Jehovak Ek Mondir

Solomon Izraelacho raza zalea uprant, Jehovan taka vicharlem: ‘Hanv tuka kitem dium?’ Tednam Solomonan sanglem: ‘Hanv fokot ek tornnattom, kitem korchem tem hanv nokllom. Dekhun tujea lokanchi kallji gheunk, please mhaka zannvai di.’ Hem aikon Jehovan sanglem: ‘Tunvem zannvai magli dekhun prithumer sogleam poros chodd zannvai hanv tuka ditolom. Ani mhoji adnea pallit ravlear tum zaitim vorsam jietolo.’

Solomon mondir bandunk suru korta. To hea kamant boreantlem-borem bhangar, chandi, lakudd ani fator vapurta. Hem bandkam korunk hozaramnim huxar dadle ani bailo vavr kortat. Sat vorsam uprant tem mondir bandun sompta ani Jehovak bhettounk toiar asta. Tea mondirant ek vedi asli, zacher bolidanam dovorlolim aslim. Solomon dimi ghalun vedi mukhar oxem magnnem korta: ‘Jehova, hem mondir tujea pasot titlem vhodd na ani titlem sobitui na, punn toriastana amchi bhokti ani amchim magnnim svikar kor.’ Mondira vixim ani Solomonachea magnnea vixim Jehovak koxem dislem? Solomonachem magnnem somptanch mollba thaun uzo denvta ani vedir aslolim bolidanam hulpaun uddoita. Hea toren Jehovan dakhoun dilem ki tem mondir taka manvolam mhunn. Hem polloun Izraelitkar khub khuxal zatat.

Raza Solomon zannvaien bhorlolo mhunn akʼkhea Izraelant ani poisulʼlea desantlea lokank khobor asli. Lok tancheo oddchonneo suttaveo korunk tache lagim ietale. Ek pavtt, Sheba desachi ranni, Solomonak kitli zannvai asa tem pollounk ieta. Ti Solomonak zaite kotthin prosn vicharta ani tache zobab aikota tednam, ti mhunntta: ‘Lok tujea vixim sangtalim tacher hanvem visvas dovrunk na, punn tannim tujea vixim jitlem sanglolem, tachea poros chodd zannvai tuka asa mhunn atam hanv zannam zali. Tuzo Dev Jehovan tujer besanv ghatlam.’ Izrael raxttrant soglem borem choltalem ani lok khuxal asle. Punn rokddich poristhiti bodolpachi asli.