Juanvak Dilʼli Prokasovnni

1 Beginuch kitem ghoddpachem asa tem Jezu Kristan aplea sevokank dakhounchem mhunn Devan taka heo vostu kolloilʼleo.* Jezun aplea dutak dhaddun, Devacho sevok Juanvak khunnam udexim teo dakhoun dileo. 2 Devan dilʼlea utra vixim ani Jezu Kristan dilʼlea govaike vixim, hoi, apnnem polloilʼlea soglea vostum vixim Juanvan govai dili. 3 Zo konn hea bhasaunnentlim utram mottʼttean vachta ani jim hea bhasaunnentlim utram aikon tantunt sangloleo vostu pallttat tim khuxal, karonn tharailʼlo vell lagim pavla.

4 Hanv Juanv, Asiantlea sat sobhank boroitam:

“Zo aslo, zo asa ani zo ieuncho asa,” tachea koddlean ani toxench tachea xinvasona mukhar aslolea sat povitr xokteam koddlean tumkam favo nasloli doia ani xanti mellom. 5 Toxench, “zo Visvaxi Sakxi,” “meloleantlo poilo jivont zalʼlo,” ani “prithume voilea razancho Raza zaun asa,” tea Jezu Krista koddlean tumkam favo nasloli doia ani xanti mellom.

Jezu zo amcho mog korta ani zannem aplea rogtan amkam patkantlean suttka dilea, 6 ani aplea Deva ani Bapa pasot, amkam raza ani iadnik keleat, hoi, taka mhoima ani xokti sodankal mellom. Amen.

7 Polloiat! To kupam sangata ieta. Dor ek dollo taka polloitolo ani zannim taka toplo, te-ui taka polloitole. Ani prithume voilim soglim kullam taka lagon dukhi zaun aplem hoddʼddem boddoitolim. Hoi, Amen.

8 Jehova* Dev “zo aslo, zo asa, ani zo ieta ani zo Sorvxoktivont asa,” to mhunntta: “Hanvuch survat ani hanvuch xevott.”*

9 Hanv Juanv, tumcho bhav ani Jezu Kristacho xis dekhun dukh sosunk, raj korunk ani sosnikai dakhounk tumchea sangata bhagidar zaun asam. Hanv Deva vixim uloitam ani Krista vixim govai ditam dekhun Patmos nanvachea zunvear aslom. 10 Tednam povitr xokten bhoron hanv Somiachea disa pavlom, ani mhaka fattlean thaun turturi vazta toslo ek mottʼtto avaz aikonk ailo 11 zo oxem mhunnttalo: “Tuka jem kitem dixtti poddtta tem kovlleant boroi ani tem hea sat sobhank dhadd: Efez, Smirna, Pergamum, Thiatira, Sardis, Filadelfia ani Laodisia.”

12 Mhojea koddem konn uloita tem pollounk hanv fattim vollʼllom tednam, mhaka bhangrache sat dive* disle. 13 Ani hea diveam modem mhaka paim-am meren pavta title lamb kopdde ghatlolo ani hoddʼddeacher bhangracho pottʼtto bandlolo munxachea puta sarko konn tori dislo. 14 Tachi tokli ani tache kens dhovea vula sarke ani borfa sarke dhovech asle, ani tache dolle ujea sarke asle. 15 Tache paim bhottʼttent tapoilea uprant, chokchokta tea xudʼdh thambea sarke asle, ani tacho avaz ghosghoxean vhanvta tea udka sarko aslo. 16 Tachea uzvea hatant sat noketram aslim ani tachea tonddantlean ek lamb ani donui vatten dhar asloli tolvar bhair sortali. Donparchea vellar suria samko chokchokta toso, tachem tondd chokchoktalem. 17 Hanvem taka polloilo tednam, hanv tachea paim-am koddem melolom koso poddlom.

Tednam tannem aplo uzvo hat mhojer dovorlo ani mhunnttlem: “Bhienaka. Hanvuch Poilo ani Nimanno, 18 ani jietam to hanvuch. Hanv melolom, punn polloi! hanv sodam-sodankala pasot jietam ani mhojea lagim mornnacheo ani Fonddacheo* chaveo asat. 19 Taka lagon, tunvem jem polloilam, ani jem ghoddtta ani jem hea uprant ghoddttolem tem soglem boroun dovor. 20 Ani tunvem mhojea uzvea hatant jim sat noketram polloileant, ani je sat bhangrache dive polloileat tancho povitr gutt ho: Him sat noketram mhunnttlear, sat sobheche devdut ani sat dive mhunnttlear, sat sobha.

2 “Efezantlea sobhechea devdutak oxem boroi: Aplea uzvea hatant sat noketram gheun asa ani bhangrachea sat diveam modem cholta to oxem mhunntta: 2 ‘Tujim kamam ani tuji mhenot ani tuji sosnikai hanv zannam. Tujean vaitt munxank sosun gheunk zaina hem-ui hanv zannam. Toxench, je apostl nastananch apunn apostl mhunn sangtat, tanchi tunvem porikxa kelea ani te khotte mhunn tuka dison ailam. 3 Tum sosnikai dakhoita, ani tunvem mhojea nanva pasot khub soslam ani tum thokonk na. 4 Tori astana, mhaka tujea add hem sangpachem asa ki tujea bhitor poilim zo mog aslo to atam na.

5 “‘Taka lagon, tum khoim thaun poddla tem ugddas kor, ani poschatap kor ani tunvem survatek kelʼlim toslim kamam kor. Tunvem poschatap korunk na zalear, hanv tuje koddem ietolom ani tuzo divo asa tea zagea voilo to kaddun uddoitolom. 6 Tori astana, tujea bhitor ek borem asa, tem mhunnttlear, tum Nikolavachea zomeachea kamacho dves korta, zancho hanv pasun dves kortam. 7 Povitr xokti sobhank kitem mhunntta tem kan asat tannim aikonchem: Zoit melloun gheta taka hanv Devachea sobit bagent,* jivitachea zhaddachem foll khaunk ditolom.’

8 “Smirnantlea sobhechea devdutak oxem boroi: ‘Zo Poilo ani Nimanno asa,’ zo melolo ani jivont zala, to oxem mhunntta: 9 ‘Mhaka tujea sonkoxttam vixim ani goribi vixim khobor asa. (Tori astana tum girest asa.) Ani je Judev nastana apunn Judev mhunnttat, te tujea add uloitat mhunn pasun hanv zannam. Te Soitanachea zomeantle* asat. 10 Tum jem dukh soscho asa tea vixim bhienaka. Polloiat! Tumchi purnn toren porikxa zaunk lagon Soitan* tumchea modlea thoddeank bondkhonnint uddoit ravtolo, ani dha dis poriant tumkam sonkoxttancho fuddo korunk poddttolo. Punn tum moro poriant visvaxi rav, ani hanv tuka jivitacho mukutt ditolom. 11 Povitr xokti sobhank kitem mhunntta tem kan asat tannim aikonchem: Zoit melloun gheta tacher dusrem moronn ieunchem na.’

12 “Pergamumantlea sobhechea devdutak oxem boroi: Zachea lagim lamb ani donui vatten dhar asloli tolvar asa, to oxem mhunntta: 13 ‘Tum khoim ravta tem mhaka khobor asa. Thoim Soitanachem xinvason asa. Tori astana, tum mhaka visvaxi asa.* Ani Soitan ravta tea tujea xarant, mhozo visvaxi sakxi Antipasak marun uddoilo tea disamnim pasun tunvem mhojer bhavarth dovrop soddun diunk na.

14 “‘Tori astana, mhaka tujea add hem sangpachem asa. Tumchea modem Balamachea xikounne pormonnem choltat tosle thodde lok asat. Izraelitkaranchea putamnim murteank bhettoilʼleo vostu khauncheo ani onoitik kuddicho sombond* dovorcho mhunn Balaman, Balakak tanchea vatter addkholltta toslo fator dovrunk xikoilem. 15 Toxench, tumchea modem Nikolavachea zomeachea xikounne pormonnem choltat tosle lok pasun asat. 16 Taka lagon, poschatap kor. Ani tum poschatap korina zalear, hanv tujea lagim rokddoch ietam, ani mhojea tonddantlean bhair sorta tea lamb tolvarin hanv tanchea add zhuz kortolom.

17 “‘Povitr xokti sobhank kitem sangta tem kan asat tannim aikonchem: Zoit melloun ghetat tankam hanv lipoun dovorlolea manʼnantlem thoddem manʼna ditolom, ani ek dhovo gullgullit fatorui ditolom. Tea fatracher ek novem nanv boroilʼlem astolem, jem konnankuch khobor aschem na punn zachea lagim to fator asa takach tem nanv khobor astolem.’

18 “Thiatirantlea sobhechea devdutak oxem boroi: Devacho Put, zache dolle ujea sarke asat ani zache paim xudʼdh tambea sarke asat to oxem mhunntta: 19 ‘Mhaka tujea kamam vixim, moga vixim, bhavartha vixim, seve vixim, ani sosnikaie vixim khobor asa. Toxench tujim atanchim kamam tunvem poilim kelʼlea kamam poros chodd asat mhunn hanv zannam.

20 “‘Tori astana, mhaka tujea add hem sangpachem asa ki Jezebel nanvachea bailek tum sosun gheta. Ti apunn ek provadin mhunntta, ani mhojea sevokank onoitik kuddicho sombond* dovrunk fosoita ani tankam murteank bhettoilʼlem jevonn jevunk xikoita. 21 Hanvem tika onoitik kuddicho sombond* soddun poschatap korunk vell dilo, punn ti oxem korunk toiar na. 22 Polloi! Hanv ticher oslem duens dhaddttolom ki ti hantrunnar poddttoli. Ani tichea sangata pordvar* kortat te tichea sarkim kamam korop soddun diun poschatap korinant zalear, hanv tankam vhodd sonkoxttant uddoitolom. 23 Hanv tichea bhurgeancher bhirankull pidda dhaddun tankam marun uddoitolom. Tednam soglea sobhank kollon ietolem ki hanv toch zo munxachea bhitorlim kholaiechim chintnam* ani kallzam topastam. Ani hanv tumchea modlea dor ekleak tumchea kamam pormonnem foll ditolom.

24 “‘Punn Thiatirant aslole urlole lok, je hea xikounne pormonnem cholonant, ani “Soitanacheo kholaiecheo vostu” mhunnttleat tea vixim zankam kainch khoborna tankam hanv hem sangtam: Hanv tumcher anik koslench vojem ghalina. 25 Tumchea lagim jem kitem asa, tem hanv ieum poriant ghott dhorun ravat. 26 Ani zo zoit melloun gheta ani xevott mhunnosor mhojea bhaxen kamam korta, taka hanv raxttrancher odhikar ditolom, 27 ani to tea lokancher gonvlleam bhaxen lokhnnachea danddean odhikar choloitolo ani matiechea aidonam bhaxen tancho churo korun uddoitolo. Ho odhikar mhaka mhojea Bapa koddlean mellʼlla. 28 Zoit mellon gheta taka hanv sokallchem noketr ditolom. 29 Povitr xokti sobhank kitem sangta tem kan asat tannim aikonchem.’

3 “Sardisantlea sobhechea devdutak oxem boroi: Zachea lagim Devacheo sat povitr xokteo asat ani sat noketram asat to oxem mhunntta: ‘Hanv tujim kamam zannam. Tum jivo asa mhunn lok somzotat, punn tum melolo asa. 2 Tea pasot, zagrut rav, ani moronk pavleat teo urloleo vostu ghott kor, karonn mhojea Deva mukhar tunvem tujim kamam purnn korunk nant mhunn hanvem polloilam. 3 Tuka jem mellʼllam ani tunvem jem aikolam tacher sodanch dhean di-it rav,* tea pormonnem cholot rav, ani poschatap kor. Tum zago zaina zalear, hanv okosmat eka chora bhaxen ietolom, ani hanv khoinchea vellar ietolom tem tuka khobor pasun aschina.

4 “‘Tori astana, Sardisant tumchea modem thodde osle lok asat,* zannim aplea kopddeancher dag lagonk diunk na, ani te mhojea sangata dhove kopdde ghalun choltole, karonn tankam ho man mellonk te purte asat. 5 Zo zoit melloun gheta taka tech bhaxen dhove kopdde nhesoitole. Ani hanv jivitachea pustoka thaun tachem nanv kednanch pusun kaddchom na, punn mhojea Bapa mukhar ani tachea devdutam mukhar taka manun ghetolom. 6 Povitr xokti sobhank kitem sangta tem kan asat tannim aikonchem.’

7 “Filadelfiantlea sobhechea devdutak oxem boroi: To zo povitr ani khoro asa, zachea lagim Davidachi chavi asa, zo daram oxea ritin ugoddtta ki konnuch bond korunk xokona ani oxea ritin bond korta ki konnuch ugddunk xokona to oxem mhunntta: 8 ‘Hanv tujim kamam zannam. Polloi! Hanvem tujea mukhar ek dar ugoddlam, jem konnuch bond korunk xokona. Tujea lagim thoddi xokti asa, ani tunvem mhojeo adnea pallʼlleat ani mhojem nanv nakarunk na hem-ui hanv zannam. 9 Polloi! Je Soitanachea zomeantle* asat ani Judev nastananch fott marun apunn Judev mhunnttat, tankam hanv tujea lagim haddttolom. Ani te tujea paim-am poddttole. Hanv tuzo mog kortam mhunn hanv tankam dakhoun ditolom. 10 Tunvem mhojea sosnikaie vixim jem aikolam tea pormonnem tum cholʼla* dekhun, prithumer ravtoleanchi porikxa zaum mhunn akʼkhea sonvsaracher, zo porikxecho vell ieuncho asa, tea vellar hanv tuka samballttolom. 11 Hanv rokddoch ietam. Konnuch tuzo mukutt tujea thaun kaddun vhorona zaunk, tujea lagim jem kitem asa tem ghott dhorun rav.

12 “‘Zo zoit melloun gheta taka hanv mhojea Devachea mondirant ek khambo kortolom, ani to porot kednanch tea mondira bhair voichona. Ani hanv tacher mhojea Devachem nanv ani mhojea Devachea xarachem nanv, mhunnche, Deva koddlean sorgar thaun denvta tea Novea Jeruzalemachem nanv, ani mhojem novem nanv pasun tacher boroitolom. 13 Povitr xokti sobhank kitem sangta tem kan asat tannim aikonchem.’

14 “Laodisiantlea sobhechea devdutak oxem boroi: Zo Amen, visvaxi ani khoro sakxi, ani Devan rochlolea rochnnechi survat zaun asa to oxem mhunntta: 15 ‘Hanv tujim kamam zannam, tum thondd na ani goromui na. Tum ek tor gorom vo thondd asonk zai aslo. 16 Tum gorom na ani thonddui na punn ubechea udka sarko asa, taka lagon hanv tuka vonkun mhojea tonddantlo bhair uddoitolom. 17 Tum mhunntta, “Hanv girest ani hanvem zaiti girestkai melloun ghetlea ani mhaka kosleach vostunchi goroz na.” Punn tum kitlo lachar, churchurem korpa sarko, gorib, kuddʼddo ani vingllo asa tem tuka khoborna. 18 Tea pasot, hanv tuka solʼlo ditam ki tum mhojea koddlean ujeant gorom korun xudʼdh kelam tem bhangar viktem ghe, jea udexim tum girest zatolo. Ani nhesonk mhojea koddlean dhove kopdde vikte ghe, jea udexim lok tujem vingllemponn pollounk pavchenant ani tuka loz bhogchina. Ani tujea dolleank lavunk vokhod viktem ghe jea udexim tum pollounk xoktolo.

19 “‘Hanv zancho mog kortam, tankam sogleank hanv xittkaitam ani xist ditam. Tor urba dakhoi ani poschatap kor. 20 Polloi! Hanv darar ubo asam ani darar martam. Konnui mhozo avaz aikon dar ugoddtta zalear, hanv tachea ghorant bhitor voitolom ani tachea sangata sanjechem jevonn jevtolom ani to mhojea sangata jevtolo. 21 Hanvem zoit melloun ghetlea uprant, hanv zoso mhojea Bapa sangata tachea xinvasonacher boslom, tosoch zo zoit melloun gheta taka hanv mhojea sangata mhojeach xinvasonacher bosonk ditolom. 22 Povitr xokti sobhank kitem sangta tem kan asat tannim aikonchem.’”

4 Tea uprant, polloiat! mhaka sorgar ek uktem dar dislem, ani mhojea lagim uloitalo to poilincho avaz mhaka aikonk ailo. To eka turturechea avaza sarko aslo. Tea avazan mhaka mhunnttlem: “Hanga voir ieo, hanv tuka teo vostu dakhoitolom jeo fuddem ghoddttoleoch.” 2 Ani tea uprant rokddich povitr xokti mhojer denvli, ani polloiat! hanvem sorgar ek xinvason polloilem, ani tacher konn tori boslolo aslo. 3 Tacher boslolo tachem rup jasper* ani sardius* fatra sarkem aslem, ani tachea xinvasona bhonvtim emerald* fatra sarko rainbow aslo.

4 Tea xinvasona bhonvtonnim 24 xinvasonam aslim ani tea xinvasonancher hanvem 24 vhoddil boslole polloile. Te dhove kopdde ghalun asle ani tanchea toklecher bhangrache mukutt asle. 5 Tea xinvasonantlean zoglam martalim. Toxench, avaz ani goddgodd aikonk ietalo. Ani xinvasona mukhar pettoilole sat ujeache dive asle. He sat dive mhunnttlear, Devacheo sat povitr xokteo. 6 Ani xinvasona mukhar konvchechea doria sarkem kitem tori aslem, jem hirea sarkem ar-par distalem.

Xinvasonachea modem* ani tachea charui vatten jive pranni asle, je fuddlean ani fattlean sogleakuch dolleamnim bhorlole asle. 7 Poilo jivo pranni xinva sarko distalo, dusro jivo pranni boila sarko aslo, tisrea jivea pranneachem tondd munxachea tondda sarkem aslem ani chovtho jivo pranni uddtta tea ghonni sarko aslo. 8 Hea char pranneam modlea dor ekleak sov-sov pakotte asle. Te charui vatten, ani bhitorlean dolleamnim bhorlole asle. Ani te dis ani rat thambonastana oxem mhunnttale: “Jehova* Dev Sorvxoktivont, zo aslo, zo asa ani zo ieta, toch povitr, povitr, povitr zaun asa.”

9 Xinvasonar boslolo asa ani sodam-sodankal jieta tea Devak jitle pavtti he jive pranni mhoima ani man ditat ani tache upkar attoitat, 10 title-i pavtti he 24 vhoddil, xinvasonar boslolo asa ani sodam-sodankal jieta tachea paim-am poddon tachi bhokti kortat. Te aple mukutt kaddun tachea xinvasona mukhar dovortat ani mhunnttat: 11 “Jehova* amchea Deva, tukach mhoima, man ani xokti favo, karonn tunvench sogleo vostu rochleat, ani tujeach khuxen teo ostitvant aileat ani rochloleo.”

5 Xinvasonar boslolo aslo tachea uzvea hatant kovllo asa to hanvem polloilo. Tea kovlleachea donui vatten* boroilʼlem aslem ani sat xikʼke marun to bond kelʼlo. 2 Ani hanvem ek xoktivont devdut polloilo zo mottʼttea avazan oxem mhunnttalo: “He xikʼke foddun to kovllo ugddunk konn purto asa?” 3 Punn sorgar vo prithumer vo prithume sokol to kovllo ugddunk vo to vachunk konnuch purto naslo. 4 Ani hanv dukam golloun roddonk laglom karonn to ugddunk vo to vachunk konnuch purto naslo. 5 Tednam vhoddilam modlea eklean mhaka mhunnttlem: “Roddonaka. Polloi! Judantlea kullantlo Xinv zo Davidachem mull zaun asa tannem ho kovllo ani sat xikʼke ugddunk zoit melloun ghetlam.”

6 Xinvasona lagim* ani tea char jivea pranneam modem, toxench vhoddilam modem hanvem ek menddro polloilo. Tea menddreachem bolidan dilʼlem. Taka sat xingam ani sat dolle asle. Hea dolleancho orth, akʼkhea prithumer dhaddleat teo Devacheo sat povitr xokteo. 7 To menddro rokddoch fuddem sorlo ani tannem xinvasonar bosloleachea uzvea hatantlo to kovllo ghetlo. 8 Ani tannem to ghetlo tednam tea char jivea pranneamnim ani 24 vhoddilamnim tea Menddreak nomoskar kelo. Dor eka vhoddila lagim ek kinori* ani bhangrachem aidon aslem, jem dhumpan bhorlolem aslem. (Ho dhump mhunnttlear, Devachea lokanchim* magnnim.) 9 Ani te novem git gaun oxem mhunnttale: “Tunch ho kovllo gheunk ani tache xikʼke ugddunk purto asa, karonn tujem bolidan dilʼlem ani tunvem tujea rogtan dor eka kulla thaun, bhaxe thaun, zati thaun ani raxttra thaun lokank Deva pasot vikte ghetleat. 10 Ani tunvem tankam amchea Deva pasot raza ani iadnik kele, ani te raza koxe prithumecher raz kortole.”

11 Ani hanvem xinvasona bhonvtonnim, ani tea jivea pranneam bhonvtonnim, toxench vhoddilam bhonvtonnim mezunk zainant title devdut polloile, ani tancho avaz aikolo. Te lakʼkhamnim-koroddamnim asle, 12 ani mottʼttea avazan oxem mhunnttale: “Bolidan kelʼlo ho Menddro xokti, girestkai, zannvai, boll, man, mhoima ani besanv mellonk purto asa.”

13 Ani hanvem sorgar, prithumer, prithume sokol, doria voir aslolo dor ek pranni ani tantunt aslolem soglem oxem mhunntta tem aikolem: “Xinvasonar bosloleak ani Menddreak vakhannʼnni, man, mhoima ani xokti sodam-sodankal mellom.” 14 Te char jive pranni oxem mhunnttale: “Amen!” ani vhoddil dimi ghalun Devak paim-am poddle.

6 Ani Menddrean sat xikʼkeantlo poilo xikʼko ugoddlo tem hanvem polloilem, ani char jivea pranneam modlea eklean goddgodda sarkea avazan oxem mhunnttlem: “Ieo!” 2 Ani polloiat! hanvem ek dhovo ghoddo polloilo ani tacher boslolo tachea lagim ek dhonu aslo. Taka ek mukutt dilʼlo, ani to aplea dusmanak haroun zoit melloit gelo.

3 Ani tannem dusro xikʼko ugoddlo tednam hanvem dusro jivo pranni oxem mhunntta tem aikolem: “Ieo!” 4 Tea uprant ujea sarkea tambddea rongacho ek ghoddo bhair ailo. Ani lokamnim eka-mekak jivexim marun uddounchem mhunn tacher bosloleak prithume voili xanti kaddun vhoronk odhikar dilʼlo. Toxench taka ek vhoddli tolvar dilʼli.

5 Ani tannem tisro xikʼko ugoddlo tednam hanvem tisro jivo pranni oxem mhunntta tem aikolem: “Ieo!” ani polloiat! Hanvem ek kallo ghoddo polloilo, ani tacher bosloleachea hatant ek tagddi asli. 6 Ani tea char jivea pranneam modlean mhaka ek avaz aikonk ailo. To mhunnttalo: “Ek kilo* gonv ek dinarak,* ani tin kilo zovar ek dinarak, zoitunachem tel ani drakxancho soro piddʼddear korinakat.”

7 Tannem chovtho xikʼko ugoddlo tednam hanvem chovtho jivo pranni oxem mhunntta tem aikolem: “Ieo!” 8 Ani polloiat! Hanvem gobrea rongacho ghoddo polloilo. Tacher boslolo tachem nanv Moronn aslem. Ani Fondd* tachea fatto-fatt ietalo. Ani ek lamb tolvarin ani jevnna-khannachea unneponnan ani bhirankull pidden ani prithume voilea ranvotti zonvaram udexim marun uddounk, taka prithumechea chovtea bhagacher odhikar dilʼlo.

9 Tannem panchvo xikʼko ugoddlo tednam hanvem vedichea ponda lokanchem rogot* polloilem. Hea lokank, Devachea utra pormonnem choltat dekhun ani tannim dilʼlea govaikek lagon marun uddoile. 10 Tannim mottʼttea avazan oxem mhunnttlem: “Akʼkhea vixvachea Dhonia, povitr ani khorea Deva, tum kednam mhunnosor neai korchona ani prithumer ravtolea lokam thaun amchea rogtacho bodlo gheunchona?” 11 Tanchea modlea dor ekleak dhove kopdde dilʼle, ani tanchea sarkech tanchea sangata kam korpi chakrank ani bhavank beginuch marun uddoupache asle. Tancho ankddo purnn zai meren tankam anik thoddo vell ravonk sanglolem.

12 Tannem sovʼvo xikʼko ugoddlo tednam ek vhoddlo bhuimkamp zalo tem hanvem polloilem. Suria, kensamnim* kelʼlea saka bhaxen kallo zalo, ani akʼkho chondrim rogta bhaxen tambddo zalo. 13 Ani zoxem borench varem marlolean anjirachea zhaddachim tornim anjiram poddttat toxim mollba voilim noketram prithumer poddlim. 14 Kovllo kovllun dovortat toxem mollob nanch zalem, ani dor ek dongor ani dor ek zunvo tachea zagea voilo kaddun uddoilo. 15 Tednam prithume voile raza, vhoddle-vhoddle odhikari, senapoti, girest ani xoktivont lok, dor ek chakor ani dor ek svotontr munis dholimnim ani dongrachea khoddpamnim liple. 16 Ani te dongrank ani khoddpank oxem mhunnot ravle: “Amcher poddat ani amkam lipoiat ani xinvasonar bosla tachea thaun ani Menddreachea raga thaun amkam salvar korat, 17 karonn tanchea ragacho vhodd dis aila, ani konn tanchea mukhar ubo ravonk xokta?”

7 Tea uprant hanvem char devdutank, prithumechea char konnxeancher ube aslole polloile. Prithumecher, doriacher vo khoinchea-i zhaddacher varo marina zaunk te prithumechea charui vareank ghott dhorun asle. 2 Ani hanvem udente thaun anik ek devdut voir sorta to polloilo. Tachea lagim jivea Devacho xikʼko aslo. Prithumecho ani doriacho nas korunk odhikar dilʼlo tea char devdutank tannem mottʼttea avazan ulo marlo, 3 ani oxem mhunnttlem: “Ami Devachea chakranchea koplar xikʼko marinant tea meren, prithumek, doriak vo zhaddank luksonn korinakat.”

4 Ani xikʼko marloleancho ankddo 1,44,000 mhunn hanvem aikolem. Tankam Izraelachea putanchea dor eka kulla thaun ghetlole:

9 Polloiat! Tea uprant hanvem lokancho ek vhoddlo zomo polloilo, zo khoinchoch munis mezunk xokonaslo. Ho zomo soglea raxttram thaun, kullam thaun, zatim thaun ani bhaxe thaun aslo. Te dhove kopdde ghalun, xinvasona mukhar ani Menddrea mukhar ube asle. Tanchea hatamnim khazurachea zhaddacheo chuddtteo asleo. 10 Ani te mottʼttea avazan porot-porot oxem mhunnttale: “Amchea taronna pasot, xinvasonar boslolea Devache ani toxench Menddreache ami upkar attoitat.”

11 Ani sogle devdut, je xinvasonachea ani vhoddilanchea ani char jivea pranneanchea bhonvtonnim ube asle tannim xinvasona mukhar dimi ghalun Devachi bhokti keli, 12 ani oxem mhunnttlem: “Amen! Amchea Devachi sodanch vakhannʼnni ani mhoima zaum, ami tachech upkar attoum, ani toxench zannvai, man, xokti ani boll sodam-sodankal tachench asom. Amen.”

13 Hem polloun eka vhoddilan mhaka vicharlem: “Dhove kopdde ghalun asat te konn ani te khoim thaun aileat?” 14 Tednam rokddench hanvem taka mhunnttlem: “Mhojea somia, he konn te tum zannam.” Tannem mhaka mhunnttlem: “Te vhodd sonkoxtta thaun bhair sorlole lok. Tannim aple kopdde Menddreachea rogtan dhuvun dhove keleat. 15 Teach pasot te Devachea xinvasona mukhar asat. Te dis ani rat tachea mondirant tachi povitr seva kortat. Xinvasonar boslolo asa to tancher aplo tombu posraitolo. 16 Te kednanch bhukelʼle vo tanelʼle aschenant. Toxench tankam suriachem koddok vot vo hulop lagchona. 17 Karonn xinvasona lagim* asa to Menddro, gonvllea bhaxen tankam jivitachea udkachea zhori lagim vhortolo. Ani Dev tanchea dolleantlim soglim dukam pusun kaddttolo.”

8 Menddrean satvo xikʼko ugoddlo tednam sorgar sumar ordem vor soglem xant zalem. 2 Deva mukhar ube ravtat te sat devdut mhaka disle, ani tankam sat turtureo dilʼleo.

3 Magir anik ek devdut ieun vedi lagim ubo ravlo, tachea hatant bhangrachem dhumpachem aidon aslem. Sogle Devache lok* magnnem kortat tednam xinvasona mukhar asa tea bhangrachea vedicher bhettounchea pasot taka khub dhump dilʼlo. 4 Devachea lokanchea* magnneam sangata devdutachea hatant aslolea dhumpacho dhunvor Deva mukhar pavlo. 5 Teach vellar devdutan dhumpachem aidon ghetlem, ani tantunt vedi voilo uzo bhorlo ani tem prithumer uddoilem. Tednam goddgodd marlo ani avaz aile, zhoglam marlim ani bhuimkamp zalo. 6 Ani jea sat devdutam koddem sat turtureo asleo, teo te vazounk toiar zale.

7 Poilea devdutan apli turturi vazoili tednam jhelache kuddke ani uzo rogtant miks zaun prithumer poddonk laglo. Taka lagon prithumecho tisro bhag zollon gelo, zhaddancho tisro vantto zollon gelo ani soglem panchvem tonn zollon gelem.

8 Dusrea devdutan apli turturi vazoili tednam uzo pettlolea vhoddlea dongra sarkem kitem tori doriant uddoilem. Ani taka lagon doriacho tisro vantto rogot zalem, 9 ani doriantlea jivea pranneam modlo tisro vantto moron gelo, ani tarvancho tisro vantto nas zalo.

10  Tisrea devdutan apli turturi vazoili tednam divea bhaxen zolltta toslem ek vhoddlem noketr mollba voilean poddlem. Tem nhoim-chea ani zhorinchea tisrea vanttear poddlem. 11 Tea noketrachem nanv Koddsann.* Ani udkacho tisro vantto koddu zalo, ani udok koddu zalem dekhun khub lok moron gele.

12  Chovthea devdutan apli turturi vazoili tednam suriachea tisrea bhagak, chondrimachea tisrea bhagak, ani noketranchea tisrea bhagak mar laglo. Hem tanchea tisrea bhagacher kallokh poddcho mhunn, ani disachea ani ratichea tisrea bhagacher uzvadd poddcho nhoi mhunn zalem.

13 Ani hanvem ek ghonn mollbachea modem uddtta ti polloili. Ti mottʼttean oxem mhunnttali: “Urlole tin devdut apleo turtureo vazoupache asat. Tanchea turtureanchea avazak lagon prithumer ravtoleancher hai, hai, hai!”

9 Panchvea devdutan apli turturi vazoili tednam hanvem ek noketr mollba voilean prithumer poddtta tem polloilem. Taka patallachi* chavi dilʼli. 2 Ani tannem patall ugoddlem, ani tantuntlean vhoddlea bhottʼttentlean ieta toso dhunvor bhair soronk laglo. Tea dhunvran suriacher ani vareacher kallokh poddlo. 3 Ani tea dhunvrantlean toll bhair soron prithumer aile. Tea tollank prithumer aslolea vinchvank asa tosli xokti dilʼli. 4 Tankam sanglolem ki tannim prithume voilem panchvem tonn vo khoinchem-i panchvem zhadd vo khoincho-i rukh piddʼddear korcho nhoi, punn fokot koplancher Devacho xikʼko naslolea lokanchem luksonn korchem.

5 Tea tollank, lokank jivexim marunk nhoi punn tankam panch mhoine meren tollmollaupacho odhikar dilʼlo. Vinchvan kuns marlea uprant zoso ek munis tollmolltta, tosle te tollmolle asle. 6 Tea disamnim lok moronk sodhtole, punn tancher moronn ieunchem na. Te moronk axetole punn moronn tanchea thaun pois dhanvtolem.

7 Ani te toll zhuza pasot toiar kelʼlea ghoddeam bhaxen asle. Tanchea toklencher bhangrachea mukuttam bhaxen kitem tori aslem, ani tanchim tonddam munxachea tonddam bhaxen aslim. 8 Punn tanche kens bailanchea kensam bhaxen lamb asle, ani tanche dant, xinvachea dantam bhaxen asle. 9 Tanchim chhatichim kottʼttim lokhnnachea kottʼtteam bhaxen aslim. Tanchea pakotteancho avaz zhuzant dhanvtat toslea ghoddeanchea rothanchea avaza sarko aslo. 10 Ani tanchea xempddeancher vinchvanchea kunsam sarkim kunsam aslim. Toxench tanchea xempddeank lokank panch mhoine poriant tollmollaupachi xokti asli. 11 Patallacho devdut tancho raza aslo. Hebrev bhaxen tachem nanv Abadon,* punn Grik bhaxen tachem nanv Apolion.*

12 Poilem sonkoxtt ieun gelem. Polloiat! Hachea fattlean anik don sonkoxttam ieunchim asat.

13 Sovʼvea devdutan apli turturi vazoili tednam Devachea mukhar aslolea bhangrachea vedichea xingantlean ek avaz aikonk ailo. 14 To avaz turturi gheun aslolea sovʼvea devdutak oso mhunnttalo: “Vhodd Eufrates nhoim-e lagim bandun dovorlolea char devdutank sodd.” 15 Ani lokancho tisro vantto marun uddounk jea char devdutank tea vora pasot, disa pasot, mhoinea pasot ani vorsa pasot toiar kelʼle tankam soddle.

16 Soinikanchea ghoddesvarancho ankddo vis korodd aslo, to hanvem aikolo. 17 Ani mhaka dorxonant ghodde ani tancher boslole asle te oxe dixtti poddle: Tanchem chhatichem kottʼttem ujea sarkem tambddem, hyacinth fatra sarkem nillem, ani solfora sarkem holldduvem aslem. Ghoddeancheo tokleo xinvachea tokleam sarkeo asleo ani tanchea tonddantlean uzo, dhunvor ani solfor bhair ietalo. 18 Ani hea tin pidde udexim, mhunnche tanchea tonddantlean bhair sorlolea ujea udexim, dhunvra udexim ani solfora udexim lokancho tisro vantto melo. 19 Karonn ghoddeanchi xokti tanchea tonddant ani tanchea xempddent asa. Tancheo xempddeo sorpam sarkeo asat. Tankam tokleo asat, ani hea udexim te dusreanchem luksonn kortat.

20 Punn hea tinui pidde thaun moronastana urlolea lokamnim aplea kamam pasot poschatap korunk na. Tannim noxttea dutanchi ani pollounk xokonant ani aikonk xokonant ani cholonk xokonant toslea bhangrachea, chandichea, tambeachea, fatrachea ani lakddachea murteanchi bhokti korop soddun diunk na. 21 Ani tannim je khun kelʼle, ghaddiponn kelʼlem, chorio kelʼleo ani onoitik kuddicho sombond* dovorlolo, tanchea thaun poschatap korunk na.

10 Tea uprant, hanvem ek xoktivont devdut kup pangrun, sorgar thaun sokol denvta to polloilo. Tachea tokler rainbow aslo, tachem tondd suria sarkem aslem, ani tache paim ujeachea khambea sarke asle. 2 Tachea hatant ek ukto kelʼlo lhan kovllo aslo. Tannem aplo uzvo paim doriant, punn dhavo paim prithumer dovorlo, 3 ani xinv gorozta tea toren mottʼttea avazan ulo marlo. Ani tannem ulo marlo tednam mhaka sat goddgoddancho avaz aikonk ailo.

4  Satui goddgoddanchem uloun zalea uprant hanv borounk voitalom, punn hanvem sorgar thaun ek avaz aikolo. Tannem mhunnttlem: “Sat goddgoddamnim jem sanglam tacher xikʼko marun bond korun dovor, ani tem boroinaka.” 5 Hanvem jea devdutak doriacher ani prithumecher ubo aslolo polloilʼlo tannem aplo uzvo hat sorga vatten ubarlo. 6 Zo sodam-sodankal jieta, zannem mollob ani tantuntleo sogleo vostu rochleat, zannem prithum ani tantuntleo sogleo vostu rochleat ani zannem doria ani tantuntleo sogleo vostu rochleat, tea Devacho soput gheun tannem oxem mhunnttlem: “Atam anik vell zaunchona. 7 Punn satvo devdut apli turturi vazounk toiar astolo tea disamnim, Devacho povitr gutt khoreponnim purnn zatolo. Ho gutt bori khobor koso Devan aplea sevokank, mhunnche aplea provadeank kolloilʼlo.”

8 Ani porot ek pavtt hanvem sorgar thaun to avaz aikolo. Tannem mhaka oxem mhunnttlem: “Voch, ani doriacher ani prithumecher ubo aslolea devdutachea hatantlean to ukto aslolo kovllo ghe.” 9 Tor hanv tea devduta lagim gelom ani hanvem tachea koddem to lhan kovllo maglo. Tannem mhaka mhunnttlem: “Ghe, ani ho kha. Ho tujem pott koddu kortolo, punn tujea tonddant to mhonva sarko ghodd lagtolo.” 10 Ani hanvem devdutachea hatantlean to lhan kovllo ghetlo ani khalo. Mhojea tonddant to mhonva sarko godd laglo, punn hanvem to khalea uprant mhojem pott koddu zalem. 11 Ani hanvem oxem aikolem: “Khub lokam vixim, raxttram vixim, veg-vegllea bhaxechea lokam vixim ani zaitea razam vixim tunvem porot bhasaunni korunk zai.”

11 Mhaka ek mezpachi boddi diun oxem sanglem: “Utth ani Devachem mondir,* tachi vedi ani mondirant tachi bhokti kortoleank mez. 2 Punn mondirachea* bhair asa tem angonn sodd. Tachem map gheum naka, karonn tem videxi raxttrank dilam. Tim povitr xarak 42 mhoine paim-am ponda maddoitolim. 3 Hanv mhojea don sakxeank dhaddttolom. Tannim sak ghalun 1,260 dis bhasaunni korchi mhunn hanv oxem kortolom.” 4 Zoitunachim don zhaddam ani don dive, tea don sakxeank suchit kortat, ani te prithumechea Dhonia mukhar ube asat.

5 Konnui tea sakxeank tras korpacho proitn korta zalear tanchea tonddantlean uzo bhair sorta ani tanchea dusmanancho nas korun uddoita. Konnui tankam luksonn korpacho proitn korta zalear tankam oxech toren marun uddoitole. 6 Te bhasaunni kortat tea disamnim paus poddcho nhoi mhunn, mollob* bond korpacho odhikar tanche koddem asa. Toxench, udkak rogot korpacho ani prithumek zaite pavtti soglea torechea piddamnim tras korpacho-i odhikar tanche koddem asa.

7 Tanchem sakx diupachem kam somplea uprant, patallantlean* bhair sorta tem ranvotti zonvar, tanche koddem zhuztolem ani tancher zoit melloitolem ani tankam marun uddoitolem. 8 Sodom ani Ejiptt jea xarak suchit korta ani jea xarant tanchea Somiak khambear khillailʼlo tea vhodd xarachea mukhel rosteacher tanchim moddim poddlolim astolim. 9 Ani veg-vegllea zatiche, kullanche, bhasanche, ani raxttranche lok sadde-tin dis meren tanchim moddim polloit ravtole, ani tankam dholint dovrunk diunchenant. 10 Ani prithumer ravtat te lok, te mele mhunn khub khuxal zatole ani mouza kortole, ani eka-mekak dennim dhaddttole. Karonn tea don provadeamnim prithumer ravtoleank aplea sondexa udexim khub tollmollailʼle.

11 Sadde-tin disam uprant, Deva koddlean tancher jivitachi xokti aili, ani te aplea paim-ancher ube ravle, ani zannim tankam polloilʼle tim khub bhielim. 12 Tankam mollba voilean ek mottʼtto avaz aikonk ailo. To tankam oxem mhunnttalo: “Hanga voir ieiat.” Ani te kupamnim voir mollbar gele ani tanchea dusmanamnim tankam polloile.* 13 Teach vellar ek vhodd bhuimkamp zalo ani tea xaracho dhavo bhag kosollʼllo. Tea bhuimkampant 7,000 lok mele ani urlolea lokancher bhirant aili, ani tannim sorgar aslolea Devachi mhoima keli.

14 Dusrem sonkoxtt ieun gelem. Polloiat! Tisrem sonkoxtt rokddench ieunchem asa.

15  Satvea devdutan turturi vazoili tednam sorgar thaun mottʼttean avaz aikonk aile. Te oxem mhunnttale: “Sonvsarachem raj atam amchea Dhoniachem ani tachea Kristachem zalem, ani to sodam-sodankal raza mhunn raz kortolo.”

16 Tednam Deva mukhar aplea xinvasonar boslole 24 vhoddil dimi ghalun Devak paim-am poddle. 17 Ani tannim oxem mhunnttlem: “Sorvxoktivont Jehova* Dev, tum zo aslo ani asa, ami tuje upkar attoitat, karonn tunvem tujea vortea xokten raza mhunn raj korunk suru kelam. 18 Punn raxttram ragar zalim, ani tuzo rag tancher ailo. Meloleanchi zhoddtti korpacho ani tujea sevokank, mhunnche provadeank, Devachea lokank* ani tujea nanvachea bhirantin choltat tea lhanank toxench vhoddank inam diupacho, ani prithumecho nas kortat tancho nas korpacho tharailʼlo vell pavlo.”

19 Tednam sorgar Devachem mondir* ugoddlem, ani mondirant* tachi korarachi pett disli. Uprant zhoglam marlim, vhoddle avaz aikonk aile, goddgodd marlo, bhuimkamp zalo, ani vhoddle-vhoddle jhelache kuddke poddle.

12 Magir sorgar ek vhoddli khunna disli: Ek bail suria pangrun asli ani chondrim tichea paim-am ponda aslo, ani tichea mathear 12 noketrancho ek mukutt aslo. 2  Ti gorbest asli ani bhurgeak zolm diunchea trasank lagon ti dukhin tollmollttali ani mottʼttean roddttali.

3 Uprant sorgar anik ek khunna dixtti poddli. Polloiat! Ujea sarko tambddea rongacho ek vhoddlo bhirankull ar dixtti poddlo. Taka sat tokleo ani dha xingam aslim, ani tachea toklencher sat mukutt asle. 4 Tannem aple xempdden mollbar aslolea noketrancho tisro vantto voddun prithumer uddoilo, ani zolm diunchi asli tea bailechem bhurgem zolmotanch taka khaun uddounk to ar tichea mukharuch ubo ravlo.

5 Tea bailen eka cheddeak zolm dilo. To gonvllea bhaxen soglea raxttrancher lokhnnachea danddean odhikar cholouncho aslo. Tichea bhurgeak tiche koddlean forsan gheun,* Deva mukhar ani tachea xinvasona mukhar vhelo. 6  Ti bail oronnʼnneant* dhanvon geli. Thoim 1,260 dis tika khaunk-pieunk diunchem mhunn Devan tichea pasot ek zago toiar korun dovorlolo.

7 Ani sorgar zhuz zalem: Mikael* ani tache devdut ara sangata zhuzle, ani ar ani tache noxtte dut tanchea sangata zhuzle. 8 Punn ar ani noxtte dut tancho fuddo korunk xoklenant.* Ani atam sorgar tanchea pasot anik zago uronk na. 9 Tor tea vhoddlea bhirankull arak, hoi teach adlea sorpak, zaka nanv piddʼddear korpi Soitan pasun mhunnttat ani zo akʼkhea prithumer ravtolea lokank fosoita, taka sokol prithumer xevttilo. Ani tachea noxttea dutankui tachea sangata prithumer xevttile. 10 Ani hanvem sorgar thaun ek mottʼtto avaz aikolo zo oxem mhunnttalo:

“Amchea Devan munxam pasot taronn haddlem. Tachi xokti, tachem Raj, ani tachea Kristacho odhikar atam stapon zalo. Karonn amchea bhav-bhoinnincher arop ghalta taka sokol uddoila. To dis ani rat amchea Deva mukhar tancher arop ghalit astalo. 11 Ani tannim menddreachea rogtak lagon ani tim govai ditalim tea sondexak lagon tacher zoit melloun ghetlem. Ani mornnacho fuddo kortana pasun tannim aplea jivachi porva korunk na. 12 Taka lagon, sorga ani thoim ravtoleamno, khuxal zaiat. Punn prithum ani doria, tumcher hai, karonn Soitan* tumchea lagim sokol aila, ani boroch ragar asa. Karonn aplea lagim thoddoch vell urla mhunn to zannam.”

13 Apleak prithumer xevttila mhunn aran polloilem tednam, cheddeak zolm dilʼlo tea bailek tannem tras kele. 14 Tea bailek oronnʼnneant tichea pasot toiar kelʼlea zagear uddon vochonk ani sorpachea tondda thaun pois ravon tika sadde-tin vorsam* khaunk-pieunk mellchem mhunn vhoddlea ghonniche don pakotte dilʼle.

15 Ani ti bail buddchi mhunn sorpan tichea fattlean aplea tonddantlean nhoim koxem udok soddlem. 16 Punn prithumen te bailechi modot keli. Ani aplem tondd ugddun arachea tonddantlean bhair sorloli nhoim gillun uddoili. 17 Ani ar tea bailecher ragar zaun tichea urlolea sonsticher* mhunnche, jim Devacheo adnea pallttat ani zankam Jezuchi govai diunk kam mellʼllam tanchea add zhuzonk bhair sorlo.

13 Ani to* doriachea renvecher vochon ubo ravlo.

Ani hanvem ek ranvotti zonvar doriantlean voir ieta tem polloilem. Taka dha xingam ani sat tokleo asleo, ani tachea xingancher dha mukutt asle, ani tachea tokleancher Devachea add uloitat toslim nanvam boroilʼlim aslim. 2 Hanvem jem ranvotti zonvar polloilʼlem tem bibttea vaga sarkem aslem. Punn tache paim vanxela sarke asle, ani tachem tondd xinva sarkem aslem. Ani aran tea zonvarak apli xokti, aplem xinvason ani khub odhikar dilʼlo.

3 Tachea eka toklek vhoddlo ghavo zalʼlo to hanvem polloilo. To ghavo jiv vochpa sarko aslo, punn to peklo. Ani akʼkhi prithum ojap zaun tea ranvotti zonvara fattlean vochonk lagli. 4 Ani tim arachi bhokti korunk laglim, karonn tannem ranvotti zonvarak odhikar dilʼlo. Tannim oxem mhunnon ranvotti zonvarachi bhokti keli: “Hea ranvotti zonvara sarko konn asa, ani konn tachea sangata zhuzonk xokta?” 5 Taka vhoddlem-vhoddlem uloita toslem ani Devachea add uloita toslem tondd dilʼlem, ani 42 mhoine taka zai tem korunk odhikar dilʼlo. 6 Tannem Deva add, mhunnche, tachea nanva add, tachea ravpachea zagea add, toxench sorgar ravtoleam add ulounk aplem tondd ugoddlem. 7 Taka Devachea lokam* add zhuzonk ani tancher zoit melloun gheunk porvangi dilʼli. Toxench, taka dor eka kullacher, zaticher, bhaxecher ani raxttrantlea lokancher odhikar dilʼlo. 8 Ani prithumer aslolim soglim tachi bhokti kortolim. Tanchea modlea ekleachem nanv pasun bolidan dilʼlea Menddreachea jivitachea pustokacher* borounk na, jem sonvsarachea survate thaun borounk suru kelʼlem.

9 Kan asat tannim aikonchem. 10 Konnankui bondkhonnint ghalunk zai zalear, taka bondkhonnint ghaltole. Zo konn tolvarin marta,* taka tolvarin marcho. Oslea poristhitint, Devachea lokamnim* pasiens dakhovop ani bhavarth dovrop gorjechem asa.

11 Uprant hanvem anik ek ranvotti zonvar prithumentlean voir sorta tem polloilem. Taka menddrea bhaxen don xingam aslim, punn tem ara bhaxen ulounk laglem. 12 Hem zonvar poilea ranvotti zonvara mukhar tacho soglo odhikar choloita. Ani tem prithume thaun ani prithumer ravtolea lokam thaun, tea poilea ranvotti zonvarachi, mhunnche, mornnak pavoita toslo ghavo boro zalʼlo tachi puza korun gheta. 13 Ani tem zonvar vhodd-vhodd vizmitam* korta. Toxench tem lokanchea mukhar mollbar thaun prithumer ujeacho paus pasun dhaddtta.

14 Taka ranvotti zonvara mukhar vizmitam* korunk porvangi dilʼli, ani tem khunna korun prithumer ravtat tankam fosoita. Toxench tolvar marun ghavo zalʼlo punn uprant salvar zalem tea ranvotti zonvarachi tem prithumer ravtolea lokank murti korunk sangta. 15 Ani tea zonvarak ranvotti zonvarachea murte bhitor funk marun svas ghalpachi porvangi dilʼli. Tea murten ulounchem ani ranvotti zonvarachea murtechi bhokti korunk nakartat tea sogleank marun uddounchem mhunn oxem kelem.

16 Tem zonvar lhan toxench vhodd, girest toxench gorib, svotontr toxench gulam, oslea soglea lokam sangata zobordosti kortalem. Tanchea uzvea hatacher vo koplacher xikʼko marcho mhunn tem oxem kortalem. 17 Ani jea konnancher to xikʼko na, mhunnche, ranvotti zonvarachem nanv vo tachea nanvacho ankddo na, to munis viktem gheunk vo vikunk xokona. 18 Hem somzonk zannvai gorjechi: Zachea lagim kholaiechi somzonni asa tannem tea ranvotti zonvarachea ankddeacho hixob launcho, karonn ho ek munxacho ankddo ani to ankddo 666.

14 Ani polloiat! Menddro Sion Dongrar ubo asa ani tachea sangata 1,44,000 ube asat tem hanvem polloilem. Tanchea koplancher tachem nanv ani tachea Bapachem nanv boroilʼlem asa. 2 Ani hanvem sorgar thaun ek avaz aikolo zo zaitem udok vhanvta ani vhoddlean goddgodd marta toslea avaza sarko aslo. To avaz kinoreo* vazoitana gaitat tea gavpeam sarko aslo. 3 Ani xinvasona mukhar ani char jivea pranneam mukhar ani vhoddilam mukhar te ek novem git koxem gaitale, ani prithume voilea vikte ghetlolea 1,44,000 soddun ani konnancheanuch tem git xikonk zainaslem. 4 He tech zaun asat zannim bailam sangata apnnak mhelle korunk nant. Khorem mhunnttlear, te ankvar asat. Menddro jea-jea zagear voita tachea fattlean tea-tea zagear voitat te hech. Tankam munxam modle, Deva ani Menddrea pasot poilim follam koxe vikte ghetleat. 5 Te aplea tonddantlean fosoita toslem kainch ulounk nant. Te khot naslole asat.

6 Uprant hanvem anik ek devdut polloilo, zo mollbachea modem* uddttalo, ani tachea lagim prithumer ravtoleank, mhunnche, dor eka raxttrachea, kullachea, bhaxechea ani zatichea lokank sangonk sasnak urta tosli bori khobor asli. 7 To mottʼttea avazan oxem mhunnttalo: “Devak bhieiat ani tachi mhoima korat, karonn tacho zhoddtti korpacho vell ailo, dekhun zannem sorg, prithum, doria ani udkacheo zhori rochleat tea Devachi bhokti korat.”

8 Tea uprant, dusro devdut oxem mhunnot ailo: “Tem poddlem! Bollixtt Babilon poddlem, hoi, tench zannem soglea raxttrank aplea onoitik kuddichea sombondacho,* aplea vaitt bhavnanchea* drakxancho soro pivoila!”

9 Magir tachea fattlean, tisro devdut, mottʼttea avazan oxem mhunnot ailo: “Zo konn tea ranvotti zonvarachi ani tachea murtechi bhokti korta ani aplea koplar ani hatar xikʼko lavun gheta, 10 to Devachea ragacho kainch miks korum naslolo drakxancho soro pietolo, zo tachea ragachea peleant votoila. Taka povitr devdutam mukhar ani Menddrea mukhar ujean ani solforan tollmollaitole. 11 Ani jea ujean tankam tollmollaitole tantuntlean sodam-sodankal dhunvor ieit ravtolo, ani je ranvotti zonvarachi ani tachea murtechi bhokti kortat, toxench je tachea nanvacho xikʼko apleacher lavun ghetat tankam dis ani rat suseg mellchona. 12 Taka lagon, Devacheo adnea pallttat ani Jezuchea bhavartha pormonnem choltat tea Devachea lokank* sosnikaiechi goroz asa.”

13 Ani hanvem sorga voilean oso avaz aikolo, “Oxem boroi: Je atam thaun Somiachea ekvottan mortole te khuxal. Hoi, povitr xokti mhunntta, atam tankam mhenotichea vavra thaun suseg mellom, karonn tannim kelʼlim kamam Dev visorchona.”*

14 Polloiat! Magir hanvem ek dhovem kup polloilem. Tacher munxachea Puta sarko konn tori boslolo aslo. Tachea mathear bhangracho mukutt aslo ani tachea hatant dhar aslolo villo aslo.

15 Uprant anik ek devdut mondirantlean* bhair sorlo, ani tannem kupacher boslolo asa taka mottʼttea avazan oxem sanglem: “Tuzo villo uzar kor ani lunvnni kor, karonn lunvnnecho vell pavlo ani prithumechem pik purnn toren toiar zalam.” 16 Tednam kupacher boslolo aslo tannem aplo villo prithumer uzar kelo, ani prithume voilem pik lunvlem.

17 Uprant anik ek devdut sorga voilea mondirantlean bhair sorlo, tachea-i hatant ek dhar aslolo villo aslo.

18 Tea uprant, anik ek devdut vedintlean bhair sorlo, zaka ujeacher odhikar aslo. Ani jea devdutachea hatant dhar aslolo villo aslo, taka tannem mottʼttean ulo marun oxem sanglem: “Tuzo villo uzar kor ani prithume voilea drakxanchea valiche ghons ektthaim kor karonn tanchim drakxam pikleant.” 19 Tednam tea devdutan prithumer aplo villo uzar kelo ani prithume voilea drakxanchea valiche ghons ektthaim kele. Tannim te ghons drakxam maddounk toiar kelʼlea zagear uddoile, zo Devachea ragak suchit korta. 20 Tea drakxank xarachea bhair uddoun maddoile, ani tantuntlean jem rogot bhair sorlem tem ghoddeanchea logama* itlem voir poriant pavlem ani sumar 300 km* meren vhanvot gelem.

15 Uprant, hanvem sorgar ek vhodd ani ojapachi khunna polloili. Hanvem sat pidda gheun aslole sat devdut polloile. Heo nimanneo pidda asleo, karonn hanchea udexim Devacho rag sompta.

2 Ani uzo miks zalʼlea konvchechea doria sarkem kitem tori mhaka dislem. Ani je ranvotti zonvaracher, tachea murtecher ani tachea nanvachea ankddeacher zoit melloitat te Devachi kinoreo* hatant gheun konvchechea doria lagim ube asle. 3 Te Devacho sevok Moizesachem ani Menddreachem, hem git gaitale:

“Sorvxoktivont Jehova* Deva, tujim kamam kitlim vortim ani ojapachim. Sasnachea Raza, tujeo vatto niticheo ani sotacheo. 4 Jehova,* fokot tum ekttoch visvaxi. Tor, konn tuji bhirant dhorcho na? Ani konn tujea nanvachi mhoima korchona? Soglim raxttram tujea mukhar ietolim ani tuji bhokti kortolim, karonn tum nitivontponnan neai korta mhunn tankam kollon ailam.”

5 Uprant hanvem, sorgar tombucho* sogleant povitr zago ugoddlo tem polloilem. 6 Ani sat pidda gheun aslole sat devdut tantuntlean bhair sorle. Tannim nitoll, ani samkech dhove kopdde ghatlole, ani tanchea hoddʼddeak bhangracheo pottʼtteo bandloleo. 7  Char jivea pranneam modlea eklean tea sat devdutank sat bhangrachim aidonam dilim. Tantunt sodam-sodankal jivo asa tea Devacho rag bhorlolo aslo. 8 Ani Devache mhoimek ani xoktek lagon to zago dhunvran bhorlo, ani sat devdutancheo sat pidda somponant tea meren thoim konnuch bhitor vochonk xokonaslo.

16 Ani hanvem mondirantlean* ek mottʼtto avaz aikolo, zo sat devdutank oxem mhunnttalo: “Vochat ani Devachea ragachim sat aidonam prithumer votoiat.”

2 Poilo devdut gelo ani tannem aplem aidon prithumer votoilem. Ani jea lokancher ranvotti zonvaracho xikʼko aslo ani je tachea murtechi bhokti kortale tankam bhorpur dukhta ani rokddech vaddot voita tosle fodd aile.

3 Dusrea devdutan aplem aidon doriant votoilem. Ani doria melolea munxachea rogta bhaxen zalo, ani tantuntlo dor ek jivo pranni, hoi, tantunt aslolem soglem moron gelem.

4  Tisrea devdutan aplem aidon nhoim-ancher ani udkanchea zhorincher votoilem ani tem rogot zalem. 5 Udkacher odhikar aslolo devdut oxem mhunnttalo tem hanvem aikolem: “Visvaxi Deva, tum zo aslo ani asa, tum nitivont zaun asa, karonn tunvem nitin neai kela. 6 Tannim Devachea lokanchem ani provadeanchem rogot varoilem, ani tunvem tankam pieunk rogot dilem. Tankam hench favo.” 7 Ani vedi oxem mhunnttali tem hanvem aikolem: “Sorvxoktivont Jehova* Deva, tum nitivontponnan ani sarko neai korta.”

8  Chovthea devdutan aplem aidon suriacher votoilem, ani lokank ujean hulpaunk suriak odhikar dilo. 9 Ani bhorpur gormek lagon lok hulpole. Punn te oslea piddencher odhikar asa tea Devachea nanva add ulounk lagle. Tannim poschatap korunk na ani taka mhoima diunk na.

10 Panchvea devdutan aplem aidon ranvotti zonvarachea xinvasonacher votoilem tednam tachea rajeacher kallokh poddlo ani dukhik lagon lok apleo jibo chabunk lagle. 11 Punn dukhink lagon ani foddank lagon te sorginchea Deva add ulounk lagle, ani tannim aplea kamank lagon poschatap korunk na.

12 Sovʼvea devdutan aplem aidon vhodd Eufrates nhoim-cher votoilem, ani udente thaun ietolea razam pasot rosto toiar zaunk tichem udok suklem.

13 Ani arachea tonddantlean, ranvotti zonvarachea tonddantlean, toxench khottea provadeachea tonddantlean, bebeam sarkim distat toslim prerit kelʼlim tin oxudʼdh utram bhair sortat tim hanvem polloilim. 14 Khorem mhunnttlear, him noxttea dutamnim prerit kelʼlim utram zaun asat. Te vizmitam* kortat, toxench akʼkhea prithumechea razam lagim vochon, tankam Sorvxoktivont Devachea vhoddlea disachea zhuza pasot ektthaim kortat.

15 “Polloiat! Hanv eka chora bhaxen ietam. Zo zagrut ravta, ani apnnem kopdde nastana bhonvchem nhoi ani lokam mukhar lojent poddchem nhoi mhunn aple kopdde rakhta, to khuxal.”

16 Ani tannim Hebrev bhaxent Armageddon* mhunnttat tea zagear soglea razank ektthaim kele.

17  Satvea devdutan aplem aidon varear votoilem tednam mondirantlean* xinvasona thaun ek mottʼtto avaz aikonk ailo. To oxem mhunnttalo: “Purnn zalem!” 18 Ani zhoglam marlim, avaz aile ani goddgodd marlo, ani munis prithumer aila tednam thaun atam poriant zaunk na titlo vhoddlo ani bhirankull bhuimkamp zalo. 19 Tem bollixtt xar futton tache tin kuddke zale, ani raxttrantlim xaram kosllon poddlim. Devan aplea ragacho ani sonkoxttanchea drakxanchea soreacho pelo taka diuncho mhunn Devan Bollixtt Babilonacho ugddas kelo. 20 Toxench, dor ek zunvo pollon gelo, ani dongor uronkuch nant. 21 Magir mollbar thaun lokancher vhoddle-vhoddle jhelache fator poddle, ani dor eka fatrachem vozon sumar 20 kilo* aslem. Hea piddek lagon lok Devachea add ulounk lagle, karonn hea pidde udexim khubuch luksonn zalem.

17 Jea sat devdutam lagim sat aidonam aslim tanchea modlea eklean ieun mhaka oxem mhunnttlem: “Ieo, zaitea udkancher boson aslolea bollixtt xindoll bailek kitem khast mellttoli tem hanv tuka dakhoitolom. 2 Prithume voilea razamnim tichea sangata onoitik kuddicho sombond* dovorlo, ani prithume voile lok tichea onoitik kuddichea sombondacho* drakxancho soro pieun ttaitt zale.”

3 Tea devdutan mhaka povitr xoktechea bollan eka oronnʼnneant* vhelo. Thoim mhaka tambddea rongachea eka ranvotti zonvaracher ek bail bosloli disli. Tea zonvarachea angar Devacho opman korta toslim nanvam aslim, ani taka sat tokleo ani dha xingam aslim. 4  Ti bail zambllea ani tambddea rongache kopdde ghalun asli. Ani ti bhangran, moladik hireamnim ani motiamnim nettloli asli. Tichea hatant ek bhangracho pelo aslo, zo vitt haddtta toslea vostumnim ani tichea onoitik kuddichea sombondachea* oxudʼdh vostumnim bhorlolo aslo. 5  Tichea koplar, “Bollixtt Babilon, xindoll bailanchi ani prithume voilea vitt haddtta toslea vostunchi avoi,” oxem gupit orthachem nanv boroilolem aslem. 6 Ti bail Devachea lokanchem* ani Jezuchea sakxeanchem rogot pieun ttaitt zalʼli tem hanvem polloilem.   

Tika polloun hanv khub ojap zalom. 7 Tednam tea devdutan mhaka oxem mhunnttlem: “Tum itlo ojap kiteak zalo? Hanv tuka tea bailecho ani ti boslea tea sat toklenchea ani dha xinganchea ranvotti zonvaracho gutt sangtam: 8 Jem ranvotti zonvar tunvem polloilʼlem tem poilim aslem, punn atam na. Tori astana, tem patallantlem* beginuch bhair sortolem, ani tacho nas zatolo. Prithume voile lok, mhunnche, zanchim nanvam sonvsarachea survate thaun boroitale tea jivitachea pustokar* na, te hem polloun ojap zatole ki koxe toren hem ranvotti zonvar poilem aslem, punn atam na, ani magir porot ieunchem asa.

9 “Hem somzonk zannvaien bhorloli tokli asonk zai: Sat tokleo mhunnttlear sat dongor, zancher ti bail bosloli asa. 10 Ani sat raza asat: Panch poddleat, eklo asa, ani eklo ieuncho asa. Punn to ietolo tednam, tannem thoddo vell ravop gorjechem asa. 11 Ani tem ranvotti zonvar jem poilim aslem punn atam na, tem atthvo raza pasun zaun asa. Punn tem tea satam modlem bhair sorta, ani tacho nas zatolo.

12 “Tunvem polloilʼlim dha xingam mhunnttlear, azun poriant raj mellonk na te dha raza. Punn tankam ranvotti zonvara sangata ek vora pasot razam sarko odhikar melltta. 13 Tanchem sogleanchem chintop ek-sarkench asa, punn te apli xokti ani aplo odhikar tea ranvotti zonvarak ditat. 14 Te Menddrea sangata zhuztole, punn Menddro tancher zoit melloun ghetolo, karonn to somiancho Somi ani razancho Raza zaun asa. Toxench, tachea sangata asat te, mhunnche, zankam apoileat, vinchun kaddleat ani je visvaxi asat te pasun zoit melloun ghetole.”

15 Ani tea devdutan mhaka mhunnttlem: “Jea udkancher ti xindoll bail bosloli tunvem polloilea, tim udkam mhunnche, lok, zome, raxttram ani bhaso. 16 Tunvem polloileant tim dha xingam ani ranvotti zonvar, tea xindoll bailecho dves kortolim, nas kortolim ani tika vinglli kortolim. Tim tichem mas khatolim ani tika purnn toren ujean zolloun uddoitolim. 17 Karonn apnnem chintlam tem purnn korunk Devan tanchea kallzant ghatlam. Hoi, Devan sanglolim utram purnn zai meren, tannim aplem raj ranvotti zonvarak diun, tanchem jem ekach torechem chintop asa, tem purnn korunk tannem oxem kelem. 18 Ani ji bail tunvem polloilea ti prithumechea razancher raj korta tem bollixtt xar zaun asa.”

18 Uprant hanvem anik ek devdut sorgar thaun denvta to polloilo. Taka vhodd odhikar aslo ani tachea mhoimen prithum uzvaddit zalʼli. 2 Tannem mottʼttea avazan oxem mhunnttlem: “Tem poddlem! Bollixtt Babilon poddlem! Tem noxttea dutancho ravpacho zago zalam. Thoim noxtte dut* ani soglea torechim oxudʼdh ani vitt haddtta toslim suknnim ravtat. 3 Tannem aplea onoitik kuddichea sombondacho,* hoi, aplea vaitt bhavnancho* drakxancho soro soglea raxttrank pivoila dekhun tim tachea fasant poddleant. Prithume voilea razamnim tachea lagim onoitik kuddicho sombond dovorla, ani prithume voile veapari* tannem loz nastana ektthaim kelʼlea mharog vostunk lagon girest zaleat.”

4 Hanvem sorgar thaun anik ek avaz oxem mhunntta to aikolo: “Mhojea lokamno, tantuntlean bhair sorat. Tumkam tachea patkamnim bhagidar zaunk naka zalear ani tacher ietat teo pidda tumcher ailʼleo nakat zalear tumi tantuntlean bhair sorat. 5 Karonn tachea patkanchi ras mollba meren pavlea ani tannem zo onʼneai* kela tacho Devan ugddas kela. 6 Tem dusrea sangata zoxem vaglam, toxench, tachea-i sangata vagat. Tannem jim kamam keleant tachea don pavtti chodd taka khast diat. Tannem peleant jem miks kelam, tachea poros don pavtti chodd taka miks korun diat. 7 Tannem jitli mhoima melloilea ani loz nasloleo mharog vostu uzar korun jielam, titlench taka tollmollaiat ani dukh diat. Karonn tem aplea kallzant oxem mhunntta: ‘Hanv zalear xinvasonar bosloli ranni, hanv vidva nhoi. Mhaka kednanch dukh korunk poddchem na.’ 8 Taka lagon, ekach disak tacher moronn, dukh ani bhuk, heo sogleo pidda ietoleo ani taka ujean purnn toren zolloitole. Karonn Jehova* Dev zannem taka hi khast dilea, to xoktivont asa.

9 “Ani prithume voilea jea razamnim tachea sangata onoitik kuddicho sombond* dovorlo ani je tachea sangata loz nasloleo mharog vostu uzar korun jiele, te tacho zolltta to dhunvor polloitole tednam roddttole ani dukhi zaun aplem hoddʼddem boddoitole. 10 Apleakui tachea sarkench tollmollait mhunn te bhirantin tachea thaun pois ube ravtole ani mhunnttole: ‘Are-re, bollixtt Babilona! Tujem kitlem vaitt zalem, tum kitlem xoktivont xar aslem. Ekach vora bhitor tuji zhoddtti zali.’

11 “Prithume voile sogle veapari tachea pasot roddttole ani dukh kortole, karonn tachem soglem saman viktem gheupi konnuch uronk na. 12 Hem soglem saman mhunnttlear, bhangar, chandi, moladik hire, motim, boro kopddo, zambllo kopddo, silk ani tambddo kopddo, ani boro vas ieta tea lakdda thaun toiar kelʼleo vostu. Toxench, hotʼtichea dantam thaun, moladik lakdda thaun, tambea thaun, lokhnna thaun ani marbola thaun toiar kelʼli dor ek torechi vost. 13 Ani tiki, mosalo,* dhump, pormollit tel, dhovo dhump, drakxancho soro, zoitunachem tel, moido, gonv, gorvam, menddram, ghodde, roth, chakram ani munis pasun asle. 14 Jea borea follachi tuka avodd asli tem atam tuje koddem na. Soglem ruchichem jevonn ani mharog vostu tujea thaun pois geleat. Teo tuka porot kednanch mellcheo nant.

15 “Heo vostu viktale ani taka lagon girest zalʼle veapari, tachea sarke apleakui tollmollaina zaunk tachea thaun pois ube ravtole ani roddttole ani dukh kortole, 16 ani mhunnttole: ‘Are-re, hea bollixtt xarak kitlem vaitt ghoddlem. Tem mharog, zamblle ani tambdde kopdde ghaltalem, ani bhangracheo vostu, mharog hire ani motiam ghaltalem, 17 punn tachi mezunk zaina titli girestkai ekach vora bhitor nas zali!’

“Ani dor eka tarvacho keptton, tantunt provas korpi, tarvotti ani doriacher veapar-dhondo korun aplem pott bhorpi sogle, pois ube ravle. 18 Tacho zolltta to dhunvor polloun te oxi bob marunk lagle: ‘Hea bollixtt xara sarkem anik khoinchem-i xar asa kai?’ 19 Tannim aplea mathear dhulʼl ghatli ani te roddonk lagle. Ani dukh korun oxem mhunnonk lagle: ‘Are-re! Hea bollixtt xarachem kitlem vaitt zalem! Doriacher zanchim tarvam aslim te sogle tachea mharog vostum udexim girest zalʼle, punn ekach vora bhitor tem nas zalem!’

20 “Sorga, ani toxench Devachea lokamno,* apostlamno ani provadeamno, tumi tachea poristhitik lagon khuxal zaiat, karonn Devan tumchea pasot tea xarak khast formailea!”

21 Ani eka bollvont devdutan danteachea pedda sarko ek vhoddlo fator ukolʼlo ani oxem mhunnot taka doriant uddoilo: “Heach toren bollixtt Babilon xarak ekach pavttin sokol uddoitole, ani porot kednanch tem dixtti poddchem na. 22 Ani Babilonant kinori* vazoitana gaitat tea gavpeancho, vazoupeancho, basureancho* ani turtureancho porot anik avaz aikonk ieunchona. Toxench, kosli-i kola aslolo kamdar thoim porot kednanch mellchona, ani danteacho avaz porot kednanch ieunchona. 23  Thoim porot kednanch diveacho uzvadd porzollchona ani vhokol-novreacho avaz porot kednanch aikonk ieunchona. Karonn tuje veapari prithume voile vhodd podvi aslole munis asle, ani tujea ghaddiponnan soglim raxttram foslolim. 24 Hoi, heach xarant provadeanchem, Devachea lokanchem* ani prithumer jivexim marun uddoilʼle tea sogleanchem rogot mellʼllem.”

19 Tea uprant hanvem sorgar eka vhoddlea zomeachea avaza sarko ek avaz aikolo. To oxem mhunnttalo: “Jehovak vakhannat!* Taronn, mhoima ani xokti amchea Devachi zaun asa, 2 karonn to nitivontponnan ani sarko neai korta. Aplea onoitik kuddichea sombondan* prithumek broxtt kelea tea vhoddle xindoll bailek tannem khast dili. Devan tiche koddlean aplea sevokanchea rogtacho bodlo ghetla.” 3 Tea uprant rokddench tannem dusre pavtti oxem mhunnttlem: “Jehovak vakhannat!* Babilon xar zolltta to dhunvor sodam-sodankal voir vochot ravtolo.”

4 Ani tea 24 vhoddilamnim ani char jivea pranneamnim paim-am poddon xinvasonar bosla tea Devachi bhokti keli ani mhunnttlem: “Amen! Jehovak vakhannat!”*

5 Ani xinvasona thaunui oso avaz ailo, zo mhunnttalo: “Amchea Devachea soglea sevokamno, tachi bhirant dovortolea lhan toxench vhodd sevokamno, taka vakhannat.”

6 Ani hanvem vhoddlea zomeachea avaza sarke, zaitea udkanchea avaza sarke, toxench vhoddlean goddgodd marta toslea avaza sarke avaz aikole. Te oxem mhunnttale: “Jehovak vakhannat,* karonn amchea Sorvxoktivont Jehova* Devan, raza koso raz korunk suru kelam! 7 Sontosbhorit ani odik khuxal zaun Devachi mhoima korum-ia, karonn Menddreacho kazar zauncho vell lagim pavla ani tachi vhokol toiar asa. 8  Tika chokchokit, nitoll, ani bore kopdde ghalunk porvangi dilea, karonn bore kopdde mhunnche, Devachea lokanchim nitivont kamam.”

9 Ani tannem mhaka mhunnttlem, “Oxem boroi: Menddreachea kazrachea sanjechea jevnnak amontronn mellʼllam tim khuxal.” Tannem mhaka oxem-i mhunnttlem: “Him Devachim khorim utram zaun asat.” 10 Hem aikotanch hanv tachi bhokti korunk tachea paim-am poddlom. Punn tannem mhaka mhunnttlem: “Na, na, oxem korinaka! Hanv tujea sarkoch ani Jezu vixim sakx ditat tea tujea bhavam sarkoch ek sevok zaun asa. Devachi bhokti kor! Karonn Jezu vixim sakx divop hoch bhasaunneancho udʼdhex zaun asa.”

11 Ani hanvem sorg ukto zalʼlo polloilo, ani polloiat! Ek dhovo ghoddo mhaka dislo. Zo tacher boslolo asa to Visvaxi ani Khoro, ani to nitivontponnan neai ani zhuz korta. 12 Tache dolle ujeache, ani tache toklek zaitim mukuttam asat. Tacher ek nanv boroilʼlem asa jem tachea xivai konnuch nokllo. 13 Tannem ek kopddo ghatla, zaka rogtacho dag lagla,* ani taka Devachem Utor oxem nanv dilam. 14 Toxench, sorgincheo fouzo dhovea ghoddeancher boson tachea fattlean ietaleo. Ani tannim dhove, nitoll, ani bore kopdde ghatlole. 15 Raxttrank marunk lagon tachea tonddantlean darechi ek lamb tolvar bhair sorta, ani to gonvllea bhaxen lokhnnachea danddean tancher odhikar choloitolo. Tea bhair, to Sorvxoktivont Devachea ragachea drakxam maddoupachea zagear drakxam maddoitolo. 16 Tachea kopddeancher, hoi, tachea zangddancher, ek nanv boroilʼlem asa, razancho Raza ani somiancho Somi.

17 Hanvem anik ek devdut polloilo zo suriachea modem ubo asa oso distalo. Tannem mottʼttea avazan mollba modem* uddttolea soglea suknneank oxem mhunnttlem: “Hanga ieiat, Devachea sanjechea vhoddlea jevnnak ektthaim zaiat. 18 Tumi razanchem, senapotinchem, bollixtt munxanchem, ghoddeanchem, ghoddesvaranchem mas khaunchem, toxench, svotontr munxanchem, chakranchem, lhan toxem vhodd, sogleanchem mas khaunchem mhunn tannem oxem mhunnttlem.”

19 Ranvotti zonvar, prithumeche raza, ani tancheo fouzo, ghoddeacher bosla tacher ani tachea foujecher zhuz korunk ektthaim zaleat tem hanvem polloilem. 20 Tea uprant ranvotti zonvarak ani tachea borabor khottea provadeak dhorlo. To vizmitam* korun, jea lokamnim apnnacheruch ranvotti zonvaracho xikʼko lavun ghetlolo ani tachea murtechi bhokti kortale tankam fosoitalo. Hea dogainkui solforan zolltta tea ujeachea tolleant jivech uddoile. 21 Ani urlolea lokank, ghoddeacher boslolo asa tachea tonddantlean bhair sorta tea lamb tolvarin marun uddoile. Ani soglea suknneamnim tanchem mas khalem.

20 Ani hanvem ek devdutak sorgar thaun denvta to polloilo. Tachea hatant patallachi* chavi asli ani ek vhoddli sanklli asli. 2 Tannem tea arak, mhunnche adlea sorpak, zaka nanv piddʼddear korpi Soitan mhunnttat, taka dhorlo ani 1,000 vorsam pasot bandun dovorlo. 3  Tim 1,000 vorsam purnn zai meren raxttrank fosoina zaunk tannem taka patallant uddoilo ani patall bond korun tacher xikʼko marlo. Tea uprant thoddo vell taka soddttole.

4 Ani hanvem xinvasonam polloilim, ani tancher boslole asle tankam neai korunk odhikar dilʼlo. Uprant, Jezu vixim govai dilʼli ani Deva vixim uloitale mhunn marun uddoilʼle* te, toxench ranvotti zonvarachi vo tachea murtechi bhokti korunk na ani aplea koplacher vo haticher xikʼko marun gheunk na te mhaka disle. Te jivont zale ani tannim Krista borabor 1,000 vorsam poriant raza mhunn raz kelem. 5 (Punn tim 1,000 vorsam purnn zai meren, meloleam modle urlole jivont zaunk na.) Hem poilem jivontponn. 6 Je poilea jivontponnache bhagidar asat te khuxal ani povitr. Tancher dusrea mornnacho kainch odhikar na. Te Devache ani Kristache iadnik zatole ani tachea sangata 1,000 vorsam raza mhunn raz kortole.

7 Tim 1,000 vorsam purnn zatanch, Soitanak bondkhonnintlo soddttole. 8 To prithumechea charui konxeamnim posorlolea raxttrank, mhunnche, Gogak ani Magogak fosounk ani tankam zhuza pasot ektthaim korunk voitolo. Tancho ankddo doriachea renve itlo asa. 9 Te akʼkhea prithumer posorle ani tannim povitr lokanchea* tombuk ani mogachea xarak gherav ghatlo. Punn sorga voilean ujeacho paus poddlo ani tea ujean tankam kabar korun uddoile. 10 Ani tankam fosoita tea Soitanak* ujeachea ani solforachea tolleant uddoilo, zoim ranvotti zonvarak ani khottea provadeak poilinch uddoilʼle. Ani tankam dis ani rat sodam-sodankal tollmollaitole.*

11 Ani hanvem ek vhoddlem dhovem xinvason ani tacher boslolo asa taka polloilo. Tachea mukhavoilean prithum ani mollob pollon gelem, ani tankam anik khoinch zago mellonk na. 12 Uprant moron gelʼle te lhan toxe vhodd, xinvasona mukhar ube asat tem hanvem polloilem, ani kovlle ugoddle. Punn anik ek kovllo ugoddlo, to jivitacho kovllo zaun asa. Tea kovlleamnim boroilolea vostunchea adaran meloleanchi, tanchea kamam pormonnem zhoddtti keli. 13 Ani dorian, tantunt melolim tankam bhair soddlim, toxench mornnan ani Fonddan* pasun tantunt melolim tankam bhair soddlim, ani tanchea dor ekleachea kamam pormonnem tanchi zhoddtti keli. 14 Mornnak ani Fonddak* ujeachea tolleant uddoilem. Hea ujeachea tolleacho orth, dusrem moronn. 15 Toxench, zanchem nanv jivitachea pustokant boroilʼlem mellonk na tankam-i ujeachea tolleant uddoilim.

21 Hanvem ek novem mollob ani ek novi prithum polloili, karonn adlem mollob ani adli prithum kabar zalʼli, ani doria-i uronk na. 2 Magir mhaka povitr xar, Novem Jeruzalem pasun dislem. Tem sorgar thaun Deva koddlean sokol denvtalem, ani ek vhokol aplea novrea pasot nhesta tea toren tem nheslolem. 3 Uprant xinvasonantlean ek mottʼtto avaz mhaka aikonk ailo. To mhunnttalo: “Polloiat! Devacho tombu munxam sangata asa. To tanchea sangata ravtolo ani te tache lok zatole ani Dev svota tanchea sangata astolo. 4 To tanchea dolleantlim soglim dukam pusun kaddttolo, hea fuddem moronn anik aschem na, dukh anik korchimnant vo roddnnem anik aschem na, ani koslech tras aschenant. Karonn adleo vostu nanch zaleo.”

5 Ani xinvasonacher boslolo asa tannem mhunnttlem: “Polloi! Hanv sogleo vostu noveo kortam.” Tannem fuddem mhunnttlem: “Oxem boroi, karonn him utram visvas dovorpa sarkim* ani khorim zaun asat.” 6 Uprant tannem mhaka mhunnttlem: “Him utram purnn zalim! Hanvuch Alfa ani Omega,* mhunnche, hanvuch survat ani xevott. Konnui tanelʼlo asa taka hanv jivitachea zhorichem udok funkott* ditolom. 7 Zo zoit melloita taka heo vostu daiz mhunn mellttoleo, ani hanv tacho Dev zatolom ani to mhozo put zatolo. 8 Punn jim konn bhivkurim asat, bhavarth dovornant, oxudʼdh ani vitt haddtta toslim kamam kortat, khun kortat, onoitik kuddicho sombond* dovortat, ghaddiponn kortat, murti-puza kortat, ani fott uloitat, tankam sogleank ujeant ani solforan zolltta tea tolleant uddoitole. Hacho orth, dusrem moronn.”

9 Jea sat devdutam lagim sat nimannea piddamnim bhorlolim sat aidonam aslim, tantuntlea eka devdutan ieun mhaka mhunnttlem: “Hanga ieo, hanv tuka vhokol dakhoitam, Menddreachi bail.” 10 Tednam to mhaka povitr xoktechea bollan eka vhoddlea ani unch dongrar gheun gelo. Ani tannem mhaka povitr xar Jeruzalem dakhoilem, jem sorgar thaun Deva koddlean sokol denvtalem. 11 Tem Devachea mhoimen bhorlolem aslem, ani tacho porzoll eka moladik hirea sarko aslo. Ani tem sarkem ar-par dista toslea jasper* fatra bhaxen chokchoktalem. 12 Tachi vonnott khub unch ani vhoddli asli. Taka 12 darvontte asle, ani tea darvonttea lagim 12 devdut asle. Tea darvontteancher Izraelachea 12 kullanchim nanvam kantoilʼlim aslim. 13 Udentek tin, utʼtorek tin, dokxinnek tin ani ostomek tin darvontte asle. 14 Tea xarachea vonnttichi buniad 12 fatrancher ubi asli, ani tea fatrancher Menddreachea 12 apostlanchim 12 nanvam boroilʼlim aslim.

15 Zo devdut mhojea lagim uloitalo, to tem xar, tache darvontte ani tacheo vonntteo mezunk ek map gheupachi bhangrachi boddi gheun aslo. 16 Tem xar chovkonni aslem ani tachi lambai tachea rundaie itlich asli. Tannem ti mezpachi boddi gheun tem xar mezlem, ani tem sumar 2,220 kilometr* aslem. Tachi lambai, rundai ani unchai ek-sarkich asli. 17 Tannem tea vonnttichem-i map ghetlem. Ti munxachea ani devdutachea mapa pormonnem, 144 hata itli* asli. 18 Tacheo vonntteo jasper fatran bandloleo. Tem xar sarkem ar-par dista toslea xudʼdh bhangarachem aslem. 19 Tea xarachea vonnttichi buniad soglea torechea moladik hireamnim nettoiloli: buniadicho poilo fator jasper, dusro safair, tisro kalsedoni, chovtho emerald, 20 panchvo sardoniks, sovo sardius, satvo krisolaitt, atthvo beril, nnovo topaz, dhavo krisofrez, ikravo haisint, ani baravo ametist* aslo. 21 Toxench, tache 12 darvontte 12 motianche asle, mhunnche, dor ek darvontto ek motiacho kelʼlo aslo. Ani tea xaracho mukhel rosto ar-par dista toslea, kovche sarko xudʼdh bhangaracho aslo.

22 Mhaka tea xarant mondir disonk na, karonn Sorvxoktivont Jehova* Dev ani Menddro, hech tachem mondir. 23 Tea xarak suria ani chondrimachea uzvaddachi goroz na, karonn tem Devachea mhoimen porzolltta, ani Menddro tacho divo zaun asa. 24 Soglim raxttram tachea uzvaddant choltolim, ani prithume voile raza thoim apli girestkai haddttole. 25 Tea xarache darvontte kednanch bond zaunchenant, karonn thoim fokot dis astolo, ani rat zaunchich na. 26 Ani te raxttranchi mhoima ani tancho man tea xarant gheun ietole. 27 Punn koslich mhelli vost, toxench, vitt haddtta toslem ani naddbudʼdhichem kam korta toslo konnuch tea xarant kednanch bhitor soronk xokchona. Fokot Menddreachea jivitachea kovlleant zanchim nanvam boroilʼlim asat tinch bhitor sortolim.

22 Ani tannem mhaka jivitachea udkachi nhoim dakhoili, ti sarki ar-par dista toxi asli ani chokchoktali, ani Devachea ani Menddreachea xinvasona thaun vhanvtali. 2 Hi nhoim tea xarachea mukhel rosteachea modem vhanvtali. Nhoim-chea donui vatten jivitachim zhaddam aslim, zantunt vorsak 12 pavtti, mhunnche, dor mhoineak follam zatalim. Tanchim panam raxttrantlea lokanchim duensam borim korunk boreak poddttalim.

3 Ani thoim porot kednanch koslech torecho xirap poddchona. Punn tea xarant Devachem ani Menddreachem xinvason astolem, ani Devache sevok tachi povitr seva kortole. 4 Te tachem tondd polloitole, ani tachem nanv tanchea koplancher boroilʼlem astolem. 5 Porot kednanch rat zaunchina, ani tankam diveachea vo suriachea uzvaddachi goroz poddchina, karonn Jehova* Dev tancher aplo uzvadd fankoitolo, ani te sodam-sodankal raza mhunn raz kortole.

6 Devdutan mhaka oxem mhunnttlem: “Him utram visvas* dovorpa sarkim ani khorim asat. Hoi, Jehova* Dev, zo provadeank prerit korta, tannem beginuch ghoddcheo asat teo vostu aplea sevokank dakhounk aplea devdutak dhaddlo. 7 Polloiat! Hanv rokddoch ietam. Hea kovlleant aslolim, bhasailʼlim utram palltta to khuxal.”

8 Hanv Juanv, heo vostu polloitalom ani aikotalom. Ani mhojem polloun ani aikon zalea uprant, zo devdut mhaka heo sogleo vostu dakhoitalo tachi bhokti korunk hanv tachea paim-am poddlom. 9 Punn tannem mhaka mhunnttlem: “Na, Na, oxem korinaka! Hanv tor fokot tujea sarko ani tujea bhavam sarko mhunnche, provadeam sarko ani hea kovlleant boroilʼlim utram pallttat tanchea sarko ek sevok zaun asam. Devachi bhokti kor.”

10 Tannem mhaka oxem-i mhunnttlem: “Hea kovlleant aslolim, bhasailʼlim utram xikʼko marun bond korinaka, karonn tharailʼlo vell lagim pavla. 11 Zo konn vaitt asa tannem vaitt kamam korit ravchem, zo konn bhurso asa tannem bhurxim kamam korit ravchem. Punn, zo konn nitivont asa tannem nitivont kamam korit ravchem ani zo konn povitr asa tannem povitr kamam korit ravchem.

12 “‘Polloiat! Hanv rokddoch ietam, ani mhojea lagim dor ekleak tachea kamam pormonnem diunk inam asa. 13 Hanvuch Alfa ani Omega,* mhunnche, poilo ani nimanno, survat ani xevott. 14 Apleak jivitachea zhaddachem foll khaunk odhikar mellcho ani tea xarachea darvontteantlean bhitor soronk mellchem mhunn, zannim aple kopdde dhuileat tim khuxal. 15 Punn sunnim,* ghaddiponn korpi, onoitik kuddicho sombond* dovorpi, khun korpi, murti-puza korpi, fott uloupi ani fottingponnacho mog korpi, tea xarachea bhair astolim.’

16 “‘Sobhanchem borem zaunchem mhunn, hanvem Jezun, hea vostum vixim tumkam govai diunk mhozo devdut dhaddlo. Hanv Davidachem mull ani sonsot toxench sokallchem chokchokta tem noketr.’”

17 Povitr xokti ani vhokol oxem mhunnot ravta: “Ieo!” Ani aikota tea dor eklean mhunnche: “Ieo!” ani tanelʼlo asa tea dor eklean ieunchem. Jea konnank jivitachem udok zai tannem tem funkott gheunchem.

18 “Hea kovlleant aslolim, bhasailʼlim utram aikota tea dor ekleak hanv govai ditam: Konnui hantunt kitem-i vaddoita zalear Dev tacher hea kovlleant boroilʼleo pidda haddttolo. 19 Konnui hea kovlleant aslolea bhasailʼlea utram modlem kitem-i kaddtta zalear, Dev taka hea kovlleant boroilʼleo boreo vostu diunchona, mhunnche, jivitachea zhaddachem foll khaunk, ani tea povitr xarant bhitor soronk diunchona.

20 “Zo hea vostunchi govai dita to mhunntta, ‘Hoi, hanv rokddoch ietam.’”

“Amen! Somi Jezu ieo.”

21 Somi Jezuchi favo nasloli doia Devachea lokancher* asom.