Dhirvont Ani Visvaxi Jonathan

Raza Saulucho vhoddlo put, Jonathan ek dhirvont zhuzari aslo. Davidan Jonathana vixim mhunnttlem ki to ghonni poros suddsuddit ani xinva poros bollixtt aslo. Ek dis, Filistevkaranche 20 soinik dongrar ube asat te Jonathan polloita. To aplim hotʼtearam vhortolea munxak mhunntta: ‘Jehova amkam khunna dita zalearuch ami tancher holʼlo korum-ia. Zor Filistevkar voir ieiat mhunn sangtat zalear ti ek khunna astoli ki ami tancher holʼlo korpacho.’ Filistevkaramnim vhoddlean mhunnttlem: ‘Voir ieun amche koddem zhuz korat.’ Tednam te dogui dongrar choddon tea soinikank haroitat.

Jonathan Saulucho vhoddlo put zalolean, to Izraelacho fuddlo raza zauncho aslo. Punn Jehovan Davidak fuddlo raza zaunk vinchun kaddla mhunn taka khobor asli. Torui, to Davidachi nattkai korina. Jonathan ani David bore ixtt zatat. Te eka-mekak sangat ditole ani rakhtole mhunn promise kortat. Jonathan aplo kott, tolvar, dhonu ani bendacho pottʼtto Davidak dita. Oxem toren, David aplo ixtt mhunn Jonathan dakhoun dita.

David Saulu thaun pollon voitalo tednam, Jonathan taka melltta ani sangta: ‘Bhienaka, dhir ghe. Fuddlo raza zaunk Jehovan tuka vinchun kaddla. Ani mhojea bapaikui hi khobor asa.’ Tor tuka Jonathana sarko ek boro ixtt zai kai?

Jonathan zaite pavtti aplo jiv dhokeant ghalun Davidak modot korta. Aplo bapui Davidak jivexim marunk sodhta mhunn Jonathanak khobor asli. Dekhun to aplea bapaik sangta: ‘Davidak jivexim marun patok korinaka. Karonn tannem kainch vaitt korunk na.’ Hem aikon Saulu Jonathanacher khub ragar zata. Thoddea tempa uprant, eka zhuzant Saulu ani Jonathan, dogui mortat.

Jonathan melea uprant, David Jonathanachea putak, Meribbaal-ak sodhun kaddtta. To mellttoch David taka sangta: ‘Tuzo bapui mhozo boro ixtt aslo dekhun, jivitbhor hanv tuzo samball kortolom. Tum mhojea mezar jevtolo ani mhojea borabor raj-mahalant ravtolo.’ David aplo ixtt Jonathanak kednanch visronk na.