Sonchalon Monddolla Thaun Chitt

Mogall Porgottnnara:

Chintat, tumi Jezuchea apostlam modlim eklim asat ani Zoitunachea Dongrar ubim asat. Jezu sorgar voicho asa, punn tachea poilim to tumkam oxem sangta: “Tumcher povitr xokti ietoli tednam tumkam boll mellttolem ani Jeruzalemant, ani akʼkhea Judeiant ani Samariant, toxench prithumechea sogleant poisulʼlea vattarant pasun tumi mhojea vixim govai ditole.” (Itihas 1:8) Hem aikolea uprant tumkam koxem distolem?

Hea vellar, Jezun sanglolem korop khub kotthin oxem ghoddie tumkam disot. Tumi ghoddie chintit, ‘Ami fokot thoddinch zannam asat, tor “sogleant poisulʼlea vattarant” ami porgottnni koxi korunk pavtolim?’ Toxench, tea vellar Jezun sanglolim him utram pasun tumkam ugddas ieunk xoktat. Tannem mhunnttlem: “Ek sevok aplea dhonia poros vhodd nhoi. Tannim mhaka dhumallo dila zalear, te tumkam-i dhumallo ditole; tannim mhojem utor pallʼllam zalear, te tumchem-i utor pallttole. Punn mhojea nanva pasot te tumchea add hem soglem kortole, karonn mhaka dhaddla Taka te vollkhonant.” (Juanv 15:20, 21) Tor tumi ghoddie chintunk puro, ‘Virodh ani dhumallo aslear, ami bore bhaxen koxim porgottunk pavtolim?’

Ami Jehovachim Sakxi zalʼlean amkam-i osle prosn ieunk puro. Karonn amkam “sogleant poisulʼlea vattarant” vochon “soglea raxttrachea lokank” bore toren porgottnni korunk sanglam. (Mt. 28:19, 20) Tor itlo dhumallo astana ami hem soglem koxem korunk pavtolim?

Dhormdutancho Itihas, hea Bible-antlea pustokantlean, Jehovan apostlank ani toxench tea kalla voilea her Kristanvank porgottnni korunk ojapanche ritin koxi modot keli tem amkam kollon ieta. Tor, tea kalla voilea Kristanvank kitem ghoddlem ani porgottnni itli vegan cholta tem polloun tankam koxem bhoglem, tem zannam zaunk hem prokaxon amkam modot kortolem. Toxench, poilea xekddeantlea Devachea sevokam modem ani aiz amchea modem kitem ek-sarkem asa tem zannam zaun tumi ojap zatolim. Zoxem, tannim porgottnnechem kam koxem kelʼlem ani tanchi manddavoll koxi asli, toxench aiz pasun ami kortat. Ani hea vixim bariksannen chintlolean, Jehova tache songottnnek margdorxon di-it asa mhunn tumchi khatri vaddttoli.

Tor Itihas pustokacher bariksannen obheas korit ravat. Oxem kelʼlean, Jehova tumkam porgottnnechea kamant modot kortolo ani dhumallo sosunk modot kortolo mhunn tumchi khatri ghott zatoli. Hich axa ami dovortat ani tumchea pasot magnnem kortat. Hea udexim tumi lokank, Devachea Rajea vixim ‘bore bhaxen sakx diunk’ ani soddvonn zoddunk modot korunk pavtolim.—Itihas 28:23; 1 Tim. 4:16.