FILIPKARANK CHITT

1 Krist Jezuche sevok, Paulu ani Timot, Filipint ravtolea Krist Jezuchea ekvottant aslolea soglea Devachea lokank,* ani toxench sobhechi dekhrekh kortoleank ani sobhechea sevokank hi chitt boroitat:

2 Dev, zo amcho Bap zaun asa tachea thaun ani Somi Jezu Krista thaun tumkam favo nasloli doia ani xanti mellom.

3 Tumcho ugddas kortam title-i pavtti hanv Devacho upkar attoitam. 4 Hanv tumchea sogleam pasot sodanch khuxalkaien kallzantlean vinovnneo kortam. 5 Karonn jea disa tumi bori khobor aikoli, tea disa thaun aiz meren tumi bori khobor ximpddaunk zaiti modot kelea ani vavr kela. 6 Jea Devan tumchea modem ek borem kam suru kelam, to tem kam Krist Jezucho dis ieum poriant purnnui kortolo mhunn mhaka khatri asa. 7 Tumchea sogleam vixim hanvem oxem chintop ekdom sarkem zaun asa, karonn tumi mhojea kallzant asat. Hanv bondkhonnint asam tednam ani toxench bori khobor porgottcho hokʼk rakhtana ani kaidea pormonnem maniotai melloun ghetana tumi soglim mhojea sangata favo naslolea doiechim bhagidaram zaleant.

8 Tumkam porot mellonk hanv kitlom axeun asam, hacho Dev mhozo govai zaun asa, karonn Kristak tumchea pasot jitlo mog ani aplemponn asa, titlench mhaka-i asa. 9 Ani hanv hench magnnem korit ravtam, ki khorea gineanan ani somzon gheupachi tank purnn toren uzar korun tumcho mog vaddot vochom, 10 jea vorvim chodd mhotvachem kitem hachi tumi khatri korun gheunk pavtolim. Hachea udexim Kristacho dis ieum meren tumchea modem koslench unnemponn urchem na ani tumi dusreank addkholl zaunchimnant. 11 Ani Devachi mhoima ani vakhannʼnni zaunchi mhunn tumi Jezu Krista vorvim utpon zata tea nitivontponnachea follamnim bhoron voitolim.

12 Bhav-bhoinnimno, khorem mhunnttlear, mhojea atanchea poristhitik lagon, bori khobor ximpddaunk modot zalea mhunn, tumi zannam zalolim mhaka zai. 13 Hanv Krista pasot bondkhonnint asam mhunn Somrazachea soglea Rakhonndarank ani urlolea lokank pasun kollon ailam. 14 Hanv bondkhonnint asam dekhun Somiachea sevent aslolea choddxea bhav-bhoinnank urba mellʼllea, ani atam tim bhienastana anikui dhiran Devachem utor porgott kortat.

15 Hem khorem, ki thodde lok nattkaien ani dusmankaien Krista vixim porgott kortat, punn dusre boro hetu dovrun porgott kortat. 16 Je boro hetu dovrun porgott kortat, te mog asa mhunn Krista vixim porgott kortat. Karonn bore khobre vatten ubo ravonk mhaka nemla mhunn te zannant. 17 Boro hetu dovrun porgott korchea bodlek, zhogddim korpacho hetu dovrun porgott kortat te, hanv bondkhonnint dukhi zauncho mhunn oxem kortat. 18 Punn hacho porinnam kitem zala? Hoch ki, vaitt hetu dovrun porgott korum vo boro hetu dovrun, hea udexim sogle kodden Krista vixim porgottnni zata, ani hachi mhaka khuxalkai bhogta. Khorem mhunnttlear, hanv osoch khuxal zait ravtolom. 19 Karonn tumchea vinovnnek lagon ani Jezu Krista udexim melltta tea povitr xoktechea modotin mhaka taronn mellttolem mhunn hanv zannam. 20 Hanv kallzantlean bhorvonso ani axa dovortam ki mhaka koslich loz bhogunk poddchina. Punn, sodanch zait ailam toxem, atam pasun hanv ukteponnim uloilolean, mhojea udexim* Kristachi mhoima zatoli, magir hanv jivo urom vo morom.

21 Karonn mhojea vixim sangchem zalear, hanv jielom zalear Kristachi seva korit ravtolom, ani melom zalear tem-ui mhojea faideachem zatolem. 22 Hanv hea sonvsarant* jivo asa tea meren, mhojea kamam udexim anikui chodd follam utpon kortolom. Hanv kitem vinchun kaddttolom tem hanv sangona. 23 Hea donui vostu modlem kitem vinchum mhunn hanv chintunk poddlam. Suttka mellon Krista sangata ravonk mhaka zai, karonn tench chodd borem. 24 Punn, tumchea pasot hanvem hea sonvsarant jievop chodd gorjechem. 25 Tumi vaddavoll korchi ani bhavarthant khuxalkai onnbhovchi mhunn hanv jietolom ani tumchea sogleam sangata ravtolom mhunn mhaka khatri asa ani hem hanv zannam. 26 Krist Jezuchim pattlavdaram zalʼlean tumi khuxal asat, ani hanv porot tumchea sangata astolom tednam tumchi khuxalkai bhoron votʼtoli.

27 Fokot itlench ugddas dovrat ki tumchi vagnnuk* Kristachea bore khobrek sobta toxi aschi. Jea udexim hanv tumkam ieun mellom vo na, mhaka tumchea vixim hench aikonk mellchem ki tumi sogle ekech torechem chintop dovrun, ekvottan ghott ube asat ani bore khobrecher bhavarth dovrun sangata mellon vavr korit asat. 28 Ani tumi tumchea virodh korpeank khoincheach toren bhienant. Hoch tanchea pasot nasacho, ani tumchea pasot taronnacho puravo zaun asa ani to Deva thaun asa. 29 Karonn Krista pasot tumkam hi sondhi dilea, ki tumi fokot bhavarth dovorcho itlench nhoi, punn tachea pasot dukh pasun soschem. 30 Karonn mhaka jea toren zhuzonk poddlam tem tumi polloilam ani atam-i hanv jea toren zhuztam tem tumi aikotat. Teach zhuzacho tumi-i fuddo kortat.

2 Kristachea ekvottant, tumi eka-mekak urba diunk sodhtat, mogan bhuzvonn diunk sodhtat, kallji dakhounk sodhtat, eka-mekak aplemponn dakhounk sodhtat ani doia-maia dakhounk sodhtat zalear, 2 tumi ek-sarkem chintop dovrat, tumchea modem ek-sarko mog ani ekvottkai asom, ani tumi eka monachim zaiat. Oxem korun tumi mhaka purnn toren khuxal korat. 3 Zhogoddpachea sobhavan ani gorvan kainch korinakat, punn khaltikaien dusrim tumchea poros vortim mhunn somzat. 4 Dor eklean fokot apleach faidea vixim chintchem nhoi, punn dusreank kitem faideachem zatolem tem-ui chintunk zai.

5 Krist Jezuk aslem toslench chintop ani sobhav tumchea modem asum-di. 6 Deva sarko asonui, tannem kednanch Devacho zago gheunk na, mhunnche, Devachi borabori korunk chintunk pasun na. 7 Tachea bodlek, tannem aplea lagim aslolem soglem soddun dilem* ani eka sevoka sarko zalo. To ek munis zalo. 8 Itlench nhoi, to munis zaun ailo tednam, tannem apnnakuch khalto kelo, ani moro poriant, hoi, trasanchea khambear* moro poriant tannem Devacheo adnea pallʼlleo. 9 Teach pasot, Devan taka poilim poros vhodd podvi diun man dilo ani doiallaien oslem nanv dilem jem soglea nanvam poros vortem asa. 10 Hem tannem sorgar, prithumer ani zomni ponda aslolea* dor eklean Jezuchea nanvan dimi ghalchi, 11 ani Dev zo amcho Bap zaun asa tachi mhoima zaunk dor eklean Jezu Krist hoch Somi mhunn ukteponnim manun gheunchem mhunn kelem.

12 Mhojea mogacheamno, tumi sodanch adnea pallit aileant. Hanv tumchea modem aslom tednam-i tumi adnea pallttalim ani hanv tumchea thaun pois asam tednam tumi anikui khuxalkaien adnea pallttat. Tumi salvar zaunchim mhunn oxinch bhieun ani koddkoddon vavr korit ravat. 13 Karonn Devuch aple khuxe pormonnem tumkam ghott korta. To tumkam donui, mhunnche, itsa dita ani ti itsa purnn korunk xokti-i dita. 14 Soglim kamam gunngunno nastana ani zhogodd nastana korit ravat. 15 Tumi guneanv naslolim, niropradhi, ani Devachim bhurgim koxim zaun uronk, ani vankdde ani vaitt pillge modem khot naslolim zaun uronk oxem korat. Hea pillge modem sonvsarant tumi uzvadd koso porzollttat. 16 Toxench jivitachem utor ghott dhorun ravat. Tednam hanv dhanvlam ani hanvem vavr kela, to funkott vochonk na mhunn zannam zaun hanv Kristachea disa khuxal zatolom. 17 Punn tumi bhavarthak lagon ditat tea bolidanacher ani povitr sevecher* mhaka soreachi bhett koso votoilo zalear pasun, hanv tumchea sogleam sangata khuxal zatam. 18 Hea toren, tumi pasun sontosbhorit zaunk zai ani mhojea sangata tumchi khuxalkai vanttunk zai.

19 Atam hanv bhorvonso dovortam ki Somi Jezuchi khuxi asa zalear hanv beginuch Timotak tumchea lagim dhaddttolom. Hea udexim tumchea vixim aikon mhoji urba vaddttoli. 20 Karonn tachea sarkea sobhavacho mhojea lagim dusro anik konnuch na. To kallzantlean tumchi porva kortolo. 21 Karonn dusre sogle apleach faidea vixim chintʼtat, Jezu Kristachea faidea vixim nhoi. 22 Punn tumi svota tache vixim zannant. Jea toren ek put aplea bapaik modot korta, teach toren bori khobor fuddem vhoronk tannem mhojea sangata khub vavr kela. 23 Taka lagon, hanv bhorvonso dovortam ki mhaka kitem ghoddttolem tem kollttanch, hanv taka tumchea lagim dhaddttolom. 24 Ani Somiachi khuxi asa zalear, hanv pasun beginuch tumchea lagim ietolom mhunn mhaka khatri asa.

25 Punn sodʼdheak hanvem Epafroditusak tumche koddem dhaddop gorjechem oxem mhaka dista. To mhozo bhav, mhojea sangata kam korpi, ek sangati soinik, ani tumi dhaddlolo dut ani toxench mhojea gorzank pavpi sevok zaun asa. 26 To tumkam sogleank mellonk khub axeun asa, ani to duent poddla mhunn tumkam kollʼllem dekhun khub nirax zala. 27 To itlo duent poddlolo ki to moronk pavlolo. Punn Devan tachi kakut keli, ani fokot tachich nhoi punn mhaka eka-fattlean-ek dukh sosunk poddchem nhoi mhunn mhoji-i kakut keli. 28 Dekhun, hanv taka zata titlea begin tumchea lagim dhaddttam, jea udexim taka polloun tumi porot ek pavtt khuxal zatolim ani mhozo usko matso unno zatolo. 29 Taka lagon tumi Somiachea pattlavdarank ieukar ditat tosoch khuxalkaien taka-i ieukar diat, ani oslea bhavank moladik mhunn lekhat. 30 Karonn Kristachea kamam* pasot to moronk pavlolo ani mhoji seva korunk tumi svota hanga ieunk xokonasle dekhun, tumchea zagear ieun seva korunk tannem aplo jiv dhokeant ghatlo.

3 Xevottak, mhojea bhav-bhoinnimno, tumi Somiachea ekvottant asat dekhun khuxal ravat. Tumkam teoch-teoch vostu porot borounk mhaka bejar iena, karonn tanchea udexim tumkanch surokxa mellttoli.

2 Oxudʼdh lokam* thaun chotur ravat, luksonn kortat tanchea thaun chotur ravat, ani je sunot korunk zai mhunn sangtat* tanchea thaun pasun chotur ravat. 3 Khorea orthan sunot kelʼle amich asat, karonn ami Devachea povitr xokten povitr-seva kortat ani Krist Jezun jem kelam tachea vixim boddai martat ani ami kuddicher visvas dovornant. 4 Punn kuddicher visvas dovrunk konnam-i lagim karonn asa zalear, tem mhojea lagim asa.

Zor dusrea konnankui taka tachea kuddicher visvas dovrunk karonn asa oxem dista zalear, mhojea lagim anikui chodd karonnam asat: 5 atthvea disa mhoji sunot zali, hanv Izrael raxttrachea Benjamin kullantlo zaun asa. Hanv ek Hebrev, ani mhojim avoi-bapui pasun Hebrev aslim. Kaideachea* babtint hanv ek Farizev zaun asa. 6 Mhaka itli urba asli, ki hanv sobhek dhumallo ditalom. Devachea kaidea pormonnem nitivont zaunk, hanv tem bariksannen pallttalom. 7 Tori astana, jeo vostu mhojea faideacheo asleo, teo Krista khatir hanvem kainch upeogacheo na oxeo lekhleo.* 8 Itlench nhoi, mhozo Somi Krist Jezuchea mol lavunk zaina toslea gineana mukhar, hanv sogleo vostu kainch upeogacheo nant mhunn lekhtam. Tachea pasot, hanvem soglea vostunchem luksonn sosun ghetlam ani tem kochro oxem somzotam. Hanv Kristak melloun gheunk pavom mhunn oxem korta. 9 Toxench, tachea sangata ekvottant asom mhunn pasun oxem korta. Ani hanv Kaido pallttam dekhun hanv nitivont zatam oxem hanv mhunnona, punn Kristacher bhavarth dovorlolean, Dev mhaka nitivont mhunn lekhta. 10 Kristak ani taka meloleantlo jivont kela tea xoktek vollkhon gheunchem ani Krista sarke dukh-tras bhogche, ani tachea sarkench moronn soschem, hoch mhozo dhei zaun asa. 11 Zankam poilim jivont kortole tanchea modem koxe-i bhaxen hanv aschom mhunn hanvem oxem kelem.

12 Mhaka poilinch inam mellʼlla vo hanv poilinch poripurnn zalam oxem nhoi. Tachea bodlek, Krist Jezun jea pasot mhaka vinchla to inam koxe-i toren melloun gheunk hanv zata titlo proitn korit asam. 13 Bhav-bhoinnimno, mhaka to inam mellʼlla oxem hanv manina. Punn hem mat khorem: Jeo vostu fattim urleat tankam visron, mukhar dovorloleo vostum melloun gheunk hanv mhakach voddun fuddem vhorot asa. 14 Ani Devan mhaka Krist Jezu udexim jem apounnem dilam, tea sorginchea jivitacho inam mellonk hanv zata titlo proitn korit asam. 15 Taka lagon, ami soglim jim bhavarthant ghott asat, amchea modem ekuch torechem chintop ani sobhav ascho, ani tumchem mon dusrea khoinchea-i vatten volltta zalear, sarkem chintop ani sobhav kitem tem Dev tumkam kolloitolo. 16 Ani atam meren, ami jitli vaddavoll kelea teach vatten ami mukhar nitt cholot ravom-ia.

17 Bhav-bhoinnimno, tumi soglim ekvottan mhoji dekh gheun cholat, ani ami tumchea pasot dovorlea, tea dekhi pormonnem choltat tancher dhean diat. 18 Karonn oxe zaite asat zanchea vixim poilim hanv porot-porot uloitalom, punn atam tanchea vixim uloitana mhojea dolleant dukam ietat, karonn te Kristachea trasachea khambeache* dusman zaleat. 19 Xevottak tancho nas zatolo. Tanchem pott tancho dev zaun asa. Jea vostum vixim tankam loz bhogonk zai, tea vixim tankam gorv bhogta, ani tim prithume voilea vostum vixim chintit ravtat. 20 Punn amchem nagrikponn sorga voilem asa, ani sorgar asa tea amchea salvar korpeachi, mhunnche Somi Jezu Kristachi ami axeun vatt polloitat. 21 Tachea koddem sogleo vostu svotachea adhin korpachi xokti asa. Tache he vorte xokten to amchea hea oskot kuddik bodlun aplea kuddi sarki mhoimevont kudd kortolo.

4 Tea pasot, mhojea bhav-bhoinnimno, tumi mhoji khuxalkai ani mhozo mukutt zaun asat. Hanv tumcho khub mog kortam ani tumkam mellonk axetam. Tumi Somiachea ekvottant oxinch ghott ubim ravat.

2 Euodia ani Sintiken, Somiachea ekvottant eka monachim zaunchim mhunn hanv somzaitam. 3 Atam, mhojea sangata purnn kallzan kam kortolea mhojea bhava, hanv tujea lagim pasun vinoti kortam, ki tunvem hea donui bailank adar korit ravcho. Khorench hea bailamnim, Klementi ani heram sangata mhojea borabor bori khobor porgottunk khub vavr kela.* Tanchim sogleanchim nanvam jivitachea pustokar boroilʼlim asat.

4 Somiachea ekvottant sodanch khuxal ravat. Hanv porot ek pavtt sangtam, Khuxal Ravat! 5 Tumi somjikaiechim mhunn sogleank dison ieum-di. Somi ieuncho zalo. 6 Khoincheach karonnak lagon usko korinakat, punn soglea vellar magnnem ani kallzantlean vinovnneo korun ani upkar attoun, Devak tumcheo vinoteo kolloiat. 7 Tednam Devachi xanti ji somzon gheupachea tanki poros vorti asa, ti Krist Jezu udexim tumchea kallzanchi ani tumchea chintnanchi* rakhonn kortoli.

8 Xevottak, bhav-bhoinnimno, jeo vostu khoreo, jeo vostu chintpa sarkeo, jeo vostu niticheo, jeo vostu nirmoll,* jeo vostu lokank mog korunk fuddem kaddttat, jeo vostu manadik, jeo vostu boreo, ani jeo vostu vakhannʼnni korpa sarkeo asat, tea vostuncher dhean di-it ravat.* 9 Jeo vostu tumi mhojea thaun xikleant ani manun ghetleat toxench mhojea thaun aikoleat ani polloileat, teo pallit ravat, ani xanticho Dev tumchea sangata astolo.

10 Atam xevottak, tumkam porot mhoji chintʼta asa hem polloun hanv Somiachea ekvottant khub khuxal zatam. Tumkam poilim pasun mhoji chintʼta asli, punn ti dakhounk tumkam sondhi mellonk na. 11 Mhaka koslea-i vostunchi goroz asa mhunn hanv tumkam hem sangtam oxem nhoi. Karonn hanv koslea-i poristhitint asum, tantunt dhadoxi ravonk hanv xiklam. 12 Thoddeoch vostu asat tednam ani chodd vostu asat tednam koxem jieunchem tem hanv zannam. Soglea vostunt ani soglea poristhitint pottbhor asop ani upaxim asop koxem asta, toxench sogleo vostu astana ani gorjecheo vostu nastana koxem jieunk zai, ho gutt hanv xikonk pavlam. 13 Karonn zo mhaka boll dita tacheach udexim soglea vostunt mhaka xokti melltta.

14 Tori astana, tumi mhojea sonkoxttamnim mhaka adar diun borem kelam. 15 Filipintlea bhav-bhoinnimno, tumi poile pavtt bori khobor aikoli ani hanv Masedonia thaun bhair sorlom tednam, tumkam soddun anik khoinchech sobhen mhaka modot korunk na ani mhojea koddlean modot gheunk na hem tumi zannant. 16 Karonn hanv Tesalonikent aslom tednam, mhojea gorzam khatir tumi ek pavtti nhoi punn don pavtti kitem tori dhaddun dilem. 17 Hanv tumche koddlean ek dennem axetam oxem nhoi. Tachea bodlek, Devache nodren tumchim borim kamam anik vaddlolim mhaka zai. 18 Punn, mhaka goroz asa, teo sogleo vostu mhojea lagim asat, ani bhorpur asat. Atam mhaka kainch unnem na, karonn tumi Epafroditusa koddlean mhaka ek dennem dhaddlam. Hem dennem Devak manvota toslem ani taka khuxal korta toslem ek pormollit bolidan zaun asa. 19 Tachea bodlek, mhozo Dev aplea mhoimechea girestkaien Krist Jezu vorvim tumcheo sogleo gorzo purnn kortolo. 20 Amchea Devachi ani Bapachi mhoima sodam-sodankal zait ravom. Amen.

21 Krist Jezuchea ekvottant aslolea soglea Devachea lokank* mhozo nomoskar. Mhojea sangata aslole bhavui tumkam aplo mog dhaddttat. 22 Sogle Devache lok,* chodd korun je Somrazachea* ghoranneache asat, te tumkam aplo mog dhaddttat.

23 Tumi dakhoitat tea bore urbek lagon Somi Jezu Kristachi favo nasloli doia tumcher asum.