TITAK CHITT

1 Hanv Paulu, Devacho chakor ani Jezu Kristacho apostl zaun asa. Mhozo bhavarth ani mhoji seva, vinchloleanchea bhavartha pormonnem ani Devache bhoktek zuddlolea sotachea sarkea gineana pormonnem asa. 2 Heo vostu sasnachea jivitachea bhasaunnechea adarit asat jea vixim kednanch fott ulounk xokona tea Devan, khub poilinch bhasaunni kelʼli. 3 Ani tannem apnnem tharailʼlea vellar, porgottnne udexim aplem utor kolloilem. Porgottnnechi hi zobabdari amchea Taronn diupi Devachea adnea pormonnem mhaka dilea. 4 Jea bhavarthant ami bhagidar asat tea bhavarthant aslolo mhozo khoro put Titak, hanv Paulu hi chitt boroitam:

Dev zo amcho Bap zaun asa tachea thaun ani amkam Salvar korpi Krist Jezu thaun tuka favo nasloli doia ani xanti mellom.

5 Tunvem Kretantli bigoddloli porisithiti sarki korchi* ani hanvem tuka suchounni dilʼli tea pormonnem tunvem dor eka xarant vhoddil nemche mhunn hanv tuka thoim soddun ailolom. 6 Vhoddil mhunn nemtat tea bhavacher kosloch arop asonk zaina, taka ekuch bail asonk zai, tachim bhurgim bhavarthant asonk zai ani tancher folgam marpi vo adnea pallinant toslim mhunn arop asonk zaina. 7 Karonn dekhrekh korpi bhav Devan nemlolo sevok asta, tea pasot, tacher kosloch arop asonk zaina. To apleak zai tench korpi, rokddoch ragar zata toslo, bebdo, maramari korta toslo, ani fottingponnachea zoddichi as korta toslo asonk zaina. 8 Tachea bodlek, to poramos korta toslo, boreponnacho mog korta toslo, sarkem chintop aslolo,* nitivont, visvaxi ani svotacher tabo dovorta toslo asonk zai. 9 Tachi xikoupachi kola, visvas dovrunk zata toslea, Devachea utrachea* adarit asonk zai. Hea udexim to bori* xikounn diun urba* ditolo. Itlench nhoi, hea xikounnecho virodh kortat tankam to sudharunkui pavtolo.

10 Thoim zaite lok oxe asat je konnanchench aikonant, gorje bhair boddboddttat, ani fosoitat, chodd korun osle lok je sunot korop gorjechem mhunn sangtat. 11 Oslea munxanchim tonddam bond korop gorjechem. Karonn te fottingponnan faido zoddunk, xikounk favona tosleo vostu xikoitat ani thoddea familincho bhavarth purnn toren piddʼddear kortat. 12 Tancheach eka provadean oxem mhunnttlam: “Kretache lok fotting, ranvotti zonvaram bhaxen krur, allxi, ani pottare* asat.”

13 Hi govai khori zaun asa. Tea pasot, tum tanchea sangata koddok ritin vag ani tannim bhavarthant ghott ravchem mhunn tankam sudharit rav. 14 Judevanchea kanneancher, toxench sota thaun pois geleat toslea munxanchea adneancher dhean dium naka. 15 Xudʼdh asat tea lokank sogleo vostu xudʼdh astat, punn je oxudʼdh asat ani zankam bhavarth na, tanchea nodrent kainch xudʼdh asona. Karonn tanchim monam ani tanchim ontoskornnam mhellim zaleant. 16 Te Devak vollkhotat mhunn sogleam mukhar sangtat, punn tanchea kamamnim te Devak nakartat mhunn dakhoun ditat. Karonn te vitt haddttat tosle, adnea pallinant tosle, ani kosleach borea kamank upkaronant tosle lok zaun asat.

2 Punn tum, bore* xikounne pormonnem asat teoch vostu sangot rav. 2 Zanntte dadle aplea sonvoim-ancher tabo dovorpi, zobabdareche, sarkem chintop dovorpi, ghott bhavarthache, mogan bhorlole, ani thir ravpi asonk zai. 3 Toxench, zannttea bailanchi vagnnuk Devachea lokank sobta tosli asonk zai. Tim nanv piddʼddear kortat toslim, chodd soro pietat toslim asonk zaina. Tachea bodlek, tim boreo vostu xikoitat toslim asonk zai. 4 Hea toren tim, tornnattea bailank ap-aplea ghovancho ani bhurgeancho mog korunk xikounk pavtolim. 5 Toxench, tim tankam sarkem chintop dovrunk, nirmoll ravonk, ghorantlem kam korunk,* boreponn dakhounk ani ap-aplea ghovank adhin ravonk solʼlo diunk pavtolim. Oxem kelolean konnuch Devachea utra vixim vaitt ulounchona.

6 Teach bhaxen, tornnattea dadleank tannim sarkem chintop dovorchem mhunn urba di-it rav. 7 Tosoch, tum-ui soglea vostumnim boro kam korpi mhunn udharonn dovor. Ani soglea zobabdaren xudʼdh asat tea vostum vixim xikoi.* 8 Konnench chuk kaddunk zaina toslea borea utramnim xikoi, jea vorvim amchea virodheank amchea add ulounk kainch sondhi mellchina ani te lojent poddttole. 9 Chakor asat tannim aplea dhoniank soglea vostumnim adhin ravchem, tankam khuxal korunk proitn korcho, tankam porteak-porto zobab diuncho nhoi, 10 ani tanchem kainch chorchem nhoi. Tachea bodlek, tannim soglea vostumnim patieupa sarke zaunche. Hea udexim amkam Taronn diupi Devachea xikounnechi sobitkai soglea vattamnim te vaddounk xoktole.

11 Karonn, Devachi favo nasloli doia dison aili ani hea doiek lagon soglea toreche lok salvar zatat. 12 Ti doia amkam Devachea khuxe add aslolim kamam ani sonvsaracheo vondovnneo nakarunk xikoita. Toxench, hea sonvsarant* sarkem chintop dovrun nitivontponnan ani Devachi bhokti korun, jieunk xikoita. 13 Amkam khuxalkai dita to bhorvonso purnn zatolo ani amchea vortea Devachi, toxench amkam Salvar korpi Jezu Kristachi mhoima dison ietoli tea vellachi ami vatt polloit ravchem. 14 Amkam soglea torechea vaittponnam thaun suttka diunk,* ani borea kamam pasot urba asloli apli khas porza koxi xudʼdh korunk, Kristan amchea pasot aplench bolidan dilem.

15 Tum tankam heo sogleo vostu sangot rav, tankam somzait* rav ani soglea odhikaran tankam sudharit rav. Konnench tuka unnea nodren lekhcho nhoi.

3 Tankam ugddas korit rav ki tannim sorkarank ani odhikareank adhin ravchem, tanche kaide pallche, dor eka borea kamank toiar ravchem, 2 konnanchem-i nanv piddʼddear korchem nhoi ani zhogddim korchim nhoi. Tachea bodlek, somjikai dakhounchi, ani soglea lokam thaim movallaien vagchem. 3 Karonn eka vellar ami pixim aslim, adnea maninaslim, sanddlolim aslim, veg-vegllea vondovnneachim gulamam aslim, moujen dis sartalim, vaitt kamam korit ravtalim, nattkai kortalim, vitt haddtta toslim kamam kortalim ani eka-mekacho dves kortalim.

4 Punn, jednam amkam Taronn diupi Devachi doiallai, ani munxakulla pasot tacho mog dison ailo 5 (ami borim kamam kelʼlim mhunn nhoi punn tache doiek lagon hem zalem), tednam tannem amkam udka udexim* jivit diun, ani povitr xokte udexim novim korun salvar kelim. 6 Tannem hi povitr xokti amkam Salvar korpi Jezu Krista udexim amcher bhorpur promannan* votoili. 7 Tachea favo naslolea doiek lagon amkam nitivont mhunn lekhchim, ani tea uprant, sasnachea jivitachea bhorvonxea pormonnem ami daiji zaunchim mhunn tannem oxem kelem.

8 Him utram visvas dovorpa sarkim asat, ani tunvem heo vostu mhotv diun sangloleo mhaka zai, jea udexim Devacher bhavarth dovortat tim borim kamam korit ravonk aplem dhean diunk pavtolim. Heo vostu munxank khub boreo ani faideacheo zaun asat.

9 Punn pixeponnan bhorlole vad-vivad, vonxavollincher bhasabhas, Kaidea* vixim aslole vad-vivad ani zhogddeam thaun pois rav. Karonn tanchea udexim kainch faido zaina ani teo nirfoll zaun asat. 10 Punn ek munis vegllich xikounn xikoita zalear taka don pavtti somzai.* Tori astana, to aikona zalear tachea lagim kosloch sombond dovornaka. 11 Karonn oslo munis sarke vattevoilo koddsorla ani patok korta ani apleakuch guneanvkari korta.

12 Hanv tuje koddem Artemas ani Tikikusak dhaddttam tednam, mhojea lagim Nikopolisant ieunk tujean zata tem soglem kor, karonn hanvem thonddeche dis thoinch sarunk tharailam. 13 Kaido bore bhaxen zannam aslolea Zenasak, ani toxench Apolosak, goroz poddttoleo teo sogleo vostu di. Tankam vatter kainch unnem zaina zaunk oxem kor. 14 Amchea lokamnim pasun borim kamam korit ravonk xikchem. Hea udexim gorjechea vellar te modot korunk pavtole ani tanchi seva nirfoll zaunchina.

15 Mhojea sangata aslole sogle tuka aplo mog dhaddttat. Bhavarthant amchea pasot mog asloleank mhozo nomoskar.

Devachi favo nasloli doia tumcher sogleancher asom.