PEDRUCHI POILI CHITT

1 Hanv Pedru, Jezu Kristacho apostl, tea vinchun kaddloleank hi chitt boroita jim Pontus, Galasia, Kapadosia, Asia ani Bithiniant ximpoddlolim asat ani thoddoch temp ravonk aileant. 2 Tankam Devan, amchea Bapan, fuddara vixim poilinch zannam zaupachi apli tank uzar korun vinchleant ani povitr xokten xudʼdh* keleant. Tannim adnea pallpi zaunchim ani tancher Jezu Kristachem rogot ximpddaunchem mhunn tannem oxem kelem:

Tumcher Devachi favo nasloli doia ani xanti anikui chodd promannan asom.

3 Amchea Somi Jezu Kristachea Devak ani Bapak sodanch vakhannʼnni mellom. Karonn tannem Jezu Kristak meloleantlo jivont korun amchi kakut keli ani amkam ek novo zolm dilo ani sodanch urta toslo bhorvonso dilo. 4 Amkam nas zaina toslem, povitr ani sodanch urta toslem daiz mellchem mhunn tannem oxem kelem. Hem daiz tumchea pasot sorgar samballun dovorlam. 5 Hoi tumchea pasot, zankam Dev apli xokti uzar korun rakhta, karonn tumkam bhavarth asa. Dev tumkam tea taronna pasot rakhta, jem xevottachea vellar dison ietolem. 6 Hea karonnak lagon tumi khub khuxal asat. Tori astana, thoddea vella pasot tumi veg-vegllea torechea porikxenk lagon dukh sosop gorjechem asa. 7 Jezu Krist dison ietolo tea vellar, tumchea porikxa zalʼlea bhavarthak lagon tumkam vakhannʼnni, mhoima ani man mellcho mhunn heo porikxa sosop gorjechem asa. Tumcho ho bhavarth ujeant porikxa zalea uprant* nas zata tea bhangra poros chodd moladik asa. 8 Tumi Kristak kednanch pollounk na, tori astana tumi tacho mog kortat. Ani atam pasun tumkam to disona, tori astana tumi tacher bhavarth dovortat, ani tumi khub khuxal asat. Tumchi hi khuxalkai ekdom vorti asa ani ti utramnim sangonk zaina. 9 Karonn tumchea bhavarthak lagon tumkam inam mhunn, taronn mellttolem hi tumkam khatri asa.

10 Tumchea pasot asa tea favo naslolea doie vixim jea provadeamnim bhasaunni kelʼli, tannim hea taronna vixim bariksannen choukoxi keli ani dhean diun sodh kelo. 11 Tancher kam korta tea povitr xokten tankam Krista vixim jem sanglolem tem khoinchea khas vellar ani koslea poristhitint purnn zatolem hea vixim te sodh korit ravle. Karonn Krist kosle-kosle tras sostolo ani tea uprant taka koxi mhoima mellttoli hea vixim povitr xokten tankam poilich govai dilʼli. 12 Te provadi svota pasot nhoi, punn tumchea pasot seva kortat mhunn tankam Devan kolloilʼlem. Tumkam jem porgott kelam tem tea provadeamnim boroilʼlem, ani sorga voilean dhaddlolea povitr xoktechea modotin tumkam zannim bori khobor porgott kelea tanchea udexim tumi heo vostu aikoleo. Khorem mhunnttlear, heo vostu bariksannen pollounk, devdutank pasun itsa asa.

13 Tor khub vavr korunk tumchim monam toiar korat, ani tumchi chintpachi tank uzar korun soglim kamam korat. Ani tea favo naslole doiecher tumcho bhorvonso dovrat, ji Jezu Krist dison ietolo tednam tumkam mellttoli. 14 Atam tumi Devachi adnea pallttat toslim bhurgim zaun asat. Taka lagon, Deva vixim ginean nastana poilim tumi tumchea vaitt itsam pormonnem vagtalim tea pormonnem vagop bond korat. 15 Tachea bodlek, jea Povitr Devan tumkam apoileant, tachea bhaxen tumi pasun tumchea soglea vagnnuken povitr ravat. 16 Karonn oxem boroilʼlem asa: “Tumi povitr asonk zai, karonn hanv povitr asam.”

17 Zo bhedbhav korinastana dor ekleachi, tanchea kamam pormonnem zhoddtti korta tea Devak tumi Bap mhunn ulo martat zalear, sodʼdheak hea sonvsarant tumi thoddeach vella pasot ravtoleam bhaxen tachi bhirant dhorun jivit sarat. 18 Karonn tumi zannant ki tumchea purvozam koddlean tumi jem faido naslolem jivit jieunk xiklolim tantuntlean tumkam suttka mellʼllea. Hi suttka tumkam, bhangar vo chandi sarkea nas zata tea vostunk lagon mellonk na.* 19 Punn hi suttka tumkam Kristachea moladik rogta udexim mellʼllea, zo khot naslolo ani guneanv naslolo menddro zaun asa. 20 Devan fuddar zannam zaupachi apli tank uzar korun taka sonvsarachea survate poilim vinchun kaddlolo, punn tumchea khatir taka kallachea xevottak dakhoun dilo. 21 Tachea udexim tumi Devacher visvas dovortat. Devan taka meloleantlo jivont kelo ani taka mhoima dili. Tumi Devacher bhavarth ani bhorvonso dovorcho mhunn tannem oxem kelem.

22 Tumi sotachem utor manun gheun apnnakuch xudʼdh keleant, jea vorvim tumi bhavam modem asta toslo dhong naslolo mog dakhounk xoktat. Tea pasot atam kallzan thaun eka-mekacho mog korat. 23 Karonn tumkam nas zata toslea bie udexim nhoi, punn nas zaina toslea bie* udexim, mhunnche, jivea ani sodankal urta tea Devachea utra udexim novo zolm dila. 24 Karonn “sogle munis tonna sarke asat, ani tanchi sobitkai ranantlea fulam sarki asa. Tonn sukon voita, ani ful zoddtta. 25 Punn Jehovachem* utor sodankal urta.” Ani hem “utor” mhunnche tumkam porgottlea ti bori khobor.

2 Dekhun soglea torechem vaittponn, naddponn, dhongiponn, nattkai ani fattlean ulovop soddun diat. 2 Novinch zolmolʼlea bhurgeam bhaxen, xudʼdh* dudha pasot, mhunnche, Devachea utra pasot zobordost torechi bhuk utpon korat, tea udexim tumi vaddot voitolim ani salvar zatolim. 3 Karonn Somi kitlo doiall tem tumi svota chakun polloilam.*

4 Somi ek jivo fator zaun asa, zaka munxamnim nakarla, punn Devan taka vinchun kaddla, ani taka to khub moladik asa. Tumi Somia lagim aileant, 5 dekhun tumi pasun povitr xokte udexim bandta tea mondira pasot jivea fatram sarkim asat. Tumi povitr iadnik zaunchim, ani Jezu Krista udexim povitr xokte pormonnem asat ani Devak manvotat toslim bolidanam bhettounchim mhunn oxem zalem. 6 Karonn Devachem Utor mhunntta: “Polloiat! Hanv Sionant ek vinchun kaddlolo fator dovortam, zo konnxeacho to moladik fator zaun asa, zacher hanv buniad ghaltam ani tacher bhavarth dovorta to kednanch nirax zauncho na.”*

7 To tumchea pasot moladik asa, karonn tumi bhavarth dovortat. Punn bhavarth dovornant tea lokam vixim Devachem utor oxem mhunntta, “bandkam korpeamnim zo fator nakarlo, toch konnxeacho mukhel fator zalo” 8 ani “to tanchea pasot addkholl ghalta toslo fator ani dukhoita toslem khoddop zalo.” Tim addkhollttat karonn tim utor pallinant. Tancho xevott osoch zauncho asa. 9 Punn tumi “vinchun kaddloli zat, raza mhunn kam korpi iadnik, ek povitr raxttr ani Devachi khas porza zaun asa.” Tannem tumkam kallkhantlean bhair kaddun aplea sobit uzvaddant haddlim. Tachea vortea gunnam* vixim akʼkhea sonvsarant porgott korchem mhunn oxem zalem. 10 Karonn eka vellar tumi Devache lok nasle, punn atam tumi Devache lok zaun asat. Eka vellar tumchi kakut korunk nasli, punn atam tumchi kakut kelea.

11 Mogacheamno, hanv tumchea lagim vinoti kortam ki tumi hea sonvsarant pordexi ani thoddeach vella pasot ravpi mhunn jietana, tumchea add zhuz kortat tea kuddichea itsam thaun svotak pois dovrat. 12 Sonvsarachea lokam modem jietana tumchi vagnnuk bori dovrat. Hea udexim te tumcher vaitt kamam kortat mhunn arop laitat tednam, te aplea dolleamnim tumchim borim kamam pollounk xoktole ani, Dev topasnni kortolo tea disa tachi mhoima korunk pavtole.

13 Somia khatir, munxamnim stapon kelʼlea odhikarak adhin ravat. Razak adhin ravat, karonn to sogleant vhoddlo odhikari. 14 Toxench, razpalank adhin ravat, zankam razan vaitt kam kortoleank khast lavunk ani borem kam kortoleank vakhannunk nemleat. 15 Tumi borem kam korun, chintinastana tumchea add uloitat toslea murkh munxanchem tondd bond korchem oxi Devachi itsa asa. 16 Svotontr lokam bhaxen jieiat, punn tumchi svotontrtai, vaitt kamam dhampunk* uzar korinakat. Tachea bodlek, Devache chakor koxe jieiat. 17 Soglea torechea lokank man diat, soglea bhav-bhoinnancho mog korat, Devachi bhirant dhorat, ani razak man diat.

18 Chakramnim aplea dhoniank adhin ravchem ani zoxi tannim tanchi bhirant dhorunk zai toxi tanchi bhirant dhorchi. Tannim fokot borea ani somjikaiechea dhoniankuch nhoi, punn khuxal korunk kotthin asa toslea dhoniank pasun adhin ravonk zai. 19 Karonn konnui Deva mukhar aplem ontoskornn nitoll dovrunk oddchonneancho fuddo korta ani onʼneai sosta zalear Devache nodren tem borem zaun asa. 20 Karonn tumi patok kelam mhunn tumkam mar poddtta ani tumi tem sostat zalear tantunt kitem borem asa? Punn tumi borem kam kortat dekhun dukh sostat zalear Devache nodren tem borem zaun asa.

21 Khorem mhunnttlear, tumkam heach vatten cholonk apoileant, karonn Kristanui tumchea khatir dukh soslem, ani tumi tachi dekh gheunchi mhunn* tannem tumchea pasot ek udharonn dovorlam. 22 Tannem koslench patok korunk na, ani tachea tonddantlean naddbudʼdhechim utram ieunk nant. 23 Tacho opman kelo tednam* tannem porot opman korunk na.* To dukh sostalo tednam, tannem dhomkeo diunk nant. Tachea bodlek zo nitivontponnan neai korta tachea hatant tannem apleak soddlo. 24 Taka khambear* khillailo tednam tannem amchim patkam aplea kuddir ghetlim. Ami amchea patkam thaun svotontr zaunchim ani borem kam korunk jieunchim mhunn tannem oxem kelem. “Tachea ghaveank lagon tumi borim zalim.” 25 Karonn tumi sanddlolea menddram bhaxen aslim, punn atam tumi tumcho gonvlli ani tumchea jivachi dekhrekh korpea lagim porot aileant.

3 Teach toren bailamno, tumi tumchea ghovanchea adhin ravat. Hea toren konnancho-i ghov Devachem utor pallina zalear pasun, bailen aplea vagnnuke udexim ekui utor bhair kaddinastana taka jikhon gheunk zata. 2 Karonn to tichi bori vagnnuk ani ti taka kallzantlean man dita tem pollounk xoktolo. 3 Bhailean dista tea toren sobitkai vaddovop, mhunnche khas toren kens korop* vo bhangar ghalop vo khubuch mharog kopdde ghalop, haka poilo zago dium nakat. 4 Tachea bodlek, tumchi sobitkai tumi kallzant thaun koxim asat tachea vorvim dison ieum-di. Tea pasot, xantponnan ani movallaien tumchi sobitkai vaddoiat. Hi sobitkai kednanch piddʼddear zaina ani ti Devachea nodren khub valorachi asa. 5 Karonn adlea kallar Devacher bhorvonso dovorpi Dev-bhiranticheo* bailo heach toren nhestaleo, ani aplea ghovank adhin ravtaleo. 6 Zoxi, Sara Abrahamak adhin ravtali, ani taka dhoni mhunnttali. Toxim tumi-i borem korit ravlim ani bhirantik tumcher tabo dovrunk dinant zalear tumi pasun ticheo dhuvo zaunk pavtolim.

7 Teach toren ghovamno, tumi tumchea bailam sangata somjikaien* vagat. Bailo, khub samballun uzar korunk poddtta toslea aidona bhaxen asat mhunn vollkhon gheun tankam man diat, na zalear Dev tumchim magnnim aikochona, karonn tumchea sangata tim pasun Devachea favo naslolea doien melltta tea jivitachi daiji zaun asat.

8 Xevottak, tumi soglim eka monachim zaiat, eka-mekachem dukh somzon gheiat, bhavam sarko mog dakhoiat, doia-maia dakhoiat ani khaltim zaiat. 9 Konnui tumkam dukhoita zalear tumi taka dukhoinakat vo konnui tumcho opman korta zalear tumi tacho opman korinakat. Tachea bodlek, borem korat.* Tumkam daiz mhunn besanv mellchem mhunnon, heach vatten cholonk tumkam apoun haddleant.

10 “Zo khuxalkaien jivit sarunk sodhta ani bore dis pollounk sodhta tannem apli jib vaitta thaun rakhchi ani aplea tonddantlean naddbudʼdhechim utram ieunk diunchim nhoi. 11 Tannem vaitta thaun pois ravon, borem tem korit ravchem. Toxench tannem xanti sodhun, ti samballcho proitn korit ravchem. 12 Karonn Jehovachi* nodor nitivont lokancher asa, ani tannim kallzantlean kelʼleo vinovnneo to aikota, punn vaitt kortat tankam Jehova* fatt korta.”

13 Khorem mhunnttlear, tuka borem korunk urba asa zalear konn tuka tras kortolo? 14 Punn nitivontponna khatir tumkam dukh pasun sosunk poddlem zalear tumi khuxal. Lokank jea vostunchi bhirant dista, tea vostunk bhienakat,* nhoi mhunn bejar zainakat. 15 Punn, Kristak tumchea kallzant Somi mhunn vollkhon taka povitr manat. Tumkam asa tea bhorvonxea vixim konnui tumkam prosn vicharta zalear taka zobab diunk sodanch toiar ravat. Punn oxem kortana movallaien ani kallzantlean man diun korat.

16 Tumchem ontoskornn nitoll dovrat. Lok tumchea vixim kitem-i add uloita zalear tumi Kristachim pattlavdaram zalʼlean tumchi vagnnuk kitli bori asa tem polloun te lojent poddttole. 17 Tumi borem kam kortat dekhun dukh sostat, ani Devachi pasun hich khuxi zalear tumi vaitt korun dukh soslea poros borem korun dukh sosop chodd borem zaun asa. 18 Krist pasun amchea patkank lagon ekuch pavtti sodankala pasot melo. Tumkam Deva lagim pavounk, to nitivont asonui nitivont nant toslea lokam pasot melo. Taka marun uddoilo tednam taka munxam sarki kudd asli, punn taka jivont kelo tednam disona tosli kudd dili. 19 Heach poristhitint tannem vochon bondkhonnint aslolea noxttea dutank porgott kelem.* 20 Noah-chea disamnim Dev pasiensan ravlo tednam* heach noxttea dutamnim tachea add kam kelʼlem. Hea kallar Noah tarum* bandtalo, zantunt thoddim zannam,* mhunnche atth zannam udkantlean salvar zalim.

21 Hi ghoddnni, aiz Jezu Kristachea jivontponna udexim tumkam salvar korta tea bautizmachi khunna zaun asa, (bautizm mhunnche kuddichem mhelleponn dhuvun kaddop nhoi, punn ek nitoll ontoskornn di mhunn Deva lagim vinoti korop zaun asa.) 22 Jezu atam sorgar gela ani Devachea uzvea vatten asa, ani devdutank, odhikareank ani xokteank tachea adhin keleat.

4 Kristan kuddint dukh soslem dekhun tumi pasun tachea bhaxen chintop dovrun* toiar ravat. Karonn zo konn dukh sosta, to patok korop soddun dilam mhunn dakhoun dita. 2 Tannem aplem urlolem jivit munxancheo itsa purnn korunk nhoi, punn Devachi khuxi korunk jieunchem mhunn oxem zalem. 3 Sonvsarantlea lokanchi itsa purnn korunk tumi atam meren zo vell sarla to puro. Tea kallar tumi loz naslolim patki kamam* kortalim, tabo dovrunk zaina tosli itsa purnn kortalim, bebdikai kortalim, hispa bhair mouza-mosti kortalim, soreacheo partti kortalim, ani vitt haddtta tosli murti-puza kortalim. 4 Atam tumi tanchea sangata hea onoitiktaiechea chiklant lollchem soddun dilam dekhun te ojap zaleat ani tumchea vixim vaitt uloitat. 5 Punn hea lokank jiveanchi ani meloleanchi zhoddtti korunk toiar asa taka hixob diunk poddttolo. 6 Khorem mhunnttlear, meloleank pasun bori khobor porgott kelʼli. Soglea munxam bhaxenuch tanchi zhoddtti zata, tori astana, Devachea povitr xoktechea margdorxona pormonnem tannim jieunchem mhunn tankam hi khobor porgott kelʼli.

7 Punn soglea vostuncho xevott lagim pavla. Taka lagon, sarkem chintop dovrat ani magnnem korchea babtint zagrut ravat. 8 Punn sogleant mhotvachem mhunnttlear, eka-mekacho kallzant thaun mog korat. Karonn mog zaitim patkam dhampta.* 9 Gunngunno nastana eka-mekachi kallji gheiat.* 10 Veg-vegllea toren Devan favo nasloli doia dakhoilea tache tumi bore sevok zaun asat, ani sevok zalolean, tumchea modlea dor ekleak jem dennem mellʼllam, tem tumi dusreanchi seva korunk uzar korchem. 11 Konnui uloita zalear, tannem Deva thaun mellʼllolo sondex sanglolea porim ulounchem. Konnui seva korta zalear, tannem Dev dita tea xoktechea adaran ti korchi. Hea toren soglea vostumnim Jezu Krista udexim Devachi mhoima zatoli. Mhoima ani xokti sodam-sodankal tachich asa. Amen.

12 Mogacheamno, tumkam ujea sarkea porikxencho fuddo korunk poddtta tednam, tumkam kitem tori vegllench onnbhovunk poddtta oxem chintun ojap zainakat. 13 Tachea bodlek, jitlim tumi Krista sarke dukh-tras sostat titlim tumi khuxal zaiat. Hea toren tachi mhoima dison ietoli tednam tumkam anikui chodd khuxalkai mellttoli. 14 Kristachea nanva pasot, tumcho opman kortat zalear tumi khuxal, karonn Devachi mhoimebhorit povitr xokti tumcher asa.

15 Punn, tumi khuni, chor vo vaitt kam korpi zaleat mhunn vo dusrea lokanchea kamant meter zaleat mhunn tumkam dukh bhogunk poddlolem mhaka naka. 16 Punn konnui Kristanv mhunn dukh sosta zalear, tannem lozchem nhoi. Tachea bodlek, tannem tea nanva pormonnem jieun Devak mhoima di-it ravchem. 17 Karonn zhoddttechi survat zauncho tharailʼlo vell pavlo ani hi zhoddtti Devachea ghora thaun suru zatoli. Atam, hi zhoddtti amchea thaunuch suru zatoli zalear, Devache bore khobre pormonnem cholonant tanchem kitem zatolem? 18 “Eka nitivont munxak salvar zaunk itlem kotthin asa zalear, Devachi bhirant dhorinant toslea ani patki munxanchem kitem zatolem?” 19 Tor, Devache khuxe pormonnem dukh sostat tannim borem kam korit ravchem ani apnnak visvaxi Rochnnarachea hatant ghalchem.

5 Taka lagon, tumchea modem aslolea vhoddilank, hanv zo tumchea sarkoch ek vhoddil, Kristachea dukhancho govai ani fuddarak dison ieunchi asa tea mhoimecho bhagidar, tumkam hi vinoti korta:* 2 Tumkam dilʼlea Devachea hinddacho gonvlleam bhaxen samball korat. Dekhrekh korpi* zalʼlean korchench poddtta mhunn nhoi, punn Deva mukhar khuxen seva korat. Fottingponnan faido zoddchea axen nhoi, punn urben seva korat. 3 Devachem daiz zaun asloleancher hukum choloinakat, punn hindda pasot udharonn zaiat. 4 Ani mukhel gonvlli dison ietolo tednam, kednanch nas zauncho na toslo mhoimecho mukutt tumkam mellttolo.

5 Teach bhaxen, tornnatteamno, tumi zanntteank* adhin ravchem mhunn hanv tumkam vinoti kortam. Tumi soglim eka-meka sangata khaltikaien vagat,* karonn Dev gorvixttancho virodh korta, punn khalteank apli favo nasloli doia dakhoita.

6 Tea pasot, Devachea xoktivont hata khala khaltim zaiat. Oxem kelear, Dev tumkam sarkea vellar voir kaddttolo. 7 Ani tumchea soglea uskeancho bhar tacher ghalat, karonn taka tumchi kallji asa. 8 Tumchi chintpachi tank samballat, zagrut ravat! Tumcho dusman Soitan,* eka gorozta tea xinva sarko, konnui apleak gillun uddounk mellot kai mhunn sodhit bhonvta. 9 Punn tumi bhavarthant ghott ravon tacho fuddo korat, karonn sonvsarbhor aslolea tumchea soglea bhav-bhoinnank osleach torechea dukh-trasancho fuddo korcho poddtta mhunn tumi zannant. 10 Punn thoddo vell poriant, tumi dukh soslea uprant soglea torechi favo nasloli doia dakhovpi Dev tumchem proxikxonn purnn kortolo. Tannem tumkam sasnachea mhoiment apoileant, karonn tumi Kristachea ekvottant asat. To tumkam ghott kortolo, xoktivont kortolo, ani thir ubim ravonk modot kortolo. 11 Xokti sodankal tachich asom. Amen.

12 Zaka hanv visvaxi bhav mhunn mantam, tea Silvanusa* udexim hanvem tumkam him thoddim utram boroileant. Oxem hanvem tumkam urba diunk ani hich Devachi favo nasloli doia mhunn khatri diunk kelem. Tantunt tumi ghott ubim ravat. 13 Babilonant asa ti, ji tumchea bhaxenuch vinchun kaddloli asa, ti tumkam aplo mog dhaddtta, ani toxench mhozo put Markui aplo mog dhaddtta. 14 Eka-mekak mogachea umean nomoskar korat.

Kristachea ekvottant aslolea tumkam sogleank xanti mellom.