Bhavart, Sobhav ani Mog Hanchea Vixim Budh

JAKOB ani Judas Jezuche soute-bhav asle. Pedru ani Juanv Jezuchea 12 xisam modle asle. Hea chougainim Kristanv Grik Xastrantlim sogllim mellon sat potram boroilim. Dor eka potracher boroinaranchem nanv asa. Hea potrantli Dev prerit budh, Jehovahk promannik ravonk ani Dev razvottkecher lokx dovrunk Kristanvank mozot korta.

Bhavart kortubanim dakoiat. Bhavart asa mhonn sanglearuch puro nhoi. Khoro bhavart korneanim dison ieta. Jakob boroita, ‘khoreponnim, bhavart kornniam vinnem melʼlo zata.’ (Jakob 2:26) Bhavartan cholʼlear koxtt ietat tedna sonsnikai utponn korunk dhir mellta. Zoit mellonk Kristanvanim Deva lagim zannvai magchi ani Dev ti ditolo mhonn khatri dovrunk zai. Dhir dovorlear Devachi maniatai mellta. (Jakob 1:2-6, 12) Bhoktanim bhavartan promannikponn samballear, Jehovah Dev magnneak zap ditolo. “Jitlim tumi Devak lagim sortat,” Jakob mhunntta, “titlo Dev tumkam lagim sortolo.”—Jakob 4:8.

Kristanvamcho bhavart itlo mozbut asunk zai ki tallnneo ani vaitt jivitacheo chali pois korunk xoktolo. Judasachea kallar vaxtt poristiti vaddot vetali dekhun tannem Kristanv bhavank vinoti keli ki “bhavartha pasot tumi dhiran zhuzchem.”—Judas 3.

Vagnnuk nitoll dovorat. Jehovah axeta ki tache bhokt povitr asche, toxem mhunnttlear soglle toren nitoll asche. Pedru boroita: “soglle tumche chalint povitr zaiat, oxench Povitr Pustok sangta: ‘Hanv [Jehovah] povitr dekhun tumi-i povitr zaiat’.” (I Pedru 1:15,16) Kristanvank dekh gheunk hem ek borem udharon asa. Pedru sangta, “Kristan tumche khatir koxtt sosle, Aplea panvlamnim tumi cholunk tumkam Tannem dekh dovorlea.” (I Pedru 2:21) Devache dorje samballunk Kristanvank koxtt ietat punn te aplem “ontoskornn guneanva-mekllem” samballtat. (I Pedru 3:16, 17) Devachea monxubechea Disachi ani bhasailʼlea novea prithumechi vatt polloit astana Pedru Kristanvanchem jivit patkavinn ani bhoktivont zavunk vinoti korta karann ‘thoi promannikponn vostelem.’—II Pedru 3:11-13.

Mog dakoiat. “Dev mhollear moguch,” oxem Juanv boroita. Dhormdut Juanv dakoita ki Devan ‘amchim patkam nattak korunk boli diunk’ Jezuk dhaddun vhodd mog dakoilo. Te bodlek Kristanvanim kitem korunk zai? Juanvan sozmonni dili “mhojea pritichea bhurgeamno Devan zor amcho itlo mog kelo, ami-i eka-mekacho mog korunk zai.” (I Juanv 4:8-11) Oslo mog dakounchi ek rit mhollear bhav-bhoinam thaim soireponnan vagchem.—III Juanv 5-8.

Jehovah Devache bhokt tacho mog kortat mhonn koxe dakoitele? Juanvan tacho zabab dilo: “Devacho mog korop mhonnge Tacheo adnia pallop; ani Tacheo adnia zhodd nhoi.” (I Juanv 5:3; II Juanv 6) Je konn Devacheo adnia palltat tankam khatri asa ki Dev tancho mog korit ravtolo ani tankam ‘sasnnik jivitacho’ axirvad ditolo.—Judas 21.

​—Jacob; I Pedru; II Pedru; I Juanv; II Juanv; III Juanv; Judas hacher adarlelem asa.