Watchtower ONLINE LIBRARY
Watchtower
ONLINE LIBRARY
Konkani (Romi)
  • BIBLE
  • PROKAXONAM
  • MITTING
  • nwt 2 Korintkarank 1:1-13:14
  • 2 Korintkarank

Tunvem vichun kaddla tea vixoi-acher viddeo na.

Sorry, ho viddeo sarko load zaunk na.

  • 2 Korintkarank
  • Novo Sonvsar Bhaxantor Bible
Novo Sonvsar Bhaxantor Bible
2 Korintkarank

KORINTKARANK DUSRI CHITT

1 Hanv Paulu, zo Devache khuxe pormonnem Krist Jezucho ek apostl zaun asa, amcho bhav Timota sangata Korintantlea sobhek ani toxench akʼkhea Akaiant aslolea soglea Devachea lokank* pasun hi chitt boroitam.

2 Dev zo amcho Bap zaun asa, tachea thaun ani Somi Jezu Krista thaun tumkam favo nasloli doia ani xanti mellom.

3 Amchea Somi Jezu Kristachea Devak ani Bapak sodanch vakhannʼnni mellom, karonn to doien bhorlolo Bap ani sogle torechi bhuzvonn diupi Dev. 4 To amkam amchea soglea sonkoxttamnim* bhuzvonn* dita, jea udexim soglea torechea sonkoxttancho* fuddo kortoleank, ami Deva thaun amkam mellʼllea ti bhuzvonn diunk xoktat. 5 Karonn zoxem Krista pasot ami zaitem dukh sostat, toxench Krista udexim amkam zaiti bhuzvonnui melltta. 6 Amkam kitlea-i sonkoxttancho* fuddo korunk poddlear pasun, tem tumchea bhuzvonne pasot ani taronna pasot asa. Ani amkam bhuzvonn melltta tednam tumkam-i bhuzvonn melltta. Hi bhuzvonn tumkam soglea torechem dukh sosunk modot kortoli, jem ami pasun sostat. 7 Zoxem tumi amchea bhaxen dukh sostat, toxench tumkam amchea bhaxen bhuzvonnui mellttoli mhunn amkam ghott bhorvonso asa.

8 Bhav-bhoinnimno, Asiant amcher kosle-kosle sonkoxtt ailole tea vixim tumi zannam zalʼlim amkam zai. Amcher itle tras aile ki ami amcheach bollan tem sosunk xokona zale. Ami ghoddie jive urchenant oxem amkam dislem. 9 Khorem mhunnttlear, amcher mornnachem formonn poddlam oxem amkam dislem. Ami amcho bhorvonso svotacher nhoi, punn meloleank jivont korta tea Devacher dovorcho mhunn oxem zalem. 10 Tannem amkam mornnachea vhoddlea dhokea thaun salvar kele ani kortolo, ani amkam bhorvonso asa ki to fuddem-i amkam salvar korit ravtolo. 11 Tumi-i amchea pasot vinovnneo korun amkam modot korunk zata. Hea udexim zaitea zannanchea magnneank lagon amkam zo favor dakhoila, tea pasot zaiteank amchea pasot Devache upkar attounk sondhi mellttoli.

12 Amkam hea vostuncho gorv bhogta, ani amchem ontoskornnui govai dita ki ami sonvsarant, ani khas korun tumchea modem povitrtaien ani Dev xikoita tea promannikponnan vagleat. Ami hea sonvsarache zannvaiecher nhoi, punn Devachea favo naslolea doiecher patieun vagleat. 13 Tumi vachunk* ani somzonk xoktat tea vostum bhair ami tumkam dusrem kainch boroinant. Ani tumi hea vostunchi purnn toren* somzonni gheit ravtole mhunn ami bhorvonso dovortat. 14 Khorem mhunnttlear, ami tumchea pasot boddai marunk karonn zaun asat. Toxench, tumi-i amchea pasot Somi Jezuchea disak boddai marunk karonn zatole mhunn tumi thoddea promannan tori somzonk pavleat.

15 Tor, hich khatri dovrun tumkam khuxal zaunk anik ek sondhi mellchi* mhunn hanv tumchea lagim dusre pavtt ieunk sodhtalom. 16 Karonn hanv Masedoniak voitana ani toxench thoim thaun porot ietana tumkam mellonk chintʼtalom, ani magir Judeiak voitana tumi thoddi vatt meren mhaka pavounk ieiat. 17 Hanvem oxem korunk chintlem tednam, fattim-fuddem polloinastana hanvem oxem kelem kai? Vo hanv kitem-i korunk chintʼtam tednam, hanv mhaka zai toxem korunk poilim, “Hoi-hoi” ani magir “Na-na” mhunnttam kai? 18 Punn zoso Devacher bhorvonso dovrunk zata, teach toren ami “hoi” mhunnttat tednam tacho orth “na” zaunchona mhunn tumi amcherui bhorvonso dovrunk zata. 19 Karonn Devacho Put Jezu Krist, zaka ami, mhunnche, hanvem, Silvanusan* ani Timotan tumche modem porgott kela, to poilo “hoi” zaun uprant “na” zaunk na. Tache bodlek, tachea vixim “hoi,” sodanch “hoi” zalam. 20 Karonn Devacheo kitleo-i bhasaunneo aslear pasun, tachea udexim teo sogleo “hoi” zaleat. Teach pasot, tachea udexim ami Devak “Amen” mhunnttat, jea vorvim tachi mhoima zata. 21 Punn zo tumi ani ami Kristachim mhunn gerentti dita ani zannem amkam povitr xokten makhleant to Dev zaun asa. 22 Tannem amcher aplo xikʼko pasun marla ani fuddem kitem ieunchem asa tachi gerentti dilea,* mhunnche, amchea kallzamnim povitr xokti ghatlea.

23 Atam, hanv tumkam anik dukh diunk sodhinaslom dekhun hanv Korintant atam meren ieunk na. Hi fott zalear Devan mhojea add govai diunchi. 24 Ami tumchea bhavarthache dhoni oxem nhoi. Punn ami tumchea khuxalkaie pasot tumchea sangata vavurpi zaun asat, karonn tumi tumchea bhavarthak lagon ubim asat.

2 Tumchea lagim hanv porot ietana, hanv tumkam dukhi korchom na mhunn hanvem nichov kela. 2 Karonn hanvem tumkam dukhi kelim zalear mhaka anik konn khuxal kortolim? Fokot tinch zankam hanvem dukhi keleant. 3 Jea lokam vorvim mhaka khuxalkai mellonk zai, tanche vorvim hanv dukhi zaina zaunk hanvem heo vostu tumkam boroileat. Karonn mhaka bhorvonso asa ki jea vostum udexim mhaka khuxalkai melltta, teach vostum udexim tumkam-i khuxalkai melltta. 4 Tumi dukhi zaunchim nhoi, punn tachea bodlek, hanv tumcho kitlo mog kortam hem tumkam kollchem mhunn hanvem khub trasan ani kallzache khontin, dukam golloun-golloun tumkam hem boroilam.

5 Atam konnem-i dukh dilam zalear tem mhaka nhoi, punn eke toren tumkam sogleank dukh dilam. Hanv hem tumkam koddok utramnim sangonk sodhina. 6 Tea munxak choddxea lokamnim ji xist dilea ti puro. 7 Atam tumi doia dakhoun taka bhogsunk zai ani taka bhuzvonn diunk zai, na zalear to dukhant buddon voitolo. 8 Taka lagon, tumi tacho mog kortat mhunn taka khatri diunk hanv tumkam urba ditam. 9 Karonn tumi soglea vostumnim adnea pallttolim kai na hem mhaka pollounchem aslem, tea pasotui hanv hi chitt boroitam. 10 Tumi konnankui bhogxitat zalear taka hanv pasun bhogxitam. Khorem mhunnttlear, hanvem konnankui bhogxila (zor hanvem kitem-i bhogxilam) tem hanvem Krista mukhar tumchea pasot kelam. 11 Oxem kelʼlean Soitan amcho faido gheunk pavchona,* karonn tacheo naddbudʼdheo* amkam khobor asat.

12 Hanv Krista vixim bori khobor sangonk Troasant pavlom, ani Somiache sevent mhojea pasot ek dar ugoddlem. 13 Tednam, mhozo bhav Tit thoim na tem polloun mhojea jivak suseg na zalo. Tor hanvem thoinchea xisank hanv voitam mhunn sanglem ani hanv Masedoniak vochonk bhair sorlom.

14 Punn Devache upkar, zo sodanch amchea mukhar cholon, zhuzant zoit melloun ietat tanchea bhaxen, amkam Krista sangata gheun voita, ani amchea udexim aplea gineanacho pormoll soglea zageancher ximpddaita!* 15 Karonn salvar zatoleam modem ani nas zatoleam modem ami Deva mukhar, Krista vixim sondexacho pormoll zaun asa. 16 Nas zatoleam pasot to mornnacho vas* zaun asa zo mornnak pavoita, ani salvar zatoleam pasot to jivitacho pormoll zaun asa zo jivitak pavoita. Hea sevek favo tea toren konn purte asat? 17 Ami purte asat, karonn zaite lok kortat toxe ami Devachea utracho veapar-dhondo korpi* nhoi. Tachea bodlek, amkam Devan dhaddlole dekhun ami promannikponnan uloitat. Hoi, ami Deva mukhar ani Krista sangata ravon uloitat.

3 Ami porot ek pavtt tumkam amchi vollokh diunchi poddttoli kai? Vo thoddea lokam bhaxen tumkam amchea vixim somzaunk ami tumkam chitti diunk zai, vo amchea vixim somzaunk tumchea koddlean chitti gheunk zai? 2 Tuminch amchi chitt zaun asa, ji amchea kallzancher boroilea ani ji akʼkho sonvsar zannam ani vachta. 3 Karonn tumi Krista koddlean amchi chitt mhunn sarkem dison ieta. Ani ami sevokamnim boroilea ti chitt, ink-an nhoi punn jivea Devachea povitr xokten, ani fatrachea pattiecher nhoi punn kallzancher boroilea.

4 Krista udexim Deva mukhar amkam hich khatri asa. 5 Ami amchech xokten purte asat oxem ami mhunnonant. Punn Dev amkam purte korta dekhun ami purte zatat. 6 Khorench, tannem amkam gorje pormonnem purte keleat. Ami khoinchea-i boroilʼlea kaideache nhoi, punn eka novea korarache ani povitr xokteche sevok zaunche mhunn tannem oxem kelem. Karonn boroilʼlo kaido mornnachi khast dita, punn povitr xokti jivit dita.

7 Itlench nhoi, jea kaidea udexim moronn ieta ani zo fatracher kantoun boroilʼlo, to itlea mhoimen dilʼlo ki Izraelitkar Moizesachem tondd porzollttalem dekhun taka pollounk xokle na. Punn to oslo porzoll aslo zo kabar zauncho aslo. 8 Tor, povitr xokti anikui chodd mhoimen diunk zaina kai? 9 Khast dita to kaido mhoimen bhorlolo aslo zalear nitivontponnak pavoita ti seva anik kitli mhoimen bhorloli astoli! 10 Khorem mhunnttlear, jem eka vellar mhoimen bhorlolem aslem tachi mhoima kaddun ghetli, karonn ji mhoima uprant aili ti tachea poros vhodd asli. 11 Karonn, jem kabar zaunchem aslem tem itlea mhoimen haddlolem zalear, jem urtolem tachi mhoima anik kitli chodd zatoli!

12 Amche koddem oslo bhorvonso asa dekhun ami samke ukteponnim uloitat. 13 Moizesa bhaxen ami korinant. Kabar zauncho aslo tea kaideachea mhoime koddem Izraelitkaramnim polloit ravchem nhoi mhunn, to aplem tondd eka poddʼddean dhamptalo. 14 Punn tanchim monam somzonk xokonaslim. Aiz pasun adlo korar vachtat tednam tanchea kallzancher toch poddʼddo asta, karonn to poddʼddo fokot Krista udexim kaddunk zata. 15 Khorem mhunnttlear, aiz pasun Moizesachim pustokam vachtat tednam tanchea kallzancher poddʼddo dhamplolo asta. 16 Punn jednam konnui porton Jehova* koddem ieta, tednam to poddʼddo kaddlea sarko zata. 17 Jehova* dixtti poddona. Ani jea zagear Jehovachi* povitr xokti asa, thoim svotontrtai asa. 18 Amchea tonddancher poddʼddo dhamplolo na, ani ami soglim harxea sarkim Jehovachi* mhoima fankoitat. Oxem kortana, amchem rup Deva sarkem zait voita. Jehova,* zaka ami pollounk xokonant to* jea toren amchem rup bodolta, teach toren ami disan-dis tachi mhoima chodd promannan fankoit ravtat.

4 Taka lagon, amcher doia korun amkam hi seva dilea dekhun ami dhir soddun dinant. 2 Punn ami lipon kortat tim lojechim kamam soddun dileant. Ami naddbudʼdhin kamam korinant, ani Devachea utrant kainch ghalinant vo kaddinant. Tachea bodlek, sot sangon ami Deva mukhar dor eka munxachea ontoskornnak manvotolem toxem borem udharonn dovortat. 3 Ami porgott kortat tea bore khobrecher poddʼddo dhamplolo asa zalear to nas zaunchea vatter asat tanchea pasot dhamplolo asa. 4 Jezu zo Devachea rupa sarko asa, tachea vixim mhoimebhorit bore khobrecho uzvadd bhavarth nasloleancher porzollcho nhoi mhunn tanchim monam hea sonvsarachea* devan kuddʼddim keleant. 5 Karonn ami amchea vixim porgott korinant, punn Jezu Krista vixim porgott kortat, ki to Somi zaun asa. Ani ami amchea vixim oxem sangtat ki ami Jezu pasot tumche sevok zaun asat. 6 Karonn Devan oxem mhunnttlolem: “Kallkhantlean uzvadd porzollom-di.” Tannench amchea kallzancher aplo uzvadd porzollaila. Oxem kelʼlean Kristachea tonddacher porzolltta tea Devachea mhoimebhorit gineanan ami tanchim monam uzvaddaunk pavtolim.

7 Punn, amchea lagim ho thevo matiechea aidonamnim* asa. Oxe toren amkam dilʼli hi xokti ji munxachea xokte poros khub vorti asa ti amchea thaun nhoi punn Deva thaun melltta mhunn kollon ieta. 8 Amkam soglea vatten chiddʼddoitat, punn amkam kainch bhorvonso na oxem nhoi; ami ekdom ghuspotat, punn ami itle ghusponant ki amkam kainch vatt disona;* 9 amkam dhumallo ditat, punn amkam soddun dinant; amkam khala uddoitat, punn amcho nas zaina. 10 Jezuchem jivit amchea kuddint dison ieunchem mhunn Jezun sosle tosle mornnache vollvolle ami sodanch amchea kuddint sostat. 11 Karonn Jezuchem jivit, nas zata toslea amchea kuddint dison ieunchem mhunn ami jim jivim asat tim sodanch Jezu khatir mornnacho fuddo kortat. 12 Oxe toren amchea bhitor moronn kam korta, punn tumchea bhitor jivit kam korta.

13 Amchea bhitor bhavarthachi tich bhavna asa zache vixim oxem boroilʼlem asa: “Hanvem bhavarth dovorlo dekhun hanv uloilom.” Ami-i bhavarth dovorla dekhun ami uloitat. 14 Amkam khobor asa ki zannem Jezuk jivont kelʼlo, to amkam-i Jezu sangata jivont kortolo ani amkam tumchea borabor tachea mukhar haddttolo. 15 Heo sogleo vostu tumchea pasot ghoddttat. Hea toren choddan-chodd lokank Devachi favo nasloli doia melltta karonn zaito lok Devache upkar attoita ani oxe toren Devak mhoima melltta.

16 Heach pasot, ami soddun dinant. Bhailean asa to munis* kabar zait voita zalear pasun, bhitorlean asa to munis disan-dis novo zait voita. 17 Karonn amcher ietat tim sonkoxttam* lhan ani thoddea vellachim. Tori astana, tanchea vorvim amkam mellttolo to inam sogleam poros vorto* asa, ani sodankal urtolo. 18 Tea mhunnosor, ami amche dolle distat toslea vostuncher nhoi, punn disonant toslea vostuncher lavun dovortat. Karonn distat teo vostu thoddea vellacheo, punn disonant teo vostu sasnak urtat tosleo.

5 Ami zannant, prithumecher aslolem amchem hem ghor, mhunnche amchea kuddicho tombu soron voitolo tednam Deva thaun amkam sorgar sodanch urta toslem ek ghor mellttolem, oslem ghor jem hatamnim bandunk na. 2 Karonn ami prithume voilea hea ghorant astana vollvollttat, ani sorgar thaun asa tem ghalunk ami axeun ravtat. 3 Ani ami tem ghaltolim tednam ami vingllim urchimnant. 4 Khorem mhunnttlear, hea tombunt astana amcher aslolea bharak lagon ami khub chiddʼddoleant ani vollvollttat. Amkam ho tombu kaddun uddounk zai oxem nhoi, punn amkam sorgar asa to tombu ghalunk zai. Oxe toren, nas zaunchem asa taka jivit gillun uddoitolem. 5 Zannem amkam hea pasot toiar keleant to zaun asa Dev. Tannem fuddem ieupacheo asa tea vostunchi gerentti* mhunn amkam tachi povitr xokti dilea.

6 Tea pasot, ami sodanch dhiran vagtat ani jea meren ami hea ghora sarkea kuddint asat, tea meren ami Somia thaun pois asat mhunn ami zannant. 7 Karonn ami dixtti poddttat tea vostunchea adaran nhoi, punn bhavarthan choltat. 8 Punn ami dhir dhorun ravtat ani munxachea kuddint ravchea poros ami Somiachea sangata ravonk sodhtat. 9 Tor, ami tachea sangata ravom vo tachea thaun pois ravom, taka khuxal korop hoch amcho dhei zaun asa. 10 Karonn kuddint astana dor eklean jim borim vo vaitt kamam keleant, tea pormonnem taka farikponn mellchem mhunn, amchea modlea dor ekleak Kristachea neai korpachea xinvasona mukhar ubem ravonk poddttolem.*

11 Somiachi bhirant dovrunk zai hem zannam zaun ami khatreche purave diun lokank xikoit ravtat. Ani ami kosle munis tem Dev bore bhaxen zannam. Toxench, tumchem sogleanchem ontoskornn pasun amkam bore bhaxen vollkhonk pavlam mhunn ami bhorvonso dovortat. 12 Amkam tumchea mukhar porot boddai marunk naka. Punn je lok kalliz polloun nhoi punn bhailem rup polloun boddai martat, tankam zobab diuncho mhunn ami tumkam amchea vixim boddai marunk urba ditat. 13 Karonn ami pixe asle zalear tem Deva pasot asle, ani ami xanne asat zalear tem tumchea pasot asat. 14 Kristacho mog amkam fuddem kaddit asa, karonn amkam hem kollon ailam ki ek munis sogleam pasot melo, karonn soglim melolim aslim. 15 Jim jivim asat tannim atam thaun fokot apnnam pasotuch jieunchem nhoi, punn zo tanchea pasot mela ani jivont kela tachea pasot jieunchem mhunn, to sogleam pasot melo.

16 Taka lagon, atam thaun ami khoincheach munxak, munxachea nodren polloinant. Eka vellar ami Kristak munxachea nodren polloitalim zalear pasun, atam ami taka tea nodren koxinch polloinant. 17 Tor konnui Kristachea ekvottant asa zalear, to ek novi rochnna zaun asa. Porneo vostu geleo; polloiat! noveo vostu ostitvant aileat. 18 Punn sogleo vostu Deva thaun asat, tannem Krista udexim aplea sangata amkam aplo favor porot mello sarko kelo, ani lokank tachea koddem aplem natem porot zoddunk modot korpachi amkam seva dilea. 19 Mhunnche, hem sangpachi seva ki Dev, Krista udexim sonvsarak aplo favor porot mello-so korta. Tannem tanche koddlean tanchea patkancho hixob gheunk na. Ani lokank tache koddem aplem natem porot zoddun gheunk modot korpachi amkam seva dilea.

20 Taka lagon, Devan amchea udexim vinoti kelʼlea bhaxen ami Kristachea bodlek kam korpi prothinidi zaun asat. Kristachea bodlek kam korpi zalolean ami tumchea lagim vinoti kortat: “Devacho favor porot melloun gheiat.” 21 Ami Deva mukhar manvololim zaunk,* zannem kednanch patok korunk na taka Devan amchea pasot patkachea farikponnachi bhett mhunn dilo.

6 Deva sangata kam korta astana, ami tumkam hi vinoti kortat ki Devachi favo nasloli doia apnnailea uprant ticho udʼdhex visornakat. 2 Karonn to mhunntta: “Favor zoddun gheunchea vellar hanvem tujem aikolem, ani taronnachea disa tuka modot keli.” Polloiat! Atanch favor zoddun gheuncho vell zaun asa. Polloiat! Atanch taronn melloun gheuncho dis.

3 Ami kortat tea sevent koslich chuk mellona zaunk, dusrim addkhollon poddonk xoktat toslem ami kainch korinant. 4 Punn soglea vattamnim ami Devache sevok mhunn dakhoun ditat: thir ravon, sonkoxttant, gorje vellar, kotthin poristhitint, 5 mar khaun, bondkhonnint ravon, hinvsen bhorlolea lokancho fuddo korun, koxtti vavr korun, nhidonastana rati kaddun, bhuk sosun, 6 xudʼdh ravon, ginean uzar korun, pasiens dakhoun, doia dakhoun, povitr xokten, dhong naslolo mog dakhoun, 7 sot tem uloun, Devache xokten, uzvea* ani dhavea hatant* nitivontponnachim hotʼtearam gheun, 8 man melltta ani opman zata tea vellar, amchea vixim vaitt khobro posraitat ani boreo khobro posraitat tea vellar. Ami dusreank fosoitat mhunn somzotat punn ami sot uloitat. 9 Amkam lok vollkhonant tori ami famad asat, ami moronk pavleat* tori polloiat! ami jive asat, amkam khast dilʼlea sarke asat punn ami moronk nant, 10 ami dukh kortoleam bhaxen asat punn ami sodanch khuxal ravtat, ami goribam sarke asat tori astana ami zaiteank girest kortat, ami kainch naslolea bhaxen asat tori astana amchea lagim soglem asa.

11 Korintkaramno, ami tumchea lagim ukteponnim uloileat. Ami tumchea pasot amchea kallzanchim daram anik uktim keleant. 12 Ami purnn toren amchim kallzam ugddun tumcho mog kelo, punn tumi amcho toso mog korunk na. 13 Taka lagon tumi mhojim bhurgim zalʼlea porim hanv tumkam sangtam ki tumi tumchea kallzanchim daram purnn toren uktim korat.

14 Onbhavartheam lagim sangat zoddum nakat.* Karonn nitivontponnacho khotteponna lagim kitem sombond asa? Vo uzvaddacho kallkha lagim kitem sombond asa? 15 Krist ani Soitana* modem kitem-i ek-sarkem asa? Vo eka bhavarthea* ani onbhavarthea modem kitem-i ek-sarkem asa? 16 Ani Devachea mondirant murteank kitem-i kam asa? Karonn ami, jivea Devachem mondir, zoxem Devan mhunnttlam: “Hanv tanchea sangata astolom ani tanchea modem choltolom, ani Hanv tancho Dev zatolom, ani te mhoje lok zatole.” 17 “Jehova* mhunntta, ‘Hea pasot, tanchea modlim bhair sorat, ani tanchea thaun tumkam kuxin kaddat, ani oxudʼdh vostunk hat lavop bond korat, tednam hanv tumkam mhojea lagim ghetolom.’” 18 “Sorvxoktivont Dev Jehova* oxem mhunntta, ‘Hanv tumcho Bapui zatolom, ani tumi mhoje put ani dhuvo zatoleo.’”

7 Tor mogall ixttamno, amkam heo bhasaunneo kelʼleo asat dekhun ami amchea kuddintlem ani monantlem mhellemponn pois korun amkanch xudʼdh korum-ia, ani Devachi bhirant dhorun purnn toren povitr zaum-ia.

2 Amkam tumchea kallzant zago diat. Ami konnankuch vaitt korunk na, konnanchench luksonn korunk na, ani konnanchoch faido-i gheunk na. 3 Hanv hem tumkam guneanvkari korunk sangona. Karonn hanvem tumkam poilinch sanglam ki ami jivim urom vo morom, tumi amchea kallzant asat. 4 Hanv tumchea lagim koslich addkholl nastana ukteponnim ulounk xoktam. Mhaka tumcher khub gorv asa. Mhaka purnn toren bhuzvonn mellʼllea. Koxtt-dukhant pasun mhojem kalliz khuxalkaien bhoron votʼta.

5 Khorem mhunnttlear, ami Masedoniant pavle tednam amkam matui suseg mellonk na, punn ami sogle toreche tras soxit ravle. Bhair zhogddim zatalim ani bhitor bhirant asli. 6 Punn Dev, zo niraxi zaloleank bhuzvonn dita, tannem Titachea bhette udexim* amkam bhuzvonn dili. 7 Ani fokot to mellonk ailo mhunn nhoi, punn taka tumchea koddlean kitli bhuzvonn mellʼllea, hem aikonui amkam bhuzvonn mellʼlli. Mhaka mellonk tumi kitlim axeun asat, tumi kitlem dukh kortat, ani mhojea pasot tumkam kitli kallji asa,* hem soglem tannem ieun amkam sanglem tednam hanv anikui chodd khuxal zalom.

8 Hanvem tumkam mhoje chitti udexim dukh dilam zalear pasun mhaka tachi khont bhogona (hoi survatek mhaka khont bhogli, karonn thoddea vellak lagon tori ti chitt vachun tumi dukhi zalim.) 9 Punn atam hanv khuxal asam, karonn tumi fokot dukhich zaunk nant, punn tumi itlim dukhi zalim ki tumi poschatap* kelo. Tumi Devak manvota tea toren dukhi zalim, ani amkam lagon tumkam kainch luksonn zaunk na. 10 Karonn Devak manvota toslem dukh poschatap korunk pavoita ani taronnachea vatter vhorta, jea udexim magir matui khont bhogona. Punn sonvsarantle lok jea toren dukhi zatat tem dukh moronn haddtta. 11 Polloiat! Devak manvota toslem dukh bhoglem mhunn tumchea bhitor kitli utsuktai vaddli, hoi, tumchea voilo dag pusun kaddunk tumi kitli umed dakhoili, tumchea chukik lagon tumkam kitlo rag ailo, tumchea bhitor bhirant vaddli, hoi, tumchea bhitor kitli itsa ani urba vaddli, ani tumi tumcheo chuki sudharleo! Hea vixim tumi xudʼdh* asat mhunn tumi soglea vattamnim dakhoun dilem. 12 Hanvem tumkam boroilʼli ti chitt, konnem-i vaitt kam kelam vo konnankui onʼneai zala taka lagon borounk nasli. Tachea bodlek, ami sanglolem aikonk tumkam kitli utsukta asa tem Deva mukhar dakhoun diunk boroilʼli. 13 Hea udexim amkam bhuzvonn mellʼlli.

Punn bhuzvonne sangata Titak mellʼllolea khuxalkaiek lagon ami anikui khuxal zale, karonn tumi sogleamnim taka urba dili. 14 Hanvem gorvan tumchea vixim Titak jem sanglolem, taka lagon mhaka loz zaunk na. Ami tumkam sanglolem tem khorem aslem, toxench ami gorvan Titak jem sanglolem tem-ui khorem mhunn kollon ailem. 15 Itlench nhoi, tumi sogleamnim koxe toren tachi adnea pallʼlli ani bhirantin taka ieukar dilo, tem to ugddas korta tednam tumchea pasot tacho mog anikui vaddtta. 16 Hanv soglea vatten tumcher purnn visvas dovrunk xoktam* mhunn hanv khuxal zatam.

8 Bhav-bhoinnimno, Masedoniantlea sobhamnim Devachi favo nasloli doia mellʼllolean kitem kelem tea vixim tumkam khobor asloli amkam zai. 2 Tim kotthin poristhitik lagon tras sostalim, ani gorib asonui tannim khuxalkaien dennim diun tim kitlim udar kallzachim tem dakhoun dilem. 3 Tannim tanchea koddem diunk zata titlem-i dilem. Khorem mhunnttlear, tachea poros chodd dilem, ani hanv svota hacho govai zaun asa. 4 Tim apunn zaun fuddem sorlim, ani Devachea lokank* modot korunk ani dennim diunk tankam pasun sondhi mellchi mhunn tim amchea lagim vinoti korit ravlim. 5 Tannim ami chintlolem tachea poros chodd kelem, karonn tannim Devachea khuxe pormonnem, poilim Somiachi ani uprant amchi purnn kallzan seva keli. 6 Taka lagon, tumi mogan dilʼlim dennim ektthaim korchem jem kam tannem suru kelʼlem tem sompounchem mhunn ami Titak urba dili. 7 Zoxim tumi bhavarthant, uloupant, gineanan, urba dakhounk ani ami tumkam mog dakhoila tosoch mog dakhounk girest asat, toxinch dennim diunkui udar kallzachim zaiat.

8 Hem sangon hanv tumkam adnea dina, punn dusrim kitle khuxalkaien dennim ditat, hacher hanv tumchem dhean voddunk sodhtam, ani tumcho mog kitlo khoro asa tem hanv pollounk sodhtam. 9 Karonn tumi amchea Somi Jezu Kristachea favo naslolea doie vixim zannant. Tumi tache goribkaiek lagon girest zaunchim mhunn, to girest asonui tumchea pasot gorib zalo.

10 Hea vixim mhaka kitem dista tem hanv tumkam sangtam: Hem kam korop tumcheach faideachem asa, karonn tumi hem kam suru kelear ek voros zalem ani tumi tem korunk khub itsa-i dakhoilʼli. 11 Tor atam, tumi tem kam jitlea urben suru kelʼlem titleach urben sompoiat. Tumchea lagim jem kitem asa tea pormonnem diun tem kam sompoiat. 12 Karonn eka munxak kitem-i diunchi itsa asa zalear tachea lagim diunk jem kitem asa tem Dev manun gheta. Tachea lagim na tem tannem diunchem mhunn Dev opekxa korina. 13 Dusreank sompem zaunchem ani tumkam kotthin zaunchem mhunn hanv hem sangona. 14 Punn, hea vellar tumchea lagim chodd asa tea udexim tanchi goroz purnn zaloli, ani tanche koddem chodd asta tednam tumchi goroz purnn zaloli mhaka zai. Oxe toren sogleam lagim ek-sarkench astolem. 15 Boroilʼlem asa toxem: “Zachea lagim chodd aslem tachea lagim samkem chodd zaunk na, ani zachea lagim unnem aslem taka samkench unnem poddonk na.”

16 Atam ami kortat toxich tumchi kallji korunk Devan Titachea kallzant ghatlam mhunn ami Devache upkar attoitat. 17 Karonn to fokot ami sanglam mhunn tumchea lagim ieunk toiar zaunk na, punn khub utsuktaien ani aplea khuxen to tumchea lagim ieta. 18 Ami tachea sangata tea bhavakui dhaddttat zannem bori khobor porgott korunk jem kam kelam, tea pasot sogleo sobha tachi vakhannʼnni kortat. 19 Titlench nhoi, tumi khuxalkaien dilolem dennem gheun vochonk tea bhavak sobhamnim amchea sangata provas korunk nemla. Hem dennem ami Somiachea mhoimek lagon vanttʼttole. Ani hea udexim ami dusreank modot korunk toiar astat mhunn dison ietolem. 20 Tor khoincheach munxan amchi chuk kaddina zaunk, udar kallzan dilʼlem hem dennem pavounk ji zobabdari dilea ti pallttana ami khub kallji ghetat. 21 Karonn ami ‘fokot Jehovachea* nodren nhoi punn munxanchea nodren pasun dor ek kam promannikponnan korunk vavurtat.’

22 Tea bhair, ami tanchea borabor amchea anik eka bhavak dhaddttat zachi ami khub pavtti porikxa kelea ani to zaitea vostumnim mhenot korpi mhunn amkam kollon ailam. Taka-i tumcher khub visvas asa ani tea pasot to anik chodd mhenot kortolo. 23 Tita vixim tumkam prosn asa zalear hanv tumkam sangonk sodhtam ki to mhozo vangddi* ani mhojea sangata kam korpi, zo tumchea borea pasot vavurta. Ani dusrea bhavam vixim tumkam koslo-i prosn asa zalear ugddas dovrat ki te sobhentlean dhaddlole apostl zaun asat, ani Kristachi mhoima kortat. 24 Tea pasot, tankam tumchea mogacho puravo diat, ani amkam tumcho kiteak gorv bhogta tem sobhe mukhar dakhoun diat.

9 Devachea lokanchi* seva korchea vixim hanvem tumkam borovop gorjechem oxem mhaka disona. 2 Karonn tumi modot korunk toiar asat mhunn mhaka khobor asa. Ani Akaiachim bhav-bhoinnam gelʼlea eka vorsa thaun modot korunk sodhtat mhunn hanv Masedoniachea bhav-bhoinnank gorvan sangot asam. Ani tumchi urba polloun tanchea modlim zaitim zannam umedin bhorleant. 3 Hea babtint tumchea vixim hanvem jem gorvan sanglolem tem fott zaina zaunk, punn tumi toiar astolim mhunn hanvem sanglolem toxench tumi toiar aslolim mellchim mhunn hanv bhavank tumchea lagim poilinch dhaddttam. 4 Na zalear, Masedoniantle bhav mhojea sangata thoim aile, ani tumi toiar na tem tannim polloilem zalear, ami tumcher zo visvas dakhoila tea pasot amchea borabor tumkam-i loz zatoli. 5 Taka lagon, bhavank khub poilinch tumche koddem ieunk urba divop mhaka sarkem dislem. Hea udexim tumi utor dilʼlea pormonnem te bhav tumi udar kallzan dilʼlem dennem toiar dovrunk xoktole. Oxe toren, tem dennem tumchea koddlean zobordosten ghetlolem koxem zaunchem na, punn udar kallzan dilʼlem dennem zatolem.

6 Hea babtint zo konn chamtteponnan vompta to thoddem lunvtolo, punn zo konn chodd vompta to chodd lunvtolo. 7 Dor eklean aplea kallzant tharailam tea pormonnem diunchem, kir-kir korun vo diunchench poddtta mhunn nhoi. Karonn khuxen dita tacho Dev mog korta.

8 Tumchea lagim sogleo vostu bhorpur ascheo, ani borem kam korunk goroz tem soglem khub aschem mhunn Dev tumcher zaiti favo nasloli doia votounk xokta. 9 (Zoxem boroilʼlem asa: “Tannem khub* vanttlem, ani goribank dilem. Tachem nitivontponn sodankal urtolem.” 10 Vompʼpeak bhorpur pik dita ani khavpeak unddo dita toch Dev tumkam vompunk bhorpur bim ditolo ani tumchem nitivontponnachem pik khub vaddoitolo.) 11 Soglea vatten Devan tumkam axirvad diun girest keleant, jea vorvim tumi-i soglea vatten udarponn dakhounk xoktat, ani amchea hea kamank lagon Devache upkar attounk xoktat. 12 Karonn hi lokanchi seva, fokot Devachea lokancheo* gorzo bore toren purnn korunk kortat oxem nhoi, punn Devache anik chodd upkar attounche mhunn pasun kortat. 13 Tumi modot korpachi ji seva kortat taka lagon lok Devachi mhoima kortat. Karonn tumi Krista vixim ji bori khobor porgott kortat tea pormonnem vagtat, ani tumi tankam ani soglea lokank udar kallzan dennim ditat. 14 Tim tumchea pasot kallzant thaun vinovnneo kortat, ani tumcho mog kortat karonn tumkam Deva thaun bhorpur favo nasloli doia mellʼllea.

15 Ami utramnim sangonk pasun zaina tea funkott dennea pasot Devache upkar.

10 Atam hanv Paulu, Kristache movallaien ani doiallaien tumchea lagim vinoti kortam. Hanv tumchea modem astana oskot distam zait, ani tumchea modem na tednam hanv tumchea sangata koddok ritin vagtam oxem disot. 2 Ami sonvsarik toren choltat mhunn somzotat tea lokam sangata ghoddie mhaka koddok ritin vagchem poddttolem, toxem tumchea modem astana mhaka tumchea sangata vagonk poddchem nhoi mhunn hanv axa dhortam. 3 Ami hea sonvsarant ravtat hem khorem, punn ami sonvsari toren zhuzonant. 4 Karonn amchim zhuzachim hotʼtearam sonvsarik nhoi, punn Devan dilʼlim bollixtt hotʼtearam zaun asat, jea vorvim ami kholaien rigloleo vostu mulla thaun umttun kaddun uddounk xoktat. 5 Karonn ami teo chukicheo somzonneo ani Devachi vollokh gheunk lokank ietat teo addkholleo portitat, ani dor eka chintnacher zoit vhoron taka koidi kortat. Hea udexim ami taka Kristachi adnea pallunk laitat. 6 Ami adnea maninant tea dor ekleak khast diunk toiar asat, punn tachea poilim, tumi purnn toren adnea mantat mhunn dakhoun diat.

7 Tumi bhailem rup polloun neai kortat. Punn konnankui apunn Kristacho mhunn purnn visvas asa zalear tannem hea sotacher porot dhean diunchem: Zoso to Kristacho, toxe ami pasun Kristache zaun asat. 8 Karonn Somian tumkam khala uddounk nhoi punn ghottai diunk amkam ho odhikar dila. Hea odhikara vixim hanv chodduch gorv kortam zalear pasun mhaka loz bhogunk poddchina. 9 Mhojea chittim udexim hanv tumkam bhieunk sodhtam oxem tumkam dislolem mhaka naka. 10 Karonn thodde mhunnttat: “Tachea chittimnim vozon ani boll asta, punn to amchea modem asta tednam oskot dista ani to ulounk lagta tednam tachem aikom koxem disona.” 11 Zo konn oxem mhunntta tannem hem zannam zaunchem ki ami jem amchea chittimnim sangtat,* tem tumchea modem astana pasun ami korun dakhoitole.* 12 Karonn ami amkam tea lokam modle koxe lekhinant vo tanchea sangata amchi sor korinant, je aplich boddai kortat. Punn, te aplench map gheun apleakuch meztat ani apli sor apleach koddem kortat tednam, te apleak somzonni na mhunn dakhoun ditat.

13 Punn ami amchea pasot nemlolea xime bhair vochon boddai marchenant. Devan zo vattar amkam mapun dila, zantunt tumi-i asat, tachea xime bhitor ravon ami boddai kortole. 14 Ami tumchea lagim aile tednam khorem mhunnttlear ami amkam nemun dilʼlea vattara bhair vochonk nant, karonn Kristachi bori khobor aminch tumchea lagim poili gheun ailʼle. 15 Amkam nemun dilʼlea xime bhair vochon dusrea konnanchea-i mhenoti vixim ami boddai marinant. Tachea bodlek, tumcho bhavarth vaddot voitolo toso, tea vattaramnim amkam jem kam dilam tea kamachi vaddavoll zait voitoli oxi ami axa dhortat. Tea uprant amchem kam anikui vaddot voitolem. 16 Tumcho des kaddun fuddem aslolea desamnim pasun ami bori khobor porgott korchi, ani dusrea khoinchea-i vattarant poilinch kelʼlea kama vixim ami boddai marchi nhoi mhunn ami oxem kortat. 17 “Punn zo boddai marta, tannem Jehova* vixim boddai marchi.” 18 Karonn zo apunn apli boddai korta to nhoi, punn zaka Jehova* boro mhunntta takach tachi maniotai melltta.

11 Tumi mhojem thoddem tori pixeponn somzon gheunchem oxi mhoji itsa asa. Khorem mhunnttlear, tumi mhojem pixeponn sosun ghetat! 2 Devak tumchi kallji asa,* toxich mhaka-i tumchi kallji asa.* Karonn tumkam ek povitr* ankvari koxi eka munxak, mhunnche Kristak diunk, hanvem tachea lagim tumkam kazar kortolo mhunn taka utor dilam. 3 Punn jea toren sorpan naddbudʼdhen Evek bhuloili, teach toren tumchim monam piddʼddear zaun Krista pasot aslolem tumchem sadeponn ani povitrtai* tumi hogddait mhunn mhaka bhirant dista. 4 Karonn konnui ieun ami porgott kela tea Jezuchea bodlek dusrea Jezu vixim tumkam porgott korta, vo tumchea monak margdorxon dita tea xoktechea* bodlek veglli xokti tumkam margdorxon dita, vo tumi apnnailea tea bore khobrechea bodlek vegllech torechi bori khobor gheun konn tori tumchea lagim ieta tednam tumi ti sompeponnim manun ghetat. 5 Tumchea tea mahan apostlam poros khoincheach babtint hanv unno asa oxem mhaka tori disona. 6 Uloupant hanv huxar na zalear pasun, gineanan hanv toso na. Ani ami hem ginean soglea vostumnim ani soglea vattamnim tumkam dakhoun dilam.

7 Vo tumkam vhoddponn mellchem mhunn hanv khaltom zalom, ani tumchea koddlean kainch ghenastana tumkam Deva vixim bori khobor khuxalkaien porgott keli zalear hanvem patok kelem kai? 8 Tumchi seva korunk lagon hanvem dusrea sobham koddlean gorjecheo vostu* gheun tanchem luksonn kelem.* 9 Toripunn, hanv tumchea modem astana mhaka goroz poddli tednam hanvem mhojem vojem konnancheruch ghatlem na. Karonn Masedoniantlean ailolea bhavamnim udar kallzan mhojeo sogleo gorzo purnn keleo. Hoi, hanv tumcher koslech torechem vojem ghalchona mhunn hanvem proitn kelo ani hea fuddem hanv tosoch kortolom. 10 Kristachem sot mhojea bhitor asa hem jitlem khorem zaun asa, titlench Akaiachea vattarant hea vixim boddai marop hanv soddchom na, hem-ui khorem zaun asa. 11 Hanvem tumchea koddlean kiteak lagon kainch gheunk na? Hanv tumcho mog korina mhunn? Hanv tumcho kitlo mog kortam tem Devak khobor asa.

12 Punn hanv jem kortam tem korit ravtolom, oxe toren apunn apostl mhunn sangon boddai martat tankam, ani amchi borabori korunk sondhi sodhtat tankam hanv koslich sondhi diunchom na. 13 Karonn osle munis khotte apostl zaun asat, ani fosounchim kamam kortat. Te Kristache apostl mhunn dhong kortat. 14 Ani hem ojapachem nhoi, karonn Soitan pasun uzvaddachea dutachem rup gheta. 15 Tea pasot, tache sevok pasun nitivontponnache sevok mhunn dhong kortat zalear tantunt khas kaim na. Punn tancho xevott, tanchea kamam pormonnem zatolo.

16 Hanv porot sangtam: Hanv piso oxem konnench chintchem nhoi. Tumi mhaka piso somzotat zalear pasun mhaka piso somzonuch sosun gheiat. Oxem kelʼlean hanv anik thoddi boddai marunk xoktolom. 17 Hanv sangtam tem Somiachea udharonnachi dekh gheun sangona. Tachea bodlek, hanv pixea bhaxen ani apleach vixim gorv kortolea ani boddai martolea munxa bhaxen sangtam. 18 Zaite lok sonvsari* vostum vixim boddai martat, tor hanv-ui boddai martolom. 19 Karonn tumi itle “somjikaieche” asat ki tumi pixeanchem khuxalkaien sosun ghetat. 20 Itlench nhoi, tumi oslea dor eka munxak sosun ghetat zo tumkam aplo gulam korta, tumchi girestkai luttun vhorta, tumchea lagim asa tem kaddun gheta, tumchea mathear bostat ani tumchea tonddar thapott marta.

21 Mhaka hem sangonk loz dista, karonn thoddea lokank ami itle oskot distat ki ami amcho odhikar sarke ritin cholounk xokonant oxem te somzotat.

Punn dusreank boddai marunk loz disona zalear hanv-ui boddai marunk lozchom na, magir lokamnim mhaka piso mhunnttlear dekhun zata. 22 Te Hebrev kai? Hanv-ui ek Hebrev. Te Izraelitkar kai? Hanv-ui ek Izraelitkar. Te Abrahamachi sonsot kai? Hanv-ui Abrahamache sonstintlo.* 23 Te Kristache sevok kai? Hanv pixeam bhaxen bob marun sangtam, hanv tanchea poros vorto zaun asa: Hanvem tanchea poros chodd mhenot kelea, hanv porot-porot bondkhonnint gelam, kitlech pavtti hanvem mar khala, kitlech pavtti hanv mornnantlo vachlam. 24 Panch pavtti hanvem Judevam koddlean 39 chabkancho mar khala, 25 tin pavtti mhaka danddeamnim marlo, ek pavtt mhaka fatramnim marlo, tin pavtti hanv provas kortalom tem tarum futtlem ani ek rat ani ek dis hanv doriant urlom; 26 hanvem porot-porot provasachea dhokeancho, nhoim-chea dhokeancho, vhoddlea choranchea* dhokeancho, mhojeach lokam thaun ailolea dhokeancho, dusrea raxttrantlea lokam thaun ailolea dhokeancho, xarantlea dhokeancho, oronnʼnneantlea* dhokeancho, doriantlea dhokeancho, ani fottkirea bhavanchea modem ravlolean ailʼlea dhokeancho fuddo kela, 27 hanvem koxtti vavr ani khub mhenot korun, zaite pavtti akʼkhi rat zago ravon, bhukelʼlo ani tanelʼlo ravon, kitlech pavtti upaxim ravon, thonddent ani unnea kopddeamnim* ravon dis sarleat.

28 Hea soglea vostum bhair, dor disa soglea sobham pasot mhaka usko zata. 29 Konnui oskot zata zalear hanv oskot zaina kai? Konnui addkholltta zalear mhaka rag iena kai?

30 Hanvem boddai marunkuch zai zalear, hanv tea vostum vixim boddai martolom jeo mhojeo oskotkaieo dakhoun ditat. 31 Somi Jezucho Dev ani Bap, zachi sodanch vakhann’nni zait ravtoli, to, hanv fott uloina mhunn zannam. 32 Damaskant Aretas razachea khala zo razpal aslo tannem mhaka dhorunk Damask xarant rakhonndar dovorlole. 33 Punn mhaka eka vhoddlea panttleant bosoun xarachea vonttichea zonelantlean sokol denvoilo ani hanv tachea hatantlo salvar zalom.

12 Boddai marun kainch faido na. Tori astana, mhaka oxem korunk poddttolem. Punn atam hanv Somian dakhoilʼlea ojapachea dorxonam vixim ani tachea thaun mellʼllolea sondexa vixim sangonk sodhtam. 2 Hanv Kristachea ekvottant aslolea eka munxa vixim zannam, zaka 14 vorsam poilim tisrea sorgar ubarun vhelo. Taka kuddi soit ubarun vhelo vo kuddi bogor, tem mhaka khoborna, punn Devak khobor asa. 3 Hoi, hanv tea munxak vollkhotam. Taka kuddi soit ubarun vhelo vo kuddi bogor, tem mhaka khoborna, punn Devak khobor asa. 4 Taka ubarun sobit bhagent* vhelo ani tannem osleo vostu aikoleo zachea vixim ulounk zaina ani jeo sangonk eka munxak porvangi na. 5 Oslea munxa vixim hanv boddai martolom, punn hanv mhojea vixim boddai marchom na, fokot mhojea oskotkaiam vixim boddai martolom. 6 Mhaka kednam-i boddai marunk disli zalear pasun, hanv piso koso zaunchom na, karonn hanv sot tench sangtolom. Konnui hanv kortam tem polloita ani hanv sangtam tem aikota, tachea bhair mhaka choddui valor dina zaunk hanv boddai marina. 7 Mhaka khas gutt kolloileat dekhun konnem-i mhaka chodduch mhotv diunchem nhoi.

Hanv gorvan fulona zaunk mhojea kuddint ek kantto toplolo asa, zo Soitanachea eka duta sarko asa. Hanvem mhakach favo tachea poros chodd mhotvacho mhunn somzocho nhoi dekhun to mhojer thapttam marit ravta.* 8 Ho kantto kaddun uddoi mhunn, hanvem Somia lagim tin pavtti kallzantlean vinoti keli. 9 Punn Somian mhaka mhunnttlem: “Mhoji favo nasloli doia tuka puro. Karonn tum oskot asta tednam mhoji xokti purnn toren dison ieta.” Tor Kristachi xokti tombu sarki mhojer urom mhunn, hanv khub khuxal zaun mhojea oskotkaiam vixim boddai martolom. 10 Krista khatir hanv oskot astam tea vellar, mhozo opman zata tea vellar, hanv gorjek sampoddtta tea vellar, mhojer dhumallo ani kotthin poristhiti ieta tea vellar hanv khuxal zatam. Karonn hanv oskot astam tednanch hanv xoktivont zatam.

11 Hanv piso zalom. Tumich mhaka oso zaum-so kelo, tumi mhojea vatten ulounk zai aslem. Karonn hanv tumchea nodren kainch nhoi zalear pasun tumi bore mhunn somzotat tea apostlam poros hanv khoincheach toren unnom na. 12 Khorem mhunnttlear, hanv apostl mhunn tumi tumchea dolleamnim purave polloilʼle, je hanvem tumkam thir ravon, khunna, vizmitam, ani ojapachim kamam korun dakhoilʼle. 13 Hanvem tumcher koslech torechem vojem ghalunk na, fokot heach babtint tumi dusrea sobham poros veglle asat. Hanvem kitem-i chuk kelea? Kelea zalear mhaka bhogsat.

14 Polloiat! Hanv tisre pavtt tumchea lagim ieunk toiar asam, tori astana, hanv tumcher vojem zaunchom na. Karonn mhaka tumchi girestkai nhoi, punn tumi zai. Bhurgeamnim avoi-bapai pasot nhoi, punn avoi-bapain bhurgeam pasot poixe ektthaim korun dovorche mhunn opekxa kortat. 15 Mhoje lagim asa tem soglem, toxench mhojem jivit pasun hanv khuxalkaien tumchea pasot khorch kortolom. Hanv tumcho itlo mog kortam zalear mhaka tumchea koddlean unno mog mellonk zai kai? 16 Hanvem tumcher koslench vojem ghalunk na. Tori astana, hanv “naddpi” ani hanvem tumkam “naddbudʼdhen” fosoileant oxem tumi mhunnttat. 17 Toxench, hanvem tumchea lagim dhaddlolea eklea udexim pasun hanvem tumcho faido gheunk na. Ghetla kai? 18 Hanvem Tita lagim vinoti korun tachea sangata eka bhavak dhaddlo. Titan khoincheach vatten tumcho faido gheunk na. Ghetla kai? Ami ekach monan cholonk nant kai? Ami ekech toren vagonk nant kai?

19 Ami kortat tem sarkem mhunn dakhounk ami proitn kortat oxem tumi azunui chintʼtat kai? Ami tumchea mukhar nhoi, punn Kristachea ekvottant Deva mukhar sarke mhunn dakhoitat. Punn mhojea mogacheamno, ami hem soglem tumkam urba diunk kortat. 20 Karonn hanv ietam tednam, tumi jea toren vagtat tem mhaka borem dista tachea poros vegllem astolem, ani hanv jea toren vagtam tem tumkam borem dista tachea poros vegllem astolem mhunn mhaka bhirant dista. Zhogddim, dusreancher zollop, rag, vad-vivad, fattlean ulovop, chaddio korop, gorvan bhorop ani gondholl, hem ghoddie tumchea modem asot. 21 Hanv tumchea lagim porot ietam tednam mhojea Deva mukhar mhaka loz zaina zalear puro, ani jea lokamnim poilim patok kelam ani je oxudʼdh asat, onoitik kuddicho sombond* dovortat ani loz naslolim patki kamam* kortat, punn poschatap korinant tanchea pasot mhaka dukh korunk poddona zalear puro.

13 Hanv tisre pavtti tumchea lagim ietam. “Don vo tin sakxeanchea govaikechea adaran* dor ek vixoi suttavo zaunk zai.” 2 Atam hanv tumchea thaun pois asam zalear pasun, hanv tumchea modem dusre pavtti asam oxem somzat. Jea lokamnim poilim patok kelʼlem tankam ani urlolea lokank hanv atam thaunuch xittkaitam ki hanv porot tumchea lagim ailom zalear hanv tankam khast dilea xivai ravchom na. 3 Karonn Krist zo tumchea pasot oskot na punn xoktivont asa, to khorench mhojea udexim uloita mhunn tumi puravo magtat. 4 Taka oskot poristhitint astana khambear khillaun marlo, tori astana to Devachea xokten jivont asa. Hem khorem, ki tachea sarke ami pasun oskot poristhitint asat, punn tumchea bhitor kam korta tea Devachea xokte udexim ami tachea borabor jivim astolim.

5 Tumi bhavarthant asat kai na, hem topaxit ravat. Tumi koslea torechim munxam zaun asat tacho puravo di-it ravat. Krist tumchea sangata ekvottant asa hem tumkam khoborna? Hem tumkam khoborna zalear tacho orth tumkam nakarleant oso zalo. 6 Punn amkam nakarunk na hem tumkam kollon ietolem mhunn hanv bhorvonso dovortam.

7 Tumi kainch chuk korchi nhoi mhunn ami Deva lagim magnnem kortat. Lokamnim amkam apnnaunchem mhunn, hanv oxem mhunnona. Amkam nakarle zalear pasun tumi borem kam korit ravchem mhunn, ami oxem magnnem kortat. 8 Karonn ami sota add kainch korunk xokonant, punn fokot sota pasotuch korunk xoktat. 9 Ami oskot astat ani tumi xoktivont astat tednam ami khuxal zatat. Ani tumi sudharnni korit ravchi mhunn ami magnnem kortat. 10 Taka lagon, hanv tumchea thaun pois astananch heo vostu tumkam boroitam. Hea udexim hanv tumchea lagim ailea uprant, Somian mhaka dila to odhikar mhaka khoraien uzar korunk poddchona. Karonn tannem mhaka ho odhikar tumkam sokol uddounk nhoi punn tumkam urba diunk dila.

11 Atam bhav-bhoinnimno, xevottak hanv tumkam itlench sangtam ki tumi sodanch khuxal ravchem, sudharnni korit ravchem, bhuzvonn gheit ravchem, ek-sarkem chintop dovorchem, ani xantin ravchem. Tednam mog ani xanticho Dev tumchea sangata astolo. 12 Eka-mekak povitr umo diun nomoskar korat. 13 Sogle Devache lok* tumkam aplo mog dhaddttat.

14 Somi Jezu Kristachi favo nasloli doia ani Devacho mog ani tumkam faideak poddtta ti povitr xokti tumchea sogleam sangata asum.

Vo “povitr lokank.”

Vo “porikxamnim.”

Vo “dhir.”

Vo “porikxencho.”

Vo “porikxancho.”

Vo ghoddie, “Tumi poilim thaun zannant.”

Utran utor, “xevott poriant.”

Vo ghoddie, “tumkam don pavtti faido zauncho.”

Taka Silas pasun mhunnttale.

Vo “ttokon dila.”

Vo “amkam fosounk pavchona.”

Vo “manddnneo.”

Vo “dhean voddun gheta.”

Vo “pormoll.”

Vo “dhondo korpi.”

Mahiti A5 polloi.

Mahiti A5 polloi.

Mahiti A5 polloi.

Mahiti A5 polloi.

Mahiti A5 polloi.

Vo ghoddie, “Jehovachi povitr xokti.”

Vo “kallachea.” Xobdhkox polloi.

Vo “moddkeamnim.”

Vo ghoddie, “punn ami nirax uronant.”

Vo “Amchi kudd.”

Vo “teo porikxa.”

Utran utor, voznacho.”

Vo “ttokon.”

Vo “amchea modlo dor eklo koslo munis tem dison ietolem.”

Vo “Ami Deva mukhar nitivont zaunk.” Xobdhkoxant “Nitivontponn” polloi.

Ghoddie marunk.

Ghoddie apli rakhonn korunk.

Vo “ami moronk favo asat oxem somzotat.”

Mhunnche, jea zum-ak don vegllea torechim zonvaram bandleant toslea zum-a khala ieum nakat.”

Utran utor, “Belial.” Hem utor eka Hebrev utrantlean ieta, zacho orth “kainch kamacho na.”

Vo “visvas dovrunk zata toslo munis.”

Mahiti A5 polloi.

Mahiti A5 polloi.

Utran utor, “Tit hajir aslo tea udexim.”

Utran utor, “tumchea bhitor urba asa.”

Hacho orth, eklean aplem chintop sarkem korop.

Vo “nirmoll; khot naslolim.”

Vo ghoddie, “Tumkam lagon mhaka khub dhir melltta.”

Vo “povitr lokank.”

Mahiti A5 polloi.

Utran utor, “bhagidar.”

Vo “Povitr lokanchi.”

Vo “udarponnan.”

Vo “povitr lokancheo.”

Utran utor, “utramnim sangtat.”

Utran utor, “korneamnim pasun dakhoitole.”

Mahiti A5 polloi.

Mahiti A5 polloi.

Utran utor, “Devak tumchea pasot urba asa.”

Utran utor, “tosoch hanv-ui tumchea pasot zollttam.”

Vo “nirmoll.”

Vo “nirmollponn.”

Vo “Devache xoktechea.”

Vo “modot.”

Utran utor, “tankam luttle.”

Mhunnche, munxanchea.

Utran utor, “bientlo.”

Vo “luttun vhortat tanchea.”

Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.

Utran utor, “vingllo.”

Vo “Paradise-ant.” Xobdhkox polloi.

Vo “to mhaka marit ravta.”

Grik bhaxent por·nei′a. Xobdhkox polloi.

Xobdhkox polloi.

Utran utor, “tondda mukhar.”

Vo “povitr lok.”

    Konkani Prokaxonam (1972-2025)
    Log Out
    Log In
    • Konkani (Romi)
    • Dhadd
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Dhadd