EFEZKARANK CHITT

1 Hanv Paulu, Devache khuxe pormonnem Krist Jezucho ek apostl, Krist Jezuchea ekvottant asat ani visvaxi asat tea Efezantlea soglea Devachea lokank* boroitam:

2 Dev zo amcho Bap zaun asa, tachea thaun ani Somi Jezu Krista thaun tumkam favo nasloli doia ani xanti mellom.

3 Amchea Somi Jezu Kristachea Devak ani Bapak sodanch vakhannʼnni mellom, karonn ami Kristachea ekvottant asat dekhun tannem amkam sorgar soglea torechim besanvam dileant. 4 Ami Devacho mog korcho ani tachea mukhar povitr ani khot naslolim urchim mhunn, tannem amkam sonvsarachea survate adinch Kristachea ekvottant uronk vinchun kaddleant. 5 Aple khuxe pormonnem, Jezu Krista udexim to amkam aple put koxe poske ghetolo mhunn tannem adinch tharailem ani oxem korop taka borem dislem. 6 Tannem doien aplea mogall Puta udexim amkam ji apli mhoimevont favo nasloli doia dakhoili tachi vakhannʼnni zaunchi mhunn oxem zalem. 7 Teach Putachea rogta udexim soddvonn* diun tannem amkam suttka dilea, hoi, tacheach udexim Devan amkam bhorpur favo nasloli doia dakhoili, ani amkam patkanchem bhogsonnem dilem.

8 Tannem amkam sogli zannvai ani somzonni diun bhorpur favo nasloli doia dakhoilea. 9 Mhunnche, tannem aplea khuxe pormonnem povitr gutt amkam kollit kelo. Ho gutt tannem apleak boro dislo tea pormonnem apnnench tharailʼlo. 10 Hea guttant, tharailʼlo vell purnn zata tednam ek manddavoll suru korop mellon asa. Ti mhunnttlear, Krista udexim sogleo vostu ektthaim korop, zaum teo sorga voileo vo prithume voileo. Hoi, tachea udexim ektthaim korop. 11 Ami tachea ekvottant asat ani daiji mhunn pasun nemleat, karonn Devan aplea udʼdhexa pormonnem to amkam vinchun kaddttolo mhunn poilinch tharailʼlem. Hoi, teach Devan, zo aple khuxe pormonnem sogleo vostu ghoddon ieum-xeo korta. 12 Ami je Kristacher bhorvonso dovrunk sogleant poile zaun asat, amchea udexim Devachi vakhannʼnni ani mhoima zaum mhunn Devan amkam vinchun kaddle. 13 Tumi pasun tumche soddvonnechi bori khobor aikoli tednam, mhunnche sotachem utor aikolem tednam, tumi Kristacher bhorvonso dovorlo. Tumi visvas dovorlo tednam bhasailʼlea pormonnem Krista udexim tumcher povitr xoktecho xikʼko marlo. 14 Daiz mellchea adim hi povitr xokti amkam ek gerentti* koxi mellʼlli. Hea udexim Dev aplea lokank soddvonne udexim suttka dita, jea vorvim tachi mhoima ani vakhannʼnni zata.

15 Taka lagon, tumkam Somi Jezucher kitlo bhavarth asa ani tumi soglea Devachea lokancho* kitlo mog kortat hem aikolem tednam thaun, 16 hanvem tumchea pasot magnneant upkar attovop bond korunk na. Hanv sodanch tumchea pasot magnnem korit asam, 17 ki amcho Somi Jezu Kristacho Dev, mhunnche mhoimen bhorlolo amcho Bap, tumkam ugddapeo korta tea vostuncho orth somzonk zannvai dium, jea udexim tumkam tachea vixim sarkem ginean mellttolem. 18 Tannem tumkam koslea bhorvonxea pasot apoileat, ani Devachea lokam pasot koslim besanvam* daiz mhunn samballun dovorleant, hem tumi somzochem mhunn tannem tumche dolle* ugoddleat. 19 Toxench tumi hem pasun somzochem ki tachi vorti xokti amchea bhavartheam modem kitle zobordost toren kam korta. Kiteakuch sor korunk zaina tosli tachi hi vorti xokti, 20 Kristachea babtint pasun dison aili. Tannem taka meloleantlo jivont kelo ani sorgar aplea uzvea vatten bosoilo. 21 Tannem taka fokot heach sonvsarant nhoi punn ieuncho asa tea sonvsarant* pasun dor eka sorkara, odhikara, xokte, raz-odhikara, ani toxench aiz meren dilam tea dor eka nanva poros khub vortem nanv dilem. 22 Itlench nhoi, sogleo vostu tachea adhin korun tachea paim-am ponda dovorleo ani sobhe sombondit aslolea soglea vostuncher taka mukheli mhunn nemlo. 23 Sobha Kristachi kudd zaun asa, ji tachea vorvim bhorloli asa ani toch sogleo vostu purnn korta.

2 Itlench nhoi, tumi tumchea guneanvank ani patkank lagon melolim aslim, tori astana Devan tumkam jivont kelim. 2 Tumi tumchea patkant aslim ani hea sonvsara* pormonnem jietalim. Sonvsari sobhavachea odhikaracher raj choloita tea razachem tumi manun choltalim. Ho sobhav sogle koddem varea bhaxen posorla ani adnea pallinant tancher atam probhav ghalta. 3 Hoi, eka vellar ami pasun heach lokam modem amchea kuddichea itsam pormonnem choltalim. Ami amcheo kuddicheo itsa purnn kortalim ani amchea chintnam pormonnem vagtalim. Ani ami zolmoleant tednam thaun tea lokam bhaxen amcherui Devacho rag aslo.* 4 Punn Dev, zo doien bhorlolo asa, tannem amcho khub mog kelo. 5 Ami amchea patkank lagon melolim aslim, tori astana, tannem amkam jivont kelim ani Kristachea ekvottant haddlim. (Tachea favo naslole doiek lagonuch tumkam taronn mellʼllam.) 6 Teach Devan amkam Krist Jezuchea ekvottant jivont kelim ani tachea sangata sorgar bosoilim. 7 Ieuncho asa tea sonvsarant* ami jim Krist Jezu sangata ekvottant asat, tancher Devan udarponnan apli bhorpur favo nasloli doia votounchi mhunn oxem zalem.

8 Heach favo naslolea doiek lagon tumchea bhavartha udexim tumkam suttka mellʼllea. Hem tumkam lagon zaunk na, punn tem Devachem dennem zaun asa. 9 Hoi, hem tumchea kamank lagon zaunk na. Khoincheach munxak boddai marunk karonn mellchem nhoi mhunn oxem zalem. 10 Ami Devachea hatanchem kam zaun asat, ani Krist Jezuchea ekvottant asat dekhun amkam borim kamam korunk rochleant. Him kamam ami korchim mhunn Devan poilinch tharailolem.

11 Taka lagon, ugddas dovrat ki jea lokanchi munxamnim sunot kelea, te eka vellar tumkam, mhunnche zolma thaun videxi asloleank “sunot zaunk naslole,” mhunnttale. 12 Tea vellar, tumi Krista bogor asle, Izrael raxttra thaun veglle asle, bhasailʼlea korarant tumkam kainch vantto naslo. Tumche koddem kainch bhorvonso naslo ani hea sonvsarant tumi Deva bogor jietale. 13 Punn atam tumi Krist Jezuchea ekvottant asat. Tumi eka vellar Deva thaun khub pois asle, punn atam Kristachea rogta udexim tachea lagim aileat. 14 Karonn Kristanuch amkam xanti haddlea, tannench donui zomeank ektthaim haddle, ani tanchea modem ubi asli ani tankam eka-meka thaun veglli kortali ti vonnot moddun uddoili. 15 Aplea kuddichem bolidan diun tannem ti dusmankai kabar keli, mhunnche zaiteo adnea asleo to Kaido* kabar kelo. Tea donui zomeank aplea sangata ekvottant haddun ek novo munis toiar korcho ani xanti haddchi, 16 ani toxench trasanchea khambea* udexim, tea donui torechea lokank ek kudd korchi ani Deva sangata tancho purnn toren ekvott korcho mhunn pasun tannem oxem kelem. Karonn tannem aplem bolidan diun hi dusmankai kabar kelʼli. 17 Tumi jim Deva thaun pois aslim ani jim Devak lagim aslim, tankam tannem ieun xantichi bori khobor sangli. 18 Karonn tacheach udexim ami donui toreche lok, ekach povitr xokte vorvim kainch addkholl nastana Bapa lagim vochonk xoktat.

19 Taka lagon, atam tumi onvollkhi ani videxi uronk nant, punn Devachea lokam* sangata nagrik zaun asat ani Devachea familiche bhag zaun asat. 20 Tumkam apostlanchea ani provadeanchea buniadicher ubim keleant, jea buniadicho konnxeacho fator svota Krist Jezu zaun asa. 21 Hi akʼkhi bildding ji Kristachea ekvottant asa, ani jiche sogle bhag eka-meka sangata purnn toren zuddlole asat, ti Jehova* pasot ek povitr mondir zaunchem mhunn vaddot voita. 22 Tacheach ekvottant tumi pasun Deva pasot ek ghor koxem zatat, zoim to aple povitr xokte udexim ravta.

3 Heach karonnak lagon hanv Paulu, zo Krist Jezu pasot ani tumi je dusrea raxttrantle lok zaun asat, tumchea pasot, bondkhonnint asa. 2 Tumchea pasot mhaka Devachea favo naslolea doiecho sevok zaunchi zobabdari dilʼli mhunn, tumi aikolanch astolem. 3 Mhunnche, mhaka povitr gutt ugddapo kelʼlo, ani hea vixim hanvem poilim thoddeach utramnim boroilʼlem. 4 Tor, tumi hem vachtolim tednam, mhaka Kristachea povitr gutta vixim kitli somzonni asa tem tumkam kollon ietolem. 5 Ho gutt aiz povitr xokte udexim povitr apostlank ani provadeank jitlo kollit kela, titlo adlea pillgentlea khoincheach lokank kollit korunk naslo. 6 Mhunnche oxem ki dusrea raxttrantlea lokamnim, Krist Jezuchea ekvottant ani bore khobre udexim, amchea sangata daiji zaunche, amchea sangata ekach kuddiche sandhe zaunche ani Devachea bhasaunnent amchea sangata bhagidar zaunche. 7 Hanv Devachea favo naslolea doiek lagon heach povitr guttacho sevok zalam. Tannem mhaka hem funkott dennem aplea xokte udexim dilam.

8 Mhojea oslo munis, zo Devachea lokam* modem sogleant lhan asa, taka hi Devachi favo nasloli doia dakhoili. Odmas pasun lavunk zaina tea Kristachea besanvam* vixim bori khobor hanvem dusrea raxttrank sangchi, 9 toxench, sogleo vostu rochpi Devan zo povitr gutt zaitea kallam thaun lipoun dovorla tachi manddavoll sogleank dakhoun diunchi mhunn oxem zalem. 10 Sobhe udexim, sorga voilea sorkarank ani odhikareank* veg-vegllea vattamnim dison ieta ti Devachi zannvai somzochi mhunn oxem zalem. 11 Hem amcho Somi, Krist Jezuchea babtint kelʼlea tachea sasnik udʼdhexa pormonnem asa. 12 Krista udexinch amkam ukteponnim ulounk dhir mellʼlla ani tacher bhavarth dovorlolean ami purnn visvasan Deva mukhar vochonk xoktat. 13 Tor hanv tumkam sangtam, tumchea pasot mhaka he dukh-tras sosche poddttat mhunn tumi dhir soddun dium nakat, karonn hea dukh-trasam udexim tumkam man mellttolo.

14 Heach karonnak lagon hanv tumchea pasot Bapa mukhar dimi ghalun magnnem kortam. 15 Tachea udexim sorgar ani prithumer dor ek familik nanv mellʼllam.* 16 Hanv magnnem kortam ki bhorpur mhoimen bhorlolea Devan povitr xokte udexim tumkam ti xokti diunchi, ani tumi disan-dis bhitorlean xoktivont zait voichim. 17 Ani tumchea bhavartha udexim Krist zo mogan bhorlolo asa to tumchea kallzamnim ravom. Toxench, tumchim mullam ghott zaum ani tea buniadir tumi ghott urom. 18 Hea udexim tumi soglim Devachea lokam* sangata sotachi rundai, lambai, unchai ani kholai bore toren somzonk pavom. 19 Ani Kristacho mogui vollkhonk pavom, zo gineana poros vorto asa. Jea vorvim Devache gunn purnn toren tumchea bhitor astole.

20 Devachi xokti amchea bhitor kam korit asa, ani ami tachea lagim jem kitem magtat vo ami jem kitem chintunk xoktat, tachea poros anik kitlech chodd ani chodd pavtti, to amchea pasot korunk xokta. 21 Tea Devak sobhe udexim ani Krist Jezu udexim pillgechea pillgek sodam-sodankal mhoima mellot ravom. Amen.

4 Taka lagon hanv, zo Somiacho xis zalʼlean bondkhonnint asam, tumchea lagim vinoti kortam ki tumchi vagnnuk tumkam dilʼlea apounneak sobta tosli aschi. 2 Khaltikai, movallai, ani pasiens dakhoun, mogan eka-mekak soxit ravat. 3 Tumkam povitr xokte udexim ekvottan bandun dovorta ti xanti samballun dovorcho purnn toren proitn korat. 4 Jea toren tumkam ekuch bhorvonso melloun gheunk apoilole, teach toren ekuch kudd asa ani ekuch povitr xokti asa. 5 Ekuch Somi, ekuch bhavarth, ekuch bautizm, 6 ani sogleancho ekuch Dev ani Bap asa. To sogleam poros vorto asa ani sogleam udexim ani sogleam modem kam korta.

7 Atam Kristan funkott dan vanttun dilam tea pormonnem amchea modlea dor ekleak favo nasloli doia dakhoilea. 8 Taka lagon, Devachea Utrant mhunnttlam: “To voir choddlo tednam koideank gheun gelo. Tannem munis dennim mhunn dile.” 9 “To voir choddlo” hea utrancho orth kitem? Tancho orth to sokoilea vattarant, mhunnche, prithumer denvon pasun ailolo. 10 Zo denvon ailolo toch sorga poros voir choddlo, hem tannem sogleo vostu purnn korunk lagon kelem.

11 Ani tannem thoddeank apostl, thoddeank provadi, thoddeank porgott korpi* ani thoddeank gonvlli ani xikxok mhunn nemle. 12 Hea udexim Devachea lokank* sarke vatten cholonk modot zaunchi,* ani tannim dusreanchi seva korchi, ani Kristachi kudd tea meren vaddot ravchi, 13 jea meren ami soglim bhavarthan, ani Devachea Putachea khorea gineanan ekvott melloun ghenant, ani Krist asa toso purnn toren vaddlolim munxam zainant. 14 Tor, ami atam thaun lhan bhurgeam bhaxen zaunchem nhoi, jim khottea khobranchea lharancher hevtten-tevtten lotton voitat ani dor eka xikounnechea vareacher hanga-thoim pavtat. Karonn tim oslea munxanchem sangnnem manun ghetat jim fottingponnan ani naddbudʼdhen tankam fosoitat. 15 Punn ami sot uloum-ia, ani soglea vostumnim mogan Krista bhaxen vaddot ravom-ia, zo amcho mukheli zaun asa. 16 Krista udexim kuddiche sogle sandhe eka-mekak zuddlole asat ani dor ek sandho kuddichea gorzam pormonnem eka-mekak adar dita. Dor ek sandho aplem kam bore bhaxen korta tednam te kuddik vaddonk adar melltta. Hea toren akʼkhi kudd mogan ghott zata.

17 Tea pasot hanv tumkam Somia mukhar sangtam ani solʼlo ditam, ki tumi atam thaun raxttrantlea lokam bhaxen zaunche nhoi, je aplea polkea* chintnam pormonnem choltat. 18 Tanchea nennarponnak lagon ani tanchim kallzam nibor asat dekhun te* kallkhant asat ani Dev dita tea jivita thaun pois asat. 19 Vaitt kamanchi sogli loz soddun, ani axen dor ek torechem oxudʼdh kam korit ravonk, tannim apnnakuch loz naslolea patki kamachea* hatant soddun dileat.

20 Punn tumi Krista vixim osli xikounn xikonk nant. 21 Jezun sot xikoilem, ani tumi tachea koddlean khorench aikon ghetlam ani xikon ghetlam zalear tumkam teo vostu bore toren khobor asat. 22 Tumkam adim xikoilʼlem toxem tumchi porni vagnnuk, mhunnche tumchem pornem jivit soddun diat.* Karonn tumkam fosoitat tea tumchea vaitt itsank lagon, tumchi porni vagnnuk piddʼddear zait voita. 23 Tumi tumchem chintop ani tumcho sobhav* novo korit ravat, 24 ani novi vagnnuk apnnaiat,* mhunnche Devache khuxe pormonnem asa tosli novi vagnnuk. Hi vagnnuk nitivontponnacher ani visvaxiponnacher adarit asa.

25 Atam, tumi khotteponn soddun dilam mhunnttoch, tumi dor eklim tumchea xezaream lagim sot tench uloiat. Karonn ami soglim ekach kuddiche veg-veglle sandhe zaun asat. 26 Tumkam rag ailo zalear pasun, patok korinakat. Suria buddo poriant tumi rag dhorun ravchem nhoi. 27 Soitanak* sondhi* dium nakat. 28 Chori korta tannem atam thaun chori korchi nhoi, tachea bodlek, aplea hatamnim mhenotin ani promannikponnan kam korchem. Hea udexim konnankui goroz asa taka diunk tachea lagim kitem tori astolem. 29 Koslench vaitt* utor tumchea tonddantlean bhair sorchem nhoi, punn jem borem ani gorje vellar urba dita toslench utor tumchea tonddantlean bhair sorchem, jea udexim aiknnareak faido zatolo. 30 Toxench, Devachea povitr xoktek dukhi korinakat, karonn soddvonne udexim suttka diunchea disa pasot heach povitr xokte udexim tumcher xikʼko marla.

31 Dor ek torechi koddsann, rag, krodh, bob marop ani gallio marop, toxench soglea torechem vaittponn tumchea modlem kaddun uddoiat. 32 Tachea bodlek, eka-meka sangata doiallaien vagat ani doia-maia dakhoiat. Devan tumkam Krista udexim kallzant thaun bhogxileant toxim tumi-i eka-mekak kallzant thaun bhogsat.

5 Tor, Devachim opurbaiechim bhurgim zalʼlea sarkim tachi dekh gheiat. 2 Kristan amcho* mog kelo ani amchea* pasot Deva mukhar pormollit bhettounni ani bolidan mhunn apleakuch dilo, toxench tumi-i mogan cholot ravat.

3 Tumi onoitik kuddichea sombonda* vixim ani koslea-i torechea mhelleponna vixim vo axe vixim ulounchem pasun nhoi, karonn Devachea lokamnim* oxem korop sarkem nhoi. 4 Toxench, tumchea modem lojechi vagnnuk ani murkhponnachem ulovop aschem nhoi, ani tumi burxeponnachim fokannam korchim nhoi, karonn Devachea lokank tem sobona. Tachea bodlek, Devache upkar attoiat. 5 Karonn tumi hem zannant, ani tumkam bore bhaxen khobor asa ki oslo khoincho-i munis zo onoitik kuddicho sombond* dovorta vo mhellim* kamam korta vo as korta (jem murti puza kelʼlea sarkem zaun asa) taka Kristachea ani Devachea Rajeant koslench daiz mellchem na.

6 Khoincheach munxak polkea utramnim tumkam fosounk dium nakat, karonn osleach vostunk lagon adnea pallinant tancher Devacho rag ieta. 7 Taka lagon, tanchea sangata bhagidar zainakat. 8 Karonn eka vellar tumi-i kallkhant aslim, punn atam tumi Somia sangata ekvottant asat dekhun uzvaddant asat. Tor uzvaddachim bhurgim koxim cholot ravat, 9 karonn uzvaddachem foll mhunnche sogle torechem boreponn, nitivontponn ani sot. 10 Dhoniak khoincheo vostu manvotat tachi khatri korit ravat, 11 ani kallkhachim upeog naslolim kamam korop bond korat. Tachea bodlek, tim ukteponnim dakhoun diat. 12 Karonn tim konnank kollonastana jim kamam kortat tea vixim ulovop poriant lojechem zaun asa. 13 Atam sogleo vostu jeo ukteponnim dakhoun dileat teo uzvadda udexim dison ietat, karonn ukteponnim dakhoun dilea ti dor ek vost uzvadd zaun asa. 14 Tea pasot, oxem boroilʼlem asa: “Are nhidlolea munxa, utth, ani meloleantlo* jivo zav, tednam Kristacho uzvadd tujer porzollttolo.”

15 Tor tumchi vagnnuk koxi asa ti pollounk tumcher koddok nodor dovrat, pixeam sarkim nhoi punn xanneam sarkim cholat. 16 Tumcho vell bore toren uzar korat,* karonn dis vaitt asat. 17 Somjikai naslolea munxam sarkem vagop bond korat, tachea bodlek, Jehovachi* khuxi kitem ti somzon gheuncho proitn korit ravat. 18 Toxench, soro pieun ttaitt zainakat, karonn to tumkam vaitt kamam korunk pavoitolo.* Tachea bodlek, tumi povitr xokten bhorot ravat. 19 Stotram gaun,* Devachi vakhannʼnni korun, ani bhoktechim gitam gaun eka-mekak dhir diat. Toxench, tumchea kallzamnim songita borabor Jehova* pasot gitam gaiat. 20 Ani soglea vostum pasot amchea Somi Jezu Kristachea nanvan amchea Devache ani Bapache sodanch upkar attoit ravat.

21 Kristachi bhirant dhorun eka-mekachea adhin ravat. 22 Somiachea adhin ravtat toxem bailamnim ap-aplea ghovanchea adhin ravchem. 23 Karonn zoso Krist aplea kuddicho, mhunnche sobhecho mukheli ani salvar korpi zaun asa, tosoch ghov aplea bailecho mukheli zaun asa. 24 Zoxi sobha Kristachea adhin asa, toxench bailamnim pasun soglea vostumnim ap-aplea ghovanchea adhin ravchem. 25 Ghovamno, zoso Kristan sobhecho mog kelo ani tichea khatir apleakuch bhettoilo, tosoch tumi tumchea bailecho mog korit ravat. 26 Sobhek udkan dhuvun, mhunnche Devachea Utran dhuvun xudʼdh ani povitr korchi mhunn Kristan oxem kelem. 27 Toxench, sobha tachea nodren sobit zaunchi, zantunt kosloch dag ascho nhoi, vo koslich miri aschi nhoi, vo koslench unnemponn aschem nhoi, punn, ti povitr ani khot nasloli aschi mhunn tannem oxem kelem.

28 Tech bhaxen, ghovan aplea kuddicho mog korta toso aplea bailecho mog korcho. Aplea bailecho mog korta to munis svotacho mog korta. 29 Karonn khoinchoch munis aplea kuddicho dves korina. Punn to ti posta ani ti moladik mhunn lekhta. Oxench Krist pasun aplea sobhe sangata korta, 30 karonn ami tachea kuddiche sandhe zaun asat. 31 “Hea karonnak lagon dadlo aplea bapaik ani aplea avoik soddttolo ani aple bailek ektthovtolo,* ani tim dogaim ek kudd zatolim.” 32 Ho povitr gutt vorto zaun asa. Atam, hanv Krista vixim ani sobhe vixim uloitam. 33 Tori astana, tumchea modlea dor eklean aplo mog korta tosoch aplea bailecho mog korcho ani bailen aplea ghovak kallzant thaun man diuncho.

6 Bhurgeamno, Somiachea ekvottant aslolea tumchea avoi-bapaichi adnea pallat, karonn oxem korop Devachea nodren sarkem zaun asa. 2 “Tujea bapaik ani tujea avoik man di,” hi poili adnea zaun asa. Ani tachea sangata oxi bhasaunni kelʼli asa: 3 “Tujem borem zaunchem* ani prithumer tunvem lamb kall jieunchem mhunn oxem kor.” 4 Ani bapaimno, tumchea bhurgeank rag haddinakat. Tachea bodlek, Jehovache* khuxe pormonnem tankam xist diun ani xikoun* vhodd korat.

5 Chakramno, tumi Kristachi adnea pallttat toxench sonvsarant aslolea tumchea dhoniank bhieun ani koddkoddon kallzachea promannikponnan tanchi adnea pallat. 6 Munxank khuxal korunk sodhtolea bhaxen, te polloitat tednanch nhoi, punn Kristachea chakram bhaxen tumchea purnn kallzan Devachi khuxi korat. 7 Munxa pasot nhoi, punn Jehova* pasot seva kortat mhunn somzon borea sobhavan seva korat. 8 Karonn dor eklo, to chakor vo svotontr munis zaum, to jem kitem borem kam korta tea pormonnem taka Jehova* koddlean inam mellttolo mhunn tumi zannant. 9 Ani dhoniamno, tumi pasun, tumchea chakram sangata bore toren vagat, ani tankam dhomkainakat. Karonn tancho ani tumcho Dhoni sorgar asa, ani to bhedbhav korina mhunn tumi zannant.

10 Xevottak, Somiachi bolladik xokti melloun gheun ghott zait ravat. 11 Soitanachea* naddbudʼdhechea kamam add* thir ubim ravonk Deva koddlean mellʼllolim soglim hotʼtearam bandun gheiat. 12 Karonn amchem zhuz,* hadda-masachea* munxam lagim nhoi, punn sorkaram add, odhikaream add, kallkhi sonvsarachea razam add ani sorgar aslolea xoktivont noxttea dutam add asa. 13 Taka lagon, Devan dilolim soglim hot’tearam bandun gheiat, jea udexim tumi vaitt dis ietat tednam tancho fuddo korunk ani jem korunk zai tem soglem kelea uprant thir ravonk xoktolim.

14 Taka lagon, tumchea bhenddak sotacho pottʼtto ghott bandun, ani nitivontponnachem chhatichem kottʼttem ghalun, thir ubim ravat. 15 Toxench, xantichi bori khobor sangonk tumi toiar asat mhunn dakhounk tumchea paim-ak butt ghalun thir ubim ravat. 16 Hachea bhair, noxtteache* sogle zolltte bann palounk, bhavarthachi vhoddli ddhal hatant gheiat. 17 Toxench, soddvonnechem helmet ghalat, ani povitr xoktechi tolvar, mhunnche, Devachem utor bandat. 18 Teach borabor, dor eka vellar povitr xoktechea margdorxona pormonnem sogle torechem magnnem ani vinovnneo korit ravat. Toxench zagrut ravat, ani Devachea soglea lokam* pasot kallzant thaun vinovnneo korit ravat. 19 Bore khobrecho povitr gutt sangtana dhiran ulounk mhojea tonddant sarkim utram ieunchim mhunn, mhojea pasotui magnnem korat. 20 Jea bore khobre pasot hanv sanklleamnim bandlolo prothinidi mhunn seva kortam, tea vixim hanvem zoxem ulounk zai toxench dhiran ulounchem mhunn mhojea pasot magnnem korat.

21 Atam hanv koso asa ani hanv kitem kortam tem tumkam somzochem mhunn, amcho mogall bhav ani Somiacho visvaxi sevok Tikikus, tumkam soglem sangtolo. 22 Ami hanga koxe asat hem tumkam kollchem ani tannem tumkam bhuzvonn diunchi mhunn hanv taka tumchea koddem dhaddttam.

23 Dev zo amcho Bap zaun asa ani Jezu Krist zo amcho Somi zaun asa tanchea koddlean bhav-bhoinnank bhavartha sangata xanti ani mog mellom. 24 Amchea Somi Jezu Kristacho sompona toslo mog kortat tea sogleank Devachi favo nasloli doia mellom.