TESALONIKEKARANK POILI CHITT

1 Dev zo amcho Bap zaun asa, tachea ani Somi Jezu Kristachea ekvottant aslolea Tesalonikekaranche sobhek Paulu, Silvanus,* ani Timot hi chitt boroitat:

Tumkam Devachi favo nasloli doia ani xanti mellom.

2 Tumchea pasot ami amchea magnneant magtat tednam sodanch Devache upkar attoitat. 3 Tumi koxe visvaxi ravon seva kortat, mogan vavr kortat ani amcho Somi Jezu Kristacher bhorvonso asa dekhun koxe sosnikai dakhoitat, tacho ami amchea Devachea ani Bapachea mukhar sodanch ugddas kortat. 4 Karonn bhav-bhoinnimno, tumi Devachim mogachim zaun asat ani tumkam Devan vinchun kaddleant mhunn ami zannant. 5 Tor, ami tumkam porgott kelea ti bori khobor fokot utramnim uloun sangonk nasli punn ti bollan, povitr xokten ani purnn khatren tumkam dilʼli. Ami tumchea sangata asle tednam tumchea pasot ami koxem kam kelam tem tumkam khobor asa. 6 Tumi zaitea sonkoxttancho fuddo korun povitr xokte thaun melltta tea khuxalkaien utor apnnailem, ani tumi amchea ani Somiachea dekhi pormonnem cholpi zalim. 7 Hea toren, tumi Masedoniantlea ani Akaiantlea soglea bhavartheank ek udharonn zalim.

8 Khorem mhunnttlear, tumkam lagon Jehovachem* utor fokot akʼkhea Masedoniachea ani Akaiachea lokankuch aikonk mellʼllem oxem nhoi, punn tumchea bhavartha vixim soglea zagear uloitat. Tor amkam anik kainch sangchi goroz poddona. 9 Karonn thoinche lok svotach sangtat ki koxe toren ami tumkam poilech pavtt mellʼlle ani koxe toren tumi tumchea murteank soddun diun, jivea ani khorea Devachi bhokti korunk tachea vatten vollʼlle. 10 Toxench, Devan meloleantlo jivont kela ani tacho ieuncho asa tea raga thaun amkam vachoitolo, tea tachea Putachi, mhunnche Jezuchi sorgar thaun ieunchi vatt pollounk pasun tachea vatten vollʼlle.

2 Bhav-bhoinnimno, ami tumkam mellonk ailʼle tem kainch upeogachem na oxem zaunk na mhunn tumi zannant. 2 Survatek, Filipi xarant amkam khub dhumallo dilo ani amchea sangata vaitt toren vagle. Punn itlo dhumallo asonui* tumkam Deva vixim bori khobor sangonk ami amchea Devachea modotin dhir ghetlo mhunn tumkam khobor asa. 3 Ami tumkam xikoitat ti xikounn khotteponnacher adarit na vo ami vaitt hetu dovrun vo tumkam fosounk xikoinant. 4 Punn Devan ami hea kamank purte asat mhunn lekhun amkam bori khobor sangpachi zobabdari dili dekhun ami munxank nhoi, punn kallzam topasta tea Devak khuxal korunk porgott kortat.

5 Ami kednanch godd-godd utram uloun tumkam fottounk na, vo amchi as purnn korpachea hetun dhongeponn korunk na mhunn tumi zannant. Dev hacho govai zaun asa! 6 Toxench, Kristache apostl zalʼlean ami zai zalear tumkam khorch korunk lavun tumcher vojem ghalunk zatalem. Tori astana, ami munxam koddlean, mhunnche tumche koddlean vo dusream koddlean kednanch vakhannʼnni melloun gheuncho proitn korunk na. 7 Tachea bodlek, zoxi ek dudh dita ti avoi aplea dhakttea bhurgeachi mogan kallji gheta,* toxe ami tumchea sangata khub movallaien vagle. 8 Tumi amkam itlim opurbaiechim aslim ki ami tumkam fokot Devachi bori khobor porgottli itlench nhoi, punn amcho jiv pasun tumchea pasot diunk ami toiar asle. Karonn tumi amkam khub mogachim zalʼlim.

9 Bhav-bhoinnimno, ami zo vavr kela ani gham golloun koxtt keleat tem tumkam ugddas astolench. Ami tumkam Devachi bori khobor porgottli tednam tumchea modlea konnakuch khorch korunk lavun, tumcher vojem ghalchem nhoi mhunn ami dis-rat kam kelem. 10 Tumchea sangata mhunnche, bhavarth dovortoleam sangata, ami vagtana kitle visvaxi, nitivont ani niropradhi asle hea vixim tumi ani tosoch Dev pasun govai zaun asa. 11 Ek bapui aplea bhurgeank dita toso, ami tumchea modlea dor ekleak urba, bhuzvonn ani xittkaunni di-it ravle mhunn tumkam bore bhaxen khobor asa. 12 Zannem tumkam aplea Rajeant ani aple mhoiment bhagidar zaunk apoileant, tea Devachea nodrent tumchi vagnnuk sarki urchi mhunn ami oxem kelem.

13 Tea pasot, ami Devache upkar attovop bond korinant, karonn tumi amchea koddlean Devachem utor aikolem tednam tem munxanchem nhoi, punn Devachem utor mhunn somzon manun ghetlem. Ani tem khorench Devachem utor zaun asa, ani tem utor tumcher mhunnche, bhavarth dovortoleancher probhav ghalta. 14 Bhav-bhoinnimno, tumi Judeiant, Krist Jezuchea ekvottant aslolea Devachea sobhechi dekh gheun cholʼlim. Je tras te Judev lokam thaun sostat toslech tras tumi tumchea desantlea lokam thaun sostat. 15 Tea Judevamnim Somi Jezuk ani provadeank pasun marun uddoile, ani tannim amkam-i dhumallo dilo. Toxench, te Devachi khuxi korinant, punn soglea munxanchea add kam kortat. 16 Dusrea raxttrantlea lokank taronn mellonk ami tankam bori khobor sangonk sodhtat tednam te amkam addaitat. Oxem korun te sodanch aplem patok vaddoitat. Punn atam tancher Devacho rag pettpacho vell ailo.

17 Bhav-bhoinnimno, thoddea vella pasot ami tumchea thaun veglle zale tednam (tumi amchea thaun pois asle khore, punn amchea kallzant asle), tumkam mellonk* amkam khub itsa asli, tea pasot ami tumchea lagim ieunk zata titlo proitn kelo. 18 Heach karonnak lagon ami, hoi, hanvem Paulun, don pavtti tumchea lagim ieunk proitn kelo. Punn Soitan amchea vatter add ailo. 19 Amcho Somi Jezu hajir asa* tea vellar, amcho bhorvonso vo khuxalkai vo zoitacho mukutt konn kai? Tuminch nhoi? 20 Khorench, tuminch amchi mhoima ani khuxalkai.

3 Tor amchean anik ravonk zaina zalem tednam ami Athenatuch ravlear borem zatolem oxem amkam dislem. 2 Ani Kristachi bori khobor porgottpi Devacho sevok ani amcho bhav Timotak, ami tumchea lagim dhaddlo. Tumkam bhavarthant ghott korunk ani bhuzvonn diunk, 3 toxench hea sonkoxttank lagon tumchea modlea konnanchoch bhavarth halcho nhoi mhunn ami oxem kelem. Karonn osle tras ami sosunkuch zai mhunn tumi tor zannant. 4 Ami tumchea sangata asle tednam amkam sonkoxttancho fuddo korchoch poddttolo mhunn ami tumkam sangtale, ani toxench zalem mhunn tumi zannant. 5 Dekhun, mhojea lagim sosunk zaina zalem tednam, tumchea visvaxiponna vixim zannam zaunk, hanvem Timotak tumchea lagim dhaddlo. Karonn Fuslavpean tumkam fuslailam zait, ani amcho vavr nirfoll zala zait mhunn mhaka bhirant asli.

6 Punn Timot atanch tumchea thoim thaun amchea lagim aila ani tannem amkam tumchea visvaxiponna vixim ani moga vixim bori khobor dilea. Tumi amcho khub ugddas kortat ani zoxem ami tumkam pollounk axeun ravleat toxench tumi amkam pollounk axeleat mhunn pasun tannem amkam sanglem. 7 Taka lagon, bhav-bhoinnimno, ami zaitea trasancho* ani sonkoxttancho fuddo kortat zalear pasun, tumchea vixim ani tumchea visvaxiponna vixim aikon amkam zaiti bhuzvonn mellʼllea. 8 Tumi Somiachea ekvottant thir ubim asat hem amkam kollʼllea uprant amkam novean urba mellʼlli.* 9 Tumkam lagon amkam Deva mukhar kallzantlean khuxalkai bhoglea tea vixim ami Devache upkar koxe mhunn attounche? 10 Amkam koxe-i bhaxen tumkam* pollounk mellchem ani tumchea bhavarthant jem unnemponn asa tem amkam bhorun kaddunk mellchem mhunn ami dis-rat Deva lagim kallzantlean vinovnneo kortat.

11 Amchea Devan ani Bapan ani toxench Somi Jezun amkam tumchea lagim ieunk vatt ukti korchi mhunn ami magnnem kortat. 12 Tea bhair, Somi tumkam vaddoit ravom, ani zoso ami tumcho khub mog kortat tosoch eka-meka pasot ani sogleam pasot tumcho mog vaddot vochom mhunn pasun ami magnnem kortat. 13 Amcho Somi Jezu, Devachea soglea lokam* sangata hajir asa* tea vellar amchea Devachea ani Bapachea mukhar to tumchim kallzam ghott korum, ani tumkam povitr ani guneanv naslolim tharaum mhunn ami oxem kortat.

4 Xevottak, bhav-bhoinnimno, Devak khuxal korunk tumi koxem vagonk zai hem ami tumkam xikoilʼlem, ani tumi toxench vagtat. Oxem tumi anikui purnn toren korit ravat mhunn ami Somi Jezuchea nanvan tumchea lagim vinoti kortat ani urba ditat. 2 Karonn Somi Jezu udexim ami tumkam kitem suchounneo dilʼleo teo* tumi zannant.

3 Tumi povitr ravchem ani onoitik kuddichea sombonda* thaun pois ravchem mhunn Devachi khuxi zaun asa. 4 Tumchea modlea dor eklean povitrtaien ani manan aplea kuddicher* tabo dovrunk zannam zaunk zai. 5 Devak vollkhonant toslea videxi raxttrantlea lokam sarkim tumi axechea ani tabeant uronant toslea kuddichea sombondachea vondovnneam fattlean voichem nhoi. 6 Konnench hea babtint aplea xime bhair voichem nhoi ani aplea bhavacho faido kaddcho nhoi. Karonn Jehova* hea soglea kamam pasot khast dilea bogor ravchona. Hea vixim ami tumkam adinch sanglolem ani khor xittkaunni dilʼli. 7 Karonn Devan amkam oxudʼdh zaunk nhoi, punn povitr zaunk apoileant. 8 Tea pasot, zo munis hem nakarta, to khoinchea-i munxak nhoi punn povitr xokti dita tea Devak nakarta.

9 Punn, bhavam modem asta toslo mog korchea babtint, ami tumkam kainch boroupachi goroz na, karonn Devanuch tumkam eka-mekacho mog korunk xikoileant. 10 Akʼkhea Masedoniantlea soglea bhav-bhoinnank tumi mog dakhoitat. Punn bhav-bhoinnimno, ami tumkam oxem anikui chodd promannan korchem mhunn urba ditat. 11 Ani ami tumkam xikoilʼlem toxem, tumi xantin jivit jietolim, dusreanchea kamant modem poddchimnant ani tumchea hatamnim kam kortolim mhunn dhei dovrat. 12 Tumi bhailea lokanchea nodren sarke toren cholchim ani tumkam koslich goroz poddchi nhoi mhunn oxem korat.

13 Tea bhair, bhav-bhoinnimno, mornnachea nhident nhidleant tancho fuddar kitem astolo, tea vixim tumi zannam zalʼlim amkam zai. Hea udexim kainch bhorvonso na tea lokam bhaxen tumi dukh korchimnant. 14 Karonn Jezu melo ani taka jivont kelo mhunn amkam bhavarth asa zalear, Jezuchea ekvottant jim mornnachea nhident nhidleant tankam Dev, Jezu udexim jivont kortolo mhunn pasun amkam bhavarth asa. 15 Amchea modlim, Somi hajir asa* tea kallar jietat tim, mornnache nhident nhidleant tanchea poilim koxinch jivont zaunchimnant mhunn Jehovachea* utrantlean ami tumkam sangtat. 16 Karonn Somi svota mukhel devdutachea zobordost avazan ulo marun sorgar thaun denvtolo, ani Devachi turturi vaztoli, ani jim Kristachea ekvottant meleant tim poilim jivont zatolim. 17 Tea uprant, ami jim jivim asat ani salvar zaleant tim Somiak mellonk mollbar, tanchea sangata kupamnim voir voitolim. Hea toren ami sodankal Somia sangata astolim. 18 Tea pasot hea utramnim eka-mekak bhuzvonn di-it ravat.

5 Atam bhav-bhoinnimno, heo vostu kednam ghoddttoleo tea kalla vixim ani vella vixim, ami tumkam kitench borounchi goroz na. 2 Karonn chor ratchea vellar ieta tosoch Jehovacho* dis ieta mhunn tumi bore bhaxen zannant. 3 “Soglim xantin ani surokxotaien asat!” oxem mhunnttat tednam, eke gorbhest bailek zoxe okosmat ballontiniche vollvolle suru zatat, teach toren tancher okosmat nas ietolo, ani tantuntlean te koxech salvar zaunk xokchenant. 4 Punn bhav-bhoinnimno, disacho uzvadd choracher okosmat ieta toso to dis tumcher ieunk tumi kallkhant nant. 5 Karonn tumi soglim uzvaddachim munxam ani disachim munxam zaun asat. Ami tor ratchim-i nhoi ani kallkhachim-i nhoi.

6 Tor, ami dusream bhaxen nhident ravchem nhoi. Tachea bodlek, zagrut ravom-ia ani amchi chintpachi tank samballum-ia. 7 Karonn je nhidtat, te ratchea vellar nhidtat, ani je pieun ttaitt zatat te ratchea vellar ttaitt zatat. 8 Punn ami jim uzvaddant* asat, ami amchi chintpachi tank samballum-ia ani bhavarthachem ani mogachem chhatichem kottʼttem, ani soddvonnechea bhorvonxeachem helmet ghalum-ia. 9 Karonn Devan amkam aplo rag sosunk nhoi, punn amkam amchea Somi Jezu Krista udexim taronn mellonk vinchleant. 10 Ami jivim asum vo mornnache nhident nhidom, ami tachea sangata jieunchim mhunn Krist amchea pasot melo. 11 Tor, tumi eka-mekak urba* di-it asat ani eka-mekak ghottai di-it asat, toxinch fuddem-i di-it ravat.

12 Atam bhav-bhoinnimno, tumchea modem khub vavr kortat ani Somiache sevent tumkam margdorxon ditat ani tumkam xikoitat tankam man diat mhunn ami tumchea lagim vinoti kortat. 13 Ani tanchea kamank lagon mogan tankam anik chodd man diat. Eka-meka sangata xantin ravat. 14 Toxench, bhav-bhoinnimno, xistin vagonant tankam xittkaunni diat,* niraxi zaleant tankam tumchea utramnim bhuzvonn diat, oskot asat tankam adar diat, ani sogleam sangata pasiensan vagat mhunn ami tumkam urba ditat. 15 Konnench konnankui vaittak-vaitt farik korina zaunk chotrai dhorat. Punn tumi sodanch eka-mekak ani dusream sogleank borem korit ravat.

16 Sodanch khuxal ravat. 17 Magnnem korit ravat. 18 Soglea vostum pasot upkar attoiat. Krist Jezu udexim tumchea pasot Devachi hich khuxi zaun asa. 19 Povitr xoktecho uzo paloinakat. 20 Bhasaunneo kainch valoracheo na oxem lekhinakat. 21 Soglea vostunchi khatri korun gheiat. Jem borem asa taka ghott dhorun ravat. 22 Soglea torechea noxtteponna thaun pois ravat.

23 Xantichea Devan tumkam purnn toren povitr korum. Ani bhav-bhoinnimno tumchem kalliz, jivit* ani kudd, amcho Somi Jezu Krist hajir asa* tea vellar, guneanv nasloli ani sogle ritin bori urom. 24 Tumkam apoita to visvaxi, ani to oxem kortoloch.

25 Bhav-bhoinnimno, amchea pasot magnnem korit ravat.

26 Soglea bhav-bhoinnank povitr umo diun nomoskar korat.

27 Hi chitt soglea bhav-bhoinnank vachun dakhounchi mhunn hanv Somiachea nanvan tumkam zobabdari ditam.

28 Amcho Somi Jezu Kristachi favo nasloli doia tumcher asom.