GALASIEKARANK CHITT

1 Hanv Paulu hi chitt boroitam, khoincheach munxa thaun vo khoincheach munxa udexim mhaka apostl mhunn nemunk na. Tachea bodlek, Jezu Krista udexim ani taka jivont kelo tea Deva, amchea Bapa udexim hanv apostl zalom. 2 Hanv ani mhojea sangata aslole sogle bhav Galasiechea sobhank hi chitt boroitat:

3 Dev zo amcho Bap zaun asa, tachea thaun ani Somi Jezu Krista thaun tumkam favo nasloli doia ani xanti mellom. 4 Hea noxttea sonvsara* thaun amkam suttka diunk, amcho Dev, zo amcho Bap zaun asa tachea khuxe pormonnem Kristan amchea patkank lagon apnnakuch dilo. 5 Sodam-sodankal Devachi mhoima zait ravom. Amen.

6 Kristachi favo nasloli doia dakhoun jea Devan tumkam apoilʼle, taka tumi itlea begin fatt korun dusreach torechea bore khobre koddem voitat mhunn hanv ojap zatam. 7 Khorem mhunnttlear, anik dusri bori khobor nanch; punn thodde lok tumkam trasant uddounk sodhtat ani Krista vixim asloli bori khobor bodlunk sodhtat. 8 Punn, ami tumkam sanglea tea bore khobre bhair dusri kosli-i bori khobor, ami vo sorga voilo ek devdut pasun sangta zalear tacher xirap poddom. 9 Ami atanch sanglolem toxem hanv portun sangtam, konnui tumkam tumi manun ghetlole bore khobre bhair anik kitem-i sangta zalear tacher xirap poddom.

10 Atam hanv munxancho vo Devacho favor melloun gheunk proitn kortam kai? Vo hanv munxank khuxal korcho proitn kortam kai? Hanv atam pasun munxank khuxal korit asam zalear hanv Kristacho sevok nhoi. 11 Bhav-bhoinnimno, hanvem tumkam sanglea ti bori khobor munxam thaun nhoi mhunn tumi zannam zalolim mhaka zai. 12 Karonn mhaka ti khoincheach munxa thaun mellonk na, vo khoincheach munxan mhaka ti xikounk na, punn Jezu Kristan ti mhaka ugddapi kelea.

13 Judev dhormant aslom tednam hanv koso vagtalom tem tumi aikolanch astolem. Devachea sobhank hanv khub dhumallo di-it ravlom ani tanchem khub luksonn korit ravlom. 14 Ani Judev dhormant mhojea raxttrantlea ani mhojea piraiechea zaitea lokam poros hanv khub vaddavoll kortalom, karonn mhaka mhojea purvozancheo riti-rivazo pallunk khubuch urba asli. 15 Punn mhaka hea sonvsarant zolmak haddlo ani mhaka favo nasloli doia dakhoun apoilo, tea Devak hem borem dislem, 16 ki hanvem videxi raxttrantlea lokank bori khobor sangchi, jea udexim te tachea Putak vollkhonk pavtole. Tednam hanvem rokddench vochon khoincheach munxa koddem solʼlo gheunk na. 17 Toxench, hanv Jeruzalemant mhojea poilim apostl asle tanchea koddem vochonk na. Punn hanv Arabia desant gelom ani magir porot Damaskant ailom.

18 Magir tin vorsam uprant hanv Kefasak* mellonk Jeruzalemant gelom, ani 15 dis tachea sangata ravlom. 19 Thoim hanv Somiacho bhav Jakobak pasun mellʼllom. Tanchea xivai hanv dusrea khoincheach apostlank mellonk na. 20 Atam hanv tumkam boroitam teo vostu fott nhoi mhunn hanv tumkam Deva mukhar khatri ditam.

21 Tea uprant, hanv Siria ani Silisiachea vattaramnim gelom. 22 Punn Kristachea ekvottant asloleo Judeiacheo sobha mhaka vollkhonasleo. 23 Teo sobha mhojea vixim fokot itlench aikotaleo: “Zo munis poilim amkam dhumallo ditalo, to atam, tannem jea bhavarthachem poilim luksonn kelʼlem teach bhavarthachi bori khobor porgott korta.” 24 Tor, tim mhaka lagon Devachi mhoima korunk laglim.

2 Magir 14 vorsam uprant hanv Barnabasa sangata porot ek pavtt Jeruzalemant gelom. Hanvem Titakui mhojea sangata vhelo. 2 Hanvem thoim voichem mhunn Somian mhaka ugddapem kelʼlem dekhun hanv thoim gelom. Videxi raxttrank hanv kosli bori khobor sangtam tem hanvem tankam sanglem. Tem hanvem fokot sobhent fuddakar ghetale teach bhavank sanglem, karonn, hanvem atam poriant ji seva kelea ani kortam ti nirfoll zalʼli mhaka naka asli. 3 Tit, zo mhojea sangata aslo, to Grik aslo. Tori astana, sunot korunk konnench tacher dobhav ghalunk naslo. 4 Punn sobhent konnank kollonastana je khotte bhav ghuslole tankam lagon, ho prosn voir sorlo. Krist Jezuche xis zalʼlean amkam ji svotontrtai mellʼlloli ti kaddun amkam aple gulam korunk, te lipon amchi choukoxi kortale. 5 Punn bore khobrechem sot tumchea modem ghott urchem mhunn, ami tanchem aikon, tanchea adhin zaunk na, thoddeach vellak poriant zaunk na.

6 Punn jea bhavank dusrim khas mhunn somzotalim, hoi, zankam heram poros vhodd mhunn somzotalim, tea bhavamnim mhaka oxem kainch sangonk na, jem mhaka novem koxem aslem. Dusrim tankam kitem-i somzom, mhaka kainch forok poddona, karonn munxam bhaxen Dev eka munxachem bhailem rup polloun taka lekhina. 7 Tachea bodlek, zoxem Judev lokank* bori khobor sangonk Pedruk nemla, toxem, videxi raxttrantlea lokank* bori khobor sangonk mhaka nemla mhunn tea bhavamnim polloilem. 8 Karonn zannem Pedruk Judevam pasot apostl mhunn zobabdari pallunk xokti dilea, tannench mhaka videxi raxttrantlea lokam pasot apostl mhunn zobabdari pallunk xokti dilea. 9 Mhaka favo nasloli doia dakhoili hem-ui tannim somzon ghetlem. Tednam, Jakob, Kefas* ani Juanv, zankam sobheche khambe koxe somzotale, tannim mhaka ani Barnabasak aplo uzvo hat diun, ami sogle bhagidar mhunn dakhoun dilem. Ami videxi raxttrantlea lokam lagim voitole ani te Judevam lagim voitole mhunn ami manun ghetlem. 10 Ami gorib bhav-bhoinnank monant dovorchem mhunn pasun tannim amkam sanglem, ani oxem korunk hanvem kallzant thaun khub proitn kelo.

11 Punn, Kefas* Antiokak ailo tednam hanvem sogleam mukhar tachea tonddar tachi chuk sangli, karonn tannem chuk kelea mhunn sarkem dison ietalem. 12 Jakoban dhaddlole thodde lok ieunchea poilim, Kefas* videxi raxttrantlea lokam sangata khata-pietalo. Punn te bhav aile tednam sunot zalʼlea lokank bhieun to videxi raxttrantlea lokam thaun kuxin sorlo, ani tanchea thaun pois-pois ravonk laglo. 13 Tachi dekh gheun urlole Judev pasun oxench dhong korunk lagle. Itlench nhoi, Barnabas pasun tanchea bhaxen dhong korunk laglo. 14 Punn te bore khobrechea sota pormonnem cholonant mhunn hanvem polloilem tednam sogleam mukhar Kefasak* hanvem oxem mhunnttlem: “Tum ek Judev zaun, Judevam sarko nhoi punn videxi raxttrantlea lokam sarko vagta zalear, videxi raxttrantlea lokank, tum Judevancheo riti pallunk koso sangonk xokta?”

15 Ami patki aslolea videxi raxttrantlea lokam bhaxen nhoi, punn zolma thaun Judev zaun asat. 16 Ami zannant ki ek munis kaideant sanglolim kamam korun nhoi, punn fokot Jezu Kristacher bhavarth dovrun nitivont zata. Taka lagon kaideant sanglolea kamachea adarit nhoi, punn Kristacher bhavarth dovrun ami nitivont zaunche mhunn ami Krist Jezucher bhavarth dovorla. Karonn Moizesan dilʼlea kaideant sanglolim kamam korun khoinchoch munis nitivont zaunk xokona. 17 Krista vorvim nitivont zaunk proitn kortana ami patki mhunn dison ieta zalear hacho orth Krist patkancho sevok kai? Kednanch na! 18 Hanvem eka vellar moddun uddoilam tem hanv porot bandunk laglom zalear, hanv ek guneanvkari mhunn dakhoun ditam. 19 Karonn Deva pasot jieunk, hanv kaidea pormonnem melam. 20 Mhaka Krista borabor khambear khillailʼlo asa. Taka lagon, atam hanv mhojea pasot jiena, punn oslem jivit jietam jem Kristachea ekvottant asa.* Atam, hanv munis koso jem jivit jietam tem hanv fokot tea bhavarthan jietam zo mhaka Devachea Putacher asa, zannem mhozo mog kelo ani apleakuch mhojea pasot dilo. 21 Kaido pallun ek munis nitivont zata zalear Kristachea mornnak kainch valor na koso zalo. Tea pasot hanv Devachi favo nasloli doia nakarna.

3 Are ginean naslolea Galasiekaramno! Konnem tumkam fosoile? Jezu Kristak kiteak lagon khambeacher khillaila tea vixim tumkam spoxtt ritin somzonni dilʼli. 2 Hanv tumkam ek prosn vicharunk sodhtam:* Tumkam povitr xokti, kaideant sanglolim kamam kelʼlim mhunn mellʼlloli? Vo bori khobor aikon bhavarth dovorlolo mhunn mellʼlloli? 3 Tumkam matui ginean na? Tumi povitr xokte pormonnem cholonk suru kelʼlem, ani atam tumi munxanchea chintpa pormonnem cholonk sodhtat? 4 Tumi itle dukh-tras bexttech soslole? Na. Bexttech sosunk na. 5 Tumkam povitr xokti dita ani tumchea modem ojapachim kamam korta to tumi Kaideant sanglolim kamam kortat mhunn oxem korta? Vo tumi bori khobor aikon tacher bhavarth dovorlo mhunn korta? 6 Abrahaman “Jehovacher* bhavarth dovorlo, ani tea pasot taka nitivont mhunn lekhlo.”

7 Jim bhavarthan choltat tinch Abrahamachi sonsot mhunn tumi tor bore bhaxen zannant. 8 Devachea Utran, hem poilinch polloilem ki Dev bhavarthachea adaran Judev nhoi tea lokank nitivont mhunn lekhtolo, ani Abrahamak hi bori khobor kolloili: “Tuje vorvim soglea raxttrank besanv mellttolem.” 9 Tea pasot, bhavarthan choltat tankam Abrahama bhaxen besanv melltta, zaka bhavarth aslo.

10 Je konn kaideant sanglolea kamacher visvas dovortat tancher xirap asa, karonn oxem boroilʼlem asa: “Zo konn Kaideachea pustokant boroilʼleo sogleo vostu pallina tacher xirap asa.” 11 Tea bhair, Kaideachea adaran konnui Devachea nodren nitivont zaina hem ekdom spoxtt asa. Karonn oxem boroilʼlem asa: “Zo nitivont asa to aplea bhavartha udexim jietolo.” 12 Kaido bhavarthacher adarit na. Tantunt, fokot oxem mhunnttlolem asa, “zo konn him kamam korta to hea kamank lagon jietolo.” 13 Kristan amkam viktim gheun, Kaideantlea xirapantlim soddoilim ani amchea bodlek apunn xirap poddlolo zalo. Karonn oxem boroilʼlem asa: “Khambear khillailʼlo* dor ek munis xirap poddlolo zaun asa.” 14 Abrahamak mellʼllolem tem besanv Krist Jezu udexim dusrea raxttrankui mellchem, ani bhasailʼli povitr xokti amkam amchea bhavartha udexim mellchi mhunn oxem zalem.

15 Bhav-bhoinnimno, hanv tumkam ek sodanchea jivitantlem udharonn diunk sodhtam: Konnem-i ek korar kelo, zaum to fokot munxamninch kelʼlo korar zalear pasun, ek pavtt to korun zalea uprant konnuch to moddunk xokona vo tantunt anik kainch ghalunk xokona. 16 Atam jeo bhasaunneo kelʼleo teo Abrahamak ani tachea sonstik* kelʼleo. Devachea Utrant, “ani tujea sonstink,”* oxem mhunnon zaitea zannam vixim sangonk naslem. Tachea bodlek, “ani tujea sonstik,”* oxem mhunnttlolem, mhunnche fokot ekleakuch, ani to mhunnttlear Krist. 17 Hanv hem-ui sangtam: 430 vorsam uprant ailʼlo Kaido Devan adim kelʼlea Korarak moddunk xokona. 18 Karonn daiz Kaideachea adarit diunk zata zalear, tem bhasaunnek lagon diunk zaina aslem, punn Devan tem doiallaien eka bhasaunne udexim Abrahamak dilʼlem.

19 Tor, Kaido kiteak dilʼlo? Jea sonstik bhasaunni kelʼli ti sonsot* ieum poriant patkam dakhoun diunk ho Kaido dilʼlo, ani to devduta udexim eka modestichea hatantlean dilʼlo. 20 Ekuch munis asta thoim modestichi goroz asona, ani bhasaunni diupi Dev, ho ekloch asa. 21 Tor Kaido, Devachea bhasaunneanchea add asa kai? Kednanch na! Karonn jivit dita toslo kaido diunk zatalo zalear, ek munis fokot to kaido pallun nitivont zata aslo. 22 Punn ji bhasaunni Jezu Kristacher bhavarth dovorlolean melltta ti tacher bhavarth dovortat tankam mellom mhunn, Devachea Utran sogleank patkachea tabeant kele.

23 Punn, bhavarth ieunchea adim, amkam Kaidea udexim rakhonn mellttali. Amkam tachea tabeant kelʼle asle, ani mukhar ugddapo zauncho aslo tea bhavarthachi ami vatt polloitalim. 24 Amkam bhavarthak lagon nitivont lekhchim mhunn, Kaido amkam Krista lagim vhorpi dekhrekh* korpi zalo. 25 Atam bhavarth pavlo dekhun, ami khoincheach dekhrekh* korpeachea khala nant.

26 Khorem mhunnttlear, tumi soglim, Krist Jezucher bhavarth dovortat dekhun tumi Devache put zaun asat. 27 Hea pasot, tumi sogleamnim zannim bautizm ghetla ani Kristachea ekvottant asat, tim soglim Krista sarkim zaleant. 28 Atam konnuch Judev na vo Grik na, nhoi mhunn konnuch gulam na vo svotontr na, nhoi mhunn konnuch dadlo na vo bail na, karonn tumi soglim Krist Jezuchea ekvottant asat. 29 Tumi Kristachim zalear, khorench tumi Abrahamachi sonsot,* ani bhasaunne pormonnem daiji.

4 Atam hanv mhunnttam, daiji ek lhan bhurgo asta tea meren, to soglea vostuncho dhoni aslear pasun, tachea modem ani chakra modem kainch forok asona. 2 Aplea bapain tharailʼlo dis ieum poriant to dekhrekh korpeanchea ani sevokanchea khala asta. 3 Teach toren, ami pasun bhurge asle tednam sonvsari chintpache ani vagnnukeche gulam asle. 4 Punn tharailʼlo vell pavlo tednam Devan aplea Putak dhaddlo, zo eke bailek zolmolʼlo ani Kaidea khala aslo. 5 Kaidea khala asat tankam vikte gheun suttka diunchi, ani amkam aple put mhunn poske gheunk mellchem mhunn Devan oxem kelem.

6 Tumi put zaun asat, taka lagon Devan aplea Putak dilʼli tich povitr xokti amchea kallzant ghatlea, ani ti “Abba,* Bapa!” mhunn ulo marta. 7 Taka lagon, atam tum chakor nhoi punn put zaun asa, ani tum put zaun asa zalear Devan tuka daiji pasun kela.

8 Tumi Devak vollkhonasle tednam dev nhoi tanchi tumi chakri kortale. 9 Punn atam tumi Devak vollkhonk pavleat, khorem mhunnttlear, Dev tumkam vollkhota. Tor, tumi sonvsarantlea kainch faideacheo na toslea ani valor naslolea vostum koddem kiteak vollttat, ani porot tanchi chakri kiteak korunk sodhtat? 10 Tumi dhean diun khas dis, mhoine, vell,* ani vorsam bariksannen pallttat. 11 Hanvem tumchea pasot kelʼli sogli mhenot funkott geli kai, mhunn mhaka bhirant dista.

12 Bhav-bhoinnimno, aiz tumi asat tosoch hanv poilim aslom, punn atam hanv toso na, ani tumi-i mhojea sarkim zaunchim mhunn hanv tumchea lagim vinoti kortam. Tumi mhaka kainch vaitt korunk na. 13 Punn mhojea duensak lagon tumkam poile pavtt bori khobor sangonk mhaka ek sondhi mellʼlloli mhunn tumi tor zannant. 14 Ani mhojem duens tumkam ek porikxa koxi asli zalear pasun, tumi mhoji beporva korunk na vo mhozo dves korunk na,* punn hanv Devacho ek dut zalʼlea sarkom, itlench nhoi, Krist Jezu zalʼlea sarko tumi mhaka ieukar dilo. 15 Atam tumchi ti khuxalkai khoim geli? Karonn ghoddttalem zalear tumi mhaka tumche dolle kaddun dita aslim mhunn hanv govai ditam. 16 Atam, hanv sot uloitam dekhun tumcho dusman zalam kai? 17 Te tumchim kallzam jikhun gheuncho zata titlo proitn kortat, punn tancho udʼdhex sarko na. Tumi khub urben tanchea fattlean voichem mhunn, te tumkam mhojea thaun pois korunk sodhtat. 18 Konnui borea udʼdhexan tumchim kallzam jikhun gheuncho proitn kortat zalear tem borem zaun asa. Tannim oxem, hanv tumchea sangata astam tednanch nhoi punn sodanch korchem. 19 Mhojea mogall bhurgeamno, Krist tumchea modem akar ghena* tea meren mhaka porot ballontiniche vollvolle sosche poddttole. 20 Hanv atam tumchea sangata aslom, ani tumchea lagim mhaka mogan ulounk mellʼllolem zalear kitlem borem zata aslem. Karonn hanv tumkam lagon chintunk poddlam.

21 Kaidea khala ravonk sodhtoleamno, mhaka sangat, kaido kitem sangta tem tumi aikonk na? 22 Udharonnak, boroilʼlem asa ki Abrahamak don put asle, ek chakorni udexim ani ek svotontr baile udexim. 23 Punn zo chakornicho aslo, to dusrea bhurgeam sarko zolmak ailʼlo, ani zo svotontr bailecho aslo, to bhasaunne udexim zolmak ailʼlo. 24 Hea vostunk anik ek orth asa. Heo don bailo mhunnttlear don korar. Ek Sinai Dongracher kelʼlo korar zo gulamam zaunk bhurgeank zolmak haddtta. Ho korar Hagara bhaxen zaun asa. 25 Hagar Arabiachea Sinai dongrak suchit korta, ani ti aichea Jeruzalema sarki asa, karonn Jeruzalem aplea bhurgeam sangata gulamponnant asa. 26 Punn voilem Jeruzalem svotontr asa, ani ti amchi avoi.

27 Karonn oxem boroilʼlem asa: “Ji bhurgeank zolm diunk xokona te vanz bailen khuxal zaunchem; ji ballontiniche vollvolle sosna tinnem khuxalkaien bhoron bob marchi. Karonn je bailecho ghov tichea sangata asa, te baile poros soddun dilʼlea bailek chodd bhurgim asat.” 28 Bhav-bhoinnimno, Izaka bhaxen tumi pasun bhasaunne pormonnem zolmak ailolim bhurgim zaun asat. 29 Punn zo sobhavik ritin zolmolʼlo, to povitr xokte udexim zolmak aila taka dhumallo diunk laglo, aizui toxench zata. 30 Punn Devachem utor kitem mhunntta? “Hea chakornik ani tichea putak ghorantlean bhair kadd, karonn chakornicho put svotontr bailechea puta sangata kosoch daiji zaunchona.” 31 Taka lagon, bhav-bhoinnimno, ami chakornichim nhoi punn svotontr bailechim bhurgim zaun asat.

5 Hich svotontrtai mellonk lagon Kristan amkam svotontr keleant. Tor, ghott ravat, ani tumi svota porot ek pavtt gulamponnachea zum-ak zuddom nakat.

2 Polloiat! Hanv Paulu, tumkam sangtam ki tumi sunot kelear Krist tumkam kainch faideacho zaunchona. 3 Sunot kelʼlea dor eka munxak hanv porot ek pavtt sangtam ki tannem sunot keli zalear, taka Moizesa udexim dilolo akʼkho kaido pasun pallunk poddttolo. 4 Tumchea modlea thoddeamnim Kaidea udexim nitivont zauncho proitn kelo zalear tumi Krista thaun veglle zaleat. Tumi tachea favo naslolea doie thaun pois pavleat. 5 Punn ami povitr xoktechea modotin, bhavartha udexim nitivont zauncho bhorvonso dovortat ani tachi utsuktaien vatt polloitat. 6 Karonn Krist Jezuchea ekvottant asloleank, sunot keli vo korunk na hem mhotvachem nhoi, punn moga vorvim dison ieta to bhavarth mhotvacho.

7 Tumi sotachea vatten bore bhaxen choltale.* Tor tumkam sotachea vatten cholot ravonk konnem addaile? 8 Tumkam apoileat tea Deva koddlean oslea torechi xikounn iena. 9 Ilʼlem-xem khomir akʼkhem pitt ambott korta. 10 Mhaka hi khatri asa ki tumi je Somiachea ekvottant asat te mhojea poros vegllem chintop apnnaunche nant, punn zo tumkam tras dita, magir to konnui zaum, taka favo ti khast mellttoli. 11 Bhav-bhoinnimno, hanv azun pasun sunot korunk zai mhunn porgott kortam zalear, mhaka dhumallo kiteak ditat? Hanv khorench toxem kortalom zalear trasanchea khambeak* lagon konnuch addkhollchim naslim. 12 Tumkam ghuspaunk sodhtat tea munxamnim aplea kuddicho sandho katrun uddoit zalear* borem zatolem.

13 Bhav-bhoinnimno, tumkam svotontr zaunk apoilolim. Hi svotontrtai tumchea kuddicheo itsa purnn korunk uzar korinakat, punn mogan eka-mekachi chakri korat. 14 Karonn ho akʼkho Kaido, hea ekach adnea udexim purnn zata, “Tuzo mog korta toso tujea xezareacho mog kor.” 15 Punn, tumi eka-meka lagim zhogddot ravtat zalear,* chotrai dovrat, tumi eka-mekacho nas kortolim.

16 Hanv sangtam, tumi povitr xoktechea margdorxona pormonnem cholot ravat ani tumi kuddicheo itsa purnn korunk pavchi nant. 17 Karonn patki kuddicheo itsa povitr xoktechea add astat, ani povitr xokti kuddichea add asta. Heo donui vostu eka-mekachea add astat dekhun tumi jeo vostu korunk sodhtat teo korinant. 18 Tumi povitr xoktechea margdorxona pormonnem choltat zalear, tumi Kaidea khala nant.

19 Kuddichim kamam sarkim dison ietat. Tim mhunnttlear, onoitik kuddicho sombond,* mhellemponn, loz naslolim patki kamam,* 20 murti-puza, ghaddiponn,* dusmankai, zhogddim, dusreancher zollop, ragan bhorop, vad-vivad, futti ghalop, veg-veglle zome korop, 21 nattkai, bebdikai, hispa bhair mouza-mosti ani oslinch anik vaitt kamam. Poilim xittkailʼlem toxem, hanv tumkam hea vaitt kamam vixim porot ek pavtt xittkaitam. Je lok oslim kamam korit ravtat te Devachea Rajeache daiji zaunche nant.

22 Dusrea vatten povitr xoktechem foll mhunnttlear, mog, khuxalkai, xanti, pasiens, doia, boreponn, bhavarth, 23 movallai, svotacher tabo dovrop. Oslea vostum add kosloch kaido na. 24 Toxench, Krist Jezuche asat tannim aplea kuddik, tichea vaitt bhavnam ani itsam sangata khambear khillailea.

25 Ami povitr xoktechea margdorxona pormonnem jietat zalear, ami toxinch povitr xoktechea margdorxona pormonnem manddavollin cholot ravom-ia. 26 Ami gorvan bhorchim nhoi, eka-mekak fatti ghalcho proitn korcho nhoi ani eka-mekachi nattkai korchi nhoi.

6 Bhavamno, ek bhav khobor nastana chukichem panvl gheta tednam tumi je bhavarthant purte asat,* tannim tea bhavak movallaien sudharcho proitn korunk zai. Punn tumi pasun tallnnent poddona zaunk svotacher nodor dovrunk zai. 2 Eka-mekacho bhar ubarit ravat, ani hea toren tumi Kristacho kaido pallttole. 3 Eklo kainch nastana apunn konn tori mhunn somzota zalear to apleakuch fosoita. 4 Punn dor eklean apleach kamanchi topasnni korchi. Tednam taka dusream lagim sor korun nhoi, punn apleach kamam udexim khuxalkai mellttoli. 5 Karonn dor eklo aplem vojem* apunnuch ukoltolo.

6 Titlench nhoi, konnankui Devachea utrachi xikounn mellʼllea tannem apleak xikoitoleak aplea borabor soglea borea vostunt bhagidar korcho.

7 Tumi tumkanch fosoinakat: Devak fottounk zaina. Ek munis jem kitem vompta tench lunvtolo. 8 Karonn zo kuddi khatir vompta to kuddi udexim nasak pavoita tem pik lunvtolo. Punn zo povitr xokte khatir vompta to povitr xokte udexim sasnik jivit dita tem pik lunvtolo. 9 Tor, ami borem kam korunk soddun diunchem nhoi, karonn ami dhir soddun dinant* zalear amkam favo tea vellar inam mellttolo. 10 Dekhun amkam sondhi* asa tea meren ami sogleam thaim borem tem korit ravom-ia. Punn chodd korun bhavartha udexim amchim bhav-bhoinnam zaleant tankam.

11 Hanvem mhojeach hatan, tumkam kitlea mottea-mottea okxoramnim boroilam tem polloiat.

12 Dusreank apunn borim mhunn bhailean dakhounk sodhtat tim soglim tumcher sunot korunk dobhav ghalcho proitn kortat. Apleacher Kristachea khambeak* lagon dhumallo ieuncho nhoi mhunn tim oxem kortat. 13 Karonn sunot kortat tinch Kaido pallinant. Punn tumchea kuddi vixim boddai marunk mellchi mhunn tankam tumi sunot keloli zai. 14 Punn hanv Somi Jezu Kristachea khambeak* soddun, anik kiteachich boddai marchom na. Tachea udexim ho sonvsar mhojea pasot mela,* ani hanv hea sonvsara pasot melam. 15 Sunot korop vo korinastana ravop mhotvachem nhoi, punn novi rochnna mhotvachi. 16 Hea kaidea pormonnem sarke ritin choltat tea sogleancher, mhunnche Devachea Izraelacher sodanch xanti ani doia asum.

17 Atam thaun konnench mhaka tras korche nhoi, karonn hanv Jezucho ek chakor mhunn dakhounk mhojea kuddicher dag asat.

18 Bhav-bhoinnimno, tumi zo boro sobhav dakhoitat, taka lagon Somi Jezu Kristachi favo nasloli doia tumcher asom. Amen.