Esther Aplea Lokank Salvar Korta

Esther ek Judev cheddum aslem, jem Persiachea Shushan xarant ravtalem. Zaitim vorsam poilim, tache familik Nebukadnezaran Jeruzalema thaun koidi korun haddloli. Taka ek bapul-bhav aslo. Tachem nanv Mordekai aslem. To Persiechea raza Ahasuerusacho ek sevok aslo, ani tannench Estherak vaddoilolem.

Raza Ahasuerusak ek novi ranni zai asli. Dekhun tache sevok desantlea soglea sobit cheddvank raza mukhar haddttat. Esther tanchea modlem ek aslem. Thoim ailolea soglea cheddvam modem, Estherak apli ranni zaunk raza vinchun kaddtta. Mordecai Estherak sangta ki tem ek Judev mhunn tannem konnakuch sangchem nhoi.

Thoinchea odhikareancho ek mukheli aslo. Tache nanv Haman aslem ani to khub gorvixtt aslo. Sogleamnim taka paim-am poddon man dilolo taka zai aslo. Punn Mordekai toxem korinaslo. Dekhun Hamanak itlo rag ieta ki to Mordekaiak jivexim marunk sodhta. Ani jednam taka kollon ieta ki Mordekai ek Judev mhunn, to desantlea soglea Judevank jivexim marunk manddnni korta. To razak sangta: ‘Judev lokancho amkam dhoko asa. Dekhun tea soglea lokank jivexim marunk zai.’ Ahasuerus taka sangta: ‘Tuka jem sarkem dista toxem tum kor.’ Toxench, to Hamanak ek kaido korunk odhikar dita. Tor Haman ek kaido korta ki lokamnim Adar mhoineachea, 13-avea disa, soglea Judevank jivexim marchem. Hem soglem Jehova polloitalo.

Estherak, hea kaidea vixim kainch khobor nasli. Dekhun Mordekai taka hea kaideachi kopi dhaddtta ani tika sangta: ‘Voch ani raza lagim uloi.’ Esther taka sangta: ‘Razan apoilea xivai konnui tachea lagim voita zalear taka moronn favo zata. Razan mhaka 30 dis meren apounk na! Tori hanv voitolem. Raza mhaka polloun aplo bhangaracho danddo fuddem korta zalear hanv jivem urtolem, na zalear hanv mortolem.’

Esther raza mukhar voita. Raza tika polloita tednam, to aplo bhangaracho danddo ubarun tika vicharta: ‘Esther tuka kitem zai?’ Esther taka sangta: ‘Tuka ani Hamanak hanv jevnnak apounk sodhtam.’ Raza ani Haman jevnnak ietat. Tea jevnna vellar, ti dusrea disak porot tankam jevnnak apoita. Tea dusrea jevnna vellar, raza tika vicharta: ‘Tuka kitem zai?’ Ti taka sangta: ‘Konn tori mhaka ani mhojea lokank jivexim marunk sodhta. Please, amkam salvar kor.’ Tednam raza vicharta: ‘Konn to, zo tuzo jiv kaddunk sodhta?’ Esther sangta: ‘Hoch to noxtto munis Haman.’ Hem aikon raza Ahasuerus itlo ragar zata ki teach vellar Hamanak jivexim marunk to hukum dita.

Punn Hamanan kelʼlo kaido konnacheanuch bodlunk zainaslo. Raza pasun toxem korunk xokonaslo. Tor, raza Hamanche suvater, Mordekaiak odhikareancho mukheli mhunn nemta ani ek novo kaido korunk taka odhikar dita. Mordekaian ek kaido kelo, jea udexim soglea Judevank aplo jiv salvar korunk mellʼllo. Adar mhoineachea, 13-avea disa Judevamnim tanchea dusmanacher zoit vhelem. Hea disa thaun dor vorsak tim apleak mellolea zoitacho ugddas korunk porob monounk lagli.