JUANVA PORMONNEM BORI KHOBOR

1 Survatek Xobd aslo, ani Xobd Deva sangata aslo, ani Xobd ek dev* aslo. 2 Hoch survatek Deva sangata aslo. 3 Sogleo vostu tacheach vorvim rochleo, ani tachea vorvim rochunk na oxi ekui vost na.

4 Tachea udexim jiv ghoddon ailo, ani jiv munxam pasot uzvadd aslo. 5 Ho uzvadd kallkhant porzolltta, ani kallokh tacher zoit vhoronk xokona.

6 Devan dhaddlolo ek munis ailo; tachem nanv Juanv aslem. 7 Ho munis tea uzvadda vixim govai diunk ek sakxi koso ailo. Taka lagon, soglea toreche lok tachea vorvim bhavarth dovrunk xoktale. 8 Ho munis svota to uzvadd naslo, punn tea uzvadda vixim govai diunk ailʼlo.

9 Soglea torechea lokank khoro uzvadd dita to uzvadd sonvsarant ieuncho aslo. 10 To* sonvsarant aslo, ani sonvsar tachea udexim rochlo, punn sonvsaran taka vollkhonk na. 11 To aplea ghora ailo, punn tacheach lokamnim taka apnnaunk na. 12 Punn zannim taka apnnailo tea sogleank tannem Devachim bhurgim zaunk odhikar dilo, karonn tim tachea nanvacher bhavarth dovortalim. 13 Tancho zolm avoi-bapai udexim vo tanchea khuxe udexim* vo munxachea khuxe udexim zaunk na, punn Devachea khuxe udexim zalo.

14 Tor Xobd munis zalo ani amchea modem ravlo, ani ami tachi mhoima polloili, ti mhoima ji Bapachea ekleach putak asta; ani to Devache kurpen* ani sotan bhorlolo aslo. 15 (Juanvan hachea vixim govai dili, tannem mottʼttea avazan mhunnttlem: “Hoch to zachea vixim hanvem mhunnttlolem, ‘Mhojea fattlean ieta to mhojea mukhar pavlo, karonn to hanv ieunchea poilim thaun aslo.’”) 16 To svota bhorpur doien bhorlolo asa dekhun amkam sogleank tachea thaun chintunk zaina titli bhorpur doia mellʼllea. 17 Karonn Moizesa udexim amkam Kaido* mellʼllolo, punn favo nasloli doia ani sot amkam Jezu Krista udexim mellʼllem. 18 Khoincheach munxan Devak kednanch pollounk na, punn ekleach Putan zo ek dev zaun asa ani Bapak ekdom lagim* asa tannem amkam Bapa vixim somzailam.

19 Judevamnim Jeruzalema thaun iadnikank ani Levitank Juanva koddem, “Tum konn?” mhunn vicharunk dhaddle tednam tannem hi govai dili. 20 To zobab diunk fatti soronk na, punn tannem ukteponnim manun ghetlem ani mhunnttlem: “Hanv Krist nhoi.” 21 Tednam tannim vicharlem: “Tor tum konn? Elija?” Tannem mhunnttlem: “Na.” “Tum Provadeam modlo ieuncho aslo to eklo?” Tannem mhunnttlem: “Na!” 22 Tednam tannim vicharlem: “Tor tum konn? Amkam dhaddleat tankam zobab diunk lagon amkam sang. Tum tujeach vixim kitem mhunntta?” 23 Juanvan mhunnttlem: “Izaias provadean sanglolem, oronnʼnneant* ek mottʼtto avaz aikonk ieta, ‘Jehova* pasot vatt nitt korat,’ toch avaz hanv.” 24 Juanva lagim ailolea hea lokank Farizevamnim* dhaddlole. 25 Tannim taka vicharlem: “Tum Krist nhoi, Elija nhoi vo Provadi nhoi zalear tum bautizm kiteak dita?” 26 Juanvan zobab dilo: “Hanv udkant bautizm ditam. Punn tumchea modem oso eklo ubo asa zaka tumi vollkhonant, 27 to mhojea fattlean ieuncho asa, ani hanv tachea paim-anchim zotim pasun kaddunk purto na.” 28 Hem soglem Juanv bautizm ditalo thoim, mhunnche, Jordan nhoim-chea poltoddi, Bethanient ghoddlem.

29 Dusrea disa tannem Jezuk aplea lagim ieta to polloilo tednam tannem mhunnttlem: “Polloiat, Devacho Menddro zo sonvsarachim patkam kaddun uddoita! 30 Ho toch zachea vixim hanvem mhunnttlolem: ‘Zo mhojea fattlean ieta to mhojea fuddem gelo, karonn to hanv ieunchea poilim thaun aslo.’ 31 Mhaka-i tachea vixim khobor nasli, punn Izraelak tachi vollokh diunk lagon hanv udkant bautizm ditam.” 32 Juanvan hi pasun govai dili: “Sorgar thaun povitr xokti parvea bhaxen denvon ieta ti hanvem polloili, ani ti tacher ravli. 33 Hanv pasun hea vixim nokllom aslom, punn zannem mhaka udkant bautizm diunk dhaddla, tannench mhaka sanglem: ‘Jea konnancher, tum povitr xokti denvta ani ravta tem polloita, toch povitr xokten bautizm dita.’ 34 Hanvem hem polloilem, ani toch Devacho Put mhunn hanvem govai dilea.”

35 Dusrea disa, porot ek pavtt Juanv aplea don xisam sangata ubo aslo. 36 Tannem Jezuk thoim thaun voitana polloun mhunnttlem: “Polloiat, Devacho Menddro!” 37 Tachem aikon te donui xis Jezuchea fattlean vochonk lagle. 38 Jezun te aplea fattlean ietat mhunn vollon polloilem ani tankam mhunnttlem: “Tumkam kitem zai?” Tannim mhunnttlem: “Rabʼbi (zacho orth, “Guruji”), tum khoim ravta?” 39 Jezun tankam mhunnttlem: “Ieiat, ani polloiat.” Tor te tachea borabor gele, ani to khoim ravta tem polloilem; tednam donparchim sumar char voram* zalʼlim. Tea disa te tacheach borabor ravle. 40 Juanvachim utram aikon Jezu fattlean vochonk lagle tea dogam modlea ekleachem nanv Andre aslem zo Simanv Pedrucho bhav aslo. 41 Andre sogleant poilim aplo bhav Simanvak mellʼllo ani tannem sanglem: “Amkam Mesias (Mesias mhunnche, “Krist”) mellʼllo.” 42 Andre taka Jezu lagim gheun gelo. Jezun Simanvak polloilem ani mhunnttlem: “Tum Juanvacho put Simanv; tuka Kefas mhunnttole” (Grik bhaxen Kefas hem utor “Pedru” mhunn bhaxantor kortat).

43 Dusrea disa, Jezu Galilient vochonk sodhtalo. To Filipak mellʼllo tednam tannem taka mhunnttlem: “Mhozo xis zav.” 44 Filip Bethsaidacho aslo. Andre ani Pedru pasun thoinchech asle. 45 Filip Nathanaelak mellʼllo tednam tannem taka sanglem: “Moizesan zachea vixim Kaideant boroilʼlem, ani Provadeanchea Pustokant* zachea vixim boroilʼlem to amkam mellʼllo: To Nazaretantlea Juzecho put Jezu.” 46 Punn Nathanaelan taka mhunnttlem: “Nazareta thaun kitem-i borem ieunk xokta?” Filipan mhunnttlem: “Tum ieo ani polloi.” 47 Jezun Nathanaelak aplea koddem ieta to polloilo tednam tachea vixim mhunnttlem: “Polloiat, ho ek khoro Izraelitkar. Tachea bhitor koslench dhongiponn na.” 48 Tednam Nathanaelan taka vicharlem: “Tum mhaka koso vollkhota?” Jezun mhunnttlem: “Filipan tuka apounche poilim, tum anjirachea zhadda ponda aslo tednam hanvem tuka polloilʼlo.” 49 Tednam Nathanaelan taka mhunnttlem: “Rabʼbi, tum Devacho Put, Izraelacho Raza tum.” 50 Jezun mhunnttlem: “Hanvem tuka anjirachea zhadda ponda polloilo mhunn sanglem dekhun tum mhojer patieta? Tum hachea poros vhodd kamam polloitolo.” 51 Uprant Jezun taka sanglem: “Hanv tumkam sot tench sangtam, tumi mollob uktem zalʼlem ani Devache dut munxachea Puta lagim sokol denvtat ani voir voitat tem polloitole.”

2 Magir tisrea disa Galilientlea Kana ganvant kazarachem ek jevonn dovorlolem, ani Jezuchi avoi thoim asli. 2 Jezuk ani tachea xisank pasun kazarachem amontronn aslem.

3 Tancho drakxancho soro sompot ailo tednam Jezuchea avoin taka mhunnttlem: “Tancho drakxancho soro somplo.” 4 Jezun tika mhunnttlem: “Hea vixim mhaka ani tuka kiteak poddlam?* Mhozo vell azun ieunk na.” 5 Tache avoin sevokank mhunnttlem: “To tumkam sangta toxench korat.” 6 Thoim Judev lokanchea xudʼdh korpachea riti-rivaza pormonnem fatracheo sov moddkeo dovorloleo. Dor eke moddkent 44 tem 66 liter* udok voitalem. 7 Jezun tankam mhunnttlem: “Moddkeamnim udok bhorat.” Tannim moddkeo votosor bhorleo. 8 Uprant tannem mhunnttlem: “Atam hantuntlem thoddem kaddun jevnnachi dekhrekh korta tachea koddem gheun vochat.” Tednam te tachea koddem gheun gele. 9 Jevnnachi dekhrekh korpean drakxancho soro zalʼlem tem udok chakun polloilem, tannim to drakxancho soro khoim thaun haddlolo tem taka khobor naslem (punn moddkeamnim udok bhorpi sevokank tem khobor aslem), tednam tannem novreak apoilo 10 ani taka mhunnttlem: “Soglim boro drakxancho soro poilim ditat, ani lok pieun ttaitt zalea uprant holko soro ditat. Punn tunvem boro drakxancho soro azun pasun dovorla.” 11 Hea toren Jezun Galilientlea Kana ganvant poilem vizmit* kelem ani apli xokti dakhoili, ani xisamnim tacher bhavarth dovorlo.

12 Tea uprant Jezu, tachi avoi, tache bhav ani tache xis Kapernaumant gele, punn te thoim chodd dis ravonk nant.

13 Judevanchi Paskachi porob lagim pavloli dekhun Jezu Jeruzalemant gelo. 14 Thoim Devmondirant tannem gorvam, menddram ani parve vikpi, ani toxench poixe bodlun diupi mezam ghalun bosleat tem polloilem. 15 Tednam tannem doriancho ek chabuk kelo ani sogleank tanchea menddram ani gorvam sangata Devmondirantlean bhair dhanvddaun ghatle. Toxench tannem poixe bodolpeanche nanne xevttun uddoile ani tanchim mezam umtim uddoilim. 16 Tannem parve viktoleank mhunnttlem: “Hem soglem hanga thaun gheun vochat! Mhojea Bapachea ghorak bazar* korinakat!” 17 Tednam xisank tachea vixim boroilʼlim him utram ugddas zalim: “Tujea ghora pasot aslole urben lhasta mhojem kalliz.”

18 Hem polloun Judevamnim taka mhunnttlem: “Hem soglem korunk tuka odhikar asa mhunn dakhounk amkam tum khoinchi khunna dakhounk xokta?” 19 Jezun tankam zobab diun mhunnttlem: “Hea Devmondirak moddun uddoiat, ani hanv tin disam bhitor tem porot ubem kortolom.” 20 Tednam Judevamnim taka mhunnttlem: “Hem Devmondir bandunk 46 vorsam laglolim, ani tum tem tin disam bhitor ubem kortolo?” 21 Punn tannem Devmondir mhunnttlem tednam to aplea kuddi vixim uloitalo. 22 Jezu oxem mhunnttalo mhunn tachea xisank to meloleantlo jivont zalea uprant ugddas zalo, ani tannim Devachea utracher ani Jezun sanglolea utrancher visvas dovorlo.

23 Paskachea porbe vellar to Jeruzalemant aslo tednam tannem kel’lim vizmitam polloun zaitea lokamnim tachea nanvacher bhavarth dovorlo. 24 Punn Jezun tancher aplo purnn visvas dovrunk na karonn to tankam sogleank vollkhotalo 25 ani lokam vixim zannam zaunk taka konnench kainch sangpachi goroz nasli, karonn munxachea monant kitem asa tem taka khobor aslem.

3 Nikodemus nanvacho ek Farizev aslo. To Judev lokancho odhikari aslo. 2 To ratchea vellar Jezu lagim ailo ani tannem taka mhunnttlem: “Rabʼbi,* ami zannant ki tum Deva thaun ailʼlo xikxok, karonn eka munxa borabor Dev na zalear tum korta tosleo khunna to korunk xokchona.” 3 Jezun taka mhunnttlem: “Hanv tuka sot tench sangtam, konnui porot zolm ghena* tea meren to Devachem Raj pollounk xokona.” 4 Nikodemusan taka mhunnttlem: “Ek munis vhodd zalea uprant porot zolm koso gheunk xokta? To aplea avoichea kusveant porot vochon anik ek pavtt zolm gheunk xokta kai?” 5 Jezun taka mhunnttlem: “Hanv tuka sot tench sangtam, eklo udkant ani povitr xokten zolm ghena tea meren to Devachea Rajeant bhitor sorchona. 6 Kuddi thaun zolmola to kuddicho, punn povitr xokte thaun zolmola to sorgincho. 7 Tumi porot zolm gheunkuch zai, oxem hanvem mhunnttlem mhunn ojap zainakat. 8 Varem apleak zai thoim marta, ani tumkam tacho avaz ieta, punn tem khoim thaun ieta ani khoim voita tem tumkam khobor asona. Tor povitr xokten zolmola to dor eklo teach bhaxen asa.”

9 Hem aikon Nikodemusan oxem mhunnttlem: “Hem soglem koxem zaunk xokta?” 10 Jezun taka zap dili: “Tum Izraelacho ek xikxok zaunui hem soglem tuka khoborna? 11 Hanv tuka sot tench sangtam, jem kitem ami zannant tem ami sangtat, ani jem kitem ami polloilam tea vixim ami govai ditat, punn tumi amchi govai manun ghenant. 12 Hanv tumkam prithume voileo vostu sangtam tori tumi visvas dovornant, tor hanvem tumkam sorga voileo vostu sanglear tumi koxe visvas dovortole? 13 Itlench nhoi, zo sorga voilean sokol denvla tea munxachea Putak soddun anik konnuch munis sorgar vochonk na. 14 Zoso Moizesan oronnʼnneant* sorpak unch ubarun dovorlo teach bhaxen munxachea Putakui unch ubarun dovortole. 15 Hea udexim, tacher visvas dovortat tankam sogleank sasnachem jivit mellttolem.

16 “Karonn Devan sonvsaracho itlo mog kelo ki tannem aplea ekleach Putak dilo. Tacher bhavarth dovortat tea sogleancho nas zaina zaunk punn tankam sasnachem jivit mellchem mhunn tannem oxem kelem. 17 Devan aplea Putak sonvsarachi zhoddtti korchi mhunn sonvsarant dhaddunk na, punn tachea udexim sonvsar salvar zauncho mhunn tannem taka dhaddlo. 18 Zo tacher visvas dovorta tachi zhoddtti zaunchina. Punn zo tacher visvas dovorna tachi zhoddtti zali, karonn tannem Devachea ekleach Putachea nanvacher visvas dovrunk na. 19 Hacher adarit zhoddtti zatoli: sonvsarant uzvadd ailo, punn lokamnim uzvadd soddun kallkhacho mog kelo, karonn tanchim kamam noxttim aslim. 20 Zo konn vaitt kamam korta to uzvaddacho dves korta ani aplim kamam dixtti poddchim nhoi mhunn to uzvaddant iena. 21 Punn zo konn sarkem tem korta to uzvaddant ieta, karonn tannem kelam tem Devache khuxe pormonnem kelam mhunn dison ailʼlem taka zai.”

22 Tea uprant Jezu ani tache xis Judeiachea kheddea ganvamnim gele, ani thoim tannem tanchea sangata vell sarlo ani lokank bautizm dilo.* 23 Punn Juanvui Salima lagim Aenon nhoim-ent bautizm ditalo, karonn thoim zaitem udok aslem, ani lok tachea lagim ieit ravlo ani to tankam bautizm di-it ravlo; 24 karonn Juanvak tednam poriant bondkhonnint ghalunk naslo.

25 Ek pavtt Juanvachea xisam modem ani eka Judeva modem xudʼdhi korchea riti-rivaza vixim vad-vivad zalo. 26 Tor te Juanva lagim aile ani mhunnonk lagle: “Rabʼbi, zo munis Jordan nhoim-chea poltoddi tujea borabor aslo ani zachea vixim tunvem govai dilʼli to atam bautizm dita, ani sogle tachea lagim voitat.” 27 Juanvan mhunnttlem: “Devan dilea xivai ek munis koslich vost korunk xokona. 28 Hanvem dilʼli govai tumi zannant. Hanvem mhunnttlolem, ‘Hanv Krist nhoi, punn mhaka tachea poilim dhaddla.’ 29 Jea konnam lagim vhokol asa toch novro. Punn novreacho ixtt ubo ravon tacho avaz aikota tednam taka khub khuxalkai bhogta. Teach bhaxen, mhoji khuxalkai purnn zali. 30 To vaddot ravonk zai ani hanv unno zait ravonk zai, hem gorjechem.”

31 Zo voir thaun ieta to dusrea sogleam poros vorto asa. Zo sonvsara thaun ieta to sonvsaracho ani sonvsaracheo vostu uloita. Zo sorgar thaun ieta to dusrea soglea lokam poros vorto asa. 32 Tannem kitem polloilam ani aikolam tachi to govai dita, punn konnuch munis tachi govai manun ghena. 33 Jea konnem tachi govai manun ghetlea tannem Dev sot uloita mhunn khatri dilea.* 34 Deva thaun aila to Devachim utram sangta, karonn Dev apli povitr xokti thoddi-thoddi korun* dina. 35 Bap Putacho mog korta ani tannem soglem tachea hatant dilam. 36 Zo Putacher bhavarth dovorta taka sasnachem jivit mellttolem; ani zo Putachi adnea pallina taka jivit mellchem na, punn Devacho rag tacher urtolo.

4 Apunn* Juanva poros chodd lokank xis korun bautizm dita oxem Farizevanchea kanar poddlem mhunn Somiak kollʼllem. 2 Khorem mhunnttlear, Jezu svota bautizm dinaslo punn tache xis ditale. 3 Tednam to Judeiantlo bhair sorlo ani portun Galilient gelo. 4 Punn tannem Samarientlean vochop gorjechem aslem. 5 Tor to Samarientlea Sikar nanvachea xarant pavlo. Hem xar Jakoban aplea putak Juzek dilʼlea xeta lagim aslem. 6 Jakobachi baim pasun thoinch asli. Ani Jezu provas korun thoklolo dekhun tea baim-chea lagim* boslo. Tednam donparchim sumar bara voram* zalʼlim.

7 Thoim Samariechi ek bail udok vhoronk aili. Tednam Jezun tika mhunnttlem: “Mhaka udok pieunk di.” 8 (Karonn tache xis jevnnacheo vostu vikteo gheunk xarant gelʼle.) 9 Te Samarieche bailen taka mhunnttlem: “Hanv tor ek Samariekar bail. Tum ek Judev zaunui mhoje koddem udok koso magta?” (Karonn Judev lok Samariechea lokam lagim kainch natem dovornasle.) 10 Jezun tika mhunnttlem: “Devachea funkott dennea vixim tuka khobor asli, ani ‘mhaka udok pieunk di,’ oxem mhunnpi munis konn, hem tuka khobor aslem zalear tum svota tachea lagim udok magtoli asli, ani to tuka jivit dita toslem udok ditolo aslo.” 11 Tednam tea bailen mhunnttlem: “Tujea lagim tor udok kaddunk baldi na ani hi baim ekdom khol asa, tor tum mhaka jivit dita toslem udok khoim thaun ditolo? 12 Hi baim amkam amcho purvoz Jakoban dilʼli. To, tache put ani tache hindd heach baim-chem udok piele. Tor tum tachea poros vhodd kitem?” 13 Jezun tika zobab dilo: “Hem udok pieta tea dor ekleak porot tan lagta. 14 Punn zo konn hanv ditam tem udok pietolo taka porot kednanch tan lagchina. Jem udok hanv taka ditolom tem tachea bhitor zhor koxi zatoli ani sasnachem jivit diunk vhanvot ravtoli.” 15 Tednam tea bailen mhunnttlem: “Dhonia, mhaka tem udok di, oxe toren mhaka tan lagchina, ani mhaka udok vhoronk porot-porot hanga ieunk poddchem na.”

16 Tannem tea bailek mhunnttlem: “Voch, ani tujea ghovak gheun hanga ieo.” 17 Tea bailen mhunnttlem: “Mhaka ghov na.” Jezun tika mhunnttlem: “‘Mhaka ghov na,’ hem tunvem sarkem sanglem. 18 Karonn tuka panch ghov asle, ani atam tum jea dadlea borabor ravta to tuzo ghov nhoi. Hem tunvem khorem sanglem.” 19 Tednam tea bailen mhunnttlem: “Somia, tum khorench ek provadi astolo. 20 Amche purvoz hea dongracher bhokti kortale, punn tumi mhunnttat ki Jeruzalemuch to zago zaun asa jea zagear bhokti korunk zai.” 21 Jezun tika mhunnttlem: “Mhojer visvas dovor. Oso vell ieta jednam lok, nhoi mhunn dongracher ani nhoi mhunn Jeruzalemant Bapachi bhokti kortole. 22 Tumi nokllo astana bhokti kortat, punn ami zannam zaun bhokti kortat, kiteak taronn Judevam thaun suru zata. 23 Punn oso vell ieuncho asa ani to vell ailo, jednam khori bhokti kortat tim povitr xokten ani sota pormonnem Bapachi bhokti kortolim. Khorem mhunnttlear, oxech toren apli bhokti kortoleank Bap sodhta. 24 Devak konnuch pollounk xokona, ani tachi bhokti kortat tannim povitr xokten ani sotan tachi bhokti korunk zai.” 25 Tednam te bailen taka mhunnttlem: “Mesias, zaka Krist mhunnttat to ieuncho asa mhunn hanv zannam. To ietolo tednam amkam sogleo vostu ukteponnim sangtolo.” 26 Jezun tika mhunnttlem: “Hanvuch to, tuje koddem uloita to.”

27 Titlean tache xis porot aile ani to eke baile lagim uloita tem polloun ojap zale. Tori astana, tanchea modlea eklean pasun taka, “Tuka kitem zai?” vo “Tum he baile lagim kiteak uloita?” oxem vicharunk na. 28 Tednam ti bail aplo udkacho kollso thoinch dovrun xarant geli ani lokank sangonk lagli: 29 “Mhojea borabor ieiat ani tea munxak polloiat zannem hanvem jem kitem kelam tem soglem sanglem. Toch Krist nhoi nhu?” 30 Lok xarantlean bhair soron tachea lagim ieunk lagle.

31 Itlea mhunnosor, xis taka porot-porot oxem sangtale: “Rabʼbi,* kitem tori kha.” 32 Punn tannem tankam mhunnttlem: “Mhojea lagim oslem jevonn asa jea vixim tumkam khoborna.” 33 Tednam xis eka-mekak mhunnonk lagle: “Konnem-i tori taka kitem-i khaunk haddun dilam kai kitem?” 34 Jezun tankam mhunnttlem: “Zannem mhaka dhaddla tachi khuxi korop ani tannem dilʼlem kam purnn korop hench mhojem jevonn. 35 Lunvnni korunk anik char mhoine asat oxem tumi mhunnttat nhoi? Hanv tumkam sangtam: Xetancher nodor marun polloiat, tim pikleant ani lunvnni korunk toiar asat. 36 Lunvnni korpeak atam thaunuch disvoddo mellonk lagla ani to sasnachea jivitachem pik ektthaim korta, hea toren vompʼpi ani lunvpi dogui khuxal zatat. 37 Hea baptint hi mhunnʼnni khori zaun asa: Konn tori eklo vompta, ani dusroch lunvta. 38 Tumi vavr korunk na tachi lunvnni korunk hanvem tumkam dhaddleat. Dusreamnim vavr kelo, ani tanchea vavrachem tumkam foll melltta.”

39 “Hanvem jem kitem kelem tem soglem tannem mhaka sanglem,” oxi tea bailen govai dilʼli mhunnon tea xarantlea zaitea Samariekaramnim Jezucher bhavarth dovorlo. 40 Taka lagon Samarieche lok Jezu lagim aile tednam, amchea borabor rav mhunn tachea lagim vinoti korunk lagle, ani to thoim don dis ravlo. 41 Haka lagon, tachim utram aikon, anik zaitea lokamnim tacher bhavarth dovorlo, 42 ani te tea bailek mhunnonk lagle: “Atam ami fokot tunvem sanglam mhunnon nhoi; punn ami svota tachem aikolam, ani ho munis khorench sonvsar salvar korpi mhunn ami zannant, taka lagon ami bhavarth dovorla.”

43 Don disam uprant Jezu thoim thaun bhair sorlo ani Galilient gelo. 44 Punn provadeak tacheach ganvant man mellona mhunn tannem govai dili. 45 To Galilient pavlo tednam lokamnim taka ieukar dilo, karonn porbechea vellar tannem kelʼlim tim soglim kamam tannim polloilʼlim. Te lok pasun porbechea vellar Jeruzalemant asle.

46 Uprant Jezu Galilientlea Kana ganvant ailo, thoim tannem udkacho soro kelʼlo. Hanga razacho ek odhikari aslo, zacho put Kapernaumant duent aslo. 47 Hea munxan Jezu Judeiantlean Galilient aila mhunn aikolem tednam, to tachea lagim gelo ani aplea putak ieun boro kor mhunn tachea lagim vinoti korunk laglo, karonn tacho put morpak pavlʼlo. 48 Punn Jezun taka mhunnttlem: “Khunna ani vizmitam polloilea xivai tumi bhavarth dovorchinch nant.” 49 Razachea odhikarean taka mhunnttlem: “Somia, mhozo bhurgo morchea poilim mhojea borabor ieo.” 50 Jezun taka mhunnttlem: “Voch, tuzo bhurgo boro zalo.” Tea munxan Jezuchea utrancher visvas dovorlo, ani to thoim thaun gelo. 51 To vatter aslo tednanch tache sevok taka mellʼlle ani tacho put boro zala* mhunn tannim taka sanglem. 52 To kednam boro zalo kai mhunn, tannem tankam vicharlem. Tannim mhunnttlem: “Kal sumar ek voracher* tacho zor gelo.” 53 Tednam tea bhurgeachea bapaik heach vellar, “Tuzo bhurgo boro zalo,” oxem Jezun mhunnttlolem mhunn ugddas zalo. Taka lagon tannem ani tachea ghorantlea soglea lokamnim Jezucher bhavarth dovorlo. 54 Judeiantlean Galilient ailea uprant Jezun kelʼlem hem dusrem vizmit* aslem.

5 Tea uprant Judevanchi ek porob aili, ani Jezu Jeruzalemant gelo. 2 Jeruzalemant Menddreanchea Darvonttea lagim ek tollem asa, taka Hebrev bhaxen Bethzatha mhunnttat. Tea tolleachea charui vatten khambe asle ani tantuntlean cholon vochonk vatt asli. 3 Thoim zaite duent, kuddʼdde, longdde, ani opong lok asle. 4 *—— 5 Thoim ek munis aslo zo 38 vorsam thaun duent aslo. 6 Jezun tea munxak polloilo. To khub vorsam thaun duent asa mhunn taka khobor asli dekhun tannem taka vicharlem: “Tuka duensantlean boro zaunk zai?” 7 Tea duent munxan mhunnttlem: “Dhonia, udok halta tednam mhaka tolleant denvounk, mhojea borabor konn na, tor hanv thoim pavchea poilim dusro konn tori udkant denvta.” 8 Jezun taka mhunnttlem: “Utth! Tuji xendri ukol ani chol.” 9 To munis teach vellar boro zalo, ani tannem apli xendri ukolʼli ani cholonk laglo.

To Sabathacho dis aslo. 10 Taka lagon Judev lok tea borea zalʼlea munxak mhunnonk lagle: “Aiz Sabath, ani aichea disa tunvem xendri uklop sarkem nhoi.” 11 Punn tannem mhunnttlem: “Zannem mhaka boro kela tannench mhaka sanglam, ‘Tuji xendri ukol ani chol.’” 12 Tannim vicharlem: “‘Xendri ukol ani chol,’ oxem tuka konnem sanglam?” 13 Punn tea munxak apnnak konnem boro kelo tem khobor naslem, karonn Jezu holluch gordent nanch zalʼlo.

14 Tea uprant Jezuk to munis Devmondirant mellʼllo. Tannem taka mhunnttlem: “Polloi, atam tum boro zala. Tor hea fuddem tuka anik chodd vaitt zaina zaunk tum patok korinaka.” 15 Tednam to munis thoim thaun gelo, ani apleak boro korpi munis Jezu aslo mhunn tannem Judevank sanglem. 16 Haka lagon Judev lok Jezuk dhumallo* diunk lagle, karonn to Sabathachea disa hem soglem kortalo. 17 Punn Jezun tankam mhunnttlem: “Mhozo Bap azun kam korit asa, ani hanv pasun kam korit ravtam.” 18 Haka lagon, Judev lok taka marun uddounk anikui sondhi sodhunk lagle. Karonn to fokot Sabath moddi naslo punn apunn Devacho Put, oxem mhunnon apunn Deva sarko oxem dakhounk sodhtalo.

19 Taka lagon Jezun tankam mhunnttlem: “Hanv tumkam sot tench sangtam, Put apunn zaun kainch korunk xokona, punn to jem aplo Bap kortana polloita tench korta. Karonn Bap jem korta, teach toren Put pasun korta. 20 Bap Putacho khub mog korta, ani to apunn jem korta tem soglem Putakui dakhoita, ani tumi ojap zaunk lagon to hachea poros anikui vhodd-vhodd kamam taka dakhoitolo. 21 Zoso Bap meloleank jivont korta ani tankam jivit dita, tosoch Put pasun apleak zai tankam jivont korta. 22 Bap konnanchich zhoddtti korina, punn tannem zhoddtti korpachi zobabdari aplea Putak dilea. 23 Bapan oxem kelam karonn sogle Bapak man ditat toxench sogleamnim Putakui man dilolo taka zai. Zo Putak man dina to taka dhaddla tea Bapakui man dina. 24 Hanv tumkam sot tench sangtam, zo mhojem utor aikota ani mhaka dhaddla Tacher bhavarth dovorta taka sasnachem jivit melltta, ani tachi zhoddtti zaina punn to mornnantlean jivont zata.

25 “Hanv tumkam sot tench sangtam, oso vell ieuncho asa; khoreponnim to vell ailo, jednam melolim Devachea Putacho avaz aikotolim, ani zannim tachem aikolem ani pallʼllem tim jietolim. 26 Karonn zoxi Bapa lagim jivit diupachi xokti asa,* toxich tannem aplea Putak pasun jivit diupachi xokti dilea. 27 Ani tannem taka zhoddtti korpacho odhikar dila, karonn to munxacho Put. 28 Hem aikon ojap zainakat, karonn oso vell ieta jednam fonddamnim* asat tim soglim tacho avaz aikotolim 29 ani bhair ietolim, zannim borim kamam keleant tankam sasnachem jivit mellonk tim jivont zatolim, ani zannim vaitt kamam keleant tanchi zhoddtti zaunk tim jivont zatolim. 30 Hanv mhaka zai toxem ekui kam korunk xokona. Punn zoxem hanv mhojea Bapa koddlean aikotam, toxich hanv zhoddtti kortam. Hanv ji zhoddtti kortam ti sarki asa, karonn hanv mhoji nhoi punn mhaka dhaddla tachi khuxi purnn korunk sodhtam.

31 “Hanvem ekleanuch mhojea vixim govai dili zalear ti govai sarki nhoi. 32 Anik eklo asa zo mhojea vixim govai dita, ani mhojea vixim to ji govai dita ti sarki asa mhunn hanv zannam. 33 Tumi Juanva koddem munis dhaddle, ani tannem sota vixim govai dili. 34 Munxachea govaikechi mhaka goroz na, punn tumi salvar zaunchim mhunn heo sogleo vostu hanv tumkam sangtam. 35 To munis porzolltta ani zolltta toslo divo aslo, ani thoddea vellak lagon tachea uzvaddant khuxal zaunk tumi toiar asle. 36 Punn Juanvan dilea tachea poros bori govai mhojea lagim asa, jim kamam mhojea Bapan mhaka purnn korunk dileant, ani jim kamam hanv kortam tim kamam mhaka Bapan dhaddla mhunn mhojea vixim govai ditat. 37 Ani jea Bapan mhaka dhaddla tannem svota mhojea vixim govai dilea. Tumi kednanch tacho avaz aikonk na ani to koso dista tem pollounkui na, 38 ani tachem utor tumchea kallzant riglolem na, karonn zaka Bapan dhaddla tacher tumi bhavarth dovornant.

39 “Tumi Devachea utracho obheas kortat karonn oxem kelear tumkam sasnachem jivit mellttolem mhunn tumkam dista; hich* mhojea vixim govai zaun asa. 40 Tori astana, jivit mellchea khatir tumi mhojea lagim ieunk sodhinant. 41 Hanv munxam thaun mhoima gheunk sodhina, 42 punn hanv bore bhaxen zannam ki tumchea bhitor Deva pasot mog na. 43 Hanv mhojea Bapachea nanvan ailam, punn tumi mhaka manun ghenant. Punn dusro konnui apleach nanvan ailo zalear tumi taka manun ghetole asle. 44 Tumi eka-meka thaun mhoima ghetat ani ekleach Deva thaun ieta ti mhoima tumkam naka, tor tumi koxe manun ghetole? 45 Hanv tumcher Bapa mukhar boglantt ghaltolom oxem chintinakat; tumcher boglantt ghaltolo eklo asa, to mhunnttlear, Moizes, zacher tumi bhorvonso dovorla. 46 Khorem mhunnttlear, tumi Moizesacher patietale zalear tumi mhojerui patieta asle, karonn tannem mhojea vixim boroilʼlem. 47 Tumi tannem kitem boroilam tacher patiena zalear hanv kitem sangtam tacher koxe patietole?”

6 Tea uprant Jezu Galili vo Tiberias Doriachea poltoddi gelo. 2 Ani lokancho ek vhodd zomo tachea fattlean gelo, karonn to koxe toren vizmitam* korun lokank duensantlim borim korta tem tannim polloilʼlem. 3 Uprant Jezu dongrar gelo ani aplea xisam sangata thoim boslo. 4 Judevanchi Paskachi porob lagim pavloli. 5 Jezun apli nodor voir korun polloilem tednam lokancho ek vhodd zomo aplea lagim ieta to taka dislo, ani tannem Filipak vicharlem: “Ami hea lokank khaunk undde khoim thaun vikte haddttole?” 6 Punn tachi porikxa gheunk Jezun oxem mhunnttlem, karonn thoddeach vellan apunn kitem kortolo tem to zannam aslo. 7 Filipan taka zobab dilo: “Dor ekleak unddeache ilʼle-ilʼle kuddke dilear pasun donxim dinaranche* undde-i tankam pavchenant.” 8 Tednam xisam modlea eklean, mhunnche Simanv Pedrucho bhav Andren taka mhunnttlem: 9 “Hanga ek lhan cheddo asa, tachea lagim panch undde ani don nustim asat. Punn hanga ektthaim zalʼlea itlea vhoddlea lokanchea zomeak itlench koxem pavtolem?”

10 Jezun mhunnttlem: “Lokank bosonk sangat.” Tea zagear bhorpur tonn aslem, taka lagon lok thoim susegad bosle. Tea lokam modem sumar 5,000 dadle asle. 11 Tednam Jezun te undde ghetle, ani magnneant Devache upkar attoun te lokank vanttle; uprant tannem tim lhan nustim-i vanttlim, dor ekleak zai titlem dilem. 12 Sogleamnim pottbhor khalea uprant tannem xisank mhunnttlem: “Kainch ibadd zaina zaunk urlole kuddke ektthaim korat.” 13 Taka lagon panch unddeantlean sogleamnim khalea uprant urlole kuddke ektthaim kele tednam 12 panttleo bhorleo.

14 Tannem kelʼlem vizmit polloilem tednam lok oxem mhunnonk lagle: “Zo Provadi sonvsarant ieuncho aslo to hoch.” 15 Uprant, lok apleak dhorun raza korunk sodhtat mhunn Jezuk kollʼllem tednam to ekttoch porot dongrar gelo.

16 Sanz zali tednam tache xis sokol doria deger gele. 17 Te eka vhoddear boson doriachea poltoddi Kapernaumant vochonk bhair sorle. Kallokh zalʼlo, ani Jezu azun poriant tanchea fuddean pavonk naslo. 18 Ani vadollak lagon doriant vhoddlim-vhoddlim lharam marunk laglim. 19 Punn xis doria deger thaun panch tem sov kilometr* pois pavlole tednam Jezu doriacher cholon tanchea vhoddea lagim ieta to tannim polloilo, ani te bhiele. 20 Punn Jezun tankam mhunnttlem: “Hanv to; bhienakat!” 21 Tednam te taka vhoddeant bhitor gheunk toiar zale, ani thoddeach vellan tanchem vhoddem, tankam jea zagear vochonk zai aslem thoim pavlem.

22 Dusrea disa doriachea poltoddi aslolea lokamnim doria deger aslem tem lhan vhoddem atam thoim na mhunn polloilem. Tea vhoddeant Jezu vochonk na, punn tache xis gele mhunn tankam kollon ailem. 23 Jea zagear Somian Devache upkar attoun lokank undde khaunk dilʼle teach zagear Tiberiasa thaun thoddim vhoddim ailim. 24 Hanga Jezui na ani tache xisui na mhunn lokamnim polloilem tednam te vhoddeancher bosle ani taka sodhunk Kapernaumant gele.

25 Doriachea poltoddi tannim taka polloilo tednam tannim vicharlem: “Rabʼbi,* tum hanga kednam ailo?” 26 Jezun tankam mhunnttlem: “Hanv tumkam sot tench sangtam, tumi vizmitam polloilʼlim dekhun tumi mhaka sodhinant, punn tumi pottbhor undde khalʼle mhunn mhaka sodhtat. 27 Piddʼddear zata toslea jevnnak lagon vavr korinakat, punn piddʼddear zaina ani sasnachem jivit dita toslea jevnnak lagon vavr korat. Tem jevonn tumkam munxacho Put ditolo; karonn Bap, mhunnche Devan svota aplea Putacher apli maniotai asa mhunn xikʼko marla.”

28 Tednam tannim taka vicharlem: “Devachi maniotai melloun gheunk ami kitem korunk zai?” 29 Jezun tankam zobab diun mhunnttlem: “Devachi maniotai zai zalear tannem zaka dhaddla tacher bhavarth dovrat.” 30 Tednam tannim mhunnttlem: “Toxem zalear tum koslem vizmit* korun dakhouncho asa, jem polloun ami tujer bhavarth dovortole? Tum koslem kam korcho asa? 31 Amchea purvozamnim tor oronnʼnneant* manʼna khalem. Boroilʼlem asa toxem: ‘Tannem tankam khaunk sorgar thaun unddo dilo.’” 32 Jezun tankam mhunnttlem: “Hanv tumkam sot tench sangtam, Moizesan tumkam sorgar thaun unddo diunk naslo, punn mhozo Bap tumkam sorgar thaun khoro unddo dita. 33 Karonn zo sorgar thaun denvon aila to Devacho unddo zaun asa ani sonvsarak jivit dita.” 34 Tednam lokamnim mhunnttlem: “Somia, amkam ho unddo sodanch di-it rav.”

35 Jezun tankam mhunnttlem: “Hanv jivit ditam toslo unddo. Zo mhojea lagim ieta taka porot kednanch bhuk lagchina, ani zo mhojer bhavarth dovorta taka porot kednanch tan lagchina. 36 Punn hanvem tumkam sanglam toxem, tumi mhaka polloila tori astana tumi mhojer visvas dovornant. 37 Bapan mhaka dileant tim soglim mhojea lagim ietolim, ani zo konn mhojea lagim ieta taka hanv kednanch mhojea thaun pois korchona; 38 karonn hanv mhoji khuxi nhoi, punn zannem mhaka dhaddla tachi khuxi purnn korunk sorgar thaun sokol ailam. 39 Mhaka dhaddla tachi hich khuxi asa ki tannem mhaka dileat tanchea modlea ekleak pasun hanvem hogddauncho nhoi, tachea bodlek xevottachea disa tankam jivont korche. 40 Karonn mhojea Bapachi hich khuxi asa, ki zo konn Putak vollkhon tacher bhavarth dovorta taka sasnachem jivit mellchem, ani xevottachea disa hanv taka jivont kortolom.”

41 “Hanv sorgar thaun denvon ailolom unddo,” oxem tannem mhunnttlem mhunn Judev lok tachea vixim gunngunnunk lagle. 42 Te mhunnonk lagle: “Ho Juzecho put Jezu nhoi kai, zachea avoi-bapaik ami vollkhotat? Tor ho oxem koxem mhunnonk xokta ki, ‘Hanv sorgar thaun sokol ailam’?” 43 Jezun tankam mhunnttlem: “Tumi gunngunnop bond korat. 44 Mhaka dhaddla tea Bapan voddun haddlea xivai konnuch mhojea lagim ieunk xokona, ani hanv taka xevottachea disak jivont kortolom. 45 Provadeanchea Pustokant* oxem boroilʼlem asa: ‘Tankam sogleank Jehova* xikoitolo.’ Dor eklo zo Bapachem aikota ani tachea koddlean xikta to mhojea lagim ieta. 46 Khoincheach munxan kednanch Bapak pollounk na, fokot zo Deva thaun aila tannench Bapak polloila. 47 Hanv tumkam sot tench sangtam, zo bhavarth dovorta taka sasnachem jivit mellttolem.

48 “Hanv jivit ditam toslo unddo. 49 Tumchea purvozamnim oronnʼnneant manʼna khalem tori astana te mele. 50 Punn zo sorgar thaun denvon aila to unddo khata, to morchona. 51 Sorgar thaun denvon ailolo jivo unddo hanvuch. Zo ho unddo khata to sasnak jietolo; khorem mhunnttlear, hanv ditolom to unddo mhunnttlear mhoji kudd, sonvsarak jivit mellchem mhunn hanv ti ditolom.”

52 Tednam Judev lok eka-meka lagim vad-vivad korunk lagle, ani mhunnonk lagle: “Ho munis amkam apli kudd khaunk koso diunk xokta?” 53 Tednam Jezun tankam mhunnttlem: “Hanv tumkam sot tench sangtam, jea meren tumi munxachea Putachem mas khainant ani tachem rogot pienant, tea meren tumkam jivit mellchem na. 54 Zo mhojem mas khata ani mhojem rogot pieta taka sasnachem jivit mellttolem, ani hanv taka xevottachea disa jivont kortolom; 55 karonn mhoji kudd khorem jevonn ani mhojem rogot piepachi khori vost. 56 Zo mhojem mas khata ani mhojem rogot pieta to mhojea sangata ekvottant urta, ani hanv tachea sangata ekvottant urtam. 57 Jea toren jivea Bapan mhaka dhaddla ani Bapak lagon hanv jivo asa, teach toren zo mhojea thaun khata to pasun mhaka lagon jivo urtolo. 58 Ho unddo sorgar thaun sokol denvon aila. Ho toslo unddo nhoi zo tumchea purvozamnim khalo ani tori astana te mele. Zo konn ho unddo khata to sasnak jietolo.” 59 To Kapernaumant eka sobha-ghorant* xikoitalo tednam tannem heo sogleo vostu sangleo.

60 Tachea xisamnim hem aikolem tednam tanchea modle zaite zann mhunnonk lagle: “Hem to kitem uloita, tachem konn aikon ghetolo?” 61 Xis hea vixim gunngunnttat mhunn to zannam aslo, dekhun tannem mhunnttlem: “Mhojem ulovop aikon tumcho bhavarth halʼlo kai?* 62 Toxem zalear, munxacho Put poilim aslo thoim, mhunnche, voir voitana tumi polloitat tednam tumchem kitem zatolem? 63 Devachea povitr xokte udexim jivit melltta; kudd kiteakuch upkarona. Hanvem tumkam jem sanglam tem povitr xokte udexim asa ani jivit dita. 64 Punn tumchea modem thodde oxe asat, je hanv sangtam tacher bhavarth dovornant.” Apnnacher konn bhavarth dovorna, ani aplo konn visvasghat kortolo tem Jezu poilinch zannam aslo. 65 To tankam sangonk laglo: “Hakach lagon hanvem tumkam sanglolem ki jea meren Bap porvangi dina tea meren konnuch mhojea lagim ieunk xokona.”

66 Hea khatir tachea zaitea xisamnim tachea fattlean vochop soddun dilem ani te poilim kortale tim kamam porot korunk lagle. 67 Tednam Jezun Bara zannank* vicharlem: “Tumi-i vochonk sodhtat kai?” 68 Simanv Pedrun zobab dilo: “Somia, ami konnam lagim mhunn voitole? Sasnachea jivitachim utram tor tujea lagim asat. 69 Ami bhavarth dovorla ani tum Devacho Povitr Sevok mhunn amkam kollon ailam.” 70 Jezun tankam zobab dilo: “Hanvem bara zannank vinchun kaddunk nasle kai? Punn tumchea modem, eklo nanv piddʼddear korpi* asa.” 71 Khorem mhunnttlear, to Simanv Iskariotacho put Judasa vixim uloitalo. Karonn to Bara modlo eklo aslo, tori astana Jezucho visvasghat korun taka dhorun diuncho aslo.

7 Tea uprant, taka Judeiant vochonk naka aslem dekhun Jezu Galilientuch ravlo, karonn Judev lok taka marun uddounk sondhi sodhtale. 2 Judevanchi Tombunchi Porob lagim pavloli. 3 Taka lagon tachea bhavamnim taka sanglem: “Tum korta tim soglim kamam tujea xisamnim pollounchim mhunn tum hanga thaun bhair sor ani Judeiant voch. 4 Lokamnim apleak vollkhocho oxem zaka dista to lipon kainch korina. Tum him soglim kamam korta zalear tum konn to, sonvsarak dakhoi.” 5 Khorem mhunnttlear, tache bhav tacher bhavarth dovornasle. 6 Taka lagon, Jezun tankam mhunnttlem: “Mhozo vell azun ieunk na, punn tumkam khoincho-i vell sarko. 7 Sonvsara koddem tumcho dves korunk kainch karonn na, punn to mhozo dves korta karonn hanv tachim kamam vaitt mhunn govai ditam. 8 Tumi porbek vochat; mhozo vell azun pavonk na mhunnon hanv porbek atam iena.” 9 Tankam oxem sangon to Galilientuch ravlo.

10 Tache bhav porbek gelea uprant to-ui gelo, punn lokamnim taka pollouncho nhoi mhunn to konnank kollonastana gelo. 11 Taka lagon, porbechea vellar Judev taka oxem mhunnon sodhunk lagle: “To munis khoim asa?” 12 Thoim ektthaim zalʼle lok bhitorlea-bhitor zaitem uloitale. Thodde mhunnttale: “To ek boro munis.” Dusre mhunnttale: “Na, to boro munis nhoi. To lokank fosoita.” 13 Punn Judevanchea bhiranten konnuch tachea vixim ukteponnim uloinaslo.

14 Ordi porob kabar zali tednam Jezu Devmondirant gelo ani xikounk laglo. 15 Hem polloun Judev lok ojap zale ani mhunnonk lagle: “Hea munxak Devachea utrachem itlem ginean khoim thaun mellʼllem? Hannem tor dhormik fuddareanchea iskolamnim xikounn gheunk na.” 16 Jezun tankam zobab diun mhunnttlem: “Hanv xikoitam ti mhoji xikounn nhoi, punn mhaka dhaddla tachi. 17 Konnui Devachi khuxi purnn korunk sodhta zalear hanv xikoitam ti xikounn Devachi vo mhoji tem to zannam zatolo. 18 Zo apli xikounn xikoita to apli vhoddvik korunk sodhta; punn zo taka dhaddla tachi vhoddvik korta to sot uloita ani tachea bhitor koslench khotteponn na. 19 Moizesan tumkam Kaido dilʼlo nhoi? Punn tumchea modlo konnuch to Kaido pallina. Tumi mhaka kiteak marun uddounk sodhtat?” 20 Lokamnim taka mhunnttlem: “Tujea bhitor ek noxtto dut* asa. Konn tuka marun uddounk sodhta?” 21 Jezun tankam mhunnttlem: “Hanvem fokot ekuch kam kelam, ani tem polloun tumi ojap zaleat. 22 Hea vixim chintun polloiat, Moizesan tumkam sunot korchi adnea dilʼli, punn ti Moizesachea kalla thaun nhoi punn amchea purvozanchea kalla thaun asa. Ani tumi sabathachea disa pasun sunot kortat. 23 Moizesa udexim dil’lo Kaido moddcho nhoi mhunn tumi sabathachea disa eka munxachi sunot kortat zalear, hanvem sabathachea disa eka munxak sarko boro kelo mhunn tumi mhojer itle ragar kiteak zatat? 24 Voilea-voir dista tea vostunchea adarar zhoddtti korop bond korat punn sarke toren zhoddtti korat.”

25 Tednam Jeruzalemant ravpi thodde munis mhunnonk lagle: “Jea munxak te marun uddounk sodhtat to hoch munis nhoi? 26 Tori astana, to sogleam mukhar koso ukteponnim uloita tem polloiat, ani taka te kainch mhunnonant. Hoch Krist mhunn odhikareank khatri zali kai kitem? 27 Ho munis khoincho tem ami zannant; punn Krist ietolo tednam to khoincho hem konnankuch khobor aschem na.” 28 Uprant Devmondirant xikoitana Jezun mottʼttean mhunnttlem: “Tumi mhaka vollkhotat ani hanv khoincho tem tumi zannant. Hanv mhojea khuxe pormonnem ieunk na, punn zannem mhaka dhaddla to khorench asa, ani tumi taka vollkhonant. 29 Hanv taka vollkhotam, karonn hanv tachea thaun ailam ani Tannench mhaka dhaddla.” 30 Tednam te koxe-i bhaxen taka dhorunk sondhi sodhtale, punn konnench taka hat lavunk na, karonn azun poriant tacho vell ieunk naslo. 31 Tori astana, thoim ektthaim zalʼlea zaitea lokamnim bhavarth dovorlo, karonn te mhunnttale: “Krist ieta tednam to zaitim vizmitam kortolo nhoi? Hea munxan unnim vizmitam keleant kitem?”

32 Lok tachea vixim kitem uloita tem Farizevamnim aikolem tednam mukhel iadnikamnim ani Farizevamnim taka dhorunk soinikank dhaddle. 33 Tednam Jezun mhunnttlem: “Zannem mhaka dhaddla tachea lagim voichea poilim, hanv anik thoddo vell tumchea borabor astolom. 34 Tumi mhaka sodhtole, punn hanv tumkam mellchona, ani hanv jea zagear astolom thoim tumi ieunk xokonant.” 35 Tor, Judev lok eka-mekak mhunnonk lagle: “Ho munis oso khoim vochonk sodhta ki amkam to mellchona? Grik lokam modem ravtolea Judev lokam koddem tor haka vochonk naka nhoi? Taka Grik lokank xikounchem asa kai kitem? 36 ‘Tumi mhaka sodhtole punn hanv tumkam mellchona, ani hanv jea zagear astolom thoim tumi ieunk xokonant,’ hea utrancho orth kitem kai?”

37 Porbechea xevottachea disa, mhunnche porbechea sogleant khas disa, Jezu ubo ravon mottʼttean mhunnonk laglo: “Konnankui tan laglea zalear tannem mhojea lagim ieunchem, ani hanv taka pieunk udok ditolom. 38 Zo konn mhojer bhavarth dovorta tachea vixim Devachea utrant oxem boroilʼlem asa: ‘Tachea kallzantlean jivit dita tosleo udkacheo zhori vhanvtoleo.’” 39 Tacher bhavarth dovorta tankam beginuch mellpachi asli tea povitr xokte vixim to uloitalo; tankam azunui povitr xokti mellonk nasli karonn Jezuk azunui mhoima mellonk nasli. 40 Ektthaim zalʼlea lokam modlea thoddeamnim hem aikolem tednam te mhunnonk lagle: “Ho khoroch ieuncho aslo to Provadi.” 41 Dusre mhunnttale: “Hoch Krist.” Anik thodde lok mhunnttale: “Krist Galili thaun ieunchona nhoi? 42 To Davidachea sonstintlean ani Davidachea ganvantlean, mhunnche Bethlehemantlean ietolo oxem Devachea utrant boroilʼlem na kai?” 43 Oxe toren Jezuk lagon thoim ektthaim zalʼlea lokam modem futt poddli. 44 Tanchea modle thodde taka dhorunk sodhtale, punn konnench taka hat lavunk na.

45 Soinik, mukhel iadnik ani Farizevam koddem porot gele tednam tannim tankam vicharlem: “Tumi taka dhorun kiteak haddunk na?” 46 Soinikamnim sanglem: “Aiz poriant khoinchoch munis oso ulounk na.” 47 Tednam Farizevamnim tankam vicharlem: “Tumi-i fosonk nant nhoi? 48 Odhikaream modlea vo Farizevam modlea eklean tori tacher bhavarth dovorla kai? 49 Punn hea lokank Kaidea vixim kainch somzonni na. Te xirap poddlole lok.” 50 Tednam Nikodemusan, zo tanchea modlo eklo aslo ani poilim Jezu lagim ailolo tannem mhunnttlem: 51 “Eka munxachem aikon ghetlea xivai ani to kitem korta tem zannam zaun ghetlea xivai amcho Kaido taka guneanvkari mhunn tharaina nhoi?” 52 Tannim Nikodemusak mhunnttlem: “Tum pasun Galilientlo kai kitem? Devachea utrant sodh ani polloi, Galilie thaun provadeak dhaddttole mhunn sangonk na.”*

8 12 Jezu porot ek pavtt lokam lagim uloilo ani tannem mhunnttlem: “Hanv sonvsaracho uzvadd. Zo mhojea fattlean cholta to kednanch kallkhant cholchona, punn jivitacho uzvadd tachea lagim astolo.” 13 Tednam Farizevamnim taka mhunnttlem: “Tunch tujea vixim govai dita; tea pasot tuji govai sarki nhoi.” 14 Jezun tankam mhunnttlem: “Hanv mhojeach vixim govai ditam zalear pasun mhoji govai sarki asa, karonn hanv khoim thaun ailam ani khoim voitam tem hanv zannam. Punn hanv khoim thaun ailam ani khoim voitam tem tumi nokllo. 15 Tumi dolleank jem dista tea pormonnem zhoddtti kortat; punn hanv konnanchich zhoddtti korina. 16 Ani hanv zhoddtti kortam zalear pasun mhoji zhoddtti sarki asa, karonn hanv ekttom na, punn mhaka dhaddla to mhozo Bap mhojea sangata asa. 17 Tumcheach Kaideant tor boroilʼlem asa: ‘Dog zannanchi govai khori mhunn somzochi.’ 18 Hanv svota mhojea vixim govai ditam, ani Bap, zannem mhaka dhaddla, to-ui mhojea vixim govai dita.” 19 Tednam tannim mhunnttlem: “Tuzo Bap khoim asa?” Jezun tankam zobab dilo: “Tumi mhaka vollkhonant, na mhunn mhojea Bapak vollkhonant. Tumi mhaka vollkhotale zalear mhojea Bapakui vollkhota asle.” 20 Hem soglem tannem Devmondirant dan pettio asleo thoim xikoitana sanglolem. Punn konnench taka dhorunk na, karonn azun tacho vell ieunk naslo.

21 Jezun tankam porot ek pavtt mhunnttlem: “Hanv voitam, ani tumi mhaka sodhtole, punn tumi tumchea patkant mortole. Hanv voitam thoim tumi ieunk xokonant.” 22 Tednam Judev lok mhunnonk lagle: “Ho aplo jiv kaddunk sodhta kitem? Karonn to oxem mhunntta, ‘Hanv voitam thoim tumi ieunk xokonant.’” 23 Taka lagon tannem tankam oxem mhunnttlem: “Tumi sokoile; ani hanv voilom. Tumi hea sonvsarantle; punn hanv hea sonvsarantlo nhoi. 24 Teach pasot hanvem tumkam mhunnttlam: Tumi tumchea patkank lagon mortole. Karonn hanv toch mhunn tumi manun ghenant zalear tumi tumchea patkank lagon mortole.” 25 Tednam te taka mhunnonk lagle: “Tum konn tor?” Jezun tankam mhunnttlem: “Tumi mhojem somzon ghenant zalear tumchea lagim uloun kitem faido? 26 Tumchea vixim mhaka zaitem sangpachem asa ani zaitea vixoi-ancher zhoddtti korchi asa. Khorem mhunnttlear, zannem mhaka dhaddla to khoro zaun asa, ani hanvem jem tachea thaun aikolam tench hanv sonvsarant sangtam.” 27 Jezu tanchea lagim Bapa vixim uloitalo mhunn tankam somzonk na. 28 Taka lagon Jezun tankam mhunnttlem: “Tumi munxachea Putak voir ubartole tednam hanv toch ani hanv mhoje khuxen kainch korina, punn mhojea Bapan mhaka xikoilam tench hanv tumkam sangtam mhunn tumkam kollon ietolem. 29 Ani zannem mhaka dhaddla To mhojea sangata asa; tannem mhaka eksuro sanddunk na, karonn hanv sodanch taka manvota teo vostu kortam.” 30 To hem soglem sangtalo tednam zaitea lokamnim tacher bhavarth dovorlo.

31 Uprant Jezun apleacher visvas dovortolea Judevank mhunnttlem: “Tumi mhojem utor manun ghetat zalear tumi khorench mhoje xis. 32 Tumi sot zannam zatole, ani sot tumkam svotontr kortolem.” 33 Tannim taka mhunnttlem: “Ami Abrahamachi sonsot ani ami kednanch konnanchea gulamponnant ravonk nant. Tor, ‘Tumi svotontr zatole,’ oxem tum koxem mhunnonk xokta?” 34 Jezun tankam zobab diun mhunnttlem: “Hanv tumkam sot tench sangtam, zo konn patok korta to patkacho gulam zata. 35 Ani gulam ghorant sodankal ravona; punn put sodankal ghorant ravta. 36 Tea pasot Put tumkam svotontr korta zalear tumi khorench svotontr zatole. 37 Tumi Abrahamachi sonsot mhunn hanv zannam. Punn tumi mhozo jiv kaddunk sodhtat, karonn tumi mhoji xikounn manun ghenant. 38 Mhojea Bapa sangata astana jem hanvem polloilam tench hanv tumkam sangtam, punn tumi tumchea bapai thaun aikolam tench kortat.” 39 Judevamnim taka mhunnttlem: “Amcho bapui Abraham.” Jezun tankam mhunnttlem: “Tumcho bapui Abraham aslo zalear tumi Abrahaman kelem toxem kortole asle. 40 Punn tumi tor mhozo jiv kaddunk sodhtat, karonn hanvem tumkam sot sanglam jem hanvem Deva thaun aikolam. Abrahaman toxem korunk na. 41 Tumi tumchea bapai sarkim kamam kortat.” Tannim mhunnttlem: “Ami onoitik kuddichea sombonda* thaun zolmolʼlim bhurgim nhoi; amcho Bapui ekuch, Dev.”

42 Jezun tankam mhunnttlem: “Tumcho Bapui Dev aslo zalear tumi mhozo mog kortole asle, karonn hanv Deva thaun ailam ani hanga asa. Hanv mhojech khuxen ieunk na, punn Tannem mhaka dhaddla. 43 Hanv sangtam tem tumi kiteak somzon ghenant? Karonn tumkam mhojem utor aikonk naka. 44 Tumi tumcho bapui Soitana* thaun asat, ani tumchea bapaichi khuxi korunk sodhtat. To survatek thaun khun korpi aslo, ani sotant ghott ravonk na, karonn sot tachea bhitor naslem. To fott uloita tednam, to apleach sobhava pormonnem uloita, karonn to fottkiro ani fottincho bapui. 45 Punn dusre vatten, hanv tumkam sot sangtam tednam tumi mhojer patienant. 46 Tumchea modlo konn hanv patki mhunn dakhoun diunk xokta? Ani hanv sot uloitam zalear tumi mhojer visvas kiteak dovornant? 47 Deva thaun asa to Devachem utor aikota. Tumi Deva thaun nant dekhun tumi mhojem utor aikonant.”

48 Tednam Judevamnim taka mhunnttlem: “‘Tum ek Samariekar ani tujer noxtto dut asa,’ oxem ami mhunnttat tem sarkem nhoi?” 49 Jezun mhunnttlem: “Mhojer noxtto dut na, punn hanv mhojea Bapak man ditam, ani tumi mhaka man dinant. 50 Hanv mhakach mhoima melloun gheunk sodhina; punn Eklo asa zo mhaka mhoima diunk sodhta ani Toch zhoddtti korta. 51 Hanv tumkam sot tench sangtam, konnui mhojea utra pormonnem cholta zalear to kednanch morcho na.” 52 Judevamnim taka mhunnttlem: “Tujer noxtto dut asa mhunn atam amkam matui dubhav na. Abraham melo, toxech provadi pasun mele, punn tum mhunntta, ‘Zor konnui mhojea utra pormonnem cholta zalear to kednanch morchona.’ 53 Tum amcho bapui Abrahama poros vhodd kitem? To tor melo, ani provadi pasun mele. Tor tum konn oxem tum mhunnonk sodhta?” 54 Jezun zobab dilo: “Hanv mhojich mhoima kortam zalear mhoji mhoima kainch nhoi. Punn zaka tumi tumcho Dev mhunnttat, Toch mhozo Bap mhaka mhoima dita. 55 Tori astana tumi taka vollkhonk na, punn hanv taka vollkhotam. Hanv taka vollkhona oxem hanvem mhunnttlolem zalear hanv tumchea bhaxen ek fottkiro zaupachom. Punn hanv taka vollkhotam ani tachea utra pormonnem cholta. 56 Tumcho bapui Abraham mhozo dis pollounchea axen khub khuxal zalo, ani tannem to polloilo ani khuxal zalo.” 57 Tednam Judevamnim taka mhunnttlem: “Tuka 50 vorsam pasun zaunk nant, tori astana tunvem Abrahamak polloila oxem tum mhunntta?” 58 Jezun tankam mhunnttlem: “Hanv tumkam sot tench sangtam, Abrahamacho zolm zaunchea adinch hanv aslom.” 59 Tednam tannim Jezuk marunk fator ukolʼle, punn Jezu liplo ani Devmondira thaun bhair soron gelo.

9 Jezu voitalo tednam tannem eka munxak polloilo zo zolma thaun kuddʼddo aslo. 2 Tachea xisamnim taka vicharlem: “Rabʼbi,* konnem patok kelʼlem mhunn to munis kuddʼddo zolmolo, tea munxan kai tachea avoi-bapain?” 3 Jezun zobab dilo: “Tannem vo tachea avoi-bapain kelʼlea patkank lagon nhoi, punn Devachim kamam hea munxa udexim dison ieunchim mhunn oxem zalem. 4 Zannem mhaka dhaddla tachem kam ami dis astanach korunk zai; karonn oxi rat ieta jednam konnuch munis kam korunk xokchona. 5 Hanv sonvsarant asom poriant, hanv hea sonvsaracho uzvadd.” 6 Hem sanglea uprant, to zomnir thuklo ani tea thuken tannem matiecho lep kelo, ani tea kuddʼddea munxachea dolleancher lailo 7 ani taka mhunnttlem: “Voch ani Siloamachea tolleant dhu” (Siloam mhunnttlear “Dhaddun Dilʼlo”). To gelo ani tannem aple dolle dhuile, ani porot ietana taka disonk laglem.

8 Uprant tache xezari ani zannim taka bhik magtana polloilʼlo te mhunnonk lagle: “Ho toch munis nhoi kai, zo boson bhik magtalo?” 9 Thodde mhunnttale: “Ho toch.” Punn dusre mhunnttale: “Ho tache bhaxen dista, punn to nhoi.” Punn to tankam, “Hanv toch” mhunn sangot ravlo. 10 Tednam te taka vicharunk lagle: “Tuka dixtt koxi mellʼlli?” 11 Tannem mhunnttlem: “Jezu nanvachea eka munxan matiecho lep kelo ani mhojea dolleank lailo ani mhaka mhunnttlem, ‘Siloamachea tolleant vochon dhui.’ Tor hanvem vochon mhoje dolle dhuile ani mhaka disonk laglem.” 12 Tednam te taka vicharunk lagle: “To munis khoim asa?” Tannem mhunnttlem: “Hanv nokllom.”

13 Te lok tea munxak Farizeva lagim gheun gele. 14 Jezun jea disa tea munxak matiecho lep lavun taka dixtt dilʼli, to Sabathacho dis aslo. 15 Tea pasot Farizev pasun taka dixtt koxi mellʼlli kai mhunn vicharunk lagle. Tannem tankam sanglem: “Tannem mhojea dolleancher matiecho lep lailo, ani hanvem mhoje dolle dhuilea uprant mhaka disonk laglem.” 16 Tednam thodde Farizev taka mhunnonk lagle: “To munis Deva thaun ieunk na, karonn to Sabath dis pallina.” Punn dusre mhunnonk lagle: “Ek patki munis oslim vizmitam* koxim korunk xokta?” Hea toren tanchea modem futt poddli. 17 Ani tannim tea kuddʼddea munxak porot vicharlem: “Tea munxan tujea dolleanchi dixtt porot dili, tor tachea vixim tum kitem mhunntta?” Tea munxan mhunnttlem: “To ek provadi.”

18 Punn tachea avoi-bapaik apoun khatri korun gheum poriant, to kuddʼddo aslo ani tachi dixtt porot aili mhunn te Judev manun gheunk toiar nasle. 19 Tannim tachea avoi-bapaik vicharlem: “Ho tumcho put, zo zolma thaun kuddʼddo aslo? Tor atam to koso pollounk xokta?” 20 Tachea avoi-bapain mhunnttlem: “Hoi, ho amcho put ani to zolma thaun kuddʼddo aslo. 21 Punn to atam koso pollounk xokta vo konnem taka dixtt dili tem amkam khoborna. Tumi takach vicharat. To atam lhan na. Toch tumkam sangonk xokta.” 22 Tachea avoi-bapaik Judev lokanchi bhirant asli dekhun tannim oxem mhunnttlem, karonn konnui Jezuk Krist mhunn manun gheta zalear tea munxak sobha-ghorantlean bhair kaddttole mhunn Judevamnim adinch tharailʼlem. 23 Taka lagon tachea avoi-bapain mhunnttlem: “To atam lhan na. Tumi takach vicharat.”

24 Tor tannim adim kuddʼddo aslolea munxak porot apoilo ani taka mhunnttlem: “Devak mhoima di ani sot uloi; karonn ho munis patki mhunn ami zannant.” 25 Tannem mhunnttlem: “To munis patki vo na tem hanv nokllom. Punn hanv poilom kuddʼddo aslom, ani atam hanv pollounk xoktam mhunn hanv zannam.” 26 Tednam tannim taka vicharlem: “Tannem kitem kelem? Tannem tuka koxi dixtt dili?” 27 Tannem tankam mhunnttlem: “Hanvem tumkam poilinch sanglam, punn tumi mhojem aikonk na. Tumi mhaka hem porot kiteak vichartat? Tumi-i tache xis zaunk sodhtat kitem?” 28 Tednam te taka ragan mhunnonk lagle: “Tum tacho xis astolo, punn ami Moizesache xis. 29 Dev Moizesa lagim uloila mhunn ami zannant, punn ho munis khoincho tem ami nokllo.” 30 Tea munxan mhunnttlem: “Mhaka ojap dista, tannem mhaka dixtt dili tori astana to khoincho tem tumi nokllo oxem tumi mhunnttat. 31 Dev patkeanchem aikona, punn konnui tachi bhirant dhorta ani tachi khuxi korta zalear to tachem aikota mhunn ami zannant. 32 Zolma thaun kuddʼddo aslolea munxak konnem-i dixtt dili mhunn aiz poriant ami aikonk na. 33 Ho munis Deva thaun ieunk naslo zalear kainch korunk xokcho naslo.” 34 Tannim taka mhunnttlem: “Tum zolma thaun patki, ani amkam xikoita?” Oxem mhunnon tannim taka bhair ghatlo!

35 Tannim taka bhair ghatla mhunn Jezun aikolem, ani magir to mellʼllo tednam Jezun taka vicharlem: “Munxachea Putacher tum bhavarth dovorta?” 36 Zobab diun tea munxan mhunnttlem: “To konn dhonia? Mhaka sang. Mhaka tacher bhavarth dovrunk zai.” 37 Jezun taka mhunnttlem: “Tunvem taka polloila, khorem mhunnttlear, toch tujea lagim uloita.” 38 Tednam tannem mhunnttlem: “Somia, hanv tacher bhavarth dovortam.” Ani tannem Jezuk bagon nomoskar kelo. 39 Uprant Jezun mhunnttlem: “Sonvsarachi zhoddtti korunk ani je pollounk xokonant tankam dischem ani je pollounk xoktat te kuddʼdde zaunche mhunn hanv ailam.” 40 Hem aikon je Farizev tachea sangata asle tannim taka vicharlem: “Ami pasun kuddʼdde kai kitem?” 41 Jezun tankam mhunnttlem: “Tumi kuddʼdde asle zalear tumkam patok aschem naslem. Punn tumi mhunnttat, ‘Ami pollounk xoktat.’ Taka lagon tumchim patkam toxinch urtolim.”

10 “Hanv tumkam sot tench sangtam, zo gotteachea* darantlean nhoi punn dusrea vattentlean bhitor ieta to chor ani luttpi. 2 Punn zo darantlean ieta to menddrancho gonvlli. 3 Darar asta to rakhonndar taka dar ugoddtta, ani menddram aplea gonvlleacho avaz aikotat. To menddranchem nanv gheun tankam apoita ani tankam bhair gheun voita. 4 Aplea soglea menddrank bhair gheun voita tednam to tanchea fuddem cholta, ani menddram tachea fattlean cholot ietat, karonn tim tacho avaz vollkhotat. 5 Tim onvollkhi munxachea fattlean kednanch voichim nant, tachea bodlek tim tachea thaun pois pollon voitolim, karonn tim onvollkhi munxacho avaz vollkhonant.” 6 Jezun tankam hem udharonn dilem, punn to kitem sangta tem te somzonk nant.

7 Taka lagon Jezun anik ek pavtt sanglem: “Hanv tumkam sot tench sangtam, hanv menddram pasot dar zaun asa. 8 Mhoje bodlek aile te sogle chor ani luttpi asle; punn menddramnim tanchem aikonk na. 9 Hanv dar. Zo mhojea thaun bhitor sorta to salvar zatolo, taka bhair-bhitor soronk mellttolem ani chorov mellttolo. 10 Chor chori korunk, jivexim marunk ani nas korunk ieta. Punn hanv menddrank jivit mellchem mhunn, tem-ui sasnachem jivit mellchem mhunn ailam. 11 Hanv boro gonvlli zaun asa. Boro gonvlli menddram pasot aplo jiv pasun diunk toiar asta. 12 Punn disvoddeacher kam korunk dovorlolo munis gonvlli asona, ani menddram tachim svotachim asona dekhun to kolo* ieta to polloita tednam to menddrank thoinch soddun pollon voita. Kolo menddrancher uddi marta ani urlolim menddram hevtten-tevtten ximpoddttat, 13 karonn tea munxak disvoddeacher dovorla ani taka menddranchi kallji asona. 14 Hanv boro gonvlli. Hanv mhojea menddrank vollkhotam ani mhojim menddram mhaka vollkhotat. 15 Bap mhaka vollkhota tosoch hanv Bapak vollkhotam, hanv mhojea menddram pasot mhozo jiv ditam.

16 “Mhojim dusrim menddram pasun asat jim hea gotteantlim nhoi, tankam pasun hanvem haddunk zai. Tim mhozo avaz aikotolim, ani tednam ek hindd ani ek gonvlli zatolo. 17 Bap mhozo mog korta, karonn hanv mhozo jiv ditam. Mhozo jiv mhaka porot mellcho mhunn hanv to ditam. 18 Konnuch munis mhozo jiv gheunk xokona, punn hanv svota mhoje khuxen mhozo jiv ditam. To diunk mhaka odhikar asa, ani to porot melloun gheunk pasun mhaka odhikar asa. Oxem korunk mhojea Bapa koddlean mhaka adnea mellʼllea.”

19 Tannem oxem mhunnttlem mhunnon Judevam modem porot futt poddli. 20 Zaite zann mhunnttale: “Tacher noxtto dut bosla. To toklen suttla. Tumi tachem kiteak aikotat?” 21 Dusre mhunnttale: “Noxtto dut boslolo munis oso ulounchona. Noxtto dut boslolo munis eka kuddʼddeak dixtt diunk xokta kai?”

22 Tea vellar Jeruzalemantlea Devmondirant Bhettounnechi Porob choltali. Te thonddeche dis asle, 23 ani Jezu Devmondirant khambe aslolea Solomonachi vatt* mhunnttlolea zagear pasoi-o martalo. 24 Tednam Judev tachea bhonvtonnim ektthaim zale ani taka vicharunk lagle: “Tum kednam meren amkam kallkhant dovortolo? Tum Krist zalear amkam spoxttponnim sang.” 25 Jezun tankam zobab dilo: “Hanvem tumkam sanglam, tori astana tumi bhavarth dovornant. Hanv mhojea Bapachea nanvan jim kamam kortam tinch tumkam govai ditat. 26 Punn tumi mhojer bhavarth dovornant, karonn tumi mhoji menddram nhoi. 27 Mhojim menddram mhozo avaz aikotat, ani hanv tankam vollkhotam, ani tim mhojea fattlean choltat. 28 Hanv tankam sasnachem jivit ditam, ani tancho kednanch nas zaunchona, ani konnuch tankam mhojea hatantlim kaddun vhorchona. 29 Mhojea Bapan jem mhaka dilam tem soglea vostum poros vortem asa, ani konnuch tankam mhojea Bapachea hatantlean kaddun vhoronk xokona. 30 Hanv ani Bap ek.”*

31 Porot ek pavtt Judevamnim taka marun uddounk fator ukolʼle. 32 Jezun tankam mhunnttlem: “Hanvem tumkam Bapa thaun zaitim borim kamam dakhoilim. Tantuntlea khoinchea kamank lagon tumi mhaka fatraunk sodhtat?” 33 Judevamnim taka zobab dilo: “Tunvem kelʼlea borea kamam pasot nhoi, punn tum Devachea add uloila dekhun ami tuka fatraunk sodhtat; karonn tum ek munis, punn tum apleak dev mhunntta.” 34 Jezun tankam sanglem: “‘Hanvem mhunnttlem: “Tumi dev,”’* oxem tumchea Kaideant boroilʼlem na? 35 Ani Devachea utrant boroilam tem bodlunk zaina. Tor guneanvkari asloleank Devan ‘dev’ mhunnttleat zalear, 36 ‘Hanv Devacho Put,’ oxem hanvem mhunnttlem dekhun, ‘Hanv Devachea add uloilam,’ oxem tumi koxe mhunnonk xoktat? Karonn mhaka tor Bapan povitr kela ani sonvsarant dhaddla. 37 Hanv mhojea Bapachim kamam korina zalear mhojer visvas dovornakat. 38 Punn hanv mhojea Bapachim kamam kortam zalear, mhojer nhoi, punn mhojea kamancher tori visvas dovrat, oxe toren Bap mhojea sangata ekvottant asa ani hanv Bapa sangata ekvottant asa mhunn tumkam kollon ietolem ani tumi visvas dovrunk pavtolim.” 39 Taka lagon tannim taka anik ek pavtt dhorpacho proitn kelo, punn to tanchea hatantlo sutton gelo.

40 Uprant to Jordan nhoim-chea poltoddi, survatek Juanv bautizm ditalo tea zagear gelo ani thoinch ravlo. 41 Tednam zaite lok tachea lagim aile ani mhunnonk lagle: “Juanvan ekui vizmit korunk na, punn tannem hea munxa vixim sanglolem tem soglem khorem zalem.” 42 Thoim zaitea zannamnim Jezucher bhavarth dovorlo.

11 Bethani ganvant, Lazar nanvacho ek munis duent aslo, tacheo bhoinno Marie ani Martha pasun teach ganvant ravtalim. 2 Khorem mhunnttlear, Somiacher pormollit tel votoun tache paim aplea kensamnim puslole ti hich Marie asli; duent aslo to Lazar hea Mariecho bhav aslo. 3 Tor Lazarachea bhoinnamnim Jezuk oxi khobor dhaddli: “Somia, tuzo mogacho ixtt duent asa.” 4 Punn Jezun hem aikolem tednam tannem mhunnttlem: “Hem duens moronn nhoi punn Devak mhoima haddttolem, ani tea udexim Devachea Putak mhoima mellttoli.”

5 Jezu Marthacho, tichea bhoinnicho ani Lazaracho khub mog kortalo. 6 Punn Lazar duent asa mhunn tannem aikolem tednam to jea zagear aslo thoinch anik don dis ravlo. 7 Tea uprant tannem xisank mhunnttlem: “Cholat, ami porot Judeiant vochum-ia.” 8 Tednam xisamnim taka mhunnttlem: “Rabʼbi,* halinch Judeiache lok tuka fatraun jivexim marunk sodhtale, tori astana tum thoim porot voita?” 9 Jezun zobab dilo: “Disak 12 voram astat nhoi? Zor konnui disachea uzvaddan cholta zalear to kiteakuch addkhollonk xokona, karonn to sonvsaracho uzvadd polloita. 10 Punn konnui ratcho cholta zalear to addkhollon poddtta, karonn tachea bhitor uzvadd na.”

11 Hem sanglea uprant Jezun tankam mhunnttlem: “Amcho ixtt Lazar nhidla punn hanv taka utthounk thoim voitam.” 12 Xisamnim taka mhunnttlem: “Somia, to nhidla zalear, to boro zatolo.” 13 Khorem mhunnttlear Jezu, Lazar mela mhunn sangtalo. Punn to visov gheunk nhidla oxem xisank dislem. 14 Taka lagon Jezun tankam spoxtt utramnim sanglem: “Lazar melo. 15 Ani hanv thoim naslom mhunn mhaka khuxalkai bhogta, karonn atam hanv jem korchom asam taka lagon tumcho bhavarth vaddttolo. Cholat tor, atam ami tachea lagim vochom-ia.” 16 Taka lagon, Zunvllo mhunnttale tea Thomasan urlolea xisank mhunnttlem: “Cholat, ami pasun tachea sangata vochom-ia, hea toren ami-i tachea sangata moronk xoktole.”

17 Jezu Bethanient pavlo tednam Lazarak dholint* dovrun char dis zalʼle mhunn taka kollon ailem. 18 Bethani Jeruzalema thaun fokot tin kilometr* pois aslem. 19 Zaite Judev lok Martha ani Mariek tancho bhav mela mhunn bhuzvonn diunk ailʼle. 20 Jezu ieta mhunn Marthan aikolem tednam ti taka mellonk geli; punn Marie ghorantuch boson ravli. 21 Marthan Jezuk mhunnttlem: “Somia, tum hanga aslo zalear mhozo bhav morcho naslo. 22 Punn, mhaka atam pasun khatri asa ki tum Deva lagim jem kitem magtolo tem to tuka ditolo.” 23 Jezun tika mhunnttlem: “Tuzo bhav jivont zatolo.” 24 Marthan taka mhunnttlem: “Xevottachea disa melolim jivont zatolim tednam to jivont zatolo mhunn hanv zannam.” 25 Jezun tika mhunnttlem: “Meloleank jivont korpi ani tankam jivit diupi hanvuch. Mhojer bhavarth dovorta to melo zalear pasun jivont zatolo. 26 Jive asat ani mhojer bhavarth dovortat te sogle kednanch morche nant. Hem tum patieta?” 27 Tinnem mhunnttlem: “Hoi Somia, sonvsarant ieuncho aslo to Devacho Put Krist tunch mhunn hanv patietam.” 28 Hem sanglea uprant, ti thoim thaun geli ani tinnem vochon apli bhoinn Mariek hollu sanglem: “Guruji aila, ani to tuka apoita.” 29 Hem aikotanch, Marie rokddich utthli ani taka mellonk geli.

30 Jezu azun pasun ganvant bhitor ieunk naslo, punn to taka Martha mellʼlloli thoinch aslo. 31 Mariek bhuzvonn ditale tea Judevamnim ti utthon bhair voita tem polloilem tednam te-ui tichea fattlean gele, karonn ti dholi* lagim roddonk voita oxem tankam dislem. 32 Marie Jezu aslo tea zagear pavlea uprant, tinnem Jezuk polloilo ani tachea paim-am poddon oxem mhunnttlem: “Somia, tum hanga aslo zalear mhozo bhav morcho naslo.” 33 Marie ani tichea sangata ailole Judev roddttat tem polloun Jezun ek vhoddlo suskar ghetlo ani tachem kalliz bhoron ailem. 34 Tannem vicharlem: “Tumi taka khoim dovorla?” Tannim mhunnttlem: “Somia, ieo ani polloi.” 35 Jezuchea dolleantlean dukam vhanvonk laglim. 36 Hem polloun Judevamnim mhunnttlem: “Polloiat, ho tacho kitlo mog kortalo!” 37 Punn thoddeamnim mhunnttlem: “Tannem kuddʼddea munxak dixtt dili zalear tachean hacho jiv kiteak salvar korunk zaunk na?”

38 Jezun porot ek vhodd suskar ghetlo ani to taka dovorlolo tea fondda lagim gelo. Khorem mhunnttlear, taka eka dholint* dovorlolo, ani tachea darar ek vhoddlo fator lailʼlo. 39 Jezun mhunnttlem: “Fator kuxin kaddat.” Tednam melolea munxachi bhoinn Marthan taka mhunnttlem: “Somia, atam mhunnttlear taka ghann marta astoli, karonn to melear char dis zaun gele.” 40 Jezun tika mhunnttlem: “Tunvem Devacher bhavarth dovorlo zalear tum Devachi mhoima polloitoli mhunn hanvem tuka sangonk na?” 41 Tor tannim fator kuxin kaddlo. Uprant, Jezun mollbar polloun oxem mhunnttlem: “Bapa, tunvem mhojem aikolem mhunn hanv tuzo upkari. 42 Tum sodanch mhojem aikota mhunn hanv zannam; punn tunvem mhaka dhaddla mhunn hanga ektthaim zalolea lokamnim bhavarth dovorcho mhunn hanvem oxem mhunnttlem.” 43 Hem sanglea uprant, tannem mottʼttean mhunnttlem: “Lazar, bhair ieo!” 44 Tednam melolo to munis bhair ailo, tache hat-paim kopddeachea pottʼtteamnim bandlole, ani tachea tonddar ek kopddo bandlolo. Jezun tankam mhunnttlem: “Tache pottʼtte soddat ani taka vochonk diat.”

45 Oxe toren, Marie lagim ailolea zaitea Judevamnim Jezun kitem kelʼlem tem polloilem ani tacher bhavarth dovorlo, 46 punn thoddeamnim tannem kitem kelʼlem tem vochon Farizevank sanglem. 47 Tednam mukhel iadnikamnim ani Farizevamnim Mha-sobha* apoili ani mhunnttlem: “Ho munis zaitim vizmitam korta, ami kitem korum-ia? 48 Haka ami osoch soddlo zalear sogle lok tacher bhavarth dovrunk lagtole, ani Romi lok ieun amcho zago* ani amchem raxttr donui amchea koddlean gheun voitole.” 49 Punn tanchea modlo eklo, zachem nanv Kaifas aslem, ani to tea vorsa mha-iadnik aslo, tannem mhunnttlem: “Tumkam kainch khoborna, 50 akʼkhem raxttr kabar zaunchea bodlek ek munis sogleam lokam khatir melo zalear tem tumcheach faideak mhunn tumi chintinant.” 51 Hem tannem apnnench chintun sangonk na, punn tea vorsa to mha-iadnik aslo dekhun Jezu akʼkhea raxttra pasot mortolo mhunn tannem bhasaunni keli. 52 Ani fokot tea raxttra pasotuch nhoi punn hanga-thoim ximpoddlolea Devachea bhurgeam pasot to morcho aslo. 53 Taka lagon tea disa thaun te Jezuk jivexim marunk ievzonn korunk lagle.

54 Tor tednam thaun Jezu Judevam modem ukteponnim bhonvona zalo, punn to vattar soddun, to oronnʼnneant* lagim aslolea Efraim mhunnttlolea xarant gelo, ani aplea xisam sangata thoim ravonk laglo. 55 Judevanchi Paskachi porob lagim pavloli, ani khedde ganvantle zaite lok Paskachea porbe poilim kaidea pormonnem nitoll zaunk Jeruzalemant gele. 56 Thoim te Jezuk sodhunk lagle, ani Devmondirant ube ravon eka-mekak oxem mhunnonk lagle: “Tumkam kitem dista? To porbek ieunchoch na?” 57 Jezu khoim asa tem konnankui kollʼllem zalear tannim ieun apleak sangchem mhunn mukhel iadnikamnim ani Farizevamnim hukum dilʼlo, jea udexim te taka dhorunk xoktale.

12 Paskachea porbechea sov dis poilim, Jezu Bethanient pavlo. Jezun meloleantlo jivont kelʼlo to Lazar thoinch ravtalo. 2 Jezu pasot thoim jevonn dovorlolem, ani Martha tankam vaddttali. Jezu sangata jevnnak boslolea lokam modem Lazar pasun aslo. 3 Marien sumar 327 gram* xudʼdh ani khub mharog zottamanxechem* pormollit tel Jezuchea paim-ar votoun aplea kensamnim tache paim pusle. Akʼkhem ghor tea telachea pormollan bhorlem. 4 Punn Jezuchea xisam modlo eklo, zo taka dhorun diuncho aslo, tea Judas Iskariotan mhunnttlem: 5 “Hem pormollit tel 300 dinarank* vikun te poixe goribank kiteak diunk nant?” 6 Hem tannem goribanchi kallji asli taka lagon mhunnonk na, punn to ek chor aslo, ani tachea lagim dovorlolea poixanchea boksantle to poixe chortalo. 7 Tednam Jezun mhunnttlem: “Asum-di, hea vorvim mhoji kudd purunk lagon ti poilinch toiari korunk xoktoli. 8 Karonn gorib tor tumchea sangata sodanch astole, punn hanv tumchea sangata sodanch aschona.”

9 Tednam mhunnttlear, Jezu thoim asa mhunn Judevank kollon ailem, ani zaite Judev takach nhoi punn tannem meloleantlo jivont kelʼlea Lazarak pasun pollounk thoim aile. 10 Atam mukhel iadnikamnim Lazarak pasun marun uddounchi ievzonn keli, 11 karonn taka lagon zaite Judev thoim voitale ani Jezucher bhavarth dovortale.

12 Dusrea disa porbek ailolea zaitea lokamnim Jezu Jeruzalemant ieta mhunn aikolem. 13 Tor te khazurachea zhaddacheo chuddtteo gheun taka mellonk gele. Te mottʼttean oxem mhunnonk lagle: “Ami tujea lagim vinoti kortat, haka salvar kor! Jehovachea* nanvan ieta tea Izraelachea Razacher besanv asum!” 14 Ek gaddvachem por mellʼllem tednam Jezu tacher boslo, karonn oxem boroilʼlem aslem: 15 “Sionachea dhuve, bhienaka. Polloi! Tuzo raza gaddvachea poracher boson ieta.” 16 Survatek hea vostuncho orth tachea xisank somzonk na, punn magir Jezuk mhoima mellʼlli tednam, boroilʼlem aslem toxench tannim tachea thaim kelem mhunn tankam ugddas ailo.

17 Jezun Lazarak dholintlo* koso bhair apoilo ani taka meloleantlo koso jivont kelo tem polloilʼle te lok tea vixim dusreank govai di-it ravle. 18 Hea vizmita vixim tannim aikolʼlem dekhun ho lokancho zomo Jezuk mellonk ailʼlo. 19 Tednam Farizev eka-mekak mhunnonk lagle: “Polloiat! Ami kainch korunk xokonant, akʼkho sonvsar tachea fattlean voita.”

20 Porbechea vellar bhokti korunk ailʼle tea lokam modem thodde Grik pasun asle. 21 Taka lagon te Filipa lagim aile, zo Galilientlea Bethsaida zagear ravtalo. Tannim tachea lagim ieun vinoti korun mhunnttlem: “Dhonia, amkam Jezuk mellonk zai.” 22 Filipan vochon Andrek sanglem. Ani Andren ani Filipan vochon Jezuk sanglem.

23 Punn Jezun tankam zobab diun mhunnttlem: “Munxachea Putak mhoima mellcho vell atam ailo. 24 Hanv tumkam sot tench sangtam, gonvacho ek danno zomnir poddon morona tea meren to ekuch danno urta; punn to morta tednam to zaitem pik dita. 25 Zo aplea jivacho mog korta to aplo jiv hogddaita, punn zo hea sonvsarant aplea jivacho dves korta to aplo jiv sasnachea jivita pasot samballtta. 26 Mhoji seva korunk sodhta tannem mhojea fattlean ieunchem, ani hanv asa thoim mhozo sevok pasun astolo. Mhoji seva korta, taka mhozo Bap man ditolo. 27 Atam hanv anik kitem mhunnom? Hanv khub dukhi asam. Mhojea Bapa, hea vella thaun mhaka salvar kor. Punn ho vell mhojer ieuncho mhunn hanv prithumer ailam. 28 Bapa, tujea nanvachi mhoima kor.” Tednam sorgar thaun oso avaz ailo: “Hanvem tachi mhoima kelea ani porot kortolom.”

29 Bhonvtonnim ube aslolea lokamnim ho avaz aikolo tednam goddgodd marta oxem te mhunnonk lagle. Dusreamnim mhunnttlem: “Ek devdut tachea lagim uloilo.” 30 Jezun mhunnttlem: “Ho avaz mhojea pasot nhoi, punn tumchea pasot aikonk aila. 31 Atam hea sonvsarachi zhoddtti zata; ani hea sonvsarachea odhikareak bhair uddoitole. 32 Mhaka hea prithume thaun voir ubartole tednam hanv soglea torechea lokank mhojea lagim voddun haddttolom.” 33 Hem tannem apunn koslem moronn morcho aslo tem dakhounk lagon mhunnttlolem. 34 Tednam lokamnim taka mhunnttlem: “Krist sodankal urtolo mhunn ami Kaideant aikolam. Toxem zalear, munxachea Putak voir ubartole oxem tum koso mhunnonk xokta? Ho munxacho Put konn?” 35 Tednam Jezun tankam mhunnttlem: “Tumchea modem uzvadd thoddoch vell astolo. Uzvadd tumchea sangata aso poriant uzvaddant cholot ravat, hea toren kallokh tumcher zoit vhoronk xokchona. Kallkhant cholta taka apunn khoim voita tem khobor asona. 36 Tumchea modem uzvadd aso poriant, tea uzvaddacher bhavarth dovrat, ani tumkam uzvaddache put mhunnttole.”

Hem sanglea uprant Jezu thoinchean gelo ani tanchea thaun liplo. 37 Tannem tanchea mukhar zaitim vizmitam* kelʼlim, tori astana te tacher bhavarth dovornasle. 38 Hea toren Izaias provadeachim utram purnn zalim: “Jehova,* ami sanglolea vostuncher konnem bhavarth dovorla? Jehovan* aplea hatachem boll konnak dakhoilam?” 39 Tannim bhavarth kiteak dovrunk na hea vixim sangon Izaias provadi porot oxem mhunntta: 40 “Tankam kednanch dischem nhoi mhunn ani tannim aplea kallzantlean kednanch somzon gheunchem nhoi mhunn, toxench, tannim porot ieunchem nhoi mhunn ani hanvem tankam kednanch bore korche nhoi mhunn tannem tanche dolle kuddʼdde keleat ani tanchim kallzam nibor keleant.” 41 Izaiasan Jezuchi mhoima polloilʼli dekhun tannem tachea vixim hem soglem sanglem. 42 Zaitea odhikareamnim pasun Jezucher bhavarth dovorlolo, punn Farizev tankam sobha-ghorantlean bhair ghalit mhunn bhiranten te ukteponnim Jezuk manun ghenasle; 43 karonn Deva thaun melltta tea mhoime poros munxam thaun melltta ti mhoima tankam chodd avoddttali.

44 Punn Jezun mottʼttean mhunnttlem: “Mhojer bhavarth dovorta to fokot mhojeruch nhoi punn mhaka dhaddla tacher pasun bhavarth dovorta; 45 ani mhaka polloita to mhaka dhaddla taka-i polloita. 46 Mhojer bhavarth dovorta to kallkhant urona zaunk; hanv hea sonvsarant uzvadd zaun ailam. 47 Punn konnui mhojim utram aikota ani tea pormonnem cholona zalear hanv tachi zhoddtti korina; karonn hanv zhoddtti korunk nhoi, punn hea sonvsarak salvar korunk ailam. 48 Mhaka nakarta ani mhojim utram manun ghena tachi zhoddtti korunk anik konn tori asa. Hanvem sanglolem utor xevottachea disa tachi zhoddtti kortolem. 49 Karonn hanvem mhojeach monantlem sangonk na, punn mhaka dhaddla tea mhojea Bapan hanvem kitem sangchem ani kitem ulounchem tea vixim mhaka adnea dilea. 50 Taka lagon, Bap mhaka sangta tench hanv sangtam. Ani tacheo adnea pallop mhunnche sasnachem jivit mhunn hanv zannam.”

13 Paskachea porbe poilinch ho sonvsar soddun Bapa koddem vochpacho aplo vell pavlo mhunn Jezu zannam aslo, taka lagon sonvsarant je tache asle, ani zancho to mog kortalo tancho to xevott poriant mog korit ravlo. 2 Sanjechem jevonn choltalem, ani Soitanan* Jezuk visvasghat korun dhorun diunk Simanvacho put Judas Iskariotachea kallzant poilinch ghatlolem. 3 Bapan sogleo vostu aplea hatant ghatleat ani apunn Deva thaun aila ani Deva lagim voita hem zannam zaun, 4 Jezu jevnnachea meza voilo utthlo ani tannem aplea angacher aslolo kopddo kaddlo ani ek tuvalo gheun aplea bhenddak bandlo. 5 Uprant eka aidonant udok gheun to xisanche paim dhuvunk laglo ani aplea bhenddak bandlolea tuvalean te pusunk laglo. 6 To Simanv Pedru lagim ailo tednam tannem Jezuk mhunnttlem: “Somia, tum mhoje paim dhuita?” 7 Jezun taka mhunnttlem: “Hanv jem kortam tem tuka atam somzona, punn tuka uprant somzotolem.” 8 Pedrun taka mhunnttlem: “Hanv mhoje paim tuka kednanch dhuvunk diunchona.” Tednam Jezun mhunnttlem: “Hanv tuje paim dhuina zalear, tuka mhojea borabor kainch vantto na.” 9 Simanv Pedrun taka mhunnttlem: “Somia, toxem zalear mhoje paim-ench nhoi punn mhoje hat ani tokli poriant dhui.” 10 Jezun taka mhunnttlem: “Zo konn nhanvla tannem fokot paim dhuilear puro, to purnn toren xudʼdh asa. Tumi xudʼdh asat, punn sogle nant.” 11 Apleak konn visvasghat kortolo tem taka khobor aslem. Teach pasot tannem mhunnttlem: “Tumi sogle xudʼdh nant.”

12 Tanche paim dhuvun zatoch to aple voile kopdde ghalun porot meza lagim ieun boslo ani tannem tankam mhunnttlem: “Hanvem kitem kelam tem tumi somzole? 13 Tumi mhaka ‘Guruji’ ani ‘Somi’ mhunnttat tem sarkem, karonn hanv toch. 14 Hanvem Somi ani Guruji zaunui tumche paim dhuile zalear tumi-i eka-mekache paim dhuvunk zai.* 15 Hanvem tumchea pasot ek dekh dovorlea. Zoxem hanvem tumkam kelam, toxem tumi-i korat. 16 Hanv tumkam sot tench sangtam, ek chakor aplea dhonia poros vorto asona, ani zaka dhaddla to konnem dhaddla tachea poros vorto asona. 17 Tumi heo vostu zannam zaleat, punn teo tumi kortat zalear tumi khuxal. 18 Hanv tumchea sogleam vixim uloina; hanvem zankam vinchun kaddleat tankam hanv vollkhotam. Punn Devachea utrant jem boroilʼlem asa tem purnn zaunk zai: ‘Zo mhojea borabor unddo khatalo toch mhojea add zala.’* 19 Jem ghoddpachem asa tem hanv tumkam atanch sangtam, oxe toren hem mhojea sovem ghoddtta tednam Devachea utrant hem mhojea vixim sanglolem mhunn tumi visvas dovortole. 20 Hanv tumkam sot tench sangtam, hanv dhaddttam taka zo ieukar dita to mhaka-i ieukar dita, ani zo mhaka ieukar dita to mhaka dhaddla taka-i ieukar dita.”

21 Hem sanglea uprant, Jezu monantlea-monant dukhi zalo ani tannem ukteponnim sanglem: “Hanv tumkam sot tench sangtam, tumchea modlo eklo mhozo visvasghat korun mhaka dhorun ditolo.” 22 Hem aikolea uprant xis eka-mekachea tonddak pollounk lagle, karonn Jezu konnam vixim uloita hem tankam somzonk na. 23 Jezu jea xisacho khub mog kortalo to tachea kuxik* jevnnak boslolo. 24 Taka lagon Simanv Pedrun tokli haloun khunna keli ani tea xisak vicharlem: “To konnam vixim uloita tem amkam sang.” 25 Tednam tea xisan fattlean vollon Jezuchea hoddʼddea lagim bagon taka vicharlem: “Somia, to konn?” 26 Jezun zobab dilo: “Hanv zaka unddeacho kuddko buddoun ditam toch to.” Tor tannem unddeacho kuddko buddoun Simanv Iskariotacho put, Judasak dilo. 27 Judasan to unddeacho kuddko ghetlea uprant Soitan tachea bhitor sorlo. Tor Jezun taka mhunnttlem: “Tum kitem korta tem begin kor.” 28 Punn jevnnak boslolea modlea konnankuch Jezun oxem kiteak mhunnttlem tem somzonk na. 29 Poixe dovorpachem boks Judasa lagim astalem, taka lagon thoddea xisank dislem ki Jezu taka sangta, “Porbe pasot jeo vostu zai teo vikteo ghe,” vo tannem goribank kitem-i dan diunchem. 30 Tea pasot unddeacho kuddko ghetlea uprant, Judas rokddoch bhair sorlo. Tednam rat zalʼli.

31 To bhair soron gelea uprant Jezun mhunnttlem: “Atam munxachea Putak mhoima melltta, ani tachea udexim Devak mhoima melltta. 32 Dev svota tachi mhoima kortolo, ani to oxem beginuch kortolo. 33 Mhojea mogall bhurgeamno, hanv tumchea sangata anik thoddoch vell asa. Tumi mhaka sodhtole; ani zoxem hanvem Judevank mhunnttlolem toxem hanv tumkam-i sangtam, ‘Hanv voita thoim tumi ieunk xokonant.’ 34 Hanv tumkam ek novi adnea ditam, tumi eka-mekacho mog korat. Zoso hanvem tumcho mog kela, tosoch tumi-i eka-mekacho mog korat. 35 Tumkam eka-mekacho mog asa zalear hea vorvim tumi mhoje xis mhunn sogleank kollon ietolem.”

36 Simanv Pedrun taka vicharlem: “Somia, tum khoim voita?” Jezun taka zobab dilo: “Hanv voitam tea zagear tum atam mhojea fattlean ieunk xokona, punn uprant tum ietolo.” 37 Pedrun taka mhunnttlem: “Somia, atam hanv tujea fattlean kiteak ieunk xokona? Hanv tujea pasot mhozo jiv pasun diunk toiar asam.” 38 Jezun taka zobab dilo: “Tum mhojea pasot tuzo jiv ditolo? Hanv tuka sot tench sangtam, tunvem mhaka tin pavtti nakarlea bogor kombo sad ghalchona.”

14 “Tumchim kallzam dukhi zaunk dium nakat. Devacher bhavarth dovrat; ani mhojerui bhavarth dovrat. 2 Mhojea Bapachea ghorant ravonk zaito zago asa. Zago naslo zalear hanv tumkam sangchom naslom, punn hanv tumchea pasot zago toiar korunk voitam. 3 Toxench, hanvem vochon tumchea pasot zago toiar kelea uprant hanv porot ietolom, ani tumkam mhojea ghorant gheun voitolom, jea vorvim zoim hanv asa thoim tumi-i astole. 4 Jea zagear hanv voitam, thoinchi vatt tumi zannant.”

5 Thomasan taka mhunnttlem: “Somia, tum khoinchea zagear voita tem ami nokllo. Tor thoinchi vatt ami koxe zannam zatole?”

6 Jezun taka mhunnttlem: “Vatt, sot ani jivit hanvuch. Konnuch mhojea vorvim ailea xivai Bapa lagim pavona. 7 Tumi mhaka vollkhotale zalear, tumi mhojea Bapakui vollkhota asle. Atam thaun tumi taka vollkholeat, khorem mhunnttlear, tumi taka polloila.”

8 Filipan taka mhunnttlem: “Somia, amkam Bap dakhoi, itlench amkam puro.”

9 Jezun taka mhunnttlem: “Filip, itlea tempa thaun hanv tumchea borabor asa, tori astana, tunvem mhaka vollkhonk na? Zannem mhaka polloila tannem Bapakui polloila. Tor, ‘Amkam Bap dakhoi,’ oxem tum koso mhunntta? 10 Hanv mhojea Bapachea ekvottant asa ani Bap mhojea ekvottant asa mhunn tumi patienant? Hanv sangtam tem mhojeach monantlem sangona, punn Bap zo mhojea sangata ekvottant asa toch mhojea udexim aplem kam korta. 11 Hanv Bapa sangata ekvottant asa ani Bap mhojea sangata ekvottant asa mhunn visvas dovrat; na zalear, hanvem kelolea kamank lagon tori mhojer visvas dovrat. 12 Hanv tumkam sot tench sangtam, zo mhojer bhavarth dovorta to-ui hanv kortam tim kamam kortolo; ani hea kamam poros vortim kamam kortolo, karonn hanv mhojea Bapa sorxim voitam. 13 Toxench, mhojea nanvan tumi jem magtat tem hanv kortolom, karonn puta udexim Bapak mhoima mellttoli. 14 Mhojea nanvan tumi kitem-i magot zalear, hanv tem kortolom.

15 “Tumi mhozo mog kortat zalear tumi mhojeo adnea pallttole. 16 Hanv Bapa lagim magtolom ani to tumkam anik ek modot korpi* ditolo zo tumchea sangata sodankal astolo. 17 To modot korpi mhunnttlear sotachi povitr xokti, ti sonvsarak mellonk xokona, karonn sonvsar ti pollounk xokona, ani tika vollkhona. Tumi tika vollkhotat, karonn ti tumchea sangata asa ani tumchea modem asa. 18 Hanv tumkam dukhant* soddun vochona. Hanv tumchea lagim porot ietam. 19 Atam thoddoch vell asa, uprant sonvsar mhaka kednanch pollounchona, punn tumi mhaka polloitole, karonn hanv jivo asa ani tumi-i jive astole. 20 Tea disa tumi zannam zatole ki hanv mhojea Bapa sangata ekvottant asa ani tumi mhojea sangata ekvottant asat ani hanv tumchea sangata ekvottant asa. 21 Zachea lagim mhojeo adnea asat ani zo teo palltta, to mhozo mog korta. Mhozo mog korta tacho mhozo Bap mog kortolo, ani hanv pasun tacho mog kortolom ani hanv taka spoxttponnim mhoji vollokh ditolom.”

22 Judasan (ho Judas Iskariot nhoi) taka mhunnttlem: “Somia, kiteak lagon tum tuji spoxttponnim vollokh sonvsarak nhoi punn amkam diunk sodhta?”

23 Jezun taka zobab dilo: “Konnui mhozo mog korta zalear, to mhojem utor pallttolo, ani mhozo Bap tacho mog kortolo, ani ami tachea lagim ieun tachea sangata ravtole. 24 Zo konn mhozo mog korina to mhojim utram pallina. Tumi aikotat tem utor mhojem nhoi, punn mhaka dhaddla tea Bapachem.

25 “Hanv tumchea sangata astana hanvem heo vostu tumkam sangleat. 26 Punn Bap mhojea nanvan dhaddtta to modot korpi, mhunnche povitr xokti, tumkam sogleo vostu xikoitolo, ani hanvem jem tumkam sanglam tem soglem tumkam ugddas korun ditolo. 27 Hanv tumkam xanti diun voitam; hanv tumkam mhoji xanti ditam. Punn sonvsar dita tea toren hanv tumkam ti dina. Tumchim kallzam dukhi zaunk dium nakat vo bhiranten oskot zainakat. 28 ‘Hanv voitam ani tumchea lagim porot ietolom,’ oxem hanvem mhunnttlam tem tumi aikolam. Tumi mhozo mog kortale zalear, hanv Bapa lagim voitam mhunn tumi khuxal zata asle, karonn Bap mhojea poros vorto. 29 Oxem ghoddtta tednam tumi visvas dovorcho mhunn tem ghoddchea poilinch hanvem tumkam sanglam. 30 Atam hanv tumchea lagim chodd ulounchona, karonn hea sonvsaracho odhikari ieta, ani taka mhojer kainch odhikar na. 31 Punn hanv Bapacho mog kortam hem sonvsarak kollchem mhunn, Bapan mhaka adnea dilea toxench hanv kortam. Utthat, atam ami hanga thaun vochom-ia.

15 “Hanv drakxanchi khori val, ani mhozo Bap xetkar. 2 Mhozo dor ek khando zo foll dina taka to katrun uddoita, ani dor ek khando zo foll dita taka anik foll lagchem mhunn to nitoll korta. 3 Hanvem tumkam utor sanglam dekhun tumi poilinch nitoll asat. 4 Mhojea sangata ekvottant ravat, ani hanv tumchea sangata ekvottant ravtolom. Ek khando jea meren drakxanchea valik zuddlolo asa, tea meren foll dita punn to vali thaun vegllo kelo zalear apunnuch foll diunk xokona, teach bhaxen tumi pasun mhojea sangata ekvottant ravonant zalear foll diunk xokonant. 5 Hanv drakxanchi val ani tumi khande. Zo mhojea sangata ekvottant ravta ani zachea sangata hanv ekvottant ravtam, to zaitim follam dita; mhojea thaun veglle zaun tumi kainch korunk xokonant. 6 Zor konnui mhojea sangata ekvottant ravona zalear, to oslea khandea sarko asa zaka bhair uddoitat ani to sukon voita. Osle khande lok ektthaim kortat ani ujeant uddoun lhastat. 7 Tumi mhojea sangata ekvottant ravle ani hanvem sanglam tem tumchea kallzant dovorlem zalear tumi jem kitem magtole tem tumkam mellttolem. 8 Tumi zaitim follam dilim, ani mhoje xis mhunn dakhoun dilem zalear mhojea Bapak mhoima melltta. 9 Bapan mhozo mog kela toso hanvem-i tumcho mog kela; mhojea mogant ravat. 10 Zoso hanv Bapacheo adnea pallttam ani tachea mogant ravtam, toxech tumi mhojeo adnea pallit zalear mhojea mogant urtole.

11 “Mhaka mellʼllea ti khuxalkai tumkam mellchi ani tumchem mon khuxalkaien bhorchem mhunn hem soglem hanvem tumkam sanglam. 12 Hanv tumkam hi adnea ditam, hanvem zoso tumcho mog kela tosoch tumi eka-mekacho mog korat. 13 Konnui aplea ixttam pasot jiv dita, hachea poros vhodd mog asonk xokona. 14 Hanv ditam ti adnea tumi pallit zalear tumi mhoje ixtt. 15 Atam hanv tumkam sevok mhunnonam, karonn sevokak aplo dhoni kitem korta tem khobor asona. Punn hanvem tumkam mhoje ixtt mhunnttleat, karonn mhojea Bapa koddlean hanvem jem aikolam tem soglem hanvem tumkam sanglam. 16 Tumi mhaka vinchun kaddunk na, punn hanvem tumkam vinchun kaddleat. Tumi vochon follam diunchim ani tim follam sodankal urchim mhunn hanvem tumkam nemleat, oxem mhojea nanvan tumi Bapa lagim kitem-i maglear, to tumkam ditolo.

17 “Tumi eka-mekacho mog korcho mhunn hanvem tumkam adnea dilea. 18 Sonvsar tumcho dves korta zalear tumchea poilim tannem mhozo dves kela mhunn ugddas dovrat. 19 Tumi sonvsarache asle zalear sonvsar tumkam aple mhunn manun tumcho mog kortolo aslo. Punn tumi sonvsarache nhoi. Tachea bodlek hanvem tumkam sonvsarantle vinchun kaddleat, taka lagon sonvsar tumcho dves korta. 20 Hanvem tumkam jem sanglam tem ugddas dovrat: Ek sevok aplea dhonia poros vhodd nhoi. Tannim mhaka dhumallo dila zalear, te tumkam-i dhumallo ditole; tannim mhojem utor pallʼllam zalear, te tumchem-i utor pallttole. 21 Punn mhojea nanva pasot te tumchea add hem soglem kortole, karonn mhaka dhaddla Taka te vollkhonant. 22 Hanv ieunk naslo ani hanvem tankam heo sogleo vostu sangonk nasleo zalear, tankam patok aschem naslem. Punn atam te aplea patkank lagon kainch nimit diunk xokonant. 23 Mhozo dves korta to mhojea Bapacho pasun dves korta. 24 Konnench korunk na toslim kamam hanvem tanchea modem kelim, him kamam hanvem tanchea modem korunk naslim zalear, tankam koslench patok aschem naslem; punn atam tannim mhaka polloila ani mhozo ani mhojea Bapacho, dogaincho-i dves kela. 25 Hem soglem Devachea utrant boroilʼlem tem purnn zaunk lagon ghoddlem: ‘Tannim karonn nastana mhozo dves kelo.’ 26 Hanv mhojea Bapa thaun tumkam ek modot korpi, mhunnche, sotachi povitr xokti dhaddttolom. Ti Bapa thaun ieta ani tumkam mhojea vixim govai ditoli. 27 Uprant tumi-i mhojea vixim govai diunk zai, karonn tumi survatek thaun mhojea sangata asle.

16 “Tumcho bhavarth halona zaunk* hanvem tumkam hem soglem sanglam. 2 Lok tumkam sobha-ghorantlean bhair ghaltole. Itlench nhoi, oso vell ieta jednam tumkam jivexim marun uddoitat tim soglim apnnem Devachi povitr seva kelea oxem chintʼtolim. 3 Punn tannim Bapak ani mhaka vollkhonk na dekhun te oxem kortole. 4 Tori astana, hanvem tumkam hem sangon dovorlam, oxe toren hem ghoddpacho vell ieta tednam hanvem tumkam hem sanglolem mhunn tumkam ugddas ietolo.

“Hanvem survatekuch hem tumkam sangonk na, karonn hanv tumchea sangata aslom. 5 Punn atam hanv, mhaka dhaddla tachea lagim voitam; tori astana tumchea modlo eklo pasun mhaka, ‘Tum khoim voita?’ mhunn vicharna. 6 Hanvem tumkam hem sanglem mhunn, tumchim kallzam khub dukhi zaleant. 7 Tori astana, hanv tumkam khorench sangtam, hanv tumchea boreak lagonuch voitam. Karonn hanv vochona zalear to modot korpi tumchea lagim ieunchona; punn hanv vochot zalear hanv taka* tumchea lagim dhaddttolom. 8 To ietolo tednam, sonvsarak patok, nit ani zhoddtte vixim khatreche purave ditolo. 9 Sogleant poilim, to patka vixim purave ditolo, karonn te mhojer bhavarth dovornant. 10 Uprant, to niti vixim purave ditolo, karonn hanv Bapa lagim voitam ani tumi mhaka porot pollounche nant. 11 Ani tea uprant to zhoddtte vixim purave ditolo, karonn hea sonvsarachea odhikareachi zhoddtti zalea.

12 “Mhaka anik zaiteo vostu tumkam sangonk zai, punn atam tumi teo somzonk xokonant. 13 Punn to modot korpi, mhunnche sotachi povitr xokti ieta tednam, to tumkam sotachi purnn somzonni mellonk modot kortolo, karonn to aplem svotachem kainch sangchona, punn jem to aikota tench sangtolo, ani jem fuddem ghoddpachem asa tem tumkam kolloitolo. 14 To mhoji mhoima kortolo, karonn to mhoje koddlean jem aikota tench tumkam sangtolo. 15 Jem kitem Bapachem tem soglem mhojem. Taka lagon hanvem tumkam sanglam ki modot korpi mhoje koddlean jem aikota tench tumkam sangtolo. 16 Atam thaun thoddea vella uprant tumi mhaka pollounche nant, ani magir, thoddea vella uprant tumi mhaka polloitole.”

17 Tednam tache thodde xis eka-mekak mhunnonk lagle: “Ho amkam jem sangta tacho orth kitem? ‘Atam thaun thoddea vella uprant tumi mhaka pollounche nant, ani magir, thoddea vella uprant tumi mhaka polloitole,’ ani hacho pasun orth kitem kai, ‘karonn hanv mhojea Bapa lagim voita.’” 18 Taka lagon te mhunnonk lagle: “‘Thoddea vella uprant,’ oxem to mhunntta, tacho orth kitem kai? Ho kitea vixim uloita tem amkam somzona.” 19 Xis prosn vicharunk sodhtat mhunn Jezu zannam aslo, taka lagon tannem tankam mhunnttlem: “Hanvem, ‘Thoddea vella uprant tumi mhaka pollounche nant, ani magir, thoddea vella uprant tumi mhaka polloitole,’ oxem mhunnttlem mhunnon tumi eka-mekak prosn vichartat kitem? 20 Hanv tumkam sot tench sangtam, tumi roddttolim ani mottʼttean bob martolim, punn sonvsar khuxal zatolo; tumkam dukh zatolem, punn uprant tumchem dukh khuxalkaient bodoltolem. 21 Ek bail bhurgeak zolm diupachi asta tednam, tika khub tras zatat karonn ticho vell lagim pavlo, punn bhurgeak zolm dilea uprant ti aple tras visorta, ani aplea bhurgeak polloun khuxal zata. 22 Teach bhaxen, tumi pasun atam dukhi asat; punn hanv tumkam porot mellonk ietolom tednam tumchim kallzam khuxalkaien bhortolim, ani tumchi khuxalkai konnuch kaddun vhoronk xokchona. 23 Tea disa tumi mhaka koslech prosn vicharchenant. Hanv tumkam sot tench sangtam, tumi Bapa lagim kitem-i maglem zalear to tumkam mhojea nanvan tem ditolo. 24 Atam meren, tumi mhojea nanvan ekui vost magonk na. Magat ani tumkam mellttolem, ani hea toren tumi khub khuxal zatole.

25 “Hanvem heo sogleo vostu tumkam udharonnam diun sangleat. Punn oso vell ieta jednam hanv tumchea lagim udharonnam diun ulounchona, punn Bapa vixim soglem spoxtt ritin sangtolom. 26 Tea disa tumi mhojea nanvan Bapa lagim magnnem kortole. Hacho orth oso nhoi ki hanv tumchea pasot Bapa lagim vinoti kortolom. 27 Bap tumcho mog korta, karonn tumi mhozo mog kortat ani hanv Bapa thaun ailam mhunn tumi visvas dovorla. 28 Hanv Bapa thaun hea sonvsarant ailom. Atam hanv sonvsar soddun Bapa lagim voitam.”

29 Tachea xisamnim mhunnttlem: “Polloi! Atam tum amkam udharonnam diun nhoi punn spoxttponnim sangta. 30 Tuka soglem khobor asa ani konnench tuka prosn vicharpachi goroz na mhunn atam amkam somzolem. Haka lagon tum Bapa thaun aila mhunn amkam visvas asa.” 31 Jezun mhunnttlem: “Atam tori tumi visvas dovortat? 32 Polloiat! To vell ieta, khorem mhunnttlear, ailo, jednam tumi sogle hevtten-tevtten ximpoddttole ani ap-aplea ghora voitole ani mhaka ekttoch soddttole. Tori astana, hanv ekttom na, karonn Bap mhojea sangata asa. 33 Tumkam mhojea udexim xanti mellchi mhunn hanvem hem soglem tumkam sanglam. Sonvsarant tumcher tras ietolech, punn dhir dhorat! Hanvem sonvsaracher zoit vhelam.”

17 Hem uloilea uprant, Jezun mollbar polloun mhunnttlem: “Bapa, vell ailo. Tujea putan tuji mhoima korunk tujea putak mhoima di. 2 Tunvem taka dilea tea sogleank tannem sasnachem jivit diunchem mhunn tunvem soglea munxancher taka odhikar dila. 3 Sasnachem jivit mellonk tannim tuka, ekleach khorea Devak, ani zaka tunvem dhaddla, tea Jezu Kristak vollkhon ghevop* gorjechem asa. 4 Tunvem mhaka dilam tem kam purnn korun hanvem tuka prithumer mhoima dilea. 5 Taka lagon, Bapa, ji mhoima mhaka sonvsarachea survate poilim tujea sangata astana asli ti mhoima tujea sangata mhaka porot di.

6 “Tunvem sonvsarantlea jea lokank mhaka dileat tankam hanvem tujem nanv kollit kelam. Te tuje asle, ani tunvem te mhaka dileat, ani tannim tujem utor samballʼllam.* 7 Tunvem dileat teo sogleo vostu tujea thaun asat mhunn atam te zannam zale; 8 karonn tunvem mhaka sangleat teo vostu hanvem tankam kolloileat, tannim teo vostu manun ghetleat, ani hanv tujea thaun ailam mhunn tankam ghott khatri zalea, ani tunvem mhaka dhaddla mhunn tannim visvas dovorla. 9 Hanv tanchea pasot vinoti kortam; hanv sonvsara pasot vinoti korina, punn tunvem mhaka dileat tanchea pasot kortam, karonn te tuje; 10 ani mhojea lagim asa tem soglem tujem ani tujem tem mhojem; ani hanchea modem mhaka mhoima mellʼllea.

11 “Itlench nhoi, atam thaun hanv hea sonvsarant aschom na, karonn hanv tujea lagim ietam, punn te hea sonvsarant astole. Povitr Bapa, tunvem mhaka dilam tea tujea nanva pasot tancho samball kor, oxe toren ami ek asat* toxe te-ui ek zaum.* 12 Hanv tanchea sangata aslom tednam tunvem mhaka dilam tea tujea nanva pasot hanv tancho samball kortalom. Hanvem tanchi rakhonn keli ani tanchea modlea ekleacho-i nas zaunk na. Fokot nasachea putachem nisontton zalem, karonn Devachea utrant boroilʼlem tem purnn zaunk zai aslem. 13 Punn atam hanv tujea lagim ietam. Mhaka mellʼllea ti khuxalkai purnn toren tankam-i mellchi mhunn hanv sonvsarant asa tednanch hem tankam sangtam. 14 Hanvem tujem utor tankam dilam, punn sonvsaran tancho dves kela, karonn hanv zoso hea sonvsaracho nhoi, toxech te-ui hea sonvsarache nhoi.

15 “Tankam sonvsarantle kadd mhunn hanv tujea lagim vinoti korina, punn tankam noxtteachea* hatantle rakh mhunn hanv tujea lagim vinoti kortam. 16 Hanv hea sonvsaracho nhoi, toxench te-ui hea sonvsarache nhoi. 17 Sota udexim tankam povitr kor; tujem utor sot. 18 Tunvem mhaka sonvsarant dhaddla, teach toren hanvem-i tankam sonvsarant dhaddleat. 19 Ani tannim pasun sota udexim povitr zaunche mhunn hanv tanchea pasot mhakach povitr kortam.

20 “Hanv fokot tanchea pasot vinoti korina, punn je tanchem utor aikon mhojer bhavarth dovortat tankam lagon pasun vinoti kortam. 21 Tannim sogleamnim ek zaunche mhunn hanv hi vinoti kortam. Bapa, zoso tum mhojea sangata ekvottant asa ani hanv tujea sangata ekvottant asa, toxench tannim-i amchea borabor ekvottant asche. Hea udexim tunvem mhaka dhaddla mhunn sonvsar visvas dovortolo. 22 Zoxe ami ek asat toxe tannim-i ek zaunche mhunn ji mhoima tunvem mhaka dilea ti hanvem tankam dilea. 23 Hanv tanchea borabor ekvottant asam ani tum mhojea borabor ekvottant asa dekhun tannim-i purnn toren ekvottant aschem. Hea ritin tunvem mhaka dhaddla ani zoso tunvem mhozo mog kela tosoch tunvem tancho-i mog kela mhunn sonvsarak kollon ietolem. 24 Bapa, je lok tunvem mhaka dileat te hanv astolom thoim mhojea sangata asche mhunn mhoji khuxi asa, oxe toren tunvem mhaka dilea ti mhoima te pollounk xoktole, karonn sonvsarachi survat zaunchea poilim thaun tunvem mhozo mog kela. 25 Nitivont Bapa, sonvsar tuka vollkhonk na, punn hanv tuka vollkhotam, ani tunvem mhaka dhaddla mhunn tannim vollkhon ghetlam. 26 Hanvem tankam tujem nanv kolloilam ani fuddem-i kolloitolom, oxe toren tunvem zoso mhozo mog kela to tanchea-i modem urom ani hanv tanchea sangata ekvottant urom.”

18 Hem sanglea uprant Jezu aplea xisam sangata Kidron Vhallachea* poltoddi gelo. Thoim ek bag asli, to ani tache xis tea bagent gele. 2 Jezu zaitea pavtti aplea xisam sangata hea zagear voitalo. Tacho visvasghat korun taka dhorun diupi Judas pasun ho zago zannam aslo. 3 Taka lagon Judas aplea borabor soinikanchea eka pongddak, toxench mukhel iadnikanchea ani Farizevanchea rakhonndarank thoim gheun ailo. Tanchea hatant dive ani hotʼtearam aslim. 4 Apnnak kitem-kitem ghoddttolem tem Jezu zannam aslo, taka lagon fuddem soron tannem tankam mhunnttlem: “Tumi konnank sodhtat?” 5 Tannim mhunnttlem: “Nazaretkar Jezuk.” Jezun tankam mhunnttlem: “Hanvuch to.” Tanchea sangata tacho visvasghat korpi, Judas pasun ubo aslo.

6 Punn, “Hanvuch to,” oxem Jezun mhunnttlem tednam te fatti sorle ani zomnir poddle. 7 Taka lagon, Jezun tankam porot vicharlem: “Tumi konnank sodhtat?” Tannim mhunnttlem: “Nazaretkar Jezuk.” 8 Jezun tankam mhunnttlem: “To hanvuch mhunn hanvem tumkam sanglam. Tumi mhaka sodhtat zalear hankam vochonk diat.” 9 “Zankam tunvem mhaka dilʼle, tantuntlea ekleak pasun hanvem hogddaunk na,” him utram purnn zaunchim mhunn oxem ghoddlem.

10 Simanv Pedru lagim tolvar asli, tannem ti tolvar kaddli ani mha-iadnikachea sevokacho uzvo kanuch katrun uddoilo. Tea sevokachem nanv Malkus aslem. 11 Punn Jezun Pedruk mhunnttlem: “Tolvar tichea zagear dovor. Bapan mhaka zo pelo dila to hanvem pieuncho nhoi kai?”

12 Tednam soinikamnim, senapotin ani Judevanchea rakhonndaramnim Jezuk dhorlo ani bandlo. 13 Te taka poilim Annasa koddem gheun gele, karonn to tea vorsacho mha-iadnik Kaifasacho sasupai aslo. 14 Ek munis sogleam khatir morot zalear boreak poddttolem, ho solʼlo khorem mhunnttlear Kaifasanuch Judevank dilʼlo.

15 Simanv Pedru ani anik ek xis, Jezu fattlean gele. Ho xis mha-iadnikachea vollkhicho aslo, ani Jezuchea sangata to mha-iadnikachea ghorachea angnnant gelo, 16 punn Pedru darachea* bhair ubo aslo. Taka lagon to dusro xis, zo mha-iadnikachea vollkhicho aslo, to bhair gelo ani daracher rakhonn korpea lagim uloun Pedruk bhitor gheun ailo. 17 Tednam daracher rakhonn korpi chakornin Pedruk mhunnttlem: “Tum pasun tea munxacho xis nhoi?” Tannem mhunnttlem: “Na, hanv nhoi.” 18 Thonddi asli dekhun thoim sevok ani rakhonndar lakddam zolloun xektale. Pedru pasun tanchea sangata ubo ravon xektalo.

19 Tednam mukhel iadnikan Jezuk tachea xisam vixim ani tachea xikounne vixim thodde prosn vicharle. 20 Jezun zobab dilo: “Hanv akʼkhea sonvsara mukhar uloilam. Hanv sobha-ghorant ani Devmondirant xikoitalom, thoim sogle Judev lok ektthaim zatale, ani hanv lipon kainch ulounk na. 21 Tor tum mhaka kiteak vicharta? Hanvem kitem-kitem sanglam tem zannim mhojem aikolam tankam vichar. Hanvem kitem sanglam tem te zannant.” 22 Tannem oxem mhunnttlem tednam thoim ube aslolea rakhonndara modlea eklean Jezuchea polear thapott marlem ani mhunnttlem: “Tum mukhel iadnikak hea toren zobab dita?” 23 Jezun taka zobab dilo: “Hanv uloilam tantunt kitem-i chuk asa zalear mhaka sang; punn hanv sarko uloilam zalear tunvem mhaka kiteak marlo?” 24 Tednam Annasan taka bandlolo aslo tosoch, mha-iadnik Kaifasa koddem dhaddlo.

25 Simanv Pedru thoim ubo ravon xektalo. Tednam lokamnim taka mhunnttlem: “Tum pasun tacho xis nhoi?” Tannem nakarlem ani mhunnttlem: “Na hanv nhoi.” 26 Thoim mha-iadnikacho ek sevok ubo aslo. Pedrun kan katorlolo tea munxacho ho sevok soiro aslo. Tea sevokan mhunnttlem: “Tuka hanvem tachea borabor bagent polloilʼlo nhoi?” 27 Punn Pedrun porot nakarlem, ani teach vellar kombean sad ghatlo.

28 Uprant te Jezuk Kaifasachea ghora koddlean razpalachea rajmahalant gheun gele. To sokallcho vell aslo. Punn te oxudʼdh zaina zaunk ani tankam Paskachem jevonn jevunk mellchem mhunn te rajmahalant bhitor soronk nant. 29 Taka lagon, Pilat bhair ailo ani tannem tankam vicharlem: “Hea munxan kitem guneanv kela mhunn tumi taka mhojea lagim gheun aileat?” 30 Tannim mhunnttlem: “Ho guneanvkari naslo zalear ami taka tujea koddem haddche nasle.” 31 Tednam Pilatan tankam mhunnttlem: “Tumi taka gheun vochat ani tumchea kaidea pormonnem tachi zhoddtti korat.” Judevamnim taka mhunnttlem: “Kaidea pormonnem amkam konnankuch jivexim marcho odhikar na.” 32 Jezun apleak koslea torechem moronn ietolem tem poilinch sanglolem. Jezun jem sanglolem tem purnn zaunchem mhunn oxem ghoddlem.

33 Tednam Pilat porot aplea rajmahalant gelo ani Jezuk apoun tannem vicharlem: “Tum Judevancho Raza?” 34 Jezun zobab dilo: “Tuka hem khorench zannam zaunk zai dekhun tum vicharta, vo tunvem mhojea vixim dusream koddlean aikolam mhunn vicharta?” 35 Pilatan zobab dilo: “Hanv ek Judev kitem? Tuka tujeach lokamnim ani mukhel iadnikamnim mhojea hatant ghatla. Tunvem kitem kelam tem sang!” 36 Jezun zobab dilo: “Mhojem Raj hea sonvsarantlem nhoi. Mhojem Raj hea sonvsarantlem aslem zalear mhaka Judevanchea hatant diuncho nhoi mhunn mhoje sevok zhogoddttole asle. Punn khorem mhunnttlear, mhojem Raj hea sonvsarantlem nhoi.” 37 Pilatan taka mhunnttlem: “Tor, tum raza kitem?” Jezun taka zobab dilo: “Hanv raza oxem tunch mhunntta. Hanv sotachi govai diunk zolmak ailam, ani hea sonvsarant ailam. Sotachea vatten asat te sogle mhozo avaz aikotat.” 38 Pilatan taka vicharlem: “Sot kitem?”

Oxem mhunnttlea uprant, Pilat Judevam koddem bhair gelo ani tannem mhunnttlem: “Tannem koslo-i guneanv kela oxem mhaka disona. 39 Tumchea riti pormonnem Paskachea porbek eka munxak bondkhonnintlean suttka diunk zai. Tor hanvem tumchea pasot Judevanchea Razak suttka dilʼli tumkam zai?” 40 Tednam te mottʼttean bob marun mhunnonk lagle: “Na, hea munxak nhoi, tachea bodlek Barabasak suttka di!” Khorem mhunnttlear, Barabas ek vhoddlo chor aslo.

19 Tednam Pilat Jezuk gheun gelo ani taka chabkamnim marunk lailo. 2 Soinikamnim ek kantteancho mukutt toiar korun tachea mathear ghatlo ani taka ek zambllea rongacho kopddo nhesoilo. 3 Te tachea lagim ieun mhunnonk lagle: “Judevanchea Raza, tuka zoi!”* Ani te tachea tonddar thapttam marunk lagle. 4 Pilat porot ek pavtt bhair ailo ani tannem lokank mhunnttlem: “Mhaka tacho kainch guneanv mellona hem tumkam kollonk hanv taka bhair haddttam.” 5 Tednam Jezu kantteancho mukutt ghalun ani zambllea rongacho kopddo nheson bhair ailo. Ani Pilatan lokank mhunnttlem: “Hea munxak polloiat!” 6 Punn, mukhel iadnikamnim ani rakhonndaramnim taka polloilo tednam te bob marunk lagle: “Taka khambear* mar! Taka khambear mar!”* Pilatan tankam mhunnttlem: “Tuminch taka vhorat ani khambear marat,* karonn mhaka hea munxacho kainch guneanv mellonk na.” 7 Judevamnim taka zobab dilo: “Amcho ek kaido asa, ani tea kaidea pormonnem taka moronn favo, karonn apunn Devacho put, oxem tannem mhunnttlam.”

8 Pilatan hem aikolem tednam to anikui bhielo. 9 Porot aplea rajmahalant vochon tannem Jezuk vicharlem: “Tum khoincho?” Punn Jezun taka kainch zobab diunk na. 10 Pilatan taka mhunnttlem: “Tum mhaka zobab dina? Tuka suttka diunk vo tuka marun uddounk pasun* mhaka odhikar asa mhunn tuka khoborna?” 11 Jezun taka zobab dilo: “Tuka voir thaun ho odhikar diunk naslo zalear tuka mhojer kainch odhikar ascho naslo. Taka lagon jea munxan mhaka tujea hatant ghatla tachem patok chodd vhodd asa.”

12 Haka lagon Pilat koso-i korun taka suttka diunk proitn korunk laglo, punn Judevamnim bob marun mhunnttlem: “Tunvem hea munxak suttka dili zalear tum Somrazacho* ixtt nhoi. Je konn apnnak raza kortat te sogle Somrazachea add uloitat.”* 13 Hem aikolea uprant Pilat Jezuk bhair gheun ailo. Uprant to zhoddtti korpachea zagear boslo zo fatramnim toiar kelʼlo aslo. Tea zageak Hebrev bhaxen, Gabbatha mhunnttale. 14 To Paskachi Toiari korpacho dis aslo; ani donparchim sumar bara voram* zalʼlim. Pilatan Judevank mhunnttlem: “Polloiat! Tumcho raza!” 15 Punn, te bob marunk lagle: “Taka marun uddoi! Taka marun uddoi! Taka khambear mar!”* Pilatan tankam mhunnttlem: “Tumchea razak hanv khambear marum?” Mukhel iadnikamnim taka zobab dilo: “Somrazak soddun amkam anik konn raza na.” 16 Tednam tannem Jezuk khambear jivexim marunk tanchea hatant dilo.

Ani soinikamnim Jezuk aplea tabeant ghetlo. 17 Jezu aplo trasancho khambo* ubarun, Toklechea Kottʼtteacho zago mhunnttat thoim gelo. Tea zageak Hebrev bhaxen Golgotha mhunnttat. 18 Thoim tannim taka don munxam modem khambear khillailo. Eklo tachea uzveak aslo ani dusro tachea daveak aslo, ani Jezu tanchea modem aslo. 19 Pilatan trasanchea khambeacher* voir oxem boroun ghetlem: “Nazaretkar Jezu, Judevancho Raza.” 20 Zaitea Judevamnim hem vachlem, karonn jea zagear Jezuk khambear khillailʼlo to zago xarachea laginch aslo, ani him utram Hebrev, Latin, ani Grik bhaxen boroilʼlim. 21 Punn Judevanchea mukhel iadnikamnim Pilatak mhunnttlem: “‘Judevancho Raza,’ oxem boroinaka, punn tannem oxem mhunnttlam mhunn boroi, ‘Hanv Judevancho Raza.’” 22 Pilatan zobab dilo: “Hanvem ek pavtt boroilem, mhunnche zalem.”

23 Soinikamnim Jezuk khambear khillailea uprant, tannim tacho kopddo gheun tache char kuddke kele, ani eka-mekak ek-ek kuddko vanttlo. Dor eka soinikak ek kuddko mellʼllo. Uprant tannim tachem khomis ghetlem punn taka xinvonn nasli. Tachea bodlek tem voir thaun sokol meren vinnlolem. 24 Taka lagon tannim eka-mekak mhunnttlem: “Ami hem pinzchem nhoi, tachea bodlek hem konnank mellttolem tem tharaunk sorti ghalum-ia.” Devachea utrant boroilʼlem tem purnn zaunchem mhunn oxem ghoddlem. Thoim boroilʼlem: “Te mhoje kopdde apnnam modem vanttʼttat, ani te mhojea khomisacher sorti ghaltat.” Soinikamnim khorench oxem kelem.

25 Jezuchea trasanchea khambea* lagim tachi avoi, tachea avoichi bhoinn, Klopasachi bail Marie, ani Magdalachi Marie ubi asli. 26 Jezun aplea avoik ani to khub mog kortalo tea xisak laginch ubo asa to polloilo tednam tannem aplea avoik mhunnttlem: “Polloi! Tuzo put!” 27 Uprant Jezun tea xisak mhunnttlem: “Polloi! Tuji avoi!” Tea disa thaun to xis Mariek aplea ghora ravonk gheun gelo.

28 Tea uprant Jezun soglem purnn zalem mhunn zannam zaun oxem mhunnttlem: “Mhaka tan laglea.” Devachea utrant sanglolem tem purnn zaunk lagon tannem oxem mhunnttlem. 29 Thoim ambott drakxanchea soreacho ek kollso dovorlolo aslo. Taka lagon, tannim ek kapsacho gullo ambott drakxanchea soreant buddoilo ani eka boddiecher* dovrun tachea tonddak lailo. 30 Jezun to ambott drakxancho soro chaklea uprant mhunnttlem: “Purnn zalem!” ani man bagoun aplo jiv soddlo.

31 Ho Toiarecho dis aslo dekhun Sabathachea disa kuddi trasanchea khambear urloleo Judevank naka aslem (karonn ho vhoddlo Sabath aslo). Taka lagon tannim Pilata lagim vinoti korun khambear umkallaileat tea munxanche paim-e moddun tancheo kuddi sokol denvouncheo mhunn sanglem. 32 Tor, soinikamnim Jezu lagim ieun khambear marlolea poilea munxache paim moddle ani uprant dusrea munxache paim moddle. 33 Punn te Jezu lagim aile tednam to poilinch mela mhunn tannim polloilem. Taka lagon tannim tache paim moddunk nant. 34 Tori soinikam modlea eklean aplo bhalo tachea borimnim toplo, ani rokddench rogot ani udok vhanvonk laglem. 35 Zannem hem soglem aplea dolleamnim polloilem tannem hachea vixim govai dilea, ani tachi govai khori zaun asa. Tannem jem sanglam tem sot mhunn to zannam, ani tumi pasun visvas dovorcho mhunn tannem hem sanglam. 36 Khorem mhunnttlear, “Tachem ekui hadd moddchem na,” him Devachea utrant boroilʼlim utram purnn zaunchim mhunn hem soglem ghoddlem. 37 Devachea utrant anik eka zagear oxem boroilʼlem asa, “Zaka tannim bhalo topla taka te polloitole.”

38 Tea uprant Arimatheachea Juzen, Pilatak apunn Jezuchi kudd gheun vochom kai mhunn vicharlem. Pilatan taka Jezuchi kudd gheun vochonk porvangi dili. Taka lagon Juze, Jezuchi kudd gheun gelo. Ho Juze Jezucho xis aslo, punn Judevanche bhiranten tannem hea vixim konnank kollonk diunk naslem. 39 Toxench, poilech pavtt ratcho Jezuk mellonk ailʼlo to Nikodemus sumar 30 kilo* gondhros* ani borea vasache mosale* gheun ailo. 40 Tednam tannim Jezuchi kudd ghetli, ani Judevanchea purpachea riti pormonnem tika hea borea vasachea mosaleam borabor eka borea kopddean guttlaili. 41 Ojapachem mhunnttlear, jea zagear taka khambear marlolo thoim ek bag asli, ani tea bagent ek novi dhol* asli. Tantunt azun poriant konnanchich kudd dovrunk nasli. 42 Tor tannim Jezuk thoinch dovorlo karonn to Judevancho Toiarecho dis aslo ani ti dhol laginch asli.

20 Sumanachea poilea disa sokallim fuddem, kallokh astananch Magdalachi Marie dholi* lagim aili. Dholicher* lailʼlo to fator poilinch kuxik kaddlolo tika dislo. 2 Tednam ti dhanvon Simanv Pedru ani Jezu khub mog kortalo tea xisa lagim geli. Tinnem tankam sanglem: “Te Somiak dholi thaun gheun gele, ani tannim taka khoim dovorla tem amkam khoborna.”

3 Tednam Pedru ani to dusro xis dholi lagim vochonk bhair sorle. 4 Te dogui xis sangata dhanvonk lagle, punn dusro xis Pedru poros fas dhanvlo ani dholi lagim poilo pavlo. 5 Tannem dholint bhitor polloilem tednam taka bore kopdde disle, punn to bhitor vochonk na. 6 Magir, Simanv Pedru pasun tachea fattlean pavlo, ani to dholint bhitor gelo. Thoim tannem te bore kopdde polloile. 7 Jezuchea tokler aslolo to kopddo dusrea kopddeam sangata na, punn eka vatten guttlaun dovorlolo asa to tannim polloilo. 8 Uprant poilim pavlolo to xis bhitor gelo, ani tannem polloilem ani visvas dovorlo. 9 Jezu melʼleantlo jivont zavop gorjechem asa, him Devachim utram tankam azun somzonk naslim. 10 Taka lagon te aplea ghora porot gele.

11 Punn Marie dholichea bhairuch roddot ubi ravli. Tinnem roddttam-roddttam dholint bhitor polloilem tednam 12 tika dhove kopdde ghatlole don devdut disle. Eklo Jezuchi tokli asli thoim boslolo, ani dusro Jezuche paim asle thoim boslolo. 13 Tannim Mariek vicharlem: “Tum kiteak roddtta?” Tinnem tankam mhunnttlem: “Te mhojea Somiak gheun gele, ani tannim taka khoim dovorla tem mhaka khoborna.” 14 Oxem mhunnttlea uprant, tinnem fattlean vollon polloilem tednam Jezu thoim ubo aslo, punn to Jezu mhunn ti vollkhonk na. 15 Jezun tika vicharlem: “Tum kiteak roddtta? Tum konnank sodhta?” To bagent kam korpi oxem somzon, Marien taka mhunnttlem: “Tum taka gheun gela zalear, tunvem taka khoim dovorla tem mhaka sang, hanv taka gheun voitoli.” 16 Jezun tika mhunnttlem: “Marie!” Tednam Marien fattlean vollon Hebrev bhaxen mhunnttlem: “Rabboni!” (zacho orth, “Guruji!”) 17 Jezun tika mhunnttlem: “Mhaka chittkon ravonaka, karonn azun poriant hanv Bapa lagim vochonk na. Punn vochon mhojea bhavank sang, ‘Mhojea Bapa lagim ani tumchea Bapa lagim, ani mhojea Deva lagim ani tumchea Deva lagim, hanv voir voitam.’” 18 Magdalachi Marie xisam lagim geli ani tinnem tankam sanglem: “Hanvem Somiak polloila!” Ani Jezun tika jem kitem sanglolem tem tinnem tankam sanglem.

19 Teach disa, mhunnche sumanachea poilea disa, sanjechea vellar, Judevanchea bhiranten xis dar bond korun ghorant bhitor asle. Dar bond aslem tori astana, Jezu tanchea modem ieun ubo ravlo. Ani tannem tankam mhunnttlem: “Tumkam xanti mellom.” 20 Hem mhunnttlea uprant, tannem tankam aple hat ani apleo bori dakhoileo. Tednam xis Somiak polloun khub khuxal zale. 21 Jezun porot ek pavtt tankam mhunnttlem: “Tumkam xanti mellom. Mhojea Bapan mhaka dhaddla toso, hanv-ui tumkam dhaddttam.” 22 Oxem mhunnttlea uprant tannem tancher funk marun mhunnttlem: “Tumkam Devachi povitr xokti mellom. 23 Tumi konnanchim-i patkam bhogxitat zalear, tankam bhogsonnem mellttolem. Punn tumi konnanchim-i patkam bhogxinant zalear, tankam bhogsonnem mellchem na.”

24 Punn Jezu ailo tednam tea Bara zannam* modlo eklo xis, zaka Zunvllo mhunnttale, to Thomas tea xisam sangata naslo. 25 Taka lagon dusrea xisamnim taka sanglem: “Ami Somiak polloilo!” Punn Thomasan tankam sanglem: “Jea meren hanv tachea hatancher khille marloli khunna polloina ani tantunt mhojem bott ghalina, ani tachea borimnim mhozo hat ghalun polloina, tea meren hanv visvas dovorchona.”

26 Magir, atth disam uprant xis anik ek pavtt ghorant bhitor asle, ani Thomas pasun tanchea sangata aslo. Tednam ghorachim daram bond aslim, tori astana, Jezu tanchea modem ieun ubo ravlo, ani tannem tankam mhunnttlem: “Tumkam xanti mellom.” 27 Uprant tannem Thomasak mhunnttlem: “Tujem bott mhojea hatank lavun polloi, ani tuzo hat mhojea borint ghalun polloi. Dubhavop bond kor ani visvas dovor.” 28 Tednam Thomasan taka mhunnttlem: “Mhojea Somia, mhojea Deva!” 29 Jezun taka mhunnttlem: “Tunvem mhaka polloila dekhun tum mhojer visvas dovorta kai? Mhaka pollounk na tori astana mhojer visvas dovortat tim khuxal.”

30 Khorem mhunnttlear, Jezun aplea xisam mukhar anik zaitim vizmitam kelʼlim,* jim hea kovlleant boroun dovrunk nant. 31 Punn jim boroileant tim Jezuch Krist ani Devacho Put mhunn tumi visvas dovorcho, ani hea visvasa vorvim tumkam tachea nanvan jivit mellchem mhunn boroileant.

21 Tea uprant porot ek pavtt Jezu Tiberius doria lagim xisank dixtti poddlo. To hea toren dixtti poddlo. 2 Simanv Pedru, Thomas (zaka zunvllo mhunnttale), Gailientlea Kana ganvantlo Nathanael, Zebedevache put ani Jezuche anik don xis sangata asle. 3 Simanv Pedrun tankam mhunnttlem: “Hanv nustem dhorunk voitam.” Tannim mhunnttlem: “Ami pasun tujea borabor ietat.” Te bhair sorle ani vhoddear bosle. Punn tea ratik tankam kainch mellonk na.

4 Sokall zali tednam Jezu doria deger ieun ubo ravlo. Punn to Jezu mhunn xisank kollonk na. 5 Tednam Jezun tankam vicharlem: “Bhurgeamno, tumchea lagim khaunk kitem-i* asa?” Tannim mhunnttlem: “Na!” 6 Jezun tankam mhunnttlem: “Vhoddeachea uzvea vatten, zall ghalat, ani tumkam thoim nustem mellttolem.” Tednam tannim zall ghatlem. Ani tantunt itlem nustem ailem, ki tanchea lagim tem zall voddunk zaina zalem. 7 Magir Jezu khub mog kortalo tea xisan Pedruk mhunnttlem: “Ho tor Somi!” Simanv Pedrun to Somi mhunn aikolem tednam tannem kopdde ghatle, karonn to vinglloch* aslo. Ani tannem doriant uddi marli. 8 Punn dusre xis, dhakttea vhoddear nustean bhorloli zall voddit gheun aile. Karonn te doria deger thaun chodd pois nasle. Te sumar 300 futt* pois asle.

9 Te doria deger aile tednam tannim kollxeancher nustem asa tem polloilem, ani thoim unddo-i asa to tankam dislo. 10 Jezun tankam mhunnttlem: “Tumi atanch jem nustem dhorlam, tantuntlem thoddem gheun ieiat.” 11 Tor Simanv Pedrun vhoddear choddon, nustean bhorlolem zall voddun haddlem. Tantunt 153 vhoddlim nustim aslim. Punn itlem nustem asonui tem zall pinzonk na. 12 Jezun tankam mhunnttlem: “Ieiat, ani khaiat.” Punn, “Tum konn?” mhunn xisam modlo eklo pasun taka vicharunk fuddem soronk na. Karonn to Somi mhunn te zannam asle. 13 Jezun unddo ghetlo, ani tankam dilo. Magir tannem tankam nustem pasun dilem. 14 Oxe toren, meloleantlo jivont zalea uprant, Jezu tisre pavtt aplea xisank dislo.

15 Tanchem khaun zalea uprant Jezun Simanv Pedruk vicharlem: “Simanv, Juanvachea puta, hanchea poros tum mhozo chodd mog korta?” Pedrun taka mhunnttlem: “Hoi Somia, hanv tuzo kitlo mog kortam, tem tor tum zannam.” Jezun taka mhunnttlem: “Mhojea dhakttea menddrank chorvak vhor.” 16 Jezun dusre pavtt taka vicharlem: “Simanv, Juanvachea puta, tum mhozo mog korta?” Pedrun mhunnttlem: “Hoi Somia, hanv tuzo kitlo mog kortam, tem tor tum zannam.” Tannem Pedruk mhunnttlem: “Mhojea dhakttea menddranchi kallji ghe.” 17 Jezun tisre pavtti taka vicharlem: “Simanv, Juanvachea puta, tum mhozo mog korta?” Jezu taka tisre pavtti, “tum mhozo mog korta?” mhunn vicharta dekhun Pedruk vaitt dislem. Taka lagon Pedrun taka mhunnttlem: “Somia, tum tor soglem zannam. Hanv tuzo kitlo mog kortam tem pasun tum zannam.” Jezun taka mhunnttlem: “Mhojea dhakttea menddrank chorvak vhor. 18 Hanv tuka sot tench sangtam, tum tornnatto aslo tednam apunnuch kopdde ghaltalo, ani tuka zai thoim voitalo. Punn tum zanntto zata tednam tum tuje hat fuddem kortolo, ani dusro konn tuka kopdde ghaltolo. Ani tuka naka thoim to tuka gheun voitolo.” 19 To koslea torechea mornna vorvim Devak mhoima haddttolo hem dakhounk Jezun oxem mhunnttlem. Hem sanglea uprant Jezun taka mhunnttlem: “Mhojea fattlean ieit rav.”

20 Pedrun fatti vollon polloilem tednam Jezu khub mog kortalo to xis ieta tem tannem polloilem. Ho toch xis aslo, zannem sanjechea jevnna vellar Jezuchea hoddʼddea lagim bagon oxem vicharlolem: “Somia tuzo visvasghat korun tuka dhorun ditolo to konn?” 21 Pedruchi nodor tea xisacher poddli tednam tannem Jezuk vicharlem: “Somia, hea munxachem kitem zatolem?” 22 Jezun taka mhunnttlem: “Hanv ieum poriant to hangach ravlolo mhaka zai zalear, tuka kiteak poddlam? Tum mhojea fattlean ieit rav.” 23 Tor bhavam modem ho xis morcho na mhunn khobor posorli. Punn Jezun taka to morchona mhunn sangonk naslem. Tachea bodlek tannem mhunnttlolem: “Hanv ieum poriant to hangach ravlolo mhaka zai zalear, tuka kiteak poddlam?”

24 Ho toch xis zaun asa, zo hea vostum vixim govai dita. Ani zannem heo vostu boroileat. Tachi govai khori mhunn ami zannant.

25 Khorem mhunnttlear, Jezun anik zaitim kamam kelʼlim. Ani tachea soglea kamam vixim ek-ek vost boroiloli zalear te kovlle dovrunk ho akʼkho sonvsar pasun pavcho naslo oxem mhaka dista.