PEDRUCHI DUSRI CHITT

1 Simanv Pedru, Jezu Kristacho ek sevok ani apostl, amchea Devachea ani Salvar korpi Jezu Kristachea nitivontponna vorvim, amchea sarko moladik bhavarth melloun ghetla tankam boroita:

2 Deva vixim ani amcho Somi Jezu vixim tumi sarkem ginean gheit ravchem mhunn hanv magtam. Oxem kelʼlean tumkam anikui chodd favo nasloli doia ani xanti mellttoli. 3 Karonn Devachi bhokti korun jivit sarunk jeo vostu gorjecheo asat teo sogleo vostu Devan aplea xokten amkam dileat. Zannem amkam aplea mhoime udexim ani boreponna udexim apoileant, tea Devachem ami sarkem ginean ghetlam dekhun amkam heo vostu mellʼlleat. 4 Hea mhoimek ani boreponnak lagon tannem amkam khub moladik ani vorteo bhasaunneo dileat. Hea bhasaunneam vorvim tumi Devak aslolea gunnanchim bhagidaram zaunchim mhunn tannem oxem kelem. Vaitt itsam udexim utpon zata tea sonvsarantlea broxttachara thaun ami sutton aileant dekhun Devan amkam heo bhasaunneo keleat.

5 Heach karonnak lagon, tumchea bhavartha borabor boreponn vaddoupacho proitn korat, toxench boreponna borabor ginean, 6 gineana borabor svotacher tabo dovrop, svotacher tabo dovrop hachea borabor, sosnikai, sosnikaie borabor Devachi bhokti, 7 Devache bhokte borabor bhav-bhoinnam pasot aplemponn, ani bhav-bhoinnam pasot aplemponn hachea borabor mog vaddoit ravat. 8 Karonn he gunn tumchea modem asat ani bhoron votʼtat zalear tumi amcho Somi Jezu Kristachea sarkea gineanan foll utpon kortolim ani bekar boschimnant.

9 Jea munxa bhitor he gunn nant to kuddʼddo, tannem aple dolle bond keleat ani to uzvadda koddem polloina,* ani tannem khub poilim kelʼlea patkam thaun taka xudʼdh kela mhunn to visorla. 10 Tea pasot bhav-bhoinnimno, tumi anikui koxtti vavr korit ravat, jea udexim tumkam jem apounnem mellʼllam ani tumkam vinchun kaddleant dekhun tumi purtim zaun urtolim. Tumi hem soglem korit ravtat zalear tumi kednanch addkhollon poddchimnant. 11 Khorem mhunnttlear, hea toren amcho Somi ani Salvar korpi Jezu Krist aplea sasnak urta tea Rajeant vhodd mhoimen tumkam bhitor ghetolo.

12 Tumi heo vostu zannant ani tumi xikleant tea sotant ghott ubim asat. Tori astana, tumkam heo vostu ugddas korit ravtolom mhunn hanvem nirnnoi ghetla. 13 Punn jea meren hanv hea tombunt* asam, tea meren tumchi umed vaddounk, tumkam heo vostu ugddas korun divop mhaka sarkem dista. 14 Karonn amchea Somi Jezu Kristan mhaka spoxttponnim kolloilʼlem toxem, beginuch mhozo ho tombu kaddun uddoitole mhunn hanv zannam. 15 Hanv gelea uprant heo vostu tumi tumcheach ugddasak haddcheo mhunn hanv sodanch mhojean zata titlo proitn korit ravtolom.

16 Ami tumkam Somi Jezu Kristachi xokti ani to hajir asa tea vixim sanglem tednam munxamnim huxarkaien ghoddoilʼlea khottea kanneancho adar gheunk na, punn ami svota tachea vortea mhoimeche govai asle. 17 Karonn Dev zo amcho Bap zaun asa tachea koddlean taka man ani mhoima mellʼlli. Tea vellar, vorti mhoima asa tannem taka oxem mhunnttlem:* “Ho mhozo opurbaiecho Put, to mhaka manvola.” 18 Hoi, ami tachea sangata povitr dongrar asle tednam, sorgar thaun ami him utram aikolʼlim.

19 Hea toren provadeanchea utracher amcho visvas anikui ghott zala, ani (jea meren dis uzvaddona ani disachem noketr dixtti poddona) eka kallkhachea zagear, mhunnche, tumchea monant divea sarko uzvadd diupi hea utracher dhean diun tumi borem kortat. 20 Karonn sogleant poilim tumi hem zannam zaiat ki Devachea Utrantli khoinchich bhasaunni konnem-i aplea chintnam pormonnem korunk na. 21 Karonn khoinchich bhasaunni munxachea khuxe pormonnem ieunk na, punn munis Devachea povitr xoktechea margdorxona pormonnem uloile.

2 Punn zoxe Izrael lokam modem khotte provadi ube zalʼle, toxech tumchea modem pasun khotte xikoupi ube zatole. Te konnank kollonastana tumchea modem osle zome haddttole je tumcho bhavarth piddʼddear korun uddoitole, ani tankam vikte ghetleat tea dhoniak pasun te vollkhonant mhunn sangtole. Oxem korun beginuch te svotacher nas haddttole. 2 Titlench nhoi, tanchi dekh gheun zaito lok loz naslolim patki kamam* kortolo, ani tankam lagon dusrim sotache vatte vixim vaitt uloitolim. 3 Toxench, axek lagon te fosoita tea toren uloun tumcho faido ghetole. Punn tanchea pasot khub poilinch khast tharailʼli asa, ani to vell sovkas-sovkas iena ani thambonkui na.

4 Jea devdutamnim patok kelʼlem tankam pasun khast diunk Dev fattim soronk na, punn tankam Tartarusan* uddoile, ani zhoddttecho vell pavo poriant tankam sanklleamnim bandun khub kallokh aslo thoim* dovorle. 5 Adlea sonvsarak khast diunk to fattim soronk na. Apli bhokti korinant toslea lokanchea sonvsaracher tannem buddtti haddli. Punn nitivontponn porgott korpi Noah-k, anik sat zannam sangata salvar kelo. 6 Toxench, Sodom ani Gomora, hea xarancho gobor korun tannem tankam khast dili. Ani hea toren apli bhokti korinant tea lokanchem fuddem kitem zatolem tem dakhounk ek udharonn dovorlem. 7 Punn tannem nitivont Lotak salvar kelo, zo noxttea lokanchi loz naslolim patki kamam* polloun khub nirax zatalo. 8 Karonn ho nitivont munis tanchea modem ravtalo tednam dor disa tanchim noxttim kamam polloun ani tanchim utram aikon tacho jiv tollmollttalo. 9 Apli bhokti kortat tankam porikxentlim koxim vattaunchim, ani noxtteancho nas korunk* zhoddttechea disa poriant koxem dovorchem tem Jehova* boro zannam. 10 Chodd korun tankam, je dusreanchi kudd mhelli korcho proitn kortat ani odhikar asloleank kainch valorache nhoi mhunn lekhtat.

Te* khub ddering astat ani apleak zai toxe vagtat, ani Devan zankam apli mhoima dilea tea lokam vixim vaitt ulounk bhienant. 11 Devdutank hea khottea xikxokam poros khub boll ani xokti asta, tori astana te Jehovak* man ditat dekhun tanchea vixim add uloun tancher arop lainant. 12 Punn he lok somjikai naslolea zonvaram bhaxen asat, je aplea sobhava pormonnem kam kortat. Ani tancho zolm fokot sampddon nas zaunchea khatir zalʼlo asta. Karonn tankam khoborna tea vostum vixim te vaitt toren uloitat. Te nasachea rostear choltat dekhun te apnnacheruch nas voddun haddttat. 13 Te jea vaittponnachea rostear choltat tacho vaitt porinnam tankam bhogunk poddttolo.

Girestkaiechem* jivit jieun mouza korop tankam borem dista. Tankam disachem pasun oxem korunk avoddtta. Te tumcher khotam ani dag koxe aslolean, te tumchea sangata partti kortat tednam tankam apleo khotteo xikounneo sangon dusreank fosounk khub borem dista. 14 Tanchea bhitor pordvar* korchi itsa bhorloli asa* ani patok korchea thaun te apnnakuch addaunk xokonant. Toxench bhavarthant oskot asat tankam* te fosoitat. Tanchea kallzant as korchi sonvoim zalʼli asa. Te xirap poddlole bhurge zaun asat. 15 Tannim nitt vatt soddun dilea, ani te koddsorleat. Beoracho put Balamachea vatten te cholonk lagleat, zaka vaitt kam korun melloun ghetlolo inam avoddttalo. 16 Punn to sarkem asa tachea add gela mhunn taka dakhoun dilem. Vozon ubarun vhorpi, ulounk kollonaslolea zonvaran munxachea avazan uloun tea provadeak murkhponnachem kam korcho addailo.

17 Te udok naslolea zhori sarke ani vhoddlea vadollan uddon voitat toslea kupam sarke asat, ani kallo-kitt kallokh tanchi vatt polloita. 18 Te vhoddleo-vhoddleo vostu uloitat punn teo samkeo pokeo astat. Te loz naslolim patki kamam* kortat, ani vaitt kamam kortolea lokam modle atanch bhair soron aileat tea lokancheo kuddicheo itsa porot vaddouncho proitn kortat. 19 Te tankam svotontrtai diupachem utor ditat, punn te svotach broxttacharache gulam asat. Karonn ek munis konnankui* apnnacher odhikar cholounk dita to tacho gulam zata. 20 Khorench, amcho Somi ani Salvar korpi Jezu Krista vixim sarkem ginean gheun svotak sonvsarantlea mhelleponna thaun pois kelea uprant, te porot teoch vostu korunk lagtat ani tanche gulam zatat zalear tanchi xevottachi poristhiti poilinchea poristhiti poros anikui vaitt zata. 21 Nitivontponnachi vatt khobor asonui tankam mellʼlloli povitr adnea tannim moddli. Tachea bodlek, tankam ti vatt sarke toren somzonkuch nasli zalear chodd borem zatolem aslem. 22 Tanchea vixim hi mhunnʼnni khori zali: “Sunno aplem vonklolem lenvonk porot voita, ani dhuiloli dukorn rebddant lollonk porot voita.”

3 Mogacheamno, atam hanv tumkam hi dusri chitt boroitam. Ani mhojea poile chitti bhaxenuch, hea chittint pasun tumi tumchi chintpachi tank sarke toren uzar korunk hanv tumkam thoddeo vostu ugddasak haddttam. 2 Povitr provadeamnim khub poilim sangloleo* vostu tumi ugddas dovorcheo, toxench amchea Somian ani Salvar korpean, apostlam udexim dilʼleo adnea tumi ugddas dovorcheo mhunn hanv hi chitt boroitam. 3 Sogleant poilim tumi hem zannam zaiat, xevottachea disamnim aplea itsam pormonnem choltat tosle fokannam korpi lok ietole, 4 ani mhunnttole: “To hajir asa mhunn tannem utor dilʼlem, punn to khoim asa? Amche purvoz mornnachea nhident nhidleat tednam thaun soglem zoxem rochnnechea survatek aslem toxench asa.”

5 Khub vorsam poilim mollob aslem ani Devachea utranuch zomin udkachea voir ani udkachea modem thir ubi asli, hem zannam zaun pasun te mudʼdom tacher dhean dinant. 6 Ani tancheach udexim tea kalla voilea sonvsaracher buddtti aili ani tacho nas zalo. 7 Punn Devachea teach utran aichem mollob ani prithum ujeant zolloun uddounk dovorlea ani zhoddttechea disa ani Devachi bhokti korinant tea lokancho nas zata tea disa meren tankam oxench dovorlolem astolem.

8 Punn mogacheamno, Jehovak* ek dis ek hozar vorsam bhaxen ani ek hozar vorsam ek disa bhaxen asa, hem tumi visornakat. 9 Jehova* aplem utor purnn korunk vell kaddtta oxem thoddea lokank dista, punn to toxem korina. To tumkam pasiens dakhoita, karonn konnanchoch nas zalʼlo taka naka. Tachea bodlek, sogleank poschatap korunk sondhi mellʼlloli taka zai. 10 Punn Jehovacho* dis chora bhaxen ietolo. Tea disa, mollob mottʼttean goddgoddacho avaz korit nanch zatolem, ani prithumer ani mollbar asat teo vostu khub gorom zaun koddon voitoleo. Toxench prithum ani tiche voilim soglim kamam ugddapim zatolim.

11 Heo sogleo vostu oxe toren nanch zatoleo* dekhun tumi kosle toreche lok asonk zai tem chintat. Tumchi vagnnuk povitr asonk zai ani tumi Devache bhoktek zuddlolim kamam korunk zai. 12 Toxench, tumi Jehovachea* disachi vatt pollounk zai, ani to dis sodanch tumchea dolleam mukhar dovrunk zai.* Tea disa mollob zollon nas zatolem, ani prithumer ani mollbar asat teo vostu ekdom gorom zaun koddon voitoleo! 13 Punn Devan bhasailʼlea pormonnem ami eka novea mollbachi ani novea prithumechi vatt polloitat. Thoim nitivontponn astolem.

14 Taka lagon mogacheamno, tumi hea soglea vostunchi vatt polloita astana, tachea mukhar khot naslolim, guneanv naslolim ani xantin aslolim mellchim mhunn, tumchea lagim zata titlo proitn korat. 15 Amcho mogall bhav Paulun, Deva koddlean mellʼllea tea zannvaie udexim tumkam boroilʼlem toxem, amchea Dhonian dakhoilam tem pasiens tumkam salvar zaunk ek sondhi mhunn somzat. 16 Tannem aplea soglea chittimnim heach vostum vixim boroilam. Punn tantuntleo thoddeo vostu somzonk kotthin asat, ani jea lokank heo vostu somzonant ani zancho bhavarth oskot asa, te hea vostuncho ani Devachea Utrantlea dusrea vostuncho chukicho orth kaddttat, ani svotacher nas voddun haddttat.

17 Mhojea mogacheamno, heo vostu tumkam poilim thaunuch khobor asat. Tea pasot, noxttea lokanchea khottea xikounneank lagon tumi koddsoron vochona zaunk ani ghott ubim asat tim poddona zaunk, chotur ravat. 18 Tumi Devachi favo nasloli doia anikui melloit ravat, ani amcho Somi ani Salvar korpi Jezu Krista vixim ginean vaddoit ravat. Tachi mhoima aiz ani sodankal zait ravom. Amen.