JAKOBACHI CHITT

1 Jakob, zo Devacho ani Somi Jezu Kristacho chakor zaun asa, to charui vatten ximpoddlolea 12 kullank boroita:

Nomoskar!

2 Mhojea bhavamno, tumi veg-vegllea trasancho fuddo kortat tednam khuxal zaiat. 3 Karonn tumchea bhavarthachi porikxa zalea dekhun sosnikai utpon zata mhunn tumi zannant. 4 Punn sosnikaiek aplem kam korunk diat, jea udexim tumi soglea vostumnim poripurnn ani dag naslolim astolim ani tumchea modem koslench unnemponn aschem na.

5 Tor, tumchea modlea konnankui zannvaiechi goroz asa zalear tannem ti Deva lagim magot ravchi, ani Dev ti taka ditolo. Karonn Dev konnakuch unno mhunn lekhinastana,* sogleank udar kallzan dita. 6 Punn tannem monant kosloch dubhav dhorinastana bhavarthan magot ravchem. Karonn zo dubhavta to varean hevtten-tevtten voitolea doriantlea lharam sarko asa. 7 Khorem mhunnttlear, oslea munxan Jehova* koddlean kitem tori mellttolem mhunn opekxa korchi nhoi. 8 Oslea munxak kitem nirnnoi gheuncho tem kollona, ani to aplea soglea kamamnim thir asona.

9 Zo bhav gorib asa tannem apleak man mellʼlla mhunn khuxal zaunchem,* 10 ani zo bhav girest asa tannem apleak khalto kela mhunn khuxal zaunchem, karonn to ranantlea fula sarko nanch zatolo. 11 Jea toren suriachea gormek lagon fulacho rompo bhavta, tachem ful sukhon poddtta ani tachi sobitkai nanch zata, teach toren, girest munis pasun girestkaiechea fattlean dhanvta dekhun nanch zatolo.

12 Zo munis sosnikaien porikxecho fuddo korit ravta to khuxal, karonn porikxe vellar ghott ravlolean taka jivitacho mukutt mellttolo. Jehovan* aplo mog korit ravtat tankam ho mukutt ditolo mhunn utor dilam. 13 Jednam konnachi-i porikxa zata, tednam tannem oxem mhunnchem nhoi: “Dev mhoji porikxa gheta.” Karonn vaitt vostumnim Devachi porikxa zaunkuch xokona, ani to pasun vaitt vostumnim konnanchich porikxa ghena. 14 Punn dor ekleak tachich itsa voddtta ani bhuloita tednam to porikxent poddtta. 15 Magir itsa gorbest zaun patkak zolm dita, ani patok ghoddlea uprant moronn ieta.

16 Mhojea mogachea bhav-bhoinnimno, fosonakat. 17 Dor ek borem ani poripurnn dennem voilean, mhunnche, sorgar thaun uzvaddachea* Bapa koddlean ieta. To bodlot ravta te savlle sarko kednanch bodolna. 18 Tachi itsa asli dekhunuch tannem amkam aplea sotachea utra udexim zolmak haddlim. Tannem rochloleam modlim ami poilem foll koxim zaunchim mhunn tannem oxem kelem.

19 Mhojea mogachea bhav-bhoinnimno hem somzon gheiat: Dor eklean aikonk utsuk aschem, uloupant tabo dovorcho, ani rokddench ragar zaunchem nhoi. 20 Karonn ragar zata to munis Devachea nitivontponna pormonnem kam korunk xokona. 21 Taka lagon, soglea torechi oxudʼdhtai, ani vaittponnacho dor ek dag tumchea bhitorlo kaddun uddoiat. Toxench, xant monachim zaiat ani tumkam salvar korunk xokta toslem utor, Devak tumchea kallzant rovunk diat.

22 Fokot utor aikotat toslim zainakat, punn tea pormonnem choltat toslim zaiat. Khotte purave diun svotakuch fosoum nakat. 23 Karonn zo munis utor aikota, punn tea pormonnem cholona zalear to arxeant aplem tondd polloita toslea munxa sarko asa. 24 Karonn to svotak polloita ani voita, ani rokddoch apunn koslea torecho munis tem visorta. 25 Punn zo munis svotontrtai dita tea poripurnn kaideak bariksannen topasta ani to kaido pallit ravta, to munis aikon visorna, punn tea pormonnem cholot ravta. Ani oxem kelam dekhun taka khuxalkai melltta.

26 Khoincho-i munis apunn Devachi bhokti korta* mhunn chintʼta punn to aplea jibecher tabo dovorna zalear, to apleakuch fosoita ani tachi bhokti kainch faideachi asona. 27 Amchea Deva ani Bapa mukhar xudʼdh ani nirmoll bhokti hi zaun asa: trasanchea vellar onathanchi ani vidvanchi kallji gheunchi ani svotak sonvsara thaun khot nastana dovorchim.

2 Mhojea bhav-bhoinnimno, tumi amchea mhoimevont Somi Jezu Kristacher bhavarthui dovortat, ani teach borabor bhedbhavui kortat kai? 2 Tumchea sobhent ek munis aplea bottank bhangracheo mudio ani mharog kopdde ghalun ieta, punn ek gorib munis mhelle kopdde ghalun ieta, 3 tednam tumi mharog kopdde ghalun aila taka man diun, “Tum hanga borea zagear bos,” oxem mhunnttat kai? Punn goribak “Tum uboch rav,” vo, “Hanga zomnir mhojea paim-am lagim bos,” oxem mhunnttat kai? 4 Tumi oxem kortat zalear tumi eklo dusrea poros vorto mhunn bhedbhav korinant kai? Ani tumi noxtteponnim neai korpi zainant kai?

5 Mhojea mogall bhav-bhoinnimno, aikat. Devan sonvsarachea nodren gorib asloleank bhavarthant girest zaunk ani tacho mog kortat tankam jea Rajeachi bhasaunni kelea tache daiji zaunk vinchunk nant kai? 6 Punn tumi goribancho opman kelo. Girest lok tumcher zulum korinant kai, ani tumkam korttant voddun vhoronant kai? 7 Te tumkam dilolea borea nanva add uloinant kai? 8 “Tuzo mog korta toso tujea xezareacho mog kor,” ho Devachea utrant dilʼlo razacho kaido tumi pallttat zalear, tumi ekdom borem kam kortat. 9 Punn tumi bhedbhav korop soddun dinant zalear tumi patok kortat, ani kaidea pormonnem tumi guneanvkari zatat.

10 Karonn konnui akʼkho Kaido* palltta, punn ek adnea moddtta zalear tannem akʼkho Kaido moddlolea bhaxen zata. 11 Karonn, jea Devan, “Tunvem pordvar* korcho nhoi,” oxem mhunnttlam, tannench, “Tunvem jivexim marchem nhoi,” oxem-i mhunnttlam. Tor, tunvem pordvar korunk na, punn jivexim marlear tunvem Devacho Kaido moddlo-so zata. 12 Svotontr lokanchea kaidea pormonnem* zanchi zhoddtti zatoli tea lokam bhaxen uloit ravat ani vagat. 13 Karonn zo kakut korina tachi zhoddtti kakut korinastana zatoli. Zhoddtte poros kakut korop vortem zaun asa.*

14 Mhojea bhav-bhoinnimno, konnui apleak bhavarth asa mhunn sangta punn tea bhavartha pormonnem kam korina zalear koslo faido? Oslo bhavarth, taka salvar korunk xokta kai? 15 Khoinchea-i bhava vo bhoinni koddem kopdde nant* ani eka disak pavta titlem jevonnui na, 16 ani tumchea modlo konn tori taka oxem mhunntta, “Xantin voch, tuka kopdde ani khaunk-jevunk bhorpur mellom,” punn jea vostunchi taka goroz asa teo tumi taka dinant zalear koslo faido? 17 Teach toren, fokot bhavarth asop puro nhoi. Kamam bogor bhavarth melolea sarko asa.

18 Punn, konnui mhunnot: “Tum bhavarth dakhoita, punn hanv kam kortam. Tum mhaka tuzo bhavarth kamam bogor dakhoi, ani hanv tuka mhozo bhavarth mhojea kamam vorvim dakhoitolom.” 19 Dev ekuch asa, hem tum patieta kai? Toxem zalear, tem borem zaun asa. Khorem mhunnttlear, noxtte dut pasun hench patietat ani bhirantin koddkoddttat. 20 Are murkh munxa, kamam bogor bhavarth kainch faideacho nhoi mhunn somzonk, tuka puravo zai? 21 Amcho bapui Abrahaman aplea putak, Izakak bhettounk vedicher dovorlo tednam tachea kamam udexim taka nitivont tharaunk na kai? 22 Tannem aplea bhavartha sangata kamui kelem ani tachea kamamnim tacho bhavarth poripurnn zalo mhunn dison ieta. 23 Ani Devachea utrantlim him utram purnn zalim: “Abrahaman Jehovacher* bhavarth dovorlo, ani hea karonnak lagon taka nitivont mhunn lekhlo,” ani taka Jehovacho* ixtt oxem mhunnonk lagle.

24 Tor tumi polloilem toxem eka munxak fokot tachea bhavarthak lagon nhoi punn taka tachea kamank lagon nitivont mhunnttat. 25 Teach toren, Rahab nanvache xindoll bailen, lipon choukoxi korunk ailolea munxank aplea ghorant ieukar dilo ani tankam dusrea vatten bhair dhaddle dekhun, tika tichea kamank lagon nitivont mhunnonk na kai? 26 Khorench, svasa bogor kudd meloli zata, teach toren kamam bogor bhavarth melolo zaun asa.

3 Mhojea bhavamno, amchea modlea zaitea zannamnim xikxok zaunchem nhoi, karonn amchi anikui koddok ritin zhoddtti zatoli mhunn ami zannant. 2 Karonn ami soglim zaitea pavtti chuktat.* Punn khoincho-i munis uloitana chuk korina zalear, to poripurnn zaun asa, ani aplea akʼkhea kuddik pasun tabeant dovrunk xokta.* 3 Ghoddean ami sangtat tea pormonnem vagchem mhunn ami tachea tonddak logam* ghaltat. Hea toren ami tanchi akʼkhi kudd amchea tabeant dovrunk xoktat. 4 Toxench, tarvam vixim pasun chintat: Tim khub vhoddlim astat ani bhorpur varem marlolean tim fuddem voitat. Tori astana, ek lhan verea* udexim tarum choloitat te tankam apleak zai tea vatten vhoronk xoktat.

5 Teach bhaxen, jib pasun amchea kuddicho ek lhan sandho, tori astana, ti khub boddai marta. Polloiat, akʼkhem ran lasun kabar korunk ujeachi ek lhan kitt puro! 6 Toxench, jib pasun ek uzo zaun asa. Kuddichea soglea sandheam modem jib noxtteponnan bhorloli asa, karonn ti akʼkhi kudd oxudʼdh korta ani munxachem akʼkhem jivit lasun uddoita, ani Gehenʼnachea* ujea bhaxen nas korun uddoita. 7 Karonn soglea torechea ranvotti zonvarank, suknneank, pott goxttun cholpi pranneank ani doriantlea pranneank munis posunk xokta ani tannem tankam aplea tabeant dovrun posleant pasun. 8 Punn, khoinchoch munis jibek aplea tabeant dovrunk xokona. Ti ek oxi bhirankull ani tabo dovrunk zaina tosli vost zaun asa, ji jiv kaddtta toslea vikan bhorlea. 9 Heach jiben ami amcho Bap Jehovachi* vakhannʼnni kortat, ani teach jiben “Devan aplea sarkim rochleant tea munxank” ami xirap ditat. 10 Ekach tonddantlean besanv ani xirap bhair sorta.

Mhojea bhav-bhoinnimno, oxem zaunk favona. 11 Ekech zhorintlean godd ani koddu udok bhair soronk xokta kai? 12 Mhojea bhav-bhoinnimno, anjirachea zhaddak zoitunachim follam zaunk xoktat kai vo drakxanchea valik anjiram zaunk xoktat kai? Na. Teach toren, kharea udkantlean godd udok bhair soronk xokona.

13 Tumchea modem zannvai ani somjikai aslolo konn asa? Hem tannem aplea borea vagnnuken dakhounchem ani zannvaie udexim utpon zata tea movall sobhava pormonnem kam korchem. 14 Punn tumi tumchea kallzant dusreancher zollpacho ani zhogddim korpacho hetu* dovortat zalear, boddai marum nakat ani sotachea add fott uloum nakat. 15 Hi sorgar thaun ieta ti zannvai nhoi, tachea bodlek, ti zannvai sonvsarantli, kuddichea itsam pormonnem* asloli, ani Soitanachi zaun asa. 16 Karonn jea zagear dusreancher zollop ani zhogddim astat,* thoim goddbodd ani soglea torechem vaittponnui astolem.

17 Punn sorgar thaun ieta ti zannvai sogleant poilim povitr, xant, somzon gheta tosli, adnea pallunk toiar asta tosli, toxench, kakut ani borea kamamnim bhorloli asa, ti bhedbhav korina ani tantunt dhongeponnui asona. 18 Toxench, jim xanti samballttat, tim xantin vomplolem ani nitivontponn utpon korta toslem pik lunvtolim.

4 Tumchea modem zhuzam ani zhogddim kiteak zatat? Tumcher tabo dovrunk tumchea lagim zhogddot ravtat tea kuddichea itsank lagon nhoi kai? 2 Tumkam zai asta, punn tumkam mellona. Tumi jivexim martat ani as kortat, tori astana, tumi tem melloun gheunk xokonant. Tumi zhogddim ani zhuzam korit ravtat. Tumi magonant dekhun tumchea lagim na. 3 Ani tumi magtat tednam pasun tumkam tem mellona, karonn tumi chukichea udʼdhexan magtat, mhunnche, tumcheo kuddicheo itsa purnn korunk magtat.

4 Are pordvar* korpeamno,* sonvsara sangata ixttagot korop mhunnche Deva sangata dusmankai korop mhunn tumkam khoborna? Karonn, zo konn hea sonvsara sangata ixttagot korunk sodhta to Devacho dusman zata. 5 “Amchea bhitor asa ti nattkai korpachi itsa sodanch amkam veg-vegllea vostunchi as korunk uksaita,” oxem Devachea utrant bexttench mhunnttlam oxem tumkam dista kai? 6 Punn, Deva koddlean melltta ti favo nasloli doia amchea itsam poros chodd xoktivont asa. Taka lagon Devachem utor mhunntta: “Dev gorvixttancho virodh korta, punn khalteank favo nasloli doia dakhoita.”

7 Taka lagon, tumi svotak Devachea adhin korat, punn Soitanacho* virodh korat, ani to tumchea thaun pois pollon voitolo. 8 Devak lagim sorat, ani to tumchea lagim sortolo. Are patkeamno, tumche hat dhuiat. Are dubhavpi lokamno,* tumchim kallzam xudʼdh korat. 9 Tumchea vaitt poristhiti vixim dukh korat ani roddat. Tumchem hansop dukhant ani tumchi khuxalkai niraxiponnant bodlom. 10 Jehovache* nodren khaltim zaiat, ani to tumkam voir kaddttolo.

11 Bhav-bhoinnimno, eka-meka add ulovop bond korat. Zo konn eka bhava add uloita vo tachi nit korta to Devachea kaidea add uloita ani Devachea kaideachi nit korta. Ani tum kaideachi nit korta zalear, tum tea pormonnem cholpi nhoi punn tacho neai korpi zata. 12 Kaide diupi ani Neai korpi ekloch asa. To salvar korunk xokta ani nasui korunk xokta. Punn dusreachi* nit korunk tum konn?

13 Aikat, atam tumi oxem mhunnttat: “Aiz vo faleam ami tea xarant voitolim ani thoim ek voros ravtolim, ani veapar dhondo korun khub poixe zhoddttolim,” 14 punn faleam tumchem jivit koxem astolem tem tumkam khoborna. Karonn tumi tea dova sarkim asat zo thoddoch vell dixtti poddtta ani magir nanch zata. 15 Tachea bodlek, tumi oxem mhunnonk zai: “Jehovachi* khuxi asa zalear, ami faleancho dis polloitolim ani hem kam kortolim vo tem kam kortolim.” 16 Punn tumi gorvan fultat ani boddai martat. Oxe toren boddai marop ekdom vaitt zaun asa. 17 Tor, konnui sarkem tem korunk zannam ani tori astana tem korina zalear, to patok korta.

5 Are girest lokamno, tumcher bhorpur tras ieunche asat, tor roddat ani mottʼttean bob marat. 2 Tumchi girestkai kuson gelea, ani tumchea kopddeank valltti laglea. 3 Tumchea bhangrak ani chandik kollom ailea, ani ti kollom tumchea add govai ditoli ani tumkam khaun uddoitoli. Tumi ektthaim korun dovorlam tem nimannea disamnim ujea sarkem zatolem. 4 Polloiat! Jea manaiamnim tumchea xetant lunvnnechem kam kelʼlem tancho disvoddo tumi addaun dovorla. Tor to disvoddo tumchea add roddot asa, ani modoti pasot manai roddttat tancho avaz fouzancho Dev Jehovachea* kanar poddla. 5 Hea prithumer tumi khub girest jivit jieleant ani tumkam zai toxem tumi kelam. Marun uddounchea disa pasot, khaun-pieun mottim zatat tea zonvaram bhaxen tumi* mottim zaleant. 6 Tumi tea nitivont munxak guneanvkari tharaun marun uddoilo. To tumcho virodh korina kai?

7 Tea pasot bhav-bhoinnimno, amcho Somi hajir asa* tea disa meren pasiens dakhoiat. Polloiat! Ek xetkar zomnichi bori pikavoll mellonk vatt polloita, ani survatecho paus ani uprant poddtta to paus ieum poriant pasiens dakhoita. 8 Toxench, tumi-i pasiens dakhoiat ani tumchim kallzam ghott korat, karonn Somi hajir asa* to dis lagim pavla.

9 Bhav-bhoinnimno, tumchi zhoddtti zaina zaunk tumi eka-meka add gunngunno nakat. Polloiat! Amcho sogleancho Neai korpi dara lagim ubo asa. 10 Bhav-bhoinnimno, Jehovachea* nanvan sondex ditolea provadeamnim dukh sosun ani pasiens dakhoun jem udharonn tumchea mukhar dovorlam tanchi dekh gheiat. 11 Jim sosnikai dakhoitat tim khuxal mhunn ami mantat. Joban koxi sosnikai dakhoili ani Jehovan* taka kitem inam dilo hem tumi aikolam. Hachea voilean Jehova* khub aplemponn* dakhoupi ani kakut korpi Dev zaun asa mhunn tumi somzonk xoktat.

12 Chodd korun, bhav-bhoinnimno soput ghevop bond korat. Sorgacho vo prithumecho vo khoinchea-i vostuncho soput ghenakat. Punn Dev tumchi nit korina zaunk, tumchem “Hoi,” hoi zaum-di ani tumchem “Na,” na zaum-di.

13 Tumchea modem konnui trasancho fuddo korta kai? Tannem magnnem korit ravchem. Tumchea modlo konnui khuxal asa kai? Tannem Devak vakhannʼnnechim gitam* gaunchim. 14 Tumchea modem konnui duent asa kai? Tor, tannem sobhechea vhoddilank apounche, ani tannim tachea pasot magnnem korchem ani Jehovachea* nanvan taka tel launchem. 15 Ani tannim bhavarthan kelʼlem magnnem tea duent* munxak boro kortolem ani Jehova* taka duensantlo ubo kortolo. Toxench, tannem patkam keleant zalear taka bhogsonnem mellttolem.

16 Tea pasot, tumi borim zaunchim mhunn eka-meka mukhar ukteponnim tumchim patkam manun gheiat, ani eka-meka pasot magnnem korit ravat. Eka nitivont munxan kallzantlean kelʼlea vinovnnek khub xokti asta. 17 Elija pasun amcheach sarkim bhavnam aslolo munis aslo, punn tannem paus poddcho nhoi mhunn kallzant thaun magnnem kelem tednam sadde tin vorsam poriant paus poddonk na. 18 Uprant, tannem porot magnnem kelem tednam mollbar thaun paus poddlo ani zomnin pik dilem.

19 Mhojea bhav-bhoinnimno, tumchea modlo konnui sotachea vatte voilo koddsorlo, ani dusrea konnem-i taka porot sarkea vatten haddlo 20 zalear zo konn hea patki munxak chukichea vatte voilo porot haddtta, to taka mornna thaun salvar korta ani tachea zaitea patkam pasot bhogsonnem melloun gheunk taka modot korta.