HEBREVANK CHITT

1 Adlea kallar Dev zaitea pavtti, veg-vegllea toren provadeam udexim amchea purvozam lagim uloilʼlo. 2 Punn atam hea xevottachea disamnim to amchea lagim aplea Puta udexim uloita. Tea Putak tannem soglea vostuncho daiji kela, ani tachea udexim tannem sonvsarant* soglem rochlem. 3 Devachi mhoima tachea Puta bhitor dison ieta ani to sarko Deva bhaxenuch asa. Aplea xoktivont utra udexim to sogleo vostu samballtta. Ani amchim patkam dhuvun xudʼdh kelea uprant, to sorgar Vortea Devachea uzvea hatak vochon boslo. 4 Oxe toren, to devdutam poros vorto zalo, karonn tanchea poros anikui borem nanv taka daiz mhunn mellʼllem.

5 Udharonnak, “Tum mhozo put, ani aiz hanv tuzo bapui zalam,” ani uprant “Hanv tacho bapui zatolom, ani to mhozo put zatolo” oxem khoinchea-i devdutak Devan kednam tori mhunnttlam kai? 6 Punn jednam to aplea Poilea Putak porot hea prithumer haddttolo, tea vella vixim to oxem mhunntta: “Devachea soglea dutamnim tachea mukhar bagon taka nomoskar korum.”

7 Toxench, to devdutam vixim oxem mhunntta: “To aplea devdutank xoktivont korta, ani aplea sevokank* ujeache agtte korta.” 8 Punn aplea Puta vixim to mhunntta: “Dev sodam-sodankal tujem xinvason zaun asa, ani tujea Rajeacho danddo nitivontponnacho* danddo. 9 Tunvem nitivontponnacho mog kelo ani vaittponnacho dves kelo. Taka lagon, Devan, hoi tujea Devan tuka telan makhlo ani tujea sangateam poros tuka chodd khuxalkai dili.” 10 Ani, “Somia, survatek tunvem prithumechi buniad ghatli, ani mollob tujea hatanchem kam zaun asa. 11 Prithum ani mollob nas zatolem, punn tum urtolo. Eka kopddea bhaxen tim porni zatolim. 12 Eka lamb kopddeak guttlaita, toso tum tankam guttlaitolo, ani eklo kopdde bodolta tea toren tum tankam bodoltolo. Punn tum asa tosoch urtolo, ani tujim vorsam kednanch kabar zaunchimnant.”

13 Punn tannem khoinchea-i devduta vixim kednam-i oxem mhunnttlam: “Hanv tujea dusmanank monnoi* koxi tujea paim-am ponda ghaltam tea meren tum mhojea uzveak bos”? 14 He sogle salvar zatole tea lokanchi, mhunnche taronn daiz mhunn mellttolem tanchi, povitr seva korunk dhaddlole devdut nhoi kai?

2 Ami kednanch koddsoron vochona zaunk jeo vostu ami aikoleat tancher ami anikui dhean divop gorjechem asa. 2 Karonn devdutam udexim uloilʼlem utor itlem khatri dovorpa sarkem aslem, ani tachea add konnem-i patok kelam ani adnea moddlea taka neai-a pormonnem khast favo zalea, 3 zalear itlea vortea taronnacher dhean dinastana, ami xikxe thaun koxim suttʼttolim? Karonn ho taronnacho sondex sangpachi survat amchea Somian kelʼli ani zannim tachem aikolem tannim amkam tea vostunchi khatri korun dilea, 4 Devanui khunnam ani ojapam korun, toxench veg-vegllim xoktivont kamam korun ani aple khuxe pormonnem povitr xoktechim dennim vanttun govai dili.

5 Karonn ami sangtat to, fuddem ieupacho asa to sonvsar Devan devdutanchea adhin korunk na. 6 Punn eka zagear eka sakxidaran oxem mhunnttlam: “Munis konn, ki tum taka motint dovorta, vo munxacho put konn, ki tum tachi kallji gheta? 7 Tunvem taka devdutam itlo vhodd korunk na. Tunvem taka mhoimecho ani manacho mukutt ghatla, ani tujea hatanchea kamacher taka nemla. 8 Tunvem sogleo vostu tachea paim-am ponda ghatleat.” Devan sogleo vostu tachea adhin keleo tednam, tannem tachea adhin korunk na oxi koslich vost soddunk na. Sogleo vostu tachea adhin keleat, hem ami sodʼdheak pollounk xokonant tem khorem. 9 Punn zaka devdutam poros matso unno kelo, tea Jezuk, atam ami mhoimecho ani manacho mukutt ghatlolo polloitat, karonn tannem moronn soslem. Devache favo naslole doiek lagon dor-eka munxa pasot tannem moronn chakchem mhunn oxem zalem.

10 Sogleo vostu Devachea mhoimek lagon ani tacheach udexim ostitvant aileo. Tor zaitea putank mhoima diunk, Devan tanchea Mukhel Fuddareak tras sosunk diun poripurnn korop sarkem aslem. Hea Mukhel Fuddarea udexim Dev tankam salvar korta. 11 Karonn povitr korpi ani zankam povitr keleant te ekach Bapa thaun asat. Tor tankam bhav mhunnonk taka loz disona. 12 Udharonnak to mhunntta: “Hanv mhojea bhav-bhoinnam modem tujem nanv kolloitolom, sobhe modem git gavun tuji vakhannʼnni kortolom.” 13 Ani porot mhunntta: “Hanv tacher visvas dovortolom.” Ani porot oxem mhunntta: “Polloi! Hanv ani mhojim lhan bhurgim, jim Jehovan* mhaka dileant.”

14 Tor, “lhan bhurgim” hadda-masachim asat tosoch to-ui hadda-masacho zalo. Marun uddounchi xokti asa taka, mhunnche, Soitanak* aplea mornna udexim kabar korun uddounk tannem oxem kelem. 15 Toxench, aplea akʼkhea jivitant mornnachea bhirantechea gulamponnant aslolea sogleank suttka diunk tannem oxem kelem. 16 Karonn khorem mhunnttlear, to devdutanchi nhoi, punn Abrahamache sonstichi* modot korta. 17 Deva sombondit aslolea vostumnim, doiall ani visvaxi mha-iadnik zaunk, ani lokank Deva thaim porot xanti melloun gheunk modot korunk bolidan diun,* tannem soglea vattamnim aplea “bhavam” sarko zavop gorjechem aslem. 18 Tachi porikxa zatali tednam tannem zaitem dukh soslem. Tea pasot atam zanchi porikxa zata tankam to modot korunk xokta.

3 Taka lagon, sorginchea apounneache* bhagidar aslolea povitr bhav-bhoinnimno, ami mantat tea apostl ani mha-iadnik Jezucher dhean diat. 2 Moizes Devachea akʼkhea ghoranneant visvaxi aslo, tosoch to-ui taka nemla tea Devak visvaxi aslo. 3 Ghora poros tem ghor bandtoleak chodd man asta, teach toren, Moizesa poros taka* chodd mhoima favo. 4 Hoi, dor ek ghor konnem tori bandlam, punn sogleo vostu rochpi Dev zaun asa. 5 Atam, Moizes Devachea akʼkhea ghoranneant eka sevoka bhaxen visvaxi aslo ani hea udexim jeo vostu uprant sangcheo asleo tanchi govai mellʼlli. 6 Punn Krist tor Devachea ghoracho dekhrekh korpi visvaxi put aslo. Ani ami zor xevott poriant bhienastana ulouncho dhir soddun dinant, ani amkam gorv bhogta to bhorvonso ghott dhorun ravtat, zalear ami Devachem ghor.

7 Taka lagon, povitr xokti mhunntta tea pormonnem, “Aiz tumi tacho avaz aikotat zalear, 8 tumchim kallzam nibor korinakat, zoxem tumchea purvozamnim oronnʼnneant* kelʼlem ani mhoji porikxa gheun mhaka rag haddlolo. 9 Tannim 40 vorsam poriant mhojim kamam polloilʼlim. Tori astana, tannim mhoji porikxa ghetli. 10 Heach karonnak lagon mhaka hea pillgechi vitt aili ani hanvem mhunnttlem: ‘Hea lokanchem kalliz sodanch hanga-thoim voita, ani tannim mhojeo vatto vollkhon gheunk nant.’ 11 Taka lagon, hanvem ragan soput ghetlo: ‘Tim mhojea visovant bhitor sorchimnant.’”

12 Bhav-bhoinnimno, tumchea modlo konnui jivea Deva thaun pois vochon, tachea bhitor bhavarth naslolem ek noxttem kalliz utpon zaina zaum mhunn chotrai dhorat. 13 Punn “Aiz,” mhunnttlolo dis chalu asa tea meren, eka-mekak urba di-it ravat. Tumchea modlim konnuch, patkachea fosoupachea xoktek lagon nibor kallzachim zaina zaunk oxem korat. 14 Karonn amkam survatek aslolo visvas ami xevott poriant ghott dhorun ravtat zalearuch ami khoreponnim Kristache bhagidar zatat. 15 Mhunnttlolem asa tea pormonnem, “Aiz tumi tacho avaz aikotat zalear, tumchim kallzam nibor korinakat, zoxem tumchea purvozamnim kelʼlem ani mhaka rag haddlolo.”

16 Devacho avaz aikonui taka rag haddlolo te konn asle? Moizesachea fuddarponna khala astana Ejipttantlean bhair sorlole, tech sogle lok nhoi kai? 17 Ani 40 vorsam poriant Devak zanchi vitt aili te konn kai? Zannim patok kelem ani zanchim moddim oronnʼnneant poddon urlim, tech nhoi kai? 18 Ani aplea visovant tim bhitor sorchimnant mhunn tannem konnank soput dilo kai? Zannim tachi adnea moddli tankanch nhoi? 19 Tor tankam bhavarth naslo dekhun tankam tachea visovant bhitor soronk mellonk na mhunn amkam dison ieta.

4 Ami azunui tachea visovant bhitor soronk xoktat mhunn Dev sangta. Tor amchea modlim konnuch tea visovant bhitor soronk purtim naslolim zaina zaunk ami chotrai dhorum-ia. 2 Karonn tankam bori khobor porgottloli toxich amkam-i porgottlea, punn utor aikonui tankam tachea thaun kainch faido zaunk na. Karonn zannim aikolʼlem tanchea sarko bhavarth tankam naslo. 3 Ami bhavarth dovorlo dekhun ami visovant bhitor sortat. Tannem tanche vixim mhunnttlem: “Taka lagon, hanvem ragan soput ghetlo, ‘Tim mhojea visovant bhitor sorchimnant.’” Aplem kam purnn korun sonvsarachea survatek thaun to visov gheta, tori astana tannem oxem mhunnttlem. 4 Eka zagear tannem satvea disa vixim oxem mhunnttlam: “Aplea soglea kamam thaun Devan satvea disa visov ghetlo,” 5 ani hanga porot to oxem mhunntta: “Tim mhojea visovant bhitor sorchimnant.”

6 Zankam bori khobor poili porgottli tim Devachea visovant bhitor soronk nant, karonn tannim Devachi adnea manunk na. Punn thoddim azunui tea visovant bhitor soronk xoktat. 7 Tea pasot, eka lamb kalla uprant to Davidachea stotrant eka disak, “Aiz,” oxem mhunntta, zoxem hea chittint voir mhunnttlolem, “Aiz tumi tacho avaz aikotat zalear, tumchim kallzam nibor korinakat.” 8 Karonn Joshua tankam visovachea zagear gheun gelʼlo zalear, Dev uprant anik eka disa vixim ulouncho naslo. 9 Tor hacho orth, Devachea lokam pasot sabathacho visov azun urlolo asa. 10 Karonn Devachea visovant bhitor sorla to munis Devan aplea kamam thaun visov ghetlolo toso visov gheta.

11 Tanchea bhaxen adnea moddpachi sonvoim zaun amchea modlim konnui patkant poddona zaunk, ami Devachea visovant bhitor soronk zata titlo proitn korum-ia. 12 Karonn Devachem utor jivem ani xoktivont asa. Tem donui vatten pazlolea tolvari poros chodd dharechem asa. Tem munis bhailean* koso dista ani bhitorlean koso asa* hanchea modlo ontor dakhoun dita. Ani toxench haddam ani tanchem bhitorlem mas ar-par chirun vegllem korta ani monantlim chintnam ani kallzache hetu parkhunk xokta. 13 Osli ekui rochnna na ji Deva thaun liploli asa. Punn, zaka ami hixob diunk zai tachea mukhar sogleo vostu ukteo asat.

14 Tea pasot, sorgar gelʼlo Devacho Put Jezu, amcho vorto mha-iadnik aslolean, ami tacher aslolo bhavarth zoso ukteponnim dakhoun dila tosoch fuddem-i dakhoun dium-ia. 15 Karonn amcho mha-iadnik amcheo oskotaieo somzon ghena toslo na. Punn amchea bhaxen tachi soglea ritin porikxa zalea. Tori to patok na toslo asa. 16 Tor, amkam kakut ani favo nasloli doia, sarkea vellar mellchi mhunn ami Devachea favo naslolea doiechea xinvasona mukhar fattim-fuddem zainastana dhiran fuddem sorom-ia.

5 Dor eka mha-iadnikak lokam modlo vinchun kaddttat ani tanchea khatir Devacho sevok mhunn nemtat. Hea udexim to dennim ani patkanchea farikponna khatir bolidanam bhettounk xokta. 2 Nokllo astana chuk kortat* tankam to doia-maia dakhounk xokta, karonn to pasun svota aplea oskotaiencho fuddo korta.* 3 Taka lagon, to dusreanchea patkam khatir bolidanam bhettoita toso, tannem aplea-i patkam pasot bolidanam bhettounk zai.

4 Ek munis apunn zaun hi manachi podvi gheunk xokona, punn hi podvi taka Dev nemta tednanch melltta, zoxem tannem Aronak nemlolo. 5 Teach bhaxen, Kristan apunnuch mha-iadnik zaun apleak mhoima diunk na. Tachea bodlek, Devan ti mhoima taka dili ani taka mhunnttlem: “Tum mhozo put, ani aiz hanv tuzo bapui zalam.” 6 Anik eka zagear tannem oxem mhunnttlem, “Tum Melkizedeka bhaxen ek iadnik ani tum sodam-sodankal ek iadnik urtolo.”

7 Prithumer astana, Kristan vhodd avazan ulo marun ani dukam golloun-golloun taka mornnantlean vachounk xoktalo tea Devak kallzant thaun vinovnneo ani vinoteo pasun keleo. Taka Devachi bhirant asli dekhun Devan tachim magnnim aikolim. 8 Devacho put asonui, to zaitem dukh sosun adnea pallunk xiklo. 9 Ani sompurnn zalea uprant, tachi adnea pallttolea soglea munxank sasnak salvar korunk taka zobabdari dili. 10 Karonn Devan taka Melkizedeka bhaxen mha-iadnik mhunn nemla.

11 Amchea lagim tumkam zaitem sangpachem asa, punn tumkam somzaunk kotthin, karonn tumi somzon gheunk proitn korinant. 12 Khorem mhunnttlear, atam meren* tumi xikoupi zaunk zai aslim, punn konnem tori tumkam porot survatek thaun Devachea povitr utrantleo mullaveo vostu somzaunchi goroz asa. Ani porot ek pavtt tumi, nibor jevonn jevtat toslim nhoi punn, dudhachi goroz asa toslim zaleant. 13 Ani zo konn dudh piet ravta taka sarkem kitem tem xikoita, tea Devachea utrachem ginean mellonk na, karonn to ek lhan bhurgo. 14 Punn nibor jevonn bhavarthant ghott asloleam pasot asa, zannim apli chintpachi tank uzar korun tika borea ani vaitta modem ontor vollkhonk proxikxonn dilam.

6 Atam, ami Krista vixim aslolea mullave xikounnechea fuddem pavleant dekhun ami bhavarthant ghott zaunk purnn toren vavr korum-ia. Ami porot buniad ghalchi nhoi, mhunnche, ami porot teoch vostu xikcheo nhoi jeo ami survatek xiklolim. Zoxem, faideak poddonant toslim kamam* soddun diun poschatap* korop, Devacher bhavarth dovrop, 2 bautizm ghevop, hat dovrop, meloleanchem jivontponn ani sasnachea zhoddttechi xikounn. 3 Devan amkam ghott zaunk dilim zalear ami khorench bhavarthant ghott zaunk pavtolim.

4 Jea lokank ek pavtti gineanacho uzvadd mellʼlla ani zannim sorgar thaun melltta tem funkott dennem chakun polloilam ani jim povitr xokteche bhagidar zaleant, 5 ani zannim Devachem borem utor ani ieuncho asa tea sonvsarantleo* xoktivont vostu chakleat, 6 punn atam jim poddleant, tankam poschatap korun porot haddunk koxech bhaxen zaina. Karonn tim apunnuch Devachea Putak porot ek pavtt khambear khillaitat ani sogleam mukhar taka loz kortat. 7 Devachea besanvan zomnicher porot-porot paus poddtta tednam zomin tem udok voddun gheta ani bhaji-palo kirlaita, jea udexim roitoleak faido zata. 8 Punn tea zomnir kantteanchim ani ranvotti zhaddam zatat zalear tika toxich soddun ditat, ani magir rokddich tika xirap diun, xevottak ti lasun uddoitolim.

9 Mogachea bhav-bhoinnimno, ami oxem uloitat khorem, punn tumi hachea poros borea poristhitint asat mhunn amkam khatri asa, mhunnche, tumi tumkam taronn mellttolem toslea vatter asat. 10 Karonn Dev onʼneai korina.* Tumi tachea nanva pasot zo vavr kela ani mog dakhoila, mhunnche, tumi Devachea lokanchi* jea toren seva kelea ani atam pasun korit asat hem to visronk xokona. 11 Tumchea modlea dor eklean osoch vavr kelʼlo amkam zai, jea udexim xevott mhunnosor tumcho bhorvonso ghott urtolo. 12 Oxem kelʼlean tumi allxi zaunchim nant, punn bhavarth ani pasiens dakhoilolean bhasaunneo daiz mhunn melloun ghetlam tea lokanchem udharonn gheun tumi cholonk pavtolim.

13 Devan Abrahamak bhasaunni kelʼli tednam soput gheunk aplea poros vhodd anik konn na dekhun, Devan apleach nanvan soput gheun mhunnttlem: 14 “Hanv tuka khorench besanv ditolom ani tuji sonsot khorench zaite pavtti chodd vaddoitolom.” 15 Hea toren Abrahaman pasiens dakhoilem tednam Devan taka hi bhasaunni keli. 16 Karonn munis kednam-i aplea poros vhodd munxacho soput gheta, ani tachea soputa udexim dor ek vad-vivad kabar zata. Karonn to soput kaidea pormonnem tachea pasot gerentti zaun asa. 17 Teach toren, aplo udʼdhex kednanch bodolchona mhunn Devan aplea bhasailʼlea daijeank anikui spoxtt toren dakhounk tharailem tednam tannem soput gheun tachi gerentti dili.* 18 Devan kelʼleo heo don vostu* kednanch bodlonk xokonant ani to kednanch fott ulounk xokona. Ani amkam, mhunnche, ami jim dhanvon Devachea asrea khala aileant tankam, hea vostunk lagon tanchea mukhar dovorlolo bhorvonso ghott dhorun ravonk urba melltta. 19 Ho khatri dovorpa sarko ani ghott bhorvonso amchea jivita pasot ek nangor koso asa, ani ho bhorvonso amkam poddʼddeachea dusrea vatten gheun voita. 20 Thoim Melkizedeka sarko sasnak mha-iadnik zalʼlo Jezu amchea pasot rosto toiar korunk amchea mukhar gela.

7 Razank zhuzant haroun Abraham porot ietalo tednam Melkizedek taka mellʼllo. Ho Salemacho raza ani Sogleant Vortea Devacho iadnik aslo. Tannem Abrahamak besanv dilem. 2 Abrahaman taka soglea vostuncho dhavo vantto dilo. Poilim mhunnttlear, Melkizedek hea nanvacho orth “Nitivontponnacho Raza” oso zata, ani toxench to Salemacho raza, mhunnche, “Xanticho Raza” zaun asa. 3 Tachea avoi-bapai vixim kainch mahiti na ani tachi vonxavollui na. Toxench, tacho zolm kednam zalo ani to kednam melo hea vixim pasun kainch mahiti mellona. Punn taka Devachea Puta sarko kela dekhun to sodankal iadnik urta.

4 Familicho mukheli* aslolea Abrahaman, luttun haddlolea sogleant borea vostuntlo dhavo vantto hea munxak dilo. Tor ho munis kitlo vorto aslo hea vixim chintat. 5 Kaidea pormonnem, Levichea putam modlea zankam iadnikponn mellʼllam tankam lokam koddlean mhunnche, Abrahamachich sonsot zaun aslolea tanchea bhavam koddlean dhavo vantto ektthaim korpachi adnea dilʼli. 6 Punn Levichea kullantlean naslo tea Melkizedekan, Devan bhasaunneo kelʼleo tea Abrahama koddlean dhavo vantto ghetlo ani taka besanv dilem. 7 Atam, dhaktteak vhoddlea koddlean besanv melltta, hem konnuch nakarunk xokona. 8 Ek koddem, zankam dhavo vantto mellttalo, te moron voitat tosle munis asle, punn dusre koddem, jea munxak dhavo vantto mellʼllo to jivo urta mhunn tachea vixim govai dilʼli. 9 Ani lokam koddlean dhavo vantto gheupi Levin pasun Abrahama udexim tea munxak dhavo vantto dilo oxem mhunnonk zata. 10 Karonn jea vellar Melkizedek Abrahamak mellʼllo tea vellar Levi aplea purvozachea, mhunnche, Abrahamachea kuddintuch aslo.*

11 Tor, Levitanchea iadnikponna udexim (karonn lokank dilʼlea Kaideacho ho ek bhag aslo) poripurnntai melloun gheunk zatali zalear Arona bhaxen nhoi, punn Melkizedeka bhaxen aslolo dusro ek iadnik ieunchi kitem goroz asli? 12 Karonn iadnik bodolta zalear Kaideant bodol korop pasun gorjechem asa. 13 Karonn jea munxa vixim heo vostu sangleat to dusrea kullantlo, ani tea kullantlea khoincheach munxan kednanch vedi lagim seva korunk na. 14 Karonn amcho Somi Juda kullantlean asa hem tor spoxtt asa, punn tea kullantlean iadnik ieunchea vixim Moizesan kainch sangonk naslem.

15 Ani Melkizedeka sarko dusro ek iadnik aila, tachea voilean hem anikui spoxtt zata. 16 Kaidea pormonnem jea kullantle iadnik zatale toso, to tea kullantlo aslo mhunn iadnik zaunk na, punn to tea xokte udexim iadnik zalo ji xokti taka nas zaina toslem jivit dita. 17 Karonn tachea vixim oxi govai dilʼli: “Tum Melkizedeka sarko iadnik ani sodankal iadnik urtolo.”

18 Tor, poilincho kaido kaddun uddoilo, karonn to oskot aslo ani faideacho naslo. 19 Tea Kaidean kainch poripurnn korunk na, punn tachea poros boro bhorvonso dilo dekhun sogleo vostu poripurnn zaunk pavtat ani tea udexim ami Devachea lagim sortat. 20 Ani ho bhorvonso soput ghenastana diunk na, 21 (karonn thodde munis Devan soput ghenastana iadnik zaleat hem khorem aslem tori, hea iadnikank Devan soput gheun iadnik mhunn nemlo. Ani tachea vixim oxem mhunnttlem: “Jehovan* soput ghetla, ani to aplem mon bodolchona.* ‘Tum sodankal iadnik urtolo.’”) 22 Taka lagon, Jezu eka anikui borea korarachi gerentti* diupi zalo. 23 Tea bhair, poilim eka-fattlean-ek zaiteank iadnik zaunchem poddttalem, karonn mornnak lagon te iadnik mhunn seva korit ravonk xokonasle. 24 Punn ho iadnik sodanch jivo asa dekhun tachem iadnikponn sodanch urtolem, ani konnuch tacho zago gheunk pavona. 25 Tor, tachea udexim Deva lagim ieta tankam purnn toren salvar korunk tachean zata, karonn tanchea pasot Deva lagim vinoti korunk to sodanch jivo asa.

26 Amkam osleach mha-iadnikachi goroz asa zo visvaxi, guneanv naslolo, dag naslolo, patki lokam poros vegllo, ani sorga poros unch ubarlolo asa. 27 Dusrea mha-iadnika bhaxen, taka poilim aplea patkam pasot ani uprant lokanchea patkam pasot, dor disa bolidan bhettounchi goroz na, karonn tannem ekuch pavtti sodankala pasot apleakuch bolidan mhunn bhettoilo. 28 Karonn Kaidea pormonnem, oslea munxank mha-iadnik mhunn nemtat zankam oskotaieo asat, punn Kaidea uprant soput gheun dilʼlea utra udexim eka Putak mha-iadnik mhunn nemlo, ani taka sasnak poripurnn kela.

8 Tor atam ami jem kitem sangtat tacho mukhel mudʼdo ho: Amcho mha-iadnik oso asa zo sorgar Vortea Devachea xinvasonachea uzvea vatten bosla. 2 To povitr zageacho ani khorea tombucho sevok* zala, zo khoinchea-i munxan nhoi punn Jehovan* ubo kela. 3 Dor eka mha-iadnikak dan ani bolidanam bhettounk nemtat. Taka lagon, hea mha-iadnika lagim pasun bhett diunk kitem tori asop gorjechem aslem. 4 To prithumer aslo zalear iadnik ascho naslo, karonn hanga poilim thaunuch Kaidea pormonnem danam bhettounk iadnik asat. 5 Te kortat ti povitr seva sorga voilea vostuncho nomuno ani savlli zaun asa. Moizes tombu bandpacho aslo tednam Devan taka ji adnea dilʼli tea pormonnem hem asa: Devan taka mhunnttlem: “Dongrar tuka dakhoilʼlo tea nomunea pormonnem sogleo vostu bariksannen toiar kor.” 6 Punn atam Jezuk tachea poros bori seva* mellʼllea karonn to anikui borea bhorvonxeacher kaidea pormonnem stapon kelʼlea vortea koraracho modesti pasun zaun asa.

7 Poilinchea korarant kainch chuk nasli zalear dusrea korarachi goroz poddchi nasli. 8 Karonn oxem mhunnon Dev lokank guneanvkari tharaita: “Jehova* mhunntta, ‘Polloi! Oxe dis ietat jednam hanv Izraelachea ghorabea sangata ani Judachea ghorabea sangata ek novo korar kortolom. 9 Hanvem tanchea purvozancho hat dhorun tankam Ejiptta thaun bhair haddlim tea disa tanchea lagim kelʼlea korara sarko ho korar aschona.’ Jehova* mhunntta, ‘tim mhojea korarak visvaxi ravonk nant dekhun hanvem tanchi kallji ghevop soddun dilem.’

10 “Jehova* mhunntta, ‘Tea disam uprant, hanv Izraelachea ghorabea sangata oso korar kortolom. Hanv mhoje kaide tanchea monant ghaltolom, ani tanchea kallzancher boroitolom. Hanv tancho Dev zatolom ani te mhoje lok zatole.

11 “‘Tea uprant, konnuch aplea desantlea lokank ani aplea bhavak oxem mhunnchona: “Jehovachi* vollokh korun ghe!” Karonn lhanam thaun vhodd, soglim mhaka vollkhotolim. 12 Hanv tankam doia dakhoitolom ani tanchim onitichim kamam ani patkam porot kednanch ugddasak haddchom na.’”

13 “Novo korar,” oxem mhunnon tannem poilincho korar porno zala mhunn dakhoilo. Ani jem kitem porne zalam tem piddʼddear zalam ani kabar zaunchem asa.

9 Poilea korarant povitr seve vixim kaide asle ani prithumer bhokti korunk ek povitr zago pasun aslo. 2 Hea tombunt zo poilo bhag toiar kelʼlo, tantunt ek divo,* mez ani bhettounche undde dovorlole. Tea bhagak Povitr Zago mhunnttat. 3 Punn dusrea poddʼddeachea fattlean Bhov Povitr mhunnttat to bhag aslo. 4 Hea bhagant, bhangrachem ek dhumpannem ani soglea vatten bhangran nettoiloli korarachi pett asli. Korarachea pettient manʼna dovorlolem ek bhangrachem aidon, kolle ailʼli Aronachi boddi ani koraracheo pattio asleo. 5 Tea pettiecher mhoimevont kerub kelʼle, je poschatapachea dhampnneacher* savlli ghaltale. Punn atam heo vostu bariksannen sangpacho ho vell nhoi.

6 Hea toren sogleo vostu toiar zalea uprant, iadnik sodanch tombuchea poilea bhagant povitr seva korunk voitale. 7 Punn dusrea bhagant fokot mha-iadnik ekttoch vorsantlean ekdam voitalo. To rogta xivai bhitor vochonaslo. Hem rogot to aplea pasot ani lokamnim khobor nastana kelolea patkam pasot bhettounk voitalo. 8 Hea toren povitr xokti spoxtt ritin dakhoun dita ki poilo tombu* ubo aslo tea meren povitr zagear* vochpachi vatt dakhoun diunk nasli. 9 Ho tombu aichea kallak lagon ek udharonn koxem zaun asa, ani hea manddavolli pormonnem danam ani iodn bhettoitat. Punn, heo bhettounneo ani iodn povitr seva kortat tea munxanchem ontoskornn purnn toren xudʼdh korunk xokonant. 10 Heo bhetto ani iodn fokot jevnna-khannam vixim ani xudʼdh korchea veg-vegllea riti vixim* asle. Sogleo vostu sudharcho vell pavona tea meren kuddichea vostum vixim aslole he kaide lagu zatale.

11 Punn, Krist poilinch ghoddon geleat tea borea vostuncho mha-iadnik mhunn ailo tednam to anikui vortea ani anikui poripurnn aslolea tombunt gelo. Ho tombu hatamnim bandlolo naslo, mhunnche, rochlolea vostum modlo naslo. 12 To bokddeanchem ani boilanchem rogot gheun nhoi, punn aplench rogot gheun ekuch pavtti sodankala pasot povitr zagear bhitor sorlo ani sasnak amchi suttka keli.* 13 Karonn zor bokddeanchea ani boilanchea rogta udexim, ani paddeancho* gobor oxudʼdh zalʼleancher ximpddailolean, tanchi kudd Devachea nodren xudʼdh zata zalear, 14 sasnak urta toslea povitr xokte udexim apleakuch ek khot naslolo iodn koso Devak bhettoilo tea Kristachem rogot amkam kitlem chodd xudʼdh korunk xokta nhoi! Amkam jivea Devachi povitr seva korunk mellchi mhunn tachem rogot amchem ontoskornn upeog naslolea kamam* thaun xudʼdh korta.

15 Tea pasot, apoileat tankam sasnachea daizachi bhasaunni mellchi mhunn to eka novea koraracho modesti zalo. Tachea mornnak lagon hem soglem ghoddonk pavlem, jea vorvim tankam adlea korara khala kelʼlea patkam thaun soddvonne udexim suttka mellʼlli. 16 Konnui korar kortat tednam korar korta to munis morop gorjechem. 17 Karonn, korar korta to munis melea uprantuch to korar lagu zata. Korar korta to munis jivo asa tea meren to korar lagu zaunk xokona. 18 Heach karonnak lagon, poilo korar pasun rogta udexinch stapon kelʼlo. 19 Moizesan soglea lokam mukhar Kaideachi dor ek adnea vachun dakhoili tednam tannem boilanchea ani bokddeanchea rogta borabor udok ghetlem, ani tambddea rongachea vulan ani boddien* korarachea pustokacher* ani soglea lokancher ximpddailem, 20 ani mhunnttlem: “Devan tumkam zo korar pallunk sangla tea korarachem hem rogot zaun asa.” 21 Tannem tombucher ani povitr sevek* vapurtat tea soglea aidonancher pasun heach toren rogot ximpddailem. 22 Hoi, Kaidea pormonnem, chodd korun sogleo vostu rogta udexim xudʼdh korunk zatat, ani jea meren rogot votoinant, tea meren bhogsonnem mellonkuch xokona.

23 Taka lagon, sorga voilea vostunche he nomune zonvaranchea rogtan xudʼdh korop gorjechem aslem. Punn sorga voileo vostu xudʼdh korunk, zonvaranchea iodna poros vortea iodnanchi goroz asa. 24 Karonn Krist, fokot ek nomuno koso asa toslea, mhunnche, munxachea hatamnim kelʼlea khoinchea-i povitr zagear bhitor soronk na. Punn to sorgar bhitor sorla. Taka lagon, atam to amchea pasot Deva mukhar* ubo asa. 25 Zoso mha-iadnik dor vorsa svotachem nhoi, punn zonvaranchem rogot gheun povitr zagear voita, toso Krist porot-porot svotak iodn mhunn bhettouncho na. 26 Kristak porot-porot aploch iodn bhettouncho poddttalo zalear sonvsarachea* survate thaun taka kitlech pavtti dukh soschem poddttolem aslem. Punn atam, aplem bolidan diun to patok kabar korun sonvsarachea xevottak ekuch pavtti sodankala pasot dison ailo. 27 Jea toren munis ekuch pavtti morta ani tea uprant tachi zhoddtti zavop tharlolem asta, 28 teach toren, zaitea lokanchea patkanchem vojem ubarun vhoronk Kristan ekuch pavtti sodankala pasot aplem bolidan dilem, ani to dusre pavtt ietolo tednam patok kaddun uddounk ieunchona, punn tachi urben vatt polloitat tankam salvar korunk ietolo ani te taka pollounk pavtole.

10 Kaido fuddarak ieuncheo asat tea borea vostunchi savlli zaun asa, punn teo vostu nhoi. Takach lagon, dor vorsa bhettoitat tea ekuch torechea bolidanam udexim, Devachi bhokti kortoleank to* kednanch poripurnn korunk xokona. 2 Oxem zalʼlem zalear, iodn bhettovop, bond zaunche nasle kai? Karonn zor povitr seva korpi ek pavtt xudʼdh zatale zalear tankam porot kednanch apunn patki asa oxem dischem naslem. 3 Tachea bodlek, dor vorsa he iodn lokank tanchea patkancho ugddas korun ditat. 4 Karonn, boilanchea vo bokddeanchea rogtan patkam kaddun uddounk zaich na.

5 Taka lagon, Krist sonvsarant ailo tednam tannem mhunnttlem: “‘Tuka bolidanam ani bhettounneo nakat, punn tunvem mhojea pasot ek kudd toiar keli. 6 Tuka hulpailʼleo bhetto ani patkam pasot kelʼleo bhetto manvonant.’ 7 Tednam hanvem mhunnttlem: ‘Deva polloi! Hanv tuji khuxi purnn korunk ailam, zoxem kovlleant* mhojea vixim boroilʼlem asa.’” 8 Poilim to mhunntta: “Tuka bolidanam, bhettounneo, hulpailʼleo bhetto ani patkam pasot kelʼleo bhetto nakat ani teo tuka manvonant”—him bolidanam kaidea pormonnem bhettoitat— 9 uprant to mhunntta: “Polloi! Hanv tuji khuxi purnn korunk ailam.” Dusri manddavoll suru korunk to poili manddavoll kaddun uddoita. 10 Jea “khuxe” vixim to uloilo teach khuxe udexim amkam povitr kele karonn Jezu Kristan ekuch pavtti sodankala pasot apli kudd iodn mhunn bhettoili.

11 Toxench, dor ek iadnik povitr seva* korunk dor-disa aplea zagear ubo ravta ani porot-porot teach toreche iodn bhettoita, punn he iodn kednanch purnn toren patkam kaddun uddounk xokonant. 12 Punn hea munxan patkam pasot ekuch iodn sodankala pasot bhettoilo ani Devachea uzveak vochon boslo. 13 Tednam thaun to tea vellachi vatt polloita jednam Dev tachea dusmanak tachea paim-anchi monnoi* kortolo. 14 Karonn povitr korta tankam tannem fokot ekuch iodn bhettoun sodankala pasot poripurnn keleant. 15 Ani Devachi povitr xokti pasun amkam hem khorem mhunn sakx dita, karonn ti mhunntta: 16 “‘Tea disam uprant hanv tanchea sangata oso korar kortolom,’ oxem Jehova* mhunntta. ‘Hanv mhoje kaide tanchea kallzamnim ghaltolom, ani te tanchea monancher boroitolom.’” 17 Magir povitr xokti mhunntta: “Hanv tanchim patkam ani tanchim noxttim kamam porot kednanch ugddasak haddchom na.” 18 Jea patkam pasot bhogsonnem mellʼllam, tanchea pasot porot iodn bhettounchi goroz na.

19 Tor, bhav-bhoinnimno, Jezuchea rogta udexim povitr zagear vhorta tea vatter cholot ravonk amkam dhir mellʼlla.* 20 Tannem hi novi ani jivi vatt ukti kelea.* Ti poddʼddo par korun voita, ani ho poddʼddo tachi kudd zaun asa. 21 Ani amche koddem Devachea ghorabeachi dekhrekh korpi mha-iadnik asa. 22 Tor ieiat ami khorea kallzan ani purnn bhavarthan Deva lagim vochom-ia, karonn amchea kallzancher rogot ximpddaun amchem noxttem ontoskornn xudʼdh kelam ani amchea kuddik xudʼdh udkan nhanvoilea. 23 Ieiat ami fattim-fuddem zainastana amchea bhorvonxea vixim soglea lokam mukhar porgott korum-ia, karonn zannem bhasaunni kelea to visvaxi asa. 24 Ani eka-meka vixim chintun* ami mog ani borem kam korunk eka-mekak urba dium-ia.* 25 Toxench, ami ektthaim ievop* soddchem nhoi zoxi thoddeanchi sonvoim asa, punn eka-mekak urba di-it ravchem, ani Devacho dis lagim ieta to ami polloitat toxem hem anikui chodd korit ravchem.

26 Karonn ek pavtt sotachem sarkem ginean mellʼllea uprant, ami zannam zaun patok korit ravtat zalear amchea patkam pasot kosloch iodn na. 27 Punn fokot bhirankull zhoddtti ani virodheank bhosm korta toslo ragacho uzo ravta. 28 Zo munis kaido moddtta taka don vo tin munxanchea govaikechea adaran, doia-maia dakhoinastana marun uddoitat. 29 Tor, zo munis Devachea Putak paim-am ponda maddoita ani taka povitr kela tea korarachea rogtak kainch valorachem na mhunn somzota ani povitr xokte udexim dakhoilʼlea favo naslolea doiecho opman korta, taka anik kitli vhoddli khast favo zatoli tea vixim chintat. 30 “Bodlo ghevop hem mhojem kam, tanchea vaitt kamank lagon hanv tankam farik kortolom.” oxem zannem mhunnttlam taka ami vollkhotat. Toxench, oxem-i boroilʼlem asa: “Jehova* aplea lokanchi zhoddtti kortolo.” 31 Jivea Devachea hatant poddop bhirankull zaun asa.

32 Gineanacho uzvadd mellʼllea uprant, tumi khub vavr korun thir ravon dukh soslem tea adlea disancho ugddas korit ravat. 33 Thodde pavtt sogleam mukhar* tumchim fokannam kelim ani thodde pavtt tumkam dhumallo dilo, tor thodde pavtt hem soglem sostat tanchea sangata tumi tanchea dukhamnim bhagidar zalim.* 34 Karonn jim bondkhonnint asat tanchi poristhiti tumi somzon ghetli ani tumcheo vostu luttun vheleo tori astana tumi khuxalkaien tem sosun ghetlem. Tumchea lagim tea poros bori ani sodankal urta tosli girestkai asa hem zannam zalʼlean tumi oxem kelem.

35 Taka lagon, dhiran* ulovop bond korinakat, karonn tacho tumkam vhodd inam mellttolo. 36 Devachi khuxi purnn kelea uprant, tumkam Devan bhasailam tem mellchem mhunn, sosnikai dakhoiat. 37 Karonn “atam thoddoch vell urla,” ani “zo ieuncho asa to ietolo, to vell korchona.” 38 “Punn mhozo nitivont sevok aplea bhavarthak lagon jietolo,” ani “to fattim sorlo zalear mhaka tachea vixim matui borem dischem na.” 39 Ami fattim soron nas zatat tanchea modlim nhoi, punn bhavarth dovrun aplo jiv vachoitat tanchea modlim zaun asat.

11 Bhavarth mhunnche bhorvonso dovorleat teo vostu ghoddttoleoch mhunn vatt pollovop, ani pollounk nant teo vostu khorench asat mhunn khatri dovrop. 2 Karonn bhavarthak lagon adlea kalla voilea lokank,* te Devak manvoleat mhunn govai mellʼlli.

3 Bhavarthak lagon sonvsarantleo* sogleo vostu Devan aplea utra udexim rochloleo* mhunn ami somzonk xoktat. Taka lagon, distat teo vostu disonant tea vostum thaun ostitvant aileat.

4 Bhavarthak lagonuch Abelan Devak, Kaina poros vorto iodn bhettoilʼlo. Ani heach bhavarthak lagon Devan tachi bhett manun gheun to nitivont mhunn govai dili. To melo hem khorem, punn tachea bhavartha udexim to aiz pasun uloita.

5 Bhavarthak lagonuch Enokan moronn chakchem nhoi mhunn taka dusrea zagear vhelo, ani to khoinch mellonk na. Karonn Devan taka dusrea zagear vhelʼlo. Punn taka vhorchea poilim to Devak manvololo mhunn taka govai dili. 6 Bhavarth nastana, ek munis Devak manvonkuch xokona, karonn zo tachea lagim ieta tannem Dev khoroch asa,* ani zo konn taka kallzantlean sodhta taka to inam dita mhunn visvas dovrunk zai.

7 Bhavarthak lagonuch Noahn Devachi bhirant dhorun aplo ghorabo salvar korunk ek tarum* bandlem, karonn taka Deva koddlean disonaslolea vostum vixim xittkaunni mellʼlli. Ani teach bhavarthak lagon tannem ho sonvsar guneanvkari mhunn dakhoun dilo ani bhavartha udexim melltta tem nitivontponn tannem daiz mhunn melloun ghetlem.

8 Bhavarthak lagonuch Abrahamak apoilo tednam tannem aikolem, ani taka Deva koddlean daiz mhunn mellcho aslo tea zagear vochonk bhair sorlo. Apunn khoim voita tem taka khobor naslem, tori astana to gelo. 9 Bhavarthak lagonuch to bhasailʼlea desant ek pordexi koso ravlo. Teach bhasaunneche daiji asle, tea Izaka ani Jakoba sangata to tombumnim ravlo. 10 Karonn, to oslea xarachi vatt polloitalo zachi buniad ghott asa, ani zacho rochpi* ani bandpi Dev zaun asa.

11 Bhavarthak lagonuch Sarak bhurgem zolmak haddpachi xokti mellʼlli. Khorem mhunnttlear, bhurgeak zolmak haddpachi tichi pirai zaun gelʼli. Karonn jea Devan tika bhasaunni kelʼli to visvaxi* mhunn tinnem manun ghetlolem. 12 Karonn, zo munis melʼlo koso aslo, tachea udexim sorga voilea noketram bhaxen ani doria dege voilea renve bhaxen mezunk zainant titlim bhurgim zolmak ailim.

13 Hea soglea munxamnim moro poriant bhavarth dovorlo. Khorem mhunnttlear, tankam bhasaunneo purnn zatat teo pollounk mellonk na, tori astana tannim pois thaunuch teo polloileo ani khuxal zale. Toxench, tannim apunn tea desant pordexi ani thoddoch temp ravpi mhunn soglea lokam mukhar sangon dilem. 14 Karonn, oxe toren uloitat tim utsuktaien to zago sodhtat mhunn dakhoun ditat zo tancho svotacho zatolo. 15 Ani zo des tim soddun ailʼlim tacho tim ugddas korit ravlolim zalear tankam thoim porot vochonk sondhi mellttoli asli. 16 Punn atam tim anikui boro zago melloun gheunk sodhtat, zacho sombond sorga lagim asa. Teach pasot, Devak apunn tancho Dev, oxem mhunnonk loz disona, ani tannem tanchea pasot ek xar toiar kelam.

17 Bhavarthak lagonuch porikxa zali tednam Abraham, Izakak iodn koso bhettounchoch aslo. Hoi, zannem khuxalkaien bhasaunneo manun ghetleo to aplea ekleach putak iodn koso bhettounk toiar zalo. 18 Taka oxem sanglolem: “Tuka jea sonsti* vixim bhasailam ti Izaka udexim ietoli,” hem sanglolem astana pasun tannem oxem kelem. 19 Dev tachea putak meloleantlo jivont korunk xokta mhunn taka visvas aslo. Taka tacho put mornnachea chopkeantlo porot mellʼllo. Hem fuddem kitem ghoddpachem aslem tachem ek udharonn zalem.

20 Bhavarthak lagonuch fuddem ghoddchem aslem tea vostum vixim Izakan, Jakob ani Esauak besanv dilem.

21 Bhavarthak lagonuch morcho aslo tednam Jakoban, Juzechea dogui putank besanv dilem, ani aplea boddiecho adar gheun Devachi bhokti keli.

22 Bhavarthak lagonuch morchea adim Juzen, Izrael lok Ejiptta thaun bhair sortole mhunn sanglem, ani aplea haddam vixim* suchounneo* dileo.

23 Bhavarthak lagonuch Moizesachea avoi-bapain to zolmolea uprant tin mhoine poriant taka lipoun dovorlo. Karonn to bhurgo khub sobit aslo mhunn tannim polloilem ani tim razachea hukumak bhieunk nant. 24 Bhavarthak lagonuch vhodd zalea uprant, Moizesan apunn Faraoh-chea dhuvecho put mhunnon gheunk nakarlem. 25 Ani thoddeach disam pasot patkanchem sukh bhogchea bodlek, tannem Devachea lokam sangata dukh sosunk vinchun kaddlem. 26 Devacho makhlolo* zalʼlean opman sosop Ejipttantlea soglea theveam poros vhoddli girestkai mhunn tannem manun ghetlem. Karonn tannem apli nodor inamacher dovorloli. 27 Bhavarthak lagonuch tannem Ejiptt soddun dilem. Punn razachea ragak bhieun tannem oxem korunk na, karonn disona toslea Devak polloit asa tea bhaxen to ghott ravlo. 28 Bhavarthak lagonuch tannem Paskanchi porob keli, ani nas korpi malgoddea putank dukhoina zaunk* tannem darachea kasletticher rogot ximpddailem.

29 Bhavarthak lagonuch sukhe zomnir choltat tea bhaxen cholon tannim Tambddo Doria par kelo. Punn Ejipttkar toxem korunk lagle tednam dorian tankam gillʼlle.

30 Bhavarthak lagonuch Izrael lokamnim Jeriko xarachea bhonvtonni sat dis bhonvddi marli tednam tea xaracheo vontteo kosollʼlleo. 31 Bhavarthak lagonuch Rahab nanvachea xindoll bailecho, adnea pallinant tea lokam sangata nas zaunk na. Karonn lipon choukoxi korunk ailolea munxank tinnem aplea ghorant ieukar dilo.

32 Ani konnam-konnam vixim sangom? Karonn hanv Gideon, Barak, Samson, Jeftha, David, toxench Samuel, ani dusrea provadeam vixim sangonk laglom zalear vell pavchona. 33 Bhavarthak lagonuch tannim rajeam jikon ghetlim, nitivontponn stapon kelem, tankam Deva koddlean bhasaunneo mellʼlleo, tannim xinvachim tonddam bond kelim, 34 ujeache xoktecho tancher kainch porinnam zaunk na, tolvarechea dhare thaun te salvar zale, oskot astana-i xoktivont zale, te bhienastana zhuzle ani akromonn kortolea foujek tannim dhanvddaun ghatli. 35 Bailank tanchim mogachim melolim jivont zaun porot mellʼllim. Punn dusreank khub tras diun marun uddoilim karonn tim dusrea khoinchea-i soddvonnechea adaran suttka melloun gheunk toiar naslim. Tankam melea uprant anik bore toren jivont zaunk zai aslem. 36 Hoi, anik zaitea zannanchim fokannam kelim ani tankam chabkamnim marlim. Hea toren tanchi porikxa zali. Titlench nhoi, tankam sanklleamnim bandlim, ani bondkhonnint ghatlim. 37 Tankam fatrailim, tanchea bhavarthachi porikxa zali, khorvotin tanche don kuddke kele, ani tolvarin tankam marun uddoilim. Tim menddranchi ani bokddeanchi chambddi ghalun bhonvtalim, tim gorjek sampoddlolim aslim, tankam dhumallo sosunk poddlo ani vaitt vagnnukecho fuddo korunk poddlo. 38 Tim itlim borim aslim ki ho sonvsar tankam favo toso naslo. Tim oronnʼnneant,* dongrancher, dholimnim ani prithumechea khanchimnim bhonvtalim.

39 Hea sogleank, tanchea bhavarthak lagon Devan apli maniotai asa mhunn govai dilʼli, punn tannim bhasaunni purnn zata ti pollounk na. 40 Karonn Devan polinch amchea pasot kitem tori anik borem tharaun dovorlam, ani tankam amchea bogor poripurnn korchim nhoi mhunn tannem oxem kelem.

12 Tor, sakxeanchem itlem vhoddlem kup amchea bhonvtonnim asa dekhun, ami dor ek vojem ani amkam sompeponnim ghuspaun dovorta tem patok kaddun uddoum-ia, ani amchea mukhar asa tea dhanvddent sosnikaien dhanvot ravom-ia. 2 Toxench, amchea bhavarthacho Mukhel Fuddari ani amcho bhavarth Poripurnn korpi Jezucher ami amchi nodor lavun dovrum-ia. Karonn ji khuxalkai tachea mukhar asli tea pasot tannem apleak loz zatoli mhunn porva korinastana trasanchea khambeacher* moronn soslem, ani atam to Devachea xinvasonachea uzveak bosla. 3 Tumi thokon soddun diunchem nhoi mhunn zannem patki lokanchem itlem opmanachem ulounnem soslem tacher bariksannen dhean diat, tachea add uloun tea lokamnim apleakuch guneanvkari keleat.

4 Patka add zhuztana rogot ieum poriant tumkam azun pasun zhuzonk poddonk na. 5 Ani Devan tumkam aple put koxe lekhun dilʼlo ho solʼlo tumi purnn toren visron geleat: “Mhojea puta, Jehovan* dilʼli xist kainch valorachi nhoi mhunn lekhinaka, vo tannem tuji chuk sudharli zalear dhir soddun dium naka. 6 Karonn Jehova* zancho mog korta tankam to xist dita. Khorem mhunnttlear, to aplo put mhunn apnnaita tea dor ekleak chabkamnim marta.”*

7 Tumkam xist* diunchi hi ek vatt mhunn chintun tumi soxit ravat. Dev tumkam aple put mhunn somzon tumchea lagim oso vagta, karonn oso khoincho put asa zaka tacho bapui xist dina? 8 Punn tumkam sogleank oxi xist diunk na zalear tumi tache put nhoi, punn dusreache put. 9 Amche bapui pasun amkam xist ditale, ani ami tankam man ditalim. Tor, ami jivim urchim mhunn povitr xokte udexim amchea jivitak vatt dakhoita tea Bapak ami anikui adhin ravchem nhoi kai? 10 Karonn amchea bapaimnim fokot thoddeach vella pasot tankam sarkem dista tea toren amkam xist dili, punn Dev amchea borea pasot amkam xist dita. Ami tachea sarkim povitr zaunchim mhunn to oxem korta. 11 Xist melltta tednam survatek konnuch khuxal zaina, tachea bodlek, taka khub dukh zata* hem khorem, punn hi xist manun ghetat tim fuddarak borem foll utpon korunk pavtolim zoxem xanti ani nitivontponn.

12 Taka lagon, tumchea thoklolea hatank ani oskot zalʼlea dimeank ghott korat. 13 Ani zo paim oskot asa to zuddlolo asa thoim thaun bhair sorona zaunk, tachea bodlek, to boro zaunk tumchea panvlank nitt vatt toiar korit ravat. 14 Soglea lokam sangata xantin ravcho ani povitrtai samballcho proitn korit ravat, karonn povitr na zalear konnuch Somiak* pollounk xokona. 15 Devachi favo nasloli doia mellonk konnui chukona zaunk bariksannen dhean diat, hea udexim luksonn korta toslem vikari mull utpon zaun zaite lok oxudʼdh zaunchenant. 16 Tumchea modem konnuch onoitik kuddicho sombond dovorpi* vo Esaua bhaxen povitr vostuncho valor korina toslo ascho nhoi mhunn dhean diat. Tannem fokot eka vellachea jevnnachea bodlek poilo put mhunn aslo to aplo hokʼk vikun dilo. 17 Uprant tannem daiji zalʼlean besanv mellouncho proitn kelo tednam taka nakarlo, hem tumkam khobor asa. Tannem dukham golloun-golloun tacho* nirnnoi bodlunk khub proitn kelo, tori astana, tacho kainch upeog zaunk na.

18 Karonn tumi, hat lavunk zata ani uzo pettla toslea dongra lagim, vo kallea kupa lagim, kallkha lagim ani vadolla lagim ieunk nant. 19 Vo tumi turturecho vhodd avaz ani konnancho tori ulouncho avaz aikonk na, zo aikotanch, atam amkam anik kainch aikonk naka oxi lokamnim vinoti kelʼli. 20 “Ek zonvar pasun tea dongrar gelem zalear taka fatramnim marun uddounchem,” hea adneak lagon tim khub bhielim. 21 Toxench, ho dekhavo itlo bhirankull aslo ki Moizesan mhunnttlem: “Hanv bhirantin koddkoddttam.” 22 Tachea bodlek, tumi Sion Dongra lagim jivea Devachem xar, mhunnche, sorginchea Jeruzalema lagim ani lakʼkhamnim devdutanchea sobhe lagim aileant, 23 ani poilea putanchi sobha, zanchim nanvam sorgar boroileant tachea lagim ani sogleancho Neai korpi Deva lagim ani zankam poripurnn keleant ani povitr xokten zolmoleant tea nitivontam lagim tumi aileant. 24 Toxench, novea koraracho modesti Jezu, ani tannem amcher ximpddailolem rogot, jem Abelachea rogta poros anik borea ritin uloita tachea lagim tumi aileant.

25 Chotrai dhorat, zo tumchea lagim uloita tachem aikonk nakarum nakat.* Karonn zannem prithumer Devachi xittkaunni dilʼli tachem aikonk na te khasti thaun salvar zaunk xokle nant zalear zo sorgar thaun uloita taka fatt keli zalear ami khasti thaun koxim salvar zaunk xoktolim? 26 Tea kallar tachea avazan prithum halʼloli, punn atam tannem oxi bhasaunni kelea: “Hanv porot ek pavtt prithumuch nhoi punn mollob pasun haloitolom.” 27 “Porot ek pavtt,” hea utrantlean amkam kollon ieta ki halounk zatat teo vostu, mhunnche Devan korunk na teo vostu nas zatoleo, halounk zainant teo vostu toxeoch urcheo mhunn oxem zatolem. 28 Tor, amkam ek oxem Raj mellpachem asa zaka konnuch halounk xokona, dekhun ami sodanch Devachi favo nasloli doia melloit ravom-ia, jea udexim ami Devachi bhirant dhorun ani taka man diun taka manvota tea toren tachi seva korit ravonk pavtolim. 29 Karonn amcho Dev bhosm korta toslo uzo zaun asa.

13 Bhavam bhaxen eka-mekacho mog korit ravat. 2 Dusreanchi kallji gheunk* visornakat, karonn oxem korun thoddeamnim nokllo astana devdutank ieukar dilo. 3 Bondkhonnint* asloleam sangata, tumi-i bondkhonnint asat oxem somzon tancho ugddas korat, ani zanchea sangata vaitt toren vagtat, tancho-i ugddas korat. Karonn tumi pasun tanchea sangata ekuch kuddiche bhag zaun asat.* 4 Kazarachea sombondak sogleamnim man diunk zai, ani kazarachi khatt mhelli zaunk diunk zaina, karonn Dev onoitik kuddicho sombond* dovortolea lokanchi ani pordvar* kortoleanchi zhoddtti kortolo. 5 Tumchea jiepachea chalintlean tumkam poixeancho mog na, ani tumchea lagim jem kitem asa tantuntuch tumi dhadoxi asat mhunn dison ieum-di. Karonn Devan mhunnttlam: “Hanv tuka kednanch soddchona, ani hanv tuka modot korop kednanch bond korchona.” 6 Tor ami dhiran oxem mhunnom-ia: “Jehova* mhozo modot korpi zaun asa, hanv bhieunchona. Munis mhaka kitem korunk xokta?”

7 Tumchea modem fuddakar ghetat ani tumkam Devachem utor sanglam tancho ugddas dhorat, ani tanchea vagnnukechea borea porinnamacher dhean diun tanchea bhavarthachi dekh gheiat.

8 Jezu Krist zoso kal aslo, tosoch aizui asa ani sodankal tosoch astolo.

9 Veg-vegllea torechea ani polkea xikounnek lagon fosonakat, karonn jevnnam-khannam poros Devachea favo naslolea doien tumchem kalliz ghott korop chodd borem. Jim jevnnam-khannantuch* buddon astat tankam tachea thaun kainch faido zaina.

10 Amchi ek oxi vedi asa, ziche voilem, tombunt povitr-seva kortoleank khaunk kainch odhikar na. 11 Karonn, mha-iadnik jea zonvaranchem rogot patkanchem bolidan mhunn povitr zagear gheun voitalo, tancheo kuddi sogle tombu asle tea zagea thaun pois zolloitale. 12 Tea pasot, Jezun pasun lokank aplea rogtan povitr korun xarachea darvonttea bhair dukh soslem. 13 Tor ieiat, tannem soslole opman ami pasun sosun, sogle tombu asle tea zagea thaun pois tachea lagim vochum-ia. 14 Karonn hanga amchem oslem xar na jem sodankal urtolem, punn ami urben tea xarachi vatt polloitat jem ieunchem asa. 15 Tor ieiat, ami Jezu udexim sodanch Devak vakhannʼnnecho iodn, mhunnche, tachem nanv sogleam mukhar porgott korta tem amchea vonttanchem foll bhettoum-ia. 16 Titlench nhoi, borem korunk ani tumchea lagim asat teo vostu dusreank vanttunk visornakat, karonn Devak osle iodn khub manvotat.

17 Tumchea modem fuddakar ghetat tanchi adnea pallat ani tankam adhin ravat, karonn tankam tanchea kamancho hixob diuncho poddttolo hem zannam zaun te tumchi dekhrekh kortat. Tannim tanchem kam dukhi zaun nhoi punn khuxalkaien korchem mhunn oxem korat. Karonn te dukhi zaun kam kortat zalear tem tumkanch luksonnachem zatolem.

18 Amchea pasot magnnem korit ravat, karonn amchem ontoskornn nitoll* asa mhunn amkam khatri asa ani hea soglea vostumnim promannikponnan kam korunk amchi itsa asa. 19 Mhaka beginuch tumchea lagim ieunk mellchem mhunn tumi magnnem korchem, oxi hanv tumchea lagim khas korun vinoti kortam.

20 Menddrancho vhodd gonvlli, mhunnche, amchea Somi Jezuk sasnachea korarachea rogtan meloleantlo jivont kelo tea Devan, 21 tumkam apli khuxi purnn korunk dor ek bori vost diunchi, ani tachem kalliz khuxal zatolem oslea dor eka kama pasot amkam Jezu Krista udexim toiar korchim. Takach sodam-sodankal mhoima mellom. Amen.

22 Bhav-bhoinnimno, atam hanv tumchea lagim vinoti kortam ki tumi mhojim him urbechim utram pasiensan aikon gheunchim, karonn hanvem tumkam hi lhan chitt boroilea. 23 Amcho bhav Timotachi suttka zali mhunn hanv tumkam sangonk sodhtam. To begin ailo zalear taka gheun hanv tumkam mellonk ietolom.

24 Tumchea modem fuddakar ghetolea sogleank ani soglea Devachea lokank* mhozo nomoskar. Italint ravpi bhav-bhoinnam tumkam aplo mog dhaddttat.

25 Devachi favo nasloli doia tumcher sogleancher asom.