Tambddea Doria Lagim Vizmit

Izraelitkaram, Ejiptta thaun bhair sorleant mhunn Faraohan aikolem tednam taka dislem ki tannem tankam dhaddun chuk keli. Tannem aplea soinikank hukum dilo: ‘Zhuzachim soglim rotham toiar korat! Ami tanchea fattik lagom-ia. Ami tankam vochonk diunk zainaslem.’ Faraoh ani tache munis Izraelitkaranchea fattik lagle.

Jehova aplea lokank vatt dakhoitalo. Tannim khoinche vatten vochonk zai, tem dakhounk to tankam disachea vellar ek kup ani ratchea vellar ujeacho khambo dakhoita. To tankam tambddea doria-xim vhorta ani tim thoim tanche tombu ghalun ravonk lagtat.

Uprant Izraelitkaramnim polloilem ki Faraoh ani tachi soin tanchea fattik lagleat mhunn. Tanchea fattlean Ejipttachi soin asli ani fuddleant doria aslo. Tankam dislem atam ami vanchʼchinant. Tim khub bhielim ani tannim Moizesak sanglem: ‘Atam ami mortolim! Tunvem amkam Ejipttantuch soddunk zai aslem.’ Punn Moizesan sanglem: ‘Bhienakat. Jehova tumkam koso salvar korta tem polloiat.’ Moizesak Jehovacher kitlo bhavarth aslo nhoi!

Jehovan, Izraelitkarank tanche tombu kaddunk laile. Tea ratik, Jehovan, Izraelitkaranchem fuddem aslolem kup, tanchea anik Ejipttkaranchea modem dovorlem. Ejipttkaranchea vatten kallokh aslo, punn Izraelitkaranchea vatten uzvadd poddttalo.

Jehovan, Moizesak tacho hat doria voir ubarunk lailo. Uprant, Jehovan akʼkhi rat bhorpur varo dhaddun doria doxim kelo ani udok vontteo koxeo donui vatten ube ravlem, ani modlean Izraelitkarank vochonk vatt toiar zali. Lakʼkhamnim Izraelitkar doria modlean sukhe vatten cholon poltoddi pavtat.

Teach vatten Faraohchi soin, Izraelitkaranchea fattlean voita. Jehova, Faraohchi soinikank gondhollant ghalta. Tanchea rothanchim rodham bhair soronk lagtat. Soinik oxem mhunnon bob martat: ‘Jehova tanchea pasot zhuzta! Ami hanga sorlean bhair sorom-ia.’

Jehovan Moizesak sanglem: ‘Tuzo hat doria voir ubar.’ Moizesan toxem kelem tednam, doriachim udkam jim vontti bhaxen ubim aslim tim kosllon Ejipttkarancher poddttat. Ani Faraoh ani tache sogle munis buddon mortat. Eklo poriant salvar zaina.

Doriache dusre vatten, Izraelit lok Jehovak vakhannʼnnunk ek git gaunk lagtat: ‘Jehovachi kirti gaiat, to mhoimen bhorla. Ghoddeank ani ghoddesvorank tannem doriant xevttile.’ Lok gaitale tednam, bailo nachonk laglim ani aplim tambourine vazounk laglim. Atam tanchi khorench suttka zalea mhunn sogle lok khub khuxal zale.