Juanvachi Poili Chitt

1 Ami tumkam tachea vixim boroitat zo jivitachem utor zaun asa, zo survatek thaun aslo, zachem ami aikolam, zaka ami amchea dolleamnim polloila, zacher ami bariksannen dhean dilam ani zaka ami hat laila. 2 (Hoi, sasnachem jivit amkam dakhoun dilam, ani ami tem polloilam, ani tea vixim ami govai ditat ani tumkam sangtat. Hem sasnachem jivit Bapa thaun asa ani amkam dakhoun dilʼlem.) 3 Tumi-i amchea sangata bhagidar zaunche mhunn, jem ami polloilam ani aikolam tem ami tumkam sangtat. Ani amchem hem bhagidarponn Bapa sangata ani tacho Put Jezu Krista sangata asa. 4 Ani amchi khuxalkai purnn zaunchi mhunn ami tumkam heo vostu boroitat.

5 Zo sondex ami tachea koddlean aikola ani tumkam sangtat to ho: Dev uzvadd, ani tachea bhitor ilʼlo pasun kallokh na. 6 “Ami tachea sangata bhagidar asat,” oxem ami mhunnttat ani tori astana kallkhant cholot ravtat zalear, ami fott uloitat ani sota pormonnem cholonant. 7 Punn zoso to svota uzvaddant asa toxim ami-i uzvaddant cholot ravlim zalear, ami eka-meka sangata bhagidar asat. Ani tachea Putachem, mhunnche, Jezuchem rogot amkam soglea patkam thaun dhuvun xudʼdh korta.

8 “Amchea bhitor patok na,” oxem ami mhunnttat zalear, ami amkanch fottoitat ani sot amchea bhitor na. 9 Dev visvaxi ani nitivont. Taka lagon, ami amchim patkam manun ghetlim zalear, to amchim patkam bhogxitolo ani amkam soglea onitivontponna thaun xudʼdh kortolo. 10 “Ami patok korunk na,” oxem ami mhunnttat zalear, ami taka fotting mhunn tharaitat, ani tachem utor amchea bhitor na.

2 Mhojea mogall bhurgeamno, tumi patok korchem nhoi mhunn hanv heo vostu tumkam boroitam. Ani konnem-i patok kelam zalear amchea pasot ek modot korpi* asa, zo Bapa lagim asa, mhunnche, Jezu Krist, zo nitivont asa. 2 To amchea patkam pasot oslem bolidan zaun asa, jem amkam Deva lagim porot xanti melloun gheunk modot korta. Ani fokot amcheach patkam pasot nhoi, punn akʼkhea sonvsarachea patkam pasot. 3 Ami tacheo adnea pallit ravtat zalear ami taka vollkhotat mhunn amkam kollon ieta. 4 “Hanv taka vollkhotam,” oxem konnui mhunntta, punn tacheo adnea pallina zalear to fotting ani sot tachea bhitor na. 5 Punn konnui tachi adnea palltta zalear khorench tea munxa bhitor Deva pasot mog purnn toren dison ieta. Ani hea vorvim ami tachea sangata ekvottant asat mhunn amkam kollon ieta. 6 Zo konn apunn tachea sangata ekvottant asa mhunn sangta tannem Jezu jielʼlo teach toren jievop* tachi zobabdari zaun asa.

7 Mogacheamno, hanv tumkam boroitam ti ek novi adnea nhoi, punn hi tumkam survatek mellʼlloli tich porni adnea zaun asa. Hi porni adnea tumi poilim aikololem tench utor zaun asa. 8 Tori astana, hanv hi adnea ek novi adnea koxi tumkam boroitam ji Kristan pallʼlloli ani tumi pasun pallttat. Karonn kallokh kabar zait voita ani khoro uzvadd atam thaunuch porzollonk lagla.

9 Zo konn apunn uzvaddant asa mhunn sangta, punn aplea bhavacho dves korta, to atam-i kallkhantuch asa. 10 Zo aplea bhavacho mog korta to uzvaddantuch ravta, ani to koslea-i karonnak lagon addkhollon poddona. 11 Punn zo aplea bhavacho dves korta to kallkhant asa, ani kallkhantuch cholta. Apunn khoim voita tem taka khoborna, karonn kallkhan tache dolle kuddʼdde keleat.

12 Mhojea mogall bhurgeamno, tachea nanva pasot tumchim patkam bhogxileant, taka lagon hanv tumkam boroitam. 13 Bapaimno, survatek thaun asa tea Jezuk* tumi vollkhon ghetla, taka lagon hanv tumkam boroitam. Tornnatteamno, tumi noxtteacher* zoit vhelam, taka lagon hanv tumkam boroitam. Bhurgeamno, tumi Bapak vollkhon ghetla, taka lagon hanv tumkam boroitam. 14 Bapaimno, survatek thaun asa tea Jezuk* tumi vollkhon ghetla, taka lagon hanv tumkam boroitam. Tornnatteamno, tumi bollixtt asat ani Devachem utor tumchea bhitor asa, ani toxench tumi noxtteacher* zoit vhelam, taka lagon hanv tumkam boroitam.

15 Tumi sonvsaracho ani sonvsarantlea vostuncho mog korinakat. Konnui sonvsaracho mog korta zalear, tachea bhitor Bapacho mog na. 16 Karonn sonvsarant asa tem soglem, mhunnche, kuddicheo itsa, dolleanchi axa ani apli girestkai dakhoun shov* marop, hem Bapa thaun nhoi punn sonvsara thaun asa. 17  Titlench nhoi, ho sonvsar ani tacheo itsa* kabar zait voitat, punn zo Devachi khuxi purnn korta to sodankal urtolo.

18 Mogachea bhurgeamno, ho xevottacho kall zaun asa, ani tumi aikolam toxem Kristache virodhi ietat. Atam pasun Kristache zaite virodhi aileat. Hache voilean ho xevottacho kall mhunn amkam kollon ieta. 19 Te amchea modlech bhair soron geleat, punn te amchea bhaxen nasle,* karonn te amchea bhaxen asle zalear te amchea sangatach ravta asle. Punn te bhair soron geleat. Hachea voilean te amchea bhaxen nhoi mhunn sarkem dison ieta. 20 Tumkam povitr Devan makhleant dekhun, tumkam sogleank ginean asa. 21 Tumkam sot khoborna mhunn nhoi, punn tumkam sot khobor asa, ani sota thaun koslich fott bhair soronk xokona, taka lagon hanv tumkam boroitam.

22 Fottkiro konn? Jezuch Krist mhunn nakarta toch nhoi kai? Hoch Kristacho virodhi zaun asa, zo Bapak ani Putak nakarta. 23 Zo konn Putak nakarta, tachea sangata Bap na. Punn zo Putak manun gheta, tachea sangata Bap asa. 24 Tumchea vixim sangchem mhunnttlear, tumi survatek aikolʼlem tem tumchea kallzant dovrat. Tumi survatek aikolʼlem tem tumchea kallzant dovorlem zalear, tumi Putachea ani Bapachea ekvottant astolim. 25 Tea bhair, tannem amkam sasnachem jivit bhasailam.

26  Thodde lok tumkam chukichea vatten vhorcho proitn kortat dekhun hanv tumkam heo vostu boroitam. 27 Tumchea vixim sangchem mhunnttlear, Devan tumkam jea povitr xokten makhleant ti povitr xokti tumchea sangata asta. Tumkam anik konnem-i xikounchi goroz na, punn Devan tumkam makhleant tea udexim to tumkam sogleo vostu xikoit asa, ani hem ek sot, fott nhoi. Ani tumkam makhlolea udexim xikoilam tea pormonnem, tumkam zannem makhleant tachea sangata ekvottant ravat. 28 Tor atam, mhojea mogall bhurgeamno, tachea sangata ekvottant ravat, jea udexim to dison ietolo tednam ami dhiran ukteponnim ulounk pavtolim, ani to hajir asa tea vellar ami lojen tachea thaun pois voichimnant. 29 To* nitivont mhunn tumi zannant zalear, tumkam hem-ui khobor astolem ki zo konn nitivontponnan kam korta to Deva thaun zolmola.

3 Polloiat! Bapan amkam itlo mog dakhoila, ki tannem amkam aplim bhurgim mhunnttleant. Ani khorench ami tachim bhurgim zaun asat. Ho sonvsar amkam vollkhona, karonn sonvsar Bapak vollkhona. 2 Mhojea mogacheamno, atam ami Devachim bhurgim zaun asat, punn fuddarak ami koxim astolim hem amkam azun dakhoun diunk na. To dison ietolo tednam ami tachea bhaxen zatolim, karonn to asa tosoch ami taka polloitolim mhunn amkam sarkem khobor asa. 3 Ani to xudʼdh asa toso, zo konn tacher bhorvonso dovorta to svotak xudʼdh korta.

4 Patok korit ravta to dor eklo kaido moddtta, karonn patok mhunnchech kaido moddop. 5 Jezu amchim patkam kaddun uddounk ailo,* ani tachea bhitor koslench patok na, hem-ui tumi zannant. 6 Dor eklo zo tachea sangata ekvottan asa to patok korit ravona. Zo konn patok korit ravta tannem taka pollounk na vo to taka vollkhonk na. 7 Mhojea mogall bhurgeamno, konnui tumkam fottoina zaum. Nitivontponnan choltat tim Jezu bhaxenuch nitivont asat. 8 Zo patok korta to Soitana* thaun asa, karonn Soitan* survate thaun patok korpi zaun asa. Soitanachim* kamam nas korun uddounk Devacho Put ailo.

9 Zo konn Deva thaun zolmola to patok korit ravona, karonn Devachi povitr xokti* tachea bhitor asta, ani to patok korit ravonk xokona, karonn to Deva thaun zolmola. 10 Devachim bhurgim konn ani Soitanachim* bhurgim konn tim hachea voilean kollon ieta: Zo konn nitivontponnan cholona to Deva thaun ieunk na, toxench zo konn aplea bhav-bhoinnancho mog korina to-ui Deva thaun ieunk na. 11 Karonn survate thaun tumi hoch sondex aikola, ki tumi eka-mekacho mog korunk zai. 12 Ami Kaina bhaxen zaunchem nhoi, zo noxttea* thaun aslo ani zannem doia dakhoinastana aplea bhavak marun uddoilo. Tannem taka kiteak marun uddoilo? Karonn tachim svotachim kamam noxttim aslim, ani tachea bhavachim kamam nitivont aslim.

13 Bhav-bhoinnimno, sonvsar tumcho dves korta mhunn ojap zainakat. 14 Ami melole koxe asle punn atam ami jive zaleat mhunn ami zannant, karonn ami bhav-bhoinnancho mog kortat. Zo mog korina to melolea bhaxen asta. 15 Zo aplea bhav-bhoinnancho dves korta to khun korpi zaun asa, ani khoinchea-i khun korpeak sasnachem jivit mellchem na mhunn tumi zannant. 16 Mog kitem tem amkam hea udexim kollon ieta, karonn Jezu Kristan amchea pasot jiv dilo. Ani ami pasun amchea bhav-bhoinnam pasot amcho jiv divop hi amchi zobabdari zaun asa. 17 Punn konnanchea-i lagim jivit jieunk sogleo vostu asat ani to aplo bhav gorjek sampoddla mhunn polloita, tori astana, taka doia-maia dakhounk nakarta zalear, to Devacho mog korta mhunn koxem mhunnonk zata? 18 Mhojea mogall bhurgeamno, ami fokot amchea utramnim ani tonddan nhoi, punn amchea kamamnim ami kallzantlean mog kortat mhunn dakhoun diunk zai.

19 Hea toren ami sotachea vatten asat mhunn amkam kollon ietolem, ani Dev amcho mog korta mhunn ami amkanch khatri ditolim. 20 Amchem kalliz koslea-i karonnak lagon amkam guneanvkari tharaita zalear pasun, Dev amchea kallzam poros vhodd ani soglem zannam mhunn ami ugddas dovrunk zai. 21 Mhojea mogacheamno, amchem kalliz amkam guneanvkari tharaina zalear, ami ukteponnim Deva lagim ulounk xoktat. 22 Ani ami tachea lagim jem kitem magtat tem to amkam dita, karonn ami tacheo adnea pallttat ani tache nodren borem tench ami kortat. 23 Khorem mhunnttlear, tachi adnea hich: ami tachea Putacher, mhunnche, Jezu Kristachea nanvacher bhavarth dovorcho ani tannem amkam dilea tea adnea pormonnem eka-mekacho mog korcho. 24 Toxench, zo tacheo adnea palltta to tachea sangata ekvottant asta, ani Dev pasun oslea munxa sangata ekvottan asta. Ani tannem amkam dilea tea povitr xokte udexim, to amchea sangata ekvottan asa mhunn amkam kollon ieta.

4 Mhojea mogacheamno, Deva thaun ieta oso dista tea dor eka sondexacher patieum nakat, punn to khorench Deva thaun aila vo na tem polloiat. Karonn sonvsarant zaite khotte provadi bhair sorleat.

2 Khoincho-i sondex Deva thaun asa vo na tem tumi hea toren zannam zaunk xoktat: Zo sondex khorench Deva thaun asa tantunt Jezu Krist hadda-masacho munis zaun ailolo mhunn manun ghetlolem asta. 3 Punn oslo dor ek sondex zantunt Jezu vixim hem manun gheunk na, to Deva thaun na. Tachea bodlek, to sondex Kristachea virodheam thaun asa. Kristache virodhi ho sondex sangtole mhunn tumi aikolʼlem, ani atam khorench ho sondex sonvsarant aikonk melltta.

4 Mhojea mogall bhurgeamno, tumi Deva thaun asat, ani tumi hea lokancher zoit melloun ghetlam. Karonn Dev zo tumchea sangata ekvottant asa, to sonvsarachea ekvottant asa tea Soitana poros vorto asa. 5 He lok sonvsara thaun asat. Taka lagon, te sonvsara thaun asat teo vostu sangtat, ani sonvsar tanchem aikota. 6 Ami Deva thaun asat. Zo konn Devak vollkhota to amchem aikota, zo konn Deva thaun na to amchem aikona. Hea toren khoincho sondex Deva thaun asa ani khoincho sondex khotto asa tem ami zannam zaunk pavtat.

7 Mhojea mogacheamno, ami eka-mekacho mog korit ravom-ia. Karonn mog Deva thaun asa, ani zo konn mog korta to Deva thaun zolmak aila ani Devak vollkhota. 8 Zo mog korina tannem Devak vollkhonk na, karonn Dev mog zaun asa. 9 Aplea Puta udexim amkam jivit mellchem mhunn Devan aplea ekleach Putak hea sonvsarant dhaddlo, hachea voilean Dev amcho kitlo mog korta tem dison ieta. 10 Amchea patkam pasot aplea Putachem bolidan diun, aplea thaim porot xanti melloun gheunk Devan aplea Putak dhaddun dilo. Hem tannem ami tacho mog kortat mhunn nhoi, punn to amcho mog korta mhunn kelem.

11 Mhojea mogacheamno, Devan amcho hea toren mog kela zalear ami pasun eka-mekacho mog korop amchi zobabdari zaun asa. 12 Konnench Devak kednanch pollounk na. Ami eka-mekacho mog korit ravlim zalear Dev amchea sangata asta ani amchea bhitor tacho mog poripurnn toren dison ieta. 13 Tannem amkam apli povitr xokti dilea, taka lagon ami tachea sangata ekvottant asat ani to amchea sangata ekvottant asa mhunn ami zannant. 14 Toxench, Bapan aplea Putak sonvsarak Salvar korpi mhunn dhaddla tem ami svota polloilam ani tea vixim ami govai pasun di-it asat. 15 Zo munis, Jezu Devacho Put mhunn manun gheta, Dev tachea sangata ekvottant asta ani to Deva sangata ekvottant asta. 16 Dev amcho kitlo mog korta tem amkam kollon ailam, ani hacher amkam purnn visvas asa.

Dev mog, ani zo mog korit ravta to Deva sangata ekvottant asta ani Dev tachea sangata ekvottant asta. 17 Hea toren mog poripurnn zata, jea udexim zhoddttechea disa ami fattim-fuddem zainastana dhiran ulounk xoktolim. Karonn, hea sonvsarant ami sarkim Krista bhaxenuch asat. 18 Mogant bhirant asona. Punn, poripurnn mog bhirant pois korta, karonn bhirant amkam addaita. Khorem mhunnttlear, zo bhieta tacho mog poripurnn asona. 19 Poilim Devan amcho mog kelo dekhun ami mog kortat.

20 Konnui zor oxem mhunntta, “Hanv Devacho mog kortam,” punn to aplea bhavacho dves korta zalear to fott uloita. Karonn, zaka tannem polloila tea bhavacho to mog korina zalear, pollounk na tea Devacho to mog korunkuch xokona. 21 Ani tachea thaun amkam hi adnea mellʼllea ki zo konn Devacho mog korta tannem aplea bhavacho-i mog korcho.  

5 Jezuch Krist mhunn bhavarth dovorta to dor eklo Deva thaun zolmola. Ani zo jivit dita tea Devacho mog korta, to tachea bhurgeancho-i mog korta. 2 Ami Devacho mog kortat ani tacheo adnea pallttat tednam ami Devachea bhurgeancho mog kortat mhunn amkam kollon ieta. 3 Devacho mog korop mhunnttlear, ami tacheo adnea pallop, ani tacheo adnea amkam ek vojem koxem nhoi. 4 Karonn zo konn* Deva thaun zolmola tannem sonvsaracher zoit melloun ghetlam. Ani ami sonvsaracher jem zoit melloun ghetlam, tem amchea bhavartha udexim melloun ghetlam.

5 Sonvsaracher konn zoit melloun gheunk xokta? Zaka Jezu Devacho Put mhunn bhavarth asa toch nhoi kai? 6 Zo udok ani rogta udexim aila, to hoch zaun asa, mhunnche, Jezu Krist. To fokot udka sangata nhoi, punn udok ani rogta sangata aila. Ani hea vixim povitr xokti govai dita, karonn povitr xokti khori govai dita. 7 Karonn tin govai diupi asat: 8 povitr xokti, udok ani rogot. Ani hea tiganchi govai ekuch zaun asa.   

9 Ami munxanchi govai manun ghetat zalear Devachi govai tachea poros vorti asa. Karonn Devan apnnench, aplea Puta vixim govai dilea. 10 Zo munis Devachea Putacher bhavarth dovorta tannem Devan dilea ti govai aplea kallzant manun ghetlea. Zo munis Devacher bhavarth dovorna to taka fotting korta, karonn Devan aplea Puta vixim dilʼlea govaikecher tannem bhavarth dovrunk na. 11 Ani ti govai hi zaun asa, ki Devan amkam sasnachem jivit dilam, ani hem jivit amkam tachea Puta udexim melltta. 12 Zo Putak manun gheta tache lagim hem jivit asa, zo Devachea Putak manun ghena tache lagim hem jivit na.

13 Tumi Devachea Putachea nanvacher bhavarth dovortat dekhun tumchea lagim hem sasnachem jivit asa mhunn tumi zannam zaunchem, taka lagon hanv tumkam hem boroitam. 14 Devache khuxe pormonnem, ami kitem-i maglear to amchem aikota mhunn amkam tacher purnn khatri asa.* 15 Ami kitem-i maglear to amchem aikota mhunn ami zannant, taka lagon ami tache lagim kitem-i maglear tem amkam mellttolench mhunn amkam purnn khatri asa.

16 Konnem-i aplea bhavak ek oslem patok kortana polloila, zachi khast moronn nhoi, zalear tannem aplea bhava pasot magnnem korchem, ani Dev taka jivit ditolo. Hoi, tea lokank jivit ditolo zannim oslem patok korunk na zachi khast moronn zaun asa. Punn oslem-i ek patok asa zachi khast moronn. Hanv oslem patok kortolea vixim magnnem kor mhunn sangona. 17 Soglea torechem vaitt kam patok zaun asa, punn oslem-i ek patok asa zachi khast moronn nhoi.

18 Deva thaun zolmola to dor ek munis patok korit ravona mhunn ami zannant, punn tachi rakhonn Deva thaun zolmola to munis* korta, ani noxtto* tacher tabo dovrunk xokona. 19 Ami Deva thaun asat mhunn ami zannant, punn akʼkho sonvsar noxtteachea* tabeant asa. 20 Ami hem-ui zannant ki Devacho Put aila, ani zo khoro asa tachea vixim amkam ginean mellchem mhunn tannem amkam kholaiechi somzonni dilea. Ani ami tea khorea Devacho Put Jezu Krista udexim Devachea ekvottant asat. Hoch khoro Dev zaun asa ani sasnachem jivit toch dita. 21 Mhojea mogall bhurgeamno, murteam thaun pois ravat.