tednam Raza tankam zobab diun mhunnttolo: ‘Hanv tumkam khorench sangtam, tumi mhojea lhanantlea-lhan bhavam modlea ekleak korunk na, tem mhaka pasun korunk na.’ 46 Hea lokancho sasnak nas zatolo,* punn nitivont lokank sasnik jivit mellttolem.”

26 Hem soglem sanglea uprant Jezun aplea xisank mhunnttlem: 2 “Aiz thaun don disam uprant Paskachi porob asa, ani munxachea Putak khambear marunk dhorun ditole mhunn tumi zannant.”

3 Tednam mukhel iadnik ani lokanche vhoddil, Kaifas nanvachea mha-iadnikachea angnnant ektthaim zale. 4 Apli naddbudʼdhi uzar korun Jezuk koso dhorcho ani marun uddouncho tea vixim te mellon ievzunk lagle. 5 Punn te mhunnttale: “Porbechea vellar naka, karonn lok uchamboll zatolo.”

6 Jezu Bethanient Simanvachea ghora aslo, zaka adim kodd zalʼlem. 7 Jezu jevnnak boslolo astana ek bail tachea lagim pormollit telachi battli* gheun aili ji khub mharog asli. Tem tel, ti tachea mathear votounk lagli. 8 Hem polloun xis ragar zale ani mhunnonk lagle: “Hi bail tel kiteak piddʼddear korta? 9 Hem tel chodd molak vikun te poixe goribank diunk zatale.” 10 Te eka-meka lagim kitem uloitat tem Jezuk kollʼllea uprant tannem tankam mhunnttlem: “Tumi hea bailek kiteak tras kortat? Tinnem mhojea pasot ek borem kam kelam. 11 Gorib tor tumchea sangata sodanch astole, punn hanv tumchea sangata sodanch aschona. 12 Mhojea kuddir pormollit tel votoun tinnem hanv melea uprant mhoji kudd purunk toiari kelea. 13 Hanv tumkam khorench sangtam, akʼkhea sonvsarant jea-jea zagear bori khobor porgott zatoli tea-tea zagear hea bailecho ugddas korun tinnem jem kelam tem-ui sangtole.”

14 Magir tea Bara zannam* modlo eklo, zachem nanv Judas Iskariot aslem, to mukhel iadnikam lagim gelo. 15 Tannem tankam mhunnttlem: “Taka dhorunk hanvem tumkam modot keli zalear tumi mhaka kitem ditole?” Tannim taka chandiche 30 nanne ditole mhunn sanglem. 16 Tednam thaun Judas Jezuk dhorun diunk bori sondhi sodhunk laglo.

17 Khomir Naslolea Unddeachea Porbechea poilea disa xis Jezu lagim ieun vicharunk lagle: “Ami tujea pasot Paskachem jevonn jevunk khoim toiari kelʼli tuka zai?” 18 Jezun mhunnttlem: “Xarant vochon umkea-umkea munxak mellon oxem sangat, ‘Gurujin sanglam: “Mhozo mornnacho vell lagim pavla; hanv mhojea xisam sangata tujea ghorant Paskachi porob kortolom.”’” 19 Tednam xisamnim Jezun sanglolem toxench kelem ani Paskachi toiari keli.

20 Sanz zalea uprant to aplea 12 xisam sangata jevunk boslo. 21 Jevta astana Jezun mhunnttlem: “Hanv tumkam khorench sangtam, tumchea modlo eklo mhozo visvasghat korun mhaka dhorun ditolo.” 22 Hem aikon te ekdom dukhi zale, ani ek-eklo taka oxem vicharunk laglo: “Somia, to hanv nhoi nhu?” 23 Tannem mhunnttlem: “Mhojea borabor mhojea tattant hat ghalta to mhozo visvasghat kortolo. 24 Munxachea Puta vixim jem boroilam tea pormonnem to voitolo tem khorem. Punn munxachea Putacho visvasghat korun taka dhorun dita tea munxachem khub vaitt zatolem! To munis zolmakuch ieunk naslo zalear chodd borem zata aslem.” 25 Tednam Judas, zo tacho thoddeach vella uprant ghat korcho aslo, mhunnonk laglo: “Rabʼbi,* to hanv nhoi nhu?” Jezun taka mhunnttlem: “Tunvem svota sanglem.”

26 Uprant jevta astana, Jezun ek unddo ghetlo, ani magnneant Devache upkar attoun to moddlo. To xisank diun tannem mhunnttlem: “Ho gheiat, ani khaiat. Ho unddo mhoje kuddik suchit korta.” 27 Magir tannem ek pelo gheun magnneant Devache upkar attoile, ani to pelo tankam diun mhunnttlem: “Tumi sogle hantuntlean pieiat, 28 ho drakxancho soro mhojea rogtak suchit korta jem ‘korarachem rogot’ zaun asa, ani tem zaitea zannam pasot, patkam thaun bhogsonnem mellonk varounchem asa. 29 Punn hanv tumkam sangtam: Jea poriant hanv mhojea Bapachea Rajeant tumchea borabor drakxancho novo soro piena tea poriant hanv drakxancho soro kednanch pieunchom na.” 30 Xevottak tannim Devachi vakhannʼnni korunk gitam* gailim ani thoim thaun Zoitunanchea Dongrar vochonk bhair sorle.

31 Magir Jezun tankam mhunnttlem: “Aichea rati mhojea thaim jem ghoddttolem taka lagon tumcho sogleancho bhavarth haltolo.* Karonn oxem boroilʼlem asa: ‘Hanv gonvlleak martolom, ani hinddantlim menddram hanga-thoim ximpoddttolim.’ 32 Punn mhaka jivont kelea uprant hanv tumchea poilim Galilient voitolom.” 33 Pedrun taka zobab dilo: “Tujea thaim jem ghoddttolem taka lagon urlolea sogleancho bhavarth halʼlo zalear pasun mhozo bhavarth kednanch halchona.”* 34 Tednam Jezun taka mhunnttlem: “Hanv tuka khorench sangtam, aichea rati kombean sad ghalchea adim, tin pavtti tum mhaka nakartolo.” 35 Pedrun taka mhunnttlem: “Mhaka tujea sangata morchem poddlear pasun hanv tuka kosoch nakarchom na.” Urlolea xisamnim pasun oxench mhunnttlem.

36 Magir Jezu aplea xisam sangata Gethsemani nanvachea zagear ailo ani tannem tankam mhunnttlem: “Hanv thoim magnnem korunk voitam, tumi hangach boson ravat.” 37 Tannem Pedruk ani Zebedevachea donui putank aplea borabor vhele. To samko chintest zalo ani ekdom dukhi zalo. 38 Tannem tankam mhunnttlem: “Hanv itlo dukhi zalam ki mhoji poristhiti morpa sarki zalea. Tumi hangach ravat ani mhojea borabor zage ravat.” 39 Magir thoim thaun to matso fuddem gelo ani dimi ghalun ani apli man bagoun to oxem magnnem korunk laglo: “Mhojea Bapa, zata zalear ho pelo mhojea thaun kaddun uddoi. Tori astana, mhaka zai toxem nhoi, punn tuka zai toxem zaum.”

40 To xisam lagim porot ailo tednam tannem tankam nhidlole polloun Pedruk mhunnttlem: “Tumche koddem mhojea borabor thoddo vell pasun zage ravonk zaina? 41 Tallnnent poddona zaunk zagrut ravat ani magnnem korit ravat. Karonn mon tor toiar* asa, punn kudd oskot asa.” 42 Magir to dusre pavtti gelo ani oxem mhunnon magnnem korunk laglo: “Mhojea Bapa, hanvem ho pelo pieunkuch zai ani mhojea thaun to kaddunk zaina zalear tuje khuxe pormonnem zaum.” 43 Magir porot to xisam lagim ailo ani tannem tankam nhidlole polloile, karonn tanche dolle jhemen zodd zalʼle. 44 Tor, to tankam thoinch soddun porot ek pavtt gelo ani tisrea pavtti pasun tannem toxench magnnem kelem. 45 Uprant tannem xisam koddem porot ieun mhunnttlem: “Tumi oslea vellar pasun nhidtat ani suseg ghetat! Polloiat, munxachea Putacho visvasghat korun taka patkeanchea hatant dhorun diuncho vell ailo. 46 Utthat, ami vochum-ia. Polloiat! Mhozo ghat korpi lagim aila.” 47 To uloita astananch Judas ailo, zo Bara zannam modlo ek aslo. Tachea borabor tolvari ani dandde gheun lokancho vhoddlo zomo aslo. Tankam mukhel iadnikamnim ani lokanchea vhoddilamnim dhaddlole.

48 Tacho visvasghat kortolean tankam oxi khunna dilʼli: “Hanv zacho umo ghetolom, toch to; taka dhorat.” 49 Uprant Judasan Jezuchea fuddem vochon mhunnttlem: “Nomoskar, Rabʼbi!” ani tannem tacho umo ghetlo. 50 Punn Jezun taka mhunnttlem: “Tum hanga kitem korunk aila?” Tednam te fuddem sorle ani tannim Jezuk dhorlo. 51 Itlean, Jezu borabor aslolea eklean apli tolvar kaddli ani mha-iadnikachea sevokacho kanuch katrun uddoilo. 52 Tednam Jezun taka mhunnttlem: “Tuji tolvar tichea zagear dovor, karonn je tolvar hatant ghetat te tolvarin nas zatole. 53 Tuka kitem dista, hanv atanch mhojea Bapa lagim, mhojea pasot devdutancheo 12 polttonneo* dhadd mhunn vinoti korunk xokona kai? 54 Punn oxem zalem zalear heo sogleo vostu ghoddonk zai, oxem Devachea Utrant boroilam tem koxem purnn zatolem?” 55 Magir Jezun lokank mhunnttlem: “Mhaka tumi tolvari ani dandde gheun dhorunk aileat te, hanv vhoddlo chor kitem? Hanv sodanch Devmondirant boson xikoitalom tednam tumi mhaka dhorunk na. 56 Punn provadeamnim boroileat teo sogleo vostu purnn zaunk lagon hem soglem ghoddlem.” Tednam sogle xis taka soddun pollon gele.

57 Jezuk dhorlole te lok taka mha-iadnik Kaifasa koddem gheun gele. Thoim xastri ani vhoddil ektthaim zalʼle asle. 58 Punn Pedru matso poisuch ravon Jezuchea fattlean-fattlean vochot ravlo. Mha-iadnikachea angnnant pavlea uprant to bhitor gelo ani fuddem kitem zata tem pollounk to tea ghorantlea sevokam borabor boslo.

59 Atam mukhel iadnik, akʼkhe Mha-sobhe* borabor Jezucher mornnachem formonn marunk tachea add khotte purave sodhtale. 60 Zaite khotte sakxi fuddem sorle, tori astana tankam Jezu guneanvkari mhunn tharaunk ekui puravo mellʼllo na. Magir don sakxi fuddem sorle. 61 Tannim mhunnttlem: “Ho munis oxem mhunnttalo, ‘Hanv Devmondir moddun tin disam bhitor ubem korunk xoktam.’” 62 Hem aikotoch mha-iadnik ubo ravlo ani tannem Jezuk mhunnttlem: “Tum vogich kiteak asa? He munis tujer kitem arop ghaltat tem tunvem aikonk na?” 63 Tori astana, Jezu vogich ravlo. Tednam mha-iadnikan taka mhunnttlem: “Hanv tuka jivea Devacho soput ghalun vichartam, amkam sang, tum Krist? Tum Devacho Put?” 64 Jezun taka mhunnttlem: “Tunvem svota mhunnttlem. Punn hanv tumkam sangtam: Hea fuddem tumi munxachea Putak Devachea bollixtt uzvea hatak boslolo ani mollbachea kupam voilean ieta to polloitole.” 65 Tednam mha-iadnikan aple kopdde pinzle ani mhunnttlem: “Ho Devachea add uloila! Atam amkam anik sakxeanchi kiteak goroz asa? Polloiat! To Devachea add uloila tem tumi pasun aikolam. 66 Tumkam kitem dista?” Tannim zobab dilo: “Taka moronn favo.” 67 Tednam te Jezuchea tonddar thukle ani tannim tacher mutti marleo. Thoddeamnim tachea tonddar thapttam marlim, 68 ani mhunnttlem: “Tum Krist nhoi? Toxem zalear tuka konnem marlem tem sang.”

69 Pedru angnnant boslolo aslo, tednam ek chakorn tachea lagim aili ani tinnem mhunnttlem: “Tum pasun tea Galilientlea Jezu borabor aslo!” 70 Punn tannem sogleam mukhar nakarun mhunnttlem: “Tum kitem mhunntta tem mhaka khoborna.” 71 To bhair soron angnnachea dara lagim gelo tednam anik eka cheddvan taka polloun thoim aslolea lokank sanglem: “Ho munis Nazaretkar Jezu sangata aslo.” 72 Anik ek pavtt to soput gheun nakarunk laglo: “Hanv tea munxak vollkhoch na!” 73 Thoddea vella uprant, thoim ube aslole te lok Pedru lagim aile ani mhunnonk lagle: “Dubhav nastana tum pasun tanchea modlo eklo. Tum uloita tea bhaxe voilean* kollon ieta.” 74 Punn Pedrun tem nakarlem* ani soput gheun mhunnttlem: “Hanv tea munxak vollkhoch na!” Ani teach vellar kombean sad ghatlo. 75 Tednam, “kombean sad ghalchea poilim tum tin pavtti mhaka nakartolo,” him Jezuchim utram Pedruk ugddas ailim ani to bhair vochon dukamnim roddonk laglo.

27 Sokall zali tednam sogle mukhel iadnik ani porjeche vhoddil ektthaim zale ani tannim Jezuk jivexim marun uddounk ievzonn keli. 2 Tannim taka bandun vhelo ani razpal Pilatachea tabeant dilo.

3 Jezucher mornnachem formonn marlam tem polloun tacho ghat kelʼlea Judasachem ontoskornn taka khaunk laglem. Tannem mukhel iadnik ani vhoddilam lagim vochon apnnak dilole 30 nanne porot dile, 4 ani mhunnttlem: “Hanvem eka niropradi munxacho ghat kelo ani taka dhorun dilo.” Tannim mhunnttlem: “Tem tum amkam kiteak sangta? Tem tum polloun ghe!” 5 Tednam tannem te chandiche nanne Devmondirant uddoile ani vochon goll ghetlo. 6 Punn mukhel iadnikamnim te nanne gheun mhunnttlem: “He nanne Devmondirachea tizorent ghalop sarkem zaunchem na, karonn he nanne eka munxachea rogtachem mol zaun asa.” 7 Te eka-meka lagim uloilea uprant, tannim tea poixeamnim porkea lokank purunk kumbharachem ek xet viktem ghetlem. 8 Teach pasot aiz meren tea xetak Rogtachem Xet mhunnttat. 9 Hea vorvim Jeremias provadea udexim sanglolim utram purnn zalim: “Tannim te chandiche 30 nanne ghetle, je tea munxachem tharailʼlem mol aslem. Izraelachea thoddea putamnim tea munxachem hem mol tharailʼlem, 10 ani Jehovan* mhaka adnea dilʼli toxi tannim te nanne kumbharachea xetak lagon dile.”

11 Jezu atam razpala mukhar ubo aslo. Razpalan taka vicharlem: “Tum Judevancho Raza?” Jezun zobab dilo: “Oxem tunch mhunntta.” 12 Mukhel iadnik ani vhoddil tacher arop ghaltale punn tannem kainch zobab diunk na. 13 Tednam Pilatan taka mhunnttlem: “Te tujer kitle arop ghaltat tem tuka aikonk iena?” 14 Tori astana Jezun kainch zobab diunk na, tannem ek zap pasun kaddunk na, tea pasot razpal ekdom ojap zalo.

15 Dor vorsak lokanchea khuxe pormonnem, porbechea vellar eka koideak suttka divop razpalachi rit asli. 16 Tea disamnim vaitt kamank lagon famad aslolo Barabas nanvacho ek munis bondkhonnint aslo. 17 Tor lok ektthaim zale tednam Pilatan tankam vicharlem: “Hanvem konnank suttka dilʼli tumkam zai, Barabasak vo Krist mhunnttat tea Jezuk?” 18 Tannim nattkaiek lagon Jezuk dhorun dila mhunn Pilat zannam aslo. 19 Pilat neai korunk boslolo aslo tednam tachea bailen taka oso sondex dhaddlo: “Tea nitivont munxachea bhangoddint poddonaka, karonn aiz mhaka tachea vixim bhirankull sopon poddlem ani khub tras zale.” 20 Punn mukhel iadnikamnim ani vhoddilamnim, Barabasak soddcho ani Jezuk marcho mhunn sangonk lokank uksaile. 21 Porot ek pavtt razpalan tankam vicharlem: “Hanvem dogaim modlea konnank soddlolo tumkam zai?” Tannim mhunnttlem: “Barabasak.” 22 Pilatan tankam vicharlem: “Toxem zalear, Krist mhunnttat tea Jezuchem hanv kitem korum?” Tannim sogleamnim mhunnttlem: “Taka khambear mar!”* 23 Razpalan vicharlem: “Kiteak? Tannem kitem vaitt kelam?” Punn te anikui vhoddlean bob marun mhunnonk lagle: “Taka khambear mar!”

24 Aplea utrancho kainch faido zaina ani lok anikui uchamboll zata tem polloun Pilatan lokam mukhar udok gheun aple hat dhuile ani mhunnttlem: “Hea munxachea rogtacho zobabdar hanv nhoi. Tem tuminch polloun gheiat.” 25 Tednam soglea lokamnim mhunnttlem: “Tachea rogtachim zobabdar ami ani amchim bhurgim zaum.” 26 Tednam tannem Barabasak suttka dili, punn Jezuk chabkancho mar ghatlo ani khambear jivexim marunk soinikanchea hatant dilo.

27 Tea uprant soinik Jezuk razpalachea rajmahalant gheun gele ani tannim soglea soinikank tachea bhonvtonnim ektthaim kele. 28 Tea soinikamnim tache kopdde kaddun taka ekdom tambddea rongache kopdde ghatle. 29 Tannim ek kantteancho mukutt toiar korun tachea mathear dovorlo ani tachea uzvea hatant ek boddi dili. Uprant te tachea mukhar dimer poddon fokannam korun oxem mhunnonk lagle: “Judevanchea Raza, tuka zoi!”* 30 Te tacher thukle, ani tonnachi ek boddi gheun tachea tokler marunk lagle. 31 Xevottak, tachim zaitim fokannam kelea uprant tannim taka ghatlole tambdde kopdde kaddle ani tachech kopdde taka porot ghatle. Uprant te taka khambear khillaunk gheun gele.

32 Te bhair sortale tednam Siren xaracho Simanv nanvacho ek munis tankam mellʼllo. Tannim tea munxacher Jezucho trasancho khambo* ubarun vhoronk dobhav ghatlo. 33 Jednam te Golgotha mhunntta thoim pavle, zaka Toklechea Kottʼtteacho Zago mhunnttat, 34 tednam tannim Jezuk drakxanchea soreant koddu panam* ghalun dilim, punn to chaklea uprant to pieunk na. 35 Soinikamnim taka khambear khillailea uprant tachea kopddeancher sorti ghalun tannim te aplea bhitor vanttle, 36 uprant tacher nodor dovrunk te thoinch boson ravle. 37 Ani tacher ghatlolo arop tannim tachea tokle voir khambear lailo. Tacher oxem boroilʼlem aslem: “Ho Jezu, Judevancho Raza.”

38 Tachea sangata don vhoddlea chorank khambear marlole, ekleak tachea uzveak ani dusreak tachea daveak. 39 Thoinchean ieta-voitale te lok tokli haloun tacho opman kortale 40 ani mhunnttale: “Devmondir moddun tin disam bhitor bandtolo mhunn sangtalo nhoi tum? Atam tukach salvar kor! Tum Devacho Put zalear, trasanchea khambea* voilo sokol denv!” 41 Mukhel iadnik pasun, xastri ani vhoddilam sangata mellon oxech toren tachim fokannam korunk lagle: 42 “Tannem dusreank salvar kele; punn to apnnakuch salvar korunk xokona! Izraelacho Raza to; atam taka trasanchea khambea* voilo sokol denvon ieum-di, magir ami tacher bhavarth dovortole. 43 Tannem Devacher visvas dovorla; Devak zai zalear taka vachoum di, karonn tannem, ‘Hanv Devacho Put,’ oxem mhunnttlam.” 44 Toxench, tachea donui vatten khambear aslole chor pasun tacho opman kortale.

45 Donparam sumar bara* thaun sumar tin* poriant tea akʼkhea desant kallokh poddlo. 46 Sumar tin vorancher Jezun mottʼttean oxem mhunnttlem: “Eli, Eli, lama sabakthani?” zacho orth, “Mhojea Deva, mhojea Deva, tunvem mhaka kiteak soddun dila?” 47 Hem aikon thoim ube aslole thodde lok mhunnonk lagle: “Ho munis Elijak ulo korta.” 48 Tednam tanchea modlea eklean rokddoch dhanvon vochon ek kapsacho gullo* haddlo. Tannem to ambott zalʼlea drakxanchea soreant buddoilo ani boddiek lavun taka pieunk dilo. 49 Heramnim mhunnttlem: “Elija taka salvar korunk ieta vo na tem polloum-ia.” 50 Jezun anik ek pavtt mottʼttean avaz kelo ani aplo jiv soddlo.

51 Teach vellar, Devmondirantlo poddʼddo voir thaun sokol pinzon tache don kuddke zale ani bhuimkamp zalo ani khoddpam futtlim. 52 Dholi* ukteo zaleo ani mornnachea nhident aslolea zaitea povitr munxanchim moddim tantuntlean bhair poddlim 53 ani zaitea lokamnim him moddim polloilim. (Dholi koddlean voitale te thodde lok Jezuk jivont kelea uprant povitr xarant aile.) 54 Bhuimkamp ani heo sogleo ghoddnneo polloileo tednam soinikancho odhikari ani tachea borabor Jezucher nodor dovrunk asle te soinik khub bhiele ani mhunnonk lagle: “Khorench ho Devacho Put aslo.”

55 Galilientlean Jezuchi seva korunk tachea borabor ailoleo zaiteo bailo pois ravon hem soglem polloitaleo; 56 tanchea modem Magdalachi Marie, Jakob ani Josesachi avoi Marie, ani Zebedevachea putanchi avoi pasun asli.

57 Sanz zata mhunnttlear,* Juze nanvacho Arimatheia-cho ek girest munis thoim ailo, to pasun Jezucho xis zalʼlo. 58 Hea munxan Pilata koddem vochon Jezuchi kudd magli. Tednam Pilatan taka Jezuchi kudd diunchi mhunn hukum dilo. 59 Juzen tachi kudd ghetli, nitoll borea kopddean guttlaili, 60 ani khoddop foddun toiar kelʼlea aplea novea dholint* dovorli. Magir tannem ek vhoddlo fator dhuklun ti dhol* bond keli ani to thoim thaun gelo. 61 Punn Magdalachi Marie ani dusri Marie thoinch dholi mukhar boson ravlim.

62 Hem soglem Sabathachi toiari korta tea disa ghoddlem. Dusrea disa mukhel iadnik ani Farizev Pilata mukhar ektthaim zale, 63 ani mhunnonk lagle: “Saiba, to fotting jivo aslo tednam tannem oxem mhunnttlolem tem amkam ugddas asa, ‘Tin disam uprant mhaka Dev jivont kortolo.’ 64 Taka lagon tisrea disa meren dholichi rakhonn korunk hukum di, na zalear tache xis ieun tachi kudd chorun vhortole ani lokank oxem sangtole, ‘Taka meloleantlo jivont kela!’ Oxem zalem zalear xevottachem fottingponn poilim poros chodd vhoddlem zatolem.” 65 Pilatan tankam sanglem: “Tumi hanga thaun rakhonndar gheun vochat ani tumkam borem dista tea bhaxen tankam nemat.” 66 Tednam te gele ani tannim dholichem dar ekdom bore bhaxen bond* kelem ani thoim rakhonndar dovorle.

28 Sabatha uprant, sumanacho poiloch dis uzvaddtta astana, Magdalachi Marie ani dusri Marie Jezuk dovorloli ti dhol pollounk gelim.

2 Thoddea vella poilim ek vhoddlo bhuimkamp zalʼlo karonn Jehovacho* dut sorgar thaun sokol denvlolo. Dholicher aslolo fator dhuklun to tacher boson aslo. 3 Tachem rup zhoglam sarkem aslem ani tache kopdde dhove-ful asle. 4 Rakhonk dovorlole te soinik ekdom bhiele ani tanchi poristhiti melolea munxa sarki zali.

5 Punn teo bailo dholi lagim aileo tednam devdutan tankam oxem mhunnttlem: “Bhienakat, khambear khillaun marlolea Jezuk tumi sodhtat nhoi? 6 To hanga na, karonn tannem sanglolem toxem Devan taka jivont kela. Ieiat ani taka dovorlolo to zago polloiat. 7 Atam tumi rokddinch vochat ani taka meloleantlo jivont kela mhunn tachea xisank sangat. To tumchea poilim Galilient voitolo ani tumi taka thoim polloitolim. Ho sondex sangonk hanv ailam.”

8 Hem aikon tim rokddinch dholi koddlean bhair sorlim. Tim khub bhielʼlim punn ekdom khuxal pasun aslim. Hi khobor xisank sangonk tim dhanvot voitalim, 9 itlean okosmat tankam Jezu rostear mellʼllo ani tannem tankam zap keli. Tannim tachea fuddean vochon tache paim dhorle ani taka nomoskar kelo. 10 Tednam Jezun tankam mhunnttlem: “Bhienakat! Vochon mhojea bhavank Galilient vochat mhunn khobor diat. Hanv thoim tankam mellttolom.”

11 Teo bailo vatter asleo tednam dhol rakhtale tea soinikam modle thodde xarant gele ani tannim mukhel iadnikank kitem ghoddlem tem soglem sanglem. 12 Tednam mukhel iadnikamnim vhoddilank apoile ani tanchea lagim te uloile. Tannim soinikanchea hatant zaite chandiche nanne dile 13 ani tankam sanglem: “Tumi oxem sangat, ‘Ratche ami nhidlole asle tednam tachea xisamnim ieun tachi kudd chorun vheli.’ 14 Ani hi khobor razpalachea kanar poddli zalear ami taka somzaitole. Tumkam usko korpachi kainch goroz na.” 15 Tor soinikamnim te chandiche nanne ghetle ani zoxem tankam sanglolem toxench tannim kelem. Aiz poriant hich khobor soglea Judevam modem posorloli asa.

16 Te 11 xis Galilient tea dongrar gele zoim Jezun tankam mellonk sanglolem. 17 Jezuk polloilo tednam tannim bagon taka nomoskar kelo, punn thodde tacher dubhavle. 18 Jezun tanchea lagim ieun mhunnttlem: “Sorgar ani prithumer mhaka soglo odhikar dilʼlo asa. 19 Heach pasot, vochat ani soglea raxttrantlea lokank mhoje xis korat, ani tankam Bapachea ani Putachea ani povitr xoktechea nanvan bautizm diat, 20 ani hanvem tumkam dileat teo sogleo adnea tankam pallunk xikoiat. Ani ugddas dovrat, sonvsarachea* xevottachea vella poriant hanv sodanch tumchea sangata asam.”