KOLOSKARANK CHITT

1 Hanv Paulu, Devache khuxe pormonnem Krist Jezucho ek apostl, ani amcho bhav Timot, 2 Kristachea ekvottant aslolea Kolosantlea Devachea lokank* ani visvaxi bhav-bhoinnank boroitat:

Dev zo amcho Bap zaun asa tachea thaun tumkam favo nasloli doia ani xanti mellom.

3 Ami tumchea pasot magnnem kortat title-i pavtt Devache, mhunnche amchea Somi Jezu Kristachea Bapache, sodanch upkar attoitat. 4 Karonn Krist Jezucher aslolea tumchea bhavartha vixim ani Devachea lokancho tumkam kitlo mog asa hea vixim ami aikolam. 5 Hem tea bhorvonxea pasot asa zo sorgar tumchea pasot dovorlolo asa. Tumi poile pavtt hea bhorvonxea vixim tumkam sot, mhunnche bori khobor sangloli tednam aikolʼlem, 6 ji tumchea lagim pavloli. Hi bori khobor akʼkhea sonvsarant foll utpon korta ani ximpddot voita. Teach pormonnem, jea disa thaun tumi Devachea favo naslolea doie vixim khoreponnim aikolem ani bariksannen somzon ghetlem, tea disa thaun hi bori khobor tumchea modem pasun foll utpon korun ximpddot asa. 7 Tumi amcho mogall sangati sevok Epafrasa thaun hench xiklolim. To amchea bodlek Kristacho ek visvaxi sevok zaun asa. 8 Povitr xokten tumchea modem mog koso utpon kelo tem tannench amkam sanglem.

9 Takach lagon, jea disa ami tumchea hea moga vixim ani bhavartha vixim aikolem, tea disa thaun tumchea pasot magnnem korop ami bond korunk na. Tumi soglea zannvaien ani povitr xokte udexim melltta tea somjikaie sangata tache khuxe vixim sarkea gineanan bhorchim mhunn ami Deva lagim vinoti korit asat. 10 Jehovachea* sevokank sobta toxem vagon tumi taka purnn toren khuxal korunk pavom. Toxench, tumi dor ek borem kam korun foll utpon korum ani Deva vixim sarkea gineanan vaddot vochom mhunn ami oxem kortat. 11 Ami hem pasun magnnem kortat ki Devan aplem mhoimevont boll uzar korun tumkam xokti diunchi, jea udexim tumi pasiensan ani khuxalkaien soglea vostumnim thir ravonk pavtolim. 12 Toxench, tumkam uzvaddant asat tea Devachea lokam* sangata daizant vantto mellonk purte keleat tea Bapache upkar attoiat.

13 Kallkhachea odhikara thaun suttka diun, to amkam aplea mogall Putachea rajeant gheun ailo. 14 Tachea udexim soddvonn* diun tannem amkam suttka dili, mhunnche amkam patkanchem bhogsonnem dilem. 15 To disonaslolea Devachea rupa sarko asa, ani akʼkhe rochnnent poilo zaun asa. 16 Karonn tacheach udexim sorgar ani prithumer, distat ani disonant tosleo sogleo vostu rochleo, zaum tim xinvasonam vo raz-odhikar, sorkaram vo odhikari. Heo sogleo vostu tacheach udexim ani tacheach pasot rochleo. 17 Toxench, to dusrea soglea vostum poilim aslo, ani tacheach udexim dusreo sogleo vostu ostitvant haddleo. 18 Ani toch, kudd mhunnche sobhecho mukheli zaun asa. To soglea vostunchi survat, ani meloleantlo jivont zaupeam modem poilo zaun asa. Soglea vostumnim to poilo zauncho mhunn oxem zalem. 19 Karonn aple sogle gunn tachea bhitor aslole Devak zai aslem. 20 Krista udexim, mhunnche, tannem trasanchea khambear* jem rogot varoilʼlem tea rogta udexim Dev sogleam sangata xanti kortolo, teo prithume voileo vostu zaum vo sorga voileo.

21 Eka vellar, tumi Deva thaun pois aslim ani tachim dusmanam aslim, karonn tumi fokot noxttea kamam vixinch chintʼtalim. 22 Punn Kristan apli kudd bolidan keli dekhun tachea mornna udexim Devan tumkam aplea favorant haddlim. Tumkam povitr, khot naslolim ani guneanv naslolim korun aplea mukhar haddunk tannem oxem kelem. 23 Punn, tumi bhavarthant ravop ani buniadicher sthaplolim asop ani ghott ravop gorjechem. Toxench, tumi aikolea ani jea vixim akʼkhea sonvsarant porgottnni zalea tea bore khobre thaun melltta to bhorvonso soddun dium nakat. Hanv Paulu, hea bore khobrecho sevok zalam.

24 Hanv atam tumchea pasot dukh sosunk khuxal zatam. Kristachea kuddicho bhag zalʼlean, mhaka dukh soxit ravonk poddttolem mhunn hanv zannam. Hem soglem Kristachea kuddichea, mhunnche, sobhechea borea pasot hanv sostam. 25 Devan mhaka ek sevok zaunchi zobabdari dilea. Tea zobabdare pormonnem hanvem Devachem utor purnn toren porgott korchem mhunn hanv tumchea pasot sobhecho ek sevok zalam. 26 Ho povitr gutt adlea sonvsara* thaun ani pillge thaun lipoun dovorlolo. Punn atam to Devachea lokank* ugddapo kela. 27 Ho mhoimevont ani moladik povitr gutt, videxi lokank porgott korop Devak sarkem dislem. Ho gutt mhunnttlear tumchea sangata ekvottant aslolo Krist, zachea mhoiment vantto gheupacho tumi bhorvonso dovortat. 28 Dor eka munxak Kristachea ekvottant aslolo ani vaddlolo munis koso Deva mukhar haddunk ami Krista vixim porgott kortat. Mhunnche, sogleank zannvaien xikoitat ani somzaitat. 29 Hem kam purnn korunk hanv khub mhenot kortam ani zhuztam. Hem hanv, mhojea bhitor zobordost toren kam korta tea xokte udexinch kortam.

2 Hanv tumchea pasot, Laodisiant asat tanchea pasot ani mhaka azun pollounk na tanchea pasot kitlom zhuztam hem tumi zannam zalʼlim mhaka zai. 2 Hanv hem hea pasot kortam ki tanchea kallzak bhuzvonn mellom ani tim soglim mogan eka-mekak zuddlolim urom. Ani tanchea lagim sarki somzonni asa mhunn purnn khatri dovorlolean melltta ti girestkai tankam mellom. Tednam, tankam Devachea povitr guttachem, mhunnche, Kristachem sarkem ginean mellonk pavtolem. 3 Tacheach modem zannvaieche ani gineanache sogle theve lipoun dovorlole asat. 4 Konnench tumkam bhuloita toslea utramnim fottoina zaunk hem hanv sangtam. 5 Hanv tumchea modem na zalear pasun, monantlean hanv tumchea sangata asam. Tumchea modem bori manddavoll asa ani Kristacher tumcho ghott bhavarth asa tem polloun hanv khuxal zatam.

6 Hea pasot tumi Somi Krist Jezuk manun ghetla, toxench tachea ekvottant cholot ravat. 7 Tumkam xikoilʼlea pormonnem, tachea bhitor zhaddachea mulla sarkim rigat ani vaddot vochat, ani bhavarthant thir ravat. Toxench, tumchea bhitor upkariponnachim bhavnam vaddot ravom.

8 Krista pormonnem nhoi punn munxanchea riti-rivazam pormonnem, ani sonvsarachea totvam pormonnem, toxench tachea zannvaien ani polkea naddbudʼdhen konnuch tumkam fottoina zaunk* chotrai dovrat. 9 Karonn Krist Devachea soglea gunnamnim purnn toren bhorlolo asa. 10 Toch soglea sorkaracho ani odhikaracho mukheli asa, dekhun tachea vorvim tumkam sogleo vostu purnn toren mellʼlleat. 11 Tachea sangata tumcho sombond asa dekhun, tumchi sunot hatamnim kortat toxi zaunk na. Tachea bodlek, tumchi patki kudd kaddun uddoilolean Kristachea sevokanchi zaunk zai toxi tumchi sunot zalea. 12 Tachea sarkea bautizma udexim tumkam-i tachea borabor purle, ani tachea sangata tumcho sombond asa dekhun tumchea bhavartha vorvim tumkam tachea borabor jivontui kele. Karonn taka meloleantlo jivont kela tea Devachea xoktivont kamacher tumkam bhavarth aslo.

13 Itlench nhoi, tumi tumchea patkank lagon melole asle ani sunot korunk naslolea poristhitint asle. Tori astana, Devan tumkam jivont kele ani tachea sangata ek kele. Tannem kakut korun amkam soglea patkam thaun bhogxilim. 14 Zaite kaide asle, ani amchea add aslem tem hatan boroilʼlem kagod tannem pusun uddoilem.* Ani trasanchea khambeacher* khillaun tem kaddun uddoilem. 15 Ani hea trasanchea khambea udexim,* tannem sorkarank ani odhikareank vinglle korun soglea lokam mukhar haddle ani tancher zoit vhelam mhunn dakhoun, tankam koidi koxe aplea fattlean vhele.

16 Tea pasot, tumi kitem khaunchem vo kitem pieunchem vo porob monounchi vo novo chondrimacho dis monouncho vo sabathacho dis monouncho mhunn konnench tumchea pasot tharaunchem nhoi. 17 Heo vostu ieuncheo asat tea vostunchi savlli asli, punn teo Krista udexim purnn zatat. 18 Khaltikaiechem dhong korta ani devdutanchi puza korunk avoddtta toslea khoinchea-i munxak tumi, tumkam mellcho asa tea inama thaun pois korunk diunchem nhoi. “Oslo munis tim dorxonam gheun bosta”* jim polloileant mhunn to dhavo korta. Patki munis chintʼtat toxem chintun to gorvan fulʼla, punn khoreponnim oxem korunk taka kainch karonn na. 19 To munis tea toklek* ghott ritin zuddlolo ravona, ji akʼkhe kuddik goroz tem soglem pavoita, ani kuddichea sandheam udexim ani masa udexim akʼkhe kuddik ektthaim dovorta ani tika Devachea xokten vaddoita.

20 Tumi sonvsarachea totvanchea babtint Krista sangata meleat zalear, porot sonvsarachea lokam bhaxen svotak oslea kaideanche gulam kiteak kortat? Zoxem: 21 “Taka hat lainakat, tem chakonakat, taka tenkonakat.” 22 He kaide oslea vostum vixim asat jeo vaprun kabar zatat. Heo munxamnim xikoilʼleo xikounneo ani kaide zaun asat. 23 He kaide munxank apleak zai toxi bhokti korunk, khaltikaiechem dhong korunk, ani aplea kuddik tras diunk fuddem kaddttat. He kaide zannvaien bhorlole oxem distat astole, punn munxancheo kuddicheo vondovnneo tabeant dovrunk te modot korinant.

3 Punn, tumkam Krista sangata jivont keleant zalear, sorga voileo mhunnche zoim Krist Devachea uzvea vatten bosla thoincheo vostu melloun gheuncho tumi proitn korit ravat. 2 Tumchem dhean prithume voilea vostuncher nhoi, punn sorga voilea vostuncher dovrat. 3 Karonn tumi meleant, ani tumchem jivit Devachea ekvottant aslolea Krista sangata lipoun dovorlolem asa. 4 Krist, zo amchem jivit zaun asa, to ugddapo zatolo tednam, tumkam pasun tachea sangata mhoiment ugddape kortole.

5 Taka lagon, onoitik kuddicho sombond,* mhellemponn, tabo nasloli kuddichea sombondachi vondovnni, vaitt itsa ani as (ji ek torechi murti puza zaun asa), osleo vostu utpon korta toslea prithume voilea tumchea kuddichea sandheank marun uddoiat. 6 Heach vostunk lagon Devacho rag denvon ieta. 7 Tumi pasun poilim oslinch kamam kortalim ani hich tumchea jivitachi chal asli.* 8 Punn atam tumi oslea soglea vostum thaun svotak purnn toren pois dovrat: zoxem krodh, rag, vaittponn, gallio marop ani burxim utram ulovop. 9 Eka-meka lagim fott uloum nakat. Tumchi porni vagnnuk* tichea vaitt sonvoim-am sangata kaddun uddoiat, 10 ani novi vagnnuk ghalat ji Dev dita. Ani tumi tika sarkea gineanan novi korit vochat, jea udexim ti Devachea vagnnuke bhaxen zatoli. 11 Tantunt, Grik vo Judev, sunot zalolo vo sunot zaunk naslolo, videxi vo Sithi,* chakor vo svotontr munis, oso bhedbhav na. Tachea bodlek, Kristuch soglem ani sogleank ekvottlolo asa.

12 Taka lagon, tumkam Devan vinchun kaddleant, ani tumi povitr ani tachim mogachim aslolean, opurbai, doia-maia, doiallai, khaltikai, movallai ani pasiens, he gunn apnnaiat.* 13 Konnui tumkam koxe-i toren dukhoita zalear pasun eka-mekak soxit ravat ani eka-mekak kallzant thaun bhogxit ravat. Jehovan* tumkam kallzant thaun bhogxileant toxem tumi-i bhogsunk zai. 14 Punn, hachea bhair mog dakhoiat,* karonn mog sogleank ekvottan dovorta.

15 Toxench, tumi ekach kuddiche sandhe zaun asat dekhun Kristache xanten tumkam apoileant. Taka lagon, hea xantek tumchea kallzancher raz korunk diat* ani upkariponn dakhoiat. 16 Kristachem utor soglea zannvaie sangata tumchea modem bhorpur promannant asum. Stotram gaun, Devachi vakhannʼnni korun ani upkari kallzan bhoktechim gitam gaun eka-mekak xikoit ravat, urba di-it ravat* ani tumchea kallzant Jehova* pasot gitam gait ravat. 17 Tumi jem kitem uloitat vo kortat, tem soglem Somi Jezuchea nanvan korat, ani tachea udexim Dev zo amcho Bap zaun asa tache upkar attoiat.

18 Bailamno, Somiachea pattlavdarank sobta toxem, tumchea ghovanchea adhin ravat. 19 Ghovamno, tumchea bailecho mog korit ravat ani tancher chodduch ragar zainakat.* 20 Bhurgeamno, soglea vostumnim tumchea avoi-bapaichi adnea pallat, karonn oxem kelʼlean Somi khuxal zata. 21 Bapaimno, tumchea bhurgeank rag haddinakat,* na zalear tim niraxi zatolim.* 22 Chakramno, soglea babtint sonvsarant aslolea tumchea dhonianchi adnea pallat. Munxank khuxal korunk, fokot te polloitat tednanch nhoi, punn kallzachea promannikponnan ani Jehovachi* bhirant dovrun oxem korat. 23 Tumi jem kitem kortat, tem munxam pasot nhoi, punn Jehova* pasot mhunn somzon purnn kallzan korat. 24 Karonn Jehova* koddleanuch tumkam ek inam koso, daiz mellttolem mhunn tumi zannant. Amchea Dhoniache, mhunnche Kristache chakor zaun tachi seva korat. 25 Zo vaitt kam korta taka tannem kelʼlea vaitt kamachem foll mellttolench, ani hea vixim kosloch bhedbhav zaunchona.

4 Dhoniamno, tumchea chakram thaim nitivontponnan ani promannikponnan vagat, karonn sorgar tumcho-i ek Dhoni asa mhunn tumi zannant.

2 Magnnem korit ravat, ani hea vixim zagrut ravat ani upkar attoiat. 3 Devachem utor porgottunk ani Krista vixim povitr gutt sangonk Devan amchea pasot ek dar ugoddchem mhunn amchea pasotui magnnem korat, karonn heach khatir hanv bondkhonnint asam. 4 Hanvem somzaunk zai toxem, spoxtt ritin hanv somzaunk pavom mhunn pasun magnnem korat.

5 Tumchea vellacho boro upeog korun,* bhailea lokam modem zannvaien vagat. 6 Tumchim utram sodanch mogall ani mittan ruchichim kelʼlea sarkim asum-di. Oxem kelʼlean, dor ekleak koxi zap diunk zai tem tumkam kollttolem.

7 Mhozo mogacho bhav ani Somiachea ekvottant visvaxi sevok ani sangati chakor Tikikus, tumkam mhojea vixim sogli khobor sangtolo. 8 Ami koxe asat hem tumi zannam zaunchem mhunn ani tannem tumchea kallzank bhuzvonn diunchi mhunn hanv taka tumchea lagim dhaddttam. 9 Tachea sangata hanv mhozo visvaxi ani mogacho bhav Onesimusak dhaddttam, zo tumchea modloch asa. Te dogui hanga kitem ghoddtta tem soglem tumkam sangtole.

10 Aristarkus, zo mhojea sangata bondkhonnint asa, to tumkam mog dhaddtta. Ani Marku, zo Barnabasacho soiro lagta to-ui tumkam mog dhaddtta. (to tumchea lagim ailo zalear tumi taka ieukar diuncho mhunn tachea vixim tumkam suchounneo mellʼllolleo), 11 ani Jezu zaka Justus mhunnttat, to-ui tumkam mog dhaddtta. He sunot kelʼlea lokam modle asat. Fokot hech Devachea Rajea khatir mhojea sangata kam korpi zaun asat ani tanchea udexim mhaka khub bhuzvonn mellʼllea.* 12 Tumchea modlo Krist Jezucho sevok Epafras, tumkam mog dhaddtta. Xevottak, tumi vaddlolea munxam bhaxen ghott ubim ravchim ani Devachea khuxe vixim tumchi khatri ghott zaunchi mhunn, to sodanch tumchea khatir purnn kallzan magnnem korit asta. 13 To tumchea khatir, ani jim Laodisia ani Hierapolisant asat tanchea khatir khub vavr korta mhunn hanv tacho govai zaun asa.

14 Amcho mogall bhav dotor Lukas, tumkam mog dhaddtta, tosoch Demasui dhaddtta. 15 Laodisiantlea bhav-bhoinnank, bhoinn Nimfak ani toxench tichea ghorant ektthaim zata te sobhek mhozo nomoskar. 16 Hi chitt tumchea modem vachlea uprant ti Laodisiachea sobhentui vachunk manddavoll korat, ani Laodisia thaun ailoli chitt tumi-i vachat. 17 Toxench, Arkipusak sangat: “Somiacho pattlavdar zalʼlean ji seva tunvem manun ghetlea, ti purnn korunk dhean di.”

18 Hanv Paulu, mhojea hatamnim boroun tumkam nomoskar mhunnttam. Hanv bondkhonnint sanklleamnim bandlolom asa mhunn ugddas dovrat. Devachi favo nasloli doia tumcher sodanch urom.