MARKU PORMONNEM BORI KHOBOR

1 Devacho Put, Jezu Krista vixim bori khobor oxi suru zata: 2 Izaias provadeachea pustokant oxem boroilʼlem asa: “(Polloi! Hanv mhojea sondexkarak tujea fuddem* dhaddttam zo tujea pasot vatt toiar kortolo.) 3 Oronnʼnneant* ek mottʼtto avaz aikonk ieta: ‘Jehova* pasot vatt toiar korat! Tacho rosto nitt korat.’” 4 Tea pormonnem, Juanv Batist oronnʼnneant ailo ani lokamnim bautizm gheuncho mhunn porgott korunk laglo. Ho bautizm, tannim poschatap* kela ani tankam bhogsonnem zai mhunn dakhounk ek khunna asli. 5 Tea pasot, akʼkhea Judeiachea vattarantle ani Jeruzalemantle sogle lok Juanva lagim vochonk lagle. Te aplim patkam ukteponnim manun ghetale ani to tankam Jordan nhoim-ent bautizm ditalo.* 6 Juanv unttachea lhonve thaun toiar kelʼle kopdde ghaltalo ani bhenddak chambddeacho pottʼtto bandtalo. To toll ani ranantlem mhonv khatalo. 7 To oxem porgott kortalo: “Mhojea fattlean zo ieuncho asa to mhojea poros anik chodd xoktivont asa. Hanv tachea paim-anchim zotim pasun kaddunk purto na. 8 Hanv tumkam udkant bautizm ditam, punn to tumkam povitr xokten bautizm ditolo.”*

9 Tea disamnim, Galili vattarantlea Nazaret xara thaun Jezu Juanva lagim ailo ani tannem taka Jordan nhoim-ent bautizm dilo. 10 Jezu udkantlean bhair sortanch sorg ukto zata to ani Devachi povitr xokti parvea bhaxen apleacher denvta ti tannem polloili. 11 Uprant sorgar thaun oso avaz aikonk ailo: “Tum mhozo opurbaiecho Put; tum mhaka manvola.”

12 Tea uprant, povitr xokten taka oronnʼnneant vhelo. 13 Jezu 40 dis poriant tea oronnʼnneant ravlo zoim Soitanan taka tallnnent ghalcho proitn kelo. Thoim ranvotti zonvaram pasun aslim, ani devdut tachi seva kortale.

14 Juanvak dhorun bondkhonnint ghatlea uprant Jezu Galilient gelo ani Devachi bori khobor porgott korunk laglo. 15 Tannem oxem porgott kelem: “Nemlolo vell pavlo, ani Devachem Raj lagim pavlam. Tor poschatap korat ani bore khobrecher bhavarth dovrat.”

16 Galiliechea doria dege voilean cholot voitana Jezun Simanv ani tacho bhav Andrek polloilo. Te doriant zall ghalun nustem dhortale karonn te dogui kharvi asle. 17 Jezun tankam mhunnttlem: “Mhojea fattlean ieiat, zoxe tumi nustem dhortat toxench hanv tumkam munxank dhorpi kortolom.” 18 Hem aikon te rokddech aplem zall soddun tachea fattlean gele. 19 Matso fuddem gelea uprant, Jezun Jakob ani tacho bhav Juanvak polloilo. He dogui Zebedevache put asle, ani te aplea vhoddeant zall sarke kortale. 20 Tannem vell kaddinastana tankam-i apoile. Tor, te aplea bapaik Zebedevak, manaiam sangata vhoddearuch soddun tachea fattlean gele. 21 Te Kapernaumant gele.

Sabath suru zatanch Jezu sobha-ghorant gelo ani tannem lokank xikounk suru kelem. 22 Tachi xikoupachi rit polloun lok ojap zalo, karonn to xastream bhaxen nhoi punn odhikar aslolea bhaxen xikoitalo. 23 Tea sobha-ghorant noxtto dut* boslolo ek munis aslo. Tea munxan mottʼttean mhunnttlem: 24 “Nazaretkar Jezu, amche koddem tuka kitem kam asa? Tum amcho nas korunk aila? Tum konn to hanv boro zannam. Tum Devacho Povitr Sevok!” 25 Punn Jezun taka koddok utramnim mhunnttlem: “Vogi rav, ani tachea voilo bhair sor!” 26 Tednam tea noxttea dutan tea munxak foddfoddailo* ani uprant mottʼttean bob marun tachea voilo bhair soron gelo. 27 Hem polloun sogle lok ojap zale ani eka-mekak oxem mhunnonk lagle: “Hem anik kitem? Hi tor ek novi xikounn! To noxttea dutank pasun odhikaran hukum dita, ani te tachem aikotat.” 28 Jezu vixim hi khobor rokddich akʼkhea Galiliechea vattarant posorli.

29 Uprant, sobha-ghora thaun bhair soron te Simanv ani Andrechea ghora gele. Jakob ani Juanv pasun tachea sangata asle. 30 Simanvachi sasumai duent zaun hantrunnar asli karonn tika zor ietalo. Tannim tichea vixim rokddench Jezuk sanglem. 31 Jezu tichea lagim gelo ani ticho hat dhorun tika utthoili. Tednam ticho zor gelo ani ti tanchi seva korunk lagli.

32 Sanz zatoch, suria buddlea uprant lok soglea duentank ani noxtte dut bosloleank Jezu lagim haddunk lagle. 33 Akʼkhea xarantle lok tanchea dara mukhar ektthaim zale. 34 Tannem veg-vegllea torechem duens aslolea zaitea lokank bore kele ani tannem zaitea noxttea dutank pasun bhair kaddle. Punn tea noxttea dutank to ulounk dinaslo, karonn to Krist mhunn te zannam asle.*

35 Dusrea disa sokallim fuddem kallokh astanach, Jezu utthon bhair konn na toslea zagear gelo. Thoim vochon to magnnem korunk laglo. 36 Tednam Simanv ani tache sangati taka sodhunk lagle, 37 ani to tankam mellʼllea uprant tannim mhunnttlem: “Sogle lok tuka sodhtat.” 38 Punn tannem tankam mhunnttlem: “Ieiat, ami dusre koddem laginchea ganvant vochum-ia. Hanvem thoim pasun porgott korunk zai, karonn heach pasot hanv ailam.” 39 Thoim thaun gelea uprant, to akʼkhea Galiliechea sobha-ghoramnim porgott korunk laglo ani lokancher aslole noxtte dut kaddunk laglo.

40 Uprant tachea lagim kodd zalʼlo ek munis ailo ani tachea mukhar dimer poddon vinoti korunk laglo: “Tuka zai zalear tum mhaka nitoll korunk xokta.” 41 Taka polloun Jezuk tachem churchurem dislem, ani tannem aplo hat fuddem korun taka lailo ani mhunnttlem: “Hoi, mhaka zai! Nitoll zav.” 42 Teach vellar tachem kodd nanch zalem, ani to nitoll zalo. 43 Magir Jezun taka rokddoch dhaddlo ani koddok utramnim oxem sanglem: 44 “Polloi, hea vixim konnankuch sangonaka, punn tum boro zala mhunn iadnikank kollche khatir vochon tankam tuji kudd dakhoi ani uprant Moizesan jeo-jeo vostu bhettounk sangloleo teo bhettoi.” 45 Punn thoim thaun gelea uprant, tea munxan sogleank hea vixim sanglem, ani ti khobor sogleak posorli. Tednam thaun Jezuk khoinchea-i xarant ukteponnim vochonk kotthin zaunk laglem. Dekhun to konn na tea zagear vochon ravonk laglo. Tori astana, soglea zagea voilo lok tachea lagim ieunk laglo.

2 Thoddea disam uprant, Jezu porot Kapernaumant ailo. To ghora asa mhunn sogleank khobor pavli. 2 Thoim zaite lok ektthaim zale. Ghor itlem bhorlem ki dara lagim pasun zago uronk na, ani Jezu tankam Devachem utor xikounk laglo. 3 Tednam char munis ar zalʼlea eka munxak ubarun thoim gheun aile. 4 Punn lokanchi gordi asli dekhun te taka Jezu lagim bhitor vhoronk xokona zale. Taka lagon, tannim Jezu boslolo thoincho, ghora voilo zago foddun kaddlo ani to bhag ukto korun ar zalʼlea munxak khatti soit sokol denvoilo. 5 Tancho bhavarth polloun Jezun ar zalʼlea munxak mhunnttlem: “Puta, tujim patkam bhogsolim.” 6 Thoim thodde xastri boslole. Te monantuch oxem chintunk lagle: 7 “Ho munis oxem koxem ulounk xokta? To Devachea add uloita. Deva bogor anik konn patkam bhogsunk xokta?” 8 Punn te monant kitem chintʼtat tem Jezu rokddoch somzolo. Tor tannem tankam mhunnttlem: “Tumi oxem kiteak chintʼtat? 9 Hea ar zalʼlea munxak kitem mhunnonk chodd sompem asa, ‘Tujim patkam bhogsolim,’ vo ‘Utth, tuji khatt ukol ani chol’? 10 Punn munxachea Putak prithumer lokanchim patkam bhogsunk odhikar asa hem tumkam kollchem mhunn—” tannem ar zaun dhorlolea munxak mhunnttlem: 11 “Hanv tuka sangtam, utth, tuji khatt ukol, ani ghora voch.” 12 Tednam to munis utthon ubo ravlo ani rokddoch apli khatt uklun sogleanchea mukhavoilean bhair gelo. Hem polloun sogle ojap zale ani oxem mhunnon Devak mhoima diunk lagle: “Ami oxem poilim kednanch pollounk na.”

13 Magir Jezu thoim thaun bhair soron doriachea deger gelo, tednam soglo lok tachea lagim ieit ravlo, ani to tankam xikounk laglo. 14 Thoim thaun fuddem voita astana taka Alfevacho put Levi, tax vosul korpeachea nakear boslolo dislo. Jezun taka mhunnttlem: “Ieo, mhozo xis zav.” Tednam to utthlo ani tachea fattlean gelo. 15 Uprant to Levichea ghorant jevnnak boslolo, ani thoim zaite tax vosul korpi ani tanchea sarke dusre patki munis Jezu ani tachea xisam sangata jevnnak boslole. Tanchea modle zaite zann Jezuche xis zalʼle. 16 Punn Farizevam* modlea thoddea xastreamnim Jezuk patkeam sangata ani tax vosul korpeam sangata jevta tem polloilem tednam tannim tachea xisank vicharlem: “Ho tax vosul korpeam sangata ani patkeam sangata jevta?” 17 Hem aikon Jezun tankam mhunnttlem: “Bholaiken ghott asat tankam nhoi, punn duent asat tankam voizachi goroz asa. Hanv nitivont* lokank nhoi, punn patkeank apounk ailam.”

18 Juanvache xis ani Farizev upas kortale. Tor te Jezu lagim aile ani tannim vicharlem: “Juanvanche xis ani Farizevanche xis upas kortat, punn tuje xis upas kiteak korinant?” 19 Tednam Jezun tankam mhunnttlem: “Novro aplea ixttam sangata asta tednam tache ixtt upas kortat kai? Na! Jea meren novro aplea ixttam sangata asta tea meren te upas korinant. 20 Punn oxe dis ietole jednam novreak tanchea thaun pois vhortole, ani tednam te upas kortole. 21 Burak poddlolea pornea kopddeak konnuch novea kopddeacho kuddko laina. Oxem kelem zalear, novo kopddo avolltta ani pornea kopddeak poddlolo burak anikui motto zata. 22 Toxench lok kednanch pornea soreachea potiamnim* drakxancho novo soro ghalinant, karonn oxem kelem zalear teo potio futtʼttoleo ani soro votʼtolo. Tor lok drakxancho novo soro novea soreachea potiamnim ghaltat.”

23 Ek pavtt Jezu Sabathachea disa xetantlean voitalo tednam tache xis thoinchim thoddim konnsam toddunk lagle. 24 Tednam Farizevamnim taka mhunnttlem: “Tuje xis Sabathachea disa korunk zaina tem kam kiteak kortat?” 25 Punn Jezun tankam mhunnttlem: “David ani tachea munxank bhuk lagli ani tanchea lagim khaunk kainch naslem tednam Davidan kitem kelem tem tumi kednanch vachunk na? 26 Abiathar mukhel iadnik aslo tea kallar Davidan Devachea ghorant* vochon povitr* undde khalʼle ani thodde aplea sangata aslolea munxankui dile je iadnikam xivai anik konnench khaunk zainasle. Hea vixim tumi vachunk na?” 27 Uprant Jezun mhunnttlem: “Sabath dis munxak lagon kela, munxak Sabath disak lagon nhoi. 28 Tor munxacho Put Sabath disacho pasun Dhoni zaun asa.”

3 Porot ek pavtt to sobha-ghorant gelo. Thoim ek munis aslo zacho ek hat ar zaun dhorlolo.* 2 Jezu taka Sabathachea disa boro korta kai mhunn pollounk Farizev tacher barik nodor dovrun asle, karonn tankam tacher arop ghalunk zai aslo. 3 Tednam Jezun hatak ar zalʼlea* munxak mhunnttlem: “Utth, hanga modem ieo.” 4 Magir tannem tankam vicharlem: “Sabathachea disa kitem korop sarkem, ekleachem borem korop kai vaitt korop, konnancho jiv vachovop kai jiv kaddop?” Punn te vogich ravle. 5 Tanchem kalliz fatra sarkem zalam tem polloun Jezu khub dukhi zalo. Tannem ragan tankam polloilem ani tea munxak mhunnttlem: “Tuzo hat fuddem kor.” Tannem aplo hat fuddem kelo tednam tacho hat boro zalo. 6 Hem polloun Farizev bhair gele ani teach vellar Herodachea pokxachea lokam sangata mellon Jezuk jivexim marunk ievzonn korunk lagle.

7 Punn Jezu thoim thaun bhair soron aplea xisam sangata doria deger gelo. Tednam Galilientle ani Judeiantle khub lok tachea fattlean gele. 8 To kortalo tea zaitea vizmitam vixim aikon Jeruzalem, Idumeia ani Jordan nhoim-chea poltoddchea vattarantle, toxench Tir ani Sidon vattarachea bhonvtonnche zaite lok pasun tachea lagim ieunk lagle. 9 Lokanchea gordent apunn chiddʼddona zaunk tannem aplea xisank ek lhan vhoddem toiar dovrunk sanglem. 10 Jezun zaitea lokanchim duensam borim kelʼlim. Taka lagon borech duent aslole lok taka hat lavunk tachea bhonvtonnim gordi korunk lagle. 11 Ani noxtte dut boslole lok Jezuk polloitale tednam te pasun tachea mukhar ieun poddttale ani bob marun mhunnttale: “Tum Devacho Put.” 12 Punn apunn konn to tannim konnankuch sangchem nhoi mhunn to tankam zaitea pavtti koddok utramnim hukum ditalo.

13 Magir Jezu dongrar gelo. Tannem apnnak zai tea xisank thoim apoile, ani te gele. 14 Tannem 12 zannank vinchle* ani tankam apostl mhunn nanv dilem. Te tachea borabor astale ani to tankam porgott korunk dhaddttalo. 15 Toxench tannem tankam noxtte dut kaddcho odhikar-ui dilo.

16 Tannem vinchlolea* 12 xisanchim nanvam him: Simanv, zaka tannem Pedru mhunn nanv dilem, 17 Zebedevacho put Jakob, ani Jakobacho bhav Juanv (Jezun tankam Boanerges oxem nanv dilem, zacho orth “Goddgoddache Put”), 18 Andre, Filip, Bartholomev, Matev, Thomas, Alfevacho put Jakob, Tadev, Urbevont* Simanv 19 ani Judas Iskariot zannem uprant tacho ghat kelo.

Magir Jezu eka ghorant gelo. 20 Porot ek pavtt itlo lok ektthaim zalo ki Jezu ani tachea xisank jevunk pasun mellonk na. 21 Punn Jezuchea ghorcheank hi khobor kollʼlli ani tim taka dhorun haddunk bhair sorlim, karonn tim mhunnttalim: “To toklen suttla.” 22 Jeruzalema thaun ailʼle xastri oxem mhunnttale: “Tachea bhitor Belzebul* asa. To noxttea dutanchea razachea modotin lokancher boslole noxtte dut kaddtta.” 23 Tednam Jezun tankam aplea lagim apoile ani vopareo sangon mhunnttlem: “Soitan Soitanak koso kaddunk xokta? 24 Eka rajeant futt poddot zalear tem raj togchem na; 25 ani khoinchea-i ghorant futt poddli zalear tem ghor togchem na. 26 Teach toren, Soitan apleach add ubo ravta zalear ani taka sangat ditoleam modem futt poddtta zalear to togcho na punn tacho xevott zatolo. 27 Konnui eka bollixtt munxachea ghora vochon tachem saman luttunk sodhta zalear tannem tea munxak poilim bandun dovorcho poddttolo. Tea uprantuch, to tachem ghor luttunk xoktolo. 28 Hanv tumkam khorench sangtam, munxamnim koslim-i patkam korum vo tim konnanchea-i add uloum, tea soglea pasot tankam bhogsonnem mellttolem. 29 Punn zo konn povitr xoktechea add uloita taka kednanch bhogsonnem mellchem na. Tachea bodlek hea patkak lagon to sasnak guneanvkari astolo.” 30 Jezun oxem mhunnttlem karonn te mhunnttale: “Tacher ek noxtto dut asa.”

31 Magir tachi avoi ani bhav aile. Tim bhairuch ubim ravlim ani taka apoun haddunk tannim konnank tori dhaddlo. 32 Tachea bhonvtonnim zaito lok boslolo aslo. Tannim taka mhunnttlem: “Tuji avoi ani tuje bhav bhair ube asat. Tim tuka mellonk sodhtat.” 33 Punn Jezun tankam mhunnttlem: “Mhoji avoi ani mhoje bhav konn?” 34 Magir aplea bhonvtonnim boslolea lokank polloun tannem mhunnttlem: “Polloi, hi mhoji avoi ani mhoje bhav! 35 Zo konn Devachi khuxi korta toch mhozo bhav, mhoji bhoinn ani mhoji avoi.”

4 Porot ek pavtt doria deger to lokank xikounk laglo, thoim tachea lagim lokancho vhoddlo zomo ektthaim zalo. Taka lagon, to vhoddear boson doria deger thaun matso pois gelo ani thoim thaun lokank xikounk laglo. Soglo lok doria deger aslo. 2 To vopareamnim tankam zaiteo vostu xikounk laglo. Tannem mhunnttlem: 3 “Dhean diun aikat! Ek xetkar bim vompunk gelo. 4 To bim vomptalo tednam thoddem bim rosteachea kuxik poddlem, ani suknneamnim ieun tem khalem. 5 Thoddem bim khoddpi zomnir poddlem. Thoim chodd mati nasli dekhun tem bim rokddench kirlolem. 6 Punn suria udelea uprant koddok votak lagon tem bim korpolem karonn taka mull ieunk naslem. 7 Thoddem bim kantteamnim poddlem, ani kantteanchea zhaddamnim taka vaddonk diunk na ani taka pik zaunk na. 8 Punn thoddem bim borea zomnir poddlem. Tem kirlolem ani vaddlem ani taka pik zaunk laglem. Konnank 30 pavtti chodd, konnank 60 pavtti ani konnank 100 pavtti.” 9 Magir tannem mhunnttlem: “Kan asat tannim aikonchem.”

10 Jezu ekttoch aslo tednam tache xis ani Bara zann* tachea lagim hea vopaream vixim prosn vicharunk lagle. 11 Jezun tankam mhunnttlem: “Devachea Rajeachi povitr guttachi somzonni tumkam dilea, punn urloleank teo fokot vopari zaun asat, 12 dekhun te polloitole punn tankam dischem na, te aikotole punn tankam tancho orth somzochona; ani te kednanch fatti vollon Deva lagim ieunche nant ani tankam bhogsonnem-i mellchem na.” 13 Uprant tannem mhunnttlem: “Hea voparecho orth tumkam somzonk na zalear, urlolea soglea vopareancho orth tumkam koso somzotolo?

14 “Vompʼpi Devachem utor vompta. 15 Jem bim rosteachea kuxik vomplolem, te osle lok zaun asat je utor aikotat punn rokddoch Soitan ieta ani tanchea modem vomplolem utor gheun voita. 16 Toxench, jem bim khoddpi zomnir vomplolem, te osle lok zaun asat je utor aikotanch tem khuxalkaien manun ghetat. 17 Punn tankam mullam asonant dekhun te thoddoch vell urtat, uprant Devachea utrak lagon tancher tras vo dhumallo ieta tednam te bhavarth dovorcho soddun ditat.* 18 Thoddem bim kantteamnim vomplem. He osle lok zaun asat je Devachem utor aikotat khorem, 19 punn hea sonvsarache* uske, lokank bhuloita tosli poixanchi takot ani her soglea vostum pasot vondovnneo tanchea kallzant ietat ani sondex damun dovortat, ani tankam pik zaina. 20 Xevottak jem bim borea zomnir vomplem te osle lok zaun asat je Devachem utor aikon khuxen manun ghetat ani pik ditat—konn 30 pavtti chodd, konn 60 pavtti ani konn 100 pavtti.”

21 Uprant Jezun tankam mhunnttlem: “Konnui divo pettoun eka aidona ponda vo khatti ponda dovorta kai? To divo haddun to eka unch zagear dovorna kai? 22 Oxem kainch lipoun dovorlolem na jem uktem zaunchem na; ani oxem kainch borem korun gupit dovorlolem na jem ugddapem zaunchem na. 23 Kan asat tannim aikonchem.”

24 Magir Jezun tankam mhunnttlem: “Tumi jem aikotat tacher dhean diat. Jea mapan tumi mezun ditat teach mapan tumkam-i mezun ditole, khorem mhunnttlear, tumkam tachea poros chodd ditole. 25 Karonn zachea lagim asa taka anik ditole, punn zachea lagim na tache koddlean asa tem-ui kaddun ghetole.”

26 Magir tannem mhunnttlem: “Devachem Raj eka oslea munxa sarkem asa zo aplea xetant bim ximpddaita. 27 To munis sodam ratcho nhidta ani sokallim utthʼtta. Hea vella bhitor tem bim kirlota ani vaddtta, punn koxem tem to nokllo. 28 Zomin hollu-hollu korun apunnuch pik diunk lagta, poilim ropo zata, magir konnos, ani xevottak konnsant danno toiar zata. 29 Ani xet pikta tednam to villo laita, karonn lunvnnecho vell pavlo.”

30 Magir tannem mhunnttlem: “Ami Devachea Rajeak kitea sangata sor korunk zata, vo kosli vopar diun somzaunk zata? 31 Tem sansvachea bie bhaxen asa. Ti bi zomnint vompta tednam bim-am modem sogleant lhan asta. 32 Punn vomplea uprant, ti vaddtta ani soglea bhajeanchea zhaddam poros tem zhadd vhoddlem zata. Taka vhoddle-vhoddle khande zatat ani tachea savllek mollba voilim suknnim pasun ghontter kortat.”

33 Tor, hea torecheo zaiteo vopareo sangon te somzonk xoktat tea ritin Jezu tankam Devachem utor xikoitalo. 34 Khorench, to vopari uzar korinastana uloinaslo, punn to aplea xisank hea soglea vostuncho orth somzaitalo.

35 Tea disa sanjer, tannem aplea xisank mhunnttlem: “Ieiat, ami doriachea poltoddi vochum-ia.” 36 Tor lokank dhaddlea uprant te taka vhoddeant gheun gele. Tanchea vhoddea borabor dusrim-i vhoddim aslim. 37 Titlean, ek vhoddlem vadoll ailem, ani lharam itlea zoran ieun vhoddear marunk laglim ki vhoddem buddonk pavlem. 38 Punn Jezu vhoddeachea fattlea vatten uxeacher tokli dovrun nhidlolo. Xisamnim taka utthoilo ani mhunnttlem: “Guruji, ami buddttat ani tuka amchem kainch poddon vochonk na?” 39 Tor to utthlo ani tannem vadollak ani doriak xant zaunk hukum diun mhunnttlem: “Shhh! Vogi rav!” Tednam vadoll thamblem ani soglem xant zalem. 40 Jezun tankam mhunnttlem: “Tumi itle kiteak bhietat? Tumkam azunui bhavarth na?” 41 Punn xis ekdom bhiele ani eka-mekak mhunnonk lagle: “Ho munis konn kai? Vadoll ani doria pasun tacho hukum aikotat.”

5 Uprant te doriachea poltoddi Gerazenachea vattarant pavle. 2 Jezu vhoddeantlean bhair sorona fuddem, ek munis zacher noxtto dut boslolo aslo, to dholi* asleo thoim thaun bhair soron tachea lagim ailo. 3 To munis dholi asleo thoim ravtalo ani taka konnuch sanklleamnim pasun bandun dovrunk xokonaslo. 4 Taka zaitea pavtti beddiamnim ani sanklleamnim bandlolo. Punn to sanklleo toddun uddoitalo ani beddianche kuddke-kuddke kortalo. Taka tabeant korunk konnankuch titli xokti nasli. 5 To dis-rat dholi ani dongor asle thoim thaun bovall martalo ani apleakuch fatramnim ghave korun ghetalo. 6 Punn pois thaun Jezuk polloitanch to dhanvon tachea koddem gelo ani tachea paim-am poddlo. 7 Magir tannem mottʼttean bob marun oxem mhunnttlem: “Sogleant Vortea Devachea Puta Jezu, tuka mhojea lagim kitem kam asa? Hanv Devacho soput ghalun tuka sangtam, mhaka tollmollainaka.” 8 Tannem taka oxem mhunnttlem karonn Jezun taka mhunnttlolem: “Noxttea duta, hea munxa voilo bhair sor.” 9 Punn Jezun taka vicharlem: “Tujem nanv kitem?” Tannem mhunnttlem: “Mhojem nanv Polttonn,* karonn ami zaite zann asat.” 10 Ani tannem porot-porot apnnak hea vattarantlo bhair ghalinaka mhunn Jezu lagim vinoti keli.

11 Tea dongrar dukrancho ek vhoddlo hindd chortalo. 12 Tor noxttea dutamnim tachea lagim vinoti korun mhunnttlem: “Ami tea dukram bhitor rigonk amkam tancher dhadd.” 13 Tannem tankam porvangi dili. Tednam te noxtte dut tea munxa thaun bhair soron dukramnim rigle, ani sumar 2,000 dukrancho akʼkho hindd dhanvon vochon dongra voilean doriant poddlo ani te sogle dukor udkant buddon mele. 14 Punn tanche rakhnne thoinchean pollon gele ani xaramnim ani ganvamnim vochon tannim hea vixim lokank sanglem. Thoim kitem ghoddlolem tem pollounk lok thoim aile. 15 Te Jezu lagim aile tednam jea munxacher noxtte dut asle, mhunnche zacher poilim polttonn asli, to munis thoim boson asa tem tannim polloilem. Atam to kopdde ghalun asa ani toklen sarko zala tem polloun te khub bhiele. 16 Jea munxamnim noxtte dut boslolea munxak ani dukranchem kitem zalem tem polloilʼlem tannim tea vixim lokank sanglem. 17 Tednam te Jezuk aplo vattar soddun voch mhunn vinoti korunk lagle.

18 Jezu vhoddear choddttalo tednam adim noxtto dut boslolo munis, apunnui tujea sangata ieta mhunn tachea lagim vinoti korunk laglo. 19 Punn Jezun taka ieunk diunk na. Tannem taka mhunnttlem: “Tujea ghora voch, ani Jehovan* tujea pasot jem kitem kelam ani tuka koxi doia dakhoilea tea vixim tujea soireank sang.” 20 Tednam to munis thoim thaun gelo ani Jezun tachea pasot jem kitem kelam tem soglem tannem Dekapolint* porgott kelʼle, ani soglo lok ojap zalo.

21 Jezu vhoddear boson poltoddi porot ailo. To doria deger astanach lokancho ek vhodd zomo tachea bhonvtim ektthaim zalo. 22 Tednam Jairus nanvacho sobha-ghoracho ek odhikari thoim ailo, ani Jezuk polloitoch tachea paim-am poddlo. 23 To porot-porot taka oxem mhunnon vinoti korunk laglo: “Mhoji lhan dhuv khubuch duent asa.* Upkar korun mhojea borabor ieo ani tuzo hat ticher dovor, jea udexim ti bori zatoli ani jietoli.” 24 Tednam Jezu tachea borabor gelo, ani lokancho vhoddlo zomo tachea fattlean vochonk laglo ani tachea bhonvtonnim gordi korunk laglo.

25 Thoim ek bail asli jika 12 vorsam thaun rogtpatachem duens* aslem. 26 Tinnem zaite voiz kelʼle ani tanche koddlean ilaz ghetana khub tras soslole. Aple sogle poixe khorch korun pasun tichi poristhiti bori zaunk na punn anik vaitt zalʼli. 27 Jezu vixim aikolem tednam ti lokanchea gordentlean tachea fattlean aili ani tachea kopddeak tinnem hat lailo. 28 Karonn ti oxem mhunnot asli: “Hanvem fokot tachea kopddeank pasun hat lailo zalear hanv bori zatoli.” 29 Teach vellar tichem rogot vhanvpachem bond zalem, ani tika khub tras zatale tea duensantlean ti bori zali mhunn tika kollʼllem.

30 Tednanch apli xokti bhair sorli mhunn Jezuk kollon ailem ani tannem fatti vollon zomeantlea lokank vicharlem: “Mhojea kopddeak konnem hat lailo?” 31 Punn xisamnim taka mhunnttlem: “Lok gordi korun tujer poddttat hem tum zannam, tori astana ‘Mhaka konnem hat lailo,’ mhunn tum vicharta?” 32 Punn apleak konnem hat lailo kai mhunn Jezu soglea vatten pollounk laglo. 33 Apunn bori zali mhunn kollʼllea uprant ti bail ekdom bhieli ani koddkoddot tachea lagim aili. Jezuchea paim-am mukhar poddon tinnem soglem sot sanglem. 34 Jezun tika mhunnttlem: “Dhuve, tujea bhavarthan tuka bori keli. Atam xantin voch. Tuka tras dita tea duensantli tum bori zali.”

35 To uloita astana, sobha-ghorachea odhikareachea ghora thaun thodde munis aile ani tannim mhunnttlem: “Tuji dhuv meli! Atam Gurujik anik kiteak apoita?” 36 Punn tanchim utram kanar poddttanch Jezun tea sobha-ghorachea odhikareak mhunnttlem: “Bhienaka, fokot bhavarth dovor.” 37 Tednam tannem Pedru, Jakob ani Jakobacho bhav Juanvak soddun anik konnankuch aplea borabor ieunk diunk na.

38 Te sobha-ghorachea odhikareachea ghora pavle tednam thoim khub bovall zata ani lok roddtta ani vhoddlean bob marta tem tannem polloilem. 39 Ghorant bhitor soron Jezun tankam mhunnttlem: “Tumi kiteak roddttat ani bovall kortat? Bhurgem moronk na punn tem nhidlam.” 40 Tednam te lok tacher tiddkole ani tachim fokannam korun hasonk lagle. Punn tankam sogleank bhair dhaddlea uprant to bhurgeachea avoi-bapaik ani aplea borabor asloleank gheun bhurgem aslem thoim gelo. 41 Uprant tannem tea bhurgeacho hat dhorlo ani mhunnttlem: “Talitha kumi,” zacho orth: “Baie, hanv tuka sangtam, ‘utth!’” 42 Teach vellar tem cheddum utthlem ani cholonk laglem. (Tem 12 vorsanchem aslem.) Ani hem polloun tim soglim khub khuxal zalim. 43 Tannem tankam porot-porot* hukum ghalun hea vixim konnankuch sangonakat mhunnttlem, ani bhurgeak kitem tori khaunk diat mhunn sanglem.

6 Thoim thaun bhair sorlea uprant Jezu aplea ganvant ailo zoim to vaddlolo, ani tache xisui tachea borabor aile. 2 Sabathachea disa to sobha-ghorant xikounk laglo ani zannim tachi xikounn aikoli tantuntle choddxe lok ojap zale ani mhunnonk lagle: “Ho munis heo vostu khoim thaun xiklo? Itli zannvai taka khoim thaun mellʼlli? Ani him vizmitam korunk taka xokti konnem dili? 3 Ho tor thovoi nhoi, Mariecho put? Ani Jakob, Juze, Judas, ani Simanv tache bhav nhoi? Ani tacheo bhoinno amcheach modem ravtat nhoi?” Taka lagon tannim tacher bhavarth dovrunk na. 4 Punn Jezun tankam mhunnttlem: “Eka provadeak sogleak man melltta punn fokot tachea ganvant, ghorant ani soiream modem man mellona.” 5 Tor tannem thoim chodd vizmitam korunk nant. Fokot thoddea duent munxancher hat dovrun tankam bore kele. 6 Khorem mhunnttlear, tankam bhavarth na tem polloun to ekdom ojap zalo. Tea uprant to bhonvtonnchea ganvamnim vochon xikounn diunk laglo.

7 Uprant tannem Bara zannank* apoile ani dog-dog zannanchi zoddi korun tankam dhaddunk laglo. Tannem tankam noxttea dutancher odhikar dilo. 8 Toxench tannem tankam adnea pasun dileo ki tannim vattek lagon ek danddo soddun anik kainch gheunchem nhoi, mhunnche unddo, jevnnachi poti vo bhenddachea pottʼtteant* poixe.* 9 Ani don zoddi kopdde pasun gheunche nhoi* punn fokot paim-ank zotim ghalchim. 10 Jezun tankam hem-ui sanglem: “Tumi eka ghorant bhitor sortat tednam tea vattarant aso-poriant thoinch ravat. 11 Ani khoinchea-i vattarant lok tumkam ieukar dina zalear vo tumchem aikona zalear tankam govai mellchea khatir thoim thaun bhair sortana tumchea paim-anchi dhulʼl fafddun uddoiat.” 12 Tednam te bhair sorle ani lokamnim poschatap korcho mhunn porgottunk lagle. 13 Tannim zaite noxtte dut kaddle ani zaitea duent lokank tel lavun bore kele.

14 Hi khobor Herod* Razachea kanar poddli karonn Jezuchem nanv khub famad zalʼlem. Lok mhunnttale: “Juanv Batistak meloleantlo jivont kela, ani taka lagon to him vizmitam korta.” 15 Punn dusre lok mhunnttale: “To Elija.” Anik thodde lok mhunnttale: “To adlea provadeam bhaxenuch ek provadi.” 16 Herodan hem aikolem tednam tannem mhunnttlem: “Jea Juanvachi gomtti hanvem katorloli to atam jivont zala.” 17 Herod Herodiasa lagim kazar zalʼlo ji tacho bhav Filipachi bail asli. Tika lagon Herodan Juanvak dhorlolo ani taka sanklleamnim bandun bondkhonnint uddoilʼlo. 18 Karonn Juanv Herodak mhunnttalo: “Tunvem tujea bhavachea bailek tuji bail korun ghetlea tem sarkem nhoi.” 19 Tea pasot Herodias Juanvacho rag dhorun asli ani taka marunk sodhtali, punn tika sondhi mellona zali. 20 Karonn Juanv ek nitivont ani povitr munis mhunn Herod zannam aslo ani taka lagon to bhietalo ani tacho jiv vattounk sodhtalo. Juanvachim utram aikon kitem korchem mhunn Herod chintunk poddttalo. Tori astana, to khuxen tachem aikotalo.

21 Punn ek dis Herodias vatt polloitali ti sondhi aili. Tea disa Herodacho zolmdis aslo ani tannem sanjer ek vhodd jevonn dovorlolem. Tannem aplea vhodd-vhodd odhikareank, senapotink ani toxench Galiliechea famad lokank jevnnak apoilʼle. 22 Tednam Herodiasachi dhuv aili ani nachli, ani tinnem Herodachem ani jevnnak ailolea lokanchem kalliz khuxal kelem. Herodan tika mhunnttlem: “Tuka zai tem mag, hanv tuka ditolom.” 23 Tannem soput gheun tika mhunnttlem: “Tum kitem-i mag, mhojem ordem raj pasun hanv tuka ditolom.” 24 Tednam tea cheddvan bhair vochon aple avoik vicharlem: “Hanv kitem magom?” Tichea avoin mhunnttlem: “Juanv Batistachi tokli mag.” 25 Teach vellar tea cheddvan rokddench raza lagim vochon oxem mhunnttlem: “Tum mhaka atanch eka tattant Juanv Batistachi tokli haddun di.” 26 Hem aikon raza khub dukhi zalo. Tori astana apnnem ghetlolea soputak lagon ani thoim jevnnak ailolea lokank lagon tem cheddum magta tem diunk to fatti soronk na. 27 Razan rokddoch eka rakhonndarak dhaddun Juanvachi tokli haddunk hukum dilo. Tor tannem bondkhonnint vochon Juanv Batistachi gomtti katorli 28 ani ti eka tattant ghalun cheddvak haddun dili, ani tea cheddvan ti aplea avoik dili. 29 Juanvachea xisank hea vixim khobor mellʼlli tednam tannim ieun tachi kudd vheli ani eka dholint* dovorli.

30 Jezuche apostl tachea bhonvtonnim ektthaim zale ani tannim lokam pasot jim kamam kelʼlim ani tankam jem xikoilʼlem tem soglem taka sanglem. 31 Thoim zaito lok ieta-voitalo ani tankam jevunk pasun vell mellonk naslo. Tor Jezun tankam mhunnttlem: “Ieiat, ami konn na toslea zagear vochon visov gheum-ia.” 32 Tor vhoddear boson te konn na toslea zagear vochonk bhair sorle. 33 Punn lokamnim te voitat tem polloilem, ani zaiteank hea vixim kollon ailem. Tednam soglea xarantle lok dhanvon tanchea poilinch tea zagear pavle. 34 Vhoddea voilo denvlea uprant Jezun lokancho ek vhoddlo zomo polloilo. Tankam polloun taka tanchem churchurem dislem, karonn te lok gonvlli naslolea menddram sarke asle. Ani to tankam zaiteo vostu xikounk laglo.

35 Atam zaito vell zaun gelʼlo dekhun tachea xisamnim tachea lagim ieun mhunnttlem: “Hea vattarant konn lok ravona ani atam khub vell zala. 36 Taka lagon lokank khaunk kitem-i viktem gheunk bhonvtonnchea ganvamnim ani kheddea ganvamnim dhaddun di.” 37 Punn Jezun tankam mhunnttlem: “Tuminch tankam kitem-i khaunk diat.” Hem aikon xisamnim vicharlem: “Tor ami 200 dinarache* undde vikte gheun tankam khaunk diunche kai?” 38 Jezun tankam mhunnttlem: “Tumchea lagim kitle undde asat tem vochon polloiat.” Polloun ailea uprant tannim mhunnttlem: “Panch undde ani don nustim-i asat.” 39 Uprant Jezun soglea lokank lhan-lhan zome korun tonnacher bosat mhunn sanglem. 40 Te lok xembor-xembor ani ponʼnas-ponʼnas zannanche lhan zome korun bosle. 41 Jezun te panch undde ani don nustim gheun mollbar polloun magnneant upkar attoile. Uprant tannem tea don unddeanche kuddke korun xisank dile, ani xisamnim te lokank vanttle. Tim don nustim pasun tannem sogleank vanttlim. 42 Tednam tim soglim pottbhor jevlim, 43 ani tannim urlole kuddke ektthaim kele tednam 12 panttleo bhorleo, tea bhair nustim-i urlolim. 44 Undde khalʼlolea lokam modem 5,000 dadle asle.

45 Uprant rokddench Jezun aplea xisank vhoddear boson aplea poilim poltoddi Bethsaidant vochonk sanglem, punn lokank dhaddunk to fatti ravlo. 46 Lokank dhaddlea uprant to magnnem korunk eka dongrar gelo. 47 Sanz zali tednam vhoddem doriachea modem aslem, punn to ekloch dongrar aslo. 48 Varem portem martalem dekhun xisank vhoddem tannunk kotthin zatalem mhunn tannem polloilem. Ratchea sumar chovtea parar* to doriacher cholon tanchea vatten ailo; punn to tanchea mukhar vochonk sodhtalo oxem distalem. 49 To udkacher cholta tem xisamnim polloilem tednam te monantuch oxem mhunnonk lagle: “Ami sopon polloitat koxem dista!” Ani te mottʼttean bob marunk lagle. 50 Karonn tannim sogleamnim taka polloilo ani te bhiele. Punn tannem rokddench tanchea lagim uloun mhunnttlem: “Dhir dhorat! Hanv to; bhienakat.” 51 Uprant Jezu tanchea lagim ieun vhoddear choddlo ani vadoll thamblem. Hem polloun te khub ojap zale, 52 karonn unddeachem vizmit polloun pasun jem tankam kollonk zai aslem tem tankam kollonk na. Tanchem mon tacho orth somzonk pavlem na.

53 Te poltoddi Genezaretachea doria deger pavle tednam tannim nangor denvoun vhoddem bandun dovorlem. 54 Punn te vhoddeantlean bhair sortanch lokamnim Jezuk vollkholo. 55 Ani akʼkhea vattarant dhanvon vochon te duent lokank khattir ghalun Jezu jea-jea zagear asa mhunn tankam khobor mellʼlli thoim te tankam gheun aile. 56 Jezu khoinchea-i xaramnim, ganvamnim ani kheddea ganvamnim voitalo tednam lok thoinchea bazarant duent asloleank haddun dovortale, ani te fokot apnnak tachea kopddeanchea degek hat lavunk di mhunn tachea lagim vinoti kortale. Ani jea lokamnim tachea kopddeank hat lailo te sogle bore zale.

7 Jeruzalema thaun ailole Farizev ani thodde xastri Jezu bhonvtonnim ektthaim zale. 2 Jezuche thodde xis mhellea hatamnim, mhunnche hat dhuinastana* jevtat tem tannim polloilem. 3 (Khorem mhunnttlear Farizev ani sogle Judev aplea purvozancheo riti-rivazo bariksannen pallttale, tea pasot te aple hat kompra poriant dhuilea bogor jevnasle, 4 ani bazara thaun ailea uprant apleak udkant xudʼdh kelea bogor te jevnasle. Osleo anik zaiteo riti-rivazo asleo jeo te bariksannen pallttale, zoxem peleank, kollxeank, ani tambeachea aidonank udkant buddoun kaddop.) 5 Tor hea Farizevamnim ani xastreamnim Jezuk vicharlem: “Tuje xis purvozancheo riti-rivazo kiteak pallinant ani mhellea hatamnim kiteak jevtat?” 6 Jezun tankam mhunnttlem: “Are dhongeamno, Izaias provadean tumchea vixim kelʼli bhasaunni ekdom sarki asa. Tannem boroilʼlem, ‘He lok vonttamnim mhaka man ditat, punn tanchem kalliz mhojea thaun khub pois asa. 7 Te mhoji bhokti kortat punn tacho kainch faido na karonn te munxamnim kelʼle kaide Devachi xikounn mhunn xikoitat.’ 8 Tumi Devacheo adnea pallpacheo soddun ditat ani munxancheo riti-rivazo dhorun ravtat.”

9 Uprant tannem tankam mhunnttlem: “Tumi apleo riti-rivazo samballunk kitlea xanneponnan Devacheo adnea kainch nhoi koxeo kortat. 10 Udharonnak, Moizesan mhunnttlolem, ‘Tujea bapaik ani tujea avoik man di,’ ani, ‘Zo aplea bapaicho vo avoicho opman korta* taka jivexim marcho.’ 11 Punn tumi mhunnttat, ‘Ek munis aplea bapaik vo aplea avoik oxem mhunntta: “Tumkam upkarak poddonk xokta toslem mhojea koddem jem kitem asa tem korban kelam,” (mhunnche, Devak bhettounk dovorloli ek bhett) zalear tantunt kainch chuk na.’ 12 Oxem korun tumi taka aplea bapai vo avoi pasot kainch korunk dinant. 13 Hea toren tumi apleo riti-rivazo xikoun Devachea utrak valor na mhunn dakhoitat. Tumi oslim zaitim kamam kortat.” 14 Uprant lokank porot aplea lagim apoun tannem mhunnttlem: “Tumi sogle, dhean diun mhojem aikat, ani tacho orth somzon gheiat. 15 Oxi koslich vost na ji bhair thaun bhitor vochon munxak oxudʼdh korunk xokta; punn ji vost munxachea bhitor thaun bhair sorta tich taka oxudʼdh korta.” 16* ——

17 Lokanchea gorde thaun pois eka ghorant gelea uprant tache xis te vopare vixim tachea lagim prosn vicharunk lagle. 18 Tednam tannem xisank mhunnttlem: “Tanchea bhaxen tumkam-i somzonk na kai? Eka munxachea tonddantlean kosli-i vost bhitor voita zalear ti taka oxudʼdh korunk xokona mhunn tumkam khoborna? 19 Karonn ti tachea kallzant nhoi, punn tachea pottant voita, ani uprant tachea kuddintlean bhair sorta.” Hea toren tannem sogleo jevnnacheo vostu xudʼdh mhunn sanglem. 20 Tea uprant tannem mhunnttlem: “Munxachea bhitor thaun jem bhair sorta tench taka oxudʼdh korta. 21 Karonn munxachea bhitor thaun, mhunnche, tachea kallzant thaun bhair sortat vaitt chintnam, zaka lagon onoitik kuddicho sombond,* chorio, khun, 22 pordvar,* as, noxttim kamam, fottkirponn, loz naslolim patki kamam,* nattkai,* opmanachim utram, gorv, ani murkhponn osleo vostu ghoddttat. 23 Heo sogleo vaitt vostu munxachea bhitorlean bhair sortat ani taka oxudʼdh kortat.”

24 Thoim thaun utthon Jezu Tir ani Sidonachea vattarant gelo. Thoim to eka ghorant gelo, ani aplea vixim konnankuch kollʼllolem taka naka aslem, tori astana tachea vixim lokank kollonastana uronk na. 25 Thoim ek bail asli, tichea lhan dhuvecher noxtto dut boslolo. Jezu thoim aila mhunn tika kollʼllem tednam ti tachea lagim ieun tachea paim-am poddli. 26 Ti bail Grik asli ani Siriantlea Finisia vattarant ravtali. Aplea dhuvecher bosla to noxtto dut kadd mhunn ti tachea lagim vinoti korunk lagli. 27 Punn Jezun tika mhunnttlem: “Poilim bhurgeank pott bhorun khaum di, karonn bhurgeancho unddo kaddun sunneachea petteam mukhar uddovop sarkem nhoi.” 28 Punn te bailen mhunnttlem: “Tum sangta tem sarkem dhonia, toripunn sunneache pette meza voilean poddttat te kuddke khatach nhoi.” 29 Hem aikon Jezun tika mhunnttlem: “Tunvem oxem mhunnttlem dekhun voch; tuje dhuve voilo noxtto dut bhair soron gelo.” 30 Tor ti bail aplea ghora geli. Tinnem aplem cheddum khattir nhidlam tem polloilem, ani tacher boslolo noxtto dut bhair soron gelʼlo.

31 Tir vattarantlean bhair sorlea uprant, Jezu Sidon ani Dekapolichea* vattarant Galiliechea doria lagim pavlo. 32 Thoim lokamnim Jezu lagim eka munxak haddlo zaka aikonk ienaslem ani tachea lagim sarkem ulounk pasun zainaslem. ‘Tuzo hat tacher dovor,’ mhunn tannim tachea lagim vinoti keli. 33 Jezun tea munxak lokam thaun kuxin vhelo. Tannem tachea kanant aplim bottam ghatlim, ani thuklea uprant tachea jibek aplo hat lailo. 34 Magir tannem mollbar polloun lamb suskar soddlo ani taka mhunnttlem: “Effatha,” mhunnche, “Ukte zaiat.” 35 Tednam tea munxache kan ukte zale, ani tachi jib suttli ani to sarko ulounk laglo. 36 Jezun tankam hukum ghalun, hem konnakuch sangonakat mhunn sanglem. Punn jitlo to lokank sangonaka mhunn sangtalo titlech te tachea vixim sangot gele. 37 Khorench, lok ekdom ojap zale ani mhunnonk lagle: “Tannem khub borim kamam keleant. To aikonk iena tosleank ani moneank pasun boro korta.”

8 Tea disamnim porot ek pavtt lokancho vhoddlo zomo ektthaim zalʼlo aslo ani tanchea lagim khaunk kainch naslem. Tednam Jezun aplea xisank apoun mhunnttlem: 2 “Mhaka hea lokanchem churchurem dista, karonn tin disam thaun te mhojea borabor asat ani tanchea lagim khaunk kainch na. 3 Hanvem tankam upaxinch ghora dhaddle zalear te vatter ghunvoll ieun poddot. Tantuntle thodde tor khub poisulʼlean aileat.” 4 Punn xisamnim taka mhunnttlem: “Konn ravona toslea hea zagear, lokank pott bhorun khaunk melltta title undde konnui khoim thaun haddttolo?” 5 Tednam Jezun tankam vicharlem: “Tumchea lagim kitle undde asat?” Tannim mhunnttlem: “Sat.” 6 Uprant tannem lokank zomnir bosonk sanglem. Tannem te sat undde ghetle ani magnnem korun Devache upkar attoile, magir te moddun tannem xisank dile, ani xisamnim te lokank vanttle. 7 Tanchea lagim thoddim nustim-i aslim. Tannem nustea pasot Devache upkar attoile ani aplea xisank, tim pasun vanttunk sanglim. 8 To lok pottbhor jevlo, ani urlole kuddke ektthaim kele tednam sat vhoddleo panttleo bhorleo. 9 Jevleat tea lokam modem sumar 4,000 dadle asle. Uprant tannem tankam dhaddle.

10 To rokddoch aplea xisam sangata vhoddear boslo ani Dalmanutha vattarant ailo. 11 Thoim Farizev aile ani Jezu lagim vad-vivad korunk lagle. Tachi porikxa korunk, amkam sorga voili ek khunna dakhoi mhunn te sangonk lagle. 12 Tednam monantlea-monant to khub dukhi zalo ani tannem mhunnttlem: “Hi pillgi sodanch khunna kiteak magta? Hanv tumkam khorench sangtam, hea pillgek koslich khunna mellchina.” 13 Hem sangon to tankam thoinch soddun porot vhoddear choddlo ani poltoddi gelo.

14 Xis aplea borabor undde gheunk vochonk visorle, ani vhoddear tanchea lagim ek unddo soddun anik kainch naslem. 15 Jezun tankam xittkaun oxem mhunnttlem: “Tumche dolle ukte dovrat ani Farizevanchea khomira thaun ani Herodachea khomira thaun zagrut ravat.” 16 Tednam, undde kiteak gheun ieunk na, oxem mhunnon te eka-meka lagim vad-vivad korunk lagle. 17 Hem polloun Jezun tankam mhunnttlem: “Tumchea lagim undde na mhunnon tumi vad-vivad kiteak kortat? Hanv kitem sangonk sodhtam tem azun tumkam kollonk na? Tumchem mon tacho orth azun somzonk pavlem na? 18 ‘Dolle asonui tumkam disona; ani kan asonui tumkam aikonk iena?’ Tumkam ugddas na, 19 hanvem 5,000 dadleank panch undde moddun vanttun dile tednam tumi kitlea panttleamnim kuddke ektthaim kelʼle?” Tannim mhunnttlem: “Bara.” 20 “Hanvem 4,000 dadleank sat undde moddun vanttun dile tednam tumi urlole kuddke ghalun kitleo panttleo bhorleo?” Tannim mhunnttlem: “Sat.” 21 Tednam Jezun tankam mhunnttlem: “Tumkam azunui somzonk na?”

22 Tea uprant te Bethsaidant aile. Hanga lokamnim tachea lagim eka kuddʼddea munxak haddlo, ani taka hat launcho mhunn tannim Jezu lagim vinoti keli. 23 Tednam Jezun tea kuddʼddea munxachea hatak dhorun taka ganva bhair vhelo, ani uprant tachea dolleacher thukun tannem aple hat tacher dovorle ani vicharlem: “Tuka kitem-i dixtti poddtta?” 24 Tea munxan voir polloun mhunnttlem: “Mhaka lok dixtti poddtta, punn oxem dista zoxem zhaddam choltat.” 25 Jezun porot ek pavtt tachea dolleancher hat dhorlo, ani taka sarkem dixtti poddonk laglem. Tachea dolleanchi dixtt porot aili ani taka soglem sarkem disonk laglem. 26 Tednam Jezun taka ghora dhaddlo, ani mhunnttlem: “Hea ganvant vochonaka.”

27 Jezu ani tache xis Sezaria Filipint vochonk bhair sorle. Vatter tannem aplea xisank vicharlem: “Hanv konn oxem lok mhunnttat?” 28 Tannim mhunnttlem: “Thodde mhunnttat Juanv Batist, dusre mhunnttat Elija, anik thodde mhunnttat provadeam modlo eklo.” 29 Uprant tannem toch prosn xisank vicharlo: “Punn tumkam kitem dista, hanv konn?” Pedrun zobab diun mhunnttlem: “Tum Krist.” 30 Tednam tannem tankam koddok utramnim hukum ghalun hea vixim konnankuch sangonakat mhunn sanglem. 31 Uprant, to xisank sangonk laglo ki munxachea Putak tras sosche poddttole ani taka vhoddil, mukhel iadnik, ani xastri nakartole ani taka jivexim martole, ani tin disa uprant Dev taka jivont kortolo. 32 Jezu hi khobor tankam spoxttponnim sangtalo. Punn Pedru taka kuxin vhoron tapounk laglo. 33 Tednam Jezun fatti vollon xisank polloile ani Pedruk koddok utramnim mhunnttlem: “Mhojea mukha voilo kuxin sor,* Soitana! karonn tujem chintop Deva bhaxen nhoi, punn munxam bhaxen asa.”

34 Tednam Jezun xisank ani lokank aplea lagim apoile ani mhunnttlem: “Konnui mhojea fattlean ieunk sodhta zalear tannem apnnakuch nakarun* aplo trasancho khambo* ukolcho ani mhojea fattlean cholot ravchem. 35 Zo aplo jiv* vachounk proitn korta to aplo jiv hogddaitolo, punn zo mhojea pasot ani bore khobre pasot aplo jiv hogddaita to aplo jiv vachoitolo. 36 Khorench eka munxan akʼkho sonvsar jikhun ghetlo ani aplo jiv* hogddailo zalear kitem faido? 37 Ek munis aplea jivachea* bodlek kitem diunk xokta? 38 Konnankui hea visvasghatki* ani patki pillge mukhar mhozo xis zaunk ani mhojea utracher visvas dovrunk loz dista zalear munxacho Put Bapachea mhoiment aplea dutam sangata ietolo tednam taka-i tachi loz distoli.”

9 Uprant Jezun tankam mhunnttlem: “Hanv tumkam khorench sangtam, hanga ube asloleam modem thodde oxe asat je Devachem Raj podven ailolem polloilea bogor morche nant. 2 Sov disam uprant Jezu Pedruk, Jakobak ani Juanvak aplea sangata eka unch dongrar gheun gelo. Tanchea bogor thoim anik konn naslo. Tanchea mukhar Jezuchem rup bodolʼlem; 3 tache kopdde chokchokonk lagle ani itle dhove zale, jitle hea sonvsarant konnuch kopdde dhuvpi korunk xokona. 4 Toxench, tankam thoim Moizes ani Elija disle, te dogui Jezu lagim uloitale. 5 Pedrun Jezuk mhunnttlem: “Rabʼbi,* amkam hanga ieun khub borem dislem. Tuka zai zalear hanv hanga tin tombu bandtam, ek tuka, ek Moizesak, ani ek Elijak.” 6 Khorem mhunnttlear, kitem mhunnchem tem Pedruk kainch somzona zalem karonn te khub bhielʼle. 7 Magir ek kup toiar zaun tancher ailem ani tea kupantlean oso avaz ailo: “Ho mhozo opurbaiecho Put. Tachem aikat.” 8 Okosmat tannim hevtten-tevtten polloilem ani Jezuk soddun thoim atam konnuch naslo mhunn tankam kollon ailem.

9 Te dongra voilean sokol voitale tednam Jezun tankam koddok utramnim hukum ghatlo ki munxacho Put meloleantlo jivont zaina tea meren tannim jem polloilam tea vixim konnankuch sangchem nhoi. 10 Xisamnim tachim utram monant dovorlim,* punn to meloleantlo jivont zatolo hacho orth kitem kai mhunn te apleach bhitor ulounk lagle. 11 Tannim Jezuk vicharlem: “Elijan poilim ieunk zai oxem xastri kiteak mhunnttat?” 12 Jezun mhunnttlem: “Elija khorench poilim ietolo ani soglem asonk zai toxem kortolo; punn munxacho Put zaite tras sostolo ani lok taka nakartole oxem kiteak boroilʼlem asa? 13 Punn hanv tumkam sangtam ki Elija khoreanich ailo ani boroilʼlem aslem tea pormonnem tannim tachea thaim tankam zai toxem kelem.”

14 Te dusrea xisam lagim aile tednam zaito lok tanchea bhonvtonnim ektthaim zala ani xastri tanchea lagim vad-vivad kortat mhunn tannim polloilem. 15 Punn lokamnim Jezuk polloilea borabor te ojap zale, ani dhanvon tachea lagim aile ani taka ieukar dilo. 16 Jezun tankam vicharlem: “Tumi tanchea lagim kitem vad-vivad kortat?” 17 Zomea modlea eklean mhunnttlem: “Guruji, hanv mhojea putak tujea lagim gheun ailʼlom karonn tacher ek mono noxtto dut boslolo asa. 18 Ani to mhojea putak dhorta title-i pavtt to taka zomnir xevttita ani mhojea putachea tonddantlean fes bhair soronk lagta. To aple dant korkoraunk lagta ani samko jiv naslolea bhaxen zata. Hanvem tujea xisank tachea voilo noxtto dut kaddunk sanglem punn tanchea lagim zaunk na.” 19 Hem aikon Jezun tankam mhunnttlem: “Onbhavarthi pillge, kitlo temp poriant hanv tumchea borabor ravom? Kitlo temp hanv tumkam sosum? Taka mhojea lagim gheun ieiat.” 20 Te taka Jezu lagim gheun aile punn jednam noxttea dutan Jezuk polloilo tannem tea bhurgeak foddfoddailo* ani to bhurgo zomnir lollonk laglo. Ani tachea tonddantlean fes bhair soronk laglo. 21 Tednam Jezun cheddeachea bapaik vicharlem: “Taka oxem kednam thaun zata?” Tannem mhunnttlem: “Bhurgeponnar thaun. 22 Tacho jiv kaddunk tea noxttea dutan zaitea pavtti taka ujeant uddoila ani zaitea pavtti udkant uddoila. Punn tujea lagim zata zalear amchem churchurem kor ani amkam modot kor.” 23 Jezun taka mhunnttlem: “‘Tujea lagim zata zalear’ oxem tum kiteak mhunntta? Zaka bhavarth asa tachea lagim soglem ghoddtta.” 24 Teach vellar tea cheddeachea bapain mottea avazan mhunnttlem: “Mhaka bhavarth asa! Punn to anik ghott korunk mhaka modot kor!”

25 Soglo lok dhanvon ietat tem Jezun polloilem, ani tannem noxttea dutak koddok utramnim hukum dilo ani mhunnttlem: “Monea ani bherea noxttea duta, hanv tuka hukum ditam, tachea voilo bhair sor ani porot kednanch tacher bosonaka!” 26 Tednam tea noxttea dutan mottʼttean bob marli ani tea cheddeak foddfoddaun tachea voilo bhair sorlo ani to cheddo melʼlea bhaxen zalo. Hem polloun zaite lok mhunnonk lagle: “To melo!” 27 Punn Jezun tacho hat dhorun taka utthoilo, ani to utthon ubo ravlo. 28 Tea uprant Jezu eka ghorant bhitor sorlo. To ekloch aslo tednam xisamnim taka vicharlem: “Ami tea noxttea dutak kiteak kaddunk xokle nant?” 29 Jezun mhunnttlem: “Hea torecho noxtto dut fokot magnnem korun kaddunk zata.”

30 Te thoim thaun bhair soron Galilientlean vochonk lagle. Apunn khoim asa tem lokank kollʼllolem Jezuk naka aslem. 31 Karonn tea vellar to aplea xisank xikoitalo ani tankam hem sangtalo: “Munxachea Putacho visvasghat kortole ani taka dhorun lokanchea hatant ditole. Te taka marun uddoitole, punn melea uprant tisrea disa Dev taka jivont kortolo.” 32 Punn to kitem sangta tem tachea xisank somzonk na, ani taka prosn vicharunkui te bhietale.

33 Uprant te Kapernaumant pavle. To eka ghorant bhitor sorlo tednam tannem aplea xisank vicharlem: “Tumi rostear kitea vixim vad-vivad kortale?” 34 Te vogi ravle karonn tanchea modlo konn vhodd asa, hea vixim te vad-vivad kortale. 35 Tednam boson tannem Bara zannank* apoile ani tankam mhunnttlem: “Tumchea modlo konnui vhoddlo zaunk sodhta zalear tannem sogleant dhaktto zavop ani sogleanchi seva korop gorjechem.” 36 Uprant tannem eka lhan bhurgeak tanchea modem ubo kelo, ani tachea khandar hat dhorun mhunnttlem: 37 “Zo konn mhojea nanvan oslea eka lhan bhurgeak ieukar dita to mhaka pasun ieukar dita; ani zo konn mhaka ieukar dita to fokot mhakach nhoi punn mhaka dhaddla taka-i ieukar dita.”

38 Juanvan taka mhunnttlem: “Guruji, ek munis tujem nanv gheun lokancher boslole noxtte dut kaddtta mhunn ami polloilam, ani ami taka addauncho proitn kelo, karonn to amchea borabor iena.” 39 Punn Jezun mhunnttlem: “Taka addauncho proitn korum nakat, karonn oso konnuch na zo mhojea nanvan vizmitam kortolo ani rokddoch mhojea vixim vaitt uloitolo. 40 Zo amchea add na to amchea sangata asa. 41 Hanv tumkam khorench sangtam, tumi Kristache xis mhunn konnui tumkam ek pelo udok pieunk di-it zalear taka tacho inam mellʼllea bogor urchona. 42 Punn zo konn mhojer bhavarth dovorta toslea lhanam modlea ekleak addkhollon poddom-so korta* tachea golleant gaddum ghunvddaita to danteacho fator bandun taka doriant uddoilear chodd borem zatolem.

43 “Zor tuzo hat tuka patkant* uddoita zalear to katrun bhair uddoi. Karonn tujea donui hatam sangata tuka Gehenʼnant,* mhunnche, palvona toslea ujeant uddoilʼlea poros, ekuch hat ason jivit inam mhunn mellʼllear odik borem. 44* —— 45 Zor tuzo paim tuka patkant* uddoita zalear to katrun bhair uddoi. Karonn tujea donui paim-am sangata tuka Gehenʼnant* uddoilʼlea poros ekuch paim ason jivit inam mhunn mellʼllear odik borem. 46* —— 47 Zor tuzo dollo tuka patkant* uddoita zalear to kaddun bhair uddoi. Karonn tujea donui dolleam sangata tuka Gehenʼnant* uddoilʼlea poros, ekuch dollo ason Devachea Rajeant bhitor sorlear odik borem, 48 karonn Gehenʼnant* kidde kednanch moronant ani uzo kednanch palvona.

49 Tea pasot, mitt marta toxem dor eka munxacher ujeacho xivor martole. 50 Mitt borem asta, punn mittachi kharsann geli zalear tumi taka porot kharsann koxi ditole? Tumi mitta sarke zaiat, ani eka-meka sangata xantin ravat.”

10 Jezu utthlo ani thoim thaun bhair soron Jordan nhoim-chea poltoddi, Judeia vattarachea xime lagim ailo. Thoim porot tachea lagim lokancho zomo ektthaim zalo. Tachea sonvoim-e pormonnem tannem porot ek pavtt tankam xikounk suru kelem. 2 Tednam Farizev thoim aile ani Jezuchi porikxa korunk te taka, eka munxan aplea bailek divors divop sarkem kai na mhunn vicharunk lagle. 3 Jezun zobab diun mhunnttlem: “Moizesan tumkam kitem adnea dilea?” 4 Tannim mhunnttlem: “Moizesan divors potr diun bailek soddun diunk porvangi dilea.” 5 Punn Jezun tankam mhunnttlem: “Tumchea nibor kallzak lagon tannem tumchea pasot hi adnea boroili. 6 Punn rochnnechea survatek thaun, ‘Devan tankam dadlo ani bail mhunn rochlim. 7 Hea karonnak lagon dadlo aplea bapaik ani aplea avoik soddttolo, 8 ani to ani tachi bail,* ek kudd zatolim.’ Tor hea toren, tim don nhoi punn ek kudd zaun asat. 9 Taka lagon, Devan jem zoddlam tem khoincheach munxan moddchem nhoi.”* 10 Porot ek pavtt te ghorant asle tednam xis taka hea vixim prosn vicharunk lagle. 11 Jezun tankam mhunnttlem: “Zo munis aplea bailek divors dita ani dusrea lagim kazar zata to poilea baile add pordvar* korta, 12 ani zor ek bail aplea ghovak divors diun dusrea lagim kazar zata zalear ti pordvar korta.”

13 Jezun lhan bhurgeancher hat dovorche mhunn lok tankam tachea lagim haddunk lagle, punn xisamnim tankam tapoile. 14 Hem polloun Jezu ragar zalo ani tannem mhunnttlem: “Lhan bhurgeank mhojea lagim ieunk diat; tankam addauncho proitn korinakat, karonn sorginchem Raj osleanchench zatolem. 15 Hanv tumkam khorench sangtam, zo konn Devachem Raj hea lhan bhurgeam bhaxen apnnaina to tantunt kosoch bhitor soronk pavchona.” 16 Uprant tannem bhurgeank aplea vengent ghetlim ani tancher hat dovrun tankam axirvad diunk laglo.

17 Jezu thoim thaun voitalo tednam ek munis dhanvon ailo ani dimer poddon tannem taka vicharlem: “Borea Guruji, sasnik jivit daiz mhunn melloun gheunk hanvem kitem korunk zai?” 18 Jezun taka mhunnttlem: “Tum mhaka boro kiteak mhunntta? Devak soddun konnuch boro nhoi. 19 Tum tor adnea zannam: ‘Jivexim marchem nhoi, pordvar korcho nhoi, chori korchi nhoi, khotti govai diunchi nhoi, konnankuch fosounchem nhoi, ani tujea bapaik ani tujea avoik man di.’” 20 Tea munxan mhunnttlem: “Guruji, heo sogleo adnea hanv lhanponnim thaun pallit ailam.” 21 Jezun mogan taka polloilem ani mhunnttlem: “Tujea bhitor ek unnem asa: Voch, tujea lagim asa titlem-i vikun goribank di karonn sorgar tuka tthevo mellttolo; ani ieun mhozo xis zav.” 22 Hem aikon to dukhi zalo ani khontin bhoron thoim thaun gelo, karonn tachea lagim zaiti girestkai asli.

23 Bhonvtonnim polloilea uprant Jezun xisank mhunnttlem: “Poixekarank Devachea Rajeant bhitor soronk kitlem kotthin zatolem!” 24 Punn xis tachim utram aikon ojap zale. Tednam Jezun porot tankam mhunnttlem: “Bhurgeamno, Devachea Rajeant bhitor soronk kitlem kotthin! 25 Eka girest munxak Devachea Rajeant bhitor sorchea poros eka unttak suiechea burkantlean vochonk sompem zatolem.” 26 Hem aikon te anikui ojap zale ani tannim taka* mhunnttlem: “Toxem zalear konnank mhunn taronn mellttolem?” 27 Jezun tancher nodor marun mhunnttlem: “Munxam lagim hem korunk zaina punn Dev toso nhoi, karonn Deva lagim soglem korunk zata.” 28 Tednam Pedrun taka mhunnttlem: “Polloi! Ami soglem soddun tujea fattlean aileat.” 29 Jezun mhunnttlem: “Hanv tumkam khorench sangtam, oso konn na zannem mhojea pasot ani bore khobre pasot ghor vo bhav vo bhoinno vo bapui vo avoi vo bhurgim vo bhattam-besam soddun dileant 30 ani taka hea kallant dhumallea* sangata 100 pavtti chodd—ghoram, bhav, bhoinno, avoio, bhurgim, ani xetam-bhattam—ani fuddlea sonvsarant* sasnik jivit mellonastana urchem na. 31 Toripunn zaitim zannam poilim asat tim nimannim zatolim ani nimannim asat tim poilim zatolim.”

32 Atam te Jeruzalemant voita tea vatten voitana Jezu tanchea fuddem choltalo. Tache xis ojap zalʼle punn tanchea fattlean choltale tea lokank bhirant disonk lagli. Ek pavtt porot Jezun tea Bara zannank* kuxin vhele, ani aplea thaim kitem soglem ghoddttolem tem tankam sangonk laglo: 33 “Polloiat! Ami Jeruzalemant voitat, ani munxachea Putak mukhel iadnikanchea ani xastreanchea hatant ditole. Te tacher mornnachem formonn martole ani taka Judev nhoi toslea lokanchea hatant ghaltole. 34 Te tachim fokannam kortole, tacher thuktole, taka chabkamnim martole ani taka jivexim marun uddoitole. Punn tin disam uprant Dev taka jivont kortolo.”

35 Zebedevache don put, Jakob ani Juanv tachea lagim aile ani tannim mhunnttlem: “Guruji, ami tujea lagim jem kitem magtat tem tunvem amchea pasot kelʼlem amkam zai.” 36 Tannem mhunnttlem: “Hanvem tumchea pasot kitem kelʼlem tumkam zai?” 37 Tannim mhunnttlem: “Tujea Rajeant* amchea modlea ekleak tujea uzveak ani dusreak tujea daveak bosonk di.” 38 Punn Jezun tankam mhunnttlem: “Tumi mhojea lagim kitem magtat tem tumkam khoborna. Hanv zo pelo pietam tea peleantlem tumchean pieunk zatolem? Vo hanv zo bautizm ghetam toslo bautizm tumchean gheunk zatolo?” 39 Tannim mhunnttlem: “Amchean pieunk zatolem.” Tednam Jezun tankam mhunnttlem: “Hanv zo pelo pietam, to tumi-i pietole, ani hanv zo bautizm ghetam to tumi-i ghetole. 40 Punn mhojea uzveak vo daveak bosonk diuncho odhikar mhaka na. Ho zago tanchea pasot asa, zanchea pasot to toiar korun dovorla.”

41 Urlolea dha zannamnim hem aikolem tednam tankam Jakob ani Juanvacho khub rag ailo. 42 Punn Jezun aplea xisank aplea lagim apoile ani mhunnttlem: “Sonvsarant lok zankam aple odhikari mhunn somzotat te tea lokancher hukum choloitat ani vhodd podvecher asat te lokank aplea odhikara khala dovortat mhunn tumi zannant. 43 Punn tumchea modem oxem zaunk zaina. Tachea bodlek, tumcho modlo zo konn vhoddlo zaunk sodhta tannem tumcho sevok zauncho, 44 ani tumchea modlo zo konn poilo zaunk sodhta tannem sogleancho chakor zauncho. 45 Karonn munxacho Put pasun seva korun gheunk nhoi, punn seva korunk aila ani aplo jiv bolidan korun zaitea zannam pasot soddvonn diunk* aila.”

46 Magir te Jerikont aile. Punn Jezu, tache xis ani lokancho ek vhoddlo zomo Jeriko thaun bhair voitalo tednam Timeusacho put, Bartimev nanvacho ek kuddʼddo bhikari rosteachea kuxik boson aslo. 47 Nazaretkar Jezu tea vatten voita mhunn tannem aikolem tednam tannem bob marun mhunnttlem: “Jezu, Davidachea Puta, mhoji kakut kor!” 48 Tem aikon zaitea zannamnim taka tapoun vogi rav mhunn sanglem, punn to anik mottʼttean bob marunk laglo: “Davidachea Puta, mhoji kakut kor!” 49 Tednam Jezu ravlo ani tannem mhunnttlem: “Taka mhojea lagim apoiat.” Tor tannim tea kuddʼddea munxak apoilo ani mhunnttlem: “Dhir dhor! Utth; to tuka apoita.” 50 Tannem aplo anga voilo kopddo thoinch uddoilo ani rokddoch utthon Jezu lagim gelo. 51 Tednam Jezun taka vicharlem: “Hanvem tujea pasot kitem kelʼlem tuka zai?” Kuddʼddea munxan taka mhunnttlem: “Rabboni,* mhojea dolleanchi dixtt mhaka porot mello-xi kor.” 52 Jezun taka mhunnttlem: “Voch. Tujea bhavarthan tuka boro kelo.” Teach vellar tachea dolleanchi dixtt porot aili, ani to Jezu fattlean cholonk laglo.

11 Te Jeruzalema lagim Zoitunanchea dongrar aslolea Bethfage ani Bethani ganvant pavche asle tednam Jezun aplea don xisank dhaddle. 2  Ani tankam sanglem: “Tumkam dixtti poddtta tea ganvant vochat. Thoim pavtanch tumkam ek gaddvachem por bandlolem mellttolem, zacher hachea poilim konnuch bosonk naslo. Taka soddun mhojea lagim gheun ieiat. 3 Ani konnui tumkam, ‘Hem kitem korta?’ mhunn vicharit zalear taka oxem sang, ‘Somiak hachi goroz asa ani to rokddoch taka porot dhaddttolo.’” 4 Tednam te gele ani rosteachea kuxik eka dara lagim gaddvachea porak bandlolem tannim polloilem ani taka soddoilem. 5 Punn thoim ube aslolea thoddea lokamnim tankam vicharlem: “Tumi tea gaddvachea porak kiteak soddoitat?” 6 Xisamnim tankam Jezun sanglolem toxench sanglem ani tannim tankam vochonk dilem.

7 Te tea gaddvachea porak Jezu lagim gheun aile. Tannim aple kopdde tacher ghatle, ani Jezu tacher boslo. 8 Zaitea lokamnim aple kopdde rostear patllaile, ani dusrea lokamnim rosteachea kuxik aslolea zhaddanche lhan khande moddun vatter posraile. 9 Je lok fuddem choltale ani je fattlean ietale te mottʼttean oxem mhunnttale: “Ami vinoti kortat, haka salvar kor! Jehovachea* nanvan ieta tacher besanv asum! 10 Amcho bapui David, hachem ieunchem asa tea Rajeacher besanv asum! Sorginchea Deva, ami tujea lagim vinoti kortat, taka salvar kor!” 11 Magir to Jeruzalemant ailo ani Devmondirant gelo, thoim tannem sorvbhonvtim polloilem, punn khub vell zalʼlo dekhun to tea Bara zannam* borabor Bethanient gelo.

12 Dusrea disa Bethani thaun bhair sortana taka bhuk lagli. 13 Pois thaun tachi nodor khub panam aslolea eka anjirachea zhaddacher poddli. Ek tori foll khaunk mellttolem mhunn chintun to tea zhadda lagim gelo. Punn lagim pavtoch tannem polloilem ki tea zhaddak panam soddun anik kainch naslem, karonn to anjiram zauncho vell naslo. 14 Tor tannem zhaddak mhunnttlem: “Hea fuddem konnuch tujem foll kednanch khaina zaum.” Tache xis hem aikotale.

15 Uprant te Jeruzalemant aile. To Devmondirant gelo ani je lok thoim viktale ani viktem ghetale tankam sogleank to dhanvddaunk laglo. Toxench, poixe bodoltale tanchim mezam ani parve viktale tanche bank tannem umte uddoile. 16 Tannem konnankuch aidon gheun Devmondirantlean vochonk diunk na. 17 To lokank xikoitalo ani oxem mhunnttalo: “‘Mhojem ghor soglea raxttram pasot magnneachem ghor oxem mhunnttole,’ hem boroilʼlem na kai? Punn tumi taka choranchi dhol korun dovorlea.” 18 Mukhel iadnikamnim ani xastreamnim hem aikolem tednam taka koso jivexim marcho tea vixim te chintunk lagle, karonn te taka bhietale ani sogle lok tachi xikounn aikon ojap zatale.

19 Sanz zali tednam te xara thaun bhair gele. 20 Dusrea disa sokallim fuddem te thoinchean voitale tednam tem anjirachem zhadd mulla poriant sukon gelam tem tannim polloilem. 21 Pedrun zhadda vixim Jezuchim utram ugddas korun mhunnttlem: “Rabʼbi* polloi! Tunvem xirap ghatlolem tem anjirachem zhadd sukon gelem.” 22 Tednam Jezun tankam mhunnttlem: “Devacher bhavarth dovrat. 23 Hanv tumkam khorench sangtam, konnui hea dongrak, ‘Hanga thaun umttun doriant vochon podd,’ oxem mhunnot ani aplea monant matso pasun dubhav dhorina, punn apunn mhunntta toxem zatolench mhunn bhavarth dovorta zalear toxem zatolem. 24 Taka lagon hanv tumkam sangtam, tumi magnneant magtat titlem-i tumkam mellttolench mhunn bhavarth dovrat, ani tem tumkam mellttolem. 25 Ani tumi magnnem korunk ubim ravtat tednam tumchea monant konnanchea-i add kitem-i asa zalear taka bhogsat, tednam sorgar asa to tumcho Bap pasun tumcheo-i chuko bhogxitolo.” 26 *——

27 Te porot Jeruzalemant aile. To Devmondirant pasoi martalo tednam mukhel iadnik, xastri ani lokanche vhoddil tachea lagim aile. 28 Tannim taka mhunnttlem: “Tum hem soglem khoinchea odhikaran korta? Ani hem soglem korunk tuka konnem odhikar dila?” 29 Jezun tankam mhunnttlem: “Hanv-ui tumkam ek prosn vichartam. Tumi mhaka tacho zobab diat, ani tednam hanv hem soglem khoinchea odhikaran kortam tem tumkam sangtam. 30 Juanvan dilolo to bautizm sorgar thaun vo munxa thaun aslo? Zobab diat.” 31 Te eka-mekak mhunnonk lagle: “Ami ‘Sorgar thaun,’ oxem mhunnttlem zalear to amkam vichartolo, ‘Toxem zalear, tumi tacher visvas kiteak dovrunk na?’ 32 Punn, ‘Munxa thaun,’ oxem ami koxem mhunnonk zata?” Te lokank bhietale karonn soglo lok Juanv khoroch ek provadi mhunn mantale. 33 Taka lagon tannim Jezuk zobab dilo: “Ami nokllo.” Jezun tankam mhunnttlem: “Toxem zalear, hem soglem hanv khoinchea odhikaran kortam tem hanv-ui tumkam sangchom na.”

12 Uprant to vopareo uzar korun oxem mhunnonk laglo: “Eka munxan drakxancho mollo lailo ani tachea sorvbhonvtim voi bandli. Tannem drakxam maddounk lagon khonnon ek zago toiar kelo ani to mollo rakhunk ek gopur bandlo. Uprant tannem drakxancho mollo xetkareank bhaddeak* dilo ani to pordesant gelo. 2 Pikecho vell pavlo tednam aplea molleantlea drakxancho vantto magonk tannem aplea eka sevokak xetkaream koddem dhaddlo. 3 Punn xetkareamnim taka dhorlo, marlo, ani kainch dinastana porot dhaddlo. 4 Uprant tannem anik eka sevokak dhaddlo punn tannim tachi tokli foddli ani tacho opman kelo. 5 Uprant bhattkaran anik eka sevokak dhaddlo, tannim taka jivexim marun uddoilo. Bhattkaran anikui zaitea sevokank dhaddle, punn tannim thoddeank boddoile ani thoddeank jivexim marun uddoile. 6 Atam bhattkara koddem ekloch urlo, tacho opurbaiecho put. Xekim tannem aplea putak tanchea koddem oxem chintun dhaddlo, ‘Te mhojea putak tori man ditole.’ 7 Punn te xetkar eka-mekak mhunnonk lagle, ‘Ho hea drakxanchea molleacho daiji. Ami taka marun uddoum-ia, ani tachem daiz amchem zatolem.’ 8 Tor tannim taka dhorlo ani jivexim marlo ani molleachea bhair vhoron uddoilo. 9 Atam molleacho bhattkar kitem kortolo? To ieun tea xetkareank marun uddoitolo ani drakxancho mollo dusrea xetkareank bhaddeak ditolo. 10 ‘Bandkam korpeamnim zo fator nakarlo toch konnxeacho mukhel fator zalo,’ hem tumi Devachea utrant kednanch vachunk na? 11 ‘Hem Jehovan* ghoddoun haddlem, ani amchea nodren ojapachem asa,’ hem-ui tumi vachunk na?”

12 Hem aikon te taka dhorun vhoronk sodhtale karonn hi vopar tannem tankanch motint dovrun sanglea mhunn te somzole, punn te lokank bhietale. Tor te taka soddun gele.

13 Uprant tannim Jezuk tacheach utramnim fosounk thoddea Farizevank ani Herodachea pokxantlea thoddea munxank tachea lagim dhaddle. 14 Jezu lagim ieun tannim taka mhunnttlem: “Guruji, ami zannant ki tum sota pormonnem cholta ani tum munxam koddlean favor zoddun gheunk proitn korina, karonn tum lokanchim tonddam polloun uloina punn tum sota pormonnem Devachi vatt xikoita. Amkam sang, Somrazak* tax farik korop sarkem vo na? 15 Ami tax farik korunk zai, kai naka?” Punn tanchem dhongeponn vollkhon Jezun tankam mhunnttlem: “Tumi mhoji porikxa kiteak kortat? Mhaka ek dinar* haddun dakhoiat.” 16 Tannim ek dinar haddlo. Jezun tankam vicharlem: “Hacher konnanchem chitr ani konnancho chhap marlolo asa?” Tannim mhunnttlem: “Somrazacho.” 17 Tednam Jezun tankam mhunnttlem: “Somrazachem asa tem Somrazak diat, punn Devachem asa tem Devak diat.” Tachim him utram aikon te ekdom ojap zale.

18 Uprant, melolim jivont zaunchimnant mhunn sangtat te Saduki* tachea lagim aile. Tannim taka vicharlem: 19 “Guruji, Moizesan boroilʼlem, konnancho-i bhav bhurgem nastana morta ani tachi bail urta zalear jivo asa tea bhavan tiche lagim kazar zaunchem ani aplea melʼlea bhava pasot bhurgim zolmak haddchim. 20 Sat bhav asle. Poilo kazar zalo punn bhurgim nastana melo. 21 Tednam dusro bhav tichea lagim kazar zalo punn to-ui bhurgim zainastana melo. Tisrea bhavak pasun oxench ghoddlem. 22 Satui bhav bhurgim nastana mele. Xevottak ti bailui meli. 23 Tor amkam sang, melolim jivont zatat tednam ti konnanchi bail zatoli? Karonn ti satui bhavam lagim kazar zalʼli.” 24 Jezun tankam mhunnttlem: “Tumchem chintop sarkem na, karonn tumi Devachem Utor nokllo, nhoi mhunn Devachi xokti. 25 Karonn melolim jivont zatolim tednam tanchea modlo konnuch dadlo vo bail kazar zaunchim nant, punn tim sorga voilea devdutam bhaxen astolim. 26 Melolim jivont zaunchea vixim Moizesachea pustokant jhilkutta lagim Devan kitem mhunnttlolem tem tumi vachunk na? Tannem mhunnttlolem: ‘Hanv Abrahamacho Dev, Izakacho Dev ani Jakobacho Dev.’ 27 To meleant tancho nhoi, punn jivim asat tancho Dev. Tumchem chintop sarkem chuklam.”

28 Xastream modlo eklo tanchem soglem ulovop aikotalo. Jezun bore toren zap dilea tem polloun tannem taka vicharlem: “Sogleant poili* adnea khoinchi?” 29 Jezun zobab dilo: “Sogleant poili* adnea hi, ‘Izraela, aik, amcho Dev Jehova* ho ekuch Jehova,* 30 ani tunvem tuzo Dev Jehovacho* tujea soglea kallzan, tujea soglea jivan,* tujea soglea monan ani tujea soglea bollan mog korunk zai.’ 31 Ani dusri oxi asa, ‘Tuzo mog korta toso tujea xezareacho mog kor.’ Hanchea poros anik khoinchi-i adnea vhodd na.” 32 Xastrean Jezuk mhunnttlem: “Guruji, tujim utram sota pormonnem asat, ‘Dev ekloch asa, ani tachea xivai anik konnuch Dev na’, 33 ani munxan aplea soglea kallzan, aplea soglea somjikaien ani aplea soglea bollan tacho mog korunk zai ani aplo korta toso aplea xezareacho mog korunk zai. Oxem korop soglea hulpailʼle bhette poros ani bolidana poros chodd mhotvachem asa.” 34 Tannem zannvaien zobab dila tem polloun Jezun taka mhunnttlem: “Tum Devachea Rajea thaun chodd pois na.” Ani uprant te Jezuk anik prosn vicharunk bhieunk lagle.

35 Punn Devmondirant xikoita astana Jezun tankam mhunnttlem: “Krist Davidacho put oxem xastri kiteak mhunnttat? 36 Povitr xokte udexim Davidan oxem sanglem, ‘Jehovan* mhojea Somiak mhunnttlem: “Hanv tujea dusmanank tujea paim-am ponda ghaltam tea meren tum mhojea uzveak bos.”’ 37 Daviduch taka Somi mhunntta zalear to Davidacho put koso zaunk xokta?”

Lokancho zomo umedin tachem aikotalo. 38 Uprant tannem xikoitana lokank oxem mhunnttlem: “Lamb-lamb kopdde ghalun bhonvonk avoddtta ani bazarant lokam koddlean nomoskar korun gheunk avoddtta toslea xastream thaun chotur ravat. 39 Tankam sobha-ghoramnim sogleant fuddem* bosonk ani sanjechea jevnnak sogleant mhotvachea zagear bosonk avoddtta. 40 Te vidvam koddlean soglem kaddun ghetat* ani lokank dakhounk vhoddlim-vhoddlim magnnim kortat. Tankam dusream poros anik khor* xikxa mellttoli.”

41 Uprant Jezu dan petti dista tea zagear vochon boslo, ani lok pettient poixe ghaltat tem pollounk laglo. Thoim zaite girest lok dan pettient bhorpur nanne ghaltale tem tannem polloilem. 42 Uprant ek gorib vidva aili ani tinnem samke unnea molache don nanne* tantunt ghatle. 43 Tednam Jezun aplea xisank aplea lagim apoun mhunnttlem: “Hanv tumkam khorench sangtam, hea dan pettient jitlea lokamnim poixe ghatleat tea sogleam poros chodd hea gorib vidven ghatleat. 44 Karonn sogleamnim aplea lagim aslolea girestkaientlem ghatlem, punn he bailen, itli gorib asonui, tichea lagim aslem titlem-i ghatlem.”

13 To Devmondirantlean bhair sortalo tednam tachea xisam modlea eklean taka mhunnttlem: “Guruji, polloi! Kitle vhoddle ani sobit fator ani vontteo!” 2 Punn Jezun taka mhunnttlem: “Tum jeo heo vhoddleo vontteo polloita tancho hanga ekui fatracher-fator urchona. Sogle fator sokol poddttole.”

3 To ekttoch Zoitunanchea Dongrar boson aslo ani thoim thaun taka Devmondir distalem, tednam Pedru, Jakob, Juanv, ani Andre tachea lagim aile ani vicharunk lagle: 4 “Amkam sang, hem soglem kednam ghoddttolem ani hea soglea vostuncho xevott zauncho vell lagim pavla tachi khunna kitem astoli?” 5 Tednam Jezun tankam sanglem: “Konnem-i tumkam fottoina zaunk chotrai dhorat. 6 Zaite lok mhojea nanvan ietole ani, ‘Hanvuch to,’ mhunn sangon zaiteank fosoitole. 7 Tumi zhuzancho avaz ani zhuzancheo khobro aikotat tednam bhienakat; hem soglem ghoddonkuch zai, toripunn ho xevott nhoi.

8 “Karonn ek raxttr dusrea raxttracher ani ek raj dusrea rajeacher zhuz kortolem; veg-vegllea zageancher bhuimkamp zatole; ani toxench bhuk pasun poddttoli. Heo vostu trasanchi* survat zaun asa.

9 “Punn tumi samballun ravat. Lok tumkam dhorun neai-sobhent vhortole, ani tanchea sobha-ghoramnim tumkam mar ghaltole. Mhaka lagon tumkam razpal ani razam mukhar ube kortole, jea udexim tankam govai mellttoli. 10 Toxench, soglea raxttrank poilim bori khobor porgott zavop gorjechi. 11 Tumkam dhorun vhortat tednam kitem ulounchem mhunn poilinch usko korinakat. Tea vellar kitem ulounchem tem tumkam kollttolem, karonn uloitat tim tumi nhoi, punn povitr xokti. 12 Titlench nhoi, bhav aplea bhavak, ani bapui aplea bhurgeak jivexim marun uddounk dhorun ditolo, bhurgim aplea avoi-bapaichea add ubim zatolim ani tankam jivexim marun uddounk dhorun ditolim. 13 Mhojea nanva khatir soglo lok tumcho dves kortolo. Punn zo xevott poriant thir ravtolo* to salvar zatolo.

14 “Punn jednam nisontton ani vitt haddtta tosli vost asonk zaina tea zagear ubi asa ti tumi polloitat (vachnnarean somzon gheunchem), tednam Judeiant asat tannim dongracher pollon vochonk suru korchem. 15 Zo munis ghoracher voir* asa tannem sokol denvchem nhoi vo kitem-i haddunk aplea ghorant bhitor sorchem nhoi; 16 zo munis xetant asa tannem fatti urloleo vostu, zoxem aple kopdde vhoronk porot ieunchem nhoi. 17 Jeo bailo gorbest asat ani jeo bailo bhurgeank dudh ditat tanchea pasot he dis kitle bhirankull astole! 18 Thonddechea disamnim oxem zaina zaunk magnnem korit ravat; 19 karonn tea disamnim Devan rochlea tea rochnnechea survatek thaun atam poriant ieunk na ani fuddem kednanch ieunchem na toslem vhodd sonkoxtt ietolem. 20 Khorem mhunnttlear, Jehovan* te dis unne korunk nasle zalear konnuch salvar zauncho naslo. Punn vinchun kaddloleam pasot zankam Devan vinchun kaddleat tannem te dis unne keleat.

21 “Tea disamnim konnui tumkam, ‘Polloiat! Krist hanga asa,’ vo ‘Polloiat! To thoim asa,’ mhunn sangot zalear visvas dovornakat. 22 Karonn khotte Krist ani khotte provadi uprastole, ani zata zalear vinchun kaddloleank fosounk lagon khunna ani vizmitam korun dakhoitole. 23 Tor tumi zagrut ravat. Hanvem tumkam heo sogleo vostu poilinch sangleat.

24 “Punn tea disamnim sonkoxtta uprant suriacher kallokh poddttolo, ani chondrim aplo uzvadd diunchona, 25 toxench mollba voilim noketram sokol poddttolim, ani mollbar asat teo xokteo haltoleo. 26 Uprant te munxachea Putak vhodd xokten ani mhoimen kupancher ieta to polloitole. 27 Magir to devdutank dhaddttolo ani te tachea vinchun kaddloleank prithumechea ponta thaun mollbachea ponta poriant charui konnxeam* thaun ektthaim kortole.

28 “Atam anjirachea zhaddachea vopare thaun hem xikat: Zoxem eka zhaddachea khandeak noveo kombreo futtʼttat ani panam ietat tednam tumkam gim lagim pavla mhunn kollon ieta. 29 Toxench, heo vostu ghoddttat tem tumi polloitat tednam munxacho Put laginch asa, mhunnche, dara koddenuch asa mhunn zannam zaiat. 30 Hanv tumkam khorench sangtam, heo sogleo vostu ghoddon ieum poriant hi pillgi koxich morchina. 31 Mollob ani prithum na zatoli punn mhojim utram sodankal urtolim.

32 “Tea disa vixim vo tea vella vixim konnankuch khoborna, na mhunn sorga voilea devdutank, na mhunn Putak, punn fokot Bapak khobor asa. 33 Chotur ravat, zagrut ravat, karonn nemlolo kall kednam ietolo to tumkam khoborna. 34 Hem, aplem ghor soddun pordesant vochpi eka munxa bhaxen asa, zo voichea poilim chakrank aplea ghoracher odhikar dita, ani dor ekleak kam dita, toxench to rakhonndarank zagrut ravonk hukum dita. 35 Taka lagon, zagrut ravat karonn ghoracho dhoni kednam ietolo tem tumkam khoborna. To sanjecho, modle rati, fantodder,* vo sokallim fuddem ietolo hem tumkam khoborna, 36 na zalear to okosmat pavta tednam tumi nhidlole asat mhunn to polloitolo. 37 Hanv jem tumkam sangtam, tem sogleank sangtam: Zagrut ravat.”

14 Don disam uprant, Paskachi ani Khomir Naslolea Unddeachi Porob asli. Tednam mukhel iadnik ani xastri Jezuk naddbudʼdhen dhorunk ani marun uddounk koxem mellot kai mhunn polloitale, 2 karonn te mhunnttale: “Porbechea vellar naka; lok ghoddie uchamboll zatolo.”

3 Jezu Bethanient Simanvachea ghora aslo zaka adim kodd zalʼlem. To jevnnak boslolo astana ek bail tachea lagim xudʼdh zottamanxechea* pormollit telachi battli* gheun aili. Ti battli khub mharog asli ani tantunt xudʼdh tel aslem. Tinnem ti battli foddun ukti keli,* ani tantuntlem tel Jezuchea mathear votounk lagli. 4 Hem polloun thodde zann bejar zale ani eka-mekak mhunnonk lagle: “Hem pormollit tel kiteak piddʼddear kelem? 5 Hem tel 300 dinaram* poros chodd molak vikun te poixe goribank diunk zatale!” Te ticher ekdom ragar zale.* 6 Punn Jezun mhunnttlem: “Tumi hea bailek kiteak tras kortat? Soddat tika. Tinnem mhojea pasot ek borem kam kelam. 7 Gorib tor tumchea sangata sodanch astole, ani tumi tankam zai tednam boreponn dakhounk zata, punn hanv tumchea sangata sodanch aschom na. 8 Ti jem korunk xoktali tem tinnem kelem; mhojea kuddir pormollit tel votoun tinnem hanv melea uprant mhoji kudd purunk poilinch toiari keli. 9 Hanv tumkam khorench sangtam, akʼkhea sonvsarant jea-jea zagear bori khobor porgott zatoli tea-tea zagear hea bailecho ugddas korun tinnem jem kelam tem-ui sangtole.”

10 Magir Judas Iskariot zo Bara zannam* modlo eklo aslo, to Jezucho ghat korun taka dhorun diunk mukhel iadnikam lagim gelo. 11 Tannim tachem aikolem tednam te ekdom khuxal zale ani tannim taka chandiche nanne ditole mhunn utor dilem. Tor to Jezuk dhorun diunk sondhi sodhunk laglo.

12 Khomir Naslolea Unddeachea Porbechea poilea disa, mhunnche Judev lok aplea chali pormonnem Paskachem zonvar bolidan kortale tednam, xis Jezu lagim aile ani taka mhunnonk lagle: “Ami khoim vochon tujea pasot Paskachem jevonn jevunk toiari kelʼli tuka zai?” 13 Tednam tannem aplea dog xisank oxem sangon dhaddle: “Xarant vochat, ani tumkam ek munis matiechea kollxant udok vhortana mellttolo. Tachea fattlean vochat, 14 ani to jea ghorant bhitor sorta tea ghorachea dhoniak mhunnat, ‘Gurujin vicharlam: “Mhojea xisam sangata Paskachem jevonn jevunk rum khoim asa?”’ 15 Magir to tumkam mallier jevnnak toiar kelʼlo vhoddlo rum dakhoitolo. Thoim amchea pasot toiari korat.” 16 Tednam xis gele, ani xarant gelea uprant zoxem Jezun sanglolem toxench ghoddlem, ani tannim Paskachi toiari keli.

17 Sanz zali tednam to Bara zannam borabor ailo. 18 Te jevtale tednam Jezun mhunnttlem: “Hanv tumkam khorench sangtam, tumchea modlo eklo zo mhojea borabor jevta to mhozo visvasghat korun mhaka dhorun ditolo.” 19 Te dukhi zale, ani ek-eklo taka vicharunk laglo: “To hanv nhoi nhu?” 20 Tannem mhunnttlem: “To Bara zannam modlo eklo asa, zo mhojea sangata tattant buddoun khata. 21 Munxachea Puta vixim jem boroilam tea pormonnem to voitolo tem khorem, punn munxachea Putacho visvasghat korun taka dhorun dita tea munxachem khub vaitt zatolem! To munis zolmakuch ieunk naslo zalear chodd borem zata aslem.”

22 Uprant jevta astana, Jezun ek unddo ghetlo, ani magnneant Devache upkar attoun to moddlo. To tankam diun tannem mhunnttlem: “Ho gheiat; ho mhojea kuddik suchit korta.” 23 Magir tannem ek pelo ghetlo, ani magnneant Devache upkar attoun to tankam dilo, ani te sogle tantuntlean piele. 24 Magir Jezun tankam mhunnttlem: “Hem mhojea rogtak suchit korta, jem ‘korarachem rogot’ zaun asa, ani tem zaitea zannam pasot varounchem asa. 25 Hanv tumkam khorench sangtam, jea poriant hanv Devachea Rajeant drakxancho novo soro piena tea poriant hanv drakxancho soro kednanch pieunchom na.” 26 Xevottak tannim Devachi vakhannʼnni korunk gitam* gailim, ani thoim thaun Zoitunanchea Dongrar vochonk bhair sorle.

27 Jezun tankam mhunnttlem: “Tumcho sogleancho bhavarth haltolo,* karonn oxem boroilʼlem asa: ‘Hanv gonvlleak martolom, ani menddram hanga-thoim ximpoddttolim.’ 28 Punn mhaka jivont kelea uprant hanv tumchea poilim Galilient voitolom.” 29 Pedrun taka zobab dilo: “Hancho sogleancho bhavarth halʼlo zalear pasun mhozo bhavarth kednanch halchona.”* 30 Tednam Jezun taka mhunnttlem: “Hanv tuka khorench sangtam, aiz, hoi aichea ratich kombean don pavtti sad ghalchea adim tum mhaka tin pavtti nakartolo.” 31 Punn Pedru porot-porot mhunnonk laglo: “Mhaka tujea sangata morchem poddlear pasun, hanv tuka kosoch nakarchom na.” Urloleamnim pasun oxench mhunnttlem.

32 Uprant te Gethsemani nanvachea zagear aile, ani tannem aplea xisank mhunnttlem: “Hanv magnnem kori poriant tumi hangach boson ravat.” 33 Tannem Pedruk, Jakobak ani Juanvak aplea borabor vhele. To samko uskean bhorlo* ani ekdom dukhi zalo. 34 Tannem tankam mhunnttlem: “Hanv itlo dukhi zalam ki mhoji poristhiti morpa sarki zalea. Tumi hangach ravat ani zagrut ravat.” 35 Ani thoim thaun to matso fuddem gelo ani dimi ghalun, zata zalear osli poristhiti apleacher iena zaum-xi kor mhunn magnnem korunk laglo. 36 Tannem mhunnttlem: “Abba,* Bapa, tujean soglem korunk zata; dekhun ho pelo mhojea thaun pois kor. Tori astana, mhaka zai toxem nhoi, punn tuka zai toxem zaum.” 37 To porot ailo ani tannem tankam nhidleat te polloile. Tannem Pedruk mhunnttlem: “Simanv, tum nhidla? Tujean thoddo vell pasun zago ravonk zalem na? 38 Tallnnent poddona zaunk zagrut ravat ani magnnem korit ravat. Karonn mon toiar* asa, punn kudd oskot asa.” 39 To portun gelo ani tannem porot ek pavtt toxench magnnem kelem. 40 Magir to xisam lagim porot ailo ani tannem tankam nhidlole polloile. Tanche dolle jhemen zodd zalʼle, tor taka kitem zobab diuncho tem tankam kollonk na. 41 Magir tisrea pavtti tannem tanchea lagim ieun mhunnttlem: “Tumi oslea vellar pasun nhidtat ani suseg ghetat! Puro! To vell pavlo! Polloiat! Atam munxachea Putacho visvasghat korun, taka patkeanchea hatant dhorun ditole. 42 Utthat, ami vochum-ia. Polloiat! Mhozo ghat korpi lagim aila.”

43 To uloita astananch, rokddoch Judas ailo, zo Bara zannam modlo ek aslo. Tachea borabor tolvari ani dandde gheun lokancho zomo aslo. Tankam mukhel iadnikamnim, xastreamnim ani vhoddilamnim dhaddlole. 44 Tacho visvasghat kortolean tankam poilinch oxem mhunnon ek khunna dilʼli: “Hanv zacho umo ghetolom, toch to; taka dhorat ani vhorat. To pollon vochona zaunk kallji gheiat.” 45 Judasan somtench Jezuchea fuddem vochon mhunnttlem. “Rabʼbi!”* ani Jezucho umo ghetlo. 46 Tednam tannim ieun Jezuk dhorlo. 47 Punn thoim ubo aslolea eklean apli tolvar kaddli ani mha-iadnikachea sevokacho kanuch katrun uddoilo. 48 Punn Jezun tankam mhunnttlem: “Mhaka tumi tolvari ani dandde gheun dhorunk aileat te, hanv vhoddlo chor kitem? 49 Hanv sodanch Devmondirant tumchea borabor aslom ani xikounn ditalom tednam tumi mhaka dhorunk na. Punn hem soglem Devachea Utrant boroilʼlem tem purnn zaunk lagon ghoddlem.”

50 Tednam te sogle taka soddun pollon gele. 51 Punn ek tornnatto aplea angar fokot borea lugttacho kopddo ghalun tachea fattlean-fattlean choltalo, ani lokamnim taka dhorpacho proitn kelo tednam 52 to aplea borea lugttacho kopddo thoinch soddun uktoch* pollon gelo.

53 Atam te Jezuk mha-iadnika koddem gheun gele, ani thoim sogle mukhel iadnik, vhoddil, ani xastri ektthaim zalʼle. 54 Punn Pedru matso poisuch ravon tachea fattlean-fattlean mha-iadnikachea angnnant poriant gelo. To tea ghorantlea sevokam borabor ujea mukhar xekonk boslo. 55 Atam mukhel iadnik, akʼkhe Mha-sobhe* borabor Jezucher mornnachem formonn marunk tachea add purave sodhtale, punn tankam ekui puravo mellonk na. 56 Zaite lok tachea add khotti govai ditale, punn tanchi govai eka-mekak zullo nasli. 57 Thoddea lokamnim ube ravon tachea add oxi khotti govai dili: 58 “Ami haka oxem mhunnttana aikolam, ‘Hanv hatamnim bandlolem hem Devmondir moddun uddoitolom, ani tin disam bhitor dusrem Devmondir bandtolom jem hatamnim bandlolem aschem na.’” 59 Punn hea vixim pasun te ditale ti govai eka-mekak zullo nasli.

60 Uprant mha-iadnik tanchea modem ubo ravon Jezuk prosn vicharunk laglo: “Tum vogich kiteak asa? He munis tujer kitem arop ghaltat tem tunvem aikonk na?” 61 Tori astana, to vogich ravlo ani tannem kainch zap diunk na. Mha-iadnikan porot taka prosn vicharlo ani mhunnttlem: “Tum Povitr Devacho Put, Krist?” 62 Uprant Jezun mhunnttlem: “Hoi, hanvuch to; ani tumi munxachea Putak Devachea bollixtt uzvea hatak boslolo ani mollbachea kupam voilean ieta to polloitole.” 63 Hem aikotanch mha-iadnikan aple kopdde pinzle ani mhunnttlem: “Atam amkam anik sakxeanchi kiteak goroz asa? 64 To Devachea add uloila tem tumi pasun aikolam. Tor atam tumcho nirnnoi kitem?”* Tannim sogleamnim taka mornnachem formonn favo mhunn sanglem. 65 Thodde tacher thukonk lagle ani tachem tondd dhampun tacher mutti marunk lagle. Tannim taka mhunnttlem: “Tuka konnem marlem tem amkam sang!” Uprant neai-sobhechea rakhonndaramnim tachea tonddar thapttam marlim ani taka gheun gele.

66 Pedru sokol angnnant boslolo aslo tednam mha-iadnikachi ek chakorn aili. 67 Pedru ujea mukhar xekta tem polloun, tinnem tacher nodor marun mhunnttlem: “Tum pasun tea Nazaretkar Jezu borabor aslo.” 68 Punn tannem hem nakarlem ani mhunnttlem: “Hanv taka vollkhona ani tum kitem mhunntta tem mhaka somzona,” ani to bhair darvonttea-xim gelo. 69 Chakornin taka polloilo ani thoim ube aslolea lokank porot ek pavtt mhunnttlem: “Ho pasun tanchea modlo eklo.” 70 Pedru porot nakarunk laglo. Thoddea vella uprant, thoim ube aslole te lok porot Pedruk mhunnonk lagle: “Dubhav nastana tum pasun tanchea modlo eklo, karonn tum ek Galiliekar.” 71 Punn Pedrun tem nakarlem* ani soput gheun mhunnttlem: “Tumi uloitat tea munxak hanv vollkhoch na!” 72 Teach vellar kombean dusre pavtti sad ghatlo. Tednam, “kombean don pavtti sad ghalchea poilim tum tin pavtti mhaka nakartolo,” him Jezuchim utram Pedruk ugddas ailim. Ani ekdom khontin bhoron to dukamnim roddonk laglo.

15 Sokall zatoch rokddech mukhel iadnik, vhoddil, ani xastri, mhunnche, akʼkhi Mha-sobha uloili, ani tannim Jezuk bandlo ani vhoron Pilatachea tabeant dilo. 2 Pilatan Jezuk prosn vicharlo: “Tum Judevancho Raza?” Jezun zobab diun mhunnttlem: “Oxem tunch mhunntta.” 3 Punn mukhel iadnik tacher veg-veglle arop ghalunk lagle. 4 Tor Pilatan taka porot prosn vicharlo: “Tum kainch zap dina? Polloi, te tujer kitle arop ghaltat.” 5 Punn Jezun kainch zobab diunk na, tea pasot Pilat ekdom ojap zalo.

6 Dor vorsa porbechea vellar, Pilat lok magta tea koideak suttka ditalo. 7 Tea disamnim, Barabas nanvacho eklo anik thoddea munxam sangata bondkhonnint aslo, karonn tannim sogleamnim sorkara add kam kelʼlem ani khun kelʼlo. 8 Tor lokancho zomo atam Pilata lagim ailo ani to dor vorsa korit ailʼlo toxem tannem korchem mhunn vinoti korunk laglo. 9 Tannem lokank mhunnttlem: “Hanvem tumchea pasot Judevanchea Razak suttka dilʼli tumkam zai?” 10 Mukhel iadnikamnim nattkaiek lagon Jezuk dhorun dila mhunn Pilat zannam aslo. 11 Punn mukhel iadnikamnim Jezuchea bodlek Barabasak soddcho mhunn lokank sangonk uksaile. 12 Porot ek pavtt Pilatan tankam vicharlem: “Tor hanv hea munxachem kitem korum, zaka tumi Judevancho Raza mhunnttat?” 13 Te porot bob marunk lagle: “Taka khambear* mar!”* 14 Punn Pilatan tankam vicharlem: “Kiteak? Tannem kitem vaitt kelam?” Punn te anikui vhoddlean bob marun mhunnonk lagle: “Taka khambear mar!”* 15 Tednam lokank khuxal korunk Pilatan Barabasak suttka dili; punn Jezuk chabkancho mar ghatlea uprant, khambear jivexim marunk, taka soinikanchea hatant dilo.

16 Uprant soinik Jezuk angnnant mhunnche, razpalachea rajmahalant gheun gele, ani thoim tannim soglea soinikank ektthaim kele. 17 Tannim taka zambllea rongache kopdde nhesoile ani ek kantteancho mukutt toiar korun tachea mathear dovorlo. 18 Te mottʼttean taka oxem mhunnonk lagle: “Judevanchea Raza, tuka zoi!”* 19 Toxench te boddi gheun tachea tokler marunk lagle ani tacher thukonk lagle. Titlench nhoi, tannim dimi ghalun taka nomoskar kelo. 20 Xevottak tachim zaitim fokannam kelea uprant tannim taka ghatlole zambllea rongache kopdde kaddle ani tache kopdde taka porot ghatle. Magir te taka khambear khillaunk gheun gele. 21 Tednam Siren xaracho Simanv nanvacho ek munis kheddea ganvantlean ietalo. Thoim thaun to pasar zatalo. To Aleksandr ani Rufusacho Bapui aslo. Soinikamnim tacher dobhav ghatlo ani Jezucho trasancho khambo* taka ubarun vhoronk lailo.

22 Uprant te Jezuk Golgotha mhunntta thoim gheun aile, zacho orth, “Toklechea Kottʼtteacho Zago.” 23 Hanga tannim taka noxa haddtta toslo gondhros* drakxanchea soreant ghalun diunk proitn kelo, punn Jezu to pieunk na. 24 Uprant tannim taka khambear khillailo ani tache kopdde vanttunk tancher sorti ghatleo ani konnem kitem vhorchem tem tharailem. 25 Sokallchim sumar nnov voram* zalim tednam tannim taka khambear khillailo. 26 Tacher ghatlolo arop oso boroilʼlo aslo: “Judevancho Raza.” 27 Ani, tannim tachea sangata don vhoddlea chorank khambear marlole, ekleak tachea uzveak ani dusreak tachea daveak. 28* —— 29 Thoinchean ieta-voitale te lok tokli haloun tacho opman kortale ani mhunnttale: “Kitem re! Devmondir moddun tin disam bhitor bandtolo mhunn sangtalo nhoi tum? 30 Trasanchea khambea* voilo sokol denvon tukach salvar kor.” 31 Teach toren, mukhel iadnik ani xastri mellon apleach bhitor tachim fokannam korunk lagle: “Tannem dusreank salvar kele; punn to apnnakuch salvar korunk xokona! 32 Atam ami polloun bhavarth dovrunk lagon, Izraelacho Raza Kristak trasanchea khambea* voilo sokol denvon ieum-di.” Toxench, tachea donui vatten khambear aslole pasun tacho opman kortale.

33 Donparchim sumar bara* voram zalim tednam akʼkhea desant kallokh poddlo, ani ho kallokh donparchim sumar tin* voram poriant urlo. 34 Ani sumar tin vorancher, Jezun mottʼttean oxem mhunnttlem: “Eli, Eli, lama sabakthani?” zacho orth, “Mhojea Deva, mhojea Deva, tunvem mhaka kiteak soddun dila?” 35 Hem aikon thoim ube aslole thodde lok mhunnonk lagle: “Polloiat! To Elijak ulo korta.” 36 Tednam konnem eklean dhanvon vochon kapsacho gullo* ambott zalʼlea drakxanchea soreant buddoilo ani boddiek lavun taka pieunk dilo, ani mhunnttlem: “Elija taka khambea voilo denvounk ieta vo na tem polloum-ia.” 37 Punn Jezun mottʼttean bob marli ani aplo jiv soddlo. 38 Tednam Devmondirantlo poddʼddo voir thaun sokol pinzon tache don kuddke zale. 39 Tachea mukhar aslolea soinikanchea odhikarean* to morta tednam kitem-kitem ghoddlem tem polloilem, ani mhunnttlem: “Khorench ho Devacho Put aslo.”

40 Thoim thoddeo bailo-i asleo jeo pois thaun polloitaleo. Tanchea modem Magdalachi Marie, toxench dhakttea Jakobachi ani Josesachi avoi Marie, ani Salome asli. 41 Teo bailo tachea borabor astaleo ani to Galilient aslo tednam tachi seva kortaleo. Thoim anikui thoddeo bailo asleo jeo tachea borabor Jeruzalemant ailʼleo.

42 Atam sanz zait ailʼli ani to Toiarecho dis aslo, mhunnche Sabathacho adlo dis, 43 dekhun Arimatheacho Juze ailo. Taka Judevanchea Vhoddlea Neai-sobhent borem nanv aslem, ani to Devachea Rajeachi vatt polloitalo. Tannem dhiran Pilata mukhar vochon Jezuchi kudd magli. 44 Jezu mela mhunn aikon Pilat ojap zalo. Tor tannem soinikanchea odhikareak apoun, Jezu khorench mela kai mhunn vicharlem. 45 Soinikanchea odhikarea koddlean Jezu khorench mela mhunn khatri kelea uprant Pilatan tachi kudd Juzek dili. 46 Juzen ek nitoll boro kopddo vikto haddlo. Tannem Jezuchi kudd denvoili ani ti tea nitoll kopddean guttlaili ani khoddop foddun toiar kelʼlea eka dholint* dovorli. Uprant tannem ek vhoddlo fator dhuklun ti dhol* bond keli. 47 Punn Magdalachi Marie ani Josesachi avoi Marie taka dovorlolo tea dholik* polloit ravlim.

16 Sabath somplea uprant, Magdalachi Marie, Jakobachi avoi Marie, ani Salome, hannim Jezuchea kuddik lavunk pormollit mosale vikte ghetle. 2 Sumanachea poilea disa suria udetanch tim dholi* lagim ailim. 3 Tim eka-mekak mhunnttalim: “Amchea pasot dholi voilo fator konn kuxik kaddttolo?” 4 Punn tannim dholicher nodor marli tednam to fator, zo khub vhoddlo aslo to poilinch kuxin kaddlolo asa mhunn tannim polloilem. 5 Tim dholint bhitor gelim tednam tannim ek tornnatto dhove kopdde ghalun uzvea vatten boson asa tem polloilem. Taka polloun tim ojap zalim. 6 Tannem tankam mhunnttlem: “Ojap zainakat. Khambear khillaun marlolea Nazaretkar Jezuk tumi sodhtat nhoi? Taka jivont kela. To hanga na. Taka dovorlolo to zago polloiat. 7 Atam vochat, ani Pedru ani her xisank oxem sangat, ‘To tumchea poilim Galilient voitolo. Tannem sanglolem toxench tumi taka thoim polloitolim.’” 8 Tor dholintlean bhair sorlea uprant, tim thoinchean dhanvlim. Tim kamptalim ani khub ojap zalʼlim. Tannim konnank kainch sangonk na, karonn tim khub bhielʼlim.*