LUKASA PORMONNEM BORI KHOBOR

1 Manadik Theofilas, jeo ghoddnneo khorench ghoddloleo mhunn ami soglim visvas dovortat, tea vixim borounk zaitea zannamnim kam hatant ghetlam. 2 Teach bhaxen je lok survatek thaun hea soglea vostunche govai asat ani amkam Devacho sondex sangchea khatir sevok zaleat tanninch amkam heo vostu sangleat. 3 Taka lagon hea soglea vostum vixim survatek thaun manddavollin tuka borounk hanvem-i tharailem. 4 Hea udexim tuka xikoilʼleo teo vostu khorench ghoddloleo mhunn tuka khatri zatoli.

5 Herod* raza Judeiacher raj choloitalo tea disamnim Zakarias nanvacho ek iadnik aslo. To Abija mhunnttlolea iadnikanchea pongddantlo aslo. Tache bailechem nanv Elizabet aslem ani ti Aronachea sonstintli asli. 6 Tim dogaim Devachea nodren nitivont aslim karonn tim Jehova* Devacheo sogleo adnea ani kaide manun choltalim. 7 Punn tankam bhurgim naslim, karonn Elizabet vanz asli ani tim dogaim zannttim zalʼlim.

8 Zakarias Deva mukhar iadnik mhunn kam kortalo, 9 karonn atam tanchea pongddachi palli asli. Iadnikamnim tharailʼlea riti pormonnem dhump zollounk tachi palli aili tednam to Jehovachea* Devmondirant bhitor gelo. 10 To dhump zolloitalo tea vellar sogle lok bhair magnnem kortale. 11 Zakariasak Jehovacho* ek dut dixtti poddlo. Dhump zolloitat tea vedichea uzvea vatten to ubo aslo. 12 Taka polloun Zakarias ghaborlo ani thorthorlo. 13 Punn devdutan taka mhunnttlem: “Bhienaka Zakarias, karonn tunvem kallzantlean kelʼli vinovnni Devan aikoli. Tuje bailek, Elizabetak ek put zolmotolo. Tunvem tachem nanv Juanv dovrunk zai. 14 Tuka khub khuxalkai mellttoli, ani to zolmola mhunn zaito lok sontostolo, 15 karonn to Jehovachea* nodren ek vhoddlo munis zatolo. Punn tannem drakxancho vo kosloch soro kednanch pieunk zaina. To avoichea kusvea thaunuch povitr xokten bhorlolo astolo, 16 ani zaitea Izraelitkarank, tanchea Deva Jehova* lagim porot haddttolo. 17 Toxench to Elija sarko urben* ani podven Deva mukhar voitolo, ani bapaichim kallzam bhurgeam bhaxen kortolo* ani Devachi adnea pallinant tankam nitivont munxank asa tosli zannvai ditolo. Oxem korun to Jehovak* favo tosli porza toiar kortolo.”

18 Tednam Zakariasan devdutak mhunnttlem: “Oxem ghoddttolem mhunn hanvem koxi khatri dovrunk zata? Karonn hanv zanntto zalam, ani mhojea bailechi-i pirai zalea.” 19 Devdutan taka mhunnttlem: “Hanv Gabriel, zo Deva mukhar ubo astam. Mhaka tujea lagim ulounk ani hi bori khobor sangonk dhaddla. 20 Punn tum mono zatolo ani heo sogleo vostu ghoddon ieum poriant tujean ulounk zaunchem na, karonn tum mhojea utrancher patieunk na, jim tharailʼlea vellar purnn zatolim.” 21 Hem soglem ghoddtta astana lok Zakariasachi bhair vatt polloitale, ani taka Devmondirant itlo vell kiteak laglo astolo mhunn chintun ojap zale. 22 To bhair sorlo tednam tachean lokam lagim ulounk zalem na. Tannem Devmondira bhitor ek dorxon* polloilam astolem mhunn tankam somzolem. To khunna korit ravlo punn tache koddem ulounk zaina zalem. 23 Tache povitr seveche* dis somple tednam to aplea ghora gelo.

24 Thoddea disam uprant tachi bail Elizabet gorbest zali, panch mhoine poriant ti aplea ghorantlean bhair soronk na. Ti mhunnttali: 25 “Atam Jehovan* hem mhojea pasot kelam. Lokam modem ji mhaka loz bhogtali ti kaddun uddounk tannem mhojer dhean dilem.”

26 Elizabetachea sovʼvea mhoineant Gabriel dutak Devan Galiliechea Nazaret xarant, 27 eke ankvare lagim dhaddlo. Davidachea kullant Juze nanvachea eka munxa lagim tichem kazarachem utor zalʼlem. Tea ankvarichem nanv aslem Marie. 28 Devdutan Marie fuddean ieun mhunnttlem: “Tujer besanv asum. Jehova* tujea sangata asa.” 29 Punn tachim utram aikon tika khub usko zalo ani tea utrancho orth kitem asonk xokta kai mhunn ti chintunk poddli. 30 Tednam devdutan tika mhunnttlem: “Bhienaka Marie, karonn tum Devak manvolea. 31 Polloi! Tum gorbest zatoli ani eka putak zolm ditoli. Taka tunvem Jezu mhunn nanv diunk zai. 32 To vhodd zatolo ani taka Bhov Vortea Devacho Put mhunnttole, ani Jehova* Dev taka, tacho bapui Davidachem xinvason ditolo. 33 To Raza zaun Jakobachea ghoranneacher sodankal raz choloitolo, ani tachi razvottki kednanch sompchina.”

34 Punn Marien devdutak mhunnttlem: “Hanv azunui ankvar asam tor mhaka bhurgo koso zolmotolo?”* 35 Tednam devdutan tika mhunnttlem: “Povitr xokti tujer ietoli, ani Bhov Vortea Devachi xokti tujer savlli ghaltoli. Tea pasot zo Put tuka zolmota taka lok povitr ani Devacho Put mhunnttole. 36 Polloi! Tuji soiri Elizabet, jika vanz mhunnttale ti aplea mhatare piraier gorbest zalea, ani eka putak zolm diunchi asa, ho ticho sovo mhoino; 37 tor Devachean purnn korunk zaina oxem kainch na.”* 38 Tednam Marien mhunnttlem: “Hanv Jehovachi* chakorn! Tunvem mhunnttlam toxem mhoje sovem ghoddom di.” Tednam to devdut thoim thaun gelo.

39 Tea disamnim Marien begin-begin toiari keli ani dongri vattarant aslolea Juda xarant vochonk bhair sorli. 40 Ti Zakariasachea ghorant bhitor sorli ani tinnem Elizabetak nomoskar kelo. 41 Elizabetan Mariecho avaz aikona fuddem tichea kusveant aslolea ballkan uddi marli, ani ti povitr xokten bhorli. 42 Elizabetan mottʼttean mhunnttlem: “Bailam modem tujer chodd besanv asa, ani tujea kusveachea follacher Devan axirvad ghatla! 43 Ho mhojea pasot kitlo vhodd man zaun asa, ki mhojea Somiachi avoi mhaka mellonk ailea. 44 Tuzo avaz mhojea kanar poddttanch mhojea kusveantlea ballkan khuxalkaien uddi marli. 45 Tunvem visvas dovorlo dekhun tujer besanv asum, karonn Jehovan* tuka bhasailam tem soglem to purnn kortolo.”

46 Tednam Marien mhunnttlem: “Hanv* Jehova* Devak vakhannttam, 47 mhaka salvar korpi Deva pasot mhojem kalliz khuxen bhorlam, 48 karonn tannem aple khalte chakornicher dhean dilem. Polloiat! Aiz thaun pillgeo mhaka besanvan bhorloli mhunnttoleo, 49 karonn sorv-bollixtt Devan mhojea pasot vhodd-vhodd kamam keleant, ani tachem nanv povitr asa. 50 Jim konn tachi bhirant dovortat tancher tachi doia pillge-pillge poriant urta. 51 Tannem aplea hatachem boll dakhoilem; ani jim konn kallzan gorvixtt aslim tankam tannem hevtten-tevtten ximpddailim. 52 Tannem bollixtt munxank xinvasona voile denvoileat ani khaltea munxank voir kaddleat. 53 Tannem bhukelʼleank boreo vostu diun dhadoxi keleat punn girestank tannem ritea hatamnim dhaddleat. 54 Apli doia sodankal ugddasak dovrun to aplo sevok Izraelachea adarak ailo, 55 amchea purvozank, mhunnche, Abraham ani tache sonstek* tannem dilʼlem utor pallʼllem.” 56 Marie sumar tin mhoine Elizabeta sangata ravli ani uprant ti aplea ghora aili.

57 Elizabetache dis zalea uprant, tinnem eka putak zolm dilo. 58 Jehovan* ticher kitli doia kelea tem tichea xezareamnim ani soireamnim aikolea uprant tim soglim tichea borabor khuxal zalim. 59 Atthvea disa tim ballkak sunot korunk gheun ailim, ani tim taka tachea bapaichea nanva pormonnem nanv ghalunk sodhtalim. 60 Punn tachea avoin mhunnttlem: “Na! Taka Juanv nanv dovrunk zai.” 61 Tednam tim mhunnonk laglim: “Tumchea soiream bhitor konnankuch hem nanv na.” 62 Magir tea ballkak kitem nanv dovorchem mhunn tannim tachea bapaik khunna korun vicharlem. 63 Tednam tannem ek folleacho kuddko maglo ani tacher boroilem: “Tachem nanv Juanv.” Hem polloun soglim ojap zalim. 64 Teach vellar tachi jib suttli ani to porot ulounk laglo. Tannem Devachi vakhannʼnni keli. 65 Tanchea bhonvtonnim ravtolea soglea xezaream modem ek bhirant posorli, ani Judeiachea akʼkhea dongri vattarant lok he ghoddnne vixim ulounk lagle. 66 Ani jea konnem hi khobor aikoli tim monantuch mhunnonk laglim: “Ho bhurgo vhodd zaun konn zatolo kai?” Karonn Jehovacho* hat khorench tacher aslo.

67 Uprant tacho bapui Zakarias povitr xokten bhorlo, ani oxi bhasaunni korunk laglo: 68 “Izraelacho Dev, Jehovak* vakhannʼnni, karonn tannem aplea lokancher dhean dilam ani tankam suttka dilea. 69 Tannem aplo sevok Davidachea ghoranneant, amchea pasot ek bollvont salvar korpi ubo kela,* 70 zoxem tannem adlea kallar aplea visvaxi provadeam udexim sanglolem. 71 Tannem sanglolem ki to amkam amchea dusmana thaun ani amcho dves korta tea sogleam thaun soddoitolo. 72 To amchea purvozanchi doia korun aplo povitr korar ugddas kortolo. 73 To aplo soput ugddas kortolo zo tannem amcho purvoz Abrahamak dil’lo. 74 Tannem mhunnttlolem ki to amkam amchea dusmanachea hatantlim soddoun bhienastana tachi povitr seva korcho sueog ditolo 75 ani ami akʼkhem jivit tachea nodre mukhar visvaxi ravtolim ani tachea nitichea dorjeam pormonnem choltolim. 76 Punn tuka mhojea puta, sogleant Vortea Devacho provadi mhunnttole, karonn tum Jehova* mukhar vochon tache pasot vatt toiar kortolo, 77 ani tachea lokank ho sondex ditolo ki to tanchim patkam bhogxitolo ani tankam soddoitolo. 78 Hem amchea Devachea doia-maiek lagon zatolem. Jednam to amchi doia-maia kortolo amcher sokallcho uzvadd poddlolea bhaxen zatolem, 79 ani tea udexim kallkhant bosloleank ani mornnachea savllent bosloleank uzvadd mellttolo ani tim xantiche vatten cholonk pavtolim.”

80 To bhurgo vhodd zait gelo ani Devachea povitr xokte udexim budʼdhin ani borea gunnamnim vaddot gelo ani Izraela mukhar ieuncho tacho vell zaum poriant to oronnʼnneant* ravlo.

2 Tea disamnim aplea razvottkentlea* soglea lokamnim ap-aplem nanv register korchem mhunn Somraz* Augustusan hukum bhair kaddlo. 2 (Hem poilem registration Kirinus, Siriacho razpal aslo tednam zalem.) 3 Taka lagon sogle lok aplem nanv register korunk, te zolmolʼle tea-tea xarant vochonk lagle. 4 Juze, Galilientlea Nazaret xara thaun Judeiantlea Bethlehem mhunnttlolea Davidachea xarant gelo, karonn to Davidachea ghoranneantlo ani kullantlo aslo. 5 Thoim Juze apli bail Marie sangata aplem nanv register korunk gelo. Ti gorbest asli ani beginuch eka ballkak zolm diunchi asli. 6 Tim Bethlehemant aslim tednam Mariek bhurgo zolmocho vell zalo, 7 ani tinnem aplea poilea putak zolm dilo. Tankam ravonk khoinch rum mellonaslo dekhun tinnem tea bhurgeak kopddeachea kuddkeamnim guttlaun khaunnent* dovorlo.

8 Tea vattarant thodde gonvlli asle, je xara bhair ravtale ani ratchea vellar aplea hinddachi rakhonn kortale. 9 Okosmat Jehovacho* ek devdut tanchea modem ieun ubo ravlo. Jehovachi* mhoima tanchea charui vattamnim porzollonk lagli, ani te khub bhiele. 10 Punn devdutan tankam mhunnttlem: “Bhienakat! Karonn hanv tumkam ek bori khobor sangonk ailam jea udexim soglo lok khub khuxal zatolo. 11 Aiz Davidachea xarant tumchea pasot ek salvar korpi zolmola, to Somi ani Krist. 12 Taka vollkhonk hi khunna: Tumkam ek lhan ballok kopddeachea kuddkeamnim guttlaun khaunnent dovorlolo distolo.” 13 Tednam okosmat, tea devduta borabor sorga voili ek vhoddli soin Devak vakhannun oxem mhunntta tem tannim polloilem: 14 “Sorgar Devachi mhoima zaum, ani jea lokancher Devachi maniotai asa tankam xanti mellom.”

15 Devdut porot sorgar gelea uprant, te gonvlli eka-mekak oxem mhunnonk lagle: “Chol, ami Bethlehemant vochum-ia ani Jehovan* amkam sanglam tem polloun ieum-ia.” 16 Tor te begin-begin gele. Thoim tannim Marie ani Juzek polloilo, ani ballok khaunnent asa to tankam dislo. 17 Tannim tea ballkak polloilo tednam devdutan tankam tea ballka vixim sangloleo sogleo vostu tannim sogleank sangleo. 18 Tea gonvlleamnim sangloleo vostu aikoleo te sogle lok ojap zale, 19 punn Marien tem soglem aplea kallzant ghott samballun dovorlem, ani tea utrancho orth kitem asonk xokta kai mhunn ti kholaien chintunk lagli. 20 Te gonvlli Devachi mhoima ani vakhannʼnni korit porot gele. Tannim jem aikolem ani polloilem tem soglem tankam sanglolem toxench aslem.

21 Atth disam uprant tea bhurgeachi sunot korcho vell ailo tednam, taka Jezu mhunn nanv dilem, jem nanv devdutan Marie gorbest zaunche poilinch sanglolem.

22 Magir Moizesa udexim dilʼlea Kaidea* pormonnem, tankam xudʼdh korcho vell ailo tednam tim taka Jeruzalemant Jehova* mukhar gheun gelim. 23 Tannim Jehovachea* Kaideant sanglolem toxench kelem. Thoim oxem mhunnttlolem: “Dor ek poilo put* Jehova* mukhar povitr asonk zai.” 24 Ani tannim Jehovachea* Kaideant sangloleo teo bhettounneo dileo: “vhoddlea parveanchi ek zoddi vo don lhan parve.”

25 Jeruzalemant Simeon nanvacho ek nitivont ani bhoktivont munis aslo, tacher povitr xokti asli, ani Dev Izraelak bhuzvonn ditolo tea vellachi to vatt polloitalo. 26 Titlench nhoi, Kristak polloilea bogor to morchona mhunn Jehovan* povitr xokte udexim Simeonak kolloilʼlem. 27 Povitr xoktechea preronnan to Devmondirant ailo. Kaideant sanglolea pormonnem Jezuchim avoi-bapui taka Devmondirant gheun ailim tednam, 28 Simeonan tea bhurgeak aplea vengent ghetlo ani Devak vakhannun mhunnttlem: 29 “Akʼkhea vixvachea Dhonia, atam tuzo chakor xantin moronk xokta, karonn tunvem sanglolem toxem, 30 zachea udexim tum taronn ditolo taka hanvem mhojea dolleamnim polloilo. 31 Soglea raxttranchea lokamnim taka pollouncho mhunn tunvem taka dila, 32 raxttranchea dolleam voilo poddʼddo kaddun uddounk to ek uzvadd ani tuje lok Izraelachi, to mhoima zaun asa.” 33 Simeon bhurgea vixim hem soglem sangtalo tem aikon tachim avoi-bapui ojap zalim. 34 Uprant Simeonan tankam besanv diun bhurgeache avoik, Mariek mhunnttlem: “Polloi! Ho Izraelant zaitim zannam poddonk ani utthonk karonn zatolo ani ek oxi khunna zatolo zachea add lok uloitole 35 (ani tujea vixim sangchem tor, ek lamb tolvar tujea ar-par zatoli), ani tea udexim zaiteanchea kallzant kitem asa tem kollon ietolem.”

36 Thoim Ana nanvachi ek provadin asli ji khub zanntti zalʼli. Ti Asher kullantlea Fanuelachi dhuv asli. Kazara uprant ti fokot sat vorsam aplea ghova sangata ravonk pavli, 37 ani uprant vidva zali. Atam ti 84 vorsanchi asli. Ti chukonastana Devmondirant voitali. Ti upas ani kallzantlean vinovnneo korun, rat ani dis povitr seva kortali. 38 Teach vellar ti thoim aili ani Devache upkar attounk lagli. Jeruzalemachea suttkechi vatt polloitolea sogleank ti tea ballka vixim sangonk lagli.

39 Jehovachea* Kaideant sanglolem titlem-i kelea uprant, Juze ani Marie aplea xarant mhunnche, Galiliechea Nazaret xarant porot gelim. 40 Bhurgo vaddot gelo ani zannvaien bhorot gelo, ani Devachem besanv tacher sodanch aslem.

41 Tachim avoi-bapui sonvoim-e pormonnem dor vorsa Jeruzalemant Paskache porbek voitalim. 42 Tor to 12 vorsancho aslo tednam tim sonvoim-e pormonnem Jeruzalemant Paskache porbek gelim. 43 Punn porbeche dis somplea uprant tim ghora ietalim tednam tancho put Jezu Jeruzalemantuch urlo, ani tachea avoi-bapaik hea vixim kainch kollonk na. 44 Tanchea sangata provas kortolea her lokam borabor to asa oxem chintun tim ek disachi vatt cholʼlim. Tea uprant tim taka soiream modem ani vollkhichea lokam modem sodhunk laglim. 45 Punn to mellonk na dekhun tim porot Jeruzalemant gelim ani taka sogle koddem sodhunk laglim. 46 Tin disam uprant tankam to Devmondirant mellʼllo. Thoim to dhormik xikxokam modem boson tanchem aikotalo ani tankam prosn vichartalo. 47 Tachem aikotale te sogle lok tachi somzopachi tank ani tache zobab aikon ojap zatale. 48 Tachea avoi-bapain taka thoim polloilo tednam tim khub ojap zalim. Tachea avoin taka mhunnttlem: “Baba, tunvem oxem kiteak kelem? Tuzo bapui ani hanv tuka sogleak sodhtalim. Amkam khub usko zalʼlo.” 49 Punn tannem tankam mhunnttlem: “Tumi mhaka hanga-thoim kiteak sodhtalim? Hanv mhojea Bapachea ghorant astolom mhunn tumkam khoborna?” 50 Punn tachea utrancho orth tankam somzonk na.

51 Magir to tanchea sangata gelo ani Nazaretant porot ailo. To sodanch tanchea adhin* ravlo. Tachea avoin heo sogleo ghoddnneo aplea kallzant samballun dovorleo. 52 Jezu zannvaien ani kuddin, toxench Devachea ani munxachea nodren vaddot gelo.

3 Tiberius Somrazachea* razvottkechea pondravea vorsa, Pontius Pilat Judeiacho razpal aslo, Herod* Galili jilʼleacho odhikari aslo, Filip tacho bhav Itureia ani Trakonitis jilʼleacho odhikari aslo, ani Lizanias Abilene jilʼleacho odhikari aslo, 2 Anas ek mukhel iadnik ani Kaifas mha-iadnik aslo, tanchea kallar Zakariasacho put Juanvak oronnʼnneant* Deva koddlean ek sondex ailo.

3 Tor Juanv Jordan nhoim-chea bhonvtonnchea soglea vattaramnim gelo, ani lokamnim bautizm gheuncho mhunn porgott korunk laglo. Ho bautizm, tannim poschatap* kela ani tankam bhogsonnem zai mhunn dakhounk ek khunna asli. 4 Hem soglem Izaias provadeachea pustokant boroilʼlem toxench zalem: “Oronnʼnneant ek mottʼtto avaz aikonk ieta: ‘Jehova* pasot vatt toiar korat! Tacho rosto nitt korat. 5 Dor ek vhall voir thaun bhoron ieunk zai, ani dor ek dongor ani porvot ek sarko zaunk zai; vankddeo-tinkddeo asloleo vatto nitt zaunk zai, ani fatrancheo vatto sullsullit zaunk zai; 6 ani Dev koso taronn* dita tem soglea lokank dison ietolem.’”

7 Aplea lagim bautizm gheunk ietat tea lokank Juanv oxem mhunnttalo: “Vikari sorpanchea pileamno, ieuncho asa tea krodha thaun pollon vochonk konnem tumkam xittkailam? 8 Tumi poschatap kela mhunn tumchea kamamnim dakhoiat. ‘Abraham amcho bapui,’ oxem tumkanch mhunnonakat. Karonn hanv tumkam sangtam, Dev hea fatram thaun Abrahama pasot bhurgim zolmak haddunk xokta. 9 Khorench, zhaddanchea mulla lagim tor kuradd poilinch dovorloli asa. Borem foll dina tem dor ek zhadd katrun ujeant uddoitole.”

10 Tednam lok taka vichartale: “Tor ami kitem korunk zai?” 11 To tankam mhunnttalo: “Jea munxa lagim don kopdde asat tannem tantuntlo ek oslea munxak diuncho zachea lagim kainch na, ani zachea lagim khaunk zaiteo vostu asat tannem oxench korchem.” 12 Tax vosul korpi pasun Juanva lagim bautizm gheunk aile, tannim taka vicharlem: “Guruji, ami kitem korunk zai?” 13 Tannem mhunnttlem: “Jitlem tax kaidean gheunk zai* tachea poros chodd gheum nakat.” 14 Foujent asloleamnim Juanvak vicharlem: “Ami kitem korunk zai?” Tannem mhunnttlem: “Konnankuch sotainakat* vo konnancheruch khotto arop ghalinakat, punn tumkam zo dispottʼtto* melltta tantunuch dhadoxi ravat.”

15 Atam lok Krist ieupacho asa mhunn vatt polloit asle ani soglim monantlea-monant Juanva vixim oxem chintʼtalim, “Hoch Krist nhoi nhu?” 16 Juanvan tankam sogleank mhunnttlem: “Hanv tumkam udkant bautizm ditam, punn mhojea uprant ieuncho asa to mhojea poros anik chodd xoktivont asa, hanv tor tachim zotim kaddunk pasun purto na. To tumkam povitr xokten ani ujean bautizm ditolo.* 17 Tachea hatant dannea thaun tonn vegllem korunk dantanchem khorem asa. To aplem akʼkhem kholl* nitoll kortolo ani gonv ektthaim korun aplea gudanvant dovortolo, punn tem tonn palvona toslea ujeant lastolo.”

18 Juanvan lokank anikui zaitem xikoilem ani tankam bori khobor porgottit ravlo. 19 Punn jilʼleacho odhikari Herodak tannem, tachea bhavachea bailek Herodiasak apli bail korun ghetlea mhunn ani tachea dusrea soglea vaitt kamank lagon xittkailo 20 tednam Herodan taka bondkhonnint ghatlo. Oxe toren aplea vaitt kamant tannem anik ek kam vaddoilem.

21 Sogle lok bautizm ghetale tednam Jezunui bautizm ghetlo. Ani magnnem kortana mollob uktem zalem, 22 tea vellar Devachi povitr xokti parvea bhaxen tacher denvon ietana disli, ani sorgar thaun oso avaz aikonk ailo: “Tum mhozo opurbaiecho Put; tum mhaka manvola.”

4 Uprant Jezu povitr xokten bhoron Jordan nhoim-e thaun bhair sorlo. Povitr xokti taka oronnʼnneant* gheun geli. 2 To 40 dis poriant thoinch ravlo. Tea disamnim Jezun kainch khaunk naslem ani te dis kabar zale tednam taka bhuk lagli. Tednam Soitanan* taka tallnnent ghalcho proitn kelo. 3 Soitanan* Jezuk mhunnttlem: “Tum Devacho put zalear hea fatrak unddo zaunk sang.” 4 Punn Jezun taka zobab diun mhunnttlem: “Oxem boroilʼlem asa, ‘Munxan fokot unddeach vorvim jieunchem nhoi.’”

5 Uprant Soitan taka eka unch zagear gheun ailo ani ekech ghoddie bhitor taka sonvsaracheo sogleo razvottkeo dakhoileo. 6 Soitanan* taka mhunnttlem: “Hanv tuka hea sogleancher odhikar ditolom ani tanchi mhoima ditolom, karonn hem soglem mhojea tabeant dilʼlem asa, ani mhaka zai taka hanv tem ditolom. 7 Tor, tum fokot ekuch pavtt mhoji bhokti korxi zalear hem soglem tujem zatolem.” 8 Jezun taka zobab diun mhunnttlem: “Oxem boroilʼlem asa, ‘Tunvem fokot Jehova* Devachich bhokti korunk zai, ani tachi ekleachich povitr seva korunk zai.’”

9 Magir Soitan, Jezuk Jeruzalemant gheun gelo, ani tannem taka Devmondirachea durgar unch ubo kelo. Tannem Jezuk oxem sanglem: “Tum Devacho put zalear hanga thaun sokol uddi mar, 10 karonn oxem boroilʼlem asa, ‘To aplea devdutank tuka salvar korunk adnea ditolo,’ 11 ani, ‘Tuje paim fatrak adollna zaunk te tuka aplea hatamnim uklun dhortole.’” 12 Zobab diun Jezun taka mhunnttlem: “Oxem boroilʼlem asa, ‘Jehova* tujea Devachi tunvem porikxa korchi nhoi.’” 13 Tor sogleo tallnneo ghalun zalea uprant dusro ek boro vell mello poriant Soitan* taka soddun gelo.

14 Magir Jezu povitr xokten bhoron Galilient porot ailo. Ani bhonvtonnchea soglea vattaramnim lok tachea vixim borem ulounk lagle. 15 To tanchea sobha-ghoramnim xikounk laglo, ani soglo lok taka man diunk laglo.

16 Magir to Nazaretant gelo zoim to vaddlolo. Aple sonvoim-e pormonnem Sabathachea disa to sobha-ghorant gelo ani vachunk ubo ravlo. 17 Izaias provadeacho kovllo tachea hatant dilo, ani tannem to kovllo ugddun to bhag sodhun kaddlo zoim oxem boroilʼlem aslem: 18 “Jehovachi* povitr xokti mhojer asa, karonn goribank bori khobor porgottunk tannem mhaka makhla. Koideank suttka porgottunk, kuddʼddeank nodor diunk, zulum sostoleank soddounk, 19 ani Jehovachi* maniotai mellttoli tea vorsa vixim porgottunk tannem mhaka dhaddla.” 20 Magir tannem to kovllo kovllun sevokachea hatant dilo ani to boslo. Sobha-ghorant soglea lokanchi nodor tacher asli. 21 Tednam tannem tankam mhunnttlem: “Tumi atanch aikoleant tim utram aiz purnn zalim.”

22 Tim soglim tachi tokhnnai korunk laglim ani kallzak khuxalkai haddtta toslim tachim utram aikon ojap zalim, ani mhunnonk laglim: “Ho Juzecho put nhoi?” 23 Tea vellar Jezun tankam mhunnttlem: “Dubhava viret tumi hi mhunnʼnni mhaka laitolim, ‘Voiza, poilim tum tukach boro kor. Kapernaumant tunvem kelʼlea kamam vixim ami aikolam. Atam tim kamam tujea ganvantui kor.’” 24 Tannem fuddem mhunnttlem: “Hanv tumkam khorench sangtam, khoinchea-i provadeak tachea svotachea ganvant svikar korinant. 25 Elijachea disanchem udharonn gheiat: Sadde tin vorsam poriant paus poddonk na ani akʼkhea desant bhuk poddloli. Khorem mhunnttlear, tea vellar Izraelant zaiteo vidva asleo. 26 Punn, Elijak tanchea modlea khoincheach baile lagim dhaddunk na, tachea bodlek taka fokot Sidon desantlea Zarefath nogrant eke vidve lagim dhaddlo. 27 Titlench nhoi, provadi Elishachea disamnim Izraelant zaite kodd zalʼle munis asle; tori astana tanchea modlea konnankuch nitoll korunk na, tachea bodlek fokot Siriantlea Namanak nitoll* kelʼlo.” 28 Sobha-ghorant aslolea lokamnim hem soglem aikolem tednam te sogle ragan bhorle. 29 Te utthle ani Jezuk xar bandlolem aslem tea dongrachea tengxer thaun sokol uddounk xarachea bhair gheun gele. 30 Punn to tanchea modlo bhair soron aplea vatten gelo.

31 Thoim thaun Jezu Kapernaumant gelo, jem Galiliechench ek xar aslem. Sabathachea disa to lokank xikounk laglo, 32 ani tachi xikoupachi rit polloun lok ojap zalo, karonn to odhikar aslolea bhaxen xikoitalo. 33 Tea sobha-ghorant ek munis aslo zacher noxtto dut* boslolo, to mottʼttean bob marunk laglo: 34 “Nazaretkar Jezu, amche koddem tuka kitem kam asa? Tum amcho nas korunk aila? Tum konn to hanv boro zannam, tum Devacho Povitr Sevok.” 35 Punn Jezun taka koddok utramnim mhunnttlem: “Vogi rav, ani tachea voilo bhair sor.” Tor tea munxak lokam modem uddoilea uprant to noxtto dut taka kainch korinastana tache voilo bhair sorlo. 36 Hem polloun te sogle lok ojap zale ani eka-mekak mhunnonk lagle: “Polloiat! To kitlea odhikaran uloita, ani tachea lagim kitli xokti asa! Tannem hukum dilear noxtte dut pasun munxa voile bhair sortat.” 37 Tea pasot bhonvtonnchea soglea vattarant tachi khobor posorli.

38 Sobha-ghorantlean bhair sorlea uprant Jezu Simanvachea ghora gelo. Thoim Simanvachi sasumai zoran foddfoddttali. Tika bori kor mhunn tannim Jezu lagim vinoti keli. 39 Tor Jezu tichea kuxik vochon ubo ravlo ani tannem zorak hukum dilo ani ticho zor gelo. Teach vellar, ti rokddich utthli ani tanchi seva korunk lagli.

40 Suria buddonk laglo tednam aplea ghorant veg-vegllim duensam aslolea soglea munxank lok Jezu lagim gheun aile. Jezun dor ekleacher hat dovrun tankam sogleank bore kele. 41 Noxtte dut pasun, “Tum Devacho Put,” oxem mhunnon zaitea zannam voile bhair sortale. Punn to tankam tapoitalo ani ulounk dinaslo, karonn to Krist mhunn te zannam asle.*

42 Dis uzvaddlo tednam to thoim thaun eka eksurea suvater gelo. Punn lokancho zomo taka sodhunk laglo, ani sodhit-sodhit to khoim aslo thoim pavlo, ani tannem tankam soddun voichem nhoi mhunn tachea lagim vinoti korunk laglo. 43 Punn Jezun tankam mhunnttlem: “Devachea Rajeachi bori khobor hanvem dusrea xaramnim pasun porgottunk zai, karonn heach pasot mhaka dhaddla.” 44 Uprant, to Judeiachea sobha-ghoramnim vochon porgottunk laglo.

5 Ek pavtti Jezu Genezaret tollea* lagim ubo ravon lokank Devachem utor xikoitalo, ani lok tachea bhonvtim gordi korun asle. 2 Tednam tannem don vhoddim todder lailʼlim polloilim. Tantuntlean bhair soron kharvi aplem zall dhuitale. 3 Tantuntlem ek vhoddem Simanvachem aslem, ani Jezu tacher choddlo. Tannem taka tem vhoddem todder thaun matxe pois vhoronk sanglem ani uprant tacher boson to lokank xikounk laglo. 4 Tachem uloun somplea uprant tannem Simanvak mhunnttlem: “Vhoddem khol udok asa thoim gheun voch, ani thoim tujem zall ghal.” 5 Punn Simanvan mhunnttlem: “Guruji, ami akʼkhi rat koxtt kele, punn amkam kainch mellonk na. Tori astana tum mhunntta dekhun hanv zall ghaltam.” 6 Tannem oxem kelem tednam tanchea zallant zaitem nustem sampoddlem. Tankam itlem nustem mellʼllem ki tanchim zallam pinzonk laglim. 7 Tednam tannim khunna korun dusrea vhoddeant aslolea aplea sangateank modot korunk apoile. Te aile ani donui vhoddeamnim nustem bhorunk lagle. Tim donui vhoddim itlim bhorlim ki tim buddonk pavlim. 8 Hem polloun Simanv Pedru Jezuchea paim-axim ieun poddlo ani mhunnonk laglo: “Mhojea thaun pois voch Somia, karonn hanv ek patki munis.” 9 Itlem nustem mellʼllam tem polloun to ani tachea borabor aslole sogle ekdom ojap zale. 10 Simanva borabor mellon kam kortale te Zebedevache put, Jakob ani Juanvachi tich poristhiti zalʼli. Punn Jezun Simanvak mhunnttlem: “Bhienaka. Karonn atam thaun tum jivea munxank* dhorpi zatolo.” 11 Tednam te ap-aplem vhoddem todder gheun aile ani soglem soddun tachea fattlean vochonk lagle.

12 Anik eka vellar Jezu eka xarant aslo tednam thoim ek munis aslo zachi akʼkhi kudd koddan bhorloli. Jezuk polloitanch to tachea mukhar vochon umto poddlo ani vinoti korun oxem mhunnonk laglo: “Somia, tuka zai zalear, tum mhaka nitoll korunk xokta.” 13 Tednam Jezun aplo hat fuddem korun taka lailo ani mhunnttlem: “Hoi, mhaka zai! Nitoll zav.” Teach vellar tachem kodd nanch zalem. 14 Jezun tea munxak hea vixim konnank sangonaka mhunn hukum dilo ani mhunnttlem: “Tum boro zala mhunn iadnikank kollche khatir, vochon tankam tuji kudd dakhoi, ani uprant Moizesan bhettounk sanglolo to iodn bhettoi.” 15 Punn Jezuchi khobor pois-pois posronk lagli, ani lokanche zomeache-zome tachem aikonk ani aplea duensantle bore zaunk tachea lagim ieunk lagle. 16 Tori astana Jezu choddxe pavtt magnnem korunk eksurea vattarant voitalo.

17 Ek dis to lokank xikoitalo tednam thoim Galili ani Judeiachea dor eka ganvantle toxench Jeruzalemantle Farizev* ani Devacho Kaido xikoitat te boson asle; ani lokank bore korunk Jehovachi* xokti tacher asli. 18 Tednam kaim zannamnim eka ar zalʼlea munxak khattir ghalun haddlo. Te taka Jezu aslo tea rumant vhorpacho proitn kortale. 19 Tor lokanche gordek lagon taka bhitor vhoronk zaina zalem dekhun te ghoracher choddle ani tannim nolle kaddun tea ar zalʼlea munxak khatti soit lokanchea gordent Jezu mukhar denvoilo. 20 Tancho bhavarth polloun Jezun ar zalʼlea munxak mhunnttlem: “Ixtta, tujim patkam bhogsolim.” 21 Hem aikon xastri ani Farizev monantlea-monant chintunk lagle: “Devachea add ulounk ho konn? Devak soddun anik konnanchean patkam bhogsunk zata?” 22 Punn te monant kitem chintʼtat tem somzolea uprant Jezun tankam mhunnttlem: “Tumi oxem kiteak chintʼtat? 23 Kitem mhunnonk chodd sompem, ‘Tujim patkam bhogsolim,’ vo, ‘Utth ani chol’? 24 Munxachea Putak prithumer lokanchim patkam bhogsunk odhikar asa hem tumkam kollchem mhunn—” Jezun ar zaun dhorlolea munxak mhunnttlem: “Hanv tuka sangtam, utth, tuji khatt ukol, ani ghora voch.” 25 Tednam to munis sogleanchea mukhar utthon ubo ravlo, ani jea khattir to nhidon aslo ti khatt uklun Devak mhoima di-it aplea ghora gelo. 26 Hem polloun sogle lok ekdom ojap zale ani Devak mhoima diunk lagle. Te samke bhiele ani mhunnonk lagle: “Aiz ami ekdom ojapacheo ghoddnneo polloileat!”

27 Tea uprant, Jezu bhair sorlo ani tannem tax vosul korta tea nakear Levi nanvachea eka munxak boslolo polloilo zo tax vosul kortalo. Jezun taka mhunnttlem: “Ieo, mhozo xis zav.” 28 Tednam to utthlo ani soglem soddun tachea fattlean cholonk laglo. 29 Uprant Levin, Jezu pasot aplea ghorant ek vhoddlem jevonn dovorlem ani zaite tax vosul korpi ani dusre lok tachea borabor jevnnak bosle. 30 Hem polloun Farizev ani tanche xastri Jezuchea xisank gunngunnon oxem mhunnonk lagle: “Tumi tax vosul korpeam sangata ani patkeam sangata kiteak jevtat?” 31 Hem aikon Jezun tankam mhunnttlem: “Bholaiken bore asat tankam nhoi punn je duent asat tankam voizachi goroz asa. 32 Hanv nitivont* lokank nhoi punn patkeamnim poschatap korcho mhunn tankam apounk ailam.”

33 Tannim mhunnttlem: “Juanvache xis porot-porot upas kortat ani kallzantlean vinovnneo kortat, ani Farizevanche xis pasun toxench kortat, punn tuje xis khatat ani pietat.” 34 Jezun tankam mhunnttlem: “Novro aplea ixttam sangata asa tea meren tumi tankam upas korunk lavunk xokonant, lavunk xoktat kai? 35 Punn osle dis ietole jednam novreak tanchea thaun pois vhortole; ani tea disamnim te upas kortole.”

36 Tea uprant Jezun tankam ek vopar pasun sangli: “Konnuch novo kopddo katrun pornea kopddeak zalʼlea burkacher laina. Oxem kelem zalear novo kopddo pinztolo ani pornea kopddea sangata zullcho na. 37 Toxench, konnuch drakxancho novo soro pornea soreachea potiamnim* bhorina. Toxem kelem zalear drakxancho novo soro potio foddttolo ani soro votʼtolo, ani soreacheo potio pasun piddʼddear zatoleo. 38 Drakxancho novo soro, novea soreachea potiamnim ghalunk zai. 39 Zo drakxancho porno soro piela taka novo soro naka asta, karonn to mhunntta, ‘Pornoch boro asa.’”

6 Ek pavtt Jezu sabathachea disa xetantlean voitalo tednam tache xis konnsam toddun aplea hatar muddʼdditale ani khatale. 2 Tednam thoddea Farizevamnim mhunnttlem: “Tumi Sabathachea disa korunk zaina tem kam kiteak kortat?” 3 Punn Jezun zobab dilo: “David ani tachea munxank bhuk lagli tednam tannem kitem kelem tem tumi vachunk na? 4 Koso to Devachea ghorant* gelo ani taka povitr* undde dile ani te tannem khale ani aplea munxankui dile, je iadnikam xivai anik konnench khaunk zainasle, hea vixim tumi vachunk na?” 5 Uprant Jezun mhunnttlem: “Munxacho Put Sabathachea disacho Dhoni zaun asa.”

6 Anik eka sabathachea disa to sobha-ghorant bhitor sorlo ani xikounk laglo. Thoim ek munis aslo zacho uzvo hat ar zaun dhorlolo.* 7 Xastri ani Farizev, Jezu taka Sabathachea disa boro korta kai mhunn pollounk tacher barik nodor dovrun asle, karonn koso-i korun tankam tacher arop ghalunk zai aslo. 8 Te aplea monant kitem chintʼtat tem Jezu zannam aslo, taka lagon hatak ar zaun dhorlolea* munxak tannem mhunnttlem: “Utth, hanga modem ieun ubo rav.” To munis utthlo ani thoim ubo ravlo. 9 Magir Jezun tankam mhunnttlem: “Hanv tumkam vichartam, Sabathachea disa kitem korop sarkem, ekleachem borem korop, kai vaitt korop, konnancho-i jiv vachovop, kai jiv kaddop?” 10 Magir sogleank polloilea uprant tannem tea munxak mhunnttlem: “Tuzo hat fuddem kor.” Tannem aplo hat fuddem kelo tednam tacho hat boro zalo. 11 Punn xastri ani Farizev ragan pixe zale, ani Jezuchem kitem korchem tea vixim eka-meka lagim ulounk lagle.

12 Ek dis Jezu magnnem korunk dongrar gelo, ani akʼkhi rat Deva lagim to magnnem korit ravlo. 13 Uprant dis uzvaddlo tednam tannem aplea xisank apoile ani tantuntlean 12 zannank vinchle, zankam tannem apostl mhunn nanv dilem. Te mhunnttlear: 14 Simanv, zaka tannem Pedru mhunn nanv dilem, ani tacho bhav Andre, Jakob, Juanv, Filip, Bartholomev, 15 Matev, Thomas, Alfevacho put Jakob, Simanv zaka “urbevont” mhunnttla, 16 Jakobacho put Judas, ani Judas Iskariot, zannem uprant Jezucho ghat kelo.

17 Jezu tanchea sangata sokol ailo ani eka mollar ieun ubo ravlo. Thoim tachea xisancho ek vhoddlo zomo aslo. Toxench akʼkhea Judeiantle ani Jeruzalemantle, ani doria deger aslolea Tir ani Sidon vattarantle khub lok thoim ektthaim zalʼle. Te lok tachem aikonk ani aplea duensantlean bore zaunk ailole. 18 Noxtte dut boslole lok pasun bore zale. 19 Tea zomeantle sogle lok Jezuk hat launcho proitn kortale, karonn tachea thaun xokti bhair sortali ani sogleank bori kortali.

20 Jezun aplea xisank polloilem ani to mhunnonk laglo:

“Goribamno, tumi khuxal, karonn Devachem Raj tumchem.

21 “Upaxim asloleamno, tumi khuxal, karonn tumkam dhadoxi kortole.

“Roddttoleamno, tumi khuxal, karonn tumi hanstolim.

22 “Munxachea Putak lagon lok tumcho dves korta, tumkam aplea modle kaddun uddoita, tumcho opman korta ani vaitt uloun tumchem nanv piddʼddear korta tednam tumi khuxal. 23 Tea disa tumi khuxal zaiat ani uddio marat, karonn sorgar tumkam vhoddlo inam mellcho asa. Tanchea purvozamnim pasun provadeank oxench kelʼlem.

24 “Punn girestamno, tumcher hai, karonn tumchea vantteachem sukh tumkam mellʼllem.

25 “Atam dhadoxi asloleamno, tumcher hai, karonn tumi upaxim urtolim.

“Atam hanstoleamno, tumcher hai, karonn tumi dukh kortolim ani roddttolim.

26 “Sogle lok tumchea vixim borem uloitat tednam tumcher hai, karonn tanche purvoz khottea provadeam sangata oxench kortale.

27 “Punn tumi je mhojem aikotat tankam hanv sangtam: Tumchea dusmanancho mog korit ravat, tumcho dves kortat tankam boreponn dakhoit ravat, 28 tumcher xirap ghaltat tankam axirvad di-it ravat, ani tumcho opman kortat tanchea pasot magnnem korit ravat. 29 Zo tujea eka polear thapott marta taka tuzo dusro-i polo dakhoi; konnui tujem khomis gheunk sodhta zalear taka tuzo kottui diunk fatti soronaka. 30 Zo konn tujea lagim magta taka di, ani zo tuje koddlean ek vost gheun voita, tachea lagim ti porot magonaka.

31 “Zoxem tumkam dusreamnim tumchea thaim kelʼlem zai, toxench tumi-i tanchea thaim korat.

32 “Tumi zor tumcho mog kortoleanchoch mog kortat zalear tantunt khas kitem asa? Patki pasun aplo mog korta tanchoch mog kortat. 33 Tumi zor tumkam borem kortoleankuch borem kortat zalear tantunt khas kitem asa? Patki pasun toxench kortat. 34 Ani zor tumi oslea lokank udar ditat zanchea thaun tumkam porot mellpachi axa asa zalear tantunt khas kitem asa? Patki pasun dilam titlem-i apleak porot mellttolem mhunn patkeank udar ditat. 35 Tachea bodlek, tumi porot mellpachi axa dhorinastana dusmanacho mog korit ravat ani borem korit ravat ani udar di-it ravat; hacho tumkam vhodd inam mellttolo, ani tumi Sogleant Vortea Devachim bhurgim* zatolim, karonn to upkar maninant tosleank ani noxtteank pasun doia dakhoita. 36 Zoso tumcho Bapui doiall, toxech tumi-i doia dakhoit ravat.

37 “Dusreanchi nit korop bond korat ani Dev tumchi nit korchona; dusreank guneanvkari tharavop bond korat, ani Devui tumkam guneanvkari tharaunchona. Dusreank bhogxit ravat,* ani Devui tumkam bhogxitolo.* 38 Tumi di-it ravat, ani lok tumkam ditole. Te tumchea unttient map bhorun, damun-chepun, bore toren haloun-haloun, ani voir poriant bhorun ghaltole. Karonn jea mapan tumi dusreank meztat, teach mapan tim-ui tumkam meztolim.”

39 Uprant tannem tankam ek vopar pasun sangli: “Ek kuddʼddo dusrea kuddʼddeak vatt dakhounk xokona, dakhounk xokta kai? Zor to vatt dakhoit zalear dogui fonddant poddttole, poddche nant kai? 40 Xis* aplea guru poros vhodd nhoi, punn zaka bore toren xikoila to dor eklo aplea guruji sarko zatolo. 41 Tor tum tujea dolleantlea pattiecher dhean dinastana tujea bhavachea dolleantlem kisor kiteak polloita? 42 Tujea dolleant asa ti patti tuka disona zalear, ‘Bhava, mhaka tujea dolleant asa tem kisor kaddunk di,’ oxem tujean tujea bhavak koxem mhunnonk zata? Are dhongea! Poilim tujea dolleant asa ti patti kadd ani uprant tujea bhavachea dolleantlem kisor koxem kaddchem tem tuka sarkem dixtti poddttolem.

43 “Khoinchem-i borem zhadd kednanch kuslolem foll dina, ani khoinchench kidd laglolem zhadd borem foll dina. 44 Tor, dor eka zhaddachi vollokh tachea folla voilean zata. Udharonnak, lok kantteachea zhadda thaun anjiram ektthaim korinant, ani toxench kantteachea zhaddantlean drakxam kaddinant. 45 Boro munis aplea kallzant aslolea borea theveantlean boreo vostu bhair kaddtta, punn vaitt munis aplea kallzant aslolea vaitt theveantlean vaitt vostu bhair kaddtta; karonn jem tachea kallzant asa tench tachea tonddantlean bhair sorta.

46 “Tor, tumi mhaka ‘Somia! Somia!’ mhunn ulo martat punn hanv sangtam tem tumi kiteak korinant? 47 Dor ek munis zo mhojea lagim ieta, mhojem utor aikota ani tea pormonnem cholta, to konnam sarko asa tem hanv tumkam sangtam: 48 To oslea eka munxa sarko asa zannem ghor bandtana khol khonnon khoddpacher buniad marli. Uprant buddtti aili tednam nhoim-chem udok ieun ghoracher marlem punn tea ghorak halounk xoklem na karonn tea ghorachi buniad ghott asli. 49 Dusrea vatten, zo mhojim utram aikota punn tea pormonnem cholona to eka oslea munxa sarko asa zannem aplem ghor buniad ghalinastana zomnicher bandlem. Jednam nhoim-chem udok ieun tachea ghoracher marlem tednam tachem ghor kosollʼllem, ani tem moddon tacho nas zalo.”

7 Lokank sangonk zai aslem tem soglem sangon zalea uprant Jezu Kapernaumant ailo. 2 Thoim ek soinikancho odhikari* aslo zo aplea chakracho khub mog kortalo, to chakor itlo duent poddlo ki to morpak pavlolo. 3 Soinikanchea odhikarean Jezu vixim aikolem tednam, ieun aplea chakrak boro kor mhunn vinoti korunk, tannem Judevanchea mukheleank Jezu lagim dhaddle. 4 Te Jezu lagim pavle tednam tannim vinoti korun oxem mhunnttlem: “To soinikancho odhikari ek boro munis, upkar korun taka modot kor, 5 to Judevancho mog korta. Tannench amchem sobha-ghor bandun dilam.” 6 Tednam Jezu tanchea sangata gelo. Punn to tachea ghora thaun matso pois aslo tednam soinikanchea odhikareache thodde ixtt tachea fuddean aile. Tankam tannem oxem sangon dhaddlole: “Dhonia, anik tras gheum naka, karonn tuka mhojea ghorant ieukar diunk hanv purto na. 7 Ani heach karonnak lagon hanv tuje koddem ieunk purto na mhunn mhaka dislem. Punn tum hanga thaunuch mhozo sevok boro zaum mhunn hukum di ani to boro zatolo. 8 Karonn hanv-ui dusreachea hata khala kam kortam, ani mhojea-i hata khala soinik kam kortat, hanv ekleak, ‘Voch!’ mhunn sangtam tednam to voita, ani dusreak, ‘Ieo!’ mhunn sangtam tednam to ieta, ani mhojea sevokak, ‘Oxem kor!’ mhunn sangtam tednam to korta.” 9 Hem aikon Jezu ekdom ojap zalo ani aplea fattlean ietale tea lokank tannem vollon polloilem ani mhunnttlem: “Hanv tumkam sangtam, itlo ghott bhavarth aslolo hanvem Izraelant pasun konnankuch pollounk na.” 10 Zankam tache koddem dhaddlole te ghora aile tednam to chakor sarko boro zala mhunn tannim polloilem.

11 Thoddea vella uprant to Nain nanvachea xarant gelo. Tache xis ani lokancho ek vhoddlo zomo tachea borabor voitalo. 12 To xarachea darvonttea lagim pavlo tednam lok eka melʼlea munxak purunk gheun voitale. To munis aplea avoicho ekloch put aslo, tea bhair ti vidva asli. Xarantle zaite lok pasun tichea borabor voitale. 13 Somiachi nodor tea bailecher poddli tednam taka tichem churchurem dislem, ani tannem tika mhunnttlem: “Roddonaka.” 14 Tannem fuddem ieun nisnnik* hat lailo, ani nisonn vhortale te thamble. Magir tannem mhunnttlem: “Tornnattea, hanv tuka sangtam, utth!” 15 Tednam melolo to tornnatto utthon boslo ani ulounk laglo, ani Jezun taka tachea avoik dilo. 16 Hem polloun sogle lok bhiele, ani oxem mhunnon Devachi mhoima korunk lagle: “Amchea modem ek vhodd provadi aila,” ani “Devan aplea lokancher dhean dilam.” 17 Tachea vixim hi khobor akʼkhea Judeiant ani bhonvtonnchea soglea vattarant posorli.

18 Juanvachea xisamnim taka heo sogleo vostu sangleo. 19 Tor Juanvan aplea don xisank apoile ani Somiak oxem vicharunk dhaddle: “Ieuncho Aslo to tunch, vo ami dusrea konnanchi vatt pollounk zai?” 20 Te Jezu lagim aile tednam tannim oxem mhunnttlem: “Juanv Batistan amkam tujea lagim oxem vicharunk dhaddlam, ‘Ieuncho Aslo to tunch, vo ami dusrea konnanchi vatt pollounk zai?’” 21 Teach vellar, Jezun zaitea lokanchim lhan toxench gombhir duensam borim kelim, lokancher boslole noxtte dut bhair kaddle, ani zaitea kuddʼddeank dixtt dili. 22 Tednam Jezun tankam sanglem: “Jem kitem tumi polloilam ani aikolam tem soglem vochon Juanvak sangat: Kuddʼddim pollounk lagtat, longddim choltat, koddkaram nitoll zatat, bherim aikotat, melolim jivont zatat, ani goribank bori khobor porgott zata. 23 Mhojer dubhavnant* tim munxam khuxal.”

24 Juanvacho sondex gheun ailʼle te gele tednam Jezu lokank Juanva vixim oxem sangonk laglo: “Tumi oronnʼnneant* kitem pollounk gelʼle? Varean halta tosli tonnachi boddi? 25 Toxem zalear tumi kitem pollounk gelʼle? Bore* kopdde ghatlolo munis? Je lok mharog kopdde ghaltat ani zanchea lagim tankam zai teo sogleo vostu asat te lok razvaddeant ravtat. 26 Tor tumi thoim kitem pollounk gelʼle? Eka provadeak? Hoi, hanv tumkam sangtam, tumi eka provadea poros vhodd munxak pollounk gelʼle. 27 Ho toch zaun asa zachea vixim oxem boroilʼlem aslem: ‘Polloi! Hanv mhojea sondexkarak tujea fuddem* dhaddttam, to tujea pasot vatt toiar kortolo.’ 28 Hanv tumkam sangtam, aiz poriant je lok zolmoleat tantunt Juanva poros vhodd konnuch na, punn Devachea Rajeant zo munis ekdom lhan asa to Juanva poros vhodd asa.” 29 (Soglea lokamnim ani tax vosul korpeamnim hem aikolem tednam Dev nitivont oxem tannim mhunnttlem karonn tannim Juanv porgottʼttalo to bautizm ghetlolo. 30 Punn Farizevamnim ani Kaidea vixim bori zannvai asli tannim ho bautizm gheunk naslo, ani Devan tanchea pasot tharailʼlo to udʼdhex tannim nakarlo.)

31 “Tor hea pillgentlea lokank hanv konnam sangata sor korum, ani te konnam sarke asat? 32 Te lok bazarant boslolea lhan bhurgeam sarke asat jim eka-mekak ulo martat ani mhunnttat: ‘Ami tumchea pasot basuri* vazoili, punn tumi nachonk nant; ami mottʼttean roddlim, punn tumi roddonk nant.’ 33 Teach bhaxen, Juanv Batist unddo khaun vo drakxancho soro pieun ieunk na, tori astana, ‘Tacher noxtto dut asa,’ oxem tumi mhunnttat.’ 34 Munxacho Put khaun pieun ailo, tori astana tumi mhunnttat, ‘Ho munis pottaro* ani bebdo, toxench to tax vosul korpeancho ani patkeancho ixtt!’ 35 Punn zannvai porinnama udexim* sarki mhunn dison ieta.”

36 Ek Farizev porot-porot Jezuk aplea ghora jevnnak apoitalo. Dekhun Jezu tachea ghora gelo ani jevnnak boslo. 37 Tea xarant ek bail ravtali, ti patki mhunn sogle zannam asle. Jezu Farizevager jevnnak aila mhunn tika kollʼllem tednam ti pormollit telachi battli* gheun thoim aili. 38 Ti Jezuchea fattlean tachea paim-am lagim aili, ani roddon-roddon aplea dukamnim tache paim bizoun aplea kensamnim te pusunk lagli. Toxench, tachea paim-anche ume gheun tinnem tancher pormollit tel votlem. 39 Hem polloun jea Farizevan Jezuk jevnnak amontronn dilʼlem to aplea monantlea-monant mhunnonk laglo: “Ho munis khorench ek provadi aslo zalear taka hat laita ti bail konn ani kosli tem taka somzotolem aslem. Ti ek patki bail mhunn taka kollttolem aslem.” 40 Punn Jezun taka mhunnttlem: “Simanv, hanv tuka kitem tori sangonk sodhtam.” Tannem mhunnttlem: “Sang Guruji!”

41 “Don munis eka munxak rinn farik korche asle; eklo 500 dinar* diuncho aslo, ani dusro 50 dinar diuncho aslo. 42 Punn tem rinn farik korunk tea donui munxam lagim kainch naslem. Tednam tea munxan tea dogainchem-i rinn bhogxilem. Tor, tea donui munxam modlo khoincho munis tea munxacho chodd mog kortolo?” 43 Simanvan zobab dilo: “Mhaka dista to munis, zachem chodd rinn bhogxilam.” Jezun mhunnttlem: “Tunvem ekdom sarkem sanglem.” 44 Tednam Jezun tea bailek vollon polloilem ani Simanvak mhunnttlem: “Tunvem hea bailek polloilea? Hanv tujea ghorant ailom tednam tunvem mhaka paim dhuvunk udok diunk na. Punn hea bailen aplea dukamnim mhoje paim dhuile ani aplea kensamnim te pusle. 45 Tunvem mhozo umo gheunk na, punn hanv ailam tednam thaun hi bail mhojea paim-anche ume gheit asa. 46 Tunvem mhojea mathear tel votounk na, punn hea bailen mhojea paim-ancher tel votoilem. 47 Hea pasot, hanv tuka sangtam, tichim patkam khub aslim, punn tim bhogsolim, karonn tinnem chodd mog kelo. Punn zachim unnim patkam bhogxileant to unno mog korta.” 48 Tednam Jezun tea bailek mhunnttlem: “Tujim patkam bhogsolim.” 49 Hem aikon tachea borabor jevnnak boslole te lok monantlea-monant mhunnonk lagle: “Patkam pasun bhogsunk ho munis konn kai?” 50 Punn Jezun tea bailek mhunnttlem: “Tujea bhavartha vorvim tum salvar zali; voch ani atam usko korinaka.”*

8 Uprant Jezu, lokank porgott korit ani Devachea Rajeachi bori khobor sangot, eka xara thaun dusrea xarant ani eka ganvam thaun dusrea ganvant gelo. Tachea borabor te Bara zann* asle. 2 Toxench, thoddeo bailo pasun asleo zanche voile noxtte dut bhair kaddlole ani zanchim duensam borim kelʼlim, zoxem Marie. Tika Magdalachi Marie mhunnttale. Tiche voile sat noxtte dut bhair kaddlole; 3 toxench Herodachea ghoracho karbhar samballpi Kusa, hachi bail Juana asli, tea bhair Suzana ani her zaiteo bailo asleo. Heo sogleo bailo aple poixe moddun Jezu ani tachea xisanchi seva kortaleo.

4 Veg-vegllea xaram thaun ailolea lokam sangata anik ek vhoddlo zomo Jezu lagim ektthaim zalʼlo tednam Jezu ek vopar sangon tanchea lagim ulounk laglo: 5 “Ek xetkar bim vompunk gelo. To bim vomptalo tednam tantuntlem thoddem bim rosteachea kuxik poddlem ani paim-am ponda maddvolem, ani mollba voilea sukhnneamnim ieun tem khalem. 6 Thoddem khoddpi zomnir poddlem, ani thoim olsann nasli dekhun kirlolea uprant tem bim sukhlem. 7 Thoddem kantteamnim poddlem, ani tachea sangata vaddlolea kantteanchea zhaddamnim taka vaddonk diunk na. 8 Punn thoddem bim borea zomnir poddlem, ani kirlolea uprant taka 100 pavtti chodd pik zaunk laglem.” Hem sanglea uprant tannem mottea avazan mhunnttlem: “Kan asat tannim aikonchem.”

9 Punn hea voparecho orth kitem kai mhunn tache xis taka vicharunk lagle. 10 Tannem mhunnttlem: “Devachea Rajeachi povitr guttachi somzonni tumkam dilea, punn herank teo fokot vopareo zaun asat. Tor te polloitole punn tankam dischem na, te aikotole punn tankam tancho orth somzochona. 11 Hea voparicho orth oso: Bim mhunnttlear Devachem utor. 12 Jem bim rosteachea kuxik poddlolem, te osle lok zaun asat je utor aikotat punn tannim tacher patiena zaunk ani te salvar zaina zaunk Soitan* ieta ani tanchea kallzantlem tem utor gheun voita. 13 Jem khoddpi zomnir poddlolem, te osle lok zaun asat je utor aikotanch tem khuxalkaien manun ghetat punn tankam mullam asonant. Te thoddea vellak lagon patietat punn porikxechea vellar bhavarth soddun ditat. 14 Ani jem bim kantteamnim poddlolem, te osle lok zaun asat je Devachem utor aikotat khorem punn jivitantle uske, girestkai, ani mouzank lagon te ghusmottʼttat, ani tea pasot te damun urtat ani borim follam diunk pavonant. 15 Jem bim borea zomnir poddlolem, te osle lok zaun asat zanchem kalliz ekdom borem asa, te utor aikotat, tem kallzant dovortat ani thir ravon borim follam diunk lagtat.

16 “Konnuch divo pettoun eka aidona ponda dhampun dovorna vo eka khatti ponda dovorna, punn bhitor ietat tankam uzvadd mellonk to eka unch zagear dovorta. 17 Oxem kainch lipoun dovorlolem na jem uktem zaunchem na, ani oxem kainch borem korun gupit dovorlolem na jem kednanch konnank kollchem na ani jem ugddapem zaunchem na. 18 Taka lagon tumi koxe aikotat tacher dhean diat, karonn zachea lagim asa taka anik ditole punn zachea lagim na tachea koddlean, to aplea lagim asa mhunn somzota tem-ui kaddun ghetole.”

19 Uprant Jezuchi avoi ani tache bhav taka mellonk ailim punn lokanchi gordi asli dekhun tim tachea lagim vochonk xokonaslim. 20 Tor taka konnem tori oxem sanglem: “Tuji avoi ani tuje bhav bhair ube asat, tim tuka mellonk sodhtat.” 21 Punn Jezun tankam zobab dilo: “Jim konn Devachem utor aikotat ani tea pormonnem choltat ti mhoji avoi ani mhoje bhav.”

22 Ek dis Jezu ani tache xis eka vhoddear choddle ani tannem tankam mhunnttlem: “Ieiat, ami doriachea poltoddi vochum-ia.” Tor te vochonk lagle. 23 Punn voita astana Jezu nhidlo. Tednam ek vhoddlem vadoll ailem ani udok vhoddeant bhitor ieunk laglem, ani tem vhoddem buddonk laglem. 24 Xis Jezu lagim ieun taka oxem mhunnon utthounk lagle: “Guruji, Guruji, ami buddttat!” Jezun utthon vadollak ani uchamboll zalʼlea doriak tapoilo, tednam vadoll thamblem ani soglem xant zalem. 25 Magir tannem xisank mhunnttlem: “Tumcho bhavarth khoim asa?” Punn te bhiele ani ojap zaun eka-mekak mhunnonk lagle: “Ho munis konn kai? Vadollak ani udkak pasun to hukum dita, ani tim tachem aikotat.”

26 Uprant te doria deger Gerazenachea vattarant pavle, zo Galiliechea poltoddi asa. 27 To denvon doria deger ailo tednam lagincheach xarantlo ek munis taka mellʼllo zacher noxtte dut boslole. To khub tempa thaun kopdde ghalinastana bhonvtalo, ani ghorant nhoi punn dholi* asat thoim ravtalo. 28 Tannem Jezuk polloilo tednam to mottʼttean bob marunk laglo, ani tachea mukhar poddon mottʼttea avazan oxem mhunnonk laglo: “Sogleant Vortea Devachea Puta Jezu, tuka mhojea lagim kitem kam asa? Hanv tujea lagim vinoti kortam, mhaka tollmollainaka.” 29 (Karonn Jezu tea noxttea dutak tea munxa voilo bhair soron voch mhunn hukum ditalo. Noxttea dutan zaitea pavtti tea munxak aplea tabeant kelʼlo,* taka porot-porot beddiamnim ani sanklleamnim bandtale ani tacher barik nodor dovortale, punn to beddio ani sanklleo toddun uddoitalo. Noxttea dutachea probhavak lagon to munis hevtten-tevtten dhanvtalo ani eksurea zageamnim pollon voitalo.) 30 Jezun taka vicharlem: “Tujem nanv kitem?” Tannem mhunnttlem, “Pollttonn,”* karonn tacher zaite noxtte dut boslole asle. 31 Te Jezu lagim apnnank khol patallant* vochonk hukum dium naka mhunn vinoti korit ravle. 32 Thoinch dongracher dukrancho vhoddlo hindd chortalo. Tor, te noxtte dut apleak tea dukramnim rigonk di mhunn Jezu lagim vinoti korunk lagle, ani tannem tankam porvangi dili. 33 Tednam te noxtte dut tea munxa thaun bhair soron dukramnim rigle, ani akʼkho hindd dhanvon vochon dongra voilean doriant poddlo ani te sogle dukor udkant buddon mele. 34 Tanchea rakhnneamnim kitem ghoddlem tem polloilem tednam te thoim thaun pollon gele, ani xaramnim ani ganvamnim vochon tannim hea vixim lokank sanglem.

35 Khorench kitem ghoddlolem tem pollounk lok thoim aile. Te Jezu lagim aile tednam jea munxa voile noxtte dut bhair sorlole to munis kopdde ghalun asa, toklen sarko zala, ani Jezuchea paim-axim boson asa mhunn tannim polloilem, tednam te khub bhiele. 36 Zannim hi ghoddnni polloilʼli tannim noxtte dut boslolo munis koso boro zalo tea vixim lokank sanglem. 37 Tednam Gerazenachea bhonvtonnechea vattarantlo ek vhoddlo zomo thoim ailo. Tannim Jezuk thoim thaun voch mhunn sanglem karonn te khub bhielʼle. Taka lagon, thoim thaun vochonk Jezu vhoddear boslo. 38 Punn jea munxa voile noxtte dut bhair sorlole to munis apleakui tujea borabor ieunk di mhunn Jezu lagim porot-porot vinoti korunk laglo, punn Jezun tea munxak oxem sangon porot dhaddlo: 39 “Tujea ghora chol, ani Devan tujea pasot jem kitem kelam tem sogleank sangot rav.” To munis gelo ani akʼkhea xarant Jezun aplea pasot kitem kelam tea vixim sangonk laglo.

40 Jezu poltoddi pavlo tednam lokamnim taka mogan ieukar dilo, karonn te tachi vatt polloitale. 41 Punn tednam thoim Jairus nanvacho ek munis ailo zo sobha-ghoracho odhikari aslo. To Jezuchea paim-am poddon aplea ghora ieo mhunn tachea lagim vinoti korunk laglo, 42 karonn taka ekuch dhuv asli ji sumar 12 vorsanchi asli, ani ti moronk pavloli.

Jezu thoim thaun vochonk bhair sorlo tednam lokanchea vhoddlea zomean tachea bhonvtonnim gordi keli. 43 Thoim ek bail asli. Tika 12 vorsam thaun rogtpatachem duens* aslem ani konnancheach ilazan ti bori zainasli. 44 Ti Jezuchea fattlean aili ani tinnem tachea kopddeachea degek hat lailo, ani rokddench tichem rogot vhanvpachem bond zalem. 45 Tednam Jezun mhunnttlem: “Mhaka konnem hat lailo?” Sogle nakarunk lagle tednam Pedrun mhunnttlem: “Guruji, lok tujea bhonvtonnim gordi korun asat ani te tujer poddttat.” 46 Tori astana Jezun mhunnttlem: “Konnem tori mhaka hat laila, karonn mhojea bhitorlean xokti bhair sorli mhunn hanv zannam.” 47 Jezuk kollʼllem mhunn tea bailen polloilem tednam ti koddkoddot aili ani Jezuchea paim-am mukhar poddli. Tinnem soglea lokam mukhar apnnem Jezuk kiteak hat lailo ani apunn rokddich koxi bori zali tem sanglem. 48 Jezun tika mhunnttlem: “Dhuve, tujea bhavarthan tuka bori keli. Atam xantin voch.”

49 To uloita astana, sobha-ghorachea odhikareachea ghora thaun ek munis ailo ani tannem mhunnttlem: “Tuji dhuv meli; atam Gurujik anik tras dium naka.” 50 Hem aikon Jezun tea odhikareak mhunnttlem: “Bhienaka, fokot bhavarth dovor, tuji dhuv salvar zatoli.” 51 Jezu tea ghorant pavlo tednam tannem Pedru, Juanv, Jakob ani tea cheddvachea avoi-bapaik soddun ani konnankuch aplea sangata bhitor ieunk diunk na. 52 Punn sogle lok roddttale ani aplem hoddʼddem boddoun tea cheddva pasot dukh kortale. Tor Jezun mhunnttlem: “Roddonakat, cheddum moronk na punn tem nhidlam.” 53 Hem aikon lok tiddkole ani tachim fokannam korun hansonk lagle, karonn tem melam mhunn te zannam asle. 54 Uprant Jezun tea cheddvacho hat dhorlo ani mhunnttlem: “Baie, utth!” 55 Tednam tachea kuddint jiv porot ailo,* ani rokddench tem utthon boslem. Cheddvak kitem tori khaunk di mhunn Jezun sanglem. 56 Cheddum jivont zalam tem polloun tachim avoi-bapui itlim khuxal zalim ki tankam hem khorem disona zalem. Punn Jezun tankam hea vixim konnankuch sangonakat mhunn sanglem.

9 Uprant Jezun tea Bara zannank* apoile ani lokancher boslolea soglea noxttea dutank kaddunk ani tanchim duensam borim korunk tankam odhikar ani xokti dili. 2 Tannem tankam Devachem Raj porgottunk ani duent lokank bore korunk dhaddle. 3 Tannem tankam sanglem: “Vattek lagon kainch vhoronakat, nhoi mhunn danddo, nhoi mhunn jevnnachi poti, nhoi mhunn unddo, nhoi mhunn poixe;* nhoi mhunn don zoddi kopdde. 4 Punn tumi eka ghorant bhitor sortat tednam thoim thaun bhair soro poriant tangeruch ravat. 5 Khoinchea-i xarant lok tumkam ieukar dina zalear tea xarantlean bhair sortana tanchea add govai mhunn tumchea paim-anchi dhulʼl fafddun uddoiat.” 6 Uprant, te akʼkhea vattarant ganvam-ganvamnim bhonvon, bori khobor porgott korit ani lokanchim duensam borim korit gele.

7 Jilʼleacho odhikari Herodan* kitem ghoddtta tem soglem aikolem tednam to chintunk poddlo karonn thodde zann mhunnttale ki ho Juanv zaka meloleantlo jivont kela. 8 Tor dusre mhunnttale Elija porot aila, ani anik thodde mhunnttale adlea provadeam modlo konn eklo jivont zala. 9 Herodan mhunnttlem: “Juanvachi tor hanvem tokli katorloli. Tor hanv zachea vixim aikotam to konn kai?” Taka lagon to Jezuk pollounk sodhtalo.

10 Jezu lagim apostl porot aile tednam apnnem kitem-kitem kamam keleant tea vixim te taka sangonk lagle. Tednam to tankam aplea borabor gheun Bethsaida nanvachea xarant eka eksurea zagear vochonk bhair sorlo. 11 Punn lokank hea vixim kollttoch te sogle tachea fattlean gele. Jezun tankam sogleank mogan ieukar dilo ani Devachea Rajea vixim tankam sangonk laglo, toxench duent aslim tankam tannem borim kelim. 12 Magir sanz zaunk aili tednam Bara zannamnim tachea lagim ieun mhunnttlem: “Lokank jevonn ani ravonk ek zago sodhunk bhonvtonnchea ganvamnim ani khedde ganvamnim dhaddun di, karonn hea vattarant konn lok ravona.” 13 Punn Jezun tankam mhunnttlem: “Tuminch tankam kitem-i khaunk diat.” Tannim mhunnttlem: “Panch undde ani don nustim soddun amchea lagim anik kainch na. Ami vochon hea soglea lokam pasot jevonn viktem gheun ailole tuka zai?” 14 Khorem mhunnttlear, thoim sumar 5,000 dadle asle. Jezun aplea xisank mhunnttlem: “Tankam ponʼnas-ponʼnas zannanche zome korun bosonk sangat.” 15 Tannim toxench kelem ani sogleank bosonk sanglem. 16 Magir tannem panch undde ani don nustim ghetlim, ani mollbar polloun magnneant upkar attoile. Uprant tannem unddeache kuddke kele ani te undde ani nustim lokank vanttunk to xisam lagim diunk laglo. 17 Tim soglim pottbhor jevlim, ani urlole kuddke ektthaim kele tednam 12 panttleo bhorleo.

18 Uprant, Jezu ekttoch magnnem kortalo tednam xis tachea lagim aile. Tannem xisank vicharlem: “Hanv konn oxem lok mhunnttat?” 19 Tannim sanglem: “Thodde mhunnttat Juanv Batist, dusre mhunnttat Elija, anik thodde mhunnttat adlea provadeam modlo konn eklo jivont zala.” 20 Tednam Jezun tankam vicharlem: “Punn tumkam kitem dista, hanv konn?” Pedrun zobab diun mhunnttlem: “Tum Devan dhaddlolo Krist.” 21 Tednam tannem tankam koddok utramnim hukum diun hea vixim konnank sangonakat mhunn sanglem. 22 Tannem tankam oxem-i sanglem: “Munxachea Putak tras sosche poddttole ani taka vhoddil, mukhel iadnik ani xastri nakartole ani jivexim martole, ani tisrea disa Dev taka jivont kortolo.”

23 Tankam sogleank Jezun oxem mhunnttlem: “Konnui mhojea fattlean ieunk sodhta zalear, tannem apnnakuch nakarun* dor disa aplo trasancho khambo* ukolcho ani mhojea fattlean cholot ravchem. 24 Karonn, zo aplo jiv vachounk proitn korta to aplo jiv hogddaitolo, punn zo mhojea pasot aplo jiv hogddaita to aplo jiv vachoitolo. 25 Khorench, ek munis akʼkho sonvsar jikhon gheta punn aplo jiv hogddaita vo svotacher tras haddtta zalear kitem faido? 26 Tor konnankui mhozo xis zaunk ani mhojea utrancher visvas dovrunk loz dista zalear munxacho Put aple, aplea Bapache, ani povitr dutanchea mhoimen ietolo tednam taka-i tanchi loz distoli. 27 Punn hanv tumkam khorench sangtam, hanga ube asloleam modem thodde oxe asat je Devachem Raj ailolem polloilea bogor morche nant.”

28 Hem sangon sumar atth disam uprant to Pedru, Juanv, ani Jakobak aplea sangata gheun magnnem korunk eka dongrar gelo. 29 To magnnem kortalo tednam tachea tonddachem rup bodolʼlem ani tache kopdde dhove fulʼl zaun chokchokonk lagle. 30 Ani polloit zalear, don munis tachea lagim uloitale; te Moizes ani Elija asle. 31 Te mhoimen ailole disle ani Jezu sonvsara thaun koso voitolo tea vixim uloitale. Hem soglem beginuch Jeruzalemant ghoddchem aslem. 32 Pedru ani tachea sangateanche dolle nhiden zodd zalʼle, punn te purnn toren zage zale tednam tannim Jezuchi mhoima polloili ani toxench tachea sangata don munis ube asat tem polloilem. 33 Te dogui vochonk lagle tednam Pedrun Jezuk mhunnttlem: “Guruji, amkam hanga ieun khub borem dislem. Tuka zai zalear hanv hanga tin tombu bandtam, ek tuka, ek Moizesak, ani ek Elijak.” Pedruk apunn kitem uloita tem kollonk na. 34 To uloita astanach, ek kup toiar zalem ani tanchea voir ieunk laglem. Tem kup tancher ailem tednam te bhiele. 35 Tea kupantlean oso avaz ailo: “Ho mhozo Put, zaka hanvem vinchun kaddla. Tachem aikat.” 36 Ho avaz ailo tednam Jezu thoim ekttoch aslo tem tannim polloilem. Punn tea vixim tannim thoddo temp poriant konnankuch kainch sangonk na. Te vogich ravle.

37 Dusrea disa te dongra voilean sokol aile tednam lokancho ek vhoddlo zomo tachea lagim ailo. 38 Tednam okosmat lokanchea zomeantlea eka munxan mottʼttean oxem mhunnttlem: “Guruji, hanv tujea lagim vinoti kortam, upkar korun mhojea putak polloi, to mhozo ekloch put. 39 Taka ek noxtto dut dhorta, ani okosmat to bob marunk lagta. To noxtto dut taka itlo foddfoddaita* ki tachea tonddantlean fes bhair soronk lagta. To taka khub tras kelea uprant pasun sompeponnim soddun vochonk sodhina. 40 Hanvem tujea xisank tachea voilo noxtto dut kadd mhunn vinoti keli, punn tanchea lagim zaunk na.” 41 Zobab diun Jezun mhunnttlem: “Onbhavarthi ani patki pillge, kitlo temp poriant hanv tumchea borabor ravom ani tumkam sosum? Tujea putak hanga gheun ieo.” 42 To bhurgo ietalo tednam noxttea dutan taka zomnir xevttilo ani boroch foddfoddailo. Punn, Jezun tea noxttea dutak tapoilo ani tea bhurgeak boro kelo ani uprant taka tachea bapaik dilo. 43 Devachi vhodd xokti polloun soglo lok ojap zalo.

Jezun kelʼlea soglea vostunk lagon soglo lok ojap zalʼlo astananch, tannem aplea xisank mhunnttlem: 44 “Dhean diun aikat ani him utram ugddas dovrat, munxachea Putacho visvasghat kortole ani taka dhorun lokanchea hatant ditole.” 45 Punn to kitem sangtalo tem tankam somzonk na. Khorem mhunnttlear, tachea utrancho orth tankam somzona zaunk, tancho orth tanchea thaun lipoun dovorlolo, ani taka hea vixim prosn vicharunkui te bhietale.

46 Uprant apnnam modem konn vhodd kai mhunn tanchea bhitor vad-vivad zaunk laglo. 47 Te aplea monant kitem chintʼtat tem somzon Jezun eka lhan bhurgeak aplea kuxik ubo kelo, 48 ani tannem tankam mhunnttlem: “Zo konn mhojea nanvan oslea eka lhan bhurgeak ieukar dita to mhaka pasun ieukar dita; ani zo konn mhaka ieukar dita to mhaka dhaddla taka-i ieukar dita. Karonn zo konn heram modem apunn lhan mhunn somzon cholta toch vhodd.”

49 Tednam Juanvan taka mhunnttlem: “Guruji, ek munis tujem nanv gheun lokancher boslole noxtte dut kaddtta mhunn ami polloilam, ani ami taka addauncho proitn kelo, karonn to amchea borabor iena.” 50 Punn Jezun taka mhunnttlem: “Taka addauncho proitn korinakat, karonn zo tumchea add na to tumchea sangata asa.”

51 Jezuk voir vhorpache dis lagim pavle* tednam tannem Jeruzalemant vochonk ghott nichov kelo. 52 Tor tannem aplea thoddea xisank aplea mukhar dhaddle. Te tachea pasot toiari korunk Samariechea eka ganvant gele. 53 Punn tea ganvantlea lokamnim Jezuk ieukar diunk na, karonn tannem Jeruzalemant vochonk nichov kelʼlo. 54 Hem polloun Jakoban ani Juanvan oxem vicharlem: “Somia, mollbar thaun uzo apoun ami tancho nas kelʼlo tuka zai?” 55 Punn vollon tannem tankam tapoile. 56 Tor te dusrea ganvant gele.

57 Te rostea voilean voitale tednam konnem tori Jezuk mhunnttlem: “Tum voita thoim hanv tujea fattlean ietolom.” 58 Punn Jezun taka mhunnttlem: “Koleank dholi asat ani mollba voilea suknneank ghontter asat, punn munxachea Putak apli tokli tenkounk pasun khoinch zago na.” 59 Tednam tannem anik ekleak mhunnttlem: “Mhozo xis zav.” Tea munxan mhunnttlem: “Somia, poilim mhaka mhojea bapaik purunk vochonk di.” 60 Punn Jezun taka mhunnttlem: “Meleant tannim aplea meloleank purum di, punn tum vochon Devachea Rajea vixim porgott kor.” 61 Anik eklean mhunnttlem: “Somia, hanv tuzo xis zatolonch, punn poilim mhaka mhojea ghorcheank mellon, nimanni zap korun ieum-di.” 62 Jezun taka mhunnttlem: “Khoincho-i munis zo xetant zot ghalta ani fatti soddlolea vostunk vollon polloita to Devachea Rajeak purto na.”

10 Uprant Somian anik 70 zannank aple xis mhunn vinchun kaddle ani jea-jea xaramnim ani ganvamnim apunn voicho aslo thoim vochonk dog-dog zannanchi zoddi korun tankam aplea poilim dhaddle. 2 Tednam tannem tankam mhunnttlem: “Khorench, pik khub asa punn vavraddi thodde asat. Taka lagon, xetachea Dhoniak lunvnni korunk anik vavraddi dhadd mhunn vinoti korat. 3 Vochat! Punn chotur ravat! Hanv tumkam koleam* modem menddram koxim dhaddttam. 4 Voitana poixanchi poti vo jevonn vo zotim vhoronakat, ani vatter konn melltta taka nomoskar korinakat.* 5 Tumi khoinchea-i eka ghorant bhitor sortat tednam poilim oxem mhunnat: ‘Hea ghorak xanti mellom.’ 6 Ani xanti sodhta toslo munis thoim asa zalear tumchi xanti tacher urom. Punn toslo munis na zalear ti xanti tumcher porot ieum. 7 Tor tea ghorant ravat, ani tim kitem ditat tem khaiat ani pieiat, karonn vavraddeak tacho disvoddo favo. Porot-porot ghor bodlit ravonakat.

8 “Toxench, tumi khoinchea-i xarant bhitor sortat tednam ani tim tumkam ieukar ditat tednam tumchea mukhar kitem dovorlam tem khaiat 9 ani duent zalʼlea lokank bore korat ani tankam sangat: ‘Devachem Raj tumchea lagim pavlam.’ 10 Punn khoinchea-i xarant bhitor sorlea uprant lok tumkam ieukar dina zalear tea xarachea mukhel rosteancher vochon oxem mhunnat: 11 ‘Tumchea add govai diun tumchea xarantli amchea paim-ank lagloli dhulʼl pasun ami fafddun uddoitat. Tori astana, Devachem Raj lagim pavlam mhunn zannam zaiat.’ 12 Hanv tumkam sangtam, Zhoddttechea Disa tea xarachi zhoddtti Sodoma poros chodd khoraien zatoli.

13 “Korazin, tujer hai! Bethsaida, tujer hai! karonn tumchea modem ghoddlolim vhoddlim-vhoddlim vizmitam Tir ani Sidonant ghoddlolim zalear thoinche lok sak ghalun ani gobrant boson poschatap kortole asle. 14 Tea pasot, Zhoddttechea Disa tumchi zhoddtti Tir ani Sidona poros chodd khoraien zatoli. 15 Ani tum Kapernauma, tuka mollba itlem unch kaddttole oxem dista kitem? Tum tor Fonddant* voitolem!

16 “Zo tumchem aikota to mhojem aikota, ani zo tumkam nakarta to mhaka-i nakarta. Itlench nhoi, zo mhaka nakarta to mhaka dhaddla tea Devakui nakarta.”

17 Uprant te 70 zann khuxal zaun porot aile, ani mhunnonk lagle: “Somia, tujem nanv uzar kelolean noxtte dut pasun amchea adhin zatat.” 18 Tednam tannem tankam mhunnttlem: “Viz mollbar thaun sokol poddtta, toso Soitan sokol poddla to mhaka dista. 19 Polloiat! Hanvem tumkam sorpank ani vinchvank paim-am ponda maddounk, ani dusmanachea soglea xoktecher tabo dovrunk odhikar dila, ani koslich vost tumkam luksonn korunk xokchina. 20 Tori astana, noxtte dut tumchea adhin zatat dekhun khuxal zainakat, punn tumchim nanvam sorgar boroun dovorleant dekhun khuxal zaiat.” 21 Teach vellar Jezu povitr xokten bhoron khuxal zalo ani tannem mhunnttlem: “Bapa, sorg ani prithumechea Dhonia, hanv sogleam mukhar tuka vakhannttam, karonn tunvem heo vostu gineani ani zannar munxam thaun bore bhaxen lipoun dovorleo punn lhan bhurgeank kolloileo. Hoi Bapa, karonn tuka hench manvolam. 22 Mhojea Bapan soglem mhojea hatant ghatlam. Bapak soddun Putak anik konnuch vollkhona, ani Putak soddun Bapak anik konnuch vollkhona. Toxench, Put zankam aplea Bapa vixim kolloita tinch Bapak vollkhotat.”

23 Tednam tannem vollon aplea xisank oxem mhunnttlem: “Tumi polloitat teo vostu, je lok aplea dolleamnim polloitat te khuxal. 24 Hanv tumkam sangtam, zaite provadi ani raza tumi polloitat teo vostu pollounk sodhtale punn pollounk pavlenant, ani jeo vostu tumi aikotat teo aikonk sodhtale punn aikonk pavlenant.”

25 Atam ek munis zo Kaido bore bhaxen zannam aslo to Jezuchi porikxa gheunk ubo ravlo ani oxem vicharunk laglo: “Guruji, sasnik jivit daiz mhunn melloun gheunk hanvem kitem korunk zai?” 26 Jezun taka vicharlem: “Kaideant kitem boroilam? Tunvem kitem vachlam?” 27 Tednam tannem taka mhunnttlem: “‘Jehova* tujea Devacho tunvem tujea soglea kallzan, tujea soglea jivan,* tujea soglea bollan, ani tujea soglea monan mog korunk zai’ ani ‘tunvem tuzo korta toso tujea xezareacho mog korunk zai.’” 28 Jezun taka mhunnttlem: “Tunvem ekdom sarkem sanglem; oxench korit rav ani tuka jivit mellttolem.”

29 Punn apunn chodd nitivont mhunn dakhounk tea munxan Jezuk mhunnttlem: “Mhozo khoro xezari konn?” 30 Jezun taka zap diun mhunnttlem: “Ek munis Jeruzalema thaun Jerikok denvon voitalo tednam choranchea hatant sampoddtta. Te chor tache kopdde kaddttat, tachea lagim aslolem soglem luttʼttat, taka bhorpur mar ghaltat, ani taka ordho melʼlo korun soddun voitat. 31 Teach vellar ek iadnik tea rostean denvon voitalo, punn tea munxak polloilo tednam to rosteachea dusrea kuxichean cholon gelo. 32 Toxench, ek Levit thoim thaun voitalo, tannem tea munxak polloilo tednam to-ui rosteachea dusrea kuxichean gelo. 33 Punn uprant ek Samariekar tea rostean voitalo, tannem tea munxak polloilo tednam taka tachem churchurem dislem. 34 To tachea fuddean ailo ani tannem tachea ghaveancher tel ani drakxancho soro votoun pottʼtteo bandleo. Uprant tannem taka aplea gaddvacher ghatlo ani eka bhaddeachea rumant dovorlo ani tachi kallji ghetli. 35 Dusrea disa tannem tea ghorachea dhoniak don dinar* dile ani mhunnttlem: ‘Hea munxachi kallji ghe, ani hachea bhair anik kitem-i khorch zata zalear to hanv porot ietam tednam tuka farik kortolom.’ 36 Tor tuka kitem dista, hea tin munxam modlo konn choranchea hatant sampoddlolea munxa lagim khorea xezarea sarko vaglo?” 37 Tannem mhunnttlem: “Zo tachea lagim doiall ritin vaglo ani tachi modot keli to.” Tednam Jezun mhunnttlem: “Voch ani tum-ui toxench kor.”

38 Uprant te fuddem gele ani eka ganvant bhitor sorle. Thoim Martha nanvachi ek bail ravtali. Tinnem Jezuk aplea ghorant ieukar dilo. 39 Tika Marie nanvachi ek bhoinn asli, ti Somiachea paim-am lagim boson to kitem sangta tem aikotali. 40 Punn Marthachem dhean zaiti toiari korpacheruch aslem. Taka lagon ti Jezu lagim ieun mhunnonk lagli: “Somia, mhojea bhoinnin soglem kam mhojeruch soddlam hachem tuka kainch disona? Mhaka ieun modot kor mhunn tika sang.” 41 Somian tika mhunnttlem: “Martha, Martha, tum zaitea vostuncho khub usko korta. 42 Khorem mhunnttlear, thoddeach vostunchi goroz asa, vo fokot ek pasun puro. Marien boro* vantto vinchun kaddla, ani tiche koddlean to konnuch kaddun gheunchona.”

11 Jezu eka zagear magnnem kortalo. Tachem magnnem korun zalea uprant, xisam modlea eklean taka mhunnttlem: “Somia, Juanvan aplea xisank magnnem korunk xikoilam toxem, tum-ui amkam magnnem korunk xikoi.”

2 Tednam tannem mhunnttlem: “Tumi magnnem kortat tednam oxem mhunnat: ‘Bapa, tujem nanv povitr zaum.* Tujem Raj ieum. 3 Amchea sodanchea gorzam pormonnem dor disa pasot amkam unddo di. 4 Amchim patkam bhogos, karonn jim konn amchea add patok korun amchim rinnkarim zatat tankam ami bhogxitat; ani amkam tallnnent poddonk dium naka.’”

5 Uprant Jezun tankam mhunnttlem: “Tuzo ek ixtt asa mhunn chint ani modlea rati tum tachea koddem voita ani mhunntta, ‘Ixtta, mhaka tin undde udar di, 6 karonn mhozo ek ixtt poisulʼlean atanch mhojea ghora aila ani taka diunk mhoje koddem kainch na.’ 7 Punn bhitorlean to oso zobab dita: ‘Mhaka bejar korinaka. Atam dar bond kelam, ani mhojim bhurgim hantrunnar mhojea borabor nhidleant. Hanv utthon tuka kainch diunk xokona.’ 8 Hanv tumkam sangtam, to aplea ixttagotik lagon nhoi zalear pasun, aplo ixtt loz dhorinastana magot asa mhunnon utthʼttolo ani taka goroz asa tem ditolo. 9 Hanv tumkam sangtam, magot ravat ani tumkam tem mellttolem; sodhit ravat ani tumkam tem gavtolem;* darar marit ravat ani tumkam tem ugoddttolem. 10 Karonn zo konn magta taka melltta ani zo konn sodhta taka gavta ani zo konn darar marta taka tem ugoddttolem. 11 Tumchea modem oso khoincho bapui asa, zo aplo put nustem magta zalear, taka nusteachea bodlek ek sorop ditolo? 12 Vo to tantim magta zalear taka vinchu ditolo? 13 Tumi patki asonui, aplea bhurgeank boreo vostu diunk zannant zalear, tumcho sorgincho Bap aplea lagim magtoleank tachea poros ekdom chodd povitr xokti* diunchona kai?”

14 Uprant Jezun eka munxacher boslolo noxtto dut bhair kaddlo. Tannem tea munxak mono kelʼlo. Noxtto dut bhair soron gelea uprant to munis ulounk laglo. Hem polloun thoim ektthaim zalʼle te lok ojap zale. 15 Punn tanchea modlea thoddeamnim mhunnttlem: “To noxttea dutancho raza, Belzebulachea* modotin lokancher boslole noxtte dut kaddtta.” 16 Ani dusre thodde lok Jezuchi porikxa korunk sorgar thaun ek khunna magonk lagle. 17 Te kitem chintʼtat tem Jezu zannam aslo dekhun tannem tankam mhunnttlem: “Jea rajeant futt poddtta tem nas zatolem, ani jea ghorant futt poddtta tem moddon poddttolem. 18 Toxench, Soitan apleach add zhuzonk laglo zalear tachem raj koxem togtolem? Karonn hanv Belzebulachea modotin noxttea dutank kaddttam oxem tumi mhunnttat. 19 Zor hanv Belzebulachea modotin noxttea dutank kaddttam zalear tumche put* konnanchea modotin tankam kaddttat? Taka lagon tumi chukichem uloitat mhunn tumche putuch dakhoun ditole. 20 Punn hanv Devachea povitr xokten* noxttea dutank kaddttam tor hacho orth, Devachem Raj hanga asa ani tumkam tem kollonkuch na. 21 Ek bollixtt munis soglim hotʼtearam gheun aplea ghorachi rakhonn korta tednam tachea ghorantleo vostu konnuch gheun vochonk xokona. 22 Punn tachea poros chodd bollixtt munis tacher holʼlo korun taka haroita tednam, to patietalo tim soglim hotʼtearam to munis tachea koddlean kaddun gheta, ani tacheo sogleo vostu luttʼtta ani vantta. 23 Zo mhojea vatten na to mhojea add asa, ani zo mhojea borabor punzaina to ximpddaita.

24 “Ek noxtto dut eka munxa thaun bhair sorta tednam to visov gheunk udok naslolo zago sodhunk bhonvta, punn taka khoinch zago mellona tednam to mhunntta, ‘Hanv jea ghorantlean bhair sorlolom tea ghorant porot voitam.’ 25 Thoim ailea uprant taka tem ghor zhaddun-pusun nitoll kelʼlem ani nettoilolem melltta. 26 Tednam to voita ani aplea poros vaitt anik sat noxttea dutank gheun ieta. Magir te, tea munxachea bhitor rigon thoinch ravonk lagtat. Tor oxe toren tea munxachi poristhiti poilim poros vaitt zata.”

27 To hem soglem sangtalo tednam, lokam modlea eke bailen mottʼttea avazan taka oxem mhunnttlem: “Jea bailen tuka aplea kusveant samballʼllo ani tuka aplem dudh dilem ti khuxal!” 28 Punn Jezun mhunnttlem: “Na, tachea bodlek, jim konn Devachem utor aikotat ani tea pormonnem choltat tim khuxal!”

29 Lokanchi gordi vaddonk lagli tednam tannem tankam mhunnttlem: “Hi noxtti pillgi; ani ti khunna magta, punn Jonasachea khunne xivai dusri koslich khunna tankam mellchina. 30 Taka lagon zoso Jonas Ninevechea lokank ek khunna koso aslo, tosoch munxacho Put hea pillgek ek khunna zatolo. 31 Dokxinneche ranniek zhoddttechea disa hea pillge borabor utthoitole ani ti tankam guneanvkari tharaitoli, karonn Solomona koddlean zannvaiechim utram aikonk ti khub pois thaun ailʼli. Punn polloiat! Solomona poros vorto konn tori hanga asa. 32 Zhoddttechea vellar, Nineveche lok hea pillge borabor utthʼttole ani tika guneanvkari tharaitole, karonn Jonasacho sondex aikon tannim poschatap kelʼlo. Punn polloiat! Jonasa poros vorto konn tori hanga asa. 33 Ek munis divo pettoun to lipoun dovorna, vo aidona ponda dovorna, punn bhitor ietat tankam uzvadd mellonk to eka unch zagear dovorta. 34 Dollo kuddicho divo. Tunvem tuzo dollo ekach vostucher lavun* dovorlo zalear, tuji akʼkhi kudd pasun uzvaddit zatoli; punn tuzo dollo nattkaien bhorlolo* asa zalear, tuji akʼkhi kudd pasun kallkhant buddttoli. 35 Tuka uzvadd diupi tuzo dollo kallkhant urona zaunk chotrai dhor. 36 Tor, tuji akʼkhi kudd uzvaddant asa ani tacho khoinchoch bhag kallkhant na zalear ek divo aplea kirnnamnim tuka uzvadd dita toxi tuji akʼkhi kudd uzvaddit zatoli.”

37 Tannem hem sangon zalea uprant, ek Farizev tachea lagim ieun taka aplea ghora jevnnak apounk laglo. Tor to tachea ghora gelo ani jevnnak boslo. 38 Punn jevnnak boschea poilim tannem aple hat dhuvunk nant* tem polloun tea Farizevak ojap dislem. 39 Punn Somian tankam mhunnttlem: “Are Farizevamno, tumi fokot bhailean nitoll kortat toslea pelea ani tatta sarke asat, jim bhitorlean burxim asat, karonn tumi axen* bhorlole ani noxtte asat. 40 Are murkhamno! Zannem bhailean rochlam tannem bhitorleanui rochlam nhoi? 41 Taka lagon tumi dan* ditat tednam tem purnn kallzan diat, ani tumi sarke nitoll zatole. 42 Are Farizevamno, tumcher hai, karonn tumi pudina* ani her soglea torechea bhajeancho dhavo vantto tor ditat, punn neai ani Devacho mog korop hea adneancher tumi dhean dinant! Tea vostuncho dhavo vantto divop tumcho kaido tem khorem, punn hea vostunchi beporva korop sarkem nhoi. 43 Are Farizevamno, tumcher hai, karonn sobha-ghoramnim sogleant fuddem* bosonk ani bazarant lokam koddlean nomoskar korun gheunk tumkam avoddtta! 44 Tumcher hai, karonn tumi meloleank purtat tea fondda* sarke asat je voilean dixtti poddonant,* tor lok tancher cholta-bhonvta ani tankam khobor pasun asona!”

45 Hem aikon, Kaidea vixim bori zannvai aslolea eka munxan taka mhunnttlem: “Guruji, hem soglem sangon tum amcho-i opman korta.” 46 Tednam Jezun taka mhunnttlem: “Are Kaidea vixim zannvai asloleamno, tumcherui hai, karonn tumi osle kaide kortat je lokanchea khandar zodd vojem koxe asat, punn tem vojem ubarunk tumi aplem ek bott pasun lainant!

47 “Tumcher hai, karonn tumi provadeanche fondd* bandun kaddttat, punn khorem mhunnttlear tumchea purvozamnim tankam marun uddoileat! 48 Tumchea purvozamnim kelʼlea vaitt korneam vixim tumkam khobor asa, tori astana tumi tankam maniotai ditat. Tannim provadeank marun uddoilʼle ani tumi teach provadeanche fondd bandun kaddttat. 49 Taka lagon Devan aplea zannvaie udexim* oxem mhunnttlem: ‘Hanv tanchea lagim provadeank ani apostlank dhaddttolom, ani te tanchea modlea thoddeank dhumallo* ditole ani thoddeank jivexim marun uddoitole, 50 hea vorvim sonvsarachea survatek thaun jitlea provadeanchem rogot varoilam tanchea rogtache zobabdar hi pillgi zaum,* 51 mhunnche, Abelachem rogot varoilʼlem tednam thaun vedi ani Devmondira modem jivexim marun uddoilʼlo tea Zekariasachea rogta poriant.’ Hanv tumkam sangtam, hea sogleanchea rogtache zobabdar hi pillgi zatoli.*

52 “Kaidea vixim zannvai asloleamno, tumcher hai, karonn Deva vixim ginean dita tem dar ugoddtta ti chavi tumi aplea lagim dovorlea. Tumi svota tea darantlean bhitor vochonk nant, ani jim konn bhitor voitat tankam-i tumi addaitat!”

53 “Jezu thoim thaun bhair sorlea uprant, xastri ani Farizev samke tachea fattik lagle ani taka ekar-ek prosn vicharunk lagle. 54 Taka dhorunk melltta toslem tachea tonddantlean kitem-i bhair sorta kai mhunn te vatt polloun asle.

12 Tednam mhunnttlear thoim hozaramnim lok ektthaim zalʼle. Te eka-mekak chiddʼddoitale ani eka-mekachea paim-ancher paim ditale. Tannem aplea xisank mhunnttlem: “Farizevanchea khomira thaun, mhunnche, tanchea dhongeponna thaun zagrut ravat. 2 Punn oxem kainch borem korun gupit dovorlolem na jem ugddapem zaunchem na, ani oso kosloch gutt na zo dusreank kollchona. 3 Tor, tum kallkhant sangta tem disa uzvaddant aikonk ietolem, ani bhitorlea rumant vochon tum kanant hollu sangta tem ghorachea voir thaun porgott zatolem. 4 Mhojea ixttamno, hanv tumkam sangtam, kudd kabar korunk xoktat ani tachea bhair kainch korunk xokonant tankam bhienakat. 5 Punn tumi konnank bhieunk zai tem hanv tumkam sangtam: Tumkam marun uddoilea uprant Gehenʼnant* ghalcho odhikar asa taka bhieiat. Hoi, hanv tumkam sangtam, takach bhieiat. 6 Don nanneak* panch lhan suknnim* viktat nhoi? Tori astana tantuntlea ekleakui Dev visorna. 7 Tumchea toklecho ek-ek kens pasun mezlolo asa. Mhunnttoch, bhienakat; zaitea lhan suknneam poros tumi chodd molachim asat.

8 “Hanv tumkam sangtam, konnui mhaka munxam hujir manun gheta zalear munxacho Put pasun taka Devachea dutam hujir manun ghetolo. 9 Punn konnui mhaka munxam hujir nakarta zalear hanv-ui taka Devachea dutam hujir nakartolom. 10 Konnui munxachea Putachea add uloita zalear taka bhogxitole, punn konnui povitr xoktechea add uloita zalear taka bhogsonnem aschem na. 11 Te tumkam lokanchea sobham mukhar,* sorkaram mukhar, ani odhikaream mukhar vhortat tednam tumchi rakhonn korunk tumi kitem uloitolim vo koxim uloitolim tachea vixim uskenakat, 12 karonn tumi kitem ulounk zai tem povitr xokti tumkam tea vellar xikoitoli.”

13 Lokanchea gordentlean eklean taka mhunnttlem: “Guruji, amchea daizache vantte kor mhunn mhojea bhavak sang.” 14 Jezun taka mhunnttlem: “Tumchea pasot neai korunk vo daizache vantte korunk mhaka konnem nemla?” 15 Magir tannem ektthaim zalʼlea lokank mhunnttlem: “Tumche dolle ukte dovrat ani soglea torechea axe thaun pois ravat, karonn munxa lagim zaiteo vostu asat zalear pasun teo vostu taka jivit diunk xokonant.” 16 Uprant tannem hi vopar dili: “Eka girest munxachea xetant zaitem pik zalem. 17 To monantlea-monant chintunk laglo, ‘Hem pik dovrunk mhojea lagim anik zago na, tor atam hanv kitem korum?’ 18 Magir tannem mhunnttlem, ‘Hanv oxem kortolom: Mhoje gudanv moddun anik vhoddle gudanv bandtolom, uprant soglem pik ani sogleo vostu thoim ektthaim korun dovortolom, 19 ani mhakach mhunnttolom: “Tujea lagim zaitea vorsam pasot khub vostu ektthaim kelʼleo asat; tor susegad jie, kha, pie, ani moja kor.”’ 20 Punn Devan taka mhunnttlem, ‘Are murkha, aiz rati tum morpacho asa. Tor tunvem ektthaim korun dovorlam tem konnank?’ 21 Zo munis girestkai ektthaim korunk vavurta punn Devachea nodren girest zaunk vavurna tea munxa thaim oxench ghoddtta.”

22 Magir tannem aplea xisank mhunnttlem: “Taka lagon hanv tumkam sangtam, tumi kitem khatolim mhunn tumchea jiva pasot usko korop bond korat vo tumi kitem nhestolim mhunn tumchea kuddi pasot usko korop bond korat. 23 Karonn eka munxachem jivit jevnna poros ani tachi kudd kopddeam poros chodd moladik asa. 24 Kavlleancher dhean diat: Te roinant, lunvnant vo gudanvamnim bhorun dovornant; tori astana Dev tankam khaunk dita. Tor tumi suknneam poros chodd molachim nhoi? 25 Usko korun aplem jivit ilʼlemxem* pasun vaddounk tumchea modlea konnancheanui zait kai? 26 Tor tumchean itlem pasun korunk zaina zalear, urlolea vostuncho usko kiteak kortat? 27 Ranantlim fulam koxim vaddttat tancher dhean diat: Tim koxttui korinant vo sutui toiar korinant. Punn hanv tumkam sangtam, Solomona lagim soglem aslolem tednam pasun to hanchea bhaxen sobit nhesonk xoklona. 28 Ranantlim zhaddam jim aiz asat ani faleam ujeant* uddoitolim, tankam zor Dev itlo boro nhesoita zalear, are unnea bhavarthachea munxamno, to tumkam hanchea poros anik boro nhesounchona kai? 29 Tor, tumi kitem khatolim vo kitem pietolim hea vixim chinta korop bond korat, ani chodduch usko korop bond korat. 30 Hea soglea vostum fattlean sonvsarache lok dis-rat dhanvtat, punn tumkam hea soglea vostunchi goroz asa mhunn tumcho Bap zannam. 31 Tachea bodlek, tachem Raj sodanch poilea zagear* dovrat, ani heo vostu to tumkam ditolo.

32 “Supurlea hindda, bhienaka, karonn tumkam Raj diunk tumchea Bapak manvolam. 33 Taka lagon tumcheo vostu vikun dan* diat. Tumchea pasot poixe dovrunk piddʼddear zainant tosleo potio toiar korat, mhunnche, kednanch kabar zaina toslo thevo sorgar ektthaim korat, zoim chor pavonk xokona ani kidd lagona. 34 Karonn jea zagear tuji girestkai astoli, thoinch tujem mon astolem.

35 “Tumchea bhenddak bandun toiar ravat ani tumche dive pettoun dovrat. 36 Aplo dhoni kazara thaun porot kednam ietolo mhunn vatt polloitat tea munxam bhaxen zaiat. Oxe toren to ieun darar marta tednam te rokddech vochon tachea pasot dar ugddunk xoktole. 37 Dhoni ieta tednam zage ravtat te sevok khuxal! Hanv tumkam khorench sangtam, to apunn tanchi seva korunk lagon aplea bhenddak bandtolo ani tankam jevnnak bosoun to tanchea kuxik ubo ravon tanchi seva kortolo. 38 To dusrea parar,* ani tisrea parar* pasun ieta tednam te taka zage mellttat zalear te khuxal! 39 Punn hem mat monant dovrat, chor khoinchea vellar ietolo hem ghorachea dhoniak khobor aslem zalear to aplem ghor foddunk diuncho naslo. 40 Tor tumi pasun toiar ravat, karonn tumi chintunk na tea vellar munxacho Put ieta.”

41 Tednam Pedrun vicharlem: “Somia, tum hi vopar fokot amkam lagon sangta, kai sogleank lagon sangta?” 42 Somian mhunnttlem: “Aplea ghorantlea her sevokanchi kallji gheunk ani tankam sarkea vellar favo titlem jevonn diunk dhonian nemlolo visvaxi ani xanno* sevok* konn zait? 43 Dhoni ieta tednam chakor toxench kortana dislo zalear to chakor khuxal! 44 Hanv tumkam khorench sangtam, to taka aplea lagim jem kitem asa titleacherui odhikar ditolo. 45 Punn zor to chakor kednam-i apleach monant mhunnot, ‘Mhozo dhoni porot ieunk vell laita,’ ani to ghorantlea chakrank ani chakornink marunk lagta ani khaun-pieun bebdo zata zalear 46 tannem chintunk pasun na tea disa ani taka khobor pasun na tea vellar tacho dhoni ietolo, ani to taka sogleant koddok xikxa ditolo ani taka ovisvaxi lokam modem uddoitolo. 47 Tednam tea chakrak tacho dhoni boroch mar ghaltolo, karonn to chakor aplea dhoniachi khuxi somzolo punn ti korunk to toiar naslo vo tannem dhonian sanglam tem kam korunk na.* 48 Punn zo konn dhoniachi khuxi somzonk na ani tea pasot mar favo zata toslim kamam korta taka unno mar poddttolo. Khorench, jea konnank chodd dilʼlem asa tachea koddlean chodd hixob ghetole, ani jea konnank chodd vostuncher odhikar dila tachea koddlean ekdom chodd hixob ghetole.

49 “Hanv prithumer uzo pettounk ailam, ani ho uzo zor adinch pettlolo asa zalear mhaka anik kitem zai? 50 Hoi, mhaka ek bautizm gheuncho asa, ani to gheum poriant hanv ekdom chintest astolom. 51 Hanv hea prithumer xanti haddunk ailam oxem tumkam dista? Na. Hanv tumkam sangtam, hanv xanti haddunk nhoi punn futt ghalunk ailam. 52 Karonn atam thaun eka ghorant panch zannam eka-meka add zatolim, tig zannam dogainchea add zatolim ani dog zannam tiganchea add zatolim. 53 Tim eka-meka add zatolim, bapui aplea putachea add, put aplea bapaichea add, avoi aplea dhuvechea add, dhuv aplea avoichea add, sasumai aplea sunechea add, ani sun aplea sasumaichea add zatoli.”

54 Tea uprant tannem lokank hem-ui sanglem: “Jednam tumi ek kup ostome thaun voir sorta tem polloitat tednam tumi rokddech mhunnttat, ‘Ek vadoll zaunchem asa,’ ani toxench zata. 55 Ani dokxinne thaun varo marta to tumi polloitat tednam tumi mhunnttat, ‘Khub gormi zatoli,’ ani toxench zata. 56 Dhongeamno, prithum ani mollob koxem dista tem polloun hovaman koso astolo tem tumi somzonk xoktat, punn hea khas vellacho orth kitem, to tumi kiteak somzonk xokonant? 57 Tumchea pasot kitem sarkem asa, hem tumchean kiteak tharaunk zaina? 58 Udharonnak, zor konnui tujea add kes korunk khoinchea-i odhikarea lagim voita zalear, tum rostearuch zhogddim suttavim korpacho proitn kor, na zalear to tuka neai korpea mukhar vhortolo, ani neai korpi tuka bondkhonnint uddoita tea munxachea hatant ditolo, ani to munis tuka bondkhonnint uddoitolo. 59 Hanv tuka sangtam, tum tacho ek-ek poiso* farik kori poriant bondkhonnintlo kosoch bhair soronk pavchona.”

13 Teach vellar thoim aslolea thoddea lokamnim Jezuk sanglem ki thodde Galilieche lok iodn bhettoitale tednam tankam Pilatan jivexim marle. 2 Tednam tannem tankam vicharlem: “Hea Galiliechea lokank oxem ghoddlem mhunnon te Galilientlea dusrea soglea lokam poros chodd patki asle oxem tumkam dista kai? 3 Na. Hanv tumkam sangtam, tumi poschatap korinant zalear tumcho sogleancho pasun osoch nas zatolo. 4 Vo jea 18 zannancher Siloamacho gopur poddlo ani je tachea ponda chiddʼddon mele te Jeruzalemantlea dusrea soglea lokam poros chodd patki asle oxem tumkam dista kai? 5 Na. Hanv tumkam sangtam, tumi poschatap korinant zalear tumcho sogleancho pasun osoch nas zatolo.”

6 Tea uprant tannem hi vopar sangli: “Eka munxachea drakxanchea molleant ek anjirachem zhadd aslem. To tea zhaddak follam lagleant kai mhunn pollounk ailo, punn taka ekui foll mellonk na. 7 Tednam tannem molleant kam kortoleak mhunnttlem, ‘Fattlea tin vorsam thaun hanv hea zhaddak foll laglam kai mhunn pollounk ietam. Punn aiz poriant mhaka ekui foll mellonk na. Taka lagon hem zhadd katrun uddoi! Hea zhaddak lagon bexttich zomin kiteak addoun dovorchi?’ 8 Molleant kam korpi munxan taka mhunnttlem: ‘Dhonia, anik ek voros hem zhadd asum. Hanv tachea bhonvtonnim charui vatten khonnttam ani taka sarem ghaltam. 9 Fuddarak zor taka foll zalem zalear borem zalem, punn zaina zalear tem katrun uddoi.’”

10 Jezu Sabathachea disa eka sobha-ghorant xikoitalo. 11 Thoim ek bail asli. Ticher 18 vorsam thaun noxtto dut boslolo. Tannem tika khub oskot* kelʼli ani ti bhendda thaun bagovloli ani tichean nitt ubi ravonk matui zainaslem. 12 Jezun tea bailek polloili tednam tannem tika mhunnttlem: “Voch, hanv tuka tujea oskotkaie thaun suttka ditam.” 13 Jezun aple hat ticher dovorle tednam ti rokddich nitt ubi zali ani Devak mhoima diunk lagli. 14 Punn Jezun tea bailek Sabathachea disa bori keli tem sobha-ghorachea odhikarean polloilem tednam to ragar zalo ani thoim ektthaim zalʼlea lokank mhunnonk laglo: “Kam korunk sov dis astat, tor teach disamnim ieun tumchea duensantlim borim zaiat, Sabathachea disa nhoi.” 15 Punn Somian taka mhunnttlem: “Are dhongeamno, tumchea modlo dor eklo Sabathachea disa aplea boilak vo gaddvak soddoun udok pieunk vhorona kai? 16 Toxem zalear, hi bail ji Abrahamachi dhuv zaun asa, tika Soitanan 18 vorsam thaun aplea tabeant dovorloli. Tor tika Sabathachea disa tachea tabeantlean soddovop sarkem nhoi kai?” 17 Jezun oxem mhunnttlem tednam tacho virodh kortale tankam sogleank loz zali. Punn ektthaim zalʼle lok him ojapachim kamam polloun khuxal zale.

18 Tor tannem mhunnttlem. “Devachem Raj kitea sarkem asa, taka hanv kitea sangata sor korum? 19 Tem sansvache bie bhaxen asa, ji eka munxan aplea bagent roili. Ti bi vaddli ani zhadd zalem ani mollba voilea suknneamnim ieun tachea khandeancher ghontter kele.”

20 Anik ek pavtt tannem mhunnttlem: “Hanv Devachem Raj kitea sangata sor korum? 21 Tem khomira bhaxen asa, jem eke bailen sumar tin vhoddlim mapam* pittant ghatlem ani mollʼllem. Taka lagon akʼkhem pitt fuglem.”

22 Uprant Jezu xaram-xaramnim ani ganvam-ganvamnim vochon xikoit ravlo ani Jeruzalema vatten fuddem vochot ravlo. 23 Tednam eka munxan taka vicharlem: “Somia thoddech lok salvar zatole kai?” Jezun taka mhunnttlem: 24 “Oxir darvontteantlean bhitor soronk zata titlo proitn korat karonn hanv tumkam sangtam, khub lok bhitor vochonk sodhtole, punn tanchean vochonk zaunchem na. 25 Ghoracho dhoni utthon dar bond kortolo tednam tumi bhair ube ravon darar martole ani mhunnttole, ‘Somia, amkam lagon dar ugodd.’ Punn to mhunnttolo: ‘Tumi khoim thaun aileat tem hanv nokllom.’ 26 Tednam tumi taka mhunnttole, ‘Ami tujea borabor khalem ani piele. Ani tum amkam hanga mukhel rosteancher xikoitalo.’ 27 Punn to tumkam mhunnttolo, ‘Tumi khoim thaun aileat tem hanv nokllom. Vaitt kamam kortoleamno mhoje sorxilʼle pois sorat!’ 28 Abraham, Izak, Jakob ani sogle provadi Devachea Rajeant asat ani tumkam bhair uddoileat mhunn tumi polloitole tednam tumi roddttole ani tumche dant korkoraitole. 29 Titlench nhoi, udent, ostom, utʼtor ani dokxinne thaun lok ietole ani Devachea Rajeant mezar jevnnak bostole. 30 Polloiat! Nimanne asat te thodde lok poile zatole ani poile asat te thodde lok nimanne zatole.”

31 Teach vellar thodde Farizev thoim aile ani Jezuk mhunnonk lagle: “Hanga thaun voch, karonn Herod* tuka marun uddounk sodhta.” 32 Tannem tankam mhunnttlem: “Vochat, ani sangat tea koleak, ‘Polloi! Hanv aiz ani faleam pasun noxtte dutank bhair kaddttolom ani lokank boro kortolom ani tisrea disa mhojem kam purnn zatolem.’ 33 Punn kitem-i zaum, mhaka aiz, faleam ani porvam pasun mhojem kam korunk zai. Karonn eka provadeak Jeruzalema bhair jivexim marta oxem zaunkuch xokona. 34 Jeruzalem, Jeruzalem, tum provadeank jivexim marun uddoupi ani zankam tujea lagim dhaddleat tankam fatravpi xar—kombi zoxi aplea pilank aplea pakottea khala ektthaim korta, toxench mhaka zaite pavtti tujea bhurgeank ektthaim korunk zai aslem! Punn tumkam tem naka aslem. 35 Devan tumchem ghor* soddun dilam.* Hanv tumkam sangtam, jea poriant tumi, ‘Jehovachea* nanvan ieta tacher besanv asum!’ oxem mhunnche nant tea poriant tumi mhaka pollounche nant.”

14 Anik ek pavtti Sabathachea disa Jezu Farizevanchea eka dhormik fuddareachea ghora jevnnak gelo. Ani thoim lok tacher barik nodor dovrun asle. 2 Thoim tachea mukhar ek oso munis aslo zaka duens zaun tachem ang suzlolem.* 3 Tednam Jezun Kaido zannam asloleank ani Farizevank vicharlem: “Sabathachea disa eka duent munxak boro korop sarkem vo na?” 4 Punn te vogich ravle. Tor Jezun tea munxak hat lavun boro kelo ani dhaddlo. 5 Uprant Jezun tankam mhunnttlem: “Tumchea modem oso konn asa zacho put, vo boil Sabathachea disa baint poddlo zalear to taka rokddoch bhair kaddchona?” 6 Tanche koddem hea prosnacho zobab diunk zalona.

7 Tea uprant thoim jevnnak ailole te lok bospak bore-bore zage vinchun kaddttat tem tannem polloilem tednam tannem tankam ek vopar sangon oxem mhunnttlem: 8 “Tuka konnui kazarachea jevnnak amontronn dita tednam vochon sogleant mhotvachea zagear boso naka, karonn tannem ghoddie tujea poros anik mhotvachea eka munxak jevnnak amontronn dilam astolem. 9 Tednam jea munxan tumkam dogainkui amontronn dilam to munis ietolo ani tuka mhunnttolo, ‘Hea munxak hanga bosonk di.’ Ani tuka lojen man sokol ghalun, thoim thaun utthchem poddttolem ani vochon sogleant sokoilea zagear boschem poddttolem. 10 Tor tuka amontronn melltta tednam vochon sogleant sokoilea zagear bos. Toxem kelem zalear, tuka jevnnak amontronn dilʼlo to ieun tuka mhunnttolo, ‘Mhojea ixtta, thoim voir vochon bos.’ Tednam jevnnak ailolea soglea lokam hujir tuzo man vaddttolo. 11 Karonn dor eklo zo svotak voir kaddtta taka sokol denvoitole ani zo konn svotak khalto korta taka voir kaddttole.”

12 Tea uprant jea munxan amontronn dilʼlem taka Jezun mhunnttlem: “Tum donparchem vo sanjechem jevonn dovorta tednam tujea ixttank, bhavank, soireank vo girest xezareank apoinaka karonn ghoddie tim-ui tuka jevnnak apoit ani tuka porot farik korit. 13 Punn tum jevonn dovorta tednam goribank, opongank, longddeank ani kuddʼddeank amontronn di. 14 Tednam tuka khuxi mellttoli, karonn tuka porot diunk tanchea lagim kainch na. Nitivont lokank jivont kortole tednam tuka tacho inam mellttolo.”

15 Hem aikon thoim jevnnak ailolea lokam modlea eklean taka mhunnttlem: “Devachea Rajeant jevnnak bostolo* to khuxal.”

16 Jezun taka mhunnttlem: “Eka munxan sanjechem ek vhoddlem jevonn dovorlem ani zaitea lokank amontronn dilem. 17 Jevnnacho vell zalo tednam tannem aplea sevokak, jea lokank apoileat tankam oxem sang mhunn dhaddlo, ‘Ieiat, karonn soglem toiar asa.’ 18 Punn te sogle nimtam diunk lagle. Poilean taka sanglem, ‘Hanvem xet ghetlam, ani mhaka thoim vochon tem pollounkuch zai, taka lagon mhaka bhogos.’ 19 Dusrean mhunnttlem, ‘Hanvem panch zoddi boil vikte ghetleat ani te sarke asat kai na tem mhaka pollounk vochonk zai, taka lagon mhaka bhogos.’ 20 Anik eklean mhunnttlem, ‘Mhojem atanch kazar zalam, taka lagon hanv ieunk xokona.’ 21 Sevokan ieun hem soglem dhoniak sanglem. Tednam to dhoni ragar zalo ani tannem sevokak mhunnttlem, ‘Atanch mukhel rosteancher ani xarantlea barik vattencher voch ani goribank, opongank, kuddʼddeank ani longddeank hanga gheun ieo.’ 22 Thoddea vella uprant sevokan sanglem: ‘Dhonia, tunvem hukum dilʼlo toxench kelem. Tori astana thodde zage rite asat.’ 23 Tednam dhonian taka mhunnttlem, ‘Rosteancher ani barik vattencher voch ani thoinchea lokank forsan apoi, oxe toren mhojem ghor bhortolem. 24 Karonn hanv tumkam sangtam, jea lokank amontronn dilʼlem tantuntlea ekleak pasun mhojem jevonn chakunk mellchem na.’”

25 Lokancho ek vhodd zomo Jezu sangata cholon voitalo. Tannem vollon tankam mhunnttlem: 26 “Zor konnui mhojea lagim ieta punn aplea bapaicho, avoicho, bailecho, bhurgeancho, bhavancho ani bhoinnincho ani toxench svotacho dves korina* zalear to mhozo xis zaunk xokona. 27 Zo aplo trasancho khambo* ubarna ani mhojea fattlean cholona to mhozo xis zaunk xokona. 28 Udharonnak, tumchea modem oso konn asa zaka gopur bandunk zai, punn poilim boson to bandun purnn korunk aplea koddem goroz te poixe asat kai na mhunn odmas kaddina? 29 Na zalear to buniad ghaltolo punn gopur bandun purnn korunk pavchona ani sogle lok tachim fokannam kortole. 30 Ani mhunnttole: ‘Hea munxan bandunk suru kelem, punn sompounk pavlona.’ 31 Vo khoincho raza oso asa, zo dusrea raza lagim zhuzonk voichea poilim apli 10 hozaranchi fouz gheun dusman razachea 20 hozaranchea fouze add zhuzonk zatolem vo na tea vixim dusream koddlean solʼlo gheunchona? 32 To zhuz korunk xokona zalear dusro raza pois astanach aplea niropeank dhaddun to tachea lagim xanti korcho proitn kortolo. 33 Heach toren tumchea modlo konnui aplea lagim aslolem soglem soddun dina, to mhozo xis zaunk xokona.

34 “Dubhava vinnem mitt borem asta. Punn mittachi kharsann geli zalear tumi taka porot kharsann koxim ditolim? 35 Tem zomni pasot vo sarem mhunn uzar korunk boreak poddona. Lok tem bhair uddoita. Kan asat tannim aikonchem.”

15 Uprant sogle tax vosul korpi ani tanchea sarke dusre patki lok Jezuchem aikonk tachea lagim aile. 2 Hem polloun Farizev ani xastri gunngunnunk lagle: “Ho tor patkeank pasun aplea lagim ieunk dita ani tanchea sangata boson jevta.” 3 Tednam Jezun tankam hi vopar sangli: 4 “Tumchea modem oso konn asa zachea lagim 100 menddram asat ani tantuntlem ek sanddlear to urlolea 99 menddrank thoinch ranant dovrun tem ek menddrum mello poriant taka sodhit ravchona? 5 Ani tem taka melltta tednam to khub khuxal zata ani taka aplea khandar gheta. 6 Ghora ailea uprant to aplea ixttank ani xezareank apoita ani tankam sangta, ‘Mhojea sangata khuxal zaiat karonn mhojem sanddlolem menddrum mhaka mellʼllem.’ 7 Hanv tumkam sangtam, heach toren poschatap korchi goroz na tea 99 nitivont munxam poros ek patki munis poschatap korta tednam sorgar soglim khub khuxal zatat.

8 “Vo oxi khoinchi bail asa jichea lagim dha chandiche nanne* asat. Tantuntlo ek sanddlo zalear ti divo pettoun akʼkhea ghorant saron marun to mello poriant sodhchina? 9 Ani to nanno* tika melltta tednam ti aplea ixttinnink ani xezareank apoita ani tankam mhunntta, ‘Mhojea sangata khuxal zaiat, karonn mhaka mhozo sanddlolo nanno* mellʼllo.’ 10 Teach bhaxen hanv tumkam sangtam, poschatap korta tea eka patki munxa pasot Devache dut khub khuxal zatat.”

11 Uprant tannem mhunnttlem: “Eka munxak don put asle. 12 Dhakttea putan aplea bapaik mhunnttlem, ‘Pai, daizantlo mhozo vantto mhaka di.’ Tednam bapain aplem daiz donui putank vanttlem. 13 Thoddea disam uprant dhakttea putan apleak mellʼllam tem soglem ektthaim kelem ani dusrea desant gelo. Thoim tannem folgam marun daizant apnnak mellʼllolem tem soglem kabar kelem. 14 Tache sogle poixe kabar zale tednam tea akʼkhea desant bhuk poddli ani to samko patixer zalo. 15 Tachi poristithi itli vaitt zali ki to tea desant eka munxa lagim kam korunk gelo. Tannem taka aplea uktea moidanar dukrank chorounk dhaddlo. 16 Dukor khatat tem jevonn pasun to khaunk axetalo punn taka konnuch kainch dinaslo.

17 “Taka apli chuk somzoli tednam tannem mhunnttlem, ‘Mhojea bapai koddem disvoddear kam korunk zaite lok asat zankam pottbhor jevunk melltta, ani hanv hanga upaxim mortam! 18 Atam hanv porot mhojea bapai lagim voitolom ani taka mhunnttolom: “Pai, hanvem Devachea* ani tujea add patok kelam. 19 Tuzo put mhunnonk pasun hanv purto na. Ek manai koso mhaka tujea lagim kamak dovor.”’ 20 Tor to utthlo ani aplea bapai lagim gelo. To poisuch astana tachea bapain taka polloilo ani taka tachem churchurem dislem. Tannem dhanvon vochon aplea putak veng marli, ani to mogan tache ume gheunk laglo. 21 Tednam putan taka mhunnttlem, ‘Pai, hanvem Devachea ani tujea add patok kelam. Tuzo put mhunnonk pasun hanv purto na.’ 22 Punn bapain aplea sevokank mhunnttlem, ‘Begin vochat ani sogleant bore kopdde haddun taka nhesoiat. Tachea hatak mudi ani paim-ank zotim ghalat. 23 Toxench ek mottʼtto paddkulo haddun marat. Ami khaun khuxal zaum-ia. 24 Karonn mhozo ho put melolo to atam jivont zala, sanddlolo to atam mellʼlla.’ Tor te sogle khuxalkai monounk lagle.

25 “Tacho vhoddlo put xetant aslo. Xeta thaun porot ailea uprant to ghora lagim pavlo tednam taka songitacho ani nachpacho avaz aikonk ieunk laglo. 26 Tannem eka sevokak aplea lagim apoun hem soglem kitem cholta kai mhunn vicharlem. 27 Sevokan taka mhunnttlem, ‘Tuzo bhav aila, ani tujea bapain ek mottʼtto paddkulo marla. Karonn tacho put taka bore bholaiken* porot mellʼlla.’ 28 Punn vhoddlea putak khub rag ailo ani to ghorant bhitor vochonk toiar zaina zalo. Tednam tacho bapui bhair ailo ani taka somzaunk laglo. 29 Tannem aplea bapaik mhunnttlem, ‘Hanv itlea vorsam thaun tuji chakri kortam ani hanvem ek pavtt pasun tuji adnea moddunk na. Tori astana tunvem mhaka mhojea ixttam sangata moja korunk bokddechem ek por pasun kednanch diunk na. 30 Punn apli girestkai xindoll bailancher kabar korun* tuzo ho put porot ailo tednam tunvem tachea pasot mottʼtto paddkulo marlo.’ 31 Tednam bapain taka mhunnttlem, ‘Mhojea puta, tum tor sodanch mhojea sangata asa ani mhojea lagim asa tem soglem tujench. 32 Punn aiz khuxalkaiecho dis, ani ami khuxal zaunk zai. Karonn tuzo bhav melolo to atam jivont zala. To sanddlolo punn atam amkam porot mellʼlla.’”

16 Jezun aplea xisank oxem-i sanglem: “Ek girest munis aslo zacho ek sevok* aslo. To sevok tachea girestkaiechi vatt laita mhunn konnem tori tea girest munxak sanglem. 2 Taka lagon tannem sevokak apoilo ani mhunnttlem, ‘Tujea vixim hanv hem kitem aikotam? Tujea kamacho hixob di, karonn atam thaun tum mhojem ghor samballpachem kam korchona.’ 3 Tednam to sevok monantlea-monant oxem chintunk laglo, ‘Dhoni mhaka kamantlo kaddtta, tor atam hanv kitem korum? Xetant vochon khonnpachem kam korunk mhaka xokti na, ani bhik magonk mhaka loz dista. 4 Hoi, kamantlean kaddlea uprant lokamnim mhaka ghorant gheuncho mhunn hanvem kitem korunk zai tem atam mhaka kollʼllem.’ 5 Tannem aplea dhoniak rinnkari aslolea dor ekleak apoilo. Tannem poilea rinnkareak vicharlem, ‘Tum mhojea dhoniak kitlem rinn farik korcho asa?’ 6 Tannem mhunnttlem, ‘2,200 liter* zoitunachem tel.’ Sevokan mhunnttlem, ‘Hem ghe tujem korarachem potr, bos ani begin tacher 1,100 liter boroi.’ 7 Tea uprant tannem dusreak vicharlem, ‘Tunvem kitlem rinn farik korchem asa?’ Tannem mhunnttlem, ‘Xembor vhoddlim mapam* ghonv.’ Sevokan taka mhunnttlem, ‘Hem ghe tujem korarachem potr ani tacher 80 boroi.’ 8 To sevok onitivont aslo tori astana tachea dhonian taka xabaski dili karonn to xanneponnan vaglo. Hanv tumkam hem sangtam karonn uzvaddachea putam poros hea sonvsarache* put dusream thaim chodd xanneponnan vagtat.

9 “Hanv tumkam hem-ui sangtam: Naddbudʼdhen ektthaim kelʼle girestkaie* udexim tumchea pasot ixtt korat. Karonn hi girestkai na zata tednam te ixtt tumkam sodankal urta toslea zagear bhitor ghetole. 10 Zo munis lhan vostumnim visvaxi asta to vhoddlea vostumnim-i visvaxi astolo. Ani zo munis lhan vostumnim ovisvaxi asta to vhoddlea vostumnim-i ovisvaxi astolo. 11 Taka lagon tunvem naddbudʼdhen ektthaim kelʼle girestkaie vixim tum visvaxi na zalear tuka khori girestkai konn ditolo? 12 Ani dusreanche girestkaie vixim tum visvaxi asa mhunn dakhoun dina zalear tujea pasot dovorloli girestkai tuka konn ditolo? 13 Konnuch sevok don dhonianchi seva korunk xokona. Karonn to ekleacho dves kortolo ani dusreacho mog kortolo, vo ekleak chittkon ravtolo ani dusreak kainch valor diunchona. Tumi ekach borabor Devachim ani girestkaiechim gulamam zaunk xokonant.”

14 Poixancho mog aslole Farizev Jezuchim him utram aikon tachim fokannam korunk lagle. 15 Taka lagon tannem tankam mhunnttlem: “Tumi munxam mukhar apunn nitivont mhunn dakhoitat. Punn Dev tumchim kallzam vollkhota. Karonn jeo vostu munis vhodd mhunn chintat, teo Devachea nodren vitt haddtta tosleo asat.

16 “Khorem mhunnttlear, Kaideant ani Provadeanchea Pustokant* boroilʼlem tem Juanvachea kalla poriant aslem. Tednam thaun Devachea Rajeachi bori khobor porgott zata ani sogle toreche munis tantunt bhitor soronk, zata titlo proitn kortat. 17 Mollob ani prithum na zavop sompem, punn Kaideant aslolem ek lhan okxor vo okxorant aslolem ek lhan kus poriant purnn zalea xivai urchem na.

18 “Dor ek munis zo aplea bailek divors dita ani dusre baile lagim kazar zata to pordvar* korta. Ani zo munis divors zalʼle baile lagim kazar zata to-ui pordvar korta.

19 “Ek girest munis aslo zo zambllea rongache ani ekdom mharog kopdde ghaltalo ani sukhan ani mojen dis sartalo. 20 Punn tachea darvonttea lagim Lazar nanvachea eka bhikareak haddun bosoitale. Tachea akʼkhea angak fodd ailole. 21 Ani to tea girest munxachea meza thaun poddttat te kuddke khaunk anvddetalo. Sunnim pasun ieun tache fodd lenvtalim. 22 Thoddea tempa uprant to bhikari melo ani devdutamnim taka Abrahamachea kuxik* vhoron bosoilo.

“Toxench to girest munis-ui melo ani taka purlo. 23 To girest munis Fonddant* tollmollttalo. Thoim thaun tannem nodor marun polloit zalear taka khub pois, Abraham ani tachea kuxik* Lazar asa to dislo. 24 Tor tea girest munxan ulo marun mhunnttlem, ‘Amchea purvoza,* Abrahama, mhoji kakut kor. Lazaran aplea bottachem pont udkant buddoun mhojea jibek thonddai diunchi mhunn taka mhojea sorxim dhaddun di karonn hanv hanga ujeant tollmollttam.’ 25 Punn Abrahaman mhunnttlem, ‘Puta, ugddas kor, tunvem jivitbhor boreo-boreo vostu uzar korun moja keli. Punn Lazarak fokot dukh-koxtt sosunk poddle. Atam to susegad jieta punn tum tollmolltta. 26 Tea bhair amchea modem ani tujea modem ek vhoddlo khoddʼddo asa zaka lagon, konnui ieunk sodhta zalear pasun hanga thaun konnuch tujea sorxim ieunk xokona. Ani thoim thaun, amchea sorxim ieunk xokona.’ 27 Tednam tannem mhunnttlem, ‘Toxem zalear, hanv tujea lagim magtam mhojea purvoza, tum taka mhojea bapaichea ghora dhadd. 28 Karonn mhaka panch bhav asat ani tannem vochon tankam sogleank bore bhaxen somzailem zalear tankam hanga ieun tollmollonk poddchem na.’ 29 Punn Abrahaman mhunnttlem, ‘Tanchea lagim Moizes ani Provadeanchim Pustokam* asat. Tannim tanchem aikonchem.’ 30 Tednam tannem mhunnttlem, ‘Na mhojea purvoza Abrahama, melʼleam modlo konnui tanchea lagim gelo zalear te poschatap kortole.’ 31 Tannem taka mhunnttlem, ‘Tannem Moizesachem ani Provadeanchea Pustokantlem aikonk na zalear konnui jivont zalear pasun te tacher visvas dovorchenant.’”

17 Jezun aplea xisank mhunnttlem: “Patkant uddoita tosleo vostu* sodanch astoleo punn jea munxa udexim eklo patkant poddtta tacher hai! 2 Hea lhanam modlea ekleak pasun patkant* poddom-so korta tea munxachea golleant danteacho fator bandun taka khol doriant uddoilear chodd borem zatolem. 3 Svotacher dhean di, tuzo bhav patok korta zalear taka tapoi ani to poschatap korta zalear taka bhogos. 4 To disantlean sat pavtti tujea add patok korta ani satui pavtti tujea lagim ieun oxem mhunntta, ‘Mhaka bhogos,’ zalear tunvem taka bhogsunk zai.”

5 Uprant apostlamnim Somiak mhunnttlem: “Amcho bhavarth vaddoi.” 6 Tednam Somian mhunnttlem: “Tumkam sansvachea konna itlo bhavarth asa zalear tumi hea zhaddak oxem mhunnttole, ‘Hanga thaun umttun voch ani doriant zav!’* ani tem tumchem aikotolem.

7 “Tumchea modem oso konn asa zacho sevok xetant kosun vo menddram choroun porot ailea uprant to taka mhunnot, ‘Begin hanga ieo ani jevnnank bos’? 8 Tachea bodlek, to taka, ‘Tuje kopdde bodol ani sanjechea jevnnak mhojea pasot kitem tori toiar kor ani mhojem jevonn zaum poriant tum mhoji seva kor, magir tum vochon tujem jevonn jev’ oso mhunnchona kai? 9 Tea sevokan taka dilʼlem soglem kam kelem mhunn to tache upkar attoitolo kai? 10 Teach bhaxen, tumkam dilʼlem soglem kam tumi kelea uprant oxem mhunnat: ‘Ami kiteakuch upkaronant toslim chakram. Ami kitem korunk zai aslem tench kelem.’”

11 Jezu Jeruzalemant voitana Samariechea ani Galiliechea xime voilean gelo. 12 Jezu eka ganvant voita astana taka dha koddkar mellʼlle. Punn te tachea thaun pois ube ravle. 13 Tannim mottʼttean mhunnttlem: “Guruji, Jezu, amchi kakut kor!” 14 Tankam polloun Jezun mhunnttlem: “Vochat ani tumchi kudd iadnikank dakhoiat.” Te voita astana vatteruch tanchi kudd nitoll zali. 15 Apunn boro zala mhunn tanchea modlea eklean polloilem tednam to mottea-mottean Devachi mhoima korit porot ailo. 16 To Jezuchea paim-am lagim umto poddlo ani tannem tache upkar attoile. Khorem mhunnttlear, to ek Samariekar aslo. 17 Taka polloun Jezun mhunnttlem: “Sogle dha-ui zann nitoll zaunk nant kai? Toxem zalear, urlole nnov khoim asat? 18 Dusrea raxttrantlea hea munxak soddun Devachi mhoima korunk anik konnuch porot ieunk na kai?” 19 Tannem tea munxak mhunnttlem: “Utth ani tujea vattek lag. Tujea bhavarthan tuka boro kelo.”

20 Devachem Raj kednam ietolem mhunn Farizevamnim taka vicharlem tednam tannem zobab diun mhunnttlem: “Devachem Raj sogleank dixtti poddtta titlea ukteponnim ieunchem na; 21 vo lok oxem mhunnche nant, ‘Polloi, tem hanga asa!’ vo ‘Thoim asa!’ Karonn Devachem Raj tumcheach modem asa.”

22 Magir tannem xisank mhunnttlem: “Oxe dis ietole jednam munxachea Putachea disantlo ek dis tumi pollounk sodhtole, punn tumkam pollounk mellchona. 23 Lok tumkam mhunnttole, ‘Polloi, to thoim asa!’ vo ‘Hanga asa!’ Punn tumi bhair vochonakat vo tanchea fattlean dhanvonakat. 24 Karonn zoxim mollbar zoglam martat tednam tim eka vatte thaun dusrea vatten chokchoktat tim dixtti poddttat, toso munxacho Put aplea disa astolo. 25 Punn tachea poilim taka zaite tras sosche poddttole ani hi pillgi taka nakartoli. 26 Ani Noah-chea disamnim zalem toxench munxachea Putachea disamnim zatolem. 27 Noah tarvant* bhitor sorlo tea disa meren lok khata-pietale, kazar zatale ani kazar korun ditale. Uprant, buddtti aili tednam tea soglea lokancho nas zalo. 28 Heach toren, Lotachea disamnim pasun lok khata-pietale, viktem ghetale, viktale, roitale ani ghoram bandtale. 29 Jea disa Lot Sodoma thaun bhair ailo tea disa mollbar thaun ujeacho ani zolltta toslea fatrancho paus poddlo ani sogleancho nas zalo. 30 Jea disa munxacho Put lokam mukhar ietolo tea disa pasun oxench ghoddttolem.

31 “Tea disa zo munis ghoracher voir* asa punn tachem saman ghorant bhitor asa, tannem tem vhoronk sokol denvchem nhoi. Toxench, zo munis xetant asa tannem fatti urloleo vostu vhoronk porot ieunchem nhoi. 32 Lotachea bailecho ugddas korat. 33 Zo aplo jiv vachounk proitn korta to aplo jiv hogddaitolo, punn zo aplo jiv hogddaita to aplo jiv vachoitolo. 34 Hanv tumkam sangtam, tea rati dog zannam ekach khattir astolim, tantuntlea ekleak borabor vhortole ani dusreak soddun ditole. 35 Don bailo ekach danteacher dollttoleo, tantuntle eke bailek borabor vhortole punn dusrek soddun ditole.” 36 *—— 37 Tor tannim taka vicharlem: “Khoim Somia?” Tannem mhunnttlem: “Moddem asa thoinch ghonni* ektthaim zatat.”

18 Magir tannem tankam, sodanch magnnem korit ravonk zai ani tannim soddun diunk zaina mhunn dakhounk ek vopar sangli. 2 Tannem mhunnttlem: “Eka xarant ek neai korpi aslo zaka Devachi matui bhirant nasli ani to munxankui resped dinaslo. 3 Tea xarant ek vidva asli. Ti porot-porot ieun taka oxem mhunnttali, ‘Kitem-i korun mhaka neai di ani mhojea add kes kelʼlea munxa thaun mhaka vachoi.’ 4 Zaito temp poriant tannem tichem aikonk na punn uprant tannem apleakuch oxem mhunnttlem, ‘Hanv Devak bhiena, nhoi mhunn munxank resped dina. 5 Toripunn, hi vidva mhaka ieun bejar korta dekhun hanv tika neai ditolom, toxem korina zalear ti porot-porot ieun mhozo jiv khatoli.’” 6 Uprant Somian mhunnttlem: “Tea neai korpeak Devachi bhirant naslear pasun* tannem kitem mhunnttlem tacher dhean diat! 7 Tor je dis-rat Deva lagim vinoti kortat tea vinchun kaddlolea lokam pasot to neai korchona kai? To tanchea lagim pasiensan vagta zalear pasun to tanchem aikotoloch. 8 Hanv tumkam sangtam, to zata title begin tankam neai ditolo. Tori astana, munxacho Put ieta tednam hea prithumer taka oslo bhavarth* mellttolo kai?”

9 Uprant, apleach nitivontponnacher visvas asloleank ani dusreank kainch valor dina asloleank Jezun ek vopar sangli. Tannem mhunnttlem: 10 “Don munis Devmondirant magnnem korunk gele, ek Farizev aslo ani dusro tax vosul korpi aslo. 11 Farizev ubo ravon monantlea-monant oxem magnnem korunk laglo, ‘Deva, hanv tuzo upkar attoitam ki hanv tea munxam sarko nhoi je dusreank luttʼttat, fottingponnam kortat ani pordvar* kortat, nhoi mhunn hanv hea tax vosul korpea sarko asa. 12 Hanv sumanak don pavtti upas kortam ani mhaka jem kitem melltta tacho dhavo vantto ditam.’ 13 Punn to tax vosul korpi pois ubo aslo ani taka mollbar pollounk pasun bhirant distali, to aplem hoddʼddem boddoitalo ani mhunnttalo, ‘Deva, hanv patki, mhoji kakut* kor.’ 14 Hanv tumkam sangtam, ho munis Deva mukhar tea Farizeva poros chodd nitivont zaun aplea ghora gelo karonn dor eklo zo svotak voir kaddtta taka sokol denvoitole ani zo konn svotak khalto korta taka voir kaddttole.”

15 Uprant, Jezun aple hat dovorche mhunn lok aplea lhan bhurgeank* pasun tachea lagim haddunk lagle, punn xisamnim hem polloilem tednam te lokank tapounk lagle. 16 Punn Jezun lhan bhurgeank aplea lagim apoilim, ani mhunnttlem: “Lhan bhurgeank mhojea lagim ieunk diat, tankam addauncho proitn korinakat. Karonn Devachem Raj osleanchench zatolem. 17 Hanv tumkam khorench sangtam, zo konn Devachem Raj hea lhan bhurgea bhaxen apnnaina to tantunt kosoch bhitor soronk pavchona.”

18 Eka odhikarean taka vicharlem: “Borea Guruji, sasnik jivit daiz mhunn melloun gheunk hanvem kitem korunk zai?” 19 Jezun taka mhunnttlem: “Tum mhaka boro kiteak mhunntta? Devak soddun konnuch boro nhoi. 20 Tum tor adnea zannam: ‘Pordvar korcho nhoi, jivexim marchem nhoi, chori korchi nhoi, khotti govai diunchi nhoi ani tujea bapaik ani tujea avoik man di.’” 21 Tednam tannem mhunnttlem: “Heo sogleo adnea hanv lhanponnim thaun pallit ailam.” 22 Hem aikolea uprant Jezun taka mhunnttlem: “Tujea bhitor ek unnem asa: Tujea lagim asa tem soglem vikun kitem melltta tem goribam modem vantt ani tuka sorgar thevo mellttolo. Ani ieun mhozo xis zav.” 23 Tannem hem aikolem tednam to ekdom dukhi zalo karonn to khub girest aslo.

24 Jezun taka polloun mhunnttlem: “Poixe asloleank Devachea Rajeant bhitor soronk kitlem kotthin zatolem! 25 Khorem mhunnttlear, eka girest munxak Devachea Rajeant bhitor sorchea poros eka unttak, xinvpachea suiechea burkantlean vochonk sompem zatolem.” 26 Hem aikolem tannim oxem mhunnttlem: “Toxem zalear konnank mhunn taronn mellttolem?” 27 Tannem mhunnttlem: “Munxa lagim jem korunk zaina tem Deva lagim korunk zata.” 28 Punn Pedrun mhunnttlem: “Polloi! Ami amchem soglem soddun tujea fattlean aileat.” 29 Jezun tankam mhunnttlem: “Hanv tumkam khorench sangtam, oso konn na zannem Devachea Rajea pasot ghor vo bail vo bhav vo avoi-bapui vo bhurgim soddun dileant, 30 ani taka hea kallant zaite pavtti chodd mellchem na ani fuddlea sonvsarant* sasnik jivit mellʼllea xivai urchem na.”

31 Uprant Jezun tea Bara zannank* kuxin vhele ani mhunnttlem: “Polloiat! Ami Jeruzalemant voitat ani munxachea Puta vixim provadeam vorvim boroilʼleo teo sogleo vostu purnn zatoleo. 32 Zoxem, taka Judev nhoi toslea lokanchea hatant ditole, ani te tachim fokannam kortole, tachea lagim vaitt toren vagtole ani tacher thuktole. 33 Te taka chabkamnim martole ani jivexim marun uddoitole, punn tisrea disa Dev taka jivont kortolo.” 34 Punn xisank hea vostuncho orth kollonk na karonn teo gupit dovorloleo, ani tankam teo somzonk nant.

35 To Jeriko xara lagim pavcho aslo tednam ek kuddʼddo munis rosteachea kuxik boson bhik magtalo. 36 Tannem thoim thaun voita tea lokanchea zomeacho avaz aikolo ani thoim kitem cholʼlam kai mhunn to lokank vicharunk laglo. 37 Tannim taka sanglem: “Nazaretkar Jezu hanga sorlean voita!” 38 Hem aikolem tednam tannem mottʼttea avazan mhunnttlem: “Jezu, Davidachea Puta, mhoji kakut kor!” 39 Je lok mukhar choltale tannim taka tapoun vogi rav mhunn sanglem, punn to anik mottʼttean bob marunk laglo: “Davidachea Puta, mhoji kakut kor!” 40 Jezu ravlo ani tannem tea munxak aplea lagim haddat mhunn hukum dilo. To munis ailo tednam Jezun taka vicharlem: 41 “Hanvem tujea pasot kitem kelʼlem tuka zai?” Tannem mhunnttlem: “Somia mhojea dolleanchi dixtt mhaka porot mello-xi kor.” 42 Jezun taka mhunnttlem: “Tuji dixtt tuka porot mellom; tujea bhavarthan tuka boro kelo.” 43 Ani rokddich tachea dolleanchi dixtt porot aili ani to Devachi mhoima korit tachea fattlean vochonk laglo. Lokamnim hem polloilem tednam te Devak vakhannunk lagle.

19 Jezu Jeriko xarantlean cholon voitalo. 2 Thoim Zakev nanvacho ek munis aslo. To tax vosul korpeancho mukheli aslo ani khub girest aslo. 3 Ho Jezu konn, mhunn to pollounk sodhtalo. Punn lokanchi gordi asli ani to mottvo aslo dekhun taka pollounk mellona zalem. 4 Tor Jezuk pollounk to dhanvon vochon eka rumddachea zhaddacher choddlo, karonn Jezu tea vatten vochpacho aslo. 5 Jezu thoim pavlo tednam tannem voir polloun mhunnttlem: “Zakev, begin sokol denvon ieo, karonn aiz mhaka tujea ghora ieunk zai.” 6 Tednam to begin-begin sokol denvlo ani tannem khuxalkaien Jezuk aplea ghora ieukar dilo. 7 Lokamnim hem polloilem tednam te gunngunnon mhunnonk lagle: “Ho eka oslea munxachea ghora gela zo patki asa.” 8 Punn Zakev ubo ravlo ani tannem Somiak mhunnttlem: “Somia, polloi! Hanv mhoji ordi girestkai goribank ditam ani hanvem jea konnank luttlam* taka hanv char pavtti chodd porot ditam.” 9 Tednam Jezun taka mhunnttlem: “Aiz Devan hea munxak ani tachea ghorcheank taronn dilam, karonn ho pasun Abrahamacho put. 10 Munxacho Put sanddleat tankam sodhunk ani taronn diunk aila.”

11 Xis hem soglem aikotale tednam tannem tankam anik ek vopar sangli. Karonn to Jeruzalema laginch aslo ani Devachem Raj beginuch tankam distolem oxem tache xis somzotale. 12 Tannem mhunnttlem: “Ek raz-ghoranneantlo munis aslo. To raz-odhikar melloun gheun porot ieunk lagon eka poisulʼlea desant gelo. 13 Tannem aplea sevokam modlea dha sevokank apoile ani tankam dha mina* chandiche nanne dile. Tannem tankam sanglem, ‘Hanv porot ieum poriant, he gheun veapar korat.’ 14 Punn tachea desache lok tacho dves kortale. Taka lagon tannim tachea fattlean niropeank oxem sangon dhaddle, ‘Ho munis amcho raza zalʼlo amkam naka.’

15 “Raz-odhikar* melloun ghetlea uprant to munis porot ailo. Tannem jea sevokank poixe* dilʼle tankam tannem apoun haddle. Karonn tannim veapar korun anik kitle poixe zoddleat hem taka zannam zaunk zai aslem. 16 Tednam poilo sevok fuddem ailo ani mhunnonk laglo, ‘Dhonia, tunvem mhaka ek mina chandiche nanne dilʼle, tanche hanvem dha mina chandiche nanne zoddle.’ 17 Tednam Dhonian taka mhunnttlem, ‘Xabʼbas, borea sevoka, tum eka lhan vostunt pasun visvaxi ravlo dekhun hanv tuka dha xarancher odhikar ditolom.’ 18 Atam dusro ieun mhunnonk laglo, ‘Dhonia tunvem mhaka ek mina chandiche nanne dilʼle, tanche hanvem panch mina chandiche nanne zoddle.’ 19 Dhonian taka-i mhunnttlem, ‘Hanv tuka-i panch xarancher odhikar ditam.’ 20 Punn anik eklo ailo ani mhunnonk laglo, ‘Dhonia hi ghe tuji chandi. Hanvem ti kopddeant bandun, lipoun dovorloli. 21 Hanv tuka bhietalom, karonn tum ek koddok munis mhunn hanv zannam. Tunvem benkent zoma korunk na te poixe tum kaddtta ani vompina tem tum lunvta.’ 22 Dhonian taka mhunnttlem, ‘Are noxttea sevoka, tujeach utramnim hanv tuzo neai kortam. Hanv ek koddok munis zo zoma korina te poixe kaddttam ani vompina tem lunvtam mhunn tum zannam aslo nhoi? 23 Tor tunvem mhoje poixe* benkent kiteak dovrunk nant? Toxem kelʼlem zalear hanv porot ailea uprant, mhojea poixam sangata mhaka jur pasun mellttolo aslo.’

24 “Tednam tachea fuddean ube asloleank Dhonian mhunnttlem, ‘Hache koddlean hi chandi gheiat ani zachea lagim dha mina chandi asa taka diat.’ 25 Punn tannim mhunnttlem, ‘Dhonia, tachea lagim tor poilim thaunuch dha mina chandi asa.’ 26 ‘Hanv tumkam sangtam, zachea lagim asa taka anik ditole, punn zachea lagim na tache koddlean jem asa tem pasun kaddun ghetole. 27 Hanv raza zauncho nhoi mhunn distalem tea mhojea dusmanank hanga gheun ieiat ani tankam mhojea mukhar jivexim marat.’”

28 Hem sanglea uprant, Jezu Jeruzalemak vochonk bhair sorlo. 29 To Zoitunanchea Dongrar aslolea Bethfage ani Bethani ganvant pavlo tednam tannem aplea don xisank oxem sangon dhaddle: 30 “Tumkam dixtti poddtta tea ganvant vochat. Thoim pavlea uprant tumkam ek gaddvachem por bandlolem mellttolem, zacher hachea poilim konnuch bosonk na. Taka soddun mhojea lagim gheun ieiat. 31 Punn konnui tumkam, ‘Tumi taka kiteak soddoitat?’ mhunn vicharit zalear tankam oxem sangat: ‘Somiak hachi goroz asa.’” 32 Tednam, zankam dhaddlole te gele ani zoxem Jezun sanglolem toxench tankam dislem. 33 Punn te tea gaddvachea porak soddoitale tednam tachea dhoniamnim ieun tankam vicharlem: “Tumi tea gaddvachea porak kiteak soddoitat?” 34 Tannim mhunnttlem: “Somiak hachi goroz asa.” 35 Te taka gheun Jezu lagim aile. Tannim tea gaddvachea poracher aple kopdde ghatle ani Jezuk tacher bosoilo.

36 To fuddem vochonk laglo toso lok aple kopdde rosteacher patllaunk lagle. 37 To Zoitunanchea Dongra voilean sokol voita tea rostear pavtanch xisancho akʼkho zomo khuxalkaien ani vhodd avazan Devachi vakhann’nni korunk laglo karonn tannim zaitim vizmitam polloilʼlim. 38 Te mhunnttale: “Jehovachea* nanvan ieta tea Razacher besanv asum! Sorgar xanti asum, ani sogleant unch zagear aslolea Devachi mhoima zaum!” 39 Punn gordentlea thoddea Farizevamnim mhunnttlem: “Guruji, tujea xisank vogi ravonk hukum di.” 40 Punn tannem mhunnttlem: “Hanv tumkam sangtam, he vogi ravle zalear fator bob marunk lagtole.”

41 To xara lagim pavlo tednam tem xar polloun to roddonk laglo. 42 To mhunnonk laglo: “Aiz tunvem, hoi tunvem, jea vostum thaun xanti melltta teo somzon ghetloleo zalear kitlem borem zatolem aslem—punn atam teo vostu tujea thaun lipoun dovorleat. 43 Karonn oxe dis ietat jednam tuje dusman tujea bhonvtonnim tokanchea khambeancheo vontti ubartole ani tuka gherav ghaltole ani soglea vattamnim tuka addaitole.* 44 Te tuka ani tujea bhurgeank zomnir apttun-apttun marun uddoitole. Te hanga ekui fatracher-fator uronk diunche nant. Karonn tunvem tuzo neai* zatolo to vell vollkhon gheunk na.”

45 Uprant to Devmondirant gelo ani je lok thoim viktale tankam dhanvddaunk laglo. 46 Tannem tankam mhunnttlem: “Oxem boroilʼlem asa, ‘Mhojea ghorak magnneachem ghor mhunnttole,’ punn tumi taka choranchi dhol korun dovorlea.”

47 To dor disa Devmondirant xikoitalo. Punn mukhel iadnik, xastri ani lokanche mukheli taka marun uddounk sodhtale. 48 Punn oxem korunk tankam bori sondhi mellonasli, karonn sogle lok tachem aikonk sodanch tachea bhonvtim astale.

20 Ek dis to lokank Devmondirant xikoitalo ani bori khobor sangtalo tednam mukhel iadnik ani xastri lokanchea vhoddilam sangata tachea fuddean aile. 2 Tannim taka mhunnttlem: “Amkam sang tum hem soglem khoinchea odhikaran korta? Ani ho odhikar tuka konnem dila?” 3 Tannem mhunnttlem: “Hanv-ui tumkam ek prosn vichartam, tumi mhaka tacho zobab diat: 4 Juanv ditalo to bautizm sorgar thaun vo munxam thaun aslo?” 5 Te eka-mekak mhunnonk lagle: “Ami ‘Sorgar thaun’ oxem mhunnttlem zalear to amkam vichartolo, ‘Toxem zalear tumi tacher visvas kiteak dovrunk na?’ 6 Punn, ‘Munxam thaun’ oxem ami mhunnttlem zalear sogle lok amkam fatraun martole karonn Juanv provadi mhunn tankam khatri asa.” 7 Taka lagon tacho bautizm konnam thaun asa tem ami nokllo mhunn tannim sanglem. 8 Tednam Jezun tankam mhunnttlem: “Toxem zalear hem soglem hanv khoinchea odhikaran kortam tem hanv-ui tumkam sangchom na.”

9 Uprant to lokank hi vopar sangonk laglo: “Eka munxan drakxancho mollo lailo ani xetkareank bhaddeak* dilo ani to zaitea tempak lagon pordesant gelo. 10 Pikecho vell pavlo tednam aplea molleantlea drakxancho vantto magonk tannem aplea eka sevokak xetkaream koddem dhaddlo. Punn xetkareamnim taka marlo ani kainch dinastana porot dhaddlo. 11 Tannem anik eka sevokak tanchea lagim dhaddlo. Tannim taka marlo, tacho opman kelo ani kainch dinastana taka porot dhaddlo. 12 Uprant tannem tisrea sevokak dhaddlo, tannim taka zokhmi korun bhair uddoilo. 13 Tednam drakxanchea molleachea bhattkaran mhunnttlem, ‘Atam hanv kitem korum? Hanv mhojea mogachea putak dhaddttam, taka tori te man ditole.’ 14 Xetkareamnim taka polloilo tednam te eka-mekak mhunnonk lagle, ‘Ho hea drakxanchea molleacho daiji. Ami taka marun uddoum-ia, mhunnche tachem daiz amchem zatolem.’ 15 Tor, tannim taka molleachea bhair vhoron jivexim marun uddoilo. Atam drakxanchea molleacho bhattkar tanchem kitem kortolo? 16 To ieun tea xetkareank marun uddoitolo ani drakxancho mollo dusrea xetkareank bhaddeak ditolo.”

Hem aikolea uprant tannim mhunnttlem: “Oxem kednanch ghoddona zaum!” 17 Punn tannem tancher nodor marun mhunnttlem: “‘Bandkam korpeamnim zo fator nakarlo, toch konnxeacho mukhel fator zalo,’ oxem boroilʼlem asa tacho orth kitem? 18 Dor eklo zo tea fatracher poddtta tache kuddkean-kuddke zatole, ani jea konnancher to fator poddtta tacho churo zatolo.”

19 Xastri ani mukhel iadnik taka teach vellar dhorunk sodhtale karonn hi vopar tannem tankanch motint dovrun sanglea mhunn te somzole. Punn te lokank bhietale. 20 Tannim tacher barik nodor dovorli ani konnank kollonastana thoddea munxank poixe dile. Tannim tankam nitivont asloleachem dhong korun Jezuk utramnim fosounk sanglem. Oxem korun te taka dhorun sorkarachea ani rajpalachea tabeant korunk sodhtale. 21 Tannim taka vicharlem: “Guruji, ami zannant ki tum sarkem tem uloita ani xikoita, ani tum lokanchim tonddam polloun vagona, punn tum sota pormonnem Devachi vatt xikoita. 22 Amkam sang, ami Somrazak* tax farik korop sarkem vo na?” 23 Punn tannem tanchi naddbudʼdhi vollkholi ani mhunnttlem: 24 “Mhaka ek dinar* dakhoiat. Hacher konnanchem chitr ani konnancho chhap marlolo asa?” Tannim mhunnttlem: “Somrazacho.” 25 Tannem mhunnttlem: “Toxem zalear, Somrazachem asa tem Somrazak diat punn Devachem asa tem Devak diat.” 26 Te lokam mukhar taka utramnim dhorunk xoklenant. Tachea bodlek, tacho zobab aikon te ojap zale ani fuddem kitem-i ulounk tanche koddem utranch naslim.

27 Punn melolim jivont zainant mhunn sangtat tea Sadukiam* modle thodde lok tachea lagim aile ani tannim taka vicharlem: 28 “Guruji, Moizesan boroilʼlem, ‘Eka munxacho bhav bhurgim nastana morta ani tachi bail urta zalear jivo asa tea bhavan tichea lagim kazar zaunchem ani aplea melolea bhava pasot bhurgim zolmak haddchim.’ 29 Atam, sat bhav asle, poilo kazar zalo punn bhurgim nastana melo. 30 Magir, dusro bhav tichea lagim kazar zalo punn to-ui bhurgim nastana melo. 31 Uprant, tisro bhav tichea lagim kazar zalo. Oxem korun satui bhav tichea lagim kazar zale punn bhurgim nastana mele. 32 Xevottak ti bailui meli. 33 Tor melolim jivont zatat tednam ti konnanchi bail zatoli? Karonn ti satui bhavam lagim kazar zalʼli.”

34 Jezun tankam mhunnttlem: “Hea sonvsarant* dadle kazar zatat ani bailank kazar korun ditat. 35 Punn jim munxam tea kallant jivit mellonk ani meloleantlim jivont zaunk purtim asat, tanchea modle dadle kazar zainant ani bailankui kazar korun dinant. 36 Khorem mhunnttlear, tim kednanch morchimnant karonn tim devdutam bhaxen astolim ani tim meloleantlim jivont zaleant dekhun tankam Devachim bhurgim mhunnttolim. 37 Punn melolim jivont zaunchea vixim Moizesan pasun jhilkutta lagim ghoddlolea ghoddnnent sanglolem. Tannem mhunnttlolem ki Jehova* ‘Abrahamacho Dev ani Izakacho Dev toxench Jakobacho Dev.’ 38 To meleant tancho nhoi punn jivont asat tancho Dev, karonn Devachea nodren tim soglim jivim asat.” 39 Hem aikon xastream modlea thoddeamnim mhunnttlem: “Guruji, tunvem ekdom bori zap dili.” 40 Tea uprant, te Jezuk anik prosn vicharunk bhieunk lagle.

41 Magir, Jezun tankam ek prosn vicharlo: “Krist Davidacho put oxem te kiteak mhunnttat? 42 David svota Stotranchea pustokant mhunntta: ‘Jehovan* mhojea Somiak mhunnttlem: “Tum mhojea uzveak tea meren bos 43 jea meren hanv tujea dusmanank monnoi* koxi tujea paim-am ponda ghalina.”’ 44 David taka Somi mhunntta zalear to Davidacho put koso zaunk xokta?”

45 Sogle lok tachem aikotale tednam tannem aplea xisank mhunnttlem: 46 “Lamb-lamb kopdde ghalun bhonvonk ani bazarant lokam koddlean nomoskar korun gheunk, toxench sobha-ghoramnim sogleant fuddem* bosonk ani sanjechea jevnnank sogleant mhotvachea zagear bosonk avoddtta toslea xastream thaun chotur ravat. 47 Te vidvam koddlean soglem kaddun ghetat* ani lokank dakhounk vhoddlim-vhoddlim magnnim kortat. Tankam dusream poros anik khor* xikxa mellttoli.”

21 Uprant Jezun dan pettie-xim nodor marli tednam girest lok tantunt aplem dan ghaltat tem polloilem. 2 Tednam Jezun gorjek sampoddlole eke vidvek, samke unnea molache don nanne* ghalta tem polloilem, 3 ani tannem mhunnttlem: “Hanv tumkam khorench sangtam hea gorib vidven dusrea sogleam poros chodd ghatlem. 4 Karonn sogleamnim aplea lagim aslolea girestkaientlem dan dilem, punn hi vidva itli gorib asonui tinnem tichea lagim aslem titlem-i ghatlem.”

5 Uprant, Devmondir sobit fatramnim ani bhettoilʼlea vostumnim koxem nettoilam tea vixim thodde zann uloitale tednam 6 tannem mhunnttlem: “Oxe dis ietole jednam tumi heo sogleo vostu polloitat tancho ekui fatracher-fator urchona. Sogle fator sokol poddttole.” 7 Tednam tannim taka vicharlem: “Guruji, hem soglem kednam ghoddttolem ani heo sogleo vostu ghoddpacho vell pavla tachi khunna kitem astoli?” 8 Tannem mhunnttlem: “Tumi fosona zaunk chotrai dhorat, karonn zaite lok mhojea nanvan ietole ani ‘Hanvuch to,’ ani, ‘Tharailʼlo vell lagim pavlo,’ mhunn sangtole. Punn tanchea fattlean vochonakat. 9 Tumi zhuzancho avaz ani goddbodda* vixim aikotat tednam bhienakat. Karonn hem soglem poilim ghoddonkuch zai, punn xevott rokddoch zaunchona.”

10 Uprant tannem sanglem: “Ek raxttr dusrea raxttracher, ani ek raj dusrea rajeacher zhuz kortolem. 11 Veg-vegllea zageancher vhodd bhuimkamp zatole. Toxench bhuk poddttoli ani pidda posortoli, bhirankull ghoddnneo dixtti poddttoleo ani mollbar vhodd khunna distoleo.

12 “Punn heo sogleo vostu ghoddchea poilim lok tumkam dhorun ditole ani tumkam dhumallo ditole. Te tumkam sobha-ghoramnim vhortole ani bondkhonnint uddoitole. Mhojea nanva khatir tumkam razam ani razpalam mukhar ube kortole. 13 Hea udexim tumkam govai diunk ek sondhi mellttoli. 14 Dekhun tumchi rakhonn korunk tumi kitem uloitolim tem poilinch toiar korchimnant mhunn tumchea kallzant ghott nichov korat. 15 Karonn hanv tumkam oxim utram ani zannvai ditolom ki tumche sogle virodhi ek zalear pasun tanchean tumcho virodh korunk zaunchona vo tumchea add ulounk zaunchem na. 16 Titlench nhoi, tumchim avoi-bapui, bhav, soirim-dairim, ani ixttam tumkam dhorun ditolim* ani tumchea modlea thoddeank marun uddoitolim. 17 Ani mhojea nanva khatir soglo lok tumcho dves kortolo. 18 Punn tumchea toklecho ek kens pasun poddchona. 19 Tumi thir ravlim zalear tumi tumcho jiv vachounk pavtolim.

20 “Soinikamnim Jeruzalem xarak gherav ghatlolo tumi polloitole tednam tacho nas lagim pavla mhunn zannam zaiat. 21 Tea vellar Judeiant asat tannim dongrar pollon vochonk suru korchem. Jeruzalemachea bhitor asat tannim tem xar soddun voichem ani kheddea ganvamnim asat tannim Jeruzalemant bhitor sorchem nhoi. 22 Karonn boroilʼleo asat teo sogleo vostu purnn zaunchea khatir te zhoddtti ghevpache* dis astole. 23 Jeo bailo gorbest asat ani jeo bailo bhurgeank dudh ditat tanche pasot he dis kitle bhirankull astole! Karonn desacher vhodd sonkoxtt ietolem ani hea lokancher rag pettʼttolo. 24 Tankam tolvarin marun uddoitole ani koidi korun soglea raxttrant vhortole ani raxttrancho* tharailʼlo kall purnn zaisor raxttram* Jeruzalemak paim-am ponda maddoitolim.

25 “Toxench suriacher, chondrimacher ani noketrancher khunna distoli ani doria gorozta ani lharam uchamboll zatat dekhun prithumechim raxttram sonkoxttant poddttolim ani kitem korchem tem tankam kollchem na. 26 Prithumecher anik kitem-kitem zatolem tem chintun ani bhieun lokanchea jivant-jiv urchona, karonn mollbar asat teo xokteo haltoleo. 27 Uprant te munxachea Putak xokten ani vhodd mhoimen eka kupacher ieta to polloitole. 28 Punn heo sogleo vostu ghoddttat tednam tumi tumchi tokli voir ubarun nitt ubim ravat, karonn tumchea suttkecho vell lagim pavlo.”

29 Jezun tankam ek vopar sangli: “Anjirachea zhaddak ani dusrea soglea zhaddank polloiat. 30 Tankam novim panam ietat tem tumi polloitat tednam gim lagim pavla mhunn tumkam kollon ieta. 31 Toxench, heo vostu ghoddttat tem tumi polloitat tednam Devachem Raj laginch asa mhunn zannam zaiat. 32 Hanv tumkam khorench sangtam, sogleo vostu ghoddon ieum poriant hi pillgi koxich morchina. 33 Mollob ani prithum na zatoli punn mhojim utram sodankal urtolim.

34 “Punn tumi tumcher dhean diat, na zalear hispa bhair khaun ani pieun ani jivitachea uskeank lagon tumchim kallzam zodd zatolim ani to dis tumcher okosmat ietolo. 35 Eka fasa sarko to ietolo.  Karonn to dis prithumer ravtolea soglea lokancher ietolo. 36 Taka lagon jeo vostu ghoddcheo asat tantuntlean salvar zaunk ani munxachea Puta mukhar ubim ravonk zagrut ravat ani dor eka vellar magnnem ani kallzantlean vinovnneo korit ravat.”

37 Hea toren Jezu disacho Devmondirant xikoitalo, punn ratchea vellar to xarachea bhair Zoitun nanvachea dongrar vochon ravtalo. 38 Sogle lok tachem aikonk sokallim fuddench tachea lagim Devmondirant ietale.

22 Khomir Naslolea Unddeachi Porob, zaka Pask mhunnttat, ti lagim pavloli. 2 Tednam mukhel iadnik ani xastri Jezuk marun uddounk ek bori sondhi sodhunk lagle, karonn te lokank bhietale. 3 Uprant Soitanan Iskariot mhunnttlolea Judasachea kallzacher probhav ghatlo, zo Bara zannam* modlo ek aslo. 4 Tednam Judas, Jezucho ghat korun taka koso dhorun diunk zata hea vixim ulounk mukhel iadnik ani Devmondirachea odhikaream lagim gelo. 5 Tednam te ekdom khuxal zale ani taka chandiche nanne diunk toiar zale. 6 Tor Judas toiar zalo ani bhonvtonnim lok na toslea eka vellar Jezuk dhorun diunk to ek bori sondhi sodhunk laglo.

7 Atam Khomir Naslolea Unddeachea Porbecho poilo dis ailo, jednam Paskachem bolidan bhettounchem aslem. 8 Tor Jezun, Pedruk ani Juanvak oxem sangon dhaddle: “Vochat ani amchea pasot Paskachem jevonn jevunk toiari korat.” 9 Tannim taka vicharlem: “Ami khoim vochon tem toiar kelʼlem tuka zai?” 10 Tannem mhunnttlem: “Tumi xarant bhitor sortole tednam ek munis matiechea kollxant udok vhortana tumkam mellttolo. Tachea fattlean vochat ani to jea ghorant bhitor sorta thoim bhitor sorat. 11 Ani tea ghorachea dhoniak mhunnat, ‘Gurujin vicharlam: “Mhojea xisam sangata Paskachem jevonn jevunk rum khoim asa?”’ 12 Ani to munis tumkam, mallier jevnnak toiar kelʼlo ek vhoddlo rum dakhoitolo. Thoim toiari korat.” 13 Tednam te gele ani zoxem Jezun sanglolem toxench polloilem, ani tannim Paskachi toiari keli.

14 To vell ailo tednam Jezu aplea apostlam sangata jevnnak boslo. 15 Tannem tankam mhunnttlem: “Hanv koxtt soschea adim hem Paskachem jevonn tumchea borabor jevunk mhaka khub itsa asli. 16 Hanv tumkam sangtam, haka* mellon asloleo sogleo vostu Devachea Rajeant purnn zai poriant hanv hem porot jevcho na.” 17 Uprant ek pelo gheun tannem magnneant Devache upkar attoile ani mhunnttlem: “Ho gheiat ani tumi sogle ek-ek korun hantuntlem pieiat, 18 karonn hanv tumkam sangtam, Devachem Raj ieum poriant hanv ho drakxancho soro portun kednanch pieunchom na.”

19 Uprant tannem ek unddo ghetlo, ani magnneant Devache upkar attoun to moddlo, ani to tankam diun tannem mhunnttlem: “Ho mhojea kuddik suchit korta, ji tumchea pasot bhettounchi asa. Mhozo ugddas korun oxench korit ravat.” 20 Teach bhaxen, sanjechem jevonn zalea uprant tannem pelo ghetlo ani mhunnttlem: “Ho pelo novea korarak suchit korta, zo mhojea rogta udexim stapon kela. Hem rogot tumchea pasot varounchem asa.

21 “Punn polloiat! Mhozo ghat ghetolo to mhojea borabor mezar asa. 22 Khorench, munxachea Puta vixim zoxem tharailam teach pormonnem to voitolo; punn zo munis tacho visvasghat korun taka dhorun ditolo tacher hai!” 23 Tor, oxem konn kortolo kai mhunn te tanchea modem ulounk lagle.

24 Teach vellar, tanchea modem konn vhodd kai mhunn tanchea bhitor mottʼtto vad-vivad zalo. 25 Tannem tankam mhunnttlem: “Raxttranche raza lokancher aplo hukum choloitat, ani dusreancher zankam odhikar asta, tankam lok khas nanvam* ditat. 26 Punn tumchea modem oxem zaunchem nhoi. Tachea bodlek, zo tumchea modem sogleant vhodd asa tannem sogleant lhan zauncho, ani zo fuddakar gheta tannem sevok koso zauncho. 27 Karonn konn vhoddlo? Mezar jevnnak bosla to vo seva korta to? Mezar jevnnak bosla to nhoi? Punn hanv tor tumchea modem sevok koso asam.

28 “Punn tumi mhojea koxttanchea vellar mhojea sangata ravleat. 29 Bapan zoso mhojea sangata ek korar kela tosoch hanv tumchea sangata rajeacho ek korar kortam, 30 jea vorvim tumi mhojea Rajeant mhojea mezar khatole ani pietole, ani xinvasonar boson Izraelachea 12 kullancher neai kortole.

31 “Simanv, Simanv, polloi! Ek munis gonv fafuddtta tosoch Soitan tumchea thaim korunk sodhta. 32 Punn tuzo visvas unno zaina zaunk hanvem kallzantlean vinovnni kelea. Tum poschatap korun porot ailea uprant tujea bhavank ghottai di.” 33 Punn Pedrun taka mhunnttlem: “Guruji, hanv tujea borabor bondkhonnint vochonk ani moronk pasun toiar asam.” 34 Punn Jezun mhunnttlem: “Pedru, hanv tuka sangtam, aiz tum mhaka tin pavtti nakarlea bogor kombo sad ghalchona.”

35 Tannem tankam oxem-i mhunnttlem: “Hanvem tumkam poixanchi poti, jevnnachi poti ani zotim nastana dhaddle tednam tumkam kitem-i unnem zalem?” Tannim mhunnttlem: “Na!” 36 Uprant tannem tankam sanglem: “Punn zachea lagim poixanchi poti asa tannem ti gheunchi, toxench tannem jevnnachi poti gheunchi, ani zachea lagim tolvar na tannem aple kopdde vikun ek tolvar gheunchi. 37 Karonn hanv tumkam sangtam, jem boroilʼlem asa tem mhojea sovem ghoddonk zai, ‘Tim taka patkeam modlo ek patki koso lekhtolim.’ Atam hem mhojea sovem purnn zata.” 38 Uprant tannim mhunnttlem: “Somia, polloi! Hanga don tolvari asat.” Tannem tankam mhunnttlem: “Titleoch puro.”

39 Uprant, thoim thaun bhair soron to aple sonvoim-e pormonnem Zoitunanchea Dongrar gelo, ani tache xisui tachea fattlean gele. 40 Thoim pavlea uprant tannem tankam mhunnttlem: “Tallnnent poddona zaunk magnnem korit ravat.” 41 To tanchea thaun matso pois* gelo ani dimer poddon oxem magnnem korunk laglo: 42 “Bapa, tuka zai zalear ho pelo mhojea thaun pois kor. Tori punn, mhoje khuxe pormonnem nhoi, punn tuje khuxe pormonnem zaum.” 43 Uprant sorgar thaun ek devdut tachea lagim ailo ani tannem taka ghottai dili. 44 Punn tachem mon itlem dukhi zalʼlem ki to kallzantlean anik magnnem korunk laglo, ani tacho gham rogtachea thembeam porim zomnir gollonk laglo. 45 To magnnem korun utthlea uprant xisam lagim gelo, ani tannem polloilem ki te nhidleat, karonn te khontibhorit zaun khub thoklole. 46 Tannem tankam mhunnttlem: “Tumi kiteak nhidleat? Utthat, ani tumi tallnnent poddona zaunk magnnem korit ravat.”

47 To uloita astanach lokancho ek zomo ailo, zaka Judas nanvachea eka munxan haddlolo. To Bara zannam modlo ek aslo. Jezucho umo gheunk to tachea lagim ailo. 48 Punn Jezun taka mhunnttlem: “Judas, tum munxachea Putacho umo gheun taka dhorun dita?” 49 Kitem ghoddpachem asa tem polloilea uprant Jezu borabor asloleamnim mhunnttlem: “Somia, ami amcheo tolvari uzar korum?” 50 Tanchea modlea eklean tolvarin mha-iadnikachea sevokacho uzvo kanuch katrun uddoilo. 51 Punn Jezun mhunnttlem: “Atam puro.” Ani tannem tea sevokachea kanak hat lavun taka boro kelo. 52 Uprant Jezun apleak dhorunk ailolea mukhel iadnikank, mondirachea odhikareank ani vhoddilank oxem mhunnttlem: “Mhaka tumi tolvari ani dandde gheun dhorunk aileat te, hanv vhoddlo chor kitem? 53 Hanv sodanch tumchea borabor Devmondirant aslom tednam tumi mhaka dhorunk na. Punn ho tumcho ani kallkhacho odhikar cholouncho vell.”

54 Tednam tannim taka dhorlo ani mha-iadnikachea ghora vhelo; punn Pedru matso pois ravon tanchea fattlean vochot ravlo. 55 Te angnnant uzo pettoun xekonk boslole tednam, Pedru pasun tanchea modem aslo. 56 Punn eke chakornin taka ujea mukhar boslolo polloilo, ani tacher barik nodor marun tinnem mhunnttlem: “Ho munis pasun tachea borabor aslo.” 57 Punn tannem hem nakarun mhunnttlem: “Hanv taka vollkhona.” 58 Anik thoddea vella uprant anik eka munxan taka polloilo ani mhunnttlem: “Tum-ui tanchea modlo eklo.” Punn Pedrun mhunnttlem: “Na, hanv to nhoi.” 59 Sumar ek vora uprant anik eka dadlean taka polloilo, ani khatren oxem mhunnonk laglo: “Dubhava vinnem ho munis pasun tachea borabor aslo, karonn to ek Galiliekar!” 60 Punn Pedrun mhunnttlem: “Tum kitem uloita tem hanv nokllo.” Ani rokddoch to uloita astanach, kombean sad ghatlo. 61 Tednam Somian vollon Pedruk polloilo, ani Pedruk Somiachea utrancho ugddas ailo, “Aiz kombean sad ghalchea poilim, tum tin pavtti mhaka nakartolo.” 62 Ani bhair vochon to dukamnim roddonk laglo.

63 Jea lokamnim Jezuk dhorun vhelʼlo te tachim fokannam korunk lagle, ani taka marunk lagle; 64 te tachem tondd dhampun taka vicharunk lagle: “Sang amkam! Tuka konnem marla?” 65 Te tachea add zaitem uloitale.

66 Dis uzvaddlo tednam lokanche vhoddil ektthaim zale. Tanchea modem mukhel iadnik ani xastri asle. Tannim Jezuk aplea Mha-sobhent* vhelo ani taka vicharlem: 67 “Tum Krist zalear amkam sang.” Punn tannem tankam mhunnttlem: “Hanvem sanglem zalear pasun, tumi koxech manun gheunche nant. 68 Ani hanvem tumkam kitem-i vicharlem zalear, tumi zobab diunche nant. 69 Punn, atam thaun munxacho Put Devachea uzvea hatak bostolo.” 70 Hem aikon tannim sogleamnim mhunnttlem: “Tor tum Devacho Put?” Tannem mhunnttlem: “Tuminch oxem mhunnttat.” 71 Tannim mhunnttlem: “Atam amkam anik sakxeanchi kiteak goroz asa? Karonn ami tacheach tonddantlean hem aikolam.”

23 Tednam te sogle utthle ani taka Pilata koddem gheun gele. 2 Thoim pavlea uprant te tacher arop ghalunk lagle: “Ho munis lokank sorkara add vochonk uksaita, Somrazak* tax farik korunk naka mhunn sangta, ani apunn Krist ani raza mhunn sangta.” 3 Tednam Pilatan taka vicharlem: “Tum Judevancho Raza?” Jezun zobab diun mhunnttlem: “Oxem tunch mhunntta.” 4 Tednam Pilatan mukhel iadnikank ani ektthaim zalʼlea sogleank mhunnttlem: “Hea munxan kitem-i guneanv kela oxem mhaka disona.” 5 Punn te anikui zor diun mhunnonk lagle: “Ho akʼkhea Judeiant, mhunnttlear Galilie thaun hanga poriant lokank xikoun uksaita.” 6 Hem aikon Pilatan ho munis Galiliecho kai mhunn vicharlem. 7 To Herodachea* odhikara khala aslolea vattarant ravta mhunn khatri kelea uprant Pilatan taka Heroda koddem dhaddlo. Tea disamnim Herod Jeruzalemantuch aslo.

8 Jezuk polloun Herod khub khuxal zalo karonn khub tempa thaun to taka pollounk sodhtalo. Herodan tachea vixim zaitem aikolʼlem, ani Jezu aplea mukhar kitem-i vizmit korun dakhoitolo oxem taka distalem. 9 Tea pasot Herod taka zaito vell prosn vicharit ravlo, punn Jezun kainch zobab diunk na. 10 Tori astana, mukhel iadnik ani xastri porot-porot ube ravon ragan tacher arop ghalunk lagle. 11 Tednam Herodan aplea soinikam sangata mellon tacho opman kelo, ani taka ek mharog kopddo ghalun tachim fokannam kelim. Uprant, taka porot Pilata koddem dhaddlo. 12 Teach disa Herodachi ani Pilatachi ixttagot zali. Hachea poilim te dogui eka-mekache dusman asle.

13 Uprant Pilatan mukhel iadnikank, odhikareank, ani lokank ektthaim kele 14 ani mhunnttlem: “Ho munis lokank sorkara add vochonk uksaita mhunn tumi taka mhojea lagim haddlolo. Polloiat! Hanvem tumchea mukharuch taka prosn vicharle, punn tumi lailʼlo arop khoro asa mhunn dakhounk mhaka ekui puravo mellonk na. 15 Ani Herodak pasun kainch puravo mellonk na, taka lagon tannem taka porot amchea lagim dhaddun dilo. Mornnachem formonn mari sarko tannem kainch guneanv korunk na. 16 Taka lagon hanv taka chabkamnim marun* soddun ditam.” 17 *—— 18 Punn ektthaim zalʼlo soglo lok bob marunk laglo: “Hea munxak marun uddoi,* ani amchea pasot Barabasak soddoi!” 19 (Sorkara add kam kelʼlem ani khun kelʼlo mhunn Barabasak bondkhonnint ghatlolo.) 20 Porot ek pavtt Pilat lokam lagim uloilo, karonn to Jezuk soddunk sodhtalo. 21 Tednam te mottea-mottean bob marun mhunnonk lagle: “Taka khambear* mar! Taka khambear mar!”* 22 Pilatan tisrea pavtti mhunnttlem: “Kiteak? Hea munxan kitem vaitt kelam? Mornnachem formonn mari sarkem tannem kainch korunk na; taka lagon hanv taka chabkamnim marun* soddun ditam.” 23 Punn te mottea-mottean bob marun, taka marun uddoi* mhunn magot ravle, ani tanchi bob vaddot geli. 24 Tanchi magnni purnn korchi mhunn Pilatan nirnnoi ghetlo. 25 Sorkara add gela ani khun kela mhunn bondkhonnint aslo tea munxak tannem suttka dili, ani tankam zai toxem korum mhunn Jezuk tanchea hatant ghatlo.

26 Te taka vhortale tednam tannim Simanv nanvachea eka munxak dhorlo. To Siren xarantlo aslo ani kheddea ganvantlean ietalo. Jezucho trasancho khambo* gheun tachea fattlean voichem mhunn tannim to tachea khandar dovorlo. 27 Tachea fattlean lokancho vhoddlo zomo cholon voitalo, tantunt bailo pasun asleo. Tim dukhi zaun aplem hoddʼddem boddoun Jezu pasot roddttalim. 28 Jezun fattlean vollon tea bailank polloilem ani mhunnttlem: “Jeruzalemachea dhuvamno, mhojea pasot roddom nakat. Tachea bodlek tumchea pasot ani tumchea bhurgeam pasot roddat. 29 Karonn polloiat! Osle dis ietole jednam lok mhunnttole, ‘Jeo bailo vanz asat, zannim bhurgeank zolm diunk na ani zannim bhurgeank dudh diunk na teo bailo khuxal!’ 30 Tednam lok dongrank mhunnttole, ‘Amcher poddat!’ ani porvotank oxem mhunnonk lagtole, ‘Amkam dhampat!’ 31 Zhaddam panchvim asat tednam oxem kortat zalear zhaddam sukhtat tednam kitem kortole?”

32 Tachea sangata anik don guneanvkari munxank mornnachem formonn marunk gheun voitale. 33 Te Kottʼttem mhunnttlolea zagear pavle tednam tannim Jezuk tea don guneanvkaream sangata khambear khillailo, eka guneanvkarak tachea uzveak ani dusreak tachea daveak. 34 Punn Jezun mhunnttlem: “Bapa, tankam bhogos, karonn te kitem kortat tem tankam khoborna.” Tannim tache kopdde aplea bhitor vanttun gheunk sorti ghatleo. 35 Lok thoim ube ravon hem polloitale. Punn odhikari oxem mhunnon tachim fokannam kortale: “Tannem dusreank salvar kele. To Devan dhaddlolo Krist ani tacho Vinchun Kaddlolo zalear tannem atam apnnakuch salvar korcho.” 36 Soinikamnim sudʼdha tachim fokannam kelim ani drakxancho ambott soro diun 37 taka oxem mhunnttlem: “Tum Judevancho Raza zalear tukach salvar kor.” 38 Ani tachea tokle voir oxem boroun lailem: “Ho Judevancho Raza.”

39 Tednam tachea sangata umkallailʼlea eka guneanvkaran taka tomnno marun oxem mhunnttlem: “Tum Krist nhoi? Toxem zalear tuka ani amkam-i salvar kor!” 40 Tednam dusrea guneanvkaran taka oxem mhunnon tapoilo: “Tuka-i tich khast favo zalea, torui tuka Devachi matui bhirant na? 41 Amkam ji khast favo zalea ti sarki asa, karonn ami kelam tacho porinnam ami bhogtat; punn hea munxan kainch chuk korunk na.” 42 Uprant tannem mhunnttlem: “Jezu, tum Raza zata tednam* mhozo ugddas kor.” 43 Jezun taka mhunnttlem: “Aiz hanv tuka khorench sangtam, tum mhojea borabor Sobit Bagent* astolo.”

44 Atam donparchim sumar bara* voram zalʼlim, tori astana akʼkhea desant kallokh poddlo, ani ho kallokh donparchim sumar tin* voram poriant urlo, 45 karonn surian uzvadd divop bond kelo. Uprant Devmondirantlo poddʼddo voir thaun sokol pinzon tache don kuddke zale. 46 Jezun mottʼttean avaz kelo ani mhunnttlem: “Bapa, hanv mhozo jiv tujea hatant ghaltam.” Oxem mhunnttlea uprant, tannem aplo jiv soddlo.* 47 Hem soglem ghoddlem tem soinikanchea odhikarean polloilem tednam tannem Devachi mhoima keli ani mhunnttlem: “Ho khorench nitivont munis aslo.” 48 Thoim ektthaim zalʼlea lokamnim hem soglem polloilem tednam te aplem hoddʼddem boddoit ghora porot gele. 49 Tache vollkhiche sogle lok matxe pois ube asle. Ani Galilie thaun tachea borabor ailʼleo teo bailo pasun thoim ubeo ravon hem soglem polloitaleo.

50 Thoim Juze nanvacho ek munis aslo, to Judevanchea Vhoddlea Neai-sobhecho vangddi aslo. To boro ani nitivont munis aslo. 51 (Hea munxan tanchea vaitt ievzonneank ani kamank tenko diunk naslo.) To Judeiantlea Arimathea xarantlo aslo, ani Devachea Rajeachi vatt polloitalo. 52 Tannem Pilata koddem vochon Jezuchi kudd magli. 53 Magir tannem Jezuchi kudd sokol denvoili ani ti nitoll kopddeant guttlaun khoddop foddun toiar kelʼlea eka dholint* dovorli. Tantunt azun poriant konnanchich kudd dovrunk nasli. 54 Ho Toiarecho dis aslo, ani Sabathacho dis suru zauncho aslo. 55 Punn Jezu sangata Galilie thaun ailoleo bailo pasun tachea fattlean geleo. Tannim taka dovorloli dhol* polloili ani toxench tachi kudd koxi dovorlea tem-ui polloilem. 56 Magir tim pormollit mosale ani tel toiar korunk porot gelim. Punn Kaidea pormonnem Sabathachea disa tannim visov ghetlo.

24 Punn sumanachea poilea disa, teo bailo toiar kelole pormollit mosale gheun sokallim fuddem dholi-xim* aileo. 2 Punn dholicher* lailʼlo to vhoddlo fator kuxik dhuklun dovorla mhunn tannim polloilem. 3 Tim bhitor gelim tednam tankam Somia Jezuchi kudd mellonk na. 4 Kitem zalem astolem kai mhunn tim chintʼta astananch okosmat don munis ieun tanchea fuddem ube ravle; tanche kopdde chokchoktale. 5 Teo bailo bhieleo ani tannim apli tokli voir kaddunk na. Tednam tea munxamnim mhunnttlem: “Zo jivont asa taka tumi meloleam modem kiteak sodhtat? 6 To hanga na, punn taka jivont kela. To Galilient aslo tednam tannem tumkam kitem sanglolem tem ugddas korat. 7 Tannem sanglolem, munxachea Putak patkeanchea hatant dhorun ditole ani taka khambear marun tacho jiv kaddttole, punn tisrea disa Dev taka jivont kortolo.” 8 Tednam tankam Jezuchea hea utrancho ugddas ailo. 9 Magir tim dholi* koddlean porot ailim ani jem kitem ghoddlolem tea vixim tannim Ikra zannank* ani urlolea sogleank sanglem. 10 Heo bailo mhunnttlear Magdalachi Marie, Juana, ani Jakobachi avoi Marie. Tanchea borabor dusreo bailo pasun asleo zannim hem soglem apostlank sanglem. 11 Punn apostlank ani dusrea xisank hem soglem pixeponn koxem dislem, ani tannim hea bailancher visvas dovrunk na.

12 Punn Pedru utthlo ani dhanvon dholi-xim* gelo. Tannem bagon bhitor polloilem tednam taka bhitor fokot to boro kopddo asa to dislo. Tor kitem ghoddlem astolem kai mhunn chintit to porot gelo.

13 Teach disa, don xis Emaus nanvachea eka ganvant voitale. To ganv Jeruzalema thaun sumar ikra kilometr* pois aslo. 14 Voita astana jem kitem ghoddlolem tea vixim te eka-meka lagim uloitale.

15 Te bhasabhas korta astananch, Jezu thoim ailo ani tanchea borabor cholonk laglo, 16 punn te taka vollkhonk nant. 17 Tannem tankam vicharlem: “Tumi choltam-choltam eka-meka borabor kitea vixim bhasabhas kortat?” Tednam te ravle. Tanchim tonddam ekdom dukhi aslim. 18 Kleopas nanvachea xisan taka mhunnttlem: “Jeruzalemant tum ekloch ravpi pordexi asa kai kitem? Fattlea thoddea disamnim hanga kitem-kitem ghoddlam tem tuka khoborna?”* 19 Tednam tannem tankam vicharlem: “Kitem zalem?” Tannim mhunnttlem: “Nazaretkar Jezu thaim kitem-kitem ghoddlem tem tunvem aikonk na? Tannem Deva mukhar ani lokam mukhar vhoddlim-vhoddlim kamam korun ani xikounn diun apunn ek provadi mhunn dakhoun dilem. 20 Ani amchea mukhel iadnikamnim ani odhikareamnim taka mornnachi xikxa diunk dhorun dilo, ani tannim taka khambear khillailo. 21 Punn ho munis Izraelak suttka ditolo mhunn ami axa dhorun asle. Ani heo sogleo ghoddnneo ghoddlear aiz tisro dis. 22 Titlench nhoi, amchea modlea thoddea bailamnim amkam jem sanglem tem aikon ami ojap zale. Karonn aiz sokallim tim dholi* lagim gelim tednam 23 tankam thoim tachi kudd mellonk na. Tannim ieun sanglem ki tankam ek ojapachi ghoddnni, mhunnche, devdut dixtti poddle, zannim tankam Jezu jivont zala mhunn sanglem. 24 Uprant amchea modle thodde tachea dholi* lagim gele, ani tea bailamnim sanglolem toxench tankam dixtti poddlem, punn to tankam dixtti poddlona.”

25 Tednam tannem tankam mhunnttlem: “Are somjikai naslolea munxamno, provadeanchea soglea utrancher visvas dovrunk tumkam itlem kotthin kiteak zata? 26 Kristan hem soglem sosun apleak mhoima melloun gheunk gorjechem naslem kai?” 27 Tannem Moizesachea pustokam thaun tem Provadeanchea Pustokam* poriant, mhunnche akʼkhea Devachea utrant tachea vixim jem kitem boroilʼlem, tea soglea utrancho orth tankam bariksannen somzailo.

28 Xevottak te voitale tea ganvam lagim pavle tednam apleak anik mukhar vochonk zai oxem Jezun dakhoilem. 29 Punn te taka porot-porot oxem mhunnonk lagle: “Amchea sangata rav, karonn atam sanz zalea ani rokddoch kallokh zatolo.” Tednam to tanchea sangata ravonk tanchea ghora gelo. 30 To tanchea sangata jevnnak boslo tednam tannem unddo ghetlo, ani magnneant Devache upkar attoun to moddlo, ani tankam diunk laglo. 31 Tednam tanche dolle ugoddle ani te taka vollkhole; punn to tanchea mukhavoilo nanch zalo. 32 Te eka-mekak mhunnonk lagle: “Vatter to amchea lagim uloitalo tednam ani bariksannen Devachea utrancho orth somzaitalo tednam tachem aikon amchim kallzam lastalim nhoi?” 33 Te teach vellar utthon Jeruzalemant porot aile, ani tannim tea Ikra zannank dusrea xisam borabor ektthaim zaleat tem polloilem. 34 Te mhunnttale: “Somi jivont zala hem khorem, to Simanvak dixtti poddla!” 35 Uprant tannim pasun vatter kitem ghoddlolem tea vixim tankam sanglem ani to unddo moddttalo tem polloun tannim taka koso vollkholo tem-ui sanglem.

36 Te hea vixim uloita astananch, Jezu tanchea modem ieun ubo ravlo ani tannem mhunnttlem: “Tumkam xanti mellom.” 37 Punn te khub bhiele ani ghaborle, karonn tannim to ek devdut mhunn chintlem. 38 Tednam tannem tankam mhunnttlem: “Tumi kiteak bhietat, ani tumchea monant kiteak dubhavtat? 39 Mhoje hat ani mhoje paim polloiat, hanvuch to; mhaka hat laiat ani polloiat. Tumi polloitat toxem devdutank hadd-mas asona.” 40 Oxem mhunnon tannem tankam aple hat ani paim dakhoile. 41 Punn te itle khuxal ani ojap zalʼle ki tednam pasun te tacher visvas dovorna zale. Tor tannem tankam mhunnttlem: “Tumchea lagim khaunk kitem-i asa?” 42 Tannim taka bazlolea nusteacho ek kuddko dilo. 43 Tannem to ghetlo ani tanchea sogleam mukhar to khalo.

44 Uprant tannem tankam mhunnttlem: “Ugddas asa, hanv tumchea sangata aslom tednam hem soglem hanvem tumkam sanglolem. Moizesa udexim dilʼlea Kaideant, Provadeanchea Pustokamnim ani Stotrant mhojea vixim jem kitem boroilʼlem tem soglem purnn zavop gorjechem mhunn hanvem tumkam sanglolem.” 45 Tednam Devachea utrant boroilʼlea vostuncho orth tannem tankam bore bhaxen somzailo,* 46 ani tankam mhunnttlem, “Boroilʼlem asa: ki Krist tras sostolo ani Dev taka tisrea disa jivont kortolo. 47 Magir, patkachem bhogsonnem mellonk, tachea nanvan poschatap korat mhunn Jeruzalema thaun suru korun—soglea raxttramnim porgottnni zatoli. 48 Tumi hea ghoddnneachi govai diunk zai. 49 Ani polloiat! Mhojea Bapan utor dilʼlea pormonnem hanv tumkam ti xokti dhaddttam. Punn voir thaun ti xokti tumkam mello poriant tumi heach xarant ravat.”

50 Magir to tankam xarantlean bhair Bethanient gheun ailo, ani aple hat ubarun tannem tankam besanv dilem. 51 Besanv ditana to tanchea thaun pois zalo, ani Devan taka sorgar vhelo. 52 Tannim taka bagon nomoskar kelo ani te khuxalkaien Jeruzalemant porot gele. 53 Te dor disa Devmondirant Devachi vakhannʼnni korit ravle.