TIMOTAK POILI CHITT

1 Amcho Taronn diupi Dev ani amcho bhorvonso zaun asa to Krist Jezu, hanchea adnea pormonnem, Krist Jezucho ek apostl, Paulu koddlean 2 bhavarthant mhozo khoro put zaun aslolea mogachea Timotak:*

Dev zo amcho Bap zaun asa tachea thaun ani amcho Somi Krist Jezu thaun tuka favo nasloli doia, kakut ani xanti mellom.

3 Hanv Masedoniak vochpacho aslom tednam hanvem tuka Efezantuch ravonk urba dili. Atam hanv tuka sangtam ki thoim thodde zann je veglle torechi xikounn xikoitat tankam oxem korchem nhoi mhunn adnea di. 4 Toxench, khottea kanneancher ani vonxavollincher dhean diunchem nhoi mhunn pasun adnea di. Tanchea thaun kainch faido zaina. Punn teo goroz naslole prosn ube kortat ani bhavarth vaddounk xokta toslea Devachea manddavolli pormonnem na. 5 Khorem mhunnttlear, ami nitoll kallzan, nitoll ontoskornnan ani dhongeponn naslolea bhavarthan mog dakhouncho hoch hea suchounnecho* udʼdhex zaun asa. 6 Hea vostum thaun pois vochon thodde zann orth naslolea vostum vixim ulounk lagleat. 7 Tankam kaideache xikxok zaunk zai, punn jea vostum vixim te uloitat ani jeo vostu sarkeo mhunn te xikoitat, teo tankanch somzonant.

8 Kaido sarkea toren apnnailo zalear to boro mhunn ami zannant. 9 Ugddas dovrat, kaido nitivont munxak lagon nhoi, punn osleank lagon dilʼlo je noxtteponn kortat, konnanchea-i add voitat, Devachi bhirant dhorinant, patki asat, ovisvaxi asat,* povitr vostu kainch valoracheo na mhunn lekhtat, bapaik ani avoik jivexim martat, khun kortat, 10 onoitik kuddicho sombond dovortat,* dadle dadleam sangata kuddicho sombond dovortat, kiddnep kortat, khotteponn kortat, utor samballnant* ani boreak* poddtta toslea xikounnechea add dusrem soglem kam kortat. 11 Hi xikounn khuxal Devachea tea mhoimevont bore khobrechea adarit asa, ji porgottpachi zobabdari mhaka dilea.

12 Mhaka xokti dilea tea amchea Somi Krist Jezucho hanv upkar attoitam, karonn tannem mhaka visvaxi mhunn somzon apli seva korunk nemla. 13 Khorem mhunnttlear, poilim hanv Devachea add uloupi, tachea lokank dhumallo diupi ani tanchea vixim vaitt uloupi munis aslom. Tori astana, Devan mhoji kakut keli. Karonn hanvem hem soglem nokllo astana ani bhavarth naslo dekhun kelem. 14 Punn amchea Dhonian mhaka bhorpur favo nasloli doia dakhoili ani mhaka Krist Jezu koddlean bhavarth ani mog mellʼllo. 15 Hacher visvas dovrunk zata ani hem purnn toren manun gheunk zata ki Krist Jezu patkeank salvar korunk hea sonvsarant ailo, ani tea patkeam modem sogleant vhoddlo patki hanv. 16 Tori astana, mhaka doia dakhoili. Hanv zo sogleant vhoddlo patki zaun asa, mhojea udexim Krist Jezun apunn kitlo pasiens dakhoita tem dakhounk ani sasnachem jivit melloun gheunk je tacher visvas dovortat tanchea pasot hanv ek udharonn zauncho mhunn tannem oxem kelem.

17 Atam, sasnachea Razak, zo sodankal jieta ani dixtti poddona, ani zo ekloch Dev zaun asa, taka man ani mhoima mellom sodam-sodankal. Amen.

18 Timot mhojea puta, tujea vixim jeo bhasaunneo kelʼleo, teo monant dovrun hanv tuka hi suchounni* ditam ki tunvem tea pormonnem bore toren zhuz korchem. 19 Toxench, tuzo bhavarth ani nitoll ontoskornn samballun dovor. Karonn thoddeamnim tem nakarlam, ani taka lagon tanchea bhavarthachem tarum futton nas zalam. 20 Tanchea modem Himeneus ani Aleksandr asat, ani hanvem tankam Soitanachea hatant soddleat. Hea toren, khast mellʼllolean tannim Devachea add ulounchem nhoi mhunn tankam kollon ietolem.

2 Tea pasot, sogleant poilim, hanv tumkam urba ditam ki tumi soglea torechea lokam pasot kallzantlean vinovnneo, magnnim, vinoteo ani upkar attounk magnnim korchim. 2 Ami Devacher purnn visvas dovrun, utsuktaien ani xantin jivit jieunchem mhunn razam khatir ani unch podvi aslolea* sogleam munxam khatir magnnem korat. 3 Amkam Taronn diupi Devachea nodren hem khub borem zaun asa ani taka tem manvota. 4 Sogle toreche lok salvar zaunche ani tankam sotachem khorem ginean mellchem hich tachi khuxi zaun asa. 5 Dev ekuch, ani Deva ani munxam modem korar korunk fokot ekuch modesti asa, to mhunnttlear, Krist Jezu. 6 Soddvonnechem sarkem mol farik korunk tannem sogleam pasot* aplo jiv bolidan kelo ani hachea vixim lok sarkea vellar govai ditole. 7 Hich govai diunk mhaka porgottnnar ani apostl mhunn nemla. Hanv sot sangtam, fott uloina. Videxi raxttrantlea lokank bhavartha vixim ani sota vixim xikounk mhaka xikxok mhunn nemla.

8 Tor, dor eka zagear dadleamnim Devak visvaxi ravon, aple hat voir korun magnnem korit ravchem mhunn mhoji itsa asa. Tannim ragar zaunchem nhoi, ani vad-vivad korcho nhoi. 9 Teach toren, bailamnim moriadin ani sarkem chintop dovrun* man haddtta tosle kopdde ghalunk zai. Tannim khas toreche kens korun ani bhangar vo motiam vo khubuch mharog kopdde ghalun nhoi, 10 punn Devachi bhokti korpi bailank sobta tea toren, borim kamam korun apli sobitkai vaddounchi.

11 Eke bailen purnn toren adhin ravon xantponnim xikchem. 12 Hanv bailek, xikounk vo dadleacher odhikar cholounk porvangi dina. Tachea bodlek, tinnem xant ravonk zai. 13 Karonn, Adanvak poilo rochlolo, ani tachea uprant Evek rochloli. 14 Toxench, Adanvak fosounk naslo, punn bail purnn toren fosli ani guneanvkari zali. 15 Bhurgeank zolmak haddlolean ek bail surokxit urtoli, punn tinnem* aplo bhavarth, mog, povitrtai ani sarkem chintop dovrop* gorjechem zaun asa.

3 Him utram visvas dovorpa sarkim asat: Ek munis dekhrekh korpachea kamank purto zaunk fuddem sorta zalear to ek borem kam korunk khuxi dakhoita. 2 Eka dekhrekh korpeacher kosloch arop lailʼlo asonk zaina. Taka ekuch bail asonk zai, to aplea sonvoim-ancher tabo dovorpi, sarkem chintop dovorpi,* kaidea pormonnem cholpi, lokank mogan ieukar diupi, ani xikounk purto asonk zai. 3 To bebdikai korpi vo maramari korpi asonk zaina, punn somjikaiecho asonk zai. To zhogddim korpi vo poixeancho mog korpi asonk zaina. 4 To aplea familicho bore toren samball* korpi asonk zai. Tachim bhurgim adnea pallttat toslim ani borea vagnnukechim asonk zai. 5 (Karonn ek munis aplea familicho samball korunk nokllo zalear, to Devachea sobhechi kallji koso ghetolo?) 6 To gorvan fulona zaunk ani Soitanak* ji khast favo zalea ti taka favo zaina zaunk, to novoch sotant ailʼlo asonk zaina. 7 Titlench nhoi, bhailea lokamnim pasun tachea vixim borem ulounk zai,* jea udexim tachem nanv piddʼddear zaunchem na* ani to Soitanachea* fasant poddchona.

8 Teach bhaxen, sobheche sevok apli zobabdari bore toren samballpi munis asonk zai. Te don tonddache,* chodd soro pietat tosle ani fottingponnan poixe zoddpachea axeche asonk favona. 9 Te nitoll ontoskornna sangata povitr gutt, mhunnche, bhavarth samballun dovortat tosle asonk zai.

10 Toxench, te purte asat vo na tem poilim topasunk zai. Uprant te guneanva meklle mellttat tednam tankam sevok mhunn kam diunk zata.

11 Teach bhaxen, bailo apli zobabdari bore toren samballpi asonk zai. Tim dusreanchem nanv piddʼddear kortat toslim asonk favona, punn aplea sonvoim-ancher tabo dovortat toslim, ani soglea vostumnim visvaxi asonk zai.

12 Sobhechea sevokak ekuch bail asonk zai, ani to aplea bhurgeank ani familik borea bhaxen samballtta toslo asonk zai. 13 Karonn je bore toren seva kortat te borem nanv zoddttat ani tankam Krist Jezucher aslolea bhavartha vixim te fattim-fuddem zainastana dhiran ulounk xoktat.

14 Khorem mhunnttlear, hanv tujea lagim beginuch pavtolom mhunn hanv bhorvonso dovortam. Tori astana, hanv heo vostu tuka boroitam. 15 Punn mhaka ieunk vell zalo zalear pasun Devachea ghorabeant tunvem koxem vagonk zai tem tuka khobor astoli. Ho ghorabo jivea Devachi sobha zaun asa ani sotacho khambo ani buniad zaun asa. 16 Khorench, Devachea bhoktecho ho povitr gutt ekdom vorto zaun asa: ‘Jezu hadda-masachea kuddint dixtti poddlo, ani taka disona tosli kudd diun nitivont mhunn lekhlo, to devdutank dixtti poddlo, dusrea raxttram modem tachea vixim porgottnni zali, sonvsarant tacher visvas dovorlo ani taka mhoima diun sorgar ubarun vhelo.’

4 Devachea preronnan boroilʼlea utrant hem poilinch spoxttponnim sanglolem ki uprant oxe dis ietole jednam lok, Deva thaun ieta mhunn somzon khottea sondexacher ani noxttea dutanchea xikounneancher dhean diun bhavarth soddun ditole. 2 Tapoilolea lokhnnacho butt diun zoxi kat nibor zata, toxem zanchem ontoskornn nibor zalam, toslea dhongi munxancheo khotteo khobro te manun ghetole. 3 Te kazar zaunk diunchenant ani lokank thoddeo vostu khauncheo nhoi mhunn adnea ditole. Punn bhavarth aslolea ani sot khoreponnim zannam aslolea lokamnim heo vostu upkar attoun khaunk zatat mhunn Devan teo rochloleo. 4 Devan rochloli dor ek vost ekdom bori asa, ani upkar attoun khalear khoinchich vost nakarpa sarki na. 5 Karonn Devachea utra udexim ani magnnea udexim ti vost povitr zata.

6 Bhav-bhoinnank ho solʼlo dilolean, tum Krist Jezucho ek boro sevok zaunk pavtolo. Ani tum dhean diun cholot aila tea bhavarthachea utram udexim ani tea vortea xikxonna udexim tuka ghottai mellttoli. 7 Punn zanntteo bailo sangtat tosleo, Devachea add asat teo khotteo kanneo nakar. Tachea bodlek, Devachi bhokti korunk tuzo dhei dovrun tukach proxikxonn di-it rav. 8 Karonn kuddik dita tem proxikxonn fokot thoddeach promannan faideachem asta, punn Devachi bhokti soglea vostumnim faideachi asta. Karonn ti aiz ani fuddarak amkam jivit diupachi bhas dita. 9 Hacher bhorvonso dovrunk zata ani hem purnn toren manun gheunk zata. 10 Haka lagon, ami khub mhenot kortat ani zhuztat, karonn ami eka jivea Devacher bhorvonso dovorla. To soglea torechea lokank taronn dita, chodd korun visvas dovortat tankam.

11 Heo adnea di-it rav ani xikoit rav. 12 Tuje torne piraiek lagon konnench tuka valoracho nhoi mhunn lekhina zaunk kallji ghe. Punn tujea utramnim, vagnnuken, mogan, bhavarthan ani nirmollponnan* visvaxi lokam pasot ek udharonn dovor. 13 Hanv ieum poriant lokam mukhar vachun dakhounk, tankam urba diunk ani xikounk tujean zata tem soglem korit rav. 14 Tujea vixim bhasaunni kelʼli ani sobhentlea vhoddilamnim tujer aple hat dovorlole tednam, tuka Devan dilolea denneachi beporva korinaka. 15 Tuji vaddavoll soglea lokank, sarki dison ieunk hea vostum vixim bariksannen chintit rav* ani tantuntuch buddon rav. 16 Tujer ani tujea xikounnecher porot-porot dhean di-it rav. Oslea vostumnim thir rav, karonn oxem kelolean tum tuka ani tujem aikotat tankam salvar kortolo.

5 Khoincheach zannttea dadleak koddok ritin tapoinaka. Tachea bodlek, tuzo bapui zalʼlea sarko taka mogan somzai. Toxench, tornnattea dadleank bhav zalʼlea sarke, 2 zannttea bailank avoi-o zalʼlea sarkeo, tornnattea bailank bhoinno zalʼlea sarkeo, soglea nirmollponnan somzai.

3 Khorench gorjek sampoddlolea* vidvanchi kallji ghe.* 4 Punn khoinchea-i vidvek, bhurgim vo natram asat zalear tannim poilim aplea ghorcheanchi kallji gheun, Deva pasot apli bhokti dakhounchi. Tannim aplea avoi-bapaichea ani tanchea avoi-bapaichea rinnant aslolea bhaxen tanchi kallji gheunchi, karonn oxem korop Devak manvota. 5 Ji vidva khorench gorjek sampoddlea ani jika kainch adar na ti Devacher bhorvonso dovorta. Ti dis ani rat kallzantlean vinovnneo ani magnnem korit asta. 6 Punn ji apleo kuddicheo itsa purnn korit ravta, ti jivi asonui melʼlea sarki asa. 7 Tor, konnench tankam bott dakhounchem nhoi mhunn tankam heo suchounneo* di-it rav. 8 Konnui aplim asat tancho, chodd korun, aplea ghorcheancho samball korina zalear, tannem bhavarth nakarla ani to bhavarthant na tea munxa poros paxtt asa.

9 Ek vidva 60 vorsam poros chodd piraiechi asa zalearuch tichem nanv listtant borounchem. Ti ekach ghovachi bail asonk zai. 10 Tichea borea kamank lagon tinnem borem nanv zoddlolem asonk zai. Zoxem, aplea bhurgeank bore bhaxen vaddoileant, onvollkhi lokank ieukar dila, Devachea lokanche* paim dhuileat, trasant asloleank modot kelea ani soglea torechea borea kamant mhenot kelea tosli bail asonk zai.

11 Punn, tornnattea vidvanchem nanv listtant boroinaka, karonn tancheo kuddicheo itsa tankam Kristachi seva korunk addkholl kortat tednam tim kazar zaunk sodhtat. 12 Tim guneanvkari zatolim karonn tannim poilim dakhoilʼlo tea bhavarthachea add* tim voitat. 13 Teach borabor, tankam bekar ravonk ani eka ghora thaun dusrea ghorant bhonvot ravonk sonvoim zata. Hoi, tankam fokot bekar ravonkuch nhoi punn chaddio korpachi pasun sonvoim zata. Tim dusreanchea kamant meter zait ravtat ani tannim ulounk zaina tosleo vostu tim ulounk lagtat. 14 Tor, virodheank amchea add sondhi mellchi nhoi mhunn tornnattea vidvamnim kazar zaunchem, bhurgeank zolmank haddchim ani aplo ghorabo samballcho, hich mhoji itsa asa. 15 Khorem mhunnttlear, thoddeo vidva bhavarth soddun Soitana fattlean geleat. 16 Bhavarthant aslolea khoinchea-i bailechea ghorcheam modem vidva asat zalear, tinnem tankam modot korchi. Hea toren sobhecher bhar poddchona ani sobha khorench gorjek sampoddleant* tea vidvank modot korunk pavtoli.

17 Sobhent bore bhaxen fuddakar ghetat tea vhoddilank, chodd korun uloupant ani xikoupant khub vavr kortat tankam, dobrad man diuncho. 18 Karonn Devachem utor sangta, “Mollnni korta tea boilachem tondd bandchem nhoi,” toxench, “Zo kam korta taka pagar mellonk zai.” 19 Dogam vo tigam zannamnim govai dilea bogor khoinchea-i zannttea munxacher* ghatlolo arop manun gheum naka. 20 Patok korit asat tankam sogleam mukhar xittkai, jea udexim urlolea lokank xittkaunni mellttoli.* 21 Adim fuddench monant tharai nastana vo bhedbhav korinastana heo suchounneo pall mhunn hanv tuka Deva mukhar, Krist Jezu mukhar ani vinchun kaddlolea devdutam mukhar hukum ditam.

22 Khoinchea-i munxacher tuje hat dovrunk* goddbodd korum naka. Toxench, dusreachea patkamnim bhagidar zaum naka. Svotak nirmoll dovor.

23 Atam thaun udok pienaka,* punn tujea pottak lagon ani tuka porot-porot zata tea duensak lagon thoddo drakxancho soro pie.

24 Thoddea lokanchim patkam sogleank kollon ieta, ani tankam rokddich khast melltta, punn thoddea lokanchim patkam uprant kollon ietat. 25 Teach bhaxen, borim kamam pasun sogleank dison ietat ani jim kamam disonant tim lipoun pasun dovrunk zainant.

6 Chakor asat tannim aplea dhoniak kallzant thaun man diuncho. Tea udexim Devachem nanv piddʼddear zaunchem na ani tache xikounne add konn ulounchimnant. 2 Jea chakranche dhoni bhavarthant asat tannim aplea dhoniacho opman korcho nhoi, karonn tanche dhoni tanche bhav zaun asat. Tachea bodlek, tannim anikui khuxalkaien tanchi seva korchi, karonn tanchea sevecho zankam faido zata te bhavarthant asat ani mogache asat.

Heo vostu tankam xikoit rav ani teo pallunk tankam urba di-it rav. 3 Zor konnui munis veglli xikounn xikoita, ani ti xikounn amcho Somi Jezu Kristachea borea* xikounne pormonnem na vo Devache bhokte pormonnem aslolea xikounne pormonnem na zalear, 4 to gorvan fulʼla ani taka kainch somzona. Tachean vad-vivad kelea xivai ani utrank lagon zhogddim kelea xivai ravonk zaina.* Heo vostu nattkai, zhogddim, nanv piddʼddear korop,* ani noxtte dubhav utpon korta. 5 Oslea munxanchim monam piddʼddear zaleant dekhun, ani tim sota thaun pois geleant dekhun, lhan-lhan vostunk lagon tanchea modem sodanch vad-vivad zatat. Devachi bhokti apleak faido melloun gheunk ek vatt zaun asa oxem tankam dista. 6 Punn khorem mhunnttlear, dhadoxi ravon Devachi bhokti korop hem khorench faideachem. 7 Karonn ami sonvsarant kainch gheun ieunk nant, ani ami kainch gheun vochonk xokonant. 8 Tor, amchea lagim khaunk ani nhesonk* asa zalear, ami tantuntuch dhadoxi ravom-ia.

9 Punn je lok koxe-i bhaxen girest zaunk sodhtat te tallnnent poddttat ani fasant sampoddttat. Tancheo murkhponnacheo ani trasant uddoitat tosleo itsa tankam nasak ani mornnak pavoitat. 10 Karonn poixeancho mog soglea torechea vaittachem mull zaun asa. Hea mogak lagon thodde lok bhavartha thaun koddsorleat, ani tannim apnnak zaitea trasamnim dukhoun ghetlam.

11 Punn, Devachea sevoka, tum hea vostum thaun pois dhanv. Ani nitivontponn, Devachi bhokti, bhavarth, mog, thirai ani movallai, he gunn utpon korcho proitn korit rav. 12 Bhavarthachem zhuz bore toren zhuzot rav. Jea pasot tuka apoila ani jea vixim tunvem zaitea sakxidaram mukhar ekdom bore toren govai dilea, tea sasnachea jivitacho bhorvonso ghott dhorun rav.

13 Sogleank jivim dovorta tea Deva mukhar, ani zannem Pontius Pilata fuddem ekdom bore toren govai dili, tea Krist Jezu mukhar hanv tuka hukum ditam, 14 ki ji adnea tuka dilea ti khot nastana ani guneanv nastana ravon, amcho Somi Jezu Krist dison ieum meren pallit rav. 15 Somi Jezu Krist tharailʼlea vellar svotak ugddapo kortolo. To khuxal, xoktivont, razancho Raza ani somiancho Somi zaun asa. 16 To ekloch oso asa zo kednanch moronk xokona, to ravta tea uzvaddant konnuch pavonk xokona ani khoincheach munxan taka pollounk na vo khoinchoch munis taka pollounk xokona. Taka sodanch man mellom ani tachi xokti sodanch urom. Amen.

17 Hea sonvsarant* girest asat tankam suchounni* di ki tannim gorvixtt zaunchim nhoi ani aplo bhorvonso aiz asa ani faleam na, toslea girestkaiecher dovorcho nhoi. Tachea bodlek, zo amkam khuxal zaunk bhorpur promannan sogleo vostu dita, tea Devacher dovorcho. 18 Tankam oxem-i sang ki tannim borem tem korit ravchem, ani borem kam korun girest zaunchim, udar kallzachim zaunchim, ani tanchea lagim jem kitem asa tem dusreank diunk sodanch toiar aschem. 19 Hea toren tim Devachea nodren thevo ektthaim kortat oxem zatolem, mhunnche fuddara pasot ek bori buniad ghaltat oxem zatolem, jea udexim khorea jivitacho bhorvonso tim ghott korunk pavtolim.

20 Timot, tuka zo thevo dila to samballun dovor. Povitr vostunchea add aslolea polkea khobram thaun ani sotachea add asa tea khottea gineana thaun pois rav. 21 Oslea gineanacho shov marun thoddim zannam bhavartha thaun koddsorleant.

Devachi favo nasloli doia tumcher asom.