19
Jezu Akʼkhea Sonvsaracher Porinam Zaupachem Bhakit Korta
Jezu aplea raz podven iennachi ani hea kallachea xevottachi khunna sangta
OLIVET dongrar thaun Jerusalem ani tachea mondiracho sobit dobazo distalo, thoim Jezuche char dhormdut ekvodde ieun tachea sangneam vixim vinchartat. Jezun nikttench sanglelem ki Jerusaleantlea mondiracho nas kortele. Hache adim “kallache sompadnne” vixim tannem tankam sanglolem. (Matev 13:40, 49) Atam dhormdutanim vincharlem “Hem kedna ghoddtolem tem, ani Tujea ienneachi ani kallachea xevottachi khunna konn ti, amkam sang.”—Matev 24:3.
Zabab diun Jezun Jerusalemachea nisonttonna adim kitem ghoddtolem tem sanglem. Punn tachea utrank aninkui khol orth aslo. Fuddarak Jezuchem bhakit akʼkhea sonvsaracher mottea promanan ghoddon ieunchem aslelem. Jezuchea bhakita pormonnem heo ghoddneo ani sonvsarachi poristhiti mellun ek khunna zatoli. Heo khunna prithumivelea lokak kolloita ki Jezuchem raz sorgar suru zalem. Dusrea utranim, Jehovah Devan Jezuk adim thaun bhasailʼlea Mesias razvottkecho raza kela mhonn hi khunna kolloita. He khunna vorvim sozmota ki hi razvottki sonvsarachem khotteponn kaddun monxakullak khori xhanti haddtoli. Jezuchem bhakit kolloita ki atam chalu aslelea pornea kallacheo dhormik, razkarannik ani somajik vyavastheche xevott zaunche dis lagim pavle ani ek novi vyavastha suru zaunchi asa.
Sorgar raza astana, hea sonvsaracher kitem ghoddtelem tem Jezun sanglem ki raxttr raxttracher uprastolim, bhuk poddteli, bhuimkamp zateli ani duvensam vaddtelim. Khotteponn-ui vaddtelem. Jezuche khore xis Devache razvottkechem xubhvortoman akʼkhea sonvsarak porgott kortele. Hea sogllea vostuncho xevott kednanch ghoddonk na toslea ek ‘vhodd sontapant’ zatolo.—Matev 24:21.
Ho sontap lagim asa mhonn Jezuchea pattlavdarank koxem gomtolem? Jezun mhunnttlem “Anjirachea zhaddachi vopar somzun gheiat.” (Matev 24:32) Anjirachea zhaddak kombrio futtʼtat tedna gim lagim pavla mhonn kollon ieta. Teach porim heo soglleo ghoddneo ekach kallar ghoddtat tedna xevott lagim asa mhonn kollon ietolem. To vhodd sontap khoimchea disak ani ghoddiek suru zatolo ti khobor ekleach Bapa bogor ani konnuch noko. Heach pasot Jezun aplea xisank vinoti keli “Chotrai dhorat, tor vell kedna pavtolo to tumi nokllot.”—Marku 13:33.
—Matev avesvor 24 ani 25; Marku avesvor 13; Luk avesvor 21, hacher adarlelem asa.