ROMKARANK CHITT

1 Hanv Paulu, Krist Jezucho sevok tumkam hi chitt boroitam. Mhaka apostl zaunk apounnem ailam, ani Devachi bori khobor sangonk vinchun kaddla. 2 Hea bore khobre vixim Devan adinch aplea provadeam udexim aplea Utrant bhasailolem. 3 Hi bori khobor tachea Puta vixim asa, zo Davidachea sonstintlean* ek munis zaun ailo. 4 Punn povitr xoktechea bollan taka meloleantlo jivont korun Devan to aplo Put mhunn kolloilem. Toch amcho Somi Jezu Krist. 5 Tacheach udexim amkam favo nasloli doia ani apostl zaunchi zobabdari mellʼlli. Tachea nanvak mhoima mellonk, soglea raxttramnim bhavarth dovorcho ani tachi adnea pallchi mhunn hem ghoddlem. 6 Jea raxttrank Jezu Kristachim zaunk apounnem dilam, tumi pasun tea raxttram modlim zaun asat. 7 Aple lok mhunn apounnem dilam, tea Romant ravpi soglea lokamno, tumi Devachea mogachim. Hanv Paulu hi chitt tumchea pasot boroitam:

Dev zo amcho Bap zaun asa, tachea thaun ani Somi Jezu Krista thaun tumkam favo nasloli doia ani xanti mellom.

8 Sogleant poilim, hanv tumchea sogleam pasot Jezu Krista udexim Devache upkar attoitam, karonn tumchea bhavartha vixim akʼkhea sonvsarant uloitat. 9 Jea Devachea Putachi bori khobor sangon hanv kallzantlean povitr seva kortam, toch Dev hanv mhojea magnneant tumcho sodanch ugddas kortam mhunn mhozo govai zaun asa. 10 Ani tachi itsa asa zalear, mhaka koxe-i toren tumchea lagim ieunk mellom mhunn hanv vinoti kortam. 11 Karonn hanv tumkam mellonk axeun asam, jea vorvim tumkam Deva thaun dennem diun,* mhaka tumcho visvas ghott korunk mellttolo, 12 vo eka-mekachea bhavartha udexim, mhunnche mhojea ani tumchea bhavartha udexim, amkam eka-mekak urba diunk mellttoli.

13 Bhav-bhoinnimno, dusrea raxttrank mellʼllam toxem tumchea-i modem porgott korun borem foll mellchem mhunn hanvem zaite pavtti tumchea koddem ieuncho proitn kelo. Punn aiz poriant sodanch mhojea vatter oddchonneo aileat, ani hea vixim tumi kallkhant urlolim mhaka naka. 14 Hanv, Grik ani Grik nhoi tancho, toxench ginean asloleancho ani ginean nasloleancho-i rinnkari zaun asam. 15 Taka lagon, Romant asloleamno tumkam pasun bori khobor sangonk hanv umedin asam. 16 Bori khobor sangonk mhaka koslich loz disona. Khorem mhunnttlear, hi bori khobor bhavarth dovortolea sogleank, poilim Judevank ani toxench Grikank taronn mellonk Devachi vatt zaun asa. 17 Karonn he bore khobre udexim bhavarth dovortoleank Devachem nitivontponn dison ieta ani hachea udexim tancho bhavarth ghott zata. Boroilʼlem asa toxem: “Zo nitivont asa to aplea bhavartha udexim jietolo.”

18 Dev-bhirant naslole ani vaitt lok chukicheo vatto apnnaun sot damun dovortat tancher sogleancher sorgar thaun Devacho rag denvon ieta. 19 Deva vixim jem zannam zaun gheupa sarkem asa tem tanchea modem spoxtt ritin dison ieta, karonn Devanuch tem tankam dakhoun dilam. 20 Sonvsar rochla tednam thaun Devache disonant tosle gunn mhunnche tachea koddem odmas lavunk zaina titli xokti asa, ani to khoroch Dev mhunn tannem rochlolea vostum thaun sarkem dison ieta. Taka lagon, tacher visvas dovornastana ravonk te kainch nimit diunk xokonant. 21 Karonn Deva vixim tankam khobor asli, tori astana tannim Dev mhunn taka mhoima diunk na, na mhunn tannim tache upkar attounk na. Tachea bodlek te somzonni naslolea sarke chintunk lagle ani tanchem ginean naslolem mon kallkhant buddlem. 22 Apunn huxar oxem te mhunnttale, punn te murkh mhunn kollon ailem. 23 Ani tannim ovinaxi Devachi mhoima korchi soddun vinaxi munxanchea, suknneanchea, char paim-anchea zonvaranchea ani pott goxttun cholpi pranneanchea murteanchi mhoima keli.

24 Taka lagon, tannim apleach kuddicho opman korcho mhunn Devan tankam tanchea kallzachea vaitt itsam pormonnem, oxudʼdh kamam korunk soddun dilim. 25 Tannim Devachea sotachea bodlek fottincher visvas dovorlo ani Rochnnarachea bodlek rochnnechi bhokti ani puza keli. Tea Rochnnarak sodanch vakhannʼnni mellom. Amen. 26 Devan tankam tancheo lojecheo loingik itsa purnn korunk soddun dilim, karonn bailamnim jea ritin vagonk zaina tea ritin tim vagtalim. 27 Teach toren, dadleamnim pasun bailam sangata jea toren kuddicho sombond dovrunk zai aslo to soddun dilo. Te eka-meka sangata onoitik kam korunk pettle, ani dadleamnim dadleam lagim kuddicho sombond dovorlo. Tanchea hea vaitt vagnnukecho porinnam tankam bhogunk poddlo.

28 Tea lokank Deva vixim zannam zavop sarkem disonk na,* taka lagon Devan pasun tanchea vaitt chintpa pormonnem, chukichim kamam korunk tankam soddun dile. 29 Tanchea bhitor soglea torechem patok, khotteponn, as ani vaittponn bhorlam. Ani te nattkai, khun, zhogddim ani fottingponn kortat. Tankam dusreanchem vaitt zalʼlem zai. Te chaddio korpi, 30 eka munxachea fattlean tachem nanv piddʼddear korpi, Devacho dves korpi, vaitt uloupi, gorvixtt, boddai marpi, vaitt ievzonneo korpi, avoi-bapaichem aikonant tosle, 31 somjikai naslole, dilʼlem utor pallinant tosle, dusrea pasot bhavna naslole* ani kakut korinant tosle asat. 32 Oslea torechim kamam korpeank mornnachi khast favo zata. Hi Devachi adnea bore bhaxen zannam zaunui te apunn oslim kamam korit ravtat. Itlench nhoi, punn toslim kamam kortat tankam maniotai pasun ditat.

2 Are nit korpea, tum konnui asum, tum dusreanchi nit korta zalear tum apunn sarko asa oxem mhunnonk xokona. Tum dusreanchi nit korta tednam tum-ui guneanvkari zata, karonn jea kamank lagon tum tanchi nit korta tim kamam tum-ui korta. 2 Dev sarki nit korta, ani oslim kamam kortoleank to khast ditolo mhunn ami zannant.

3 Are munxa, oslim kamam kortat tanchi tum nit korta, punn apunn toslim kamam korit ravta. Devache zhoddtte thaun tum salvar zatolo oxem tuka dista? 4 Dev tuka doia dakhoita, sosun gheta ani pasiens dakhoita. Hea gunnank valor na mhunn tum lekhta kai? Doia dakhoun Dev tuka poschatap* korunk modot korcho proitn korta mhunn tuka khoborna? 5 Tujem kalliz nibor ani poschatap korunk toiar na toslem zalam. Hea toren tum Devachea ragachea disa ani to nitivontponnan zhoddtti kortolo tea disa tujeach pasot rag ektthaim korun dovorta. 6 To dor ekleak tachea kamam pormonnem farik kortolo: 7 Je sosnikaien borim kamam korun mhoima, man ani nas zaina toslem jivit melloun gheuncho proitn korit ravtat tankam to sasnachem jivit ditolo. 8 Punn je zhogddekar asat ani sot manun gheunchea bodlek vaitt kamam kortat, tankam Dev khast laitolo ani tankam Devachea ragacho fuddo korcho poddttolo. 9 Punn vaitt kamam korit ravtat tea dor eka munxacher sonkoxtt ani tras ietole, poilim Judevancher ani magir Grikancher pasun. 10 Punn borem kam kortat tea dor eka munxak Dev mhoima, man ani xanti ditolo, poilim Judevank ani magir Grikank pasun. 11 Karonn Dev munxam modem bhedbhav korina.

12 Jea lokamnim Devacho kaido nokllo astana patok kelem tim soglim Devacho kaido nokllo astana mortolim. Punn jea lokamnim Devacho kaido zannam zaun patok kelem tanchi sogleanchi kaidea pormonnem zhoddtti zatoli. 13 Karonn Dev fokot kaido aikotat tankam nhoi, punn kaido pallttat tankam nitivont mhunn lekhtolo. 14 Raxttrantlea lokam koddem Devacho kaido na, tori astana te apunn zaun tantunt sangloleo vostu pallttat tednam te kaido nastana pasun Devachea kaidea pormonnem choltat. 15 He lok dakhoun ditat ki Devachea kaideant asa tem tanchea kallzant boroilʼlem asa, ani tanchea borabor tanchem ontoskornn pasun govai dita, ani tanchim chintnam tankam tim guneanvkari vo guneanvkari nhoi mhunn tharaitat. 16 Oxem tea disak zatolem jednam Dev Krist Jezu udexim munxam bhitor lipon aslolea vostunchi zhoddtti kortolo, ani ti zhoddtti hanv tumkam sangtam tea bore khobre pormonnem zatoli.

17 Zor tum apunn ek Judev mhunntta ani tuka Devachea kaideacher visvas asa ani Deva sangata aslolea ixttagotik lagon tuka gorv bhogta, 18 ani tum tachi khuxi kitem ti zannam ani tuka Devachea Kaideachi* xikounn mellʼllea dekhun tum boreantleo boreo vostu somzonk xokta, 19 ani tuka ghott khatri asa ki tum kuddʼddeank vatt dakhoupi, ani kallkhant asloleank uzvadd dakhoupi, 20 murkhank sudharpi, ani lhan bhurgeancho* xikoupi, ani Kaideant aslolea Devachea mullavea gineanachi ani sotachi somzonni aslolo munis mhunn zalear— 21 tum dusreank xikoita, ani tukach xikoina? “Chori korchi nhoi,” mhunn tum dusreank porgottʼtta, ani tunch chori korta? 22 Tum dusreank “Pordvar* korcho nhoi,” mhunn xikoita, ani tunch pordvar korta? Tuka murteanchi vitt ieta, ani tunch mondiram luttʼtta? 23 Tuka Devachea kaideak lagon gorv bhogta, ani tunch Kaidea add vochon Devacho opman korta? 24 Karonn oxem boroilʼlem asa: “Tumkam lagon raxttram modem Devachea nanvacho opman zata.”

25 Khorem mhunnttlear, tum Devacho kaido palltta zalear, sunot tuka faideachi zatoli, punn tum Devachea kaidea add voita zalear, tuji sunot zaunkuch na oxem zatolem. 26 Tor, sunot zaunk naslolo ek munis Devachea Kaideant boroilʼlem asa tem palltta zalear, tachi sunot zaunk na zalear pasun, Dev taka sunot zalʼlea sarko somzochona kai? 27 Tujea lagim Devacho Kaido asa ani tuji sunot zalea, tori astana tum Devacho kaido pallina dekhun kuddin sunot zaunk naslolo munis Devacho kaido pallun, tuka guneanvkari tharaita. 28 Karonn zo bhailean Judev dista to Judev nhoi, ani bhailean sunot zalea ti khori sunot nhoi. 29 Bhitorlean Judev to khoro Judev ani khori sunot Devachea boroilʼlea kaidea pormonnem zata ti nhoi, punn povitr xokte pormonnem kallzachi sunot zata ti. Oslea munxak lokam koddlean nhoi, punn Deva koddlean vakhannʼnni melltta.

3 Tor, ek munis Judev zaun asa zalear tacho kitem faido, vo sunoticho kitem faido? 2 Zaite faide asat. Poilem mhunnttlear, Judevankuch Devan aplim povitr utram dilʼlim. 3 Punn Judevam modlea thoddea zannamnim bhavarth dovrunk na zalear kitem zalem? Tannim bhavarth dovrunk na dekhun, Dev bhavarth dovrunk purto na oxem zata kai? 4 Oxem zaunkuch xokona! Sogle munis fotting zale zalear pasun, Dev ekttoch khoro mhunn kollon ietolem. Karonn oxem boroilʼlem asa: “Tujea utramnim tum nitivont mhunn kollon ieunchem ani tuji nit kortat tankam te khotte mhunn tunvem dakhoun diunchem.” 5 Ami vaitt kamam korun Dev kitlo nitivont asa hem dakhoun ditat, oxem thodde mhunnttat. Te sangtat tem sarkem zalear, Dev tankam khast lavun tancher onʼneai korta oxem zaunchem na? (Hanv eka munxachea nodrentlean sangtam.) 6 Na, to onʼneai korunkuch xokona! Dev onʼneai korta zalear, to akʼkhea sonvsaracho neai koso kortolo?

7 Punn hanv fott uloilolean Dev khoro mhunn kollon ieta ani taka mhoima melltta zalear, to mhaka patki mhunn kiteak lekhta? 8 “Ami vaitt tem korum-ia magir borem tem zatolem, oxem ami kiteak mhunnchem nhoi”? Ami oxench xikoitat mhunn thodde lok amcher khotto arop ghaltat. Oslea lokank Devache niti pormonnem khast mellttoli.

9 Tor atam ami kitem mhunnom-ia? Ami Judev dusream poros vorte asat kai? Kednanch na! Karonn Judev ani Grik soglech patkachea odhikara khala asat mhunn ami poilinch dakhoun dilam. 10 Oxem boroilʼlem asa: “Konnuch munis nitivont na, eklo pasun na. 11 Kholaiechi somzonni aslolo konnuch na, eklo pasun Devak sodhina. 12 Sogle munis sarke vatte voilean koddsorleat, te sogle kainch upeogache nant, konnuch doia dakhoina, eklo pasun dakhoina.” 13 “Tancho gollo mhunnttlear ek ukto fondd, tannim aplea jiben lokank fosoileat.” “Tanchea vonttanchea fattlean sorpachem vik asta.” 14 “Tanchea tonddant sodanch xirap ani koddsann bhorloli asta.” 15 “Tanche paim khun korunk* begin-begin dhanvtat.” 16 “Dusreank kabar korun uddovop ani dukh divop hench tanchem kam, 17 ani dusream sangata xantin koxem jieunchem tem tankam khoboruch na.” 18 “Tanchea dolleant Devachi matui bhirant na.”

19 Kaideant boroilʼlem asa tem soglem, Kaidea khala asat tankam lagon asa mhunn ami zannant, jea udexim dor eka munxachem tondd bond zata ani akʼkho sonvsar Deva mukhar guneanvkari zata. 20 Kaideant sanglolim kamam korun, khoinchoch munis Deva mukhar nitivont zaunk xokona, karonn Kaideantlean amkam patok kitem tem sarkem kollon ieta.

21 Punn atam kaido pallinastana ek munis Devachea nodren nitivont zaunk xokta mhunn dakhoun dilam, ani Kaido ani Provadeanchim Pustokam* pasun tich govai ditat. 22 Hoi, Jezu Kristacher bhavarth dovrun, ek munis Devache nodren nitivont zaunk xokta. Bhavarth dovortat tim soglim munxam nitivont zaunk xoktat. Ani Dev tanchea modem kosloch bhedbhav korina. 23 Karonn soglea munxamnim patok kelam ani Devache mhoimevont gunn dakhounk tim unnim poddttat. 24 Punn Dev amkam nitivont mhunn lekhta, hi tachi favo nasloli doia ani amchea pasot ek funkott dennem zaun asa. Amkam suttka diunk Krist Jezun amchea pasot jem soddvonnechem* mol farik kelam tea udexim Dev amkam nitivont mhunn lekhta. 25 Jezuchea rogtacher bhavarth dovrun lokamnim Deva thaim xanti korunk Devan Jezuchem bolidan dilem. Hem tannem apunn nitivont mhunn dakhounk kelem, karonn adlea tempar tannem lokanchim patkam sosun ghetlim ani tankam bhogxit ravlo. 26 Jezucher bhavarth dovorta tea munxak nitivont mhunn lekhtana apunnui nitivont mhunn dakhounk, Devan amchea tempar pasun oxem kelem.

27 Toxem zalear, boddai marunk kitem-i karonn asa? Na, koslench karonn na. Khoinchea kaidea vixim boddai marchi? Kamank mhotv ditat tea kaidea vixim? Na, punn bhavarthachea kaidea vixim. 28 Karonn ek munis kaideant sanglolea kamam udexim nhoi punn bhavartha udexim nitivont zata oxem ami mantat. 29 To fokot Judevanchoch Dev kai? To dusrea raxttrantlea lokancho Dev nhoi? Hoi, to tancho-i Dev mhunn dubhav na. 30 Dev ekuch, taka lagon sunot kelea tea lokank tanchea bhavartha udexim to nitivont mhunn lekhta ani sunot korunk na tea lokank pasun tanchea bhavartha udexim to nitivont mhunn lekhta. 31 Toxem zalear, ami amchea bhavartha udexim, kaido kainch upeogacho na mhunn dakhoitat kai? Na! Tachea bodlek, ami kaido sarko mhunn dakhoun ditat.

4 Oxem asa zalear ami kitem mhunnom-ia, amcho purvoz Abrahamak kitem mellʼllem? 2 Abrahamak tachea kamank lagon nitivont tharailʼlo zalear to boddai marunk xoktalo, punn Deva mukhar nhoi. 3 Devachem utor kitem mhunntta? “Abrahaman Jehovacher* bhavarth dovorlo, ani hea karonnak lagon taka nitivont mhunn lekhlo.” 4 Ek munis kam korta tednam taka melltta to pagar, taka favo nasloli doia dakhoili oxem zaina, punn to pagar mellonk tacho hokʼk zaun asa. 5 Dusrea vatten, zo munis aplea kamacher bhavarth dovorchea bodlek patkeank nitivont mhunn lekhta tea Devacher bhavarth dovorta, tea munxak Dev tachea bhavarthak lagon nitivont mhunn lekhtolo. 6 Jea munxan kaido purnn toren pallunk na tori astana Devan taka nitivont mhunn lekhlo, tea munxak Davidan pasun khuxal mhunnttlo. Tannem mhunnttlem: 7 “Zanchim vaitt kamam bhogxileant ani zanchim patkam dhampleant* tim khuxal. 8 Jehova* jea munxachea patkancho hixob dovorchona, to munis khuxal.”

9 Toxem zalear, fokot sunot kelea tea lokankuch hi khuxalkai melltta kai? Sunot korunk na tea lokank hi khuxalkai mellona kai? Karonn, “Abrahamachea bhavarthak lagon taka nitivont mhunn lekhlo,” oxem ami mhunnttat. 10 Taka nitivont mhunn kednam lekhlo? Sunot zalea uprant vo sunot zaunchea poilim? Taka sunot zaunchea poilinch nitivont mhunn lekhlolo. 11 Tachi sunot zaunk nasli tednam tannem zo bhavarth dakhoilo taka lagon Devan taka nitivont mhunn lekhlo. Ani taka nitivont lekhla hachi gerentti* mhunn taka sunot korunk sangli. Sunot zaunk nastana-i je bhavarth dovortat tancho sogleancho to bapui zauncho, ani tankam nitivont mhunn lekhche dekhun oxem kelem. 12 Teach borabor zanchi sunot zalea tancho-i to bapui zauncho. Mhunnche, fokot zanchi sunot zalea tanchoch nhoi, punn je amcho bapui Abrahamachea panvlamnim nitt choltat ani tachi sunot zaunchea poilim tannem zo bhavarth dakhoilo toslo bhavarth dakhoitat tancho-i bapui zauncho.

13 Abrahamak ani tachea sonstik* te sonvsarache daiji zatole mhunn bhasaunni kelʼli. Tankam ti bhasaunni kaido pallttat mhunn nhoi, punn Devacher bhavarth dovrun tankam nitivont mhunn lekhleat taka lagon kelʼli. 14 Karonn fokot kaido pallttale te daiji zatale zalear bhavarthak kainch valor urcho naslo ani bhasaunni kainch upeogachi na koxi zatoli asli. 15 Khorem mhunnttlear, Kaido Devacho rag voddun haddtta, punn jea zagear kaido na, thoim to moddunkui zaina.

16 Abrahamachea bhavarthak lagon, taka put zolmotolo mhunn bhasaunni kelʼli, ani tea bhasaunnentlean Devachi favo nasloli doia dison aili. Hea udexim hi bhasaunni tachea akʼkhea sonste* pasot asa mhunn kollon ailem, mhunnche, fokot je Kaido pallttat tankanch nhoi punn amcho sogleancho bapui Abrahama bhaxen zankam bhavarth asa tanchea-i pasot. 17 (Hem boroilʼlem asa toxench zalem: “Hanvem tuka zaitea raxttrancho bapui mhunn nemla.”) Hem tea Deva mukhar zalem, zacher taka bhavarth aslo ani zo meloleank jivont korta ani zo ghoddon ieunk na tea vostum vixim ghoddon ailʼlea bhaxen* uloita. 18 Apleak bhurgim zatolim mhunn Abrahamak bhorvonso naslo. Tori astana, tannem bhorvonso dovrun, apunn zaitea raxttrancho bapui zatolo mhunn bhavarth dovorlo. Karonn Devan taka oxi bhasaunni kelʼli: “Tuji sonsot* oxich mezunk zaina titli zatoli.” 19 Abrahaman aplea oskot kuddi vixim chintlem, ji eka melolea munxachea kuddi sarki zalʼli (karonn to sumar 100 vorsancho zalʼlo.) Toxench apli bail Sara atam zanntti zalea ani bhurgeak zolmak haddunk xokchina hem-ui to zannam aslo. Tori astana tacho bhavarth unno zaunk na. 20 Devan kelʼlea bhasaunnek lagon, tacho bhavarth halonk na. Punn tachea bhavarthak lagon to xoktivont zalo, ani tannem Devak mhoima dili. 21 Jea Devan bhasaunni kelea to Dev ti bhasaunni purnn korunk xokta mhunn taka ghott visvas aslo. 22 Heach karonnak lagon, “taka nitivont mhunn lekhlo.”

23 Punn, “taka nitivont mhunn lekhlo” hem fokot tacheach pasot borounk naslem, 24 tem amchea-i pasot boroilʼlem. Amkam-i nitivont mhunn lekhtole, karonn ami tea Devacher bhavarth dovortat zannem amcho Somi Jezuk meloleantlo jivont kela. 25 Amchea patkam pasot Devan Jezuk marunk dilo ani amkam nitivont mhunn lekhunk taka jivont kelo.

5 Tor, amkam bhavarthak lagon nitivont mhunn lekhleant dekhun amcho Somi Jezu Krista udexim Deva sangata ami xantichem natem samballum-ia.* 2 Tacheach udexim bhavarthak lagon Deva mukhar ieun ami Devachi favo nasloli doia mellounk xoktat, ji aiz amcher asa. Ani Deva koddlean mhoima mellttoli mhunn bhorvonso asa dekhun ami khuxal zaum-ia. 3 Itlench nhoi, ami sonkoxttancho fuddo kortat tednam pasun khuxal ravom-ia, karonn sonkoxtt amkam thir ravonk modot korta mhunn ami zannant. 4 Ani thir ravlolean amkam Devachi maniotai melltta, ani taka lagon amkam bhorvonso melltta. 5 Ani ho bhorvonso amkam nirax korina, karonn amkam dilʼlea povitr xokte udexim Devacho mog amchea kallzamnim votoila.

6 Karonn, ami oskot astananch, Krist tharailʼlea vellar patki munxam pasot melo. 7 Eka nitivont munxa pasot aplo jiv diunk konnui fuddem soronk ekdom kotthin. Punn, eka borea munxa pasot ghoddie konnui aplo jiv diunk toiar zait. 8 Torui, ami patki astananch Krist amchea pasot melo. Hea toren Devan amcho mog korta mhunn puravo dilo. 9 Devan amkam Jezuchea rogta udexim nitivont mhunn lekhleant zalear, tacheach vorvim ami Devachea raga thaun salvar zatolim mhunn ami khatri dovrunk zata. 10 Ami Devachim dusman astananch Devachea Putachea mornna udexim ami Devacho favor porot mellounk pavleant. Tor atam ami Devacho favor porot mellounk pavleant zalear tachea Putachea jivita udexim ami salvar zatolinch mhunn ami khorench khatri dovrunk zata nhoi! 11 Titlench nhoi, Somi Jezu Krista udexim Deva sangata jem amchem natem asa tea pasot ami khuxal zatat, zache udexim Devacho favor amkam porot mellʼllo.

12 Tor, eka munxa udexim patok hea sonvsarant bhitor sorlem ani patka udexim moronn. Hea toren moronn soglea munxam modem posorlem karonn tannim sogleamnim patok kelʼlem—. 13 Kaido diunchea poilim patok hea sonvsarant aslem, punn kaido na zalear konnankuch patki mhunn tharaunk zaina. 14 Tori astana, mornnan Adanva thaun Moizesa meren ek raza koso raj choloilem. Adanva bhaxen kaido moddun patok korunk na tancher pasun tannem raj choloilem. Adanv sarko zo ieuncho aslo tachea bhaxenuch aslo.

15 Punn Devachem dennem guneanva bhaxen na. Karonn eka munxachea guneanva udexim zaitim zannam melim. Punn Devachea favo naslolea doiek lagon ani funkott denneak lagon zaitea zannank bhorpur faido zalo. Hem dennem favo naslolea doie sangata eka munxa udexim, mhunnche, Jezu Krista udexim dilem! 16 Funkott dennea vorvim mellttat te faide eka munxachea patkachea porinnama sarke nhoi, karonn eka munxachea guneanvak lagon oxi xikxa mellʼlli ki munis guneanvkari zalo. Punn zaitea guneanvam uprant jem dennem mellʼllem taka lagon Dev munxank nitivont mhunn lekhta. 17 Eka munxachea guneanvak lagon mornnan raza zaun raz choloilem zalear jea lokank favo nasloli doia ani Deva mukhar nitivont zaupachem funkott dennem bhorpur melltta, tankam eka munxa udexim, mhunnche, Jezu Krista udexim jivit mellttolem ani te raza zaun raz choloitole mhunn ami khatri dovrunk zata.

18 Tea pasot, eka munxachea guneanvak lagon soglea torechea lokank guneanvkari tharaile. Tech bhaxen eka munxachea nitivont kamank lagon soglea torechea lokank jivit mellonk Dev tankam nitivont mhunn lekhta. 19 Karonn, zoxem eka munxan adnea moddli dekhun zaite lok patki zale, toxench eka munxan adnea pallʼlli dekhun zaite lok nitivont zatole. 20 Munis chodd ani chodd guneanv korta mhunn dakhounk Devan Kaido dilo. Punn lokamnim zaitim patkam kelim tednam Devan tankam anikui chodd favo nasloli doia dakhoili. 21 Kiteak lagon? Karonn, zoxem patkan mornna sangata raza mhunn raz choloilem, toxench Somi Jezu Krista vorvim amkam sasnachem jivit mellonk Devache favo naslole doien, nitivontponna udexim raza zaun raz korchem mhunn.

6 Atam ami kitem mhunnom-ia? Amkam anikui chodd favo nasloli doia mellche khatir ami patok korit ravchem kai? 2 Kednanch na! Ami patkak lagon meleant, tor fuddem ami patkant koxim jieunk xoktat? 3 Vo ami sogleamnim zannim bautizm ghetla ani Krist Jezuchea ekvottant asat, tannim tachea mornnant bhagidar zaunk bautizm ghetla mhunn tumi nokllo? 4 Tea pasot tachea mornnant bhagidar zaunk bautizm ghetlolean amkam pasun tachea borabor purleant. Hea toren Bapachea mhoimen bhorlolea xokten Kristak meloleantlo jivont kelo toxench ami novem jivit jietolim. 5 Ami tachea sarkim moron tachea sangata ek zaleant zalear ami tachea sarkim jivont zaun tachea sangata ek zatolinch. 6 Karonn tachea vorvim ami poilim koxim aslim, tachea thaun atam ekdom bodolʼleant.* Hea toren amchea patki kuddicho odhikar amcher kabar zata. Atam thaun ami patkachim gulamam zaun uronant mhunn ami zannant. 7 Karonn zo munis morta taka tachea patkantlean suttka melltta.*

8 Itlench nhoi, ami Krista borabor meleant zalear ami tachea sangata jietolim mhunn pasun amkam khatri asa. 9 Karonn Kristak meloleantlo jivont kela ani to porot morchona mhunn amkam khobor asa. Atam mornnak tacher kosloch odhikar na. 10 Karonn patok pusun kaddunk Krist melo, ani to ekuch pavtti melo, taka porot moronk poddchem na. Punn to atam jem jivit jieta, tem Deva pasot jieta. 11 Hea toren tumi pasun patka pasot meleant, punn Deva pasot Krist Jezu vorvim jietat mhunn somzon gheiat.

12 Dekhun, patkak tumchea nas zatolea kuddincher raza zaun raz cholounk dium nakat ani kuddichea itsanche gulam zaun tanchem aikonakat. 13 Na mhunn tumchi kudd* vaittachim hotʼtearam zaunk patkachea hatant ghalinakat. Tachea bodlek meloleantlean jivont zalʼlea lokam bhaxen tumkam Devachea hatant ghalat. Toxench tumchi kudd* nitivontponnachim hotʼtearam zaunk Devachea hatant ghalat. 14 Atam patok tumcho dhoni zauncho nhoi, karonn tumi kaidea khala nant punn Devachea favo naslole doie khala asat.

15 Tor atam ami kitem mhunnom-ia? Ami kaidea khala nant punn Devachea favo naslole doie khala asat dekhun patok korchem kai? Kednanch na! 16 Tumi konnanchi-i adnea manunk, svotak gulamam bhaxen tachea hatant ghaltat zalear tumi tachim gulam zatat mhunn tumkam khoborna? Tumi patkachim gulamam zalim zalear tumkam moronn mellttolem, punn tumi Devachim gulamam zaun tachi adnea pallʼllear to tumkam nitivont mhunn lekhtolo. 17 Devache upkar, karonn adim tumi patkachim gulamam aslim, punn atam tumi kallzantlean Devacheo adnea pallttat ani tannem xikoilʼlea pormonnem choltat. 18 Hoi, tumkam patka thaun suttka dili dekhun tumi nitivontponnachim gulamam zalim. 19 Hanv sompea utramnim tumchea lagim uloitam, karonn tumchea bhitor kuddicheo oskotkaieo asat. Zoxem, eka vellar vaitt kamam korunk tumi tumchea kuddichea sandheank oxudʼdh ani vaitt kamanche gulam kelʼle, teach toren atam povitr kamam korun tumchea kuddichea sandheank nitivontponnache gulam korat. 20 Karonn tumi patkachim gulamam aslim tednam tumi sarkem tem korunkuch zai oxem naslem.

21 Toxem zalear, tea vellar tumi koslim follam utpon kortalim? Tumi oslim kamam kortalim zache vixim chintunuch tumkam loz dista. Karonn toslea kamancho porinnam moronn. 22 Punn, atam tumkam patka thaun suttka dilea ani tumi Devachim gulamam zaleant, taka lagon xevottak sasnik jivit melltta toslim povitrtaiechim follam tumi atam utpon kortat. 23 Karonn patkacho pagar moronn, punn Dev dita tem dennem mhunnttlear amcho Somi Krist Jezu udexim sasnik jivit.

7 Bhav-bhoinnimno, (hanv kaido zannam tanchea lagim uloitam) ek munis jivo aso poriant tacher Kaideacho odhikar asta mhunn tumkam khoborna? 2 Udharonnak, ek kazari bailecho ghov jivo aso poriant, ti kaidea pormonnem taka bandloli asta. Punn ticho ghov melo zalear, tika aplea ghovachea kaidea thaun suttka melltta. 3 Ticho ghov jivo astana ti dusrea dadlea lagim kazar zata zalear tinnem pordvar* kela oxem zatolem. Punn ticho ghov melo zalear, tika tea kaidea thaun suttka melltta. Tea uprant ti dusrea dadlea lagim kazar zata zalear tinnem pordvar kela oxem zaunchem na.

4 Teach toren, mhojea bhav-bhoinnimno, meloleantlean jivont kelʼlea Kristache zaunk, tumi Kristachea kuddi udexim Kaidea pasot meleant. Tumi Deva pasot foll utpon korchem mhunn oxem zalem. 5 Karonn ami kuddichea itsam pormonnem jietalim tednam, Kaidean amkam amcheo patki itsa dakhoun dileo. Amkam mornnak pavoita toslem foll utpon korunk heo itsa amchea kuddint kam kortaleo. 6 Punn atam amkam hea Kaidea thaun suttka mellʼllea. Karonn jem kitem amkam addaitalem tachea pasot ami meleant. Atam ami boroilʼlea kaidea pormonnem pornea toren nhoi, punn povitr xokte udexim novea toren sevok zaleant.

7 Toxem zalear, ami kitem mhunnom-ia? Kaideant kitem-i chuk* asa? Na, koslich chuk na! Khorem mhunnttlear, Kaido naslo zalear hanv patka vixim kednanch zannam zaunk pavcho naslom. Udharonnak, “Tunvem as korchi nhoi,” oxem Kaideant naslem zalear as mhunnttlear kitem tem hanv somzonk pavcho naslom. 8 Punn patkan sondhi mellttanch kaido uzar korun, mhojea bhitor dor ek torechi as utpon keli, karonn kaido nastana patok melʼlea sarkem aslem. 9 Khorem mhunnttlear, ek vell oso aslo jednam hanv kaido nastana jietalom. Punn kaido ailo tednam patok portun jivem zalem punn hanv melom. 10 Ani ji adnea mhaka jivita koddem gheun voichi asli, tinnem mhaka mornnak pavoilo. 11 Karonn patkan sondhi mellttanch kaido uzar korun, mhaka fosoilo ani hea udexim mhaka marun uddoilo. 12 Kaido povitr asa, ani adnea povitr, nitivont ani bori.

13 Toxem zalear, jem borem asa taka lagon mhojer moronn ailem kai? Na, toxem nhoi! Tachea bodlek, patkak lagon mhojer moronn ailem. Hea toren jem borem asa tachea udexim patokuch mhojea bhitor kam korit mhaka mornnache vatten gheun voita, ani adnea udexim patok kitlem vaitt tem sarkem kollon ieta. 14 Kaido Deva thaun asa mhunn ami zannant, punn hanv patki, ani mhaka patkachea hatant gulam koso vikla. 15 Hanv jem kortam tem kiteak kortam tem mhaka somzona. Karonn hanv jem korunk sodhtam tem korina, punn hanv jea kamacho dves kortam tench kam hanv kortam. 16 Hanv korunk sodhina tench hanv kortam zalear, Kaido boro mhunn hanv manun ghetam. 17 Taka lagon hanv jem kortam, tem hanv nhoi punn mhojea bhitor asa tem patok korta. 18 Mhojea bhitor, mhunnche, mhojea kuddint, thoddem pasun boreponn na mhunn hanv zannam. Karonn borem kam korunk mhaka itsa asa, punn mhojean borem kam korunk zaina. 19 Karonn jem borem kam hanv korunk sodhtam tem korina, punn jem vaitt kam hanv korunk sodhina tench korit ravtam. 20 Tor, hanv korunk sodhina tench hanv kortam zalear, tem korta to hanv nhoi punn mhojea bhitor aslolem patok.

21 Tor, mhojea vixim mhaka ho kaido dison ieta: Hanv borem tem korunk sodhtam tednam, mhojea bhitor mhaka vaitt tench dista. 22 Devachea kaideak lagon hanv khoreanich kallzantlean khuxal zatam. 23 Punn hanv mhojea kuddint dusro ek kaido kam korta mhunn polloitam. To mhojea chintnancher raz kortolea kaidea add zhuzta ani mhojea kuddint aslolea patkachea kaideacho mhaka gulam korta. 24 Kitlo lachar munis hanv! Morta tea mhojea hea kuddi thaun mhaka konn soddoitolo? 25 Somi Jezu Krista udexim Devache upkar! Hanv mhojea chintnamnim Devachea kaideacho sevok zaun asa, punn mhoji kudd patkachea kaideachi gulam zaun asa.

8 Taka lagon, je Krist Jezuchea ekvottant asat te guneanvkari nant. 2 Karonn povitr xoktecho kaido zo Krist Jezu udexim jivit dita tannem tumkam patok ani mornnachea kaideantlean suttka dilea. 3 Patki munxak lagon Kaido oskot zalo. Taka lagon, Kaido jem kam korunk xoklona, tem Devan kelem. Patok kaddun uddounk Devan aplea putak munxachea rupan* dhaddlo ani oxe toren tannem kuddintlea patkak guneanvkari tharailem. 4 Hea toren, ami amchea patki kuddi pormonnem nhoi, punn povitr xokte pormonnem cholon, Devachea Kaideant boroilʼlem asa tem pallchem mhunn oxem zalem. 5 Jim kuddi pormonnem jietat tim kuddichea vostuncher dhean dovortat. Punn jim povitr xokte pormonnem jietat, tim povitr xoktechea vostuncher dhean dovortat. 6 Karonn kuddichea vostuncher dhean dovrop mhunnttlear moronn, punn povitr xoktechea vostuncher dhean dovrop mhunnttlear jivit ani xanti. 7 Kuddichea vostuncher dhean dovrop mhunnttlear Deva sangata dusmankai zaun asa, karonn kudd Devachea kaidea khala na, ani asonkui xokona. 8 Taka lagon jim kuddi pormonnem choltat tim Devak khuxal korunk xokonant.

9 Devachi povitr xokti tumchea thaim asa zalear tumi kuddi pormonnem nhoi, punn povitr xokte pormonnem choltat. Jea konnam lagim Kristacho sobhav na zalear to Kristacho nhoi. 10 Punn Krist tumchea sangata ekvottant asa zalear, tumchi kudd patkak lagon melʼli asa zalear pasun, povitr xokti nitivontponnak lagon tumkam jivit dita. 11 Jea Devan, Krist Jezuk meloleantlo jivont kela tachi povitr xokti tumchea thaim asa zalear, toch Dev zannem Jezu Kristak jivont kela to tumchea thaim asa tea povitr xokte udexim tumcheo nas zata teo kuddi pasun jivont kortolo.

12 Taka lagon bhav-bhoinnimno, ami patki kuddi pormonnem jieunkuch zai oxem na. 13 Tumi kuddi pormonnem jietat zalear tumi mortolinch. Punn tumi povitr xokte udexim kuddichea kamank marun uddoitat zalear tumi jietolim. 14 Karonn jim Devachea povitr xoktechea margdorxona pormonnem choltat tim soglim khorench Devache put zaun asat. 15 Karonn Devachi povitr xokti amkam chakor korina, toxench, ti amchea kallzant bhirant porot ieunk dina. Tachea bodlek, Dev amkam povitr xokte udexim put mhunn poskim gheta ani hich povitr xokti amkam: “Abba,* Bapa!” oxem mhunnon ulo marunk fuddem kaddtta. 16 Ami Devachim bhurgim mhunn Devachi povitr xokti amchea kallzak govai dita. 17 Tor, ami tachim bhurgim zalear, daiji pasun zatat—hoi Devachim daiji ani Krista sangata daiji—punn amkam tachea sangata mhoima mellonk amkam tachea sangata trasui sosche poddttole.

18 Aichea kallar ami je tras sostat te amchea vixim ugddapi zaunchi asa tea mhoime mukhar kainch nhoi mhunn hanv somzotam. 19 Karonn, rochnna Devachea putanchi mhoima ugddapi zaunk axeun vatt polloita. 20 Devan rochnna kaim upeogachi na oxi zaunk dili. Punn ti tichea khuxe pormonnem nhoi, punn zannem ti kainch upeogachi na oxi kelea, tache khuxe pormonnem oxi keli. Hea bhorvonxeachea adaran ki 21 rochnna anik fuddem patkachi ani mornnachi gulam aschi na. Tika Devachim bhurgim mhunn mhoimebhorit svotontrtai mellttoli. 22 Karonn akʼkhi rochnna aiz meren vollvolltta ani tras sosta mhunn amkam khobor asa. 23 Itlench nhoi, tor poilem foll, mhunnche, povitr xokti mellʼllolim ami pasun amchea kallzant vollvollttat. Punn teach vellar amkam Devache put koxe poske gheunche mhunn, ani soddvonne udexim amchea kuddintlean suttka mellchi mhunn ami axeun vatt polloitat. 24 Amkam suttka dili tednam amkam ho bhorvonso mellʼllo. Punn jea vostu vixim bhorvonso aslo ti vost disli zalear to bhorvonso urona. Karonn eka munxan ek vost polloilea uprant, to ani tichi vatt polloita kai? 25 Punn jem pollounk na tacher ami amcho bhorvonso dovortat tednam ami axeun ani sosnikaien tachi vatt polloitat.

26 Toxench, ami oskot astat tednam povitr xokti pasun amkam modot korta. Karonn somosia oxi asa ki magnnem korchi goroz asa mhunn khobor asonui, kitem mhunn magnnem korchem hem amkam kollona. Punn ami vollvollttat ani amchean utor pasun ucharunk zaina* tednam povitr xokti svota amchea pasot vinoti korta. 27 Ani zo kallzam parkhita taka povitr xokten kelʼlea vinoticho orth kolltta, karonn hi povitr xokti Devachea lokam pasot Devache khuxe pormonnem vinoti korta.

28 Jim konn Devacho mog kortat ani zankam tachea udʼdhexa pormonnem apoileant, tanchea boreak lagon Dev aplim soglim kamam manddavollin zoddun haddtta mhunn amkam khobor asa. 29 Karonn zancher tannem sogleant poilim dhean dilem tankam tannem aplea Puta sarke zaunche mhunn poilim thaunuch nemleat. Tacho Put zaitea bhavam modem poilo zauncho mhunn oxem zalem. 30 Itlench nhoi, zankam tannem poilim thaun nemle tankanch tannem apoile, ani zankam tannem apoile tankanch tannem nitivont mhunn lekhle. Ani zankam tannem nitivont mhunn lekhle tanchi tannem mhoima pasun keli.

31 Tor, hea vostum vixim ami kitem mhunnom-ia? Dev amchea vatten asa zalear amchea add konn astolo? 32 Tannem aplea Putak pasun amchea sogleam pasot moronk dilo zalear, to ani tacho Put, amchi doia korun urloleo sogleo vostu pasun amkam diunchona kai? 33 Devachea vinchloleancher konn arop ghalunk xokta? Karonn Dev tankam nitivont mhunn lekhta. 34 Konn tankam guneanvkari mhunn tharaunk xokta? Konnuch na. Karonn Krist Jezun tanchea pasot aplo jiv dilo. Itlench nhoi, taka meloleantlo jivont kelo ani to Devachea uzvea vatten boson amchea pasot vinoti pasun korta.

35 Kristachea moga thaun konn amkam vegllo korunk xokta? Sonkoxtt, dukh, dhumallo, bhuk, vingllemponn, dhoko vo tolvar? 36 Boroilʼlem asa tea pormonnem: “Tujea pasot ami dis-bhor mornnacho fuddo kortat. Amchi poristhiti marunk vhortolea menddram sarki asa.” 37 Tori astana, zannem amcho mog kela tachea modotin ami hea soglea torechea oddchonneancher purnn toren zoit melloit asat. 38 Karonn mhaka khatri asa ki nhoi mhunn moronn, nhoi mhunn jivit, nhoi mhunn devdut, nhoi mhunn sorkar, nhoi mhunn aicheo vostu, nhoi mhunn ieuncheo asat teo vostu, nhoi mhunn koslich xokti, 39 nhoi mhunn unchai, nhoi mhunn kholai, nhoi mhunn koslich dusri rochnna amkam Devachea moga thaun vegllim korunk xokona, zo mog Somi Krist Jezu udexim dakhoun dila.

9 Hanv Kristacho pattlavdar zalʼlean sot uloitam, hanv fott uloina. Mhojem ontoskornn povitr xokte udexim govai dita, 2 ki mhaka khub dukh bhogta ani mhojea kallzachi dukh unnich zaina. 3 Karonn, mhoje Judev bhav, mhunnche mhojem rogtachem natem asa tanchea bodlek, mhojer xirap poddon hanv Krista thaun vegllom zaunk toiar asam. 4 He Izraelitkar, zankam put koxe poske ghetlole. Tankanch mhoima dilʼli, tanchea sangata korar kelʼle, tankam Kaido dilʼlo, povitr seva korunk man dilʼlo, ani tankam besanvam ditolo mhunn utor dilʼlem. 5 Amche purvoz pasun tancheach modle asle, ani tanchea sonstintlean Krist ailo. Dev, zo sogleant vorto, tachi sodankal vakhannʼnni zaum. Amen.

6 Punn hacho orth Devachem utor nirfoll zalem oxem nhoi. Karonn Izraelachea sonstintle sogle lok khorench “Izraelitkar” oxem nhoi. 7 Toxench, Abrahamachea sonstintle* zalolean te sogle tache bhurge oxem nhoi. Punn boroilʼlem asa toxem, “Tuka jea sonsti* vixim bhasailam ti Izaka thaun ietoli.” 8 Hacho orth, jim rogtachea natean Abrahamachim bhurgim, tim khorem mhunnttlear, Devachim bhurgim nhoi. Punn jim Devachea bhasaunne pormonnem tachim bhurgim, tankam Abrahamachi sonsot* mhunnttat. 9 Karonn Devan hi bhasaunni kelʼli: “Hanv fuddlea vorsa heach vellar ietolom ani Sarak ek put zolmolʼlo astolo.” 10 Hi bhasaunni fokot heach vellar nhoi punn Rebeka, amcho purvoz Izaka udexim gorbest asli ani tichea kusveant zunvlle put asle tednam pasun kelʼli. 11 Hem vinchop munxachea kamachea adarit nhoi, punn Devachea udʼdhexa adarit zaunchem mhunn hi bhasaunni, bhurge zolmonk pasun nasle ani tannim kitench borem vo vaitt kam korunk naslem, tednam kelʼli. Dev apleak zai takach vinchta. 12 Devan Rebekak oxem sanglolem: “Vhoddlo dhaktteacho gulam zatolo.” 13 Boroilʼlem aslem toxench ghoddlem: “Hanvem Jakobacho mog kelo, punn Esauacho dves kelo.”

14 Tor ami kitem mhunnom-ia? Dev onit korta kai? Kednanch na! 15 Karonn tannem Moizesak mhunnttlem: “Zachi mhaka kakut korunk zai tachi hanv kakut kortolom, ani zaka doia-maia dakhounk zai, taka hanv doia-maia dakhoitolom.” 16 Tor, Dev konnank vinchun kaddttolo, tem munxachea itsecher vo tachea proitnacher nhoi,* punn kakut korta tea Devacher tharlolem asa. 17 Karonn Devachem utor Faraohk oxem mhunntta: “Tujea babtint mhoji xokti dakhounk ani akʼkhe prithumer mhojem nanv kollounk hanvem tuka jivo dovorla.” 18 Tor, Dev apleak zai tanchi kakut korta, punn dusreank tanchem kalliz nibor zaunk soddun dita.

19 Taka lagon atam konnui oxem mhunnot: “Toxem zalear to atam pasun munxancheo chuki kiteak kaddtta? Tache khuxe add konn ubo ravonk xokla?” 20 Are munxa, Devak porteak-porto zobab diunk tum konn? Akar dilʼli vost apleak akar divpeak oxem mhunntta kai: “Tunvem mhaka hea toren kiteak kela?” 21 Ekach matiechea gullea thaun ek aidon khas kamank lagon, ani dusrem aidon sadea kamank lagon toiar korunk kumbharak odhikar na kai? 22 Noxtteank aplo rag dakhounk ani apli xokti dakhounk Devak zai aslem. Tori astana, nisontton favo aslolea ragachea aidonank Devan pasiens dakhoilam. 23 Tannem mhoima mellonk poilim thaun toiar kelʼlea kakutichea aidonank apli vorti mhoima dakhounk oxem kelem. 24 Mhunnche amkam, zankam fokot Judevam modle nhoi, punn dusrea raxttram modle pasun apoun haddleat. 25 Hem tannem Hoseachea Pustokant mhunnttlolem toxench asa: “Je mhoje lok nasle tankam hanv ‘mhoje lok,’ mhunnttolom ani ji mhoji mogachi nasli tika ‘mogachi’ mhunnttolom. 26 Ani jea zagear tankam oxem mhunnttlolem: ‘Tumi mhoje lok nhoi,’ teach zagear tankam ‘jivea Devache put’ oxem mhunnttole.”

27 Itlench nhoi, Izaias Izraela vixim mottʼttean oxem sangta: “Izraelitkar doria voilea renve itle asat zalear pasun, tanchea modle fokot mutt-bhor lokuch* salvar zatole. 28 Karonn Jehova* prithumer hixob ghetolo ani vell kaddinastana hem kam purnn kortolo.” 29 Toxench, Izaiasan bhasaunni kelʼli toxi: “Fouzancho Dev Jehovan* amchi thoddi sonsot* jivont soddunk naslim zalear, ami Sodoma sarkim zatolim aslim, ani amchi poristhiti Gomora sarki zatoli asli.”

30 Tor, ami kitem mhunnom-ia? Hench ki videxi raxttrantle lok, nitivont zauncho proitn korinant, tori astana Dev tankam nitivont mhunn lekhta, karonn tankam bhavarth asa. 31 Punn Izraelitkaramnim, kaidea pormonnem cholon nitivont zauncho proitn kelo, tori astana te purnn toren kaidea pormonnem cholonk xoklenant. 32 Kiteak lagon? Karonn tannim bhavarthan nhoi, punn aplea kamamnim nitivont zauncho proitn kelo. “Addkhollon poddttat toslea fatrak” adllon te poddle. 33 Boroilʼlem asa toxem: “Polloi! Hanv Sionant addkholl ghalta toslo fator ani dukhoita toslem khoddop dovortam, punn zo tacher bhavarth dovorta to nirax zaunchona.”

10 Bhavamno,* mhaka kallzantlean Izraelitkaranchem taronn zalʼlem zai dekhun hanv Deva lagim magnnem pasun kortam. 2 Karonn hanv tanchea vixim govai ditam, ki tankam Devachi seva korunk urba asa, punn ti urba sarkea gineana pormonnem na. 3 Devachea nodren nitivont zaunk kitem gorjechem, tem tankam khobor naslem. Taka lagon, te apnnak zai tea toren apunn nitivont mhunn dakhounk proitn korit ravle, ani Devachea nitichea dorjeam pormonnem cholonk nant. 4 Kristachea mornna udexim Kaido kabar zalo. Hea toren Kristacher bhavarth dovorta tea dor ekleak nitivont mhunn lekhunk mellʼllem.

5 Kaidea udexim nitivont zaunchea vixim Moizes oxem boroita: “Zo munis him kamam korta to hea kamank lagon jietolo.” 6 Punn bhavartha udexim nitivont zaunchea vixim oxem boroilʼlem asa: “Tumchea kallzant oxem mhunno nakat, ‘Voir sorgar konn voitolo’ mhunnche, Kristak sokol haddunk sorgar konn voitolo? 7 vo, ‘Sokol patallant* konn denvtolo’ mhunnche, Kristak meloleantlo voir haddunk sokol patallant konn denvtolo?” 8 Punn Devachem utor kitem mhunntta? Tem mhunntta: “Ho sondex tujea lagim, tujeach tonddan ani tujeach kallzant asa,” mhunnche, bhavarthacho “sondex” zo ami porgott kortat. 9 Tum tujea tonddan sogleam lokam mukhar Jezuch Somi mhunn sangot zalear ani tujea kallzan Devan taka meloleantlo jivont kela mhunn bhavarth dovrit zalear, tum salvar zatolo. 10 Karonn ek munis kallzantlean bhavarth dovorta tednam to Deva mukhar nitivont zaunk xokta. Punn to aplea bhavartha vixim aplea tonddan lokam mukhar sangta tednam taka taronn mellonk xokta.

11 Karonn Devachem utor mhunntta: “Tacher bhavarth dovorta to konnuch niraxi zaunchona.” 12 Judev ani Grik hanchea modem kainch ontor na. Karonn sogleancho Somi ekuch, zo apleak ulo marta tea sogleank zaitim* besanvam dita. 13 Karonn, “zo konn Jehovachem* nanv gheun ulo korta to salvar zatolo.” 14 Punn, tannim tacher bhavarth dovrunk na zalear tim taka ulo koxim martolim? Ani, tannim tachea vixim kednam aikonkuch na zalear tim tacher bhavarth koxim dovortolim? Ani konnem-i tachea vixim porgott korunkuch na zalear tim koxim aikotolim? 15 Ani, tankam dhaddunk na zalear, tim porgott koxim kortolim? Boroilʼlem asa toxem: “Borea vostunchi bori khobor sangtat tanche paim kitle sobit!”

16 Tori astana, tanchea modle soglech bore khobre pormonnem cholonk nant. Izaias mhunntta: “Jehova* Deva, ami sanglolea vostuncher konnem bhavarth dovorla?” 17 Tor, sondex aikolea uprantuch bhavarth dovrunk melltta. Ani, Krista vixim porgott kelea uprantuch sondex aikonk melltta. 18 Punn hanv tumkam vichartam, Tannim sondex aikonk na kai? Dubhav nastana aikola. Karonn oxem boroilʼlem asa “sondex sangtat tancho avaz akʼkhea prithumer aikonk ailo, ani tancho sondex prithumechea konnxeak meren pavlo.” 19 Punn hanv vichartam, Izraelitkarank somzonk na kai? Poilim Moizes mhunntta: “Ek raxttr pasun nhoi, tanchea udexim hanv tumi tancher zollttat toxem kortolom, eka murkh raxttra udexim hanv tumchea bhitor ragacho uzo pettoitolom.” 20 Uprant Izaias bhienastana mhunntta: “Zannim mhaka sodhunk na tankam hanv mellʼllom, ani zannim mhojea vixim vicharunk na tankam hanvem mhojea vixim kolloilem.” 21 Punn Izraelitkaram vixim to mhunntta: “Mhoji adnea pallinant ani nibor kallzache asat toslea lokam mukhar hanvem dis-bhor mhoje hat posorle.”

11 Tor hanv vichartam, Devan aplea lokank nakarleat kai? Kednanch na! Karonn hanv pasun ek Izraelitkar, Abrahamachea sonstintlo,* ani Benjaminachea kullantlo. 2 Devan sogleant poilim jea lokancher khas dhean dilʼlem, tea lokank tannem nakarunk na. Elijan, Izraelitkaram add jem Devak sanglem tea vixim Devachem utor kitem mhunntta tem tumkam khoborna? 3 “Jehova,* tannim tujea provadeank marun uddoileat, ani tujeo vedi foddun kabar keleat, ani hanv ekttoch urlam, ani atam mhozo jiv kaddunk te mhojea fattik lagleat.” 4 Punn, Devan taka kitem zobab dilo? “Azun pasun mhoje 7,000 oxe munis asat, zannim Bala mukhar dimi ghalun nomoskar korunk na.” 5 Teach toren, aiz pasun thodde urlole lok asat, zankam Devachea favo naslolea doiek lagon vinchun kaddleat. 6 Ani tankam favo naslolea doiek lagon vinchleat zalear, hacho orth tankam tanchea kamank lagon vinchleat oxem nhoi. Toxem zalem zalear, favo nasloli doia, favo nasloli doia urona.

7 Tor, ami atam kitem mhunnom-ia? Izraelitkar khub vavr korun ji vost mellounk sodhtale ti tankam mellonk na, punn ti vost vinchloleank mellʼlli. Urlole lok nibor kallzache zale. 8 Boroilʼlem asa toxem: “Devan tankam sust nhid lagom-xi kelea. Tanchea dolleamnim te pollounk xokonant, ani tanchea kanamnim te aikonk xokonant, aiz pasun tanchi hich poristhiti asa.” 9 Ani David pasun oso mhunntta: “ Tanchem mez tanchea pasot fas, zall, addkholl ghalta toslo fator ani khastichem karonn zaum. 10 Tannim polloina zaunk tanchea dolleam mukhar kallokh ieum, ani tanchi fatt sodanch bagovloli urom.”

11 Taka lagon, hanv vichartam, te porot kednanch utthonk xokonant toxe addkhollon poddleat kai? Na. Toxem zaunk na! Punn, tanchea chukinchea panvlank lagon videxi raxttrantlea lokank taronn mellonk pavlem. Judev haka lagon tancher zollttat. 12 Tor tannim chukichim panvlam ghetlim mhunn sonvsarak besanvam mellʼllim ani te unne zale dekhun videxi raxttrantlea lokank besanvam mellʼllim zalear, tancho ankddo purnn zalear anik kitlim besanvam mellttolim!

13 Atam hanv raxttrantlea lokam lagim uloitam. Mhaka apostl mhunn videxi raxttrantlea lokam lagim dhaddla, ani hanv mhojea sevek khub man* ditam. 14 Oxe toren koxe-i bhaxen tumkam polloun mhoje lok tumcher zolltta toxem korun, hanv tanchea modlea thoddeank ghoddie salvar korunk pavot. 15 Karonn, tankam pois kele tednam sonvsarantlea lokank Devacho favor melloun gheunk vatt ukti zali. Tor, tankam apnnaile zalear kitem zatolem tea vixim chintat. Tankam meloleantlean jivont kelʼlea bhaxen zatolem. 16 Tea bhair, poilem foll mhunn bhettounk haddlolo pittacho thoddo bhag povitr asa zalear, pittacho akʼkho gullo pasun povitr astolo. Ani zhaddachem mull povitr asa zalear, khande pasun povitr astole.

17 Punn, borea zoitunachea zhaddache thodde khande katorle. Ani tumi ranvotti zoitun zaun pasun, tumkam tachea urlolea khandeam modem graftt* kele ani tumi tachea mullachea ekdom borea rosache bhagidar zale. 18 Taka lagon, tumi boddai marun* katorlole khande kainch nhoi oxem korinakat. Tumi boddai martat zalear* ugddas dovrat, tumi mullak adar dinant, tachea bodlek mull tumkam adar dita. 19 Tumi mhunnttolim: “Mhaka tea zhaddacher graftt korunk zai aslem dekhun tea zhaddache khande katorle.” 20 Tumi sangtat tem khorem! Tancho bhavarth unno aslo dekhun tankam katorle, punn tumi tumchea bhavarthak lagon ghott ubim asat. Tor, gorvixtt zainakat, punn bhirant dhorat. 21 Karonn Devan zoitunachea zhaddachea khandeank soddunk na zalear to tumkam-i soddchona. 22 Tor, Devan koxi doia dakhoili ani to koso koddok ravlo tacher dhean diat. Jim poddlim tanchea thaim to koddok ravlo, punn tumkam tannem doia dakhoili. Atam tumcher tachi doia urta toxim ravat. Na zalear to tumkam-i katrun uddoitolo. 23 Anik tim porot bhavarth dovrunk laglim zalear, to tankam pasun zhaddacher graftt kortolo, karonn Dev tankam porot zoddunk xokta. 24 Tumkam ranvotti zoitunachea zhadda voilim katrun bagent aslolea zoitunachea zhaddak graftt kelim, jem choddxe pavtt korinant. Toxem zalear, hea zoitunachea zhaddachea khandeank tacheach zhaddacher porot graftt korunk kitlem sompem zatolem!

25 Bhav-bhoinnimno, tumi tumcheach nodren xannim zalʼlim, ani hea povitr gutta vixim khobor nastana urlolim mhaka naka: Videxi raxttrantlea lokancho ankddo purnn zai meren thoddea Izraelitkaranchim kallzam niboruch urlim. 26 Ani hea toren akʼkhem Izrael salvar zatolem. Boroilʼlem asa toxem: “Salvar korpi* Siona thaun ietolo ani Devacho opman kortat toslim Jakobachea sonstintlim soglim kamam kaddun uddoitolo. 27 Tanchim patkam kabar kelea uprant, hanv tanchea sangata ho korar kortolom.” 28 Bori khobor nakarun tim Devachim dusman zaleant ani hachea udexim tumkam faido zala hem khorem. Punn Devan tanchea purvozank jem utor dilʼlem, taka lagon tannem tanchea modlea thoddea lokank aple ixtt mhunn vinchleat. 29 Karonn denneam vixim ani apounnea vixim Dev aplo nirnnoi bodolchona. 30 Eka vellar tumi Devachi adnea pallinaslim, punn tumkam doia dakhoili, karonn tannim Devachi adnea pallunk na. 31 Jea toren tannim adnea pallunk na dekhun tumkam doia dakhoili, teach toren tankam-i doia dakhounk zata. 32 Tannim Devachi adnea pallunk na dekhun Devan tankam bondkhonnint ghatlolea bhaxen lekhlim. Hea toren, to tankam sogleank doia dakhounk xoktolo.

33 Devachea girestkaiechea, zannvaiechea ani gineanachea kholaiecho thav lavunk zaina! Tache nirnnoi amchean chintunk zainant toxe asat ani tacheo vatto amkam somzonk zainant toxeo asat! 34 Karonn “Jehovachem* mon konn zannam zaunk xokla, vo konn taka solʼlo diunk xokla?” 35 Vo, “konnem taka kitem tori dilam, jem tannem porot farik korunk zai?” 36 Karonn soglem tachea thaun, tachea udexim ani tachea pasot asa. Taka sodankal mhoima mellot ravom. Amen.

12 Taka lagon, bhav-bhoinnimno, Devan amkam doia-maia dakhoilea dekhun tumi tumchi kudd jivi, povitr ani Devak manvota toslem bolidan koxi diat mhunn hanv tumchea lagim vinoti kortam. Hea toren tumchi somzochi tank uzar korun tumi tachi povitr seva korunk pavtolim. 2 Sonvsarachea* vostum pormonnem tumkam akar divop bond korat. Punn tumchi chintpachi rit bodlun tumkanch bodlat. Oxe toren Devachi bori, manvota tosli, ani poripurnn khuxi kitem ti tumi tumkanch khatri korun diunk pavtolim.

3 Mhaka ji favo nasloli doia mellʼllea, tachea udexim tumchea modlea dor ekleak hanv hem sangonk sodhtam. Tumchea vixim favo tachea poros chodd chintinakat. Tachea bodlek, Devan dor ekleak jitlo bhavarth dila* tachea pormonnem tumchea vixim sarkem chintop dovrat. 4 Karonn, zoxem amchea kuddik zaite sandhe asat, punn soglea sandheanchem kam ekuch torechem asona. 5 Toxench, ami pasun zaitim asonui, Kristachea ekvottant ek kudd ani eka-mekak zuddlole sandhe zaun asat. 6 Devan, favo nasloli doia dakhoun, amkam veg-vegllea torechim dennim dileant. Taka lagon, amchea lagim bhasaunni korchem dennem asa zalear amkam zo bhavarth dila tachea pormonnem ami bhasaunni korum-ia, 7 vo seva korchem dennem dilam zalear ami seva korit ravom-ia, vo zaka xikounchem dennem mellʼllam, tannem xikoit ravchem, 8 vo zaka urba diunchem dennem mellʼllam, tannem toxem korit ravchem, zo vanttʼtta tannem udar kallzan vanttchem,* zo fuddakar gheta tannem khub vavr korun* oxem korchem, zo kakut korta tannem ti khuxalkaien korchi.

9 Tumcho mog dhong naslolo zaum. Vaittacho dves korat ani borem asa taka chittkon ravat. 10 Eka-mekak bhavam modem asta toslo mog ani aplemponn dakhoiat. Tumi poilim fuddem soron dusreank man diat. 11 Vavr korat,* allxi zainakat.* Povitr xoktechea urben bhorat. Jehovache* sevok zaun tachi seva korat. 12 Tumchea bhorvonxeak lagon khuxal zaiat. Sonkoxttachea vellar thir ravat. Magnnem korit ravat. 13 Devachea lokancheo gorzo purnn korunk tumchea lagim asa tem tankam diunk fuddem sorat. Dusreanchi kallji ghevpachi* sonvoim korat. 14 Tumkam dhumallo ditat tanchea pasot Deva lagim besanv magot ravat. Hoi, besanv magat, xirap ghalinakat. 15 Khuxal asat tanchea sangata khuxal zaiat, roddttat tanchea sangata roddat. 16 Tumi tumchea vixim chintʼtat toxench dusream-i vixim chintat. Vhoddlea-vhoddlea vostum vixim chintinakat. Punn sadeo mhunn somzotat teo vostu korit ravat. Tumkanch tumchea nodren xannim mhunn somzonakat.

17 Konnem-i tumkam vaitt kelam zalear tumi tankam vaitt korinakat. Sogleanchea nodren borem kitem tacher dhean diat ani tench korat. 18 Ghoddtta zalear, sogleam sangata xanti samballunk zata titlo proitn korat. 19 Mogacheamno, tumi bodlo gheum nakat, punn jem vaitt zalam tacher Devak aplo rag dakhounk diat. Karonn oxem boroilʼlem asa: “‘Bodlo ghevop hem mhojem kam. Tanchea vaitt kamank lagon hanv tankam farik kortolom.’ oxem Jehova* mhunntta.” 20 Punn “tumcho dusman upaxim asa zalear taka khaunk diat, to tanelʼlo asa zalear taka pieunk diat, karonn oxem korun tumi tachea mathear pettlolea kollxanchi ras dovortolim.”* 21 Vaittak tumcher zoit vhoronk dium nakat, punn borem tem korun vaittacher zoit melloit ravat.

13 Dor eka munxan apleacher odhikar asloleanchea* adhin ravchem, karonn Deva koddlean ieunk na oso khoinchoch odhikar na. Je odhikari asat tankam Devanuch veg-veglleo podveo diun nemleat. 2 Taka lagon, zo odhikaracho virodh korta to Devan korun dovorlolea manddavollichea add ubo ravta, ani zo hea manddavollichea add ubo ravta taka khast favo zatoli. 3 Borim kamam kortat te nhoi punn vaitt kamam kortat te lok odhikareank bhietat. Tuka odhikareank bhienastana jieunk zai? Toxem zalear, borim kamam korit rav, ani tuka tanchea koddlean vakhannʼnni mellttoli. 4 Karonn, te odhikari tujea boreak Devache sevok zaun asat. Punn tum vaitt kamam korta zalear bhirant dovor, karonn te bexttech tolvar gheun nant. Te Devache sevok zaun asat, ani vaitt kam korit ravtat tankam khast diunk tankam nemleat.

5 Dekhun tanchea adhin ravonk tumkam anikui borem karonn asa. Tem mhunnttlear, tumi tumchea ontoskornnak lagon tanchea adhin ravonk zai, fokot to khast laitolo mhunn nhoi. 6 Heach khatir, tumi tax pasun bhortat, karonn te Devan nemlole, lokanche sevok zaun asat ani hench kam korit ravtat. 7 Taka lagon, zaka jem diunk zai tem diat: zaka tax diunk zai, taka tax diat; zaka farik korunk zai, taka farik korat; zaka bhieunk zai, taka bhieiat; ani zaka man diunk zai, taka man diat.

8 Eka-mekacho mog korop hachea bhair konnancheach kosleach rinnant ravonakat, karonn zo mog korta tannem khoreponnim Devacho kaido pallʼllo. 9 Karonn, “Tunvem pordvar* korcho nhoi, tunvem jivexim marchem nhoi, tunvem chori korchi nhoi, tunvem as korchi nhoi,” he kaide ani urlole sogle kaide, hea ekach kaideant asat. To mhunnttlear: “Tuzo mog korta toso tujea xezareacho mog kor.” 10 Mog aplea xezareak vaitt korina. Taka lagon, mog korop mhunnttlear khoreponnim kaido pallʼllea sarkem asa.

11 Oxem korat, karonn ami khoinchea kallar jietat tem tumkam khobor asa. Atam tumi nhidentlean uttcho vell ailo, karonn ami bhavarth dovorlolo tednam poros atam amkam taronn mellpacho vell anik lagim pavla. 12 Rat sompot aili, dis uzvaddcho vell pavlo. Taka lagon, ami kallkhachim kamam soddun dium-ia ani uzvaddachim hotʼtearam bandun gheum-ia. 13 Disachea vellar lok bore toren vagtat, toxim ami-i bore toren vagom-ia. Hispa bhair mouza-mosti, bebdikai, onoitik kuddicho sombond, loz naslolim patki kamam,* zhogddim ani dusreancher zollop hem soglem ami korunk zaina. 14 Tachea bodlek, Somi Jezu Kristak ghalat,* ani kuddicheo itsa purnn korpacheo ievzonneo korinakat.

14 Zacho bhavarth oskot asa taka ieukar diat, punn tachem chintop tumchea poros vegllem asa mhunn* tachi zhoddtti korinakat. 2 Eka munxak bhavarth asta ani to soglem khata, punn zacho bhavarth oskot asa to fokot bhaji-palo khata. 3 Khata tannem khaina taka kainch valoracho na mhunn lekhcho nhoi. Toxench, khaina tannem khata tachi zhoddtti korchi nhoi, karonn Devan taka ieukar dila. 4 Dusreachea sevokachi zhoddtti korunk tum konn? To ubo ravtolo kai poddttolo to nirnnoi tacho dhoni kortolo. Khorem mhunnttlear, to ubo ravtolo, karonn Jehova* taka ubo korunk xokta.

5 Ek munis, umkoch dis dusrea disa poros mhotvacho mhunn lekhta. Punn dusro munis sogle dis ekach sarke mhunn lekhta. Dor eka munxan taka purnn khatri asa tench korchem. 6 Ek munis, ek dis mhotvacho mhunn lekhta zalear to Jehovak* lagon to mhotvacho mhunn lekhta. Ani toxench zo khata, to Jehovak* lagon khata, karonn to Devache upkar attoun khata. Ani zo khaina to Jehovak* lagon khaina, tori astana to Devache upkar attoita. 7 Khorem mhunnttlear, amchea modlo konnuch svotak lagon jiena ani konnuch svotak lagon morona. 8 Karonn ami jietat zalear Jehovak* lagon jietat, ani ami mortat zalear Jehovak* lagon mortat. Taka lagon, ami jieum vo morom, ami Jehovachinch* zaun asat. 9 Karonn Kristan meloleancho ani jiveancho Somi zauncho mhunn aplo jiv dilo, ani to jivont zalo.

10 Punn tum tujea bhavachi zhoddtti kiteak korta? Vo tuzo bhav kainch valoracho na mhunn kiteak somzota? Ami soglim Devachea neai korpachea xinvasona mukhar ubim ravtolim. 11 Karonn oxem boroilʼlem asa: “Jehovan* mhunnttlam, ‘Hanv mhojea jivacho soput gheun sangtam, dor eklo mhojea mukhar dimi ghaltolo, ani hanvuch Dev mhunn dor eklo aplea jiben sogleam mukhar manun ghetolo.’” 12 Tor, amchea modlo dor eklo Devak hixob ditolo.

13 Taka lagon, atam thaun ami eka-mekachi zhoddtti korchi nhoi. Tachea bodlek, tumi tumchea bhava mukhar addkholl ghalta toslo fator vo bhavarth soddun vochonk karonn zaunchim nant mhunn nichov korat. 14 Hanv zannam ani Somi Jezu Kristacher mhaka purnn khatri asa ki khoinchich vost oxudʼdh asona. Punn zo te vostuk oxudʼdh mhunn somzota, taka ti vost oxudʼdh. 15 Tujea jevnnak lagon tuzo bhav dukhovta zalear, tum atam mogan cholona. Krist zachea pasot melo, tacho tum tujea jevnnak lagon nas korinaka. 16 Taka lagon, tumi jem borem kam kortat tachea vixim vaitt ulounk dium nakat. 17 Karonn Devachem Raj mhunnttlear khavop-pievop nhoi, punn nitivontponn, xanti ani povitr xokte udexim melltta ti khuxalkai. 18 Zo konn hea toren Kristacho sevok zaun tachi seva korta to Devak manvota ani taka munxam koddlean pasun maniotai melltta.

19 Tor, xanti korunk ani eka-mekak urba diunk ami zata titlo proitn korum-ia. 20 Fokot jevnnak lagon Devachem kam piddʼddear korun uddoinakat. Sogleo vostu xudʼdh tem khorem. Punn eka munxachea jevnnak lagon dusreak addkholl zata zalear tannem tem jevonn jevop chukichem zatolem. 21 Tum mas khaina vo drakxancho soro piena vo tujea bhavak addkholl korta tosli kosli-i vost korina zalear odik borem. 22 Hea vixim tuzo zo bhavarth asa, to tujea ani Deva modem dovor. Ek munis ek kam sarkem mhunn chintʼta ani tem kelea uprant apleakuch guneanvkari mhunn lekhina, to munis khuxal. 23 Punn tachea monant dubhav asa ani tori astana to khata zalear to guneanvkari zaun asa, karonn to bhavarthan khaina. Khorench, dor ek kam jem bhavarthan korinant tem patok zaun asa.

15 Ami jim bhavarthant ghott asat, tannim oskot asat tancheo oskotkaieo somzon gheuncheo, ani fokot amkanch khuxal korunk chintchem nhoi. 2 Dor eklean aplea xezareak khuxal korunk chintchem jea udexim tachem borem zatolem ani to ghott zatolo. 3 Karonn, Kristan pasun apleakuch khuxal korunk chintunk na. Tachea vixim oxem boroilʼlem asa: “Tujea add uloitat tanchim utram mhojer aileant.” 4 Poilim thaun boroun dovorloleo sogleo vostu amkam xikounn diunk boroun dovorleat. Devachea Utrantlean amkam bhorvonso melltta, karonn Devachem Utor amkam thir ravonk modot korta ani bhuzvonn dita. 5 Tumchem chintop ani tumcho sobhav Krist Jezu bhaxen zauncho mhunn tumkam thir ravonk modot korpi ani bhuzvonn diupi Dev tumcher besanv ghalum. 6 Hea toren tumi ekvottan ravon ani eka avazan* amcho Somi Jezu Kristachea Devachi ani Bapachi mhoima korunk pavtolim.

7 Tor, Kristan zoxim amkam apnnaileant* toxench tumi eka-mekak apnnaiat,* oxe toren Devachi mhoima zatoli. 8 Karonn hanv tumkam sangtam ki Krist sunot zalʼli tancho sevok zalo. Dev khoro, ani tannem tanchea purvozank kelʼleo bhasaunneo visvas dovorpa sarkeo asat mhunn govai mellchea pasot oxem zalem. 9 Ani videxi raxttramnim pasun Devache doiek lagon tachi mhoima korchi mhunn oxem zalem. Zoxem boroilʼlem asa: “Hea pasot raxttram modem sogleam mukhar hanv tuka vakhannttolom, ani gitam gaun tujea nanvak argam ditolom.” 10 Uprant to mhunntta: “Raxttramno, Devachea lokam sangata khuxal zaiat.” 11 Ani to porot mhunntta: “Soglea raxttramno, Jehovachi* vakhannʼnni korat, ani raxttrantlea soglea lokamnim tachi vakhannʼnni korchi.” 12 Ani uprant Izaias mhunntta: “Jesechea mullak kombri futtʼttoli. To raxttrancher raz korunk ubo ravtolo, ani veg-vegllea raxttrantle lok tacher bhorvonso dovortole.” 13 Bhorvonso diupi Dev tumkam bhorpur khuxalkai ani xanti dium mhunn hanv magnnem kortam. Karonn tumi tacher bhorvonso dovorla, ani hea toren povitr xoktechea bollan tumcho bhorvonso vaddot vochom.

14 Bhav-bhoinnimno, tumi boreponnan ani gineanan khub bhorlolim asat, ani tumi eka-mekak somzaunk* xoktat mhunn mhaka tumchea vixim khatri asa. 15 Tori astana, thoddea vostuncho tumkam porot ugddas korunk hanvem Deva thaun mellʼllolea favo naslolea doien tea vixim ekdom spoxttponnim boroilam. 16 Hanv videxi raxttram pasot Krist Jezucho lokam khatir sevok zauncho mhunn mhaka hi favo nasloli doia dakhoilea. Hea videxi raxttramnim povitr xokte vorvim, povitr kelʼli ani Devak manvota tosli bhett zaunchi mhunn hanv Devachi bori khobor sangpachem povitr kam kortam.

17 Dekhun Devache sevek zuddlolea vostum vixim hanv Krist Jezucho xis mhunn mhaka gorv bhogta. 18 Jim kamam Kristan mhojea udexim keleant tim soddun hanv anik kainch ulounchona. Videxi raxttramnim adnea pallcheo mhunn Kristan mhojea udexim kam kelem. Tannem mhojea utram udexim ani kamam udexim, 19 ani khunna ani vizmitam udexim, ani povitr xoktechea bollan oxem kelem. Hanvem Jeruzalema thaun Ilirikum poriant charui vatten Kristachi bori khobor bore bhaxen porgott kelea. 20 Punn, dusrean buniad ghatlolea zageacher hanvem bandkam korchem nhoi mhunn, jea vattaramnim Kristachea nanva vixim poilinch porgott kelam, thoim vochon hanv bori khobor sangchona mhunn hanvem nichov kela. 21 Tachea bodlek, zoxem boroilʼlem asa toxench korpacho hanvem dhei dovorla: “Tachea vixim zankam kednanch sangonk na tim polloitolim, ani zannim aikonk na tim somzotolim.”

22 Taka lagon, zaite pavtti hanv tumchea lagim ieunk sodhtalom tednam mhaka addailo. 23 Punn atam hea vattaramnim porgott zaunk na oso ekui zago uronk na, ani hanv zaitea* vorsam thaun tumchea lagim ieunk axeun aslom. 24 Tea pasot, hanv Spainant vochonk bhair sortolom tednam vatter tumkam mellon tumchea borabor thoddo vell sartolom. Ani thoddi vatt meren tumi mhaka pavounk ietole mhunn hanv bhorvonso dovortam. 25 Punn atam hanv Devachea lokanchi* seva korunk Jeruzalemant vochpachom asa. 26 Jeruzalemant Devachea lokam* modem je gorib asat tanchea pasot Masedoniant ani Akaiant ravtoleamnim aplea lagim asa tantuntlem khuxen dan dilam. 27 Tankam diunk khuxalkai mellʼlli, ani khorem mhunnttlear, te Devachea lokanche rinnkari asle. Karonn Devachea lokamnim Deva koddlean tankam jem mellʼllem tem videxi raxttrantlea lokankui dilem. Tor Devachea lokancheo dor disacheo gorzo purnn korunk, dan diun tanchi seva korop, hi tanchi zobabdari zaun asa. 28 Taka lagon, hanv hem kam purnn korun, ani hem dan tanchea meren pavoilea uprant, tumchea lagim ieunuch Spainant voitolom. 29 Ani hanv tumchea lagim ietolom tednam Krista koddlean zaitim besanvam gheun ietolom mhunn hanv zannam.

30 Atam mhojea bhav-bhoinnimno, Somi Jezu Kristacher tumkam zo bhavarth asa ani povitr xokten tumchea modem zo mog utpon kela, taka lagon mhojea bhaxen tumi pasun kallzantlean mhojea pasot Deva lagim magnnem korit ravat mhunn hanv tumkam urba ditam. 31 Devan mhaka Judeiantlea bhavarth dovornant toslea lokam thaun vachounchem ani Jeruzalemantlea Devachea lokamnim* mhoji seva manun gheunchi mhunn magnnem korat. 32 Oxe toren, Devachi khuxi purnn korun hanv khuxalkaien tumchea lagim ietolom tednam ami eka-mekak urba diunk pavtolim. 33 Xanti diupi Dev tumchea sogleam sangata asum mhunn hanv magtam. Amen.

16 Kenkreiachea sobhent seva korta ti amchi bhoinn Febe vixim, hanv tumkam sangonk sodhtam. 2 Devachea lokank* diunk zai toso Somiachea nanvan tika ieukar diat. Toxench, tika koslea-i kamant tumchi goroz poddli zalear tika modot korat, karonn ti zaitea lokank ani mhaka pasun modot* korunk rokddich aili.

3 Mhojea sangata Krist Jezuchea sevent vavurpi, Priska ani Akuilak mhozo nomoskar. 4 Tannim mhozo jiv vachounk aplo jiv* dhokeant ghatlo. Ani fokot hanvuch nhoi, punn videxi raxttrantleo sogleo sobha pasun tanche upkar attoitat. 5 Tanchea ghorant mellon ieta tea sobhek nomoskar. Ani Krista pasot Asiache poilem foll zaun aslolea mhojea mogacho Epenetusakui mhozo nomoskar. 6 Tumchea pasot khub vavr kela tea Mariekui nomoskar. 7 Toxench, je mhojea sangata bondkhonnint asle te mhoje soire, Andronikus ani Junias hankam-i nomoskar. Apostlam modem tankam borem nanv asa ani mhojea poilim thaun te Kristache xis zaun asat.*

8 Mhozo mogall bhav Ampliatusak mhozo nomoskar. To pasun Somiacho pattlavdar zaun asa. 9 Mhojea sangata Kristache sevent vavurpi Urbanusak nomoskar, ani mhojea mogachea Stakusak pasun nomoskar. 10 Kristachi maniotai aslolea, Apelesak mhozo nomoskar. Aristobolusachea ghorantlea sogleank mhozo nomoskar. 11 Mhozo soiro, Herodionak nomoskar. Narsisusachea ghorantle sogle je Somiache xis zaleat tankam mhozo nomoskar. 12 Somiache sevent khub vavr korpi, Trifena ani Trifosak mhozo nomoskar. Mhojea mogachea Persisak mhozo nomoskar. Tinnem Somia pasot zaito vavr kela. 13 Somia pasot vinchlolea Rufusak ani tache avoik mhozo nomoskar. Tika hanv-ui mhoji avoi mantam. 14 Asinkritus, Flegon, Hermes, Patrobas, Hermas ani tanchea sangata aslolea bhavank mhozo nomoskar. 15 Filologus ani Julia, Nereus ani tachi bhoinn, ani Olimpas, ani tanchea sangata aslolea soglea Devachea lokank* mhozo nomoskar. 16 Eka-mekak povitr umo diun nomoskar korat. Kristacheo sogleo sobha tumkam nomoskar kortat.

17 Bhav-bhoinnimno, atam hanv tumkam oxi vinoti kortam, tumi xikleant tea vostum add vochon je lok sobhent futt ghaltat ani dusreank bhavarth soddun vochonk* karonn zatat, tancher nodor dovrat ani tanchea thaun pois ravat. 18 Karonn osle munis, amcho Somi Kristache gulam nhoi, punn aplea pottache gulam* zaun asat. Te godd uloun ani mon bhulovpi utramnim sadea lokank fosoitat. 19 Tumchem visvaxiponn soglea lokamnim polloilam ani taka lagon, mhaka tumchea vixim khuxalkai bhogta. Punn tumi borea vostum vixim xannim, ani vaitt vostum thaun nitoll ravlolim mhaka zai. 20 Xanti diupi Dev beginuch Soitanak tumchea paim-am khala chiddʼddoitolo. Amcho Somi Jezuchi favo nasloli doia tumcher asom.

21 Mhojea sangata vavurpi Timot ani mhoje soire Lusius, Jason, ani Sosipater tumkam nomoskar mhunnttat.

22 Hanv Tertius, zo hi chitt boroitam, Somiachea nanvan tumkam nomoskar mhunnttam.

23 Gaius, zannem mhaka aplea ghorant ieukar dilo, ani zachea ghorant akʼkhi sobha ektthaim zata, tacho tumkam nomoskar. Erastus, zo xaracho karbhari* zaun asa, ani tacho bhav, Kuartusacho tumkam nomoskar. 24 *——

25 Hanv tumkam ji bori khobor sangtam ani Jezu Krista vixim porgott kortam, tachea udexim Dev tumkam ghottai diunk xokta. Hi bori khobor tea povitr gutta pormonnem asa zo ugddapo kela. Ho povitr gutt adlea kalla thaun gupit dovorlolo. 26 Punn atam to gutt ugddapo zait asa. Soglea raxttramnim bhavarth dovrun adnea pallcheo mhunn sodankal astolo tea Devachea adnea pormonnem, ho gutt tachea Utrant boroilʼlea bhasaunneam udexim sogleank kolloitat. 27 Zannvaien bhorlolea ekleach Devachi Jezu Krista udexim sodanch mhoima zait ravom. Amen.