Jehova Jezuk Rakhta

Izrael raxttrachea udenti vatten ek des aslo. Thoinche lok noketram apleak vatt dakhounk xoktat mhunn mantale. Eke ratik, mollbar kitem tori noketra bhaxen zhogzhogta ani fuddem-fuddem voita mhunn thoinche thodde munis polloitat. Ani te tachea fattlean vochonk lagtat. Tem “noketr” tankam Jeruzalemant pavoita. Tednam te lokank vichartat: ‘Vhodd zaun Judevancho raza zauncho asa, to bhurgo khoim asa? Ami taka nomoskar korunk aileat.’

Jeruzalemacho raza Herod, ek novo raza zolmola mhunn aikotanch taka khub usko zaunk lagta. To mukhel iadnikank apoun tankam vicharta: ‘Ho raza khoim zolmoncho aslo?’ Tednam te taka sangtat: ‘To Bethlehemant zolmotolo mhunn provadeamnim sanglolem.’ Tor Herod Udenti thaun ailolea munxank apoun tankam sangta: ‘Bethlehemant vochat ani to bhurgo khoim asa to sodhat. Tumkam to mellttoch mhaka-i ieun sangat. Karonn hanvui taka nomoskar korunk sodhtam.’ Punn hi ek fott asli.

Tem “noketr” fuddem vochonk lagta. Udente thaun ailole munis tea noketrachea fattlean vochon Bethlehemant pavtat. Tem “noketr” eka ghora voir vochon ravta ani te munis tea ghora bhitor voitat. Thoim te Jezuk, tachi avoi Marie sangata polloitat. Te tea bhurgeak nomoskar kortat ani taka bhangar, dhovo dhump ani gondhros gift mhunn ditat. Jezu khoim asa tem sodhunk khorench Jehovan tea munxank dhaddlole kai? Na.

Tea ratik, Jehova Juzek sopnant oxem sangta: ‘Herod Jezucho jiv kaddunk sodhta. Dekhun tuje bailek ani bhurgeak gheun Ejipttak pollon voch ani hanv tuka porot apoi meren tum thoinch rav.’ Rokddoch Juze aple familik gheun Ejipttant voita.

Jehova Udenti thaun ailolea munxank, Heroda lagim porot vochonaka mhunn sangta. Te munis aplea lagim porot ieunche nant mhunn Herodak kollʼllem tednam to ekdom ragan bhorta. Jezu khoim asa tem taka kollona dekhun, to Bethlehemant aslolea Jezuchea piraiechea soglea cheddea bhurgeank jivexim marunk hukum dita. Punn Jezu khub pois Ejipttant aslo dekhun to salvar zata.

Thoddea tempan, Herod morta. Tednam Jehova Juzek sangta: ‘Atam Izraelant porot vochonk tumkam kosloch dhoko na, tor tumi porot ieiat.’ Dekhun Mariek ani Jezuk gheun Juze Izraelant porot ieta ani tim Nazaret xarant aplea ghorant ravonk lagtat.