TIMOTAK DUSRI CHITT

1 Devache khuxe pormonnem Krist Jezucho ek apostl ani Krist Jezu udexim melltta tea jivitachea bhorvonxea vixim porgott korunk nemla tea Paulu koddlean, 2 mogacho put Timotak:

Dev zo amcho Bap zaun asa tachea thaun ani amcho Somi Krist Jezu thaun tuka favo nasloli doia, kakut ani xanti mellom.

3 Mhojea purvozam bhaxenuch hanv jea Devachi nitoll ontoskornnan povitr seva kortam, tacho hanv upkari zaun asa. Ani hanv dis-rat kallzantlean vinovnneo kortam tednam chukonastana tuzo ugddas kortam. 4 Tujea dukancho ugddas ieta tednam, hanv tuka mellonk axetam, ani tuka mellttolo tednam hanv khuxalkaien bhortolom. 5 Hanv tujea bhavartha vixim sodanch ugddas kortam, zantunt koslench dhongiponn na. Osloch bhavarth poilim tuji xemai Loisak, ani tuji avoi Eunisak aslo, ani tosloch bhavarth atam tuka-i asa mhunn mhaka purnn khatri asa.

6 Heach karonnak lagon, hanv tuka ugddas kortam ki hanvem hat dovorlolean tuka Deva koddlean jem dennem mellʼllam, taka tum ujea bhaxen pettounuch dovor. 7 Karonn Dev dita ti povitr xokti amchea bhitor bhirant utpon korina. Tachea bodlek, xokti, mog ani somzunchi tank utpon korta. 8 Tor, amchea Somia vixim govai diunk vo tachea pasot hanv bondkhonnint asa mhunn lojenaka. Tachea bodlek, Devachea xoktecher bhorvonso dovrun, bore khobre pasot dukh sosunk toiar rav. 9 Devan amkam salvar kele ani aple lok* zaunk apounnem dilem. Punn hem apounnem amkam amchea kamank lagon nhoi, punn ho Devacho udʼdhex zaun aslo ani tannem amkam favo nasloli doia dakhoili mhunn mellʼllem. Ani hi favo nasloli doia, tannem Jezu Kristak lagon amkam zaitea kallam poilim dakhoilʼli. 10 Punn atam amcho Salvar korpi Krist Jezu dixtti poddlolean, hea favo naslole doie vixim amkam sarki somzonni mellʼlli. Tannem moronn kaddun uddoilem ani bore khobre udexim jivit ani kusona tosli kudd koxi mellonk xokta tacher uzvadd ghatlo. 11 Hich bori khobor sangonk mhaka ek porgottnnar, ek apostl ani ek xikxok mhunn nemla.

12 Heach karonnak lagon hanv hem soglem dukh sostam, punn mhaka tachi loz disona. Karonn hanvem zacher visvas dovorla, taka hanv vollkhotam ani hanvem taka dila to thevo, to zhoddttecho dis ieta tea meren samballttolo mhunn mhaka khatri asa. 13 Krist Jezuchea ekvottant aslolean utpon zata to bhavarth ani mog dakhoita tachea borabor, tunvem mhojea thaun aikoleat teo boreo* xikounneo, ek udharonn* koxem ghott dhorun rav. 14 Tuka dilolo ho moladik thevo amchea modem ravta tea povitr xokte udexim samballun dovor.

15 Asiantle sogle lok mhaka soddun geleat mhunn tum zannam. Tanchea modem Fijelus ani Hermojen pasun asat. 16 Onesiforusachea ghorabeak Dhonian doia dakhoum. Karonn tannem zaite pavtti mhaka urba dilea ani mhojea sanklleank lagon taka loz disonk na. 17 Tachea bodlek, to Romant astana, tannem mhaka sodhpacho khub proitn kelo ani xevottak mhaka sodhun kaddlo. 18 Zhoddttechea disa amcho Dhoni Jehovan* taka doia dakhoum. Efezant tannem mhojea pasot kitem-kitem kelam tem tum bore bhaxen zannam.

2 Taka lagon, mhojea puta, Krist Jezuchea ekvottant ravlolean melltta tea favo naslole doie thaun xokti melloit rav. 2 Tunvem mhojea thaun aikoleat ani zanchea vixim zaiteamnim govai dilea, teo vostu visvaxi dadleanchea hatant ghal, jea udexim te dusreank xikounk favo tea ritin purte zaunk pavtole. 3 Krist Jezucho ek khoro soinik zalʼlean, tras sosunk toiar rav. 4 Khoincho-i soinik veapar-dhondeant* meter zaina, karonn to aplea foujent bhorti kelea tachi maniotai melloun gheunk sodhta. 5 Ani khellant bhag gheta to kaidea pormonnem khellona zalear taka mukutt mellona. 6 Mhenot korta tea xetkareak sogleant poilim aplea pikecho vantto mellonk zai. 7 Hanv jem sangtam tacher sodanch dhean di; Dhoni tuka sogleo vostu somzon gheupachi tank ditolo.

8 Jezu Kristak meloleantlo jivont kelʼlo mhunn ugddas dovor. To Davidachea sonstintlo* aslo, heach vixim bori khobor hanv sangtam. 9 Hea bore khobrek lagon hanv dukh soxit asam ani ek guneanvkari koso bondkhonnint asam. Punn, Devachem utor mat bandun dovrunk zaina. 10 Heach karonnak lagon hanv vinchloleam pasot soglem sostam, jea udexim tankam sasnak urta tosli mhoima ani Krist Jezu udexim taronn mellonk xoktolem. 11 Him utram visvas dovorpa sarkim asat: Ami tachea sangata melim zalear ami tachea sangata jietolim pasun. 12 Ami thir ravlim zalear tachea sangata raza zaun raz pasun kortolim. Punn ami taka nakarlo zalear to-ui amkam nakartolo. 13 Ami ovisvaxi zalearui to kednanch ovisvaxi zaunchona, karonn to apleach add kednam vochonk xokona.

14 Deva mukhar tankam heo vostu ugddas korit rav, ani utrank lagon zhogddim korchim nhoi mhunn suchounni di-it rav.* Karonn hacho kainch faido zaina, tachea bodlek aiknnareanchem luksonnuch zata.* 15 Devak manvololo zaunk, loz disonk koslench karonn naslolo zaunk, ani sotachem utor bore toren uzar korpi sevok zaunk zata titlo proitn korit rav. 16 Povitr vostum add aslolem pokem ulovop nakar, karonn oslem ulovop lokank anikui chodd Devacho opman korunk fuddem kaddtta. 17 Tanchi xikounn eka oslea ghavea bhaxen zaun asa zo posrot ravta ani kudd kusoita. Himeneus ani Filetus osleach lokam modle zaun asat. 18 He munis sotachea vatte voilean koddsorleat, karonn melole jivont zaleat oxem te mhunnttat, ani thoddeancho bhavarth te moddun uddoitat. 19 Tori astana, Devan ghatloli ghott buniad thir urta, ani tacher hea utramnim xikʼko marlolo asa, “Aple asat tankam Jehova* vollkhota,” ani, “Zo konn Jehovachea* nanvan ulo korta tannem vaittponna thaun pois ravchem.”

20 Eka vhoddlea ghorant fokot bhangrachim ani chandichinch nhoi, punn lakddachim ani matiechim pasun aidonam astat. Thoddim manadik kamank lagon tor thoddim sadea kamank lagon uzar kortat. 21 Tor, konnui sadea kamank lagon uzar kelʼlea aidona thaun apnnak pois dovorta zalear, to manadik kamank lagon povitr kelʼlea aidona sarko zatolo. To aplea dhoniak upeogak poddtta ani dor eka borea kamak toiar kelʼlea aidona sarko zatolo. 22 Taka lagon, tornnattponnachea vondovnneam thaun pois dhanv, ani je lok nitoll kallzan Dhoniachem nanv ghetat tanchea sangata nitivontponn, bhavarth, mog ani xanti he gunn utpon korcho zata titlo proitn korit rav.

23 Murkhponnache ani upeogache nant toslea vad-vivadam thaun pois rav, karonn tanchea udexim zhogddim zatat mhunn tum zannam. 24 Dhoniachea chakrak zhogoddpachi goroz na. Punn tannem sogleam sangata thondd ravchem, taka xikoupachi tank aschi, ani konnui tachea sangata vaitt ritin vagta tednam pasun tannem svotacher tabo dovorcho, 25 ani zanchem chintop sarkem na tankam movallaien somzaunchem. Ghoddie Dev tankam sotachem sarkem ginean gheun poschatap* korchi sondhi di-it, 26 ani ghoddie tim sintidan ieit. Ani Soitanan* tankam aplea itsam pormonnem vagonk, jivech aplea fasant dhorleat mhunn tankam kollon ietoch tim tachea fasantlean suttot.

3 Punn nimannea disamnim trasan bhorlolo oslo vell ietolo zacho fuddo korop khub kotthin zatolem mhunn zannam zav. 2 Karonn, lok aploch mog kortat tosle, poixeancho mog kortat tosle, boddai martat tosle, svotak dusream poros vorte lekhtat tosle, add uloitat tosle, avoi-bapaichem aikonant tosle, onupkari, ovisvaxi, 3 dusrea pasot bhavna naslole,* koslea-i vixoi-acher kobul zainant tosle, nanv piddʼddear korpi, svotacher tabo naslole, ragixtt, boreponnacho mog korinant tosle, 4 ghatki, dusreanchem aikonant tosle, gorvan fulʼlole, Devacho mog korchea bodlek mouza korunk avoddtta tosle, 5 Devachi bhokti kortat mhunn dhong kortat, punn tea pormonnem jienant tosle astole. Oslea lokam thaun pois rav. 6 Oslea lokam modlech, oxe munis voir sortat je naddponnan ghorant ghustat ani patkan buddlolea ani veg-vegllea vondovnneank sampoddlolea oskot monachea bailank aple gulam kortat. 7 Heo bailo sodanch xikot ravtat, punn tankam sotachem khorem ginean mellonk pavona.

8 Jea toren Janes ani Jambresan, Moizesacho virodh kelʼlo, teach toren he lok sotacho virodh korit ravtat. Tanchim monam purnn toren piddʼddear zaleant, ani te bhavartha pormonnem cholonant dekhun Dev tankam nakarta. 9 Punn, he munis chodd mukhar vochonk pavchenant, karonn zoxem tea dogainchem pixeponn sogleank spoxttponnim dison ailʼlem, toxench hanchem-i pixeponn sogleank sarkem dison ietolem. 10 Punn tunvem mhoji xikounn, mhoji jivitachi chal, mhozo udʼdhex, mhozo bhavarth, mhojem pasiens, mhozo mog, mhoji thirai, 11 ani mhojer ailʼlo dhumallo, ani mhoje tras bariksannen polloileat. Hanvem Antiokant, Ikoniumant ani Listrant, kosle-kosle tras sosleat ani koslea-koslea dhumalleancho thir ravon fuddo kela, ani Somian* mhaka tea sogleantlo koso vattaila tem-ui tunvem polloilam. 12 Khorem mhunnttlear, Krist Jezuchim xis koxim Devachi bhokti korit jieunk sodhtat tankam sogleank dhumallo soschoch poddttolo. 13 Punn noxtte ani fottoupi munis anik-anik vaitt zait voitole. Te apunn fostole ani toxench dusreankui fosoitole.

14 Punn tum jem xiklolo ani zachi tuka khatri korun dilʼli, tem pallit rav. Karonn tem tum konnam thaun xikla hem tum zannam. 15 Toxench, hem-ui tuka khobor asa ki tum lhan aslo tednam thaun tuka Devachea utrant kitem boroilʼlem tachem ginean asa. Him utram tuka Krist Jezucher aslolea bhavartha udexim taronn zhoddunk, zannvaiecho korunk xoktat. 16 Soglem Devachem Utor tachea preronnan boroilʼlem asa ani xikounk, somzonni diunk, vankddeo vostu nitt korunk,* ani nitichea dorjeam pormonnem xist diunk faideachem asa. 17 Hea udexim Devacho sevok dor ek borem kam korunk purnn toren purto zata ani soglea ritin toiar zata.

4 Hanv tuka Deva mukhar, ani zachem Raj ieunchem asa ani zo ugddapo zaun jiveancho ani meloleancho neai korcho asa, tea Krist Jezu mukhar oso hukum ditam: 2 Porgott korit rav, kallachi goroz vollkhon borea ani vaitt, hea donui kallant urben hem kam kor. Khub pasiensan, ani boro xikoupi zaun xikoita astana, chuk kortat tankam sudhar, koddok utramnim xittkai ani somzai. 3 Karonn oso kall ietolo jednam tim bori* xikounn nakartolim. Tachea bodlek, tankam aikonk zai tosleoch vostu aikonk tim aplea itsam pormonnem aplea bhonvtim xikxok ektthaim kortolim. 4 Tim sotak fatt kortolim ani khottea kanneancher dhean ditolim. 5 Punn, tum mat, soglea babtint tujea chintpachi tank samball, kotthin poristhitint thir rav, porgottnnechem kam kor, ani tuji seva bore toren purnn kor.*

6 Karonn, soreachi bhett votoilʼlea bhaxen hanv mhaka voitoit asam, ani mhaka suttka mellcho vell ekdom lagim pavla. 7 Hanv borem zhuz zhuzlom, hanvem mhoji dhanvodd dhanvon purnn keli, ani mhozo bhavarth ghott dovorlo. 8 Atam thaun mhojea pasot nitivontponnacho mukutt dovorlolo asa. Nitivontponnan neai korpi Somi, tea disa mhaka to mukutt inam mhunn ditolo. Ani to fokot mhakach nhoi, punn to ugddapo zaunchi urben vatt polloitat tankam sogleank to mukutt ditolo.

9 Zata titlea begin mhojea lagim ieuncho proitn kor. 10 Karonn Demas atanchea sonvsarachea* mogak lagon mhaka soddun Tesalonikent gelo, Kresens Galasiek gelo, ani Tit Dalmasiak gelo. 11 Fokot Lukas mhojea sangata asa. Markuk tujea sangata gheun ieo, karonn to sevechea kamant mhaka khub modot korunk xoktolo. 12 Tikikusak hanvem Efezant dhaddla. 13 Tum ieta tednam hanvem Troasant, Karpusager dovorleat te mhoje kopdde gheun ieo. Toxench, kovlle-i gheun ieo, chodd korun chamddeache kovlle.

14 Tambeachem kam korpi Aleksandran mhaka khub luksonn kelam. Jehova* taka tachea kamam pormonnem farik kortolo. 15 Tum-ui tachea thaun samballun rav, karonn tannem amchea sondexacho khub virodh kela.

16 Poile pavtt mhaka neai korpea mukhar ubo kelo tednam mhojea vatten ulounk konnuch fuddem soronk na. Sogle mhaka soddun gele. Tori astana, Devan tankam hea vixim zobabdar tharaunche nhoi mhunn hanv magnnem kortam. 17 Punn Somi mhojea lagim ubo ravlo ani mhojea udexim purnn toren porgottnni zaunchi ani soglea raxttrank aikonk mellchem mhunn tannem mhaka xokti dili, ani xinvachea tonddantlean mhoji suttka keli. 18 Somi mhaka dor eka noxttea fasa thaun salvar kortolo ani tachea sorginchea Rajeak lagon mhaka vachoitolo. Sodam-sodankal taka mhoima mellom. Amen.

19 Priskak, Akuilak ani Onesiforusachea ghorabeak mhozo nomoskar.

20 Erastus Korintant ravlo, ani Trofimus duent poddlo dekhun hanv taka Miletusant dovrun ailom. 21 Thonddeche dis suru zaunchea poilinch, tum mhojea koddem ieunk zata titlo proitn kor.

Eubulus, Pudens, Linus, Klaudia ani soglim bhav-bhoinnam tuka aplo mog dhaddttat.

22 Tum dakhoita tea bore urbek lagon Somi tujea sangata asom. Tachi favo nasloli doia tumcher asom.